1-2. Why nao iumi attendim Memorial evri year?

 KLOSAP 2,000 year go finis, Jesus givim laef blo hem for iumi, mekem iumi savve kasem laef olowe. Lo naet bifor Jesus dae, hem givim komand for olketa disaepol duim wanfala simpol ceremony for rememberim bigfala love wea hem showimaot. Hem iusim bred and wine for duim datwan.​—1 Cor. 11:23-26.

² Iumi obeyim disfala komand blo Jesus bikos iumi barava lovem hem. (John 14:15) Evri year lo olketa week bifor and afta lo Memorial, iumi showimaot iumi tinghae lo wat hem duim taem iumi spendem taem for prea and ting raonem gud samting iumi kasem from dae blo hem. And lo datfala taem, iumi hapi for duim moa samting lo ministry and for invaetem staka pipol for attend witim iumi lo datfala spesol taem. And iumi sure bae iumi no letem eni samting for stopem iumi for attendim Memorial.

3. Wat nao bae iumi storyim lo disfala article?

³ Lo disfala article, bae iumi storyim thrifala important samting wea pipol blo Jehovah duim for rememberim dae blo Jesus: (1) For followim moa hao Jesus duim Memorial bifor, (2) for invaetem pipol for attendim Memorial, and (3) for no misstim Memorial nomata taem hem no isi.

4. Olketa wanem important truth nao iumi lanem each year lo Memorial, and why nao iumi shud no ting smol lo datwan?

⁴ Evri year lo Memorial, iumi savve lisin lo wanfala tok wea base lo Bible wea storyim kliafala ansa for samfala  kwestin. Iumi lanem why iumi evriwan needim wanfala ransom, and hao dae blo wanfala man fit for finisim olketa sin blo staka pipol. Iumi lanem tu wat nao bred and wine piksarem and hu nao shud drinkim wine and kaikaim bred. (Readim Luke 22:19, 20.) And iumi ting raonem tu olketa blessing wea bae kamap lo future for olketa wea garem hope for laef olowe lo earth. (Isa. 35:5, 6; 65:17, 21-23) Iumi shud no ting smol lo olketa important truth hia. Staka billion pipol no savve lo diswan, and olketa no luksavve hao important nao sakrifaes blo Jesus. Olketa no savve duim tu Memorial blo dae blo Jesus followim hao hem duim bifor. Why nao olsem?

5. Bihaen staka aposol dae finis, wat nao happen lo hao olketa Christian celebratem Memorial?

⁵ No longtaem bihaen staka aposol blo Jesus dae, olketa laea Christian kam insaed kongregeson. (Matt. 13:24-27, 37-39) Olketa “talem olketa samting wea no stret for mekem olketa disaepol followim olketa.” (Acts 20:29, 30) Wanfala lo olketa samting wea “no stret” wea olketa laea Christian hia teachim, hem hao Jesus no “dae wantaem nomoa for sin bilong plande pipol” olsem wanem Bible teachim, bat olketa sei datfala sakrifaes mas kamap staka taem. (Heb. 9:27, 28) Distaem staka pipol bilivim datfala false teaching. Olketa go lo church each week, samfala taem each day, for duim datfala celebration wea olketa Catholic kolem “Sakrifaes blo Mass.” b Olketa nara religion savve celebratem tu dae blo Jesus bat no olowe, nomata olsem staka church member blo olketa no idea lo wat nao sakrifaes blo Jesus hem minim. Samfala maet ting, ‘Dae blo Jesus hem really mekem mi savve kasem forgiveness tu?’ Why nao olketa ask olsem? Samfala taem, hem bikos olketa wea no bilivim ransom mekem olketa for daotem hao dae blo Jesus hem openem wei for kasem forgiveness. Wat nao olketa tru follower blo Jesus duim for deal witim datwan?

6. Kasem 1872, wat nao wanfala grup blo olketa Bible student faendemaot?

⁶ Lo 1870, wanfala grup blo olketa Bible student wea Charles Taze Russell leadim, start duim deep study lo Bible. Olketa laek for savve lo truth abaotem hao important nao sakrifaes blo Jesus, and wat nao stretfala wei for rememberim dae blo hem. Kasem 1872, olketa luksavve nao dat Bible hem teachim hao Jesus givim wanfala ransom for evriwan. Olketa laek for talemaot wanem olketa faendem. So olketa iusim olketa buk, niuspepa, and magasin for duim datwan. And kwiktaem nomoa, olketa start for followim example blo olketa Christian lo first century for hipap tugeta for attendim Memorial wantaem lo year nomoa.

7. Hao nao research blo olketa Christian brata lo 19th century helpem iumi distaem?

⁷ Research wea olketa Christian brata hia duim barava helpem iumi distaem. Hao nao hem helpem iumi? Jehovah helpem iumi for luksavve lo truth abaotem sakrifaes blo Jesus and olketa gud samting iumi kasem from datwan. (1 John 2:1, 2) Iumi lanem tu hao Bible storyim tufala hope for pipol wea mekem God hapi. Samfala hope for laef olowe lo heven and no savve dae moa and staka  million hope for laef olowe lo earth. Taem iumi luksavve Jehovah barava lovem iumi and hao iumi wanwan savve kasem gud samting from ransom sakrifaes blo Jesus, datwan mekem iumi for fren klos witim Jehovah. (1 Pet. 3:18; 1 John 4:9) Olsem olketa faithful brata blo iumi lo 19th century, iumi laek invaetem pipol for joinim iumi for duim Memorial followim hao Jesus duim bifor.

8. Wat nao pipol blo Jehovah bin duim for invaetem narawan for attendim Memorial? (Lukim piksa.)

⁸ For staka year finis pipol blo Jehovah invaetem pipol for attendim Memorial. Lo samting olsem 1881, olketa brata and sista lo United States kasem invitation for hipap lo wanfala haos for attendim Memorial lo Allegheny, Pennsylvania. Bihaen datwan, each kongregeson savve duim Memorial seleva. Then lo March 1940, olketa pablisa kasem instruction for invaetem pipol lo territory wea interest for attend. Lo 1960, hem firstaem for Bethel provaedem invitation for olketa kongregeson. Kam kasem distaem, iumi givimaot staka billion Memorial invitation. Why nao iumi spendem taem and duim staka samting for invaetem narawan?

9-10. Hu nao kasem gud samting from iumi duim best for invaetem pipol for kam lo Memorial? (John 3:16)

⁹ Wanfala reason why iumi invaetem olketa narawan for attendim Memorial witim iumi, hem bikos iumi laekem olketa wea kam for lanem truth abaotem wanem Jehovah and Jesus duim for iumi  evriwan. (Readim John 3:16.) And iumi hope wanem olketa herem and lukim lo Memorial bae helpem olketa for laek lanem samfala samting moa and worshipim Jehovah. Bat, olketa narawan tu kasem gud samting.

¹⁰ Iumi invaetem tu olketa brata and sista wea inactive. Iumi duim datwan for remindim olketa hao God still lovem olketa, and iumi hapi for lukim staka lo olketa hia kam lo Memorial. Taem olketa kam, olketa remember hao taem olketa duim waka blo Jehovah bifor, datwan mekem olketa hapi tumas. Tingim example blo Monica. c Hem kamap active pablisa moa lo taem blo COVID-19 pandemic. Bihaen hem attendim Memorial lo 2021, hem sei: “Disfala Memorial hem barava spesol lo mi. Bihaen 20 year, hem firstaem moa for mi preach lo pipol and for invaetem olketa for Memorial. Mi barava laek for duim datwan bikos mi tinghae lo wanem Jehovah and Jesus duim for mi.” (Sams 103:1-4, SIPB) Nomata pipol acceptim invitation or nomoa, iumi laek duim best blo iumi for invaetem pipol for Memorial, bikos iumi savve Jehovah hapi lo datwan.

11. Hao nao Jehovah blessim wanem iumi duim for invaetem pipol for kam lo Memorial? (Haggai 2:7)

¹¹ Jehovah barava blessim wanem iumi duim for invaetem pipol for kam lo Memorial. Lo 2021, nomata iumi no savve duim samfala samting bikos lo COVID-19 pandemic 21,367,603 pipol nao attendim Memorial. Datwan hem klosap thri taems winim namba blo Olketa Jehovah’s Witness lo full world! Hem tru, Jehovah no interest lo namba nomoa, bat hem interest lo each wan wea attend. (Luke 15:7; 1 Tim. 2:3, 4) Iumi sure taem iumi duim waka for invaetem pipol, Jehovah helpem iumi for faendem olketa wea garem gudfala heart.​—Readim Haggai 2:7.

12. Wat nao samfala situation wea savve mekem hem hard for iumi duim Memorial? (Lukim piksa.)

¹² Jesus talem hao lo olketa last day iumi bae feisim staka hard situation, olsem famili againstim iumi, persecution, war, sik, and staka samting moa. (Matt. 10:36; Mark 13:9; Luke 21: 10, 11) Samfala taem, olketa situation olsem savve mekem hem hard for iumi duim Memorial. Wat nao olketa brata and sista blo iumi duim for winim olketa challenge olsem, and hao nao Jehovah helpem olketa?

13. Hao nao Jehovah blessim wei wea Artem no fraet and duim Memorial nomata hem stap lo prison?

¹³ Stap lo prison. Olketa brata and sista blo iumi wea stap lo prison bikos olketa faithful lo God, olketa duim wanem olketa fit for duim for rememberim dae blo Jesus. Tingim example blo Artem. Lo taem blo 2020 Memorial, hem stap lo wanfala cell wea 17-square-meter (183-sq-ft), and samting olsem faevfala prisoner savve stap insaed. Nomata hem stap lo prison, hem faendem samfala samting wea hem savve iusim for bred and wine, and hem plan for givim tok for hemseleva. Bat olketa prisoner wea stap witim hem savve smoke and swear. Wat nao hem duim? Hem askem olketa for stop for smoke and swear for wan hour. Artem barava no expectim, bat olketa agree for no swear and smoke taem hem duim Memorial. Artem laek for explainim Memorial lo olketa bat olketa no laek herem. Bat bihaen olketa lukim and  herem hao Artem duim Memorial, olketa askem hem staka kwestin.

14. Lo taem blo COVID-19 pandemic, wat nao samfala duim for no misstim Memorial?

¹⁴ COVID-19 pandemic. Lo taem blo disfala pandemic, pipol blo Jehovah no fit for hipap tugeta for attendim Memorial. Bat datwan no stopem olketa for duim Memorial. d Olketa kongregeson wea garem Internet iusim videoconferencing for duim Memorial. Bat waswe lo staka million pipol wea no garem Internet? Lo samfala kantri, branch office arrangem for olketa herem lo radio, or lukim lo television. And tu, olketa branch recordim Memorial tok lo winim 500 languis mekem olketa wea stap farawe tu savve duim Memorial. And olketa brata arrange for tekem recording hia go lo olketa wea needim.

15. Wat nao iu lanem from experience blo wanfala Bible student wea nem blo hem Sue?

¹⁵ Taem famili againstim iumi. Wanfala situation wea mekem hem no isi for samfala  attendim Memorial nao, hem wei wea famili againstim olketa. Tingim wanfala Bible student wea nem blo hem Sue. Lo 2021, lo day bifor Memorial, Sue talem Bible teacher blo hem dat bae hem no attendim Memorial bikos famili againstim hem. Bible teacher blo hem readim Luke 22:44, then hem explainim hao nomata iumi feisim olketa hard situation, iumi shud followim example blo Jesus for prea lo Jehovah and barava trustim Hem. Lo next day, Sue preparem bred and wine and watchim datfala spesol Morning Worship program lo jw.org. Lo evening, hem go seleva lo rum and connect go lo Memorial lo phone blo hem. Bihaen, Sue raet go lo Bible teacher blo hem and sei: “Yesterday iu encouragem mi tumas. Mi duim wanem mi fit for duim for attendim Memorial and Jehovah barava helpem mi. Mi laek for talem hao mi hapi tumas!” Hao, iu ting Jehovah savve helpem iu tu sapos iu feisim semkaen situation?

16. Why nao iumi savve sure hao Jehovah bae blessim wanem iumi duim for attendim Memorial? (Rome 8:31, 32)

¹⁶ Jehovah barava tinghae lo wanem iumi duim for rememberim dae blo Jesus. Iumi sure bae hem blessim iumi taem iumi showimaot iumi tinghae lo wanem hem duim for iumi. (Readim Rome 8:31, 32.) So iumi no laek letem eni samting for mekem iumi misstim Memorial disfala year, and iumi laek for duim moa samting for Jehovah lo olketa week bifor and bihaen lo Memorial.