OMWATSI W’ERIGHA 4
Yehova akatuwatikaya omughulu tukayikasa eryibuka oluholo lwa Yesu
“Mukole mutya erinyibuka.”—LUKA 22:19.
OLWIMBO 19 Akalyo k’Omukama ak’erigholo-gholo
EBIKENDIKANIBWAKO a
1-2. Busanaki tukahika oko muhindano w’Eryibuka oluholo lwa Yesu?
YESU mwatuholera tutoke erisyabana engebe y’erikota. Hamabilaba hakuhi emyaka 2 000. Omo milaliryo y’oluholo lwiwe, Yesu mwabwira abigha biwe ati babye bakibuka ekyo abakolera busana n’olwanzo. Mwabugha ati babye bakakolesya omukati n’edivai bakibuka oluholo lwiwe.—1 Kor. 11:23-26.
2 Tukasikaya ekyalayiro kya Yesu ekyo kundi tumwanzire kutsibu. (Yoa. 14:15) Obuli mwaka embere n’enyuma w’erikola Omuhindano w’Eryibuka, tukakanganaya erisima lyetu. Tukakola tutya omughulu tukalengekanaya oko ndundi y’oluholo lwa Yesu. Kandi tukalabaya endambi nene y’omw’itulira tukabwira abandu tuti basyahika oko muhindano oyo. N’akandi situlyanza omwatsi wosi-wosi akaleka tukabula oko muhindano oyo.
3. Tukendikania okuki omo mwatsi ono?
3 Omo mwatsi ono, tukendikania oko myatsi isatu eyo Abimiri ba Yehova bakayikasa erikola omughulu w’eryibuka oluholo lwa Yesu. Eky’erimbere, bakakola ngoko Yesu abakangiriraya. Ekyakabiri, bakabwira abandi bati bahike oko muhindano oyo. N’ekyakasatu, bak’ibuka oluholo lwa Yesu nomo bangabya omo mibere eyikalire.
BAKAKOLA NGOKO YESU ABAKANGIRIRAYA
4. Omukania w’Eryibuka akakanaya oko myatsi yahi, kandi busanaki ni lusunzo lunene eriminya emyatsi eyo? (Luka 22:19, 20)
4 Oko buli muhindano w’Eryibuka, tukahulikirira omukania owakasubiraya oko mabulyo malebe. Omukania oyo akakanganaya busanaki lyabya litolere Yesu iniatuholera kandi oluholo lwiwe nga lwangalihira luti amalolo w’abandu bangyi. Kandi omukania oyo akatukanganaya omukati n’edivai nga bikafananisayaki. Kandi akatukanganaya nga ni bahi bo batolere erirya oko mukati n’erinywa oko divai. (Soma Luka 22:19, 20.) Ekindi, tukaghaniraya oko bibuya ebyo Yehova akendisyaha abakendisyikala oko kihugho. (Isa. 35:5, 6; 65:17, 21-23) Ni lusunzo lunene eriminya emyatsi eyo! Hali bandu bangyi kutsibu abatasi emyatsi eyo. Kandi sibasi endundi y’oluholo lwa Yesu. N’akandi, sibalyibuka oluholo lwa Yesu ngoko atukangiriraya. Busanaki tukabugha tutya?
5. Abangyi b’oko bakwenda babere babihola, mohabyaki?
5 Mughulu muke abangyi b’oko bakwenda ba Yesu babihola, Abakristo b’amabehi mobahuluka omo ndeko. (Mat. 13:24-27, 37-39) Abakristo abo mobabugha “emyatsi y’amabehi, erikura abigha erikwamabo.” (Emib. 20:29, 30) Abakristo b’amabehi abo mobatsuka erikangirirya ‘omwatsi w’amabehi’ bati eBiblia yikateba omughulu ikabugha yiti Yesu mwahola “ngendo nguma eriheka ebibi by’abandu bangi.” Ibo bati lyabya litolere Yesu inyahola ngendo nyingyi. (Ebr. 9:27, 28) Munabwire hali bandu bangyi abikirirye amabehi ayo. Oko buli yenga, n’oko yindi mighulu obuli kiro bakalya omukati kutse ibanywa n’oko divai omo bisomo byabo. b Ebindi bisomo bikibuka hake oluholo lwa Yesu, aliwe sibyasi ndeke-ndeke endundi y’oluholo lwa Yesu. Abandi bakanayibulaya bati: ‘Kwenene-kwenene oluholo lwa Yesu lwanganaleka amalolo waghe iniaghanyirwa?’ Bakayibulaya batya busanaki? Kundi babirikangiribwa ambu oluholo lwa Yesu silwangataleka amalolo akasangulwa. Abigha ba Yesu b’ekwenene bakawatikaya bati abandu abo?
6. Oko mwaka 1872, abigha b’eBiblia mobafumbula ki?
6 Oko nduli y’akarne ke 19, Charles Taze Russell n’abandi bigha b’eBiblia mobatsuka eritsopolya Amasako wo ndeke. Babya ibanzire ibaminya endundi y’oluholo lwa Yesu kandi nga lutolere ilwibukwa luti. Oko mwaka 1872, mobafumbula ngoko eBiblia yikabugha yiti mwaholera abandu bosi. Mobatahunira ebyo bafumbula. Omo mwanya w’ekyo, ebyo bafumbula mobahirabyo omo bitabu, n’omo syogazeti. Kandi biro bike enyuma sy’aho mobatsuka erikola ng’Abakristo b’oko karne k’erimbere. Mobatsuka eribya bakibuka oluholo lwa Yesu kaghuma oko mwaka.
7. Tunemubana tuti endundi omo myatsi eyo abigha b’eBiblia bafumbula?
7 Munabwire tunemubana endundi omo myatsi eyo abigha b’eBiblia abo bafumbula. Tuti? Yehova abirituwatikya eriminya ndeke-ndeke ebilebirye oluholo lwa Yesu kandi nga lukaletera abandu bosi b’endundi yahi. (1 Yoa. 2:1, 2) Kandi twabiriminya ngoko abandu abakatsemesaya oMungu bakendisyabyaho kera na kera, abandi elubula, n’abandi oko kihugho. Omughulu tukalangira ngoko Yehova atwanzire kutsibu kandi ngoko oluholo lwa Yesu lukatuletera endundi, tukayitunda hakuhi na Yehova. (1 Pet. 3:18; 1 Yoa. 4:9) Neryo ng’abalikyetu ba kera, tukabwira abandu tuti base bibuke haghuma netu oluholo lwa Yesu, tukibukalo ngoko Yesu abugha ati ilwibukwa.
TUKABWIRA ABANDI TUTI BAHIKE OKO MUHINDANO OYO
Wangakolaki utoke erighabira abandu bangyi b’emyaliko y’omuhindano w’Eryibuka? (Lebaya enungu 8-10) e
8. Abandu ba Yehova bakakolaki abandi batoke erihika oko muhindano w’Eryibuka? (Ulebaye epitsa.)
8 Erilua kera, abandu ba Yehova bakabirikira abandu oko muhindano w’Eryibuka. Eritsuka oko 1881, abaghala n’abali betu omo Amerika mobabwirwa ambu bakolere haghuma omuhindano oyo omo nyumba ya mughala wetu mughuma omo Allegheny, Pennsylvania. Enyuma w’aho, obuli ndeko moyatsuka eriyikolera omuhindano oyo. Oko Mwisi 3, 1940, abatuliri mobabwirwa ambu babirikire abandi b’omo kiharo kyabo abanzire ekwenene oko muhindano oyo. Oko mwaka 1960, eBeteli moyatsuka eritumira esyondeko sy’emyaliko. Eritsuka aho, twabirighabira abandu amamilioni na mamilioni w’emyaliko. Busanaki tukayikasa kutsibu eribirikira abandi oko muhindano oyo?
9-10. Omughulu tukayikasa eribirikira abandi b’oko muhindano w’Eryibuka, ni bahi abakabana endundi? (Yoane 3:16)
9 Tukabirikira abandi b’oko muhindano oyo kundi twanzire abakahika kugho kw’engendo y’erimbere ibaminya ekyo Yehova na Yesu babiritukolera itwebosi. (Soma Yoane 3:16.) Tukabya itunayiketere ngoko ebyo bakendilangira n’eryowa oko muhindano oyo bikendileka ibanza eriminya bingyi n’eritsuka erikolera Yehova. Aliwe n’abandi bakanabana endundi.
10 Kandi tukabirikira n’ababirileka erikolera Yehova kundi twanzire eribibukya ngoko Yehova akinabanzire. Abangyi bakahika, neryo tukatsema kutsibu erilangirabo. Erihika oko muhindano oyo likaleka ibibuka ngoko babya n’obutseme bunene omughulu babya bakakolera Yehova. Tukanaye oko ky’erileberyako kya Monica. c Omo mughulu w’eKorona, mobamuwatikya erisubira omubírí w’eritulira. Mwahika oko muhindano w’Eryibuka owe 2021. Mwabugha ati: “Mongatsemera omuhindano wo kutsibu. Nabya inabiribugha emyaka 20 isinditulira. Lero namatulira n’eribirikira abandu b’oko muhindano w’Eryibuka. Monayikasire busana n’erisima kutsibu ekyo Yehova na Yesu babirinyikolera.” (Esy. 103:1-4) Abandu banganahika kutse ibatahika. Nomo bine, itwe tukabirikirabo kundi twasi ngoko Yehova akatsema omughulu tukakola tutya.
11. Niki ekikakanganaya ngoko Yehova akatuwatikaya omughulu tukabirikira abandu b’oko muhindano w’Eryibuka? (Hagai 2:7)
11 Yehova akatuwatikaya kutsibu omughulu tukabirikira abandu b’oko muhindano w’Eryibuka. Ng’eky’erileberyako, n’omo hanabya obukoni bw’eKorona, abandu 21 367 603 mobahika oko muhindano w’Eryibuka owe 2021. Abo babya bandu bangyi. Omughanzo oyo ni hakuhi ngendo ibiri n’enusu Abimiri ba Yehova abali omo kihugho kyosi! Aliwe Yehova syalilebaya obungyi bw’abandu. Akalebaya obuli mundu oyukahika. (Luka 15:7; 1 Tim. 2:3, 4) Twasi ngoko omughulu tukaha abandu b’emyaliko, Yehova akatuwatikaya eribana abanzire eriminya ekwenene.—Soma Hagai 2:7.
TUKIBUKA OLUHOLO LWA YESU NOMO TWANGABYA OMO MIBERE EYIKALIRE
Yehova akatuwatikaya omughulu tukayikasa erihika oko muhindano w’Eryibuka (Lebaya enungu 12) f
12. Ni myatsi yahi eyangaleka ikyakala okw’itwe eryibuka oluholo lwa Yesu? (Ulebaye epitsa.)
12 Yesu mwabugha ati omo biro by’enduli emyatsi yikendisyatukalako. Mwabugha ati abatunga betu bakendisyatughana, ati tukendisyendereribwa. Kandi mwabugha ati hakendisyabya amalwa, amakoni, n’awandi maligho. (Mat. 10:36; Mar. 13:9; Luka 21:10, 11) Emyatsi eyi yikanaleka ikyakala okw’itwe eryibuka oluholo lwa Yesu. Balikyetu bakakolaki emyatsi eyo siyileke bakataluka eryibuka oluholo lwa Yesu? N’akandi Yehova akabawatikaya ati?
13. Niki ekikakanganaya ngoko Yehova mwawatikya Artem omughulu ayikasa eryibuka oluholo lwa Yesu iniane omo muliki?
13 Abali omo muliki. Balikyetu ababohirwe busana n’obwikirirya bwabo, bakakola ekyosi-kyosi batoke eryibuka oluholo lwa Yesu. Omughuma w’oko balikyetu abo ni Artem. Omuhindano w’Eryibuka owe 2020 ahika iniane omo muliki. Mobamubohera omo kumba kanyoho-nyoho iyo n’abandi balume bani. Nomo anabya omo muliki, mwabana omukati n’edivai eby’erikolesya okw’Ibuka. Kandi mwapanga eriyilabirya omukania w’Eryibuka oluholo lwa Yesu. Aliwe ababya babohirwe haghuma naye ibakafuta etaba n’eribugha amakaku. Mwakolaki? Mwabasaba ati nga banganaleka erifuta n’eribugha amakaku omo saha nguma nyisa. Eky’eriswekya, abalume abo mobaligha. Artem akabugha ati: “Monanza eribabwira emyatsi eyilebirye omuhindano oyo.” Oko mwanzo, mobaghana. Aliwe enyuma syaho, babere babilangira n’eryowa Artem akibuka oluholo lwa Yesu, mobamubulya amabulyo mangyi.
14. Abandu ba Yehova mobayikasa bati batoke eryibuka oluholo lwa Yesu omo mughulu w’eKorona?
14 Omughulu w’eKorona. Busana n’eKorona, abandu ba Yehova mobatahindana haghuma kibiri-biri bakibuka oluholo lwa Yesu. Aliwe ekyo mokitaleka bakatendyibukalo. d Esyondeko esyabya n’obutoki bw’erikolesya e enternete mosyibuka oluholo lwa Yesu erilabira e vidéoconférence. Neryo n’abandi bangyi abatawite obutoki bw’erikolesya enternete mobakola bati? Omo bindi bihugho, omukania w’Eryibuka mwalaba oko televizyo kutse oko radio. Kandi, esyobeteli mosyahamba omukania w’Eryibuka omo mibughe eyilabire oko 500. Ekyo mokyaleka abate bangakwamagho oko televizyo kutse oko radio nabo batoke erikwamagho. Balikyetu mobaha baghala betu abo b’esyorekodi esy’omukania oyo.
15. Eky’erileberyako kya Sue kyamakwighisyaki?
15 Eryendereribwa omo kihanda. Oko bandi, eryendereribwa omo kihanda likaleka ikyakala eryibuka oluholo lwa Yesu. Tukanaye oko ky’erileberyako ky’omwigha w’eBiblia oyukahulawa mo Sue. Oko milaliryo y’Eryibuka erya 2021, Sue mwabwira oyukamukangiriraya eBiblia ati busana n’eryendereribwa ry’omo kihanda kiwe, syenditoka erihika oko muhindano w’Eryibuka. Omughalimu wiwe w’eBiblia mwamusomera Luka 22:44. Neryo mwamukanirya ngoko omughulu tuli omo maligho, litolere itwakola nga Yesu. Yesu mwasaba Yehova n’eriyiketeraye n’omutima wosi. Oko kiro ky’Eryibuka, Sue mwateghekania omukati n’edivai, neryo amakwama Eriramya ry’omo asubui rye kiro ky’Eryibuka oluholo lwa Yesu oko jw.org. Omw’igholo, iniane iyuwene omo kyumba kiwe, mwakwama omukania w’Eryibuka oko telefone yiwe. Enyuma syaho, Sue mwahandikira omughalima wiwe w’eBiblia ati: “Muligholo, mowanyisubirye omutima wo kutsibu. Mongayikasa isinatala okw’Ibuka oluholo lwa Yesu, na Yehova mwakanyiwatikaya. Nyitsemire kutsibu kandi nyiri n’erisima rinene kutsibu!” Naghu wamabya omo hali ng’eyo, ukalengekanaya uti Yehova anganakuwatikya?
16. Niki ekikaleka itwikirirya ngoko Yehova akenditutsumula omughulu tukayikasa eryibuka oluholo lwa Yesu? (Abanya Roma 8:31, 32)
16 Yehova akatsema kutsibu omughulu tukayikasa eryibuka oluholo lwa Yesu. Twikirirye ngoko twamakangania ko tukasima ebyo abiritukolera, iniakenditutsumula. (Soma Abanya Roma 8:31, 32.) Neryo kwesi isitwabula oko muhindano w’Eryibuka oluholo lwa Yesu ow’omwaka ono. Kandi amayenga awali embere n’enyuma w’omuhindano oyu, tuyikase eritulira kutsibu.
OLWIMBO 18 Tukasima busana n’embanulo
a Abandu bangyi omo kihugho kyosi bakendisyibuka oluholo lwa Kristo omo Pili, kiro 4 Omwisi 4, 2023. Oko bangyi, yikendisyabya ngendo yabo y’erimbere. Abandi ababya ibabirileka erikolera Yehova nabo bakendisyahika oko muhindano oyo. N’abandi banawite ebyangaleka ibatahika. Nomo bine bitya, bakendisyayikasa sibabule kugho. Nomo wangabya omo mibere eyiri yiti, Yehova akendisyatsema wamasyayikasa uhike oko muhindano oyo.
b Ab’omo bisomo ebyo bikirirye bati omughulu bakalya omukati kutse erinywa oko divai, omukati akabinduka mo mubiri wa Yesu, n’edivai iyabya musasi wiwe. Bikirirye bati obuli ngendo eyo mundu akalya oko mukati n’erinywa oko divai, akabya inyakalya omubiri wa Yesu n’erinywa oko musasi wiwe.
c Awandi mena mwakabindulawa.
d Ulebaye emyatsi eyiri oko jw.org eyiwite omutwe “2021 Mwadhimisho wa Ukumbusho.”
