1-2. Hana wa taʼondrasi ngaluo Wanörö Tödö ero röfi?

 ARAKHAGÖ 2.000 fakhe silalö, no itehegö khöda nosonia Yesu enaʼö taʼokhögö waʼauri si lö aetu. Ba mbongi fatua lö si mate ia, ifaretake ndra nifahaʼönia Yesu enaʼö lafalua wanörö tödö, iʼogunaʼö roti hegöi agu. Lö tola löʼö lafalua daʼö enaʼö tola itörö tödöra höli nibeʼe Yesu.—1 Ko. 11:23-26.

² Taʼoʼö fareta Yesu andrö börö me taʼomasiʼö ia. (Yoh. 14:15) Ero röfi, ba migu fatua lö mufalua Wanörö Tödö mazui na no aefa mufalua ia, taforomaʼö wa taʼandrö saohagölö ba höli si no ibeʼe Yesu khöda na talau mangandrö ba taʼangerönusi hadia gunania ba waʼaurida. Oya göi taʼogunaʼö ginötö ba halöwö fanuriaigö ba wogaoni niha enaʼö tola laʼondrasi ngaluo si tohude andrö. Ba yaʼita samösa, taforege sibai enaʼö tola taʼondrasi ngaluo Wanörö Tödö.

3. Hadia nitutunöda ba artikel daʼa?

³ Ba artikel daʼa, so tölu ngawalö niforege nono mbanua Yehowa enaʼö tola lafalua wanörö tödö faʼamate Yesu: (1) lafalua Wanörö Tödö ba lala si no itatugöi Yesu, (2) lakaoni niha enaʼö laʼondrasi Wanörö Tödö, (3) fao ba wamalua Fanörö Tödö hewaʼae na basaki zalua.

4. Hadia zindruhu si tola tafahaʼö ita ba wamalua Fanörö Tödö, ba hana wa ebua sibai böli zindruhu andrö? (Luka 22:19, 20)

⁴ Ero röfi na mufalua Wanörö Tödö, tafondrondrongo huhuo si teʼodane-dane moroi ba Zura Niʼamoniʼö si tola mameʼe fanema li ba zi hauga ngawua wanofu sabölö moguna sanandrösa ba höli. Tafahaʼö ita hana wa moguna höli ba niha gulidanö, ba hewisa waʼamate zi samösa niha tola ihöli niha sato. Tola göi tafahaʼö ita hadia geluaha roti hegöi agu, ba haniha manö zi tola manga roti ba samadu agu ba wanörö tödö andrö. (Baso Luka 22:19, 20.) Taʼangerönusi göi hadia manö howu-howu nitema niha sangokhögö tötönafö faʼauri ba gulidanö sagötö faʼara. (Yes. 35:5, 6; 65:17, 21-23) Ebua sibai mböli zindruhu nifahaʼöda yaʼita ba wanörö tödö andrö. Miliaran niha lö khöra faʼaboto ba dödö sanandrösa ba zindruhu andrö, ba lö aboto ba dödöra hawaʼamoguna höli si no ibeʼe Yesu. Lö göi lafalua wanörö tödö ba lala si no itatugöi Yesu. Hadia mbörö?

5. Me no mate ndra sinenge Yesu, hewisa wamalua niha fanörö tödö faʼamate Yesu?

⁵ Lö ara me no ato mate zinenge Yesu, ibörögö möi niha Keriso faya bakha ba mbanua niha Keriso. (Mat. 13:24-27, 37-39) Lafaʼema ’wamahaʼö selungu enaʼö fao khöra ndra nifahaʼö’. (Hal. 20:29, 30) Sambua ’wamahaʼö selungu’ nifaʼemara, yaʼia daʼö wa lö tola löʼö oya kali itehegö waʼaurinia Yesu. Sindruhunia sa, ifahaʼö ita Sura Niʼamoniʼö wa ”ha sakali mate ia irugi zi lö aetu ba wangefaʼö horö niha sato”. (Heb. 9:27, 28) Iadaʼa, ato niha satulö tödö zi faduhu tödö ba wamahaʼö selungu andrö. Ba zi hauga gereja, asese owulo ira, ba so zamalua daʼö ero maʼökhö ba wamalua ”Eka Risti” mazui ”Misa Kudus”. b Gereja tanö böʼö tenga simane daʼö waʼasese wamaluara, hizaʼi ato ba nösi gerejara lö khöra faʼaboto ba dödö hadia guna höli si no ibeʼe Yesu andrö. Te so zangumaʼö, ’Hadia tola teʼefaʼö horögu börö waʼamate Yesu andrö?’ Tola so ba wangera-ngerara zimane daʼö börö me tedönisi dödöra ba mbua gera-era nifaʼema niha wa höli si no ibeʼe Yesu andrö tebai iheta horöda. Hewisa zoloʼö khö Yesu ba wanolo niha böʼö enaʼö tola aboto ba dödöra hadia guna höli andrö ba enaʼö tola lafalua wanörö tödö faʼamate Yesu ba lala si tefaudu?

6. Ba ndröfi 1872, hadia rahu-rahu si tola lahalö ono zekola Zura Niʼamoniʼö?

⁶ Ba gafuriata abad si 19, ono zekola Zura Niʼamoniʼö nidöniaʼö Charles Taze Russell, labörögö lahaogö wamahaʼö yaʼira ba Zura Niʼamoniʼö. Omasi ira na aboto ba dödöra zindruhu sanandrösa ba höli nibeʼe Yesu hegöi hewisa lala ba wamalua fanörö tödö faʼamate Yesu andrö. Ba ndröfi 1872, lahalö gangetula wa Yesu andrö no ibeʼe ia tobali höli ba niha fefu. Ba lö laʼiröʼö zindruhu andrö ha khöra samösa, hizaʼi laʼogunaʼö ngawalö mbuku, koran, hegöi majalah ba wamatunö ba niha fefu. Lö ara aefa daʼö, owulo ira sakali ba zi döfi ba wamalua fanörö tödö faʼamate Yesu hulö simane nifalua niha Keriso me abad siföföna.

7. Hadia mbua nitemada me no lafalua riset ono zekola Zura Niʼamoniʼö ba zilalö?

⁷ Riset nifalua nono zekola Zura Niʼamoniʼö ba zilalö, moguna ia khöda iadaʼa. Börö howu-howu Yehowa, tola aboto ba dödöda zindruhu sanandrösa ba höli si no ibeʼe Yesu hegöi gunania khöda. (1 Yo. 2:1, 2) Ba Zura Niʼamoniʼö, tafahaʼö göi ita sanandrösa ba zi dombua  tötönafö ba niha sangomusoiʼö tödö Yehowa. So ösa ba gotaluara zi möi ba zorugo ba lö irai mate, ba tanö böʼönia auri ira ba gulidanö sagötö faʼara. Tola itugu ahatö ita khö Yehowa na taʼangeragö hawaʼebua waʼomasinia khöda hegöi bua si tola tatema börö höli si no ibeʼe Yesu khöda zamösana. (1 Fe. 3:18; 1 Yo. 4:9) Simane ira talifusöda si lö faröi ba zilalö, omasi ita ba wogaoni niha wefao ba wamalua Fanörö Tödö simane si no itatugöi Yesu.

8. Hadia manö nifalua nono mbanua Yehowa ba wogaoni niha enaʼö laʼondrasi Wanörö Tödö? (Faigi gambara.)

⁸ No ara lafalua ono mbanua Yehowa ba wogaoni niha ba wangondrasi Fanörö Tödö. Ba ndröfi 1881, ira talifusöda si so ba Amerika Serikat, lakaoni ira ba wangondrasi angowuloa si tohude andrö nifalua ba zi sambua omo si so ba Allegheny, Pennsylvania. Ba gafuriata, ero sambua mbanua niha Keriso lafalua Wanörö Tödö zamösana. Ba mbaŵa si Tölu 1940, lafatunö khö ndra sanuriaigö wa tola lakaoni gofu haniha manö zadöni tödö ba mbanua si möi ira manuriaigö. Ba ndröfi 1960, ihenaigö Betieli undranga tercetak si oföna sibai nibeʼe ba mbanua niha Keriso. Iʼotarai daʼö, no saʼae miliaran waʼoya undranga nibeʼe nono mbanua Yehowa ba wangondrasi Fanörö Tödö. Hana wa tatehegö ginötö hegöi faʼabölöda ba wogaoni niha böʼö?

9-10. Haniha manö zanema mbua na taforege ba wogaoni niha böʼö ba wangondrasi Fanörö Tödö? (Yohane 3:16)

⁹ Sambua gohitö dödöda wa takaoni niha ba wangondrasi Fanörö Tödö yaʼia daʼö omasi ita na latema mbua moroi ba Wanörö Tödö andrö. Niha sawena mangondrasi fanörö tödö, tola lafahaʼö ira sanandrösa ba  nifalua Yehowa hegöi Yesu soguna ba khöda fefu. (Baso Yohane 3:16.) Tatötöna enaʼö fefu zi no laʼila hegöi nirongora ba wanörö tödö andrö, tola möi famarou dödöra enaʼö lafahaʼö ira ba tobali nono mbanua Yehowa. Haniha manö nasa zi tola manema bua ba Wanörö Tödö?

¹⁰ Takaoni ndra talifusöda si no ara mamöhöli halöwö ba wamati. Na tafalua daʼö, tafasugi ba dödöra wa iʼomasiʼö ira nasa Yehowa. Ato ba gotaluara zanemaʼö fogaoni moroi khöda. Tatu omuso dödöda börö me falukha ita khöra. Ba Wanörö Tödö andrö, tola ifuli itörö tödöra waʼomuso dödö nirasoira me lafosumange Yehowa. Nehegö zi no irai alua khö Monica. c Ifuli tobali ia sanuriaigö sowölö-ölö sagötö pandemi COVID-19. Me no aefa iʼondrasi Wanörö Tödö ba ndröfi 2021, imane wangumaʼö, ”Tohude sibai khögu Wanörö Tödö nifalua ba ndröfi daʼa. Me no aefa zi 20 fakhe, ifuli tola möido zui ba wanuriaigö ba ukaoni niha ba wangondrasi Fanörö Tödö Faʼamate Yesu. Uforege sibai enaʼö sökhi wamaluagu daʼö börö me uʼandrö saohagölö ba zi no ifalua Yehowa hegöi Yesu khögu.” (Si. 103:1-4) Gofu hewisa wanemaʼö niha yaʼita, takaoni ira si fao faʼowölö-ölö ba wangondrasi Fanörö Tödö börö me aboto ba dödöda wa iʼameʼegö tödö Yehowa wamorege si no tafalua.

11. Hadia zangoromaʼö wa ifahowuʼö Yehowa wamorege nifaluada ba wogaoni niha ba wangondrasi Fanörö Tödö? (Hagaʼi 2:7)

¹¹ Ifahowuʼö Yehowa wamorege nifaluada ba wogaoni niha böʼö ba Wanörö Tödö. Me döfi 2021, hewaʼae oya daha-taha börö COVID-19, awena sakali daʼa faʼato zangondrasi Fanörö Tödö irugi 21.367.603 niha. Arakhagö dua kali amatonga abölö ato moroi ba waʼato ndra Samaduhuʼö Yehowa ba zi sagörö ulidanö. Hewaʼae simanö, tenga ha asala inehegö Yehowa hawaʼato zangondrasi ba Wanörö Tödö andrö, hizaʼi inehegö ira ero zamösana. (Luk. 15:7; 1 Ti. 2:3, 4) Faduhu dödöda wa ba ginötö tabeʼe undranga Wanörö Tödö, sindruhunia itolo ita Yehowa ba wanöndra niha satulö tödö.—Baso Hagaʼi 2:7.

12. Hadia manö zanaisi yaʼita ba wangondrasi Fanörö Tödö? (Faigi gambara.)

¹² Simane si no ifaʼeleʼö Yesu, oya gabula dödö salua ba ngaluo safuria, simane fanaisi moroi ba nösi nomo, famakao, fasuwöta, fökhö waba, hegöi tanö böʼönia. (Mat. 10:36; Mrk. 13:9; Luk. 21:10, 11) Itaria daʼö zi tobali taha-tahada ba wanörö tödö faʼamate Yesu. Hadia manö zi no lafalua ira talifusöda ba wanaögö abula dödö andrö, ba hewisa wanolo Yehowa yaʼira?

13. Hewisa wamahowuʼö Yehowa angetula hegöi faʼabarani Artem ba wamalua Fanörö Tödö ba gurunga?

¹³ Ba ginötö labeʼe ba gurunga. Ira talifusöda nikuru börö wamatira, laforege sibai wamalua fanörö tödö faʼamate Yesu. Nehegö atö zalua khö Artem. Me baŵa Wanörö Tödö 2020, labeʼe ia ba gurunga si 17 meter öfa sagi, si toʼölönia monaha daöfa mazui dalima niha gurunga. Hewaʼae bakha ba gurunga so ia, mofozu Artem ba wanöndra roti hegöi agu soguna ba Wanörö Tödö. No iʼera-era ba wamaʼema huhuo Wanörö Tödö soguna khönia samösa. Hizaʼi, asese moroko ba falele niha gurunga tanö böʼö si so ba daʼö. Hadia nifalua Artem? Iʼandrö khöra enaʼö böi moroko ba falele ira he ha sambua za manö. Ba zi lö mudöna-döna, laʼoʼö niwaʼönia andrö. Imane Artem, ”Usofu khöra hewisa na ututunö sanandrösa ba Wanörö Tödö.” Ba wamobörö, lawaʼö wa lö adöni dödöra. Hizaʼi, me no aefa  lafondrondrongo huhuo Wanörö Tödö nifaʼema Artem, oya wanofu nifaʼemara sanandrösa ba wanörö tödö andrö.

14. Hewisa wa tola mufalua Wanörö Tödö sagötö pandemi COVID-19?

¹⁴ Sagötö pandemi COVID-19. Sagötö pandemi, tebai owulo nono mbanua Yehowa ba zi sambua nahia ba wamalua Fanörö Tödö. Hewaʼae simanö, lö tebulö mufalua Wanörö Tödö. d Banua niha Keriso si so internet, lafalua Wanörö Tödö laʼogunaʼö konferensi video. Hizaʼi, hewisa ndra sanuriaigö si zuta faʼato si lö hadöi internet? Ba zi hauga soi, lafaʼema huhuo Fanörö Tödö ba TV hegöi radio. Baero daʼö, larekam huhuo Fanörö Tödö ba gödo ndraha ba zi töra 500 ngawalö li enaʼö tola lafondrondrongo ira niha si toröi ba mbanua saröu. Aefa daʼö, so ndra talifusöda samasao rekaman andrö ba niha sangogunaʼö yaʼia.

15. Hadia wamahaʼö nihalömö moroi ba zalua khö Susan?

¹⁵ Fanaisi moroi ba nösi nomo. So ösa zorasoi wa abua khöra wangondrasi Fanörö Tödö börö wanaisi moroi ba nösi nomo. Nehegö  atö zalua khö zi samösa niha nifahaʼö ba Zura Niʼamoniʼö sotöi Susan. Me döfi 2021, sahari fatua lö mufalua Wanörö Tödö, ifatunö khö zamahaʼö yaʼia wa tebai iʼondrasi Wanörö Tödö börö wanaisi moroi ba nösi nomonia. Aefa daʼö, ibaso khönia Luka 22:44 samahaʼö yaʼia ba Zura Niʼamoniʼö andrö, ba itutunö wa moguna taʼoʼö duma-duma Yesu na alua khöda gabula dödö, yaʼia daʼö talau mangandrö khö Yehowa ba taʼodaligö ia soroi ba dödö. Mahemolunia, ifaʼanö roti hegöi agu Susan ba wamalua Fanörö Tödö, ba ifaigi Ibadah Pagi si tohude ba jw.org. Ba zi bonginia, möi ia ba mbateʼe ba ifondrondrongo huhuo Fanörö Tödö ba HP-nia. Me no aefa daʼö, ifaʼoheʼö SMS khö zamahaʼö yaʼia ba Zura Niʼamoniʼö, ”Tefarou sibai dödögu ba wehedemö andrö menewi. No ufalua fefu zi tola ufalua enaʼö tola uʼondrasi Wanörö Tödö, ba sindruhu-ndruhu itolo ndraʼo Yehowa. Omuso sibai dödögu iadaʼa ba uʼandrö saohagölö!” Moloʼö yaʼugö, na alua khöu zimane daʼö, hadia tola itolo ndraʼugö Yehowa?

16. Hana wa tola faduhu dödöda wa hasambalö ifahowuʼö Yehowa wamorege nifaluada ba wangondrasi Fanörö Tödö? (Roma 8:31, 32)

¹⁶ Iʼameʼegö tödö sibai Yehowa wamorege nifaluada ba Wanörö Tödö Faʼamate Yesu. Faduhu dödöda wa ifahowuʼö ita Yehowa na taforomaʼö wangandrö saohagölö ba zi no ifalua khöda. (Baso Roma 8:31, 32.) Börö daʼö, halo gangetula ba wangondrasi ngaluo Wanörö Tödö ba ndröfi daʼa. Fatua lö mufalua Wanörö Tödö hegöi na no aefa mufalua, forege ba wamalua halöwö ba wamati soroi ba dödö.