1-2. Bika bitukaila ku Canukiso mwaka na mwaka?

 MYAKA ya kweta ku 2,000 kunima Yesu watutsililile mangana atukwase kukala na lilabelelo lya kukayoya myaka yoshe. Ha butsiki bwa kwinduka litangwa libamutsiile, Yesu washikile baka-kumukabangeya ngwendi balinge-linge cilika ca likende na binyu mu kwanuka cizemo cabamwesele.—1 Kori 11:23-26.

² Tukakabangeya byatushikile Yesu mwafwa twamuzema manene. (Iwano 14:15) Mwaka na mwaka mu byalumingo bya kukokela ku canukiso na munima, tukamwesa kukandelela ku byuma byatulingilile ha kulombela na kusinganyekesesa muitukwasela ndando ya kupatula. Co lalo ha simbu ei, tukapanga na nzili cipangi ca kwambulula mangana tulanye banu babangi ku Canukiso. Kutundaho kutwesi kwecelela cuma coshe-coshe citwonowese kukala ku Canukiso.

3. Bika bitusimutwiya muno mu cilongesa?

³ Muno mu cilongesa tusimutwiya ha byuma bitatu bibanalingi banu ba Yehova mangana banuke-anuke kutsa kwa Yesu: (1) kulinga Canukiso mwashikilile Yesu, (2) kulanya bakwabo ku Canukiso, na (3) kulinga Canukiso nameme byuma binakaluwa.

4. Bika bitukalilongesa ku Canukiso, co mwafwa bika tunapande kubimona kupwa bya seho? (Luka 22:19, 20)

⁴ Ha mwaka na mwaka ku Canukiso, tukatolilila ku ñanda ya Mbimbiliya ije ikakumbulula mwamubwa bihula byabingi. Tukalilongesa bitutondela ndando ya kupatula nomwo kutsa kwa munu umo kumanesela bubi bwa banu babangi. Bakatwanukisa bilimanena likende na binyu na kutuleka banu banapande, kulya likende na kunwa binyu. (Tandeni Luka 22:19, 20.) Co  lalo tukasinganyekesesa ha bibezikiso bibakalikuwa baje bali na lilabelelo lya kukayoya hano hasi. (Isaya 35:5, 6; 65:17, 21-23) Tunapande kumona obu busunga kupwa bwa seho. Banu babangi kubesi kuzibisisa, co kubesi kumona seho ya ndando ya kupatula yafwetele Yesu. Co lalo kubesi kulinga Canukiso mu ngila ije yashikile Yesu. Mwafwa bika?

5. Tupositolo ba Yesu babangi mubatsile banu bashangumukile bati kulinga cilika ca kutsa kwendi?

⁵ Munima ya simbu yaindondo lika kutunda habatsililile bandongesi ba Yesu, mu cikungulukilo ca baka-Kristu mwakobelele baka-Kristu ba makuli. (Mate 13:24-27, 37-39) Bendekele ‘byuma bya kuhenga, mangana bongumune bandongesi babakabangeye.’ (Bili 20:29, 30) Aba baka-Kristu ba makuli bakele na kulongesa “byuma bya kuhenga” ngwabo Yesu kanene mubila wendi kupwa mulambu “lumo lika mangana ambate bubi bwa banu babangi” ngwe muyendekela Mbimbiliya. Oloni bakele na kulongesa ngwabo mulambu wendi bapandele kuwana kushwa kumo. (Hebe 9:27, 28) Banu babangi ano matangwa banakulahela eci cilongesa ca makuli. Bakalikungulwila ku biceci byabo ha calumingo na calumingo nambe ha litangwa na litangwa mangana banuke kutsa kwa Yesu kuje kubakasana baka-katolika ngwabo Mulambu wa Banu Babangi. b Mu bulombelo bumo kubesi kulinga cilika ca kwanuka kutsa kwa Yesu kushwa kumo, oloni nameme ngoco kubazibisisa bwino biilumbununa ndando ya kupatula. Bamo banasa kulihula ngwabo: ‘Kuma cili bene kutsa kwa Yesu kulingisa bubi bwange babukonekele ndi?’ Bika bikabalingisa behule ngoco?’ Mwafwa banabongumuna ku banu baje bakendeka ngwabo kutsa kwa Yesu kukwasa kulingisa bubi bwa banu babukonekele. Bandongesi ba Yesu ba busunga bakwasele bati banu bazibisise biilumbuna ndando ya kupatula ya Yesu nomwo mubanapande kwanukila kutsa kwendi?

6. Baka-kulilongesa Mbimbiliya bazibisisile bika mu mwaka wa 1872?

⁶ Mu cita ca myaka ca bu 19, cibunga ca baka-kulilongesa Mbimbiliya babatwamenene kuli ndolome Charles Taze Russell cashangumukile kutondesesa manene Bisoneka na kulilongesabyo. Bashakele kuzibuka biilumbununa ndando ya kupatula ya Yesu nomwo mubanapande kulingila cilika ca kwanuka kutsa kwendi. Mubetele mu mwaka wa 1872, bawanene busunga bwa mu Mbimbiliya buje bumwesa ngwabo cili bene Yesu wanene mulambu mangana bubi bwa banu babangi babukonekele. Aba baka-kulilongesa mbimbiliya kubolokele lika munima ya kuwana obu busunga. Oloni balekeleko bakwabo byuma bibalilongesele kupangesa mabulu, mapapelo a mizimbu na magazini. Munima ya simbu yaindondo, aba baka-kulilongesa Mbimbiliya bashangumukile kuliwana-wana lumo ha mwaka mu kulinga cilika ca kwanuka kutsa kwa Yesu ngwe mubakele na kulingila baka-Kristu ba kulibanga.

7. Byuma bibatondesesele Baka-kulilongesa Mbimbiliya bitukwasa bati?

⁷ Byuma bibatondesesele aba baka-Kristu myaka yaingi kunima, bili na kutukwasa ano matangwa. Mu ngila muka? Yehova natukwasa tuzibisise mwamubwa biilumbununa ndando ya kupatula ya Yesu nomwo muitukwasela tubaboshe. (1 Iwa 2:1, 2) Twalilongesa lalo ngwetu mu Mbimbiliya muli biñanda bije bilingisa banu baje bali na kuzibisa  Njambi kubwaha bakale na lilabelelo. Bamo bali na lilabelelo lya kukayoya myaka yoshe mwilu, co kuli lalo bakwabo babangi bali na lilabelelo lya kukayoya hano hasi myaka yoshe. Kusinganyekesesa mwanatuzemanamo Yehova nomu muitukwasela ndando ya kupatula ya Yesu kutulingisa tushwenye manene kuyehi na Yehova. (1 Pita 3:18; 1 Iwa 4:9) Ngwe mwa bandolome betu ba kunima netu tukalanya bakwetu mangana twakulingile hamo cilika ca kwanuka kwa Yesu ngwe mwatushikilile.

8. Bika bibanalingi banu ba Yehova mangana base kulanya banu ku Canukiso? (Taleni cikupulo.)

⁸ Bangamba ba Yehova banatwalelelaho kulanya banu ku Canukiso ha myaka yaingi. Mu 1881 bandolome na bandokazi ku America, mu Allegheny, Pennsylvania, babalanyele kulikungulwila ku njibo ya ndolome umo mangana balinge cilika ca kwanuka kutsa kwa Yesu. Kushwa bene ha simbu ije cikungulukilo na cikungulukilo cashangumukile kulilingila Canukiso. Mu March 1940, baka-kwambulula babalekele ngwabo basa kulanya munu woshe-woshe mu chitingitingi cabo uje washakele kukalako. Mu 1960 ofisi ya munango yapulintile mapapelo a kulanya banu ku canukiso lwa kulibanga na kuwana ku bikungulukilo. Kushwa bene haje Bakaleho ba Yehova banana banu mapapelo amangi a kubalanya ku canukiso. Mwafwa bika tukalingi mutwasela mwoshe kupangesa simbu na nzili mu kulanya banu ku Canukiso.

9-10. Beya bawana bukwasi nga tulifwita kulinga cipangi ca kulanya banu ku Canukiso? (Iwano 3:16)

⁹ Kuli byuma bikatulingisa tulanye bakwetu ku Canukiso. Tukalanya bakwetu ku Canukiso mangana bakulilongese byuma byanatulingila Yehova na Yesu. (Tandeni Iwano  3:16.) Tuzibuka ngwetu byuma bibamona nambe kuziba ku Canukiso binasa kubashongangeya balilongese byabingi na kupwa bangamba ba Yehova. Oloni kuli banu bakwabo lalo banasa kuwana bukwasi nga baya ku Canukiso.

¹⁰ Tukalanya lalo na baje banalikele kupangela Yehova. Tukalingi ngoco mangana tubakwase banuke ngwabo Yehova wabazema manene. Babangi bakatambula cilanyo cetu, co tukabwahelela manene mutukabamono ku Canukiso. Kukala ku Canukiso kubalingisa banuke byuma byabingi bibalikuwile mubakele na kupangela Yehova kunima. Tucisimutwiyeni hali Monica. c Nameme kunima wazeyele, oloni washangumukile lalo kwambulula ha simbu ya mushongo wa COVID-19. Hanima ya kuwaniwa ku Canukiso ca mu 2021 wendekele ngwendi: “Eci Canukiso cinapu ca kulitila manene kuli yange. Kuneti oni myaka 20 kutunda hanjambulwilile na kulanya banu ku Canukiso. Njapangele na nzili cipangi ca kulanya banu ku Canukiso mwafwa njashakele kumwesa kukandelela ku byuma byananjilingila Yehova na Yesu.” (Myaso 103:1-4) Nameme banu bamo banasa kubyana ku balanya, oloni tutwalelelaho kulinga cipangi ca kulanya banu ku Canukiso mwafwa tuzibuka ngwetu Yehova abezikisa kulifwita kwetu.

11. Yehova nabezikisa bati cipangi cetu ca kulanya banu ku Canukiso? (Hangai 2:7)

¹¹ Yehova nabezikisa cipangi cetu ca kulanya banu ku Canukiso. Nameme mu 2021 mushongo wa COVID-19 unatwowesele kulinga mwamubwa eci cipangi, oloni ku Canukiso kunakele banu ba kupwa 21,367,603. Nambala ya Bakaleho ba Yehova mu kaye koshe ikobela omu mu nambala lubali na hafu. Yehova kesi kwaka manene mbunge ku nambala ya banu bakala ku Canukiso. Oloni akaka mbunge ku munu na munu uje akawaniwa ku Canukiso. (Luka 15:7; 1 Timo 2:3, 4) Tuzibuka ngwetu Yehova akatukwasa tuwane banu ba bimbunge byabibwa mutukalingi cipangi ca kulanya banu ku Canukiso.—Tandeni Hangai 2:7.

12. Bukalu muka bunasa kutwonowesa kukala ku Canukiso? (Taleni cikupulo.)

¹² Yesu wapolofwetele ngwendi mu matangwa a kukotoka tuliwana na bukalu bwa kuliseza-seza. Cakumwenako, tunasa kuliwana na bukalu bwa kutulwisa kuli baka-nanga yetu, mapakeso, binzita, mishongo ya kulitambwisa na bukalu bweka. (Mate 10:36; Maki 13:9; Luka 21:10, 11) Simbu imo kunasa kutukaluwila kukala ku cilika ca kutsa kwa Yesu mwafwa ya bukalu bwa cifwa eci. Byuma muka bibanalingi bandolome na bandokazi mangana bahyane obu bukalu, co Yehova nabakwasa bati?

13. Yehova wabezikisile bati kulifwita na kusimpa kwa ndolome Artem ha simbu yakele mu kamenga mangana alinge Canukiso?

¹³ Nga tuli mu kamenga. Bandolome betu baje bali mu tumenga mwafwa ya likulahelo lyabo bakalingi mubasela mwoshe mangana balinge cilika ca kwanuka kutsa kwa Yesu. Tusimutwiyeni hali ndolome Artem. Mu byalumingo bya kukokela ku Canukiso ca mu 2020 bamwakele mu selu yaindondo manene muje mwasele lika kukala binzinda batanu. Nameme wakele mu kamenga, wesekele mwaselele mwoshe kuwana byuma bya kupangesa bifwisa bya Canukiso. Co lalo walibwaheselele kwendeka ñanda ya Canukiso yendi babenya. Oloni bakwabo bakele nabo mu kamenga bakele na kusipa manene, co lalo bakele na kwendeka majwi amabi.  Bika byalingile? Wabalekele ngwendi balikele kusipa na kwolokako nambe mu ola imo lika. Ndolome Artem wakomokele mwafwa bolokele na kulikela kusipa ha simbu yalingile Canukiso. Ndolome Artem wendekele ngwendi: “Njashakele kubaleka bya Canukiso.” Nameme babyanene, oloni munima ya kuziba na kumona Artem alinga Canukiso bamwihwile mangana abaleke bicilumbununa.

14. Bakaleho ba Yehova banalingile bati Canukiso nameme kunakele mushongo wa COVID-19?

¹⁴ Mushongo wa COVID-19. Ou mushongo muwashangumukile, banu ba Yehova kubakele na kulingila Canukiso ku Njibo ya Bumwene. Oloni oku kukwabonowesele kulinga cilika ca kwanuka kutsa kwa Yesu. d Bikungulukilo bije byakala mu myela muli intaneti byakele na kulingila Canukiso ha makina. Batico bikungulukilo byabingi bije bili mu myela muje kumwesi intaneti? Mu mafuti amo baka-munango babwahesele byuma mangana banu batolilile ku ñanda ya Canukiso ha ma TV nambe ku ma redio. Kutundaho minango imo yarekodele ñanda ya Canukiso mu bindaka bya kutubakana 500 mangana baje bakala  kulako nabo balinge Canukiso. Co bandolome bambatele bije biñanda bya kurecoda na kubitwalela bandolome baje bakala kulako.

15. Bika bitulilongesa kuli muka-kulilongesa Mbimbiliya wa lizina lya Sue?

¹⁵ Kutulwisa kuli baka-nanga yetu. Bamo kubapwila kwakukalu kuya ku Canukiso mwafwa ya kubalwisa kuli baka-nanga yabo. Tucisimutwiyeni hali Sue uje acili na kulilongesa Mbimbiliya. Mukwasalele lika litangwa limo ngwabo litangwa lya Canukiso ca mu 2021 lyete, Sue walekele uje wakele na kumulongesa Mbimbiliya ngwendi kakala ku Canukiso mwafwa baka-nanga yendi bakele na kumulwisa. Muka-kumulongesa Mbimbiliya watandele cisoneka ca Luka 22:44. Kutundaho wamulumbunwinine ngwendi nga tuliwana na bukalu tunapande kukabangeya mwanja wa Yesu wa kukulahela manene Yehova na kumulomba bukwasi. Litangwa lyateleko, Sue wabwahesele bifwisa na kukenga Kulemesa kwa Mutondo ha jw.org. Ha litangwa lije mangwezi Sue wakobelele mu mulili wendi wa kulala na kutolilila ku Canukiso ha foni likalyendi. Munima Sue walekele Muka-kumulongesa Mbimbiliya ngwendi: “Munanjitakamesele manene izau. Njinesekele munjinaselele mwoshe kukala ku Canukiso, co Yehova nanjikwasele. Njabwahelela manene, co lalo njakandelela manene.” Kuma mwakulahela ngweni Yehova asa kumikwasa nga muliwana na bukalu bwa cifwa eci ndi?

16. Bika bitulingisa tukulahele ngwetu Yehova abezikisa kulifwita kwetu mangana tukawaniwe ku Canukiso? (Loma 8:31, 32)

¹⁶ Yehova akabwahelela manene mwakamono tulifwita kulinga cilika ca kwanuka kutsa kwa Yesu. Twakulahela ngwetu Yehova atubezikisa omwo tumwesa kukandelela ku byuma byanatulingila. (Tandeni Loma 8:31, 32.) Ngeci, tulingeni mutwasela mwoshe mangana tukakale ku canukiso ca uno mwaka na kupanga byabingi mu bipangi bya Yehova mu bingonde bya Canukiso.