1-2. Mesoriẹ ọwan e riẹ Ẹkarorhọ Uhwu i Jesu kẹgbukpe kẹgbukpe?

 Ọ JOMA te ẹgbukpe 2,000 ne ri Jesu ọ ha arhọ ye kpahontọre fọkiẹ ọwan, ro rhiẹ uphẹn firhọ rẹn ọwan ne vwo arhọ i bẹmẹdẹ. Uvuẹn ason na o ki hwu, Jesu no jurhi rẹn idibo yi nẹ aye i karorhọ ẹguọlọ ro djephia, nyoma irueruo ọlolọhọ rọ ha ibrẹdi ọrhẹ enyo ru.​—1 Cor. 11:23-26.

² Ọwan a huvwele urhi ọrana fọkime e vwo ẹguọlọ okokodo kpahen Jesu. (John 14:15) Kẹgbukpe kẹgbukpe, ọke re ruẹ Ẹkarorhọ na, ne dje ọdaremẹro ọwan phia fọkiẹ oborẹ o ru rẹn ọwan, nyoma re fi ọke rhotọre roro kodo, ji nẹrhomo kpahen oborẹ uhwu i Jesu o mevirhọ. Ọwan ne ji vwobọrhọ owian aghwoghwo na rhọ rhẹ omamerhomẹ, ji jirie rẹn ihworho buebun nẹ aye i homaba ọwan ruẹ irueruo oghẹnrensan ọnana. Habaye, e vwo omwemẹ ra na ja ha uphẹn rẹn emru owuorowu lẹrhẹ ọwan je riẹ Ẹkarorhọ na.

3. Me ye ne yono kpahen uvuẹn urhomu-ẹmro ọnana?

³ Uvuẹn urhomu-ẹmro ọnana, ene yono kpahen izede esa rẹ ihworho i Jehova e ru damoma ruẹ Ẹkarorhọ Uhwu i Jesu: (1) nyoma aye a rharhumu hẹrokele udje i Jesu ọ ha mwu, (2) ha use rẹn awọrọ rhiẹ Ẹkarorhọ na,  (3) nyoma aye e ruẹ Ẹkarorhọ na udabọ erhirhiẹ egbogbanhon.

4. Enọ ego ya kpahanrhọ kẹgbukpe kẹgbukpe ọke re ruẹ Ẹkarorhọ na, mesoriẹ o vwo fo na ha ukẹro sakamu ni irhomẹmro erana? (Luke 22:19, 20)

⁴ Kẹgbukpe kẹgbukpe uvuẹn Ẹkarorhọ na, ọwan a kerhọ ẹmro ra bọn kpahen i Baibol na rọ dabu kpahenrhọ enọ buebun. E yono oborẹ ọsoriẹ ituakpọ a guọlọ otan, ọrhẹ oborẹ uhwu ọhworhare owu o ru phorho edandan ihworho buebun. Na karorhọ ọwan oborẹ ibrẹdi na ọrhẹ enyo na i mevirhọ, ọrhẹ ihworho ri na sabu riẹ ji da ye. (Se Luke 22:19, 20.) Ọwan ne ji roro kpahen ebrurhọ ra hẹrhẹ eri vwo ifiẹrorhọ aye ine rhirhiẹ otọrakpọ na. (Isa. 35:5, 6; 65:17, 21-23) A vwa ha ukẹro sakamu ni irhomẹmro enana-a. Iduduru manẹ iduduru ihworho e vwẹruọ aye-e, aye e ji vwo ọdaremẹro kpahen oborẹ izobo otan i Jesu ọghanren te-e. Aye i vwe ji ruẹ Ẹkarorhọ uhwuie lele udje ri Jesu o dje rhotọre-e. Mesoriẹ?

5. Ọke inyikọ na buebun e hwu hin, me yọ phia rẹn udje ri Jesu o dje rhotọre?

⁵ Ogege inyikọ i Jesu e hwu hin, ihworho ra gemai ruẹ jerẹ Ilele Kristi ni homaba ukoko na. (Matt. 13:24-27, 37-39) Aye na tẹmro “efian neneyo idibo na i homaba aye.” (Acts 20:29, 30) Owu usuẹn ẹmro “efian” rẹ Ilele Kristi efian na i yonorin ọke oru yẹ, Jesu ọ homa yen kpahontọre ‘ukwọgbọ fọkiẹ edandan ihworho buebu-un,’ jerẹ oborẹ i Baibol na ọ tare-e, ọrẹn ana rha vwanriẹn izobo yi na ọgbọ buebun. (Heb. 9:27, 28) Inyenana, ihworho buebun ri vwo omamọ ẹhẹn i vwo ekwerhọ kpahen uyono efian ọrana. Aye e riẹ ishọshi ọke ephian​—ọkezẹko kẹdẹkẹdẹ​—nẹ aye i ruẹ oborẹ aye e se “the Sacrifice of the Mass.” b Ukoko ẹga erọrọ i vwe ruẹ ẹkarorhọ uhwu i Jesu ọke ephia-an, ọrẹn ihworho re riẹ ẹga aye, a dabu vwẹruọ oborẹ uhwu i Jesu o mevirhọ-ọ. Ezẹko ina sabu rhe roro, ‘Uhwu i Jesu o ghini mevirhọ taghene ana sabu harhomu edandan mẹ?’ Mesoriẹ aye a nọ onọ ọrana? Uvuẹn erhirhiẹ buebun, fọkime ihworho i yonirin aye taghene uhwu i Jesu ọ sabu harhomu edanda-an. Me yọ ha userhumu rẹn idibo i Jesu vwẹruọ oborẹ izobo yi o mevirhọ, ọrhẹ izede ro serhọ re ne ruie lele?

6. Uvwre ẹgbukpe 1872, me yẹ emọ uyono i Baibol na i vwẹruọ ye?

⁶ Uvwre ehion ẹgbukpe 1900, Charles Taze Russell ọrhẹ ẹko emọ Baibol na, ni dabu gbẹro rhotọre yono i Baibol na kodo. Aye i guọlọ rhe urhomẹmro na kpahen ọghanronmẹ izobo i Jesu ọrhẹ oborẹ ana karorhọ uhwuie lele. Uvwre ẹgbukpe 1872, aye ni kwerhọ ye nyoma i Baibol na taghene Jesu o ghini tiobọnu otan rẹn ituakpọ ephian. Aye e ti oborẹ aye i yonorin nu-u. Ukpomaran, aye ni ghwoghwirie nyoma ẹbe sansan, ẹbe ra kpare iyẹnrẹn ọrhẹ imagazini. Ọrana ọ vrẹn hin, aye na hẹrokele Ilele Kristi erukaro na ji ruẹ Ẹkarorhọ na ukwọgbọ ẹgbukpe.

7. Marhẹ e ru mẹrẹn erere nẹ uyono rẹ emọ uyono i Baibol na i vwobọrhọ ọke ọtonrhọ?

⁷ Inyenana, ọwan a mẹrẹn erere nẹ  uyono okokodo rẹ Ilele Kristi urhomẹmro erana i vwobọrhọ ẹgbukpe buebun ri vrẹnren na. Izede ọgo? Nyoma ebrurhọ i Jehova, a dabu vwẹruọ oborẹ izobo i Jesu o mevirhọ ne, ọrhẹ oborẹ ono ru rẹn ituakpọ. (1 John 2:1, 2) E ji yono ne uvuẹn i Baibol na taghene ituakpọ ri ruẹ oborẹ ọ merhen Osolobrugwẹ oma, i vwo ifiẹrorhọ eva​—akpọ ijehwuo obẹ odjuwu, ọrhẹ arhọ i bẹmẹdẹ uvuẹn otọrakpọ na harẹn iduduru awọrọ. Ọwan ne tikẹrẹ i Jehova rhọ ọke re roro kpahen oborẹ o vwo ẹguọlọ kpahen ọwan te, ọrhẹ oborẹ ene ru mẹrẹn erere omobọ nẹ izobo i Jesu. (1 Pet. 3:18; 1 John 4:9) Omarana, jerẹ imizu ukoko na ọke ri vrẹnren, ọwan a ha use rẹn awọrọ homaba ọwan ruẹ Ẹkarorhọ na lele udje ri Jesu o dje rhotọre.

8. Me yẹ ihworho i Jehova i ru ne nẹ aye i sabu ha use rẹn awọrọ rhiẹ Ẹkarorhọ na? (Ni ifoto na.)

⁸ O jiri ne rẹ ihworho i Jehova a ha use rẹn awọrọ rhiẹ Ẹkarorhọ na. Uvuẹn ẹgbukpe 1881, na ha use rẹn imizu sansan uvuẹn United States nẹ aye i vwoma ruẹ irueruo oghẹnrensan ọnana uvuẹn oghwa omizu owu obẹ Allegheny, Pennsylvania. Ọke oru, ukoko owuowu no ruẹ Ẹkarorhọ na. Uvuẹn March 1940, na ta rẹn ighwoghwẹmro na taghene aye ina sabu ha use rẹn ihworho ri ha okogho aye. Uvuẹn ẹgbukpe 1960, uvuẹn ọke ukaro, Oghọn Ukoko no fomu ẹbe use rẹn ikoko sansan. Nẹ ọke ọrana rhe, ne tiobọnẹ iduduru ẹbe use buebun rẹn ihworho. Mesoriẹ ọwan e dje aruẹ omẹdamu ọrana phia, na sabu ha use rẹn awọrọ?

9-10. Ọrọmo yọ mẹrẹn erere arha ha userhumu rẹn awọrọ rhiẹ Ẹkarorhọ na? (John 3:16)

 ⁹ Iroro owu rọ lẹrhẹ ọwan ha use rẹn awọrọ rhiẹ Ẹkarorhọ na, yẹ ọrẹ ene yono aye urhomẹmro na ọke ukaro kpahen oborẹ i Jehova ọrhẹ Jesu i ru rẹn ọwan ne. (Se John 3:16.) E fiẹrorhọ taghene oborẹ aye i rhonrin, ji mẹrẹn ọke re ruẹ Ẹkarorhọ na, ono mwu aye yono kpahen Jehova rhọ, ji rhiẹ idibo yi. Ọrẹn, awọrọ a ji mẹrẹn erere.

¹⁰ Ọwan a ji ha use rẹn eri nẹ ukoko na ne. Ọwan e ruẹ ọnana nẹ aye i sabu karorhọ taghene Jehova o ji vwo ẹguọlọ kpahen aye. Buebun a kpahanrhọ use na, oma ọ ji merhen ọwan aye i rha rhe. Ẹkarorhọ Uhwu na, ọ lẹrhẹ aye karorhọ aghọghọ aye i vwori ọke aye a ga i Jehova bi. Roro kpahen udje i Monica. c A rharhumu kwe riẹn no rhiẹ oghwoghwẹmro uvwre ọke emiamo i COVID-19. Ọke ro riẹ Ẹkarorhọ Uhwu i Jesu ọrẹ ẹgbukpe 2021, nọ tare: “Ẹkarorhọ ọnana, ọ ghanren mẹ omamọ. Fọkime ọnana ọke ukaro uvwre ẹgbukpe 20, ri mia sabu ghwoghwo rẹn ihworho ji ha use rẹn aye rhiẹ Ẹkarorhọ na. Mi wian owian na nẹ ẹhẹn rhe, fọkime mi vwo ọdaremẹro kpahen oborẹ i Jehova ọrhẹ Jesu i ru mẹ.” (Ps. 103:1-4) Sẹ ihworho i kpahenrhọ use ọwan, yanghene aye a kpahenrhọ ye-e, ọwan a ji dabu ha use rẹn awọrọ rhiẹ Ẹkarorhọ na fọkime Jehova ọ djokarhọ omẹdamu ọwan.

11. Marhẹ i Jehova o ru ha ebrurhọ rẹn omẹdamu ọwan ra ha use rẹn ihworho rhiẹ Ẹkarorhọ na? (Haggai 2:7)

¹¹ Jehova ọ ha ebrurhọ rẹn omẹdamu ọwan ra ha use rẹn ihworho rhiẹ Ẹkarorhọ na. Uvuẹn ẹgbukpe 2021, udabọ ebẹnbẹn emiamo i COVID-19 ọ soro, ihworho ri rhiẹ Ẹkarorhọ na i bun te 21,367,603. Ọrana ọ joma ha emrẹ akwasa bun ghwẹ Iseri Jehova ri ha akpọ na! Itiọrurhomẹmro, o rhiẹ uchunu ihworho na yi Jehova ọ mai vwo ọdamẹ kpahe-en. Ọrẹn, eri dje omamerhomẹ phia. (Luke 15:7; 1 Tim. 2:3, 4) E vwo imwẹro taghene Jehova ọ nyoma Ẹkarorhọ na guọlọ eri vwo omamọ ẹhẹn.​—Se Haggai 2:7.

12. Erhirhiẹ ego yi na sabu lẹrhiẹ bẹn re ne ruẹ Ẹkarorhọ na? (Ni ifoto na.)

¹² Jesu ọ mẹraro taghene uvuẹn ẹdẹ ri koba na, ana dẹrughwaroghwu erhirhiẹ egbogbanhon sansan, jerẹ ẹkparehaso ekrun, ivweri, emiamo, ẹkparehaso igọmẹti ọrhẹ ekwakwa erọrọ. (Matt. 10:36; Mark 13:9; Luke 21:10, 11) Ọkezẹko, erhirhiẹ erana a lẹrhiẹ bẹn re ne ruẹ Ẹkarorhọ Uhwu i Jesu. Me yẹ imizu sansan i ru ne nẹ aye i sabu fiẹ ebẹnbẹn enana kparobọ, marhẹ i Jehova o ru ha userhumu rẹn aye?

13. Marhẹ i Jehova o ru ha ebrurhọ rhẹ uduefigbere ọrhẹ omwemẹ Artem o vwori ro no ruẹ Ẹkarorhọ na uvuẹn ekanron?

¹³ Ekanron. Imizu ukoko na ri ha ekanron fọkiẹ esegburhomẹmro aye, a ji damoma ruẹ Ẹkarorhọ Uhwu i Jesu. Roro kpahen udje Artem. Uvwre ọke Ẹkarorhọ ọrẹ ẹgbukpe 2020, e firie rhẹ ekanron rọ kamurun omamọ ro vwo awan isionrin uvwre ọke owu. Udabọ ọnana, nọ sabu koko ekwakwa ezẹko jerẹ ibrẹdi ọrhẹ enyo rọ nọ ha ruẹ Ẹkarorhọ na, no ji mwuegbe rọ nọ ha ẹmro Ẹkarorhọ na phia. Ọrẹn, awọrọ uvuẹn ekanron na e phopho isigẹti, ji tẹmro aghwa omamọ.  Ni me yo ruru? Nọ nọren aye sẹ aye ina sabu dobọ isigẹti ephopho ji, ọrhẹ ẹmro aghwa ẹta emrẹ unọke owu ọvo. O gbe Artem unu taghene aye ni kweri taghene aye i phopho isigẹti, ji tẹmro aghwa uvwre ọke Ẹkarorhọ na-a. Artem nọ tare: “Ni mi ta rẹn aye kpahen Ẹkarorhọ na.” Dedevwo aye i tare taghene aye a guọlọ rhon kpahen irueruo na-a, ọrẹn aye ni nọ kpahiẹn ọke aye a mẹrẹn ji rhon oborẹ Artem o ruẹ Ẹkarorhọ na lele.

14. Omẹdamu ọgo ye djephia na sabu ruẹ Ẹkarorhọ na udabọ emiamo i COVID-19?

¹⁴ Emiamo i COVID-19. Ọke emiamo ọnana ọ homaphia, ihworho i Jehova a sabu vwoma kugbe ọrẹ ugboma ruẹ Ẹkarorhọ na-a. Ọrẹn, ọrana ọ lẹrhẹ aye je ruẹ Ẹkarorhọ na-a. d Ikoko sansan ri vwo itanẹti ni ruẹ Ẹkarorhọ Uhwu na nyoma ividio. Marhẹ iduduru ihworho erọrọ ri vwe vwo itanẹti i ru ruẹ Ẹkarorhọ na? Uvuẹn ẹkwotọre ezẹko, na ha ẹmro na phia uvuẹn ekpetughe ọrhẹ ekpeti agboro. Habaye, Oghọn Ukoko sansan ni ha ẹmro na phia uvuẹn edjadjẹ ri vrẹn 500, neneyo eri ha ekete ri vwe ji rhie, i sabu  ruẹ Ẹkarorhọ na. Imizu ezẹko ni homakpahontọre kpare ẹmro Ẹkarorhọ na vwe imizu ri guọleriẹ.

15. Me wu yono nẹ udje ọmọ uyono i Baibol re se Sue?

¹⁵ Ẹkparehaso ekrun. Obẹnbẹn rọmai gbanhon rẹn ihworho ezẹko, rẹ aye ine ruẹ Ẹkarorhọ na, yẹ ẹkparehaso ekrun. Roro kpahen udje ọmọ uyono i Baibol owu re se Sue. Uvuẹn ẹgbukpe 2021, uvuẹn ẹdẹ ene ki ruẹ Ẹkarorhọ na, Sue nọ ta rẹn omizu ro yonie i Baibol na taghene fọkiẹ ẹkparehaso ekruien uvuẹn oghwa, ọye ọ sabu ruẹ Ẹkarorhọ na-a. Omizu na no se Luke 22:44. Nọ ta riẹn taghene ekwakwa i rha gbanhon rẹn ọwan, ofori na hẹrokele udje i Jesu nyoma ra na nẹrhomo vwe i Jehova, ji hẹrosuiẹ nẹ ẹhẹn rhe. Ẹdẹ ọreva ye, Sue no mwuegbe ibrẹdi ọrhẹ enyo na, ji ni ẹkwaphiẹrhotọre oghẹnrensan Ogame Urhiọke uvuẹn jw.org. Ọke ọye ọvo ọ ha obuvun ọnẹyen owuọwọn ẹdẹ ọrana, nọ nyoma ifonu kerhọ ẹmro Ẹkarorhọ na. Ọke oru, Sue nọ ya ileta vwe omizu ro yonie na: “Wu ha urhebro mẹ omamọ odẹrorieri na. Mi ruẹ kemru kemru ne mi sabu ruẹ Ẹkarorhọ na, Jehova no ruẹ ọrọ hẹrhẹre. Oma ọ ghini merhen mẹ omamọ!” Wu rorori taghene Jehova ọnọ ghini sabu ha userhumu wẹn uvuẹn aruẹ erhirhiẹ ọrana?

16. Mesoriẹ e vwo imwẹro taghene Jehova ọnọ ha ebrurhọ rhẹ omẹdamu ọwan re ne riẹ Ẹkarorhọ na? (Romans 8:31, 32)

¹⁶ Oma ọ merhen i Jehova ọke erhe dje omẹdamu phia re ne ruẹ Ẹkarorhọ Uhwu i Jesu. E vwo imwẹro taghene ọnọ ha ebrurhọ rẹn ọwan erhe dje ọdaremẹro phia fọkiẹ oborẹ o ru rẹn ọwan. (Se Romans 8:31, 32.) Jene brorhiẹn re ne riẹ Ẹkarorhọ Uhwu i Jesu ọrẹ ẹgbukpe ọnana, ji ruẹ ekete omẹgbanhon ọwan o teri na wian bunrhọ uvuẹn ogame i Jehova uvwre ọke Ẹkarorhọ na.