1-2. Ndaŵa yanji tupezekapo pa Chikumbukilo chaka chilichonse?

 PAFUPI-FUPI vyaka 2.000 vapita, Yesu epeleka moyo wake chifukwa cha sewo, kuti vizankhale vokwanishika kuzafwana moyo wosasila. Usiku wakuti apaiwe m’mawa mwake, Yesu elamula ophunzila ŵake kuti akokumbukila vechichita powonesha chikondi chake mwa kuchita mwambo wosavuta wamene poyendeshewa nkate na vinyu.—1 Akor. 11:23-26.

² Tumvwila lamulo ya Yesu chifukwa chakuti tumukonda ngako. (Yoh. 14:15) Chaka chilichonse pa nyengo ya Chikumbukilo, tuwonesha kuti tutembeja pa vinthu vechitichitila mwa kupatula nthawe yopemphela noganizila vayutanthauza imfwa yamene iyi kuli ŵanthu. Tuwoneshasoti kutembeja mwa kuyangijila utumiki wasu, nolimbikisa ŵanthu anyinji kuti azakwanishe kupezekapo pa chochitika chapadela chamene ichi. Ndipo kulaŵila chendi, nise osimikija ntima kuti tilolelini chilichonse kutikangisha kupezeka pa Chikumbukilo.

3. Kansi tikambilane chinji mu nkhani ino?

³ Mu nkhani ino, tikambilane njila zitatu zakukatishila ntchito ŵanthu a Yehova kuti akumbukile imfwa ya Yesu: (1) mwa kuyambasoti kuchita Chikumbukilo mu njila yechinkhazikisha Yesu, (2) mwa kuitila ayakine ku Chikumbukilo, ndipo (3) mwa kupezekapo pa Chikumbukilo olo kuti okumana na mavuto.

4. Kansi ni mfundo za choonadi zotyani zufotokozewa chaka chilichonse pa Chikumbukilo, ndipo ndaŵa yanji tufunikalini kupepusha mfundo zamene izi? (Luka 22:19, 20)

⁴ Chaka chilichonse, tumvwishila nkhani ya m’Baibolo yamene yuyankha momvwika luweme makonsho anyinji. Tuphunzila  chifukwa chake ŵanthu anyinji ofunikila dipo, komasoti chifukwa chake n’vokwanishika kuti imfwa ya munthu m’mozi ilipile machimo a ŵanthu anyinji. Tukumbushiwa kuti nkate na vinyu vupanamila chinji komasoti ŵanthu oyenelela kulya nkate na kumwa vinyu. (Ŵelengani Luka 22:19, 20.) Komasoti, tuganizila za sogolo iweme ngako yakuyembekezela ŵanthu akuti azankhale pano pachalo mpaka kale-kale. (Yes. 35:5, 6; 65:17, 21-23) Tufunikalini kuziwona mopepuka mfundo zamene izi za choonadi. Ŵanthu mabiliyoni anyinji omvwishalini vinthu vamene ivi, ndipo otembejalini kufunika kwa nsembe ya Yesu. Kuyangijila pamene apa, ove ochitalini Chikumbukilo mokatijana na njila yechinkhazikisha Yesu. Ndaŵa yanji tunena tetyo?

5. Atumwi anyinji pechimwalila, kansi ŵanthu eyamba kuikumbukila tyani imfwa ya Yesu?

⁵ Pechingomwalila atumwi anyinji a Yesu, Akhilisitu awenye eloŵa mumpingo. (Mt. 13:24-27, 37-39) Ove enzelaŵila “vinthu vosokonezeka kuti apatushe ophunzila kuti akoŵakonkheja.” (Mac. 20:29, 30) Chimozi mwa “vinthu vosokonezeka” vamene ivi n’chakuti Akhilisitu awenye eyamba kuphunzisa kuti Yesu aliyepeleke muŵili wake, “kamozi tyala kuti anyamule machimo a ŵanthu anyinji” monga mwayunenela Baibolo, koma kuti nsembe yake yenzefunika kupelekewa moweleja-weleja. (Ahe. 9:27, 28) Masiku ŵano pali ŵanthu anyinji aweme mitima amene okhulupilila chiphunziso chawenye chamene ichi. Ove oluta kutchetchi sondo iliyonse—ndipo nthawe ziyakine oluta nsiku iliyonse—kuti achite mwambo wa nsembe ya Yesu wamene chipembezo chakatolika chuuita kuti “Nsembe ya Misa.” b Ŵanthu a vipembezo viyakine, nthawe ziyakine okumbukila imfwa ya Yesu, koma omvwishalini bwino-bwino tanthauzo ya nsembe ya Yesu. Ayakine payakine angakonshe kuti, ‘Kansi imfwa ya Yesu yutanthauza chendi kuti machimo ŵangu angakhululukiwe?’ Ndaŵa yanji ove okonsha konsho yamene iyi? Ndaŵa yakuti okhulupilila vakunena ŵanthu ayakine kuti machimo angakhululukiwelini chifukwa cha imfwa ya Yesu. Kansi ophunzila ngawo-ngawo a Yesu oiwona tyani nkhani yamene iyi?

6. Pofwika m’chaka cha 1872, kansi gulu ya ophunzila Baibolo imvwisha mfundo yotyani?

⁶ Mu chaka cha 1870, gulu ya ophunzila Baibolo mosogolelewa na Charles Taze Russell, iyamba kuphunzila mosamala ngako Malemba. Ove enzefuna kuziŵa ngavo-ngavo vayutanthauza nsembe ya Yesu komasoti mwangaikumbukilile. Pofwika cham’ma 1872, ove emvwisha mfundo yakuti Yesu epeleka chendi dipo kuti awombole ŵanthu onse. Ove aliyefise vechiphunzila. Mmalo mwake, ove eyamba kuziŵishako ŵanthu ayakine kupitila m’mabuku, m’manyunzipepala, na m’magazini. Ndipo pakaliyepita nthawe itali, molingana na Akhilisitu oyambilila, ove eyamba kusonkhana tyala kamozi pa chaka kuti achite Chikumbukilo.

7. Kansi tupindula tyani na vinthu vechiphunzila ophunzila Baibolo oyambilila?

⁷ Masiku ŵano tupindula kufumila ku vinthu vechiphunzila Akhilisitu amene aŵa vyaka vapita. Motyani? Yehova watiyavya kumvwisha tanthauzo ya nsembe ya Yesu, komasoti vaikuti izatichitile kupamikijapo ŵanthu wonse. (1 Yoh. 2:1, 2) Taphunzilasoti kuti Baibolo yupeleka viyembekezo viŵili kuli ŵanthu okondwelesha Mulungu—ayakine azalondele moyo wosasila kululu, ndipo ayakine mamiliyoni anyinji azalondele moyo wosasila pano pachalo. Ushamwali wasu na Yehova unkhala wotang’a ngako keno tuganizila chikondi chake komasoti mwatupindulila chifukwa cha nsembe ya Yesu. (1 Pet. 3:18; 1 Yoh. 4:9) Tetyo, molingana na  abale okhulupilika a m’masiku akuvuli, tuita ayakine kuti tichite nawo Chikumbukilo mokatijana na chisanzo chechitisiila Yesu.

8. Kansi ŵanthu a Yehova achita chinji kuti aitile ŵanthu ayakine ku Chikumbukilo? (Onani chithunzi.)

⁸ Ŵanthu a Yehova ankhala oitila ayakine ku Chikumbukilo kufumila kale-kale. Kumayambililo kwa chaka cha 1881, abale na alongo ku United States, eitiwa kuti akasonkhane mu ng’anda iyakine ku Allegheny, Pennsylvania, pa chochitika chapadela chamene ichi. Pavuli pake, mpingo uliwonse wiyamba kuchita paweka Chikumbukilo. Mu March 1940, wofalisa aliyense eujiwa kuti angaitileko munthu aliyense wa m’gawo yake wamene wawonesha chidwi. Mu 1960, kwa nthawe yoyamba, Beteli ipeleka tumapepa toitila ŵanthu ku Chikumbukilo m’mipingo. Kufumila nthawe yamene iyo, mabiliyoni anyinji a tumapepa toitila ŵanthu ku Chikumbukilo twankhala tuyaŵiliwa. Ndaŵa yanji tuchita khama kuitila ayakine ku Chikumbukilo?

9-10. Kansi ni ŵani opindula na khama yatuchita poitila ŵanthu ku Chikumbukilo? (Yohane 3:16)

⁹ Chifukwa chimozi chatuitila ŵanthu ayakine ku Chikumbukilo, n’chakuti tufuna kuti ŵanthu amene ni kuyamba kufwika pa chochitika chamene ichi aphunzile vechitichitila Yehova na Yesu. (Ŵelengani Yohane 3:16.) Tuyembekezela kuti vinthu vangawone komasoti kumvwa pa Chikumbukilo, viŵachitishe kuti aphunzile vinyinji nonkhala atumiki a Yehova. Koma pali ayakine amene opindulasoti.

¹⁰ Tuitilasoti ŵala amene eleka kutumikila Yehova. Tuchita vamene ivi pofuna kuŵakumbusha kuti Yehova akaliŵakonda. Anyinji owela tikaŵaita, ndipo tusangalala ngako kuŵawona. Kupezeka pa Chikumbukilo kuŵakumbusha  mwenzesangalalila penzetumikila Yehova m’masiku akuvuli. Ganizilani chisanzo cha Monica. c Nkati mwa mulili wa COVID-19, yove eyambasoti kulalikila. Pavuli popezeka pa Chikumbukilo mu 2021, yove enena kuti: “Mwambo wamene uyu wa Chikumbukilo chankhala chochitika chapadela ngako kuli newo. Pa nthawe yoyamba kwa vyaka 20, nankhala na mwayi wolalikila ŵanthu komasoti kuŵaitila ku Chikumbukilo. Nechita vonse vaningakwanishe poitila ayakine ku Chikumbukilo chifukwa nutembeja ngako vechinichitila Yehova na Yesu.” (Sal. 103:1-4) Viliye kanthu keno ŵanthu avomele olo akane, tuyeja-yeja mwakhama kuitila ayakine ku Chikumbukilo chifukwa tuziŵa kuti Yehova otembeja kuyeja-yeja kwasu.

11. Kansi Yehova wadalisa tyani khama yasu yoitila ŵanthu ku Chikumbukilo? (Hagai 2:7)

¹¹ Yehova wadalisa ngako khama yatuchita poitila ŵanthu ku Chikumbukilo. Mu 2021, olo kuti tenze tileka kuchita vinthu viyakine chifukwa cha mulili wa COVID-19, chiŵelengelo cha ŵanthu epezeka pa Chikumbukilo chenze 21.367.603. Chiŵelengelo chamene ichi chuwelejela pafupi-fupi maulwendo aŵili na hafu pa chiŵelengelo chonse cha a Mboni za Yehova pachalo chonse! Kulaŵila chendi, Yehova ochitalini tyala chidwi na kupaka kwa ŵanthu opezeka pa Chikumbukilo. Yove ochita chidwi na aliyense wapezeka pa mwambo wamene uyu. (Lk. 15:7; 1 Tim. 2:3, 4) Tingankhale osimikijila kuti keno tuitila ŵanthu ayakine, Yehova otiyavya kufwana ŵanthu aweme mitima.—Ŵelengani Hagai 2:7.

12. Kansi ni vinthu votyani vingachitishe kuti kuchita Chikumbukilo kunkhale kovuta? (Onani chithunzi.)

¹² Yesu enenelatu kuti m’masiku osilijila tizakumane na mavuto osiyana-siyana—monga kushushiwa na achibale, kutamanishiwa, nkhondo, milili, komasoti mavuto ayakine anyinji. (Mt. 10:36; Mk. 13:9; Lk. 21:10, 11) Nthawe ziyakine, mavuto monga ni amene aŵa angachitishe kuti kukumbukila imfwa ya Yesu kunkhale kovuta kuli sewo. Kansi abale na alongo ŵasu achita tyani kuti alimbane na mavuto amene aŵa, ndipo Yehova waŵayavya tyani?

13. Kansi Yehova emudalisa tyani Artem chifukwa chotang’a ntima komasoti kusimikijila kuti achite Chikumbukilo penze mu djeli?

¹³ Kuikiwa mu djeli. Abale ŵasu amene ali mu djeli chifukwa cha chikhulupililo chawo ochita vonse vangakwanishe kuti akumbukile imfwa ya Yesu. Ganizilani chisanzo cha Artem. Mu 2020, kukali masondo anyinji kuti Chikumbukilo chichitike, yove ezaliliwa m’chipinda chikulu cha mamita 17 mbali zonse, amene ni malo okwanila akaidi 5 pa nthawe imozi. Olo venze tetyo, yove ekwanisha kufwana vizindikilo va pa Chikumbukilo, ndipo elinganija kuti alaŵile nkhani na cholinga chakuti apindule. Koma akaidi ayakine amene enze m’chipinda chake enzepepa komasoti kutukila ngako. Kansi yove echita chinji? Eŵasenga kuti alekejeko kutukila na kupepa kwa 1 awa tyala. Artem edabwa akaidi ayake pechivomela kuti apepelini olo kutukila pochita Chikumbukilo. Artem enena kuti, “Nelipeleka kuti niŵauje vokhuza Chikumbukilo.” Olo kuti ove enze enena kuti ofunalini kumvwa vokhuza mwambo wamene uyu, pavuli powona na kumvwa za chochitika chamene ichi, ove emukonsha vonse vokhuza mwambo wamene uyu.

14. Kansi ŵanthu a Yehova echita tyani kuti akochita Chikumbukilo olo pa nthawe ya mulili wa COVID-19?

¹⁴ Mulili wa COVID-19. Mulili wamene uyu pewiyamba, venze vosakwanishika kuti ŵanthu a Yehova achite Chikumbukilo pamenso na pamenso. Koma vamene ivi viliyeŵakangishe kuti akochita Chikumbukilo. d Mipingo yamene ili  m’madela kuli intaneti ekwanisha kuchita Chikumbukilo kupitila pa videoconference. Koma tyani ponena za ŵanthu mamiliyoni anyinji amene kumadela kwawo kuliye intaneti? M’vyalo viyakine, maofesi a nthambi epanga makonzedwe kuti ŵanthu alolele nkhani ya Chikumbukilo pa TV olo kumvwishila pa wailesi. Kuyangijila pamene apa, maofesi a nthambi etepa nkhani ya Chikumbukilo m’vilaŵilo vopitilila 500 kuti olo ŵanthu a m’madela aku minzi akwanishe kuchita Chikumbukilo. Ndipo abale okhulupilika epeleka nkhani zamene izi kuli abale a m’madela osiyana-siyana amene aŵa.

15. Kansi muphunzilapo chinji pa chisanzo cha wophunzila Baibolo muyakine zina yake Sue?

¹⁵ Kushushiwa na achibale. Vuto ikulu ngako yakukumana nayo ŵanthu ayakine kuti achite Chikumbukilo, ni kushushiwa na achibale ŵawo. Ganizilani chisanzo cha wophunzila Baibolo muyakine zina yake Sue. Mu 2021, kwasala tyala nsiku imozi kuti Chikumbukilo chichitike, Sue euja enzemuphunzisa Baibolo kuti chifukwa chakuti achibale ŵake ayakine enzemushusha, alutelini ku Chikumbukilo. Munthu enzemuphunzisa Baibolo eŵelenga Luka 22:44. Pavuli pake, emufotokozela kuti tikakumana na  mavuto tufunika kukonkheja chisanzo cha Yesu mwa kupemphela na ntima wonse kwa Yehova komasoti kumudalila na ntima wonse. Nsiku yokonkhapo, Sue ekonza vizindikilo nololela pulogilamu yapadela ya Kulambila kwa m’Mawa pa jw.org. N’chingulo wa nsiku yamene iyo, yove eloŵa m’chipinda chake noyamba kuchita Chikumbukilo ali yeka pa foni yake. Pavuli pake, Sue elembela enzemuphunzisa Baibolo kuti: “Mwenitang’isha ngako mailo. Nechita vonse vaningakwanishe kuti nipezeke pa Chikumbukilo, ndipo Yehova eniyavya. Ningakwanishelini kufotokoza chisangalalo chanili nacho komasoti mwaningatembejele!” Kansi muganiza kuti Yehova angakuyavyeni mukakumana na vuto monga ni yamene iyi?

16. Ndaŵa yanji tingankhale osimikijila kuti Yehova azadalise kuyeja-yeja kwasu kuti tipezeke pa Chikumbukilo? (Aroma 8:31, 32)

¹⁶ Yehova otembeja ngako pa kuyeja-yeja kwatuchita kuti tikumbukile imfwa ya Yesu. Tingankhale osimikijila kuti yove azatidalise keno tuwonesha kutembeja kwasu pa vinthu vechitichitila. (Ŵelengani Aroma 8:31, 32.) Tetyo, tiyeni tinkhale osimikija ntima kupezekapo pa Chikumbukilo cha chino chaka. Ndipo Chikumbukilo chikaliyechitika komasoti pavuli pake, nise ofunishisha kumuchitila vinyinji Yehova.