1-2. Amulandu ci wuno tukazanilwa ku Cizusyo cila mwaka?

 PAPITA imyaka mupipi ne 2,000 ukufumilila pano e Yesu watufwizile. Wacisile wo-o pakuti atwiyulile inzila ya kuwa nu wumi wamuyayaya. Uwusiku pano atani afwe, wanenile awasambilizi wakwe ukuti wakwizuka vino walanjizya ulukundo, ukupitila mukukwata ukuzevya ukupepuke ukuwomvyavye umukate ne waini.​—1 Kor. 11:23-26.

² Tukakonka vino Yesu watunena, amuno twamukunda nkaninye. (Yoha. 14:15) Cila mwaka pano tutani tuzevye Icizusyo nanti pa nsizi ya Cizusyo, tukalanjizya ukusalifya pevino e Yesu watucitila ukupitila mukupepa nu kwelenganyapo pevino imfwa yakwe yacindama ku wantu. Swinya tukakwivwa icete ukuwombako mu mulimo wakuwizya nukwitako awantu awavule ukuti wize wazanweko kwe wo-o uwanda uwuyiwele. Tusilonda icili consinye citupumvyanye ukuzanwa ku Cizusyo.

3. Avyani vino twandi tusambilile mwe co-o icipande?

³ Mwe co-o icipande twandi tulande pa nzila zitatu zino awantu wa kwe Yehova wakakwelezya na maka ukukonka pakuzevya imfwa ya kwe Yesu: (1) ukucita vino e Yesu wa wasambilizizye pavyakuzevya Icizusyo, (2) ukwita awantu ku Cizusyo, ne (3) ukuzanwa ku Cizusyo asamulandu ni ntazi zino wakupitamo.

4. Amawuzyo ci yano yakakwasukwa pa Cizusyo, swinya amulandu ci wuno ukumanya vyo-o ivyasuko kwacindamila kwe sweswe? (Luka 22:19, 20)

⁴ Cila mwaka pakulongana kwa Cizusyo, tukateyelezya kwi lyasi lye Baibolo lino likakwasuka amawuzyo amavule. Tukasambilila na pamulandu wuno awantu wakalondecelwa inzuwi na vino imfwa ya muntu wenga yingalipila paluwembu lwa wantu  awavule. Swinya wakatwizusyako na vino umukate ne waini vikakwimililako, apano na wano wazipizile ukulyako umukate nukumwa e waini. (Wazyani Luka 22:19, 20.) Cinji acakuti pe wo-o uwanda, tukakwelenganya na pa vintu ivizima ivyakunkolelo vino wano wawa ni suwilo lya kwikala umuyayaya munsi waliwayitopwa. (Ayize. 35:5, 6; 65:17, 21-23) Tutazipizile twalola vyo-o ivisinka ngati akampepe. Amuno awantu awavule watavimanya swinya watamanya nuwucindaminye wuno wawa munzuwi ya kwe Yesu. Asa vyo-o vitupu, weni wasizevya ni Cizusyo ukulingana navino e Yesu wasambilizizye awasambilizi wakwe. Amulandu ci wuno wakacitila wo-o?

5. Uzye awantu watalisile ukuzevya wuli Icizusyo pano awatumwa wa kwe Yesu awavule wafwilevye?

⁵ Awatumwa wa kwe Yesu awavule walilevye wafwa, awina Klistu wawufi wizile awinjila mwiwungwe. (Mat. 13:24-27, 37-39) Wavwanganga “ivyawufi ukuti wakwemele awasuwizi kwakwe woliwo.” (Imili. 20:29, 30) Cimwi pa ‘vyawufi’ vino wa-a awina Klistu wawufi watalisile ukusambilizya acakuti, e Yesu atapile umuwili wakwe “lyonganye nsu kukufumya uluwembu lwawavule,” ndi vino Baibolo yikasambilizya, lelo inzuwi ya kwe Yesu yizipizile ukunyocezwapo ukupwa imiku imivule. (Hebe. 9:27, 28) Awantu awavule mwe ya-a amanda wasuwila wo-o uwufi. Wakaya ku macalici cila sabata swinya ne mpindi zimwi wakaya cila wanda mukuzevya pa nzuwi ya kwe Yesu. Wakaya mukuzevya kuno wakatolika wakakwita ukuti “Ulukalesitiya nanti Masi.” b Ne imipepele yimwi, yeni yisizevya imfwa ya kwe Yesu imiku imivule, lelo nanti ciwe wo-o, yitivwicisya icete cete muno mwasula inzuwi ya kwe Yesu. Wamwi wakakolowozya ukuti, ‘Uzye kweni molimonye inzuwi ya kwe Yesu yingalenga ntetelwe pe vino nawembuka?’ Amulandu ci wuno wakakolowozezya lyo-o iwuzyo? Amuno wasuwila vino awantu wamwi wakalanda ukuti tutanga tutetelwe pamulandu vye ni nzuwi ya kwe Yesu. Uzye awasambi wa kwe Yesu wavwizye wuli awantu ukumanya uwupiliwulo wa nzuwi apano na vino wazipizile ukucita pakuzevya Icizusyo?

6. Pano cafikanga mu 1872, avyani vino iwumba lya wasambi we Baibolo lizile alivwicisya?

⁶ Mu 1870, iwumba lya wasambi we Baibolo lino lyatungululwanga ne Charles Taze Russell lyatalisile ukuyisambilizya sana amawaliko. Walondesyanga ukumanya uwupiliwulo wa nzuwi ya kwe Yesu nga na vino wazipizile ukucita pakwizucizya imfwa yakwe. Acino pano cafikanga mu 1872, wizile awivwicisya icisinka ca mu Baibolo icakuti e Yesu wapile inzuwi pakuti aluwule awantu wonsinye. Vyo-o vino wazanile, watavilesilevye ukuwa ankama yawo. Lelo wavisalanginye ukupitila mukuwomvya amabuku, wa nyuzipepala na wa magazini. Swinya apano watalisile nukusunkana lyonga mu mwaka pakuzevya Icizusyo ngati avino awina Klistu wakutalicila wacitanga.

7. Avizima ci vino tukazanamo mwe vino awasambi we Baibolo wavwambilizizye?

⁷ Pe yo-o impindi na sweswenye twazanamo ivizima mwe vino wa-a awina Klistu wazanile pa myaka imivule nkaninye yino yapitapo. Avizima ci vino twazanamo? E Yehova watwavwa ukwivwicisya muno inzuwi ya kwe Yesu yikasula na vino yilicita kwe sweswe na kuwantu wanji. (1 Yoh. 2:1, 2) E Baibolo yalanda pa masuwilo yawili yano awantu wano wakasecelesya Yehova wawa nayo, akuli ukuti​—ukuwa nu wumi wuno wisifwa kwi yulu apano ni lyakuti imintapendwa ya wantu waliwakwikala umuyayaya munsi. Tukapalamila sana kwe Yehova  nga cakuti twelenganya pe vino watukunda na pavizima vino tukazanamo wenga nawenga mu nzuwi ya kwe Yesu. (1 Pet. 3:18; 1 Yoh. 4:9) Ndi wulyanye vino awanawitu awacisinka wano walinjiko ku nsizi wacitanga, nasweswenye tukakwitako wanji ukuti wize wazanweko pano tukuzevya Icizusyo ukulingana navino e Yesu wasambilizizye awasambilizi wakwe.

8. Avyani vino awawomvi wa kwe Yehova wafuma wakacita ukufuma na kaali pakulalika awantu ku Cizusyo? (Lolani icikope.)

⁸ Papita imyaka imivule nkaninye ukufumilila pano awantu wa kwe Yehova watalicizile ukwita awantu ku Cizusyo. Ku kutalika kwa mwaka wa 1881, mu Ulupungu lwa kwe Malonda lumwi mwalinji icimanyisyo cakuti wakulalika awanawitu na wankazi awa ku United States ukuti wize wazanweko ku kulongana ukuyiwele kuno kwalinji nukuwela mu ng’anda ya mwanawitu ku Allegheny mu Pennsylvania. Ne mukupita kwa mpindi awanawitu na wankazi watalisile ukuzevya Icizusyo mu mawungwe yakumwawonye. Mu March 1940, wanenile wakawizya ukuti wangitako uwili wensinye mu cifulo cino wakawizizyamo wino angakunda ukuzanwako. Mu 1960, awuno walinji amwaka wakutalicilako, pano awa pa Bethel wapanjizile awa mu mawungwe wonsinye utupepala twakwitilako awantu ku Cizusyo. Ukufika pe yo-o impindi, twapa awantu utupepala twakuwitilako ku Cizusyo utuvule. Amulandu ci wuno tukawombesezya ukuwomvya impindi na maka yitu kukulalika awantu ku Cizusyo?

9-10. Awaweni wano wakazanamo ivizima mukuwombesya kwitu ukwakwita awantu ku Cizusyo? (Yohani 3:16)

⁹ Umulandu wonga wuno tukalalicila awantu ku Cizusyo, awakuti tukalonda wano wazanwako pa muku wakutalicila, wasambilile icisinka pe pevino e Yehova ne Yesu watucitila swensinye.  (Wazyani Yohani 3:16.) Tukasuwila ukuti vino wandi walole nukwivwa pa Cizusyo vyandi vilenge wavwambisye ukumanyilapo na vinji nukuwa awawomvi wa kwe Yehova. Lelo nanti ciwe wo-o, asa wa-a wonga wano wakazanamo ivizima, kwawa nawanjinye.

¹⁰ Tukalalikako na walyanye wano waleka ukuwombela Yehova. Tukacita wo-o pakuwizusyako ukuti e Yehova acili wa wakunda. Awavule wakazumila nga twawalalika swinya tukakwivwa icete nga twawalola wazanwako. Nga wazanwako, wakakwizuka vino wayitopwanga pano wawombelanga Yehova kaali. Lekani tulande pa cakulolelako ca kwe Monica. c E Monica wamunyosezizye icalembwa mu mpindi ye Korona. Nomba pansizi yakuzanwa ku Cizusyo mu 2021, walanzile ukuti: “Ko-o ukulongana kwa Cizusyo kwayiwezile nkaninye kwe nene. Amuku wakutalicilako pa myaka 20, ukufumilila pano nawizizizyepo awantu nukuwalalika ku Cizusyo. Nawombesizye ukufika pano papelezile amaka yane, amuno nkasalifya nkaninye pe vino e Yehova ne Yesu wancitila.” (Amalu. 103:1-4) Asamulandu nukuti awantu wangakana nanti ukuzumila, tukawombesya na maka yitu yonsinye ukuwalalika ku Cizusyo, amuno twamanya ukuti e Yehova akasalifya pe vino tukawombesya.

11. Uzye e Yehova wapaazile wuli ukuwombesya kwitu ukwakwita awantu ku Cizusyo? (Hagayi 2:7)

¹¹ E Yehova wapaazile ukuwombesya kwitu ukwakwita awantu ku Cizusyo. Asamulandu niviwindo vino wawisileko pamulandu ni ndwala ye Korona, impendwa ye wano wazanilwe ku Cizusyo mu 2021 yakuzile nkaninye, icakuti yafisile na kwe 21,367,603. Co-o cikusula mukuti impendwa ya Inte zya kwe Yehova ukuzinguluka insi yonsinye yinginjilamo mupipi ni miku yiwili ne hafu. Lelo nanti ciwe wo-o, e Yehova asiwika amano ku mpendwa, akawika amano ku muntu wenga na wenga. (Luk. 15:7; 1 Tim. 2:3, 4) Twasuwila ukuti e Yehova akawomvya umulimo wakwita awantu ku Cizusyo pakutwavwa ukuzana awantu wano wawa ni myezo imizima.​—Wazyani Hagayi 2:7.

12. Avyani vino vingalenga citutalile ukuzanwa ku Cizusyo? (Lolani icikope.)

¹² E Yesu walandizile lyankani ukuti mu manda ya kulecelezya tuliwapita mu vintu ivitale nkaninye ponga ngati​—akutukanya kwa lupwa, ukutucuzya, izya nkondo, izyandwala zino zikakwambucila apano ni vintu vinji. (Mat. 10:36; Mar. 13:9; Luk. 21:10, 11) Mpindi zimwi ivintu vyamusango wo-o vikalenga catutalila nukuzanwa ku Cizusyo. Avyani vino awanawitu na wankazi wacita pakucimvya zyo-o intazi, swinya e Yehova wawavwa wuli?

13. Uzye e Yehova wapaazile wuli ukuwombesya nukuyiwicilisya kwa kwe Artem ukwakuzevya Icizusyo asamulandu nukuti walinji mu cifungo?

¹³ Ukutunyepa. Awanawitu na wankazi wano wawanyepa pamulandu na vino wazumilamo, wakawombesya ukufika pano papelezile amaka yawo ukwizucizya imfwa ya kwe Yesu. Lekani tulandeko pe vino vyaciticizile e Artem. Mu 2020 mu mpindi ya Cizusyo, e Artem wamunyefile nukumuwika mu cifungo cino catalimfile amameter 17 (183-sq-ft) monsi monsi. Mwe co-o icifungo, wawikangamo awafungwa 4 nanti 5 pa mpindi iyili yonganye. Nomba asamulandu nu kuti walinji mu cifungo, wawomvizye vilyanye vino wakweti ku kupanjilako umukate ne waini ya pa Cizusyo swinya wapekinye nukuti ayize alande ilyasi lya Cizusyo wenganye. Lelo awafungwa wawuye wapepanga nkaninye fwaka swinya walandanga imvwango imbipe. Uzye e Artem wacisile wuli? Wawalenzile nga cakuti wangalekako ukupepa e fwaka nukulanda imvwango imbipe  pi awalavye lyonga pano akuzevya Icizusyo. E Artem watili,“Nayikundizile ukuwanenako pa Cizusyo.” Nanti acakuti wakanile ukuti watakulonda ukwivwako kwe vino vyalinji nukuwacitika, pansizi yakwivwa nukulolako kuno e Artem wazevyanga, watalisile ukumukolowozya amawuzyo.

14. Calinji wuli pakuti awantu wa kwe Yehova wazevye Icizusyo asamulandu ni ndwala ye Korona?

¹⁴ Indwala ye Korona. Pano kwalinji yo-o indwala ye Korona, awantu wa kwe Yehova watalongine ponga Icizusyo. Lelo co-o citalenzile wakane ukuzevya. Amawungwe yamwi kuno kwawa e netiweki, walongine Icizusyo ukuwomvya Intaneti. Nga imintapendwa ya wantu wano watakweti ulongo lwakuwomvya e intaneti, weni wacisile wuli? Munsi zimwi, amaofesi ya misambo yapekinye ukuti awantu wangiza watambe ilyasi lya Cizusyo ukuwomvya e TV nanti ukuteyelezya vye pa Redyo. Cinji acakuti, imisambo yapekinye amalyasi amakopwe ukucila mu vitundu 500 pakuti na walyanye wano wakakwikala mu ncende zya kutali wazevyeko Icizusyo. Ne awanawitu nawo watantisile ukuti wasenda ya-a amalyasi amakopwe nukutwalila awe mwe zyo-o incende.

15. Mukusambililako cani kumusambi we Baibolo uwizina lya kuti Sue?

 ¹⁵ Ukutukanya kwa lupwa. Wamwi cino cikalenga cawawomela ukuzanwa ku Cizusyo, akuwakanya kwa lupwa. Lekani tulande pa musambi we Baibolo uwizina lyakuti Sue. Mu 2021 pano uwanda wa Cizusyo wutani wufike, e Sue wanenile wino akamusambilizya e Baibolo ukuti atandi akumanisye ukuzanwako pamulandu wakuti walupwa lwakwe wamwi wakumukanya. Wino akamusambilizya e Baibolo wamuwazizizye iwaliko lya kwe Luka 22:44. Apano wamulondololezile ukuti nga tukupita mu ntazi, tuzipizile ukukolanya icakulolelako ca kwe Yesu, ukupitila mukupepa kwe Yehova nu kusuwila sana mwe weliwe. Uwanda wuno wakonsilepo e Sue wapekinye umukate ne waini nukutamba e programu ya Mapepo ya Mutondo Tondo ayayiwele pa jw.org. Ne amanguzi wayile kumuputule wakwe kuno akalala, nukuteyelezya kwi lyasi lya Cizusyo ukuwomvya e foni yakwe. Pasinzi yakumala ukulongana, walembezile wino akamusambilizya Baibolo ukuti: “Mwambomelezizye nkaninye mutondo. Nawombesizye ukufika pano papelezile amaka yane ukuzevyako Icizusyo swinya e Yehova wanjavwizye. Ntamanyile na vino ningalanda pakulanjizya vino indi ni nsansa na vino nkusalifya Yehova peco-o!” Uzye mukwelenganya ukuti namwemwe e Yehova angamyavwa nga mukupita mu ntazi iyikolaneko na yo-o?

16. Amulandu ci wuno tungasuwilila ukuti e Yehova alipaala ukuwombesya kwitu ukwakuzanwa ku Cizusyo? (Waroma 8:31, 32)

¹⁶ E Yehova akasalifya nkaninye nga cakuti twawombesya ukufika pano papelezile amaka yitu ukuzanwa ku Cizusyo. Tutakuvwilika ukuti alitupaala nga cakuti tukulanjizya ukusalifya pe vino watucitila. (Wazyani Waroma 8:31, 32.) Lekani swensinye twize tuzanweko ku Cizusyo wo-o umwaka swinya tuwombesye nkaninye mu mulimo wa kwe Yehova mu masabata ya Cizusyo ukufika pano papelezile amaka yitu.