1-2. Mwasiwa ngwan’ni ninofwanyeya va Ithuuleloni yawa iliyothene?

 VYAWA vyowandamela 2.000 vivirile, Yesu atovelela ingumiyee namwasa wa i-yo. Vyevi vyatovelela ngari yoi nidhafwanye ingumi yo-omala. Vama-iyu omari-a, Yesu atoawandela anamafunjedhee ira tathuulelenga udhivelee voira mwambo o-orucha vo-indi-edha basa pau na vinyu.—1 Akor. 11:23-26.

² Ninovwela lamulo la Yesuli namwasa oi ninomdhiveliwana maningi. (Juwau 14:15) Yawa iliyothene vahora ya Ithuulelo, ninothonyi-edha simba vyevyo vyaniirele liye volobela thitho thuulela maningi thapulela wa wukwawee. Ninosangalala thitho irana vyongo vinjinji vabasa lolaleela nolimbi-a atu anjinji ira takale na-iyo vamwambo wavakundula. Thitho ninokala osikimiza ira na-arumele ira yongo iliyothene iniimwanani-e fwanyeya va Ithuuleloni.

3. N’nga chini inofuna i-yo tapanya muyofunjedha yei?

³ Muyofunjedha yei, ninofuna nitapanyeni vyongo viraru vyeyvo atu a Yohova vikanle aliwa tathonyi-edhanga thindhi ira tafwanyeye vamwambo othuulela wukwa wa Yesu vyevyo vili: (1) roma okoka irana mwambula mundhila yakaathi-idhe Yesu, (2) itanela atu Ithuuleloni, thitho (3) irana mwambula vahora yorucha maningi.

4. N’nga ndimakundo aimbarimbari avi enao anovwechecha i-yo va Ithuulelo yawa iliyothene, n’nga mwasiwa ngwan’ni kaninofwanela aona movevuwa? (Luka 22:19, 20)

⁴ Yawa iliyothene va Ithuuleloni, ninovuruwana masa wa Bibilyani wenuo unawakula movweya pama vyofuka vingasi. Ninofunjedha  mwasee atu anjinji vinofuneela aliwa kuto thitho mwemo munoirela aliwa ira vyodawa vyaatu anjinji vileveleliwe. Ninothuuchiwa vinoimelela pau na vinyu thitho atu tanofwanela udya na umwa. (Muleri Luka 22:19, 20.) Thitho ninothuulela maraeli-o anofuna dhakaana atu tanaidedi-edho yodhakala vailamboi. (Esaya 35:5, 6; 65:17, 21-23) Kaniaonenga movevuwa makundo aimbarimbarala. Atu mabiliyau manjinji katinaidhiwa vyevi thitho katinavwechecha ira sembe ya Yesu njofuneya maningi. Aliwa thitho katinairana Ithuulelo ninga mwemo mwaromi-idhe liye. Mwasiwa ngwan’ni vili e-no?

5. Arumiwi anjinji tangakwidhe, n’nga atu taira a-vi mwambo uthuulela wukwa wa Yesu?

⁵ Vangavirile hora yoyeva kumela vevo arumiwi anjinji a Yesu vyakwide aliwa, Makristau onama tatovolowa pingoni. (Mat. 13:24-27, 37-39) Aliwa tanoonga “vyongo vyo-okaana basa ira taavandhuche anamafunjedha ira taa-arelenga.” (Mayir. 20:29, 30) Yongo imbo-i mwa “vyongo vyo-okaana basa” vyeyvo vira wahora vyaromile aliwa funji-a, yali yoi Yesu kaavelenle manungwee “fendo imbo-i baa-i ira atukule vyodawa vyaatu anjinji,” ninga mwemo munoongela Bibiliya, mbwenye ira sembee inofwanela veleliwanga moweli-edha weli-edha. (Aeb. 9:27, 28) Malamboano atu anjinji oona rima tanororomela mafunji-edho onamala. Aliwa tanogumaneya magrejani mwaduzi na duzi, thitho hora dhinango tanogumaneya ndambo nlilothene ira taire mwambo unoromoliwa ira “Sembe ya Misa.” b Mareligiau enango thitho anoira mwambo othuulela wukwa wa Yesu mwavo navo, mbwenye atu anjinji amureligiaunimo katinaidhiwa thapulela wa sembe ya Yesu. Ee-no atu enango tanodabwa ira, ‘N’nga wukwa wa Yesu unoiri-adi ira vyodawa vyanga vileveleliwe?’ Mwasiwa ngwan’ni anofuka yofuka yei? Hora dhinango aliwa tanokala ira tali tangamandhi dodomi-iwa naatu ale anokaikela ira sembe ya Yesu inoniiri-a ira vyodawa vi-u vileveleliwe. N’nga anama-arela aimbarimbari a Yesu takami-idhe a-vi atu vamwasa wen’na?

6. Vofiya mu yawa ya 1872, n’nga ixigulu ya anamafunjedha Bibilya tavwechechilen’n?

⁶ Maromelo wa vyawa vya 1800, ixigulu yofunjedha Bibiliya yasogoleliwa na Charles Taze Russell yatoroma funjedha Malemba mwapolepole. Aliwa tafuna idhiwa imbarimbari inothapulela sembe ya Yesu thitho mwemo atu munofwanelela aliwa thuulelenga wukwawee. Vofiya mu yawa ya 1872, aliwa tatovwechecha vinoonga Bibilya vyoi Yesu atovelela kuto oombolana atu othene. Mbwenye kaira aliwa tatevikaathina vyaidhi aliwavyo kabe. Malomwe, tatoawandelamo thitho atu enango vo-indi-edha basa mabukhu, makarta na magazini. Hora yeniyo, vofuna sazi-edha Makristau oroma, aliwa tatoroma gumaneyanga fendo imbo-i vayawa ira tairenga Ithuulelo.

7. N’nga vyasakasakile anamafunjedha Bibilya oroma vinonikami-a a-vi?

⁷ Vyasakasakile Makristau oona rimala vyawa vinjinji vivirile, vinonikami-a thitho malamboano. Moi a-vi? Mokami-iwa na Yohova ninovwechecha imbarimbari yokuza sembe ya Yesu thitho vyevyo vinokwakwaneli-edha sembiyo. (1 Ju. 2:1, 2) Nitofunjedha thitho vinoonga Bibilya vyokuza idedi-edho ina atu oi tanom’sangalali-a Nlungu, thitho ira atu enango tanodha kaana ingumi yo-okwa  dhulu thitho ira atu mamiliyau manjinji tanodhakaana ingumi yo-omala vailambo yavathi. Ninokala vauxamwali olimba na Yohova nathuulelanga vya udhivela wenuo unonithonyi-edha liye thitho mutu uliwethene munoganyalela liye namwasa wa sembe ya Yesu. (1 Pe. 3:18; 1 Ju. 4:9) Ee-no mofwanafwana na abali-u ororomeliya awale, ninoaitana atu ira tadhakale vambo-i na-iyo vamwambo wa Ithuulelo wenuo unoireya mofwanafwana na mwairile Yesu.

8. N’nga atu a Yohova takanle tairanga vyoi a-vi ira taitanelenga atu Ithuuleloni? (Muone iruthiruthi.)

⁸ Wa vyawa vinjinji atu a Yohova takanle taitanelanga atu enango wu Ithuuleloni. Mu yawa ya 1881, abali naarongola au Estados Unidos tatoovepiwa ira tamagumaneye m’mba mwa bali wu Allegheny, Pennsylvania ira taire mwambo wavakundula. Muvyawa vyo-arela, mipingo yatowandeliwa ira pingo uliwethene unooda ira Ithuulelo vaokene. Mu Março 1940, anamalaleya tatowandeliwa ira tanooda itanela mutu uliwethene othonyi-edha ifunelo tatamuni mwiwa. Mwahora yoroma mu 1960, Beteli yatootumiza mipingoni makarta oitanelana atu Ithuuleloni. Kumela muhora yeniyo, mabiliyau a viximakartavi takanle tagawiwanga. Mwasiwa ngwan’ni ninokaana thindhi mwamoda wen’na voitanela atu Ithuuleloni?

9-10. N’nga mbaani unoganyali nakaana thindhi voitanela atu enango wu Ithuuleloni? (Juwau 3:16)

⁹ Mwasa umbo-i unoniiri-a itanelanga atu wu Ithuuleloni, ngoi ninofuna ira tadhafunjedhe vyevyo Yohova na Yesu viniirele aliwa.  (Muleri Juwau 3:16.) Ninodedi-edhela ira vinofuna aliwa dhaona thitho uvwa vamwambula, vialimbi-enga ira tafune idhiwa vinjinji thitho takale arumiwi a Yohova. Mbwenye vatokala atu enango thitho tanoganyali.

¹⁰ Ninoitanela thitho atu ta-iidhe m’labela Yohova. Ninoira vyevi vofuna athuucha ira Nlungu unoadhiveliwanave. Atu anjinji tanodha naaitana thitho ninosangalala maningi naaona. Fwanyeya vamwambula unoathuucha mwemo mwasangalalela aliwa vyam’labela aliwa Yohova. Kathuulelani ifwanafwani-o ya Monica. c Liye atokami-iwa ira arome okoka kala namalaleya vahora ya sau wa COVID-19. Angafwanyeyile va Ithuuleloni mu yawa ya 2021, aongile ira: “Ithuulelo yei chavakundu maningi wa miyo. Wahora yoroma vasogolo va vyawa 20 nditooda laleela atu thitho aaitanela wu mwambou. Ndatokaana thindhi vabasa loitanela atuli, namwasa oi ndinosimba maningi vyandiirele Yohova na Yesu.” (Sal. 103:1-4) Akala atu tanodha Ithuulleloni venango kabe, ninoaitanelave mwathindhi voidhiwa ira Yohova unosimba thindhili-ulo.

11. N’nga Yohova uraeli-idhe a-vi thindhi liirile i-yo voitanela atu Ithuuleloni? (Agai 2:7)

¹¹ Yohova utoraeli-a maningi thindhi li-u voitanela atu Ithuuleloni. Mu yawa ya 2021 angalive ira kaniodile irana vinjinji namwasa wa sau wa COVID-19, atu tafwanyeile vamwambula tali okwakwana 21,367,603. Moi numerwila, kuweli-edha fendo mbili na meya numero ya a Mboni dha Yohova vailambo yothene. Pyaimbarimbari ira Yohova kanobala injiva waatu tafwanyeile vamwambula. Mbwenye unobala mutu uliwethe vaeka. (Luka 15:7; 1 Timo. 2:3, 4) Kaninokaikela ira Yohova unonikami-a fwanya atu a rima wapama dhela mubasa loitanela atu wu Ithuulelonili.—Muleri Agai 2:7.

12. N’nga ndinyarwa dhivi dhinairi-e ira vikale vyorucha irana Ithuulelo? (Muone iruthiruthi.)

¹² Yesu atoongelatu ira malambo omari-a ninodha gumanana nyarwa dhinjinji ninga runi-iwa naabali, oni-iwa nyarwa, kondo, sau na nyarwa dhinango dhinjinji. (Mat. 10:36; Marku 13:9; Luka 21:10, 11) Hora dhinango nyarwa ninga dhedhi dhinoiri-a ira vikale vyorucha irana mwambo othuulela wukwa wa Yesu. N’nga abali naarongoli-u tairile vyongo vyoi a-vi volimbanana nyarwa ninga dhedhi, n’nga Yohova waakami-idhe a-vi?

13. N’nga Yohova araeli-idhe a-vi Artem namwasa olimba rima thitho kala osikimiza ira aire Ithuulelo angali perezoni?

¹³ Mangiwa. Abali-u enao tali perezoni namwasa wa iroromeloiwa, tanoira vyongo vyothene vinoode aliwa ira tathuulele wukwa wa Yesu. Kathuulelani ifwanafwani-o ya Artem. Vahora yaithuulelo mu yawa ya 2020, liye ato-eliwa perezoni ya mametru 17 mwemo mwakalecha anyaperezo 5 vahora imbo-ive. Angalive ira vyali ee-no, liye atooda fwanya vizindiyelo vyavaithuulelo thitho atoira masaka-edho ira amaonge mwasa naifunelo yoi aganyali. Mbwenye anyaperezo afwee tanofumali thitho dhiveliwana ruwana. N’nga liye airile a-vi? Atoavepa akala vinoodeya wahora imbo-i baa-i ira katifumali thitho ruwana. Liye atodabwa ira afweao tatorumela ira katinairena vyevyo vahora yaithuulelwiyo. Artem aongile ira: “Ndanofuna awandela vyaithuulelo.” Angalive ira aliwa katafuna uvwa vyokuza mwambuwo, tangavwidhe thitho ona Artem airanga mwambo waithuulelo aliwa tanofuna uvwa vinjinji.

14. N’nga abali tadhilimbi-edhe iranan’ni angalive ira watokala sau wa COVID-19?

 ¹⁴ Sau wa COVID-19. Sau wangaromile, atu a Yohova kataodile irana ithuulelo vametho nametho. Mbwenye vyevi, kavyaaimwanani-idhe irana mwambula.  d Mipingo ili matatamu oi utokala interneti, tatoira mwambula dhela va vidiyokoferensiya. N’nga a-vi mamiliau aatu anjinji oi matatamoni mwiwa kuli interneti? Vilambo vyaatu enango, tatoira masaka-edho ooni-a mwasa wa Ithuulelo va TV venango varadiyoni. Wenjedhela vevo maofesi atambi tatogaravari mwasula muviongelo vyokwaranya 500 ira masiki atu tali undendai taire Ithuulelo. Thitho abali ororomeleya tatovelela myasila matatamonimo.

15. N’nga ninofunjedhavon’ni wa namafunjedha Bibilya mwinango dhinalee Sue?

¹⁵ Runi-iwa naabali. Nyarwa ilukulu inogumanana atu enango vamwasa oirana Ithuulelo ndi runi-iwa naabaliwa. Kathuulelani vyam’mwireele namafunjedha Bibilya mwinango dhinalee Sue. Mu yawa ya 2021, unga-adhi dambo limbo-i ira mwambo wa Ithuuleluo uireyee,  Sue atom’mwandela am’funji-a Bibilya ira liye kanaoda fiya vaithuulelo namwasa oi anooruni-iwa naatu a banjanimwee. Namafunji-ee atoleri lemba la Luka 22:44. Ee-no vasogolovee atom’mwandela ira nagumanangana nyarwa, ninofwanela tukulela ifwanafwani-o ya Yesu volobela wa Yohova thitho m’roromela maningi. Dambo lo-arela Sue atosaka-edha vizindiyelo ira avi-indi-edhe basa thitho atoonela porograma yavakundu yolambela wamaebe-i va jw.org. Nama-iyu angali ekene kwartuniwee atoira Ithuulelo dhela vatelefonini. “Vasogolovee atom’mwadela namafunji-eeo ira: Mwatondilimbi-a maningi dhilo. Ndatoira vyothene vyaodile miyo ira ndiire Ithuulelo thitho Yohova atondikami-a maningi.” N’nga nyo thitho munoona ira Yohova unoukami-ani mwagumanangana nyarwa ninga dhedhi?

16. Mwasiwa ngwan’ni kaninokaikela ira Yohova unodha raeli-a thindhi li-u loi nidhafwanyeye vaithuulelo? (Aroma 8:31, 32)

¹⁶ Yohova unosimba maningi thindhi linoira i-yo ira nithuulele wukwa wa Yesu. Kaninokaikela ira unodha niraeli-a nasimbanga vyevyo viniirele liye. (Muleri Aroma 8:31, 32.) Ee-no dhoweni nikale osikimizela ira nidhafwanyeye vaithuulelo yawa yei thitho wenjedhela vyevyo vinoira i-yo vom’labela Yohova vahora yen’na.