1-2. Chifukwa n’ni ninafwanyeya va Iwumbuwelelo chaka iliyetene?

 CHAKA 2000 diviriledo, Yesu oopeleka moywaye chifukwa ya iyo, vyevyo vyapelekile mwayi woi nize nifwanye moyo wo-omala. Ma-iywaye omari-a Yesu oolamula o-arelaye ira kaumbuwelenga chikondaye voira mwambo wo-orucha vo-indi-eda chito pau na vinyu. — 1 Akor. 11:23-26.

² Ninovwela lamulo la Yesuli chifukwa yoi ninomuwomeluwana vinjinji. (Yoh. 14:15) Chaka iliyetene va nyengo ya Iwumbuwelelo, ninotonyi-eda yamikela vyevyo aniirele liye vopepela koma teto ganizela vinjinji tapulela wo khwa waye. Ninosangalala teto panga vinjinji va chito yolaleela nolimbikisa athu anjinji ira kaze kakale na iyo va mwambo wavadelola. Teto ninokala osimikiza ira kanilole iliyetene nilepeli-a fwanyeya va Iwumbuwelelo.

3. Kodi ninatapanya n’ni mukhanila?

³ Mukhanila ninotapanya ndila taaru dedo athu a Yehova kakan’leathu katonyi-edelanga tindi ira kaire mwambo oumbuwela khwa wa Yesu, dedo dili (1) ambeela teto panga mwambola mundila eneyo Yesu agarati-ile liye, (2) itanela amo-i u Iwumbuwelelo koma teto (3) panga mwambola masiki vathawi eneyo valiathu vyorucha vyoinjiva.

4. Kodi mba makundo a imbarimbari aavi anayo ninaavwechecha iyo va Iwumbuwelelo chaka iliyetene, n’nga chifukwa n’ni kaninafuneela awonanga movevuwa? (Luka 22:19, 20)

⁴ Chaka iliyetene va Iwumbuwelelo, ninovuruwana khani ya m’Baibulo eneyo inasomeda movweya pama vyofuka vingasi vyene. Ninofunjeda chifukwiwa athu kanafuneela dipo koma teto mwemo linairi-elaathu ira machimo a athu anjinji kakhululukiwe. Ninoumbuchiwa vyevyo pau na vinyu vinaimelelaathu koma teto anayo kanafuneela dja nong’wa. (Welengani Luka 22:19, 20.) Koma teto ninoganizela madaliso anayo athu anayo kan’na idedi-edo yoza kala vailambwela kanazeathu kafwanye. (Yes. 35:5, 6; 65:17, 21-23) Kanionenga movevuwa makundo a imbarimbari anala. Athu mabiliyoni katinaiziwa vyevyi teto katinavwechecha ira sembe ya Yesu chi yofuneya vinjinji. Aliwa katinaira teto mwambola n’nga mwemo liye mwauwambeeli-ede liye. Chifukwa n’ni vili eeno?

5. Anamarumiwa anjinji kangatatiile, kodi athu kaira avi mwambo oumbuwela khwa wa Yesu?

⁵ Vangavirile thawi yoyeva kumela vevo anamarumiwa anjinji a Yesu katatiileathu, Akiristu onama koovolowa mupingo. (Mat. 13:24-27, 37-39) Aliwa koowonga “vyongo vyonama ira kaperuche ofunjeda kaa-arelenga.” (Vyo. 20:29, 30) Imo-i mwa “vyongo vyonama” vyevyo vira wa thawi kaambeen’leathu funji-a, yali yoi Yesu kaapelekile thuthu laye “ndila imo-i ba-i ira atukule machimo a athu anjinji,” n’nga mwemo Baibulo linaongelaathu, koma ira sembaye inafuneela pelekiwanga moweli-edaweli-eda. (Aheb. 9:27, 28) Malambwano athu anjinji oona murima kanororomela vyofunji-a vyonamavi. Aliwa kanosonkana m’machalichi vakwikwivakwikwi thawi dimo-i teto dambo lililetene ira kaire mwambo onoyo kanauromolaathu ira “Sembe ya Misa.” b Vipembezo vimo-i vinoira teto mwambo oumbuwela khwa wa Yesu mwa vo na vo koma athu anjinji muvipembezovyo katinaiziwa tapulela wa sembe ya Yesu. Eeno amo-i podi dabwa ira, ‘Kodi khwa wa Yesu unokoza pangi-a ira machimwanga kakhululukiwe?’ Chifukwa n’ni kanafuka yofuka enela? Thawi dimo-i aliwa kanakalecha ira koosokoneziwa na athu anayo kanakaikela ira sembe ya Yesu inokoza pangi-a ira machimo kakhululukiwe. Ndiye kodi o-arela enieni a Yesu kakami-ile avi athu amo-i vakhani enela?

6. Vofiya mu 1872, kodi gulu ling’onong’ono la Ofunjeda Baibulo lavwechechile n’ni?

⁶ Yaumaambeelelo wa chaka dam’ma 1800, gulu ling’onong’ono la Ofunjeda Baibulo losogoleliwa na Charles Taze Russell loowambeela funjeda Malemba mosamala vinjinji. Aliwa koofuna iziwa vyoona viwa vyevyo sembe ya Yesu inatapulelaathu koma teto mwemo athu kanafuneelaathu umbuwelela khwa waye. Vofiya mu 1872, aliwa koovwechecha vyevyo Baibulo linawongaathu vyoi Yesu oopeleka dipo loombola athu etene. Koma aliwa katakede vigaratina ekiwa vyevyo kaiziwaathuvi. M’malo mwiwa, koowandela teto amo-i vo-indi-eda chito mabuku, manyuzipepala koma teto magazini. Thawi eneyo, vo-arela Akiristu owambeelela koowambeela sonkhana ndila imo-i vachaka ira kairenga Iwumbuwelelo.

7. Kodi vyevyo Ofunjeda Baibulo owambeelela kasaen’leathu vinanikami-eda avi?

⁷ Vyevyo Akiristu oona murimala kasaelileathu chaka dinjinji diviriledo, vinonikami-eda  teto malambwano. Moi avi? Mokami-iwa na Yehova ninovwechecha imbarimbari yokuza sembe ya Yesu koma teto vyevyo sembeyo inakwakwaneli-edaathu. (1 Yoh. 2:1, 2) Nifunjeda teto vyevyo Baibulo linasambaulaathu vyokuza idedi-edo eneyo athu anayo kanasangalasa Mulungu kan’naathu, ira amo-i kanaza kakaana moyo o-okhwa udimu koma teto athu mamiliyoni anjinji kanoza kakayena moyo o-omala vailambo yavati. Ninokala va usamwali olimba na Yehova naganizelanga chikondi eneyo unanitonyi-eda liye koma teto mwemo uliwetene vaeka munapindulela liye chifukwa ya sembe ya Yesu. (1 Pe. 3:18; 1 Yoh. 4: 9) Eeno mofwanafwana na abali-u ororomeleya awale, ninoitanela amo-i ira kaze kakale na iyo vamwambo wa Iwumbuwelelo onoyo unaireya mofwanafwana na mwemo Yesu airele liye.

8. Kodi athu a Yehova kakan’le kairanga vyoi avi ira kaitanele athu u Iwumbuwelelo? (Onani ithuzithuzi.)

⁸ Wachaka dinjinji athu a Yehova kookala kaitanelanga amo-i u Iwumbuwelelo. Mu chaka ya 1881, abali na arongola u United States koovepiwa ira kasonkane munyumba ya m’bali u Allegheny, Pennsylvania ira kaire mwambo wavadelola. Muchaka do-arela, mipingo doowandeliwa ira pingo uliwetene unokoza panga Iwumbuwelelo vaekiwa. Mu Marichi 1940, ofalisa koowandeliwa ira kanokoza itanela uliwetene onoyo utonyi-edile chidwi mu gawo liwa. Wathawi yowambeela mu 1960, Beteli yootumiza umipingo mapepala oitanela athu u Iwumbuwelelo. Keda kumela thawi eneyo, mabiliyoni a mapepalala kookala kagaweliwanga. Chifukwa n’ni ninaira tindi eeno voitanela athu umwambola?

9-10. Kodi ngu mbaani anayo kanapindula naira tindi voitanela amo-i u Iwumbuwelelo? (Yohani 3:16)

 ⁹ Chifukwa imo-i eneyo inaniiri-a itanela amo-i u Iwumbuwelelo, choi ninofuna kaze kafunjede vyevyo Yehova na Yesu kaniireleathu. (Welengani Yohani 3:16.) Ninodedi-edela ira vyevyo kanazeathu kaone koma teto vwa vamwambola vinoza vialimbi-e ira kafune iziwa vinjinji koma teto kakale atumiki a Yehova. Koma viikala teto amo-i anayo kanapindula.

¹⁰ Ninoitanela teto athu anayo ka-iile tumikela Yehova. Ninoira vyevyi vofuna aumbucha ira Mulungu unoawomeliwanave. Anjinji kanoza naaitana teto ninosangalala vinjinji aona. Fwanyeya vamwambola unowaumbucha mwemo kasangalalelaathu vevo katumikelaathu Yehova. Kaganizelani isazo ya Monica. c Liye ookami-iwa ira aambeele teto kala wofalisa vathawi ya mulili wa COVID-19. Angafwanyeile va Iwumbuwelelo mu 2021, awongile ira: “Iwumbuwelelo enela chavadela vinjinji wa miyo. Wathawi yowambeela vanduli va chaka 20 ndikwakwani-a laleela wa athu koma teto aitanela umwambola. Ndooira tindi va chito yoitanela athwila, chifukwa ndinoyamikela vinjinji vyevyo Yehova na Yesu kandiireleathu.” (Sal. 103:1-4) Kaya athu kanoza u Iwumbuwelelo kapena naari, ninowaitanelave mwatindi voiziwa ira Yehova unoyamikela tindi li-ulo.

11. Kodi Yehova udalisile avi tindi lelo ninaira iyo voitanela athu u Iwumbuwelelo? (Hagayi 2:7)

¹¹ Yehova udalisa vinjinji tindi li-u voitanela athu u Iwumbuwelelo. Mu 2021 masiki ira kanawandile panga vinjinji chifukwa ya mulili wa COVID-19, athu anayo kafwanyeile vamwambola kali okwakwana 21 367 603. Chiwelengelo enela kuwilikiza maulendo ambin’li na hafu chiwelengelo ya a Mboni da Yehova vailambo yetene. Pivyoona ira Yehova kanakeda ira chidwi noinjiva wa athu anayo kafwanyeile vamwambola. Koma unoira chidwi na muthu uliwetene vaekave. (Luk. 15:7; 1 Tim. 2:​3, 4) Kaninakaikela ira Yehova unonikami-a fwanya athu a murima wapama zela mu chito yoitanela athu u Iwumbuwelelwela. — Welengani Hagayi 2:7.

12. Kodi mba mavuto aavi anayo kanapangi-e ira vikale vyorucha ira nipange Iwumbuwelelo? (Onani ithuzithuzi.)

¹² Yesu oovaela onga ira m’malambo omari-a ninoza nigumanena mavuto anjinji n’nga runi-iwa na abali, zuzumi-iwa, khondo, mulili na amo-i anjinji. (Mat. 10:36; Malik. 13:9; Luk. 21:10, 11) Thawi dimo-i mavuto anala kanopangi-a ira vikale vyorucha ira nipange mwambo oumbuwela khwa wa Yesu. Kodi abali na arongoli-u kairile vyoi avi volimbanana mavuto n’nga anala, n’nga Yehova uwakami-ile avi?

13. Kodi Yehova amudalisile avi Artem chifukwa yolimba murima koma teto kala osimikiza ira apange Iwumbuwelelo angali mundende?

¹³ Mangiwa. Abali-u anayo kali mundende chifukwa ya iroromelo iwa, kanoira vyetene vyevyo kanawandeathu ira kaumbuwele khwa wa Yesu. Kaganizelani isazo ya Artem. Vathawi ya Iwumbuwelelo ya mu 2020, liye oo-eliwa mundende yamamita 17 eneyo mwakala akaidi 5 vathawi imo-ive. Masiki vyali eeno, liye ookwakwani-a fwanya vizindikilo vya va Iwumbuwelelo koma teto oosakaeda vyoi akambe khani na yolinga yoi apindule. Koma akaidi afwaye koodja sola koma teto koowomeliwa ruwana. Ndiye kodi liye airile n’ni? Oowavepa ira  akala kanakwakwani-e, wa ola limo-i loka katidje sola koma teto ruwana. Artem oodabwa ira afwayayo koosomeda ira katinaire vyevyo vathawi ya Iwumbuwelelweyo. Artem eere: “Ndoofuna awandela vya Iwumbuwelelo.” Masiki ira aliwa katafuna vwa vyokuza mwambola, kangavwile koma teto ona Artem apanganga mwambo wa Iwumbuwelelo, koofuna vwa vinjinji.

14. Kodi abali kayesayesile panga n’ni ira kaire Iwumbuwelelo masiki ira vookala mulili wa COVID-19?

¹⁴ Mulili wa COVID-19. Mulilila ungaambeen’le, athu a Yehova katiwandile teto panga Iwumbuwelelo vamaso na vamaso. Koma vyevyi kavyaalepeli-ile panga mwambola. d Mipingo dam’madela anayo uli intaneti doopanga mwambola zela va vidiyokomferensi. Koma bwanji vya athu mamiliyoni anayo kali m’madela anayo kuli intaneti? Mu vilambo vimo-i koosakaeda vyoulusa khani ya Iwumbuwelelo zela va TV kapena va wailesi. Wenjedela vevo ma ofesi a thambi koojambula khanila mu viwongelo vyokwaranya 500 ira masiki athu a undendayi vinjinji kapange Iwumbuwelelo.  Teto abali ororomeleya koodowa dowa peleka khanidi umadelala.

15. Kodi ninafunjeda n’ni wa wofunjeda Baibulo m’mo-i zina laye Sue?

¹⁵ Runi-iwa na abali. Vuto lilukulu lelo amo-i kanagumananaathu vakhani yoira Iwumbuwelelo ku runi-iwa na abali. Kaganizelani vyevyo vyamuireele ofunjeda Baibulo m’mo-i zina laye Sue. Mu 2021, unga-an’le dambo limo-i ira mwambo wa Iwumbwelelo uireye, Sue oomuwandela onoyo amufunji-a Baibulo ira kanakwakwani-a irana Iwumbuwelelo chifukwa ooruni-iwa na athu a m’banja laye. Omufunji-aeyo oomuwelengela lemba la Luka 22:44. Vanduli viwa oomusambaulela ira nagumanangana mavuto ninafuneela landela isazo ya Yesu vopepela wa Yehova koma teto muroromela vinjinji. Dambo lo-arela Sue oosakaeda vizindikilo vyoi a-indi-ede chito teto oowonela porogaramu yavadela Yolambela wa Mamawa ya va jw.org. Mazulo a dambo lelo angali ekave usubi waye, ooirana Iwumbuwelelo zela va foni. Vanduli viwa Sue oomulembela kalata omufunji-aeyo ira: “Moondilimbikisa vinjinji zilo. Ndooira vyetene vyevyo ndinawande ira ndipange Iwumbuwelelo teto Yehova oondikami-eda vinjinji. Kandinawande sambaula mwemo ndinasangalalela miyo teto ndinoyamikela vinjinji.” Kodi nyo teto munoona ira Yehova unokoza ukami-edani mwagumanana mavuto n’nga anala?

16. Chifukwa n’ni kaninakaikela ira Yehova unoza adalise tindi li-u ira nize nifwanyeye va Iwumbuwelelo? (Aroma 8:31, 32)

¹⁶ Yehova unoyamikela vinjinji tindi lelo ninapanga iyo ira niumbuwele khwa wa Yesu. Kaninakaikela ira unoza anidalise nayamikelanga vyevyo aniirele liye. (Welengani Aroma 8:31, 32.) Eeno tiyemoni nikale osimikiza ira nize nifwanyeye va Iwumbuwelelo chaka ila koma teto wenjedela vyevyo ninaira iyo votumikela Yehova va nyengo enela.