CHIBAABA CHAKUDIZA 4
Yehova Watukiswilaña Neyi Tuzata Nañovu Kwanuka Chanukishu
“Ilenuña mwenimu hakuñanuka.”—LUKA 22:19.
KAMINA 19 Kuda kwaMwanta kwaMelela
NSAÑU YIDI MUCHIBAABA a
1-2. Muloñadi chitwayilaña kuChanukishu hachaaka-hachaaka?
KWAKWIHI nayaaka 2,000 yinahitihu, Yesu wahanini wumi windi kukoola etu, nakutwenzunwina njila kulonda twakekali nawumi wahaya nyaaka. Wufuku wakutwala kukufwa kwindi, Yesu wayilejeli akakumulondela nindi anukeña kukeña kwayimwekesheleliyi kuhitila mukwikalaña nachidika chanyanya munabombeli dinkendi nivinyu.—1 Kor. 11:23-26.
2 Twovwahilaña lushimbi lwaYesu muloña twamukeña nankashi. (Yow. 14:15) Hachaaka-hachaaka mumpinji yaChanukishu, twamwekeshaña kusakilila hachuma chatwililayi kuhitila mukutoñojokahu chikupu hamwatalisha kufwa kwindi nikulombelahu. Twazataña cheñi nañovu mumudimu wakushimwina, nakutambika antu amavulu kulonda akenzi nakupompa hamu nanetu iku kupompa kwalema. Nawa tunakufwila kubula kwiteja chuma chidi chejima kutukañesha kuya kuChanukishu.
3. Yumanyi yitukuhanjekahu muchinu chibaaba?
3 Muchinu chibaaba, tukuhanjeka hanjila jisatu mwamwekeshelañawu antu jaYehova nawu azataña nañovu kulonda anukeña kufwa kwaYesu: (1) kuhitila mukwanuka Chanukishu kuzatisha njila yayishililiyi Yesu, (2) kuhitila mukutambika antu kuChanukishu, nawa (3) kuhitila mukuya kuChanukishu hela chakwila tunakumona kukala.
KWANUKA CHANUKISHU KUZATISHA NJILA YASHIYILIYI YESU
4. Nsañwinyi yitwadizaña haChanukishu hachaaka-hachaaka, nawa muloñadi chitwatela kubulila kudiwula iyi nsañu? (Luka 22:19, 20)
4 Chaaka hichaaka haChanukishu, twatiyililaña kumpanji yashindamena haBayibolu yakulaña chiwahi malwihu amavulu. Twelukaña chaleteshaña antu akeñekeña ifutu danyiloña nikufwa kwamuntu wumu chikwabutaña hanshidi jawantu amavulu. Atwanukishaña yuma yemenañaku dinkendi nivinyu niatela kudaku nikunwa. (Tañenu Luka 22:19, 20.) Nawa twatoñojokaña hankisu jakatambwilawu antu achiñejaña kushakama hamaseki. (Isa. 35:5, 6; 65:17, 21-23) Bayi tudiwula iyi nsañuku. Antu amavulu eluka wanyi iyi nsañu, nawa hiyeluka kulema kwamulambu waYesuku. Cheñi hiyanukaña Chanukishu chakufwa kwindi kwesekeja nanjila yashiyiliyiku. Muloñadi?
5. Chelili apostolu amavulu afwi, chumanyi chamwekeni kunjila yashiyiliyi Yesu yakwanukilamu Chanukishu?
5 Chelili tuhu apostolu aYesu amavulu afwi, akaKristu akutwamba eñilili muchipompelu. (Mat. 13:24-27, 37-39) Ahosheleña “yuma yakutwamba kulonda adikokeli atumbanji.” (Yilw. 20:29, 30) Chuma chimu ‘hayuma yakutwamba’ chatachikiliwu kutañisha akaKristu akutwamba, chadiña nawu Yesu wahanini mujimba windi “kamu hohu haya nyaaka kulonda afumishihu nshidi jawantu amavulu,” neyi chahosha Bayiboluku, ilaña nawu mulambu windi atela kuwufuntisha-funtishañahu. (Heb. 9:27, 28) Antu amavulu makonu akuhwelela muniyi ntañishilu yakutwamba. Apompaña hamu mpinji yejima mumachechi, mpinji jikwawu mafuku ejima, kulonda ekali nachidika chatachikawu kutena nawu “Mulambu waMisa.” b Machechi amakwawu ekalaña nanichi chidika chakwanuka kufwa kwaYesu kakavulu wanyi, ilaña antu amavulu amunawa machechi hiyeluka kulema kwamudimu wazata mulambu waYesuku. Amakwawu ajinokaña nawu, ‘Komana mwamweni kufwa kwaYesu kunateli kuletesha nshidi jami ajanakeni?’ Muloñadi chadihwilañawu ilu lwihu? Muloña ayiluwañesha kudi antu ahoshaña nawu nshidi hiyanateli kujanakena namulambu wakufwa kwaYesuku. Indi akakumulondela Kristu alala elaña ñahi naniyi nsañu?
6. Mu 1872, izanvu dawatudizi aBayibolu dakunkulwili nawudi?
6 Kumakumishilu ayaaka yamuma 1800, izanvu dawatudizi aBayibolu alombweleñawu kudi Charles Taze Russell, atachikili kudiza chikupu Nsona. Akeñeleña kwiluka chalala kutalisha hakulema kwamulambu waYesu nichatela kwanukañawu kufwa kwindi. Chashikiliwu mu 1872, akunkulwili nawu chalala Yesu wahanini mulambu wakukuula antu ejima. Hiyaswekeli nsañu yawaniniwuku. Ilaña ataandishili iyi nsañu kuhitila munyikanda, manyuzipepa nimagazini. Kufumahu, atachikili kubulakana nakwanuka Chanukishu kamu muchaaka neyi chelileñawu akaKristu akusambila.
7. Yuma yadiziliwu atudizi aBayibolu akusambila yatukwashaña ñahi?
7 Makonu iyi nsañu yadiziliwu awa akaKristu ashinshika hadi yaaka yayivulu yatukwashaña. Yatukwashaña ñahi? Yehova natukwashi kwiluka mwatalisha mulambu waYesu niyuma yiwakelila antu ejima. (1 Yow. 2:1, 2) Tuneluki cheñi netu Bayibolu yahosha hakuchiñeja kuyedi kwawantu amutiyishaña Nzambi kuwaha, dikwila nawu wumi wabulaña kufwa wawantu akekala mwiwulu niwumi wahaya nyaaka wawantu amavulu ekekala hanu hamaseki. Twaswinaña kwakwihi naYehova neyi twiluka chatukeñayi nimulambu waYesu chiwatukwashaña hamuntu-hamuntu. (1 Pet. 3:18; 1 Yow. 4:9) Neyi chelileñawu amanakwetu ashinshika kunyima, twatambikaña antu kwinza nakwanukila hamu Chanukishu nanetu kuhitila mukuzatisha njila yashiyiliyi Yesu.
KUTAMBIKA ANTU KUCHANUKISHU
Yumanyi yimwatela kwila hakwila mwakazatiku chikupu mukampeni yakutambika antu kwinza kuChanukishu? (Talenu maparagilafu 8-10) e
8. Chumanyi chelañawu antu jaYehova hakwila atambiki antu kuChanukishu? (Talenu mwevulu.)
8 Antu jaYehova atachikili dehi kutambika antu kuChanukishu. Kumatachikilu a 1881, amanakwetu niahela muUnited States ayitambikili kuya nakupompela ichi chidika chadimena kwitala damanakwetu muAllegheny, Pennsylvania. Mukuhita kwampinji, amanakwetu atachikili kwikala nanichi Chanukishu muyipompelu yawu. MuMarch 1940, akakushimwina ayilejeli nawu anateli kutambika muntu wudi wejima wamwekesheli mpwila mumaluña awu akushimwina. Mu 1960, Beteli yahanini muyipompelu yipapilu yakupulinta yakutambika nachu antu, nawa aka dikadiña katachi. Kufuma tuhu hayina mpinji, anahani yipapilu yayivulu yakutambika nachu antu kuChanukishu. Muloñadi chitwazatilaña nañovu kutambika antu kuChanukishu?
9-10. Anyi ahetelañamu chitwazataña nañovu kutambika antu kuChanukishu? (Yowanu 3:16)
9 Chuma chimu chaleteshaña tutambikeña antu kwinza nakupompela hamu Chanukishu nanetu, twakeñaña netu ana anenzi nakupompa nanetu katachi eluki yuma yatwililawu wejima wetu kudi Yehova niYesu. (Tañenu Yowanu 3:16.) Twakuhwelelaña netu yuma yikumonawu nikutiya haChanukishu yikuyiletesha kwiluka yuma yayivulu nakwikala ambuña aYehova. Ilaña kudi amakwawu cheñi ahetelañamu.
10 Twatambikaña cheñi antu aleka dehi kumukalakela Yehova. Twayitambikaña kulonda tuyanukisheña netu Nzambi wuchidi wayikeña. Amavulu etejaña mutambi wetu nawa twatiyaña kuwaha kuyimona neyi anenzi. Neyi aya kuChanukishu anukaña muzañalu watiyileñawu hamukalakeleleñawu Yehova kunyima. Talenu chuma chamumwekeneni Monica. c Watachikili cheñi kushimwina mumpinji yamusoñu waCOVID-19. Hanyima yakuya kuChanukishu mu 2021 wahosheli nindi: “Ichi Chanukishu chadiña chalema nankashi kudi ami. Hadi yaaka 20, aka dikatachi kinayishimwinini antu nikuyitambika kuChanukishu. Nazataña nañovu muloña nasakililaña hayuma yañililawu kudi Yehova niYesu.” (Mas. 103:1-4) Hela chakwila antu aneteji mutambi wetu hela nehi, twazataña nañovu kutambika akwetu kuChanukishu muloña tweluka netu Yehova wasakililaña hachitwazataña.
11. Yehova nakiswili ñahi mudimu wetu wakutambika antu kwinza kuChanukishu? (Hagayi 2:7)
11 Yehova wakiswilaña mudimu wetu wakutambika antu kuChanukishu. Mu 2021, hela chakwila musoñu waCOVID-19 watukañesheli kupompela hamu, naambala yawantu apompeli yashikili ku 21,367,603. Dikwila nawu naambala yawaYinsahu jaYehova mukaayi kejima yikwiñilamu kapampa kayedi nachikunku! Hela chochu, Yehova hashaña muchima hakuvula kwawantu anapompiku. Washaña muchima hadi muntu-himuntu wunapompi. (Luka 15:7; 1 Tim. 2:3, 4) Tuneluki netu Yehova wazatishaña mudimu wetu wakutambika antu kulonda atukwashi kuwana antu adi nanyichima yashinshika.—Tañenu Hagayi 2:7.
KUYA KUCHANUKISHU HELA CHAKWILA TUNAKUMONA KUKALA
Yehova watukiswilaña neyi tuzata nañovu kwanuka Chanukishu (Talenu paragilafu 12) f
12. Yumanyi yinateli kuletesha chitukalili kwanuka Chanukishu? (Talenu mwevulu.)
12 Yesu washimwineñahu dehi nindi mumafuku akukuminina twakamonaña kukala kwashiyashana, chidi neyi ikañesha damuchisaka, ikabisha, majita, yipupu niyuma yikwawu. (Mat. 10:36; Maku 13:9; Luka 21:10, 11) Mpinji jikwawu, iku kukala kwatuleteshaña chitukalili kwanuka kufwa kwaYesu. Yumanyi yelañawu amanakwetu niahela hakwila ashindi iku kukala, nawa Yehova nayikwashi ñahi?
13. Yehova wamukwashili ñahi Artem kumwekesha kuhamuka nikufuukulahu kwanuka Chanukishu hadiñayi mukaleya?
13 Kutukasa mutuleya. Amanakwetu akasawu muloña wayuma yakuhwelelawu azataña nañovu kwanuka kufwa kwaYesu. Talenu chuma chamumwekeneni Artem. Mu 2020 mumpinji yaChanukishu, amushili mukapeka kamukaleya kadiña namamita 17, mumbadi jejima jiwana, mwatela kushakama antu 5 hampinji yimu. Hela chakwila wadiña mukaleya, watwesheli kuwana yifwikija yakuzatisha haChanukishu, nawa wadiloñesheli kuhana mpanji yaChanukishu kulonda yimukwashi yomweni. Ilaña akwawu atuyili adiñayi nawu munaka kapeka adiña nakunwa makanya nikuhosha kasawuntu. Welili ñahi? Wayilombeli neyi chakwila anateli kuleka kunwa makanya nikuhosha kasawuntu hadi ora yimu hohu. Chuma chamuhayamishili Artem, atuyili adiñayi nawu munaka kapeka etejeli nawu hiyakunwa makanya hela kuhosha kasawuntu hampinji yaChanukishuku. Artem wahosheli nindi, “Nafuukwilihu kuyileja mwatalisha Chanukishu.” Hela chakwila ahosheli nawu hiyakeñeleña kutiya nsañu yanichi chidikaku, hanyima yakutiya nikumona Artem nakwanuka ichi Chanukishu, amwihwili nawu ayileji chichekala.
14. Antu jaYehova elili ñahi hakwila ekali naChanukishu hela chakwila kwadiña musoñu waCOVID-19?
14 Musoñu waCOVID-19. Chenjili iwu musoñu, antu jaYehova alekeli kupompela hamu Chanukishu. Ilaña chumichi hichayikañesheli kupompa Chanukishuku. d Yipompelu yekala mumaluña mwekala Intaneti, yapompeli Chanukishu kuzatisha vidiyo konfalensi. Indi antu amavuli adi mumaluña mwabula Intaneti elili ñahi? Mumatuña amakwawu, ashiliku ntanjikilu yakutiyakesha mpanji ha TV hela hachikunzulemba. Kubombelahu, tusanji twakwatili iyi mpanji mumadimi akubadika ha 500 kulonda ninana ashakamaña mumaluña amwamulehi atweshi kupompa Chanukishu. Nawa amanakwetu amakwawu adihanini kutwala jimpanji kudi amanakwetu adiña mumaluña amwamulehi.
15. Yumanyi yimunakudizila kudi kadizi waBayibolu wejina daSue?
15 Ikañesha damuchisaka. Amakwawu, kukala kweneni kwamonañawu hakwanuka Chanukishu hikañesha damuchisaka. Talenu chuma chamumwekeneni kadizi waBayibolu wejina daSue. Mu 2021, hefuku dakwila kumadiki dihikwakekala Chanukishu, Sue wamulejeli muntu wamudizishileña Bayibolu nindi wakaya wanyi kuChanukishu muloña antaña jindi amakwawu amukañesheleña. Muhela wamudizishileña Bayibolu watañili Luka 22:44. Kuhiñahu wamulumbulwilili nindi neyi tunakumona kukala, twatela kwila neyi cheliliyi Yesu kuhitila mukulomba kudi Yehova nikumukuhwelela chikupu. Ifuku dahiñilihu, Sue waloñesheli yifwikija nawa watalili progiramu yadimena yaKudifukula Kwantetemena ha jw.org. Namelela hadiñayi mukapeka nkawindi, watiyilili kumpanji yaChanukishu hafoni yindi. Nkumininaku, Sue wamusonekeleli muhela wamudizishileña Bayibolu nindi: “Haloshi mwankolesha chikupu. Nazata kwesekeja nahakumina ñovu jami kulonda nipompi Chanukishu nawa Yehova wankwasha. Nazañalali nawa nasakilili nankashi!” Munakutoñojoka nenu Yehova nateli kuyikwasha neyi mumona kukala kwokumu?
16. Muloñadi chitunelukili chikupu netu Yehova wakatukiswila neyi tuzata nañovu kuya kuChanukishu? (ARoma 8:31, 32)
16 Yehova watiyaña kuwaha chikupu chitwazataña nañovu hakwila twanuki kufwa kwaYesu. Tuneluki chikupu netu wakatukiswila neyi tumwekeshaña kusakilila hachuma chatwililayi. (Tañenu ARoma 8:31, 32.) Dichi, tudiloñesheña kulonda twakayi kuChanukishu achinu chaaka nikuzata kwesekeja nahanakumini ñovu jetu mumudimu wakushimwina mumpinji yaChanukishu.
KAMINA 18 Tunahameki Hakutwinka Ifutu daNyiloña
a Hachiyedi, April 4, 2023, antu amavulu mwahita kaayi kejima akanukaña Chanukishu chaKufwa kwaKristu. Antu amavulu akaya kunichi chanukishu katachi. Amavulu alekeli kumukalakela Yehova nawa abulaña kuya kuChanukishu hadi yaaka yayivulu niwena akapompa. Amakwawu akashinda kukala kwakuvulu hakwila akapompi. Hichikweti muloña nakukala kumukwetiku, ilukenu nenu Yehova wakatiya kuwaha nankashi neyi muzata nañovu kuya nakupompa.
b Awa akakudifukula akuhwelela nawu hampinji yanichi chidika, dinkendi nivinyu jabalumukaña nakwikala mujimba nimashi aKristu. Atoñojokaña nawu mujimba waYesu nimashi indi, ajihanaña mpinji yejima yikuyayi muntu kunichi chidika.
c Majina amakwawu anayihimpi.
d Talenu cheñi ha jw.org yibaaba yinakwila nawu “Kwanuka Chanukishu mu 2021.”
