4 EKOBEE UE ENƆ
Jɛhova Wee Nɛ Leelee Epiaga I Doo Lo Esi Doonu Nyɛŋiabu Loo Luh Jizɔs
“Dooraa lo ba ama bu kɛkɛɛrɛ mɛ bu.”—LUK 22:19.
YƆƆ 19 Nyɛŋiabu Loo Luh Nɛɛ-a-i-ɛrɛ
DASĪ TƐƐ̄NYƆƆ a
1-2. Ena anua i wee si Doonu Nyɛŋiabu Loo Luh Jizɔs ziī ziī zua a?
NU ALU 2,000 zua akii adumɛ, Jizɔs bee nɛ ye dum i bee, sa kpaāna dee i nɛ lokwa i ɛrɛ dum a naatah. Uunɛ lɛɛ Jizɔs gae u, a bee nɛ lok pya a wee ye nyɔɔnɛ dumɛ kɔ ba a nyɛŋiabu loo ye luh, tɛ̄maloo ziī ewɛpbah doonu alu esu mii le fituru daā.—1 Kɔr 11:23-26.
2 I doo nu Jizɔs bee kɔ i doo ama nyɔɔbee i were ye loo kaāna. (Jɔn 14:15) Ziī ziī zua, sɔ̄ e’ina sɔ̄ Doonu Nyɛŋiabu Loo Luh Jizɔs, i wee tɔgɛ nia loo nu a bee doo tɛ̄maloo eyere kara sa su sɔ̄ ɛā ekɛɛrɛ kumaloo nu ye luh kura. Bu ɛɛbu, i wee sinage tam zue ue yereloo, sa yere mɛm loo gbɛnɛ-edo nɛɛ kɔ ba a gbaa i loo bu keebee doonu ama. E i biaɛfii kɔ ii le elɛɛbaloo lɔgɔ nu kɔ a kpaɛ̄ i lɛɛloo esi lo doonu.
3. Ena i gaa le nɔ bu ekobee ue ama a?
3 Bu ekobee ue ama, i gaa le kɛɛrɛbu taa sīdee pya nɛɛ Jɛhova epiiga kaāna lo esi Doonu Nyɛŋiabu Loo Luh Jizɔs: (1) tɛ̄maloo esikɛ̄ nyɔɔnɛ taɛ kɛ̄ Jizɔs bee doo lo doonu doo, (2) tɛ̄maloo ekue pya dɔɔ̄na kɔ ba a gbaa i loo nyɛŋiabu loo luh Jizɔs, le (3) tɛ̄maloo edoo doonu ama kaɛlɛɛ e’aga kɛ̄tɔɔ̄.
SISIKƐ̄ NYƆƆNƐ TAƐ KƐ̄ JIZƆS BEE DOO LO DOONU DOO
4. Pya amunu kaka ue na a wee lu ekɔ baatɛ̄ bie Doonu Nyɛŋiabu Loo Luh Jizɔs ziī ziī zua a, e ena anua ii le ɛp pya kaka ue ama tɛrɛ a? (Luk 22:19, 20)
4 Ziī ziī zua bie Doonu Nyɛŋiabu Loo Luh Jizɔs, i wee gbaɛ̄tɔ̄ ekɔaue a dɛɛa nyɔɔ Baibol lo a agara pio ebip. I wee suā nu anua waara zɔɔ a’agara bɛɛ̄ miɔŋɔ nɛɛ, le kɛ̄ luh aba ziī nɛɛ dap agara booboo nɛɛ doo. Wee lu enyɛŋia i bu nu lo fituru le mii alu esu daā lo doonu yira dɔ, le pya ba dap de sa ɔ̄. (Buū Luk 22:19, 20.) E i wee kɛɛrɛbu leelee pya ba ɛrɛ bɛābu lo etɔɔ̄dum a kɛnɛkɛ̄ e’ɛrɛ li deesī. (Ais 35:5, 6; 65:17, 21-23) Naa lee kɔ i ɛp pya kaka ue ama tɛrɛ. Gbɛnɛ-edo biliɔn pya nɛɛ naa dābeeloo pya kaka ue ama, e ba naa suā kɛ̄ waara zɔɔ Jizɔs i dɔbiī nɛ doo. Ba naa wee doonage Doonu Nyɛŋiabu Loo Luh Jizɔs dookɛ̄ alɛ bee doo doo. Ena anua a?
5. Sɔ̄ gbɛnɛ-edo pya nɛɛ lɛɛratam e’ua sah, pya nɛɛ bee bɔātɛ̄ edoo Doonu Nyɛŋiabu Loo Luh Jizɔs doodoo wa?
5 Sɔ̄ naa bee binia sɔ̄ gbɛnɛ-edo pya nɛɛ lɛɛratam Jizɔs e’ua sah, pya esah Nɛɛ Kraist bee yii bu bɔŋanaloo. (Mat 13:24-27, 37-39) Ba bee kɔ “keekee nu dag [wa] nɛ, lo ezuura pya a wee nyɔɔnɛ dumɛ Jizɔs, kɔ ba a nyɔɔnɛ wa dumɛ.” (Doonu 20:29, 30) Ziī lo “keekee nu dag” pya esah Nɛɛ Kraist bee bɔātɛ̄ tɔgɛ na kɔ ekpaloo Jizɔs naa bee lu enɛ “aba ziī sɔ̄ lo etoora pɔrɔ gbɛnɛ-edo nɛɛ” dookɛ̄ Baibol kɔ doo, mɛ ba kɔ lo waara zɔɔ ɛrɛ elu edoogi aā ziī sɔ̄ yii ziī. (Hib 9:27, 28) Nii’ee gbɛnɛ-edo pya nɛɛ le beenyiɛ eyiga ekwɔ tɔgɛ nu ama. Pya tɔbari fada wee bɔŋia dɛ̄dɛɛ̄ sɔ̄ bie wa tɔbari, pio sɔ̄ dɛ̄dɛɛ̄ dee lo edoo doonu ba kure “De Ziā Kaɛ.” b E pya dɔɔ̄na tɔbari wee nyɛŋiabu loo luh Jizɔs, mɛ ba naa wee doo dɛ̄dɛɛ̄ dee. Kerewo, pya a si wa tɔbari naa aadee dābeeloo nu waara zɔɔ Jizɔs edora mmɛɛ. Pio nɛɛ dap kɛɛrɛ kɔ, ‘Ekɔ dapge lu e’aaloo na pɔrɔ nyɔɔbee luh Jizɔs ni?’ Ena anua ba bip ebip ama a? Pio sɔ̄, dap lu kɔ ba yiga ue pya ba kɔ luh Jizɔs naa dap doo kɔ alu e’aaloo i pɔrɔ i nɛ. Mɛ sīdee na kaka Pya Nɛɛ Kraist aabah loo ue ama a?
6. Bu zua 1872, ena pya nɔ Baibol bee dābeeloo leere aābu Baibol a?
6 Dee kuma loo 19 sɔ̄ o’oo tup zua a, ziī eku pya nɔ Baibol lo Charles Taze Russell zaāsī, bee bɔātɛ̄ ebiibahkɛ̄ nɔ Kpa Kaɛ. Ba bee gbī esuā kaka akiiloo kɛ̄ waara zɔɔ Jizɔs dɔbiī doo le kɛ̄ a bɔloo enyɛŋiabu ye luh doo. Bu zua 1872, ba bee dābeeloo aābu Baibol kɔ bu kaka, Jizɔs bee nɛ ye dum nua zɔɔ a’agara bee dɛ̄dɛɛ̄ miɔŋɔ nɛɛ. Ba naa bee gɔ̄ nu ba egbiā muɛ ama. Taāwo, ba bee zue yaari tɛ̄maloo ekpokpa, niuz pepa, le magazin. E sɔ̄ naa bee binia loo sɔ̄ ba bee bɔātɛ̄ egbaa zɔ̄ŋia ziī sɔ̄ bu ziī zua lo edoo Doonu Nyɛŋiabu Loo Luh Jizɔs, taɛ kɛ̄ Pya Nɛɛ Kraist bu tua sɔ̄ o’oo tup zua a bee doo.
7. Bu mɛ sīdee na i aa ɛrɛ biī aāloo gbītɛ̄nu pya nɔ Baibol a kere bee doo a?
7 Nii’ee i ɛrɛ biī aāloo gbītɛ̄nu pya kaāna Nɛɛ Kraist bee doo aā kere ama. Bu mɛ sīdee? Tɛ̄maloo leelee Jɛhova, elua edoo kɔ i suā kaka akiiloo waara zɔɔ Jizɔs le nu lo waara zɔɔ doo gbɔ̄mɛɛ. (1 Jɔn 2:1, 2) I enɔānage aābu Baibol kɔ a ɛrɛ baɛ bɛābu a le nɛ pya nɛɛ a doo nu Bari gbī, lo a le kɔ pio nɛɛ e’ɛrɛ dum a naatah li bunyɔɔ, e gbɛnɛ-edo miliɔn pya dɔɔ̄na e’ɛrɛ dum a naatah a kɛnɛkɛ̄. I tɔɔ̄ waɛloo Jɛhova sɔ̄ i kɛɛrɛ kɛ̄ a i wereloo doo, le kɛ̄ ziī ziī ii ɛrɛ biī aāloo waara zɔɔ Jizɔs doo. (1 Pit 3:18; 1 Jɔn 4:9) Nyɔɔwo, doodoo pya i wuga ba bee bɔloo eture nyiɛ loo sɔ̄ akii adumɛ, i kue pya dɔɔ̄na kɔ ba a nyɔɔnɛ i doo Doonu Nyɛŋiabu Loo Luh Jizɔs dookɛ̄ a bee kɔ alu edoo doo.
KUKUE PYA NƐƐ NUA LOO DOONU NYƐŊIABU LOO LUH JIZƆS
Ena o dap doo lo ekue pya nɛɛ nua loo Doonu Nyɛŋiabu Loo Luh Jizɔs a? (Ɛp 8-10 barakpaɛ̄) e
8. Ena pya nɛɛ Jɛhova edoora lo ekue pya dɔɔ̄na loo Doonu Nyɛŋiabu Loo Luh Jizɔs a? (Ɛp foto.)
8 Pya nɛɛ Jɛhova wee kue pya dɔɔ̄na nua loo Doonu Nyɛŋiabu Loo Luh Jizɔs aa kere. Aāge bu zua 1881, bee lu ekue pya wuga nɛɛdam le nɛɛwa a le United States kɔ ba a gbaa zɔ̄ŋia bie tɔ̄ nɛɛ li Allegheny, a le Pennsylvania, loo keebee doonu ama. Sɔ̄ esaa, ziī ziī bɔŋanaloo bee doo Doonu Nyɛŋiabu Luh Jizɔs. Bu Taa Enɔɔ̄ bu zua 1940, bee lu ekɔ nɛ pya zue ue kɔ ba dap kue ɛrɛgeba nɛɛ a ɛrɛ taɛ a le wa kɛ̄ zue ue nua loo lo doonu. Bu zua 1960 na tua sɔ̄ Bɛtɛl bee nɛ kpa bɔŋanaloo kɔ ba a su kuema pya nɛɛ loo lo doonu a. Aā lo sɔ̄, elua edɔɔ̄ gbɛnɛ-edo biliɔn kpa kue loo Doonu Nyɛŋiabu Loo Luh Jizɔs. Ena anua i piaga sa su gbɛnɛkpo sɔ̄ kuema pya dɔɔ̄na a?
9-10. Sɔ̄ alu ekue pya dɔɔ̄na nua loo Doonu Nyɛŋiabu Loo Luh Jizɔs, ba mɛɛ na a wee ɛrɛ biī aāloo a? (Jɔn 3:16)
9 Ziī nu anua i kue pya dɔɔ̄na loo Doonu Nyɛŋiabu Loo Luh Jizɔs na bee, i gbī kɔ pya a si tua sɔ̄ a suā kaka akiiloo nu Jɛhova le Jizɔs edora nɛ dɛ̄dɛɛ̄ ii. (Buū Jɔn 3:16.) I bɛābu kɔ nu ba muɛ sa dā bie Doonu Nyɛŋiabu Loo Luh Jizɔs ezū wa kɔ ba a nɔ nu yereloo sa lu pya a taāŋabah Jɛhova. Kerewo, pya dɔɔ̄na ɛrɛnage biī aāloo.
10 I wee kuenage pya ebee ɔbɛ etaāŋabah Jɛhova. I wee doo wo lo enyɛŋia wa bu kɔ Bari lege aa wa wereloo. Gbɛnɛ-edo aba wee si lo kue, e lo ama wee i ɛɛrɛbu kaāna. Sɔ̄ ba sikɛ̄ si Doonu Nyɛŋiabu Loo Luh Jizɔs wee doo kɔ ba a nyɛŋiabu kɛ̄ ba bee le bu ɛɛbu doo sɔ̄ ba gaa bee taāŋabah Jɛhova sɔ̄ akii adumɛ. Naa kɛɛrɛ edoba Monica. c A bee lu eyerebah ye nɛ kɔ a sikɛ̄ lu nɛɛ zue ue bu sɔ̄ dumɛloo COVID-19. Sɔ̄ a bee aa Doonu Nyɛŋiabu Loo Luh Jizɔs a bu zua 2021, a bee kɔ: “Doonu Nyɛŋiabu Loo Luh Jizɔs ama nia mɛ kaāna. M bee dap zue ue sa kue pya nɛɛ nua loo Doonu Nyɛŋiabu Loo Luh Jizɔs, lo mm bee doona bu nu alu 20 zua akii adumɛ. M bee si aābu dɛ̄dɛɛ̄ na beenyiɛ, nyɔnɛbee bu mɛ ɛɛ kaāna loo nu Jɛhova le Jizɔs edora mɛ nɛ.” (Yɔɔ 103:1-4) Kere pya nɛɛ yiga kɔ ba esie ale ba naa yiga, i wee piiga lo ekue pya dɔɔ̄na nua Doonu Nyɛŋiabu Loo Luh Jizɔs. Nyɔnɛbee i suā kɔ Jɛhova tɔgɛ nialoo i epiaga.
11. Bu mɛ sīdee na Jɛhova enɛa leelee i epiaga lo ekue pya nɛɛ nua loo Doonu Nyɛŋiabu Loo Luh Jizɔs a? (Hagai 2:7)
11 Jɛhova enɛa leelee i epiaga kaāna lo ekue pya nɛɛ nua loo Doonu Nyɛŋiabu Loo Luh Jizɔs. Bu zua 2021, kaɛlɛɛ kɔ dumɛloo COVID-19 bee doo kɔ i aa dap si tam dookɛ̄ i wee doo, nu aluge 21,367,603 pya nɛɛ bee si lo doonu. Bia kina buā ama lu baɛ sɔ̄ le siga buā dɛ̄dɛɛ̄ Pya Ekeebee Jɛhova bu yube nyɔuwe! Kerewo, naale aba sɔ̄ buā nɛɛ kuī na a nia Jɛhova a. A ɛrɛ nia bu ziī ziī nɛɛ a si lo doonu. (Luk 15:7; 1 Tim 2:3, 4) I suā leere kɔ Jɛhova wee su tam i si lo ekue pya nɛɛ gbiā pya nɛɛ kaāna beenyiɛ muɛ.—Buū Hagai 2:7.
SISI DOONU NYƐŊIABU LOO LUH JIZƆS KAƐLƐƐ E’AGA KƐ̄TƆƆ̄
Jɛhova wee nɛ leelee i epiaga lo edoo Doonu Nyɛŋiabu Loo Luh Jizɔs (Ɛp 12 barakpaɛ̄) f
12. Pya amunu kɛ̄tɔɔ̄ na a dap doo kɔ a aga i bah lo esi Doonu Nyɛŋiabu Loo Luh Jizɔs a? (Ɛp foto.)
12 Jizɔs bee kɔ serekɛ̄ kɔ bu kpɛdumɛ dee, i gaa le kpesī keekee bee e’aga kɛ̄tɔɔ̄, doodoo gbanasī a aa butɔ, tɛ̄ŋaloo, nɔ̄, dumɛloo a yaara, le gbɛnɛ-edo pya dɔɔ̄na e’aga kɛ̄tɔɔ̄. (Mat 10:36; Maak 13:9; Luk 21:10, 11) Pio sɔ̄, pya kɛ̄tɔɔ̄ ama wee doo kɔ a’aga i bah lo esere Doonu Nyɛŋiabu Loo Luh Jizɔs. Ena pya i wuga nɛɛdam le nɛɛwa edoora lo ebe eebah pya e’aga kɛ̄tɔɔ̄ ama, sa bu mɛ sīdee na Jɛhova eyerebah wa nɛ a?
13. Bu mɛ sīdee na Jɛhova bee nɛ leelee e’agaloo le biaɛfii Artem bee doo lo esere Doonu Nyɛŋiabu Loo Luh Jizɔs bie kpɔgɔrɔ a?
13 Sɔ̄ alu eyere i kpɔgɔrɔ. Pya i wuga lo ba wa yere kpɔgɔrɔ nyɔɔ wa yira, wee piiga lo esere Doonu Nyɛŋiabu Loo Luh Jizɔs. Naa kɛɛrɛbu edoba ziī wuga nɛɛdam a kura Artem. Bu sɔ̄ Doonu Nyɛŋiabu Loo Luh Jizɔs a bu zua 2020, bee lu eyere ye lo tɛm tɔ-kpɔgɔrɔ alu 17-square-meter (183 sq ft) a wee lu eyere o’oo pya kpɔgɔrɔ bu. Kaɛlɛɛ kɔ a bee le kpɔgɔrɔ a bee dap ɛrɛ pio nu a su nua fituru le mii. E a bee kpɛ̄naloo lo enɛ ekɔaue nyɔɔ Doonu Nyɛŋiabu Loo Luh Jizɔs lokwa a ɛrɛ biī aāloo. Mɛ pya le ɛɛ bee le aba tɛm bie lo tɔ-kpɔgɔrɔ wee ɔ̄ sɔɔ̄ sa kɔgara pɔrɔ pɔrɔ muɛ̄ ue. Ena a bee doo ani? A bee wa bara kɔ ba a yerebah lo e’ɔbɛ ɔ̄ sɔɔ̄ le kɔ pɔrɔ pɔrɔ muɛ̄ ue bu aba ziī awa. A bee lu nyɛŋia loo Artem, kɔ pya le ɛɛ bee le aba tɛm kpɔgɔrɔ ama bee yiga kɔ ba naale e’ɔ̄e sɔɔ̄ ale kɔ pɔrɔ pɔrɔ muɛ̄ ue sɔ̄ a gaa lu edoo Doonu Nyɛŋiabu Loo Luh Jizɔs. Artem kɔ: “M bee biaɛfii lo ekɔ nu akiiloo Doonu Nyɛŋiabu Loo Luh Jizɔs wa nɛ.” Kere ba bee kɔ ba naa gbī edā lɔgɔ nu akiiloo lo doo doonu, sɔ̄ ba bee muɛ sa dā kɛ̄ Artem doo lo Doonu Nyɛŋiabu Loo Luh Jizɔs doo, ba bee ye bip nu akiiloo.
14. Amunu epiaga na pya wuga bee doo lokwa a dap lu edoo Doonu Nyɛŋiabu Loo Luh Jizɔs kaɛlɛɛ dumɛloo COVID-19 a?
14 Dumɛloo COVID-19. Bu sɔ̄ dumɛloo a yaara ama aa bee kiisī, pya nɛɛ Jɛhova naa bee dap si Doonu Nyɛŋiabu Loo Luh Jizɔs sī le sī. Mɛ lo ama naa bee wa kpaɛ̄ kɔ ba aa doo Doonu Nyɛŋiabu Loo Luh Jizɔs. d Pya bɔŋanaloo ba ɛrɛ dee eyima nyɔɔ Intanɛt bee si lo doonu ama tɛ̄maloo vidio. Mɛ gbɛnɛ-edo miliɔn pya a naa dap yii nyɔɔ Intanɛt ni a? Bu pio edonyɔɔ, bee lu enɔɔ kɔ alu enɛ lo ekɔaue nyɔɔ TV ale radio. Gbaāloo wo, pio tɔ-naatam bee yere lo ekɔaue bu gāma bu nu a eeloo 500 muɛ̄ ue lokwa kere pya a le kɛ̄ a binia dap si lo doonu. E pio pya wuga bee piiga lo enɔɔ kɔ alu esu pya lo ue alu eyere bu gāma ama ma pya a bɛɛ̄.
15. Ena o nɔ aāloo edoba ziī nɛɛ a wee nɔ Baibol a kura Sue a?
15 Gbanasī a aa butɔ. Kiikɛ̄ pio nɛɛ le, nu alu wa gbɛnɛ nu finiabah lo esi Doonu Nyɛŋiabu Loo Luh Jizɔs na gbanasī a aa butɔ. Naa ɛp edoba ziī nwiīnɛɛwa a wee nɔ Baibol a kura Sue ama. Bu zua 2021, nyɔɔ dee Doonu Nyɛŋiabu Loo Luh Jizɔs, Sue bee kɔ nɛ nɛɛ a wee ye nɔɛ̄ Baibol kɔ a naale edabe si lo doonu nyɔɔ kɛ̄ pya ye butɔ ye gbanasī doo. Nɛɛ a wee ye nɔɛ̄ Baibol bee buū kpa Luk 22:44 ye nɛ. Lɛɛ a baatɛ̄ ye nɛ kɔ sɔ̄ i kpesī e’aga kɛ̄tɔɔ̄, i nyɔɔnɛ edoba Jizɔs tɛ̄maloo ekɔ ue nɛ Jɛhova bu kara sa Ye dɛrɛ nyiɛ nyɔɔ mmɛnɛ kɔ edā i. Lo dee a za nyɔɔnɛ, Sue doo fituru le mii elu esu daā lo doonu, sa a si’ee ziī keebee Nu A Le Nɛ Dee nyɔɔ jw.org. Sɔ̄ e’ina loo uunɛ lo dee, aba ɛɛ bee yii ye tɛm sa bee gbaɛ̄tɔ̄loo lo Doonu Nyɛŋiabu Loo Luh Jizɔs tɛ̄ma nyɔɔ ye fon. Sɔ̄ esaa, Sue bee ɛm kpa ma nɛɛ a wee ye nɔɛ̄ Baibol kɔ: “O yere mɛ mɛm loo gbɛnɛ a nyɔɔ’ee a. M bee doo dɛ̄dɛɛ̄ nu m dap doo lo esi Doonu Nyɛŋiabu Loo Luh Jizɔs, e Jɛhova bee mɛ yerebah nɛ kaāna. Mm suā kɛ̄ esere muɛ̄ loo edoo a yaa le kɛ̄ ekɔ kɛ̄ bu mɛ ɛɛ doo!” O kɛɛrɛge kɔ Jɛhova dap a yerebah nɛ lo o kpesī dua kɛ̄tɔɔ̄ ama ni?
16. Ena anua i suā leere kɔ Jɛhova enɛ leelee epiaga i doo lo esi Doonu Nyɛŋiabu Loo Luh Jizɔs a? (Pya Rom 8:31, 32)
16 Jɛhova tɔgɛ gbɛnɛ nia loo kɛ̄ i piiga lo esi Doonu Nyɛŋiabu Loo Luh Jizɔs doo. I suā leere kɔ enɛ i leelee sɔ̄ i tɔgɛ nia loo nu edora i nɛ. (Buū Pya Rom 8:31, 32.) Nyɔɔwo, dooraa i biaɛfii lo esi Doonu Nyɛŋiabu Loo Luh Jizɔs a bu zua ama. Sa doo dɛ̄dɛɛ̄ nu i dap lo enyimɛ pya tam i si nɛ Jɛhova bu sɔ̄ Doonu Nyɛŋiabu Loo Luh Jizɔs ama.
YƆƆ 18 Tɔgɛ Nia Loo Waara Zɔɔ A’agara
a Nyɔɔ Baɛ Deelookaɛ 4 biradee bu Nia Enɔɔ̄, 2023, gbɛnɛ-edo miliɔn pya nɛɛ tɛɛ̄ ɛŋɛnɛ nyɔuwe gaa le si Doonu Nyɛŋiabu Loo Luh Jizɔs. Elu tua sɔ̄ gbɛnɛ-edo aba gaa le si lo. Pya dɔɔ̄na lo ba ebee ɔbɛ etaāŋabah Jɛhova, sa naa bee sina lo doonu gaa le sinage. Kɛ̄tɔɔ̄ pio nɛɛ edoo kɔ a aga wa bah lo esi, kerewo ba epiiga lo esi lo doonu. Ɛrɛgeba kɛ̄ oloo kɛ̄tɔɔ̄ mɛā doo, suā leere kɔ bu Jɛhova e’ɛɛ lo o piiga lo esi.
b Pya yigabari ama wee yiga kɔ, lo fituru le lo mii wee kiiya lu ekpaloo le miī Kraist sɔ̄ ba aa doo lo doonu. Ba kɛɛrɛ kɔ ekpaloo Jizɔs le ye miī, lu e’waara nua zɔɔ sɔ̄ ziī ziī nɛɛ de sa ɔ̄ bu lo doonu.
c Elua enyaana pio bee ama.
d Ɛpnage ekobee ue a kɔ: “2021 Memorial Commemoration” a le nyɔɔ jw.org.
