1-2. Omokonda yatyi tuila kehinangelo omanima aeho?

 SESUSI waavele omuenyo wae etuikulila ondyila opo tukamone omuenyo wahapu. Apa etyilinga pakala-le omanima ehungi 2.000. Monthiki Sesusi maipawa, kongulohi watyo wapopilile ovalanduli vae opo vahinangaile ononkhia mbae. — 1 Kol. 11:23-26.

² Onthue tutavela etyi Sesusi apopile mokonda tumuhole unene. (Suau 14:15) Omanima aeho onthue tulekesa okuti tuapandula otyilikutila tya Sesusi tyina tuovola omuvo wokusokolola kuetyi ononkhia mbae mbuhangununa. Tuundapa unene movilinga viokuivisa atukongo ovanthu ovanyingi opo veye Kehinangelo. Iya tulinga umwe atyiho opo pahamoneke natyike tyitutyika okuenda Kehinangelo.

3. Oityi matulilongesa monthele ei?

³ Monthele ei, matulilongesa ovipuka vitatu vilekesa omokonda yatyi Onombangi mba Siovaa valingila umwe ononkhono opo vende kehinangelo liononkhia mba Sesusi: (1) omokulinga ehinangelo ngetyi Sesusi atumine, (2) omokukonga vakuetu opo veye Kehinangelo, (3) omokulinga ehinangelo liononkhia mba Sesusi namphila pamwe tyihapepukile.

4. Omapulo patyi akumbululwa melongomona liehinangelo, iya omokonda yatyi onthue tueeholelele unene? (Luka 22:19, 20)

⁴ Omanima aeho Pehinangelo onthue tutehela elongomona liapolwa Mombimbiliya likumbulula omapulo omanyingi  tulipula. Tunoñgonoka omokonda yatyi ovanthu vesukisila otyilikutila tyeyovo, oñgeni ononkhia mbomunthu wike vala mbupondola okuhita ononkhali mbovanthu ovanyingi. Tupu tuhinangeleswa etyi ombolo novinyu vihangununa, no valie valia kombolo nokunwa kovinyu. (Tanga Luka 22:19, 20.) Tupu, elongomona olio litukuatesako okusoka kovipuka oviwa matukamona mouye omupe. (Isa. 35:5, 6; 65:17, 21-23) Ovio ovipuka onthue tuhole unene. Mahi ovanthu ovanyingi kavevinoñgonokele iya tupu kavapandula otyilikutila tyeyovo. Tyina vati pokuhinangela ononkhia mba Sesusi, avehetyilingi-vo ngoomu Sesusi etyilulikilile. Omokonda yatyi?

5. Etyi ono apositolu vapwa-po okunkhia, oñgeni pahe ovanthu ankho vahinangela ononkhia mba Sesusi?

⁵ Etyi ono apositolu vapwa-po okunkhia, liwa-liwa Ovakilisitau vomatutu avahimbika okunyingila mewaneno. (Mat. 13:24-27, 37-39) Ovanthu ovo avahimbika okulongesa “ovipuka vihaviukile opo vakokele ovalongwa kuvo muene.” (Ovil. 20:29, 30) Tyimwe ‘povipuka ovio viahaviukile’ ovanthu ovo ankho valongesa, okuti Sesusi kaavele olutu lwae like vala “opo atyinde ononkhali mbovanthu ovanyingi” ngetyi Ombimbiliya ipopia. Mahi vapopia okuti otyilikutila tyae ankho tyina okuwanwa-wanwa. (Heb. 9:27, 28) Hono ovanthu ovanyingi vetavela umwe komatutu oo. Ovanthu ovo, vakala kumwe ononthiki ambuho opo vahinangele etyi tyitiwa “Otyilikutila Tyomisa.” b Vamwe, vahinangela umwe ononkhia mba Sesusi, mahi kavetyilingi-vo apeho. Iya ononkhalamutwe mbonongeleya mbomatutu, muene kavetyinoñgonoka umwe nawa etyi ononkhia mba Sesusi mbuhangununa. Nkhele ovanyingi velipula okuti: ‘Okuti ononkhia mba Sesusi ñgana mbutyivila umwe okuhita ononkhali mbange?’ Oityi velipulila ngotyo? Pamwe omokonda vahongiliywa na vana vehetavela okuti otyilikutila tya Sesusi tyihita umwe ononkhali mbetu. Oñgeni ovalongwa votyotyili va Sesusi vakuatesako ovanthu vanoñgonoke etyi otyilikutila tya Sesusi tyihangununa, neetyi tyina okulingwa?

6. Mo 1872, oityi otyikundyi tyo valilongesi Vombimbiliya vanoñgonokele?

⁶ Okuhimbikila momanima 1800 otyikundyi tyimwe tyovalilongesi vo Mbimbiliya ankho tyihongolelwa na Charles Taze Russell avahimbika okulilongesa nawa Ovihonekwa. Ngwe ankho vahanda okunoñgonoka etyi tyihangununa otyilikutila tyeyovo no ñgeni tyina okulingwa. Etyi vanoñgonoka umwe nawa etyi Ombimbiliya ipopia, pahe mo 1872, avetyimono umwe nawa okuti Sesusi waava omuenyo wae opo ayovole ovanthu. Etyi vanoñgonoka otyipuka otyo, avahimbika okutyipopila ovanthu. Avetyipake momikanda nomo no jornale. Iya ngetyi ankho tyilinga ovakilisitau vo potyita tyotete, navo avahimbika okulivasa monthiki ike nima na nima, opo vahinangele ononkhia mba Sesusi.

7. Oñgeni hono onthwe tupola ouwa komaovololo alingilwe novalilongesi Vombimbiliya?

⁷ Hono, nonthwe tupola ouwa komaovololo Ovakilisitau ovo valingile. Ñgeni ngotyo? Omokonda Siovaa wetukuatesako okunoñgonoka etyi tyihangununa otyilikutila tya Sesusi, nouwa onthwe tupolako. (1 Suau 2:1, 2) Tupu tuanoñgonoka okuti, Ombimbiliya ipopia okuti ovanthu vamwe mavakakala keulu, iya ovanthu ovakuavo ovanyingi-nyingi avakakala pano pohi tyahakankhia  vali. Tyina tusoka kouwa tupola kotyilikutila tyeyovo, noluembia Siovaa ena nonthwe oupanga wetu nae upama vali. (1 Pet. 3:18; 1 Suau 4:9) Iya ngetyi ankho tyilinga vakuetu kohale, nonthwe tukonga ovanthu opo veye Kehinangelo liononkhia mba Sesusi, ngetyi apopile.   

8. Oityi ovaumbili va Siovaa valinga opo vakonge ovanthu veye Kehinangelo? (Tala olutalatu.)

⁸ Tundee kohale, Onombangi mba Siovaa vakonga ovanthu opo veye Kehinangelo liononkhia mba Sesusi. Mo 1881, ovakuatate nonomphange ko Estados Unidos vakongelwe opo vakalinge Ehinangelo liononkhia mba Sesusi mepunda-umbo lyo Allegheny, mo Pennsylvania. Etyi pakala, ovakuatate pahe avahimbika umwe okulingila ehinangelo momawaneno avo. Mu Março yo 1940, Omutala Womulavi aupopi okuti ovakuatate aveho vena okukonga ovanthu vopotyilongo tyavo opo veye Kehinangelo liononkhia mba Sesusi. Mo 1960, otyo Ombetele pahe yahimbika okuavela omawaneno omikanda viokukonga ovanthu veye Kehinangelo. Okutuka menima olio, tuaavelele ovanthu omikanda ominyingi-nyingi viokukonga. Omokonda yatyi onthwe tulingila umwe ononkhono mbokukonga ovanthu?

9-10. Ovalie vapola ouwa kononkhono tulinga tukonge ovanthu veye Kehinangelo? (Suau 3:16)

⁹ Onthue tukonga ovanthu veye Kehinangelo, mokonda tuahanda monthiki yotete veya, vanoñgonoke etyi Siovaa na Sesusi vetulingila. (Tanga Suau 3:16.) Onthue tuahanda etyi veiva Mehinangelo tyivekuateseko okunoñgonoka Siovaa avakala ovaumbili vae.  Mahi pena vali ovanthu ovakuavo vapolako ouwa.

¹⁰ Tupu tukonga vana vayekapo okufenda Siovaa. Tulinga ngotyo mokonda tuahanda vanoñgonoke okuti Siovaa nkhele uvehole. Tyina tuamakongo omunthu eya Kehinangelo, tyituhambukiswa umwe unene. Tyina umwe wayekelepo Siovaa ameya Kehinangelo, tyimuhinangelesa ehambu ali nalio etyi ankho aumbila Siovaa kohale. Tutalei etyi tyaendele na Monica. c Ngwe ankho wayekapo okuenda komaliongiyo, mahi pahe momuvo ou womuhiki, ahimbika vali okuenda komaliongiyo. Mo 2021, aende Kehinangelo. Etyi liapwa, apopi okuti: “Ehinangelo eli himelilimbwa. Nakala-le omanima 20 tyahakongo ovanthu opo veye Kehinangelo. Mahi pahe menima eli, opo umwe nahimbika okukonga ovanthu veye Kehinangelo. Netyilinga umwe nomutima wange auho, mokonda ndyipandula etyi Siovaa na Sesusi vandingila.” (Sal. 103:1-4) Namphila ovanthu vamwe vehetavela tyina tuvekonga, mahi nongotyo tuvekonga umwe mokonda tutyii okuti Siovaa uhambukwa unene okutala ononkhono tulinga.

11. Oñgeni Siovaa etuyamba mokonda yononkhono tulinga tukonge ovanthu opo veye Kehinangelo? (Ageu 2:7)

¹¹ Siovaa utuyamba mokonda yononkhono tulinga tukonge ovanthu veye Kehinangelo. Mo 2021, namphila ankho tuatyikwa nomukuti wokolona vilu, mahi nongotyo ovanthu veile Pehinangelo vena 21.367.603. Ovanthu ovo valamba apa pelifwe onombangi mba Siovaa ouye auho! Mahi Siovaa kesukile vala nombalulo yatyo! Wesuka umwe na kese munthu weile Pehinangelo. (Luka 15:7; 1 Tim. 2:3, 4) Onthue tutyii okuti tyina tukonga ovanthu veye Kehinangelo, Siovaa omo etyilingila umwe opo akuateseko ovanthu vesuka notyili. — Tanga Ageu 2:7.

12. Ovitateka patyi vipondola okutupuiya okulinga Ehinangelo? (Tala olutalatu.)

¹² Sesusi wapopile okuti kononthiki mbonthyulilo, ovanthu ankho mavakakala novitateka ovinyingi. Tyiti umwe onthwe tuyalwe no vetu, onthue tuhukaiswa novanthu ovakuavo, novilwa, nomauvela, novitateka ovikuavo vali. (Mat. 10:36; Malu. 13:9; Luka 21:10, 11) Mokonda yovipuka ovio, pamwe tyitupuiya umwe okulinga Ehinangelo liononkhia mba Sesusi. Oityi ovakuatate valinga opo ovitateka ovio viehevetyike okulinga Ehinangelo iya oñgeni Siovaa evekuatesako?

13. Oñgeni Siovaa ayambele Artem mokualinga ononkhono opo alinge Ehinangelo Liononkhia mba Sesusi?

¹³ Okupakwa movikaleya. Ovakuatate vetu veli movikaleya mokonda yokuumbila Siovaa, valinga umwe ononkhono mbokulinga Ehinangelo liononkhia mba Sesusi. Nkhele tutalei etyi tyalingile Artem. Mehinangelo lyo 2020, ngwe ankho uli mokaleya kamwe okatutu kafwa vala ovanthu vetano. Namphila ankho eli mokaleya, mahi alingi umwe Ehinangelo. Walingile vala ovipuka vimwe avikala ngatyina uti ombolo novinyu, tupu alingi umwe ngatyina ekahi nokulinga elongomona. Mahi ononkhuatwa ononkhuavo ankho vapwena nokupopia ovipuka viasila. Pahe alingi ñgeni? Eveiti vahalinge ovipuka ovio nokupuena moola ike vala. Ononkhuatwa ononkhuavo avetavela umwe, otyipuka otyo atyimuhuvisa unene. Artem wati: “Andyivepopila umwe aveho etyi tyayemba Kehinangelo.” Namphila ngwe vemupopilile okuti kamavatehelela otyipuka otyo, mahi etyi Artem amana  okulinga Ehinangelo avemupulu ovipuka ovinyingi.

14. Oityi tyalingwa opo ovakuatate vatale Ehinangelo pomuvo womukihi?

¹⁴ Omukihi Wokolona Vilu. Etyi omukihi Wokolona Vilu wahimbika, ovaumbili va Siovaa ankho kavapondola okuliongiya peke opo valinge Ehinangelo Liononkhia mba Sesusi. Mahi otyipuka otyo, atyehevetyiki okulinga Ehinangelo. d Omawaneno ana ankho okuna o Internet avalingila Ehinangelo liononkhia mba Sesusi mo Zoom. Mahi pahe ovanthu ovanyingi ankho vokuhena o Internet avalingi ñgeni? Vatehelele elongomona liononkhia mba Sesusi ko laliu noko televisau. Onombetele ambungalavala elongomona olio momalaka alamba po 500, opo ovakuatate vana vakala oku kuehena o internete vetyivile okutehelela elongomona Liehinangelo. Etyi vamana okungalavala, ovakuatate pahe avatuaila ovidiu ava vakala kokule.

15. Oityi welilongesila kuetyi tyalingile omulongwa umwe Wombimbiliya utiwa o Sue?

¹⁵ Okuyelwe nombunga. Vamwe tyivepuiya  unene okulinga Ehinangelo Liononkhia mba Sesusi mokonda yokuyelwe nombunga. Tala etyi tyalingile omulongwa umwe Wombimbiliya utiwa o Sue. Mo 2021, etyi kuakamba onthiki ike pala okulinga Ehinangelo, Sue apopila omulongesi wae Wombimbiliya okuti kameya Kehinangelo mokonda ombunga yae kavetyihandele. Omulongesi wae Wombimbiliya emutangela omukanda wa Luka 22:44. Emupopila okuti tyina tukahi nokulambela movitateka, tuesukisa okulinga ngetyi tyalingile Sesusi. Tuna okulikuambela ku Siovaa nokumuyumba onthumbi. Monthiki Yehinangelo afuiika ombolo novinyo iya komuhuka watyo, atale efendelo liombunga lilingwa komuhuka mo jw.org. Pahe kokangulohi namphila ankho eke vala mondyuo yae, anyingila mo Zoom yewaneno akala umwe Pehinangelo. Etyi Ehinangelo liapwa, Sue ahonekela omulongesi wae Wombimbiliya okuti: “Mongulo wamphamekele unene. Nalinga umwe atyiho opo ndyikale Pehinangelo Liononkhia mba Sesusi, iya wankhuatesako unene. Ame nahambukwa unene tupu ndyipandula unene etyi netyivila okukala Pehinangelo!” Okuti no ove usoka okuti Siovaa mekukuatesako ngetyi akuatesileko Sue?

16. Oityi tyitukalesa nonthumbi yokuti Siovaa mayambe ononkhono tulinga mbokuenda apeho Kehinangelo liononkhia mba Sesusi? (Ova Loma 8:31, 32)

¹⁶ Siovaa upanda unene ononkhono tulinga opo tuhinangele ononkhia mba Sesusi. Tutualeiko okuyumba onthumbi mu Siovaa yokuti metuyambe tyina tupandula otyipuka otyo otyiwa etulingila. (Tanga Ova Loma 8:31, 32.) Nonthue tulingei ononkhono opo tuende Kehinangelo enima lino, iya tupu atutualako okuyawisa kovilinga tulingila Siovaa tyina Ehinangelo liamalambe.