1, 2. ¿Tyiʼiga dyaʼ tan̈togoytyaʼmpa jesɨk itypa jeʼm Jɨɨskimoʼoyi?

 TOOMIAM 2,000 amtyɨy, iga Jesús ikɨan̈kot iityi por taɨchtyam, y jeʼyukmɨ tanaitytyaʼm jeʼm an̈jogoʼoyi iga tampɨktson̈taʼmpa tuum ityi dyapɨk kuyajpa. Jeʼm tsuʼu wiñtyi iga kaʼaba Jesús, iniwiʼkmon̈ jeʼm ikuyujkɨʼɨwiñyaj y ikɨʼɨsyaj jeʼm kaxtyañaañi y iukyaj jeʼm vino. Okmɨ ipɨʼɨmɨy jeʼm ikuyujkɨʼɨwiñyaj iga duroj ijɨɨsyajiñ jempɨk jeʼ iwat (1 Cor. 11:23-26).

² Iga tsaam tantoytyaʼmpa Jesús, tan̈kupɨktaʼmpa jempɨk jeʼ pɨʼɨmɨyoy iga wattaiñ(Juan 14:15). Tumtum amtyɨy jesɨk wattaap jeʼm Jɨɨskimoʼoyi tanakwiñkejtaʼmpa juʼtspɨy tantsoowaixtyaʼmpa jempɨk jeʼ iwat. Juʼuts akwiñkejoʼoyi tantoppa tiempo iga tan̈watpa an̈wejpadoʼoyiyaj y tan̈kujɨɨspa tyiʼiga ikɨan̈kot iityi. Y tantoptaʼmpatyim tiempo iga majnam taputtaʼmpa jeʼm an̈matkuyjom iga wɨaiñ tantɨʼpyaj jaʼyan̈yaj iga tan̈wagajɨɨsaytyaʼmpa jeʼm Jesús ikaʼiʼ. Y tan̈wattaʼmiñ juʼtspɨy tawɨap iga odoy tan̈togoʼyiñ.

3. ¿Tyi tan̈kɨʼpin̈taʼmpa yɨʼp kuyujijom?

³ Jempɨk tan̈kuyooxataʼmpa Jehová dyaʼ tantsaktaʼmpa iga tanjɨɨsaytyaʼmpa jeʼm Jesús ikaʼiʼ. Yɨʼp kuyujijom tan̈kɨʼpin̈taʼmpa juutypɨk tan̈watnetaʼm: 1) tan̈wattaʼmpa jeʼm Jɨɨskimoʼoyi juutypɨgam Jesús nɨm, 2) tantɨʼpyajpa tun̈gakyaj y 3) dyaʼ tan̈togoytyaʼmpa mex iga tanan̈an̈kamoktaʼmpa kutɨʼɨchiyaj.

4. a) ¿Juʼptam an̈kejayoʼoyiyaj wɨan̈mattaap jesɨk itypa jeʼm Jɨɨskimoʼoyi? (Lucas 22:19, 20). b) ¿Tyiʼiga nasuntaap iga tan̈wɨkutɨʼɨyɨytyaʼmiñ yɨʼpyaj an̈kejayoʼoyiyaj?

⁴ Tumtum amtyɨy, jesɨk wattaap jeʼm Jɨɨskimoʼoyi, tan̈kumaton̈taʼmpa tuum najɨʼyoʼoyi topnetawɨʼɨp jeʼm Bibliajom iga ikutson̈ba weeñi akwagoʼoyiyaj. Juʼuts akwiñkejoʼoyi, tyiʼiga tatogoyaytyaʼm jeʼm kɨakpudoʼoyi y tyiʼiga kun jeʼm Jesús ikaʼiʼ jaʼyan̈yaj wadayyajtaap perdón jeʼm ityan̈kaʼ. Takjɨɨstaap ityam ikɨʼɨsyajpa jeʼm kaxtyañaañi y iukyajpa jeʼm vino, y tyiapaʼap ikwiñkejyajpa (maayɨʼ Lucas 22:19, 20). Jesɨk aknastaap jeʼm najɨʼyoʼoyi, tayooxpaʼtpa iga tan̈kujɨɨxiñ jeʼm kumaykedoʼoyiyaj iga ipɨktson̈yajpa jempɨk ityyajpa yɨʼp Naxyukmɨ (Is. 35:5, 6; 65:17, 21-23). Jesɨk tan̈kutɨʼɨyɨʼyba yɨʼpyaj an̈kejayoʼoyiyaj tsaam tamaymaywatpa; odoy tan̈kujaʼamaytyaʼmiñ. Jaʼyan̈yaj dyaʼ ikutɨʼɨyɨyyajpa y jeʼyukmɨ dyaʼ ichoowaixyajpa tyiʼiga Jesús ikɨan̈kot iityi. Y dyatyim iwatyajpa jeʼm Jɨɨskimoʼoyi juutypɨgam Jesús nɨmneʼ iga wattaiñ. ¿Tyiʼiga naspa yɨʼɨmpɨk?

5. Jesɨk yajiam idyɨk kukaʼayiyaj jeʼm apóstolyaj, ¿juutypɨk jaʼyan̈yaj moj ijɨɨsayyaj jeʼm Jesús ikaʼiʼ?

⁵ Jesɨk yajiam idyɨk kukaʼayiyaj jeʼm apóstolyaj, jempɨk nɨʼman̈tayayajpa iga cristianojyaj moj in̈kejyaj mɨgoʼoyiyaj jeʼm kumunjom (Mat. 13:24-27, 37-39). Imɨgoyayyajtoʼoba idyɨk «jém icupɨcnewɨɨp Cristo iga ictsacpa jém Dios iŋma̱t́i» (Hech. 20:29, 30). Tuum mɨgoʼoyi iga moj in̈kejyaj, jeʼ iga Jesús dyaʼ tyun̈kɨy ikɨan̈kot imɨjtaay «iga iccáyáypa jáyaŋ jém pɨxiñt́am it́áŋca». Dyaʼ idyɨk in̈kejyajpa juʼuts nɨmpa jeʼm Dios In̈maatyi, jeʼeyaj nɨmyajpa idyɨk iga Cristo watykɨy ikɨan̈kodyiñ iityi (Heb. 9:27, 28). Yɨʼp jaama, jaʼyan̈yaj mex iga iniityyaj tuum wɨbɨk jɨɨxi ikupɨkyajpa yɨʼp mɨgoʼoyi. Nɨkyajpa mastɨkjom tumtum semana, o tumtum jaama, iga nɨkpa ikumaton̈yaj jeʼm misa. b Ity religiónyaj iga dyaʼ ijaya jɨɨsayyajpa jeʼm Jesús ikaʼiʼ, pero jaʼyan̈yaj jempɨk sɨʼɨyajpa jeem, dyaʼ ikutɨʼɨyɨyyajpa juutypɨk iwɨwadayyajpa jeʼm kɨakpudoʼoyi. Wɨapsɨ iga weeñiyaj nakwaʼkyajtaap: «¿Nunta jeʼm Jesús ikaʼiʼ ayooxpaʼtpa iga akujaʼamayaytyaiñ jeʼm antan̈kaʼ?». Weeñiyaj nawadayyajtaap yɨʼp akwagoʼoyi, iga jeempɨgam akkupɨkneyajta iga jeʼm Jesús ikaʼiʼ dyaʼ kuyooxaoʼyba. ¿Y tyi iwatneyaj jeʼm Jesús iñunta kuyujkɨʼɨwiñyaj?

6. ¿Tyi ikutɨʼɨyɨyyaj jeʼm ikuyujkayajpaʼap jeʼm Biblia en 1872?

⁶ En jeʼm amtyɨy setenta del siglo diecinueve, Charles Russell y jeʼm igrupo ikuyujkayajpaʼap jeʼm Biblia, moj iwɨkɨʼpin̈yaj jeʼm Dios In̈maatyi. Ikutɨʼɨyɨyyajtoʼoba idyɨk juutypɨk tawɨwadaʼyba jeʼm Jesús ikaʼiʼ y juutypɨk jɨɨsaytyaiñ. Iga iwɨkuyujkayaj jeʼm Biblia, en 1872 ikutɨʼɨyɨyyaj iga Jesús ikɨan̈kot iityi iga tayojaytyaʼm tantan̈kaʼ. Y dyaʼ in̈neʼkyaj jempɨk ijoodon̈ayaj. Moj in̈matyaj ikuyukmɨ jeʼm libros, periódicos y revistas. Dyaʼ maaj jaʼy tumtum amtyɨy moj iwatyaj jeʼm Jɨɨskimoʼoyi, juʼutstyim iwatyajpa idyɨk jeʼm cristianojyaj ityyajwɨʼɨp en jeʼm wiñtyipɨk siglo.

7. ¿Juutypɨk tayooxpaʼttaʼmpa yɨʼp jaama ityumpɨy jempɨk ikutɨʼɨyɨyyaj jeʼm ikuyujkayajpaʼap jeʼm Biblia?

⁷ ¿Juutypɨk tayooxpaʼttaʼmpa yɨʼp jaama ityumpɨy jempɨk ikutɨʼɨyɨyyaj peʼm cristianojyaj? Jehová ikumayket jempɨk iwatyaj y jeʼyukmɨ sɨɨ tan̈wɨkutɨʼɨyɨytyaʼmpa juʼtspɨy tawɨwadaʼyba jeʼm Jesús ikɨakpudoʼoyi y ityumpɨy jempɨk iwatpa dyaʼ jaʼyñeʼ (1 Juan 2:1, 2). Tan̈kutɨʼɨyɨyñetyim iga jeʼm Biblia in̈kejpa wɨsteen an̈jogoʼoyi iga wɨap ipɨktson̈yaj jempɨk ikupɨkyajpa Dios, weeñiyaj iniityyaj  jeʼm an̈jogoʼoyi iga nɨkyajpa sɨn̈yukmɨ y jaʼyan̈yaj iniityyaj jeʼm an̈jogoʼoyi iga ipɨktson̈yajpa jeʼm ityi dyapɨk kuyajpa yɨʼp Naxyukmɨ. Y majtyim tan̈kunuʼkpa Jehová jesɨk tan̈kujɨɨspa juʼtspɨy tatoyba y juʼtspɨy tawɨwadaʼyba tumtum de taɨchtyam jeʼm Jesús ikɨakpudoʼoyi (1 Ped. 3:18; 1 Juan 4:9). Jeʼyukmɨ, juʼutstyim jeʼm wiñɨkpɨk Dios iyooxakɨʼɨwiñyaj, tantɨʼpyajpatyim tun̈gakyaj jesɨk tan̈wattaʼmpa jeʼm Jɨɨskimoʼoyi juutypɨgam Jesús nɨm iga wattaiñ.

8. ¿Tyityam iwatneyaj jeʼm Jehová iyooxakɨʼɨwiñyaj iga ityɨʼpyajiñ tun̈gakyaj jesɨk itypa jeʼm Jɨɨskimoʼoyi? (Aʼmɨ jeʼm imagenyaj).

⁸ Jeʼm Jehová iyooxakɨʼɨwiñyaj pekam sɨʼ ityɨʼpyajpa tun̈gakyaj jesɨk itypa jeʼm Jɨɨskimoʼoyi. En 1881, tɨʼpyajta jeʼm tɨwɨtam ityyajwɨʼɨp en Estados Unidos iga an̈tuʼumaayajiñ tuum tɨkkɨʼɨm de Allegheny (Pensilvania) iga iwatyajiñ jeʼm Jɨɨskimoʼoyi. Okmɨ tumtum kumun moj iwatyaj jeʼm Jɨɨskimoʼoyi. Pero en marzo de 1940 nɨʼmayyajta jeʼm an̈matkɨʼɨwiñyaj iga wɨap idyɨk ityɨʼpyaj tun̈gakyaj siiga ikumaton̈yajtoʼoba. Y en 1960, Betel moj ikutsaday jeʼm kumunyaj jeʼm invitaciónyaj. Dende jesɨgam, juʼuts Jehová tatestigojtam tan̈kusajnetaʼmum jaʼyan̈ invitaciónyaj. ¿Tyiʼiga pɨɨmi tanteguedataʼmpa iga tantɨʼpyajpa tun̈gakyaj?

9, 10. ¿Ityamnam iwɨwadayyajpa iga tantɨʼpyajpa tun̈gakyaj jesɨk itypa jeʼm Jɨɨskimoʼoyi? (Juan 3:16).

⁹ Tantɨʼpyajpa tun̈gakyaj jesɨk itypa jeʼm Jɨɨskimoʼoyi, iga tansuntaʼmpa iga ijoodon̈ayajiñtyim jempɨk Jehová y Jesús iwatneyaj por taɨchtyam (maayɨʼ Juan 3:16). Tansuntaʼmpa iga jempɨk iaʼmyajpa o ikumaton̈yajpa  peʼm tsuʼu iyooxpaʼtyajiñ iga iwɨixpɨkyajiñ y ikuyooxayajiñ Jehová. Pero dyaʼ numaaj jeʼeyaj iwɨwadayyajpa jesɨk tantɨʼpyajpa tun̈gakyaj.

¹⁰ Jeʼm invitación iyooxpaʼtpatyim jeʼm tɨwɨtam jempɨk dyam nɨkyajpa jeʼm an̈tuʼumaajiyaj y dyam putyajpa jeʼm an̈matkuy. Tantɨʼpyajpa jesɨk itypa jeʼm Jɨɨskimoʼoyi iga odoy ikujaʼamayyajiñ iga Dios ityoyyajpanam. Tsaam tamaymaywatpa jesɨk jaʼyan̈yaj ipɨkyajpa jeʼm ijɨɨxi iga nɨkyajpa. Peʼm tsuʼu iyooxpaʼtyajpa iga ijɨɨsyajiñ juʼtspɨy idyɨk maymayyaj jesɨk jaʼy ikuyooxayaj Jehová. Tanaʼmtaʼmiñ jeʼm Mónica iñasɨyoʼoyi. c Jesɨgam tsukum jeʼm pandemia del COVID-19 eybɨktyim moj in̈mat jeʼm Dios In̈maatyi. Jeʼm amtyɨy 2021, ikumaton̈ jeʼm Jɨɨskimoʼoyi iñajɨʼyoʼoyi y nɨm: «Yɨʼp Jɨɨskimoʼoyi tsaam an̈kusuʼnɨy. Nas 20 amtyɨy iga eybɨktyim anan̈kejayyajiñ tun̈gakyaj jeʼm Dios In̈maatyi y antɨʼpyajiñ jesɨk itypa jeʼm Jɨɨskimoʼoyi. Y an̈wat kun ityumpɨy ananmaj, iga tsaam amaymaywatpa jempɨk Jehová y Jesús iwatneyaj por aɨch» (Sal. 103:1-4). Tanjoodon̈tam iga Jehová ichoowaixpa jeʼm tanyooxakuytyam, jeʼyukmɨ tan̈wattaʼmpa ityumpɨy juʼtspɨyam tawɨap iga tantɨʼpyajpa tun̈gakyaj, mex siiga ipɨktson̈yajpa jeʼm invitación o dyaʼ.

11. ¿Juutypɨk ikumayketneʼ Jehová iga tantɨʼpyajpa tun̈gakyaj jesɨk itypa jeʼm Jɨɨskimoʼoyi? (Ageo 2:7).

¹¹ Jehová tsaam ikumayketneʼ ityumpɨy jempɨk tan̈wattaʼmpa iga tantɨʼptaʼmpa tun̈gakyaj jesɨk itypa jeʼm Jɨɨskimoʼoyi. Juʼuts akwiñkejoʼoyi, en jeʼm amtyɨy 2021, mex iga ity jeʼm pandemia del COVID-19, 21,367,603 tan̈kumaton̈taʼm jeʼm najɨʼyoʼoyi. Dyaʼ tyi ijoo juʼtsan̈yaj, pero jempɨk Jehová maaj ityeguedaap jeʼ ityam ikumaton̈yaj (Luc. 15:7; 1 Tim. 2:3, 4). Wɨkejpa iga jesɨk tantɨʼpyajpa tun̈gakyaj jesɨk itypa jeʼm Jɨɨskimoʼoyi, Jehová tayooxpaʼtpa tampaʼtyaj jempɨk iniityyaj tuum wɨbɨk anmaj (maayɨʼ Ageo 2:7). d

12. ¿Juʼptam nasɨyoʼoyiyaj wɨapsɨ iga dyaʼ taaʼmchiʼiba iga tan̈wattaʼmiñ jeʼm Jɨɨskimoʼoyi? (Aʼmɨ jeʼm imagen).

¹² Jesús nɨm iga jeʼm in̈an̈pɨgam jaama tannaskataʼmpa idyɨk juʼptyin̈kej yaʼachaajiyaj: jesɨk tanfamilia ijoʼykayajpa iga tan̈kuyooxaap Dios, tayaʼachwattamtaap, itypa guerras, kaʼakuyyaj… (Mat. 10:36; Mar. 13:9; Luc. 21:10, 11). Yɨʼpyaj nasɨyoʼoyiyaj wɨapsɨ iga dyaʼ taaʼmchiʼiba iga tan̈wattaʼmiñ jeʼm Jɨɨskimoʼoyi. ¿Tyi iwatneyaj jeʼm tantɨwɨtam jesɨk in̈an̈kamokyajpa yɨkxpɨk nasɨyoʼoyiyaj, y juutypɨk Jehová iyooxpaʼtneyaj?

13. ¿Juutypɨk Jehová ikumayket a Artiom iga dyaʼ kɨɨn̈ jesɨk iwat jeʼm Jɨɨskimoʼoyi mex iga pajneta idyɨk?

¹³ Jeʼm cárcel. Jeʼm tɨwɨtam pajneyajtawɨʼɨp iwatyajpa juʼtspɨyam wɨayajpa iga ijɨɨsayyajpa jeʼm Jesús ikaʼiʼ. Tanaʼmtaʼmiñ jeʼm Artiom iñasɨyoʼoyi. En jeʼm amtyɨy 2020 jesɨk dyam idyɨk jaʼyñeʼ wattaap jeʼm Jɨɨskimoʼoyi, Artiom jaʼy ipajneta en tuum celda iga iwɨtyi 17 metros, y hasta 5 kukomyajtaap idyɨk jeem. Pero wɨa mu iniity tyityam nasuntaap idyɨk iga wɨaiñ iwat jeʼm Jɨɨskimoʼoyi, y nawɨtsaktatyim iga wɨaiñ iknas jeʼm najɨʼyoʼoyi. Pero jempɨk ityyajtyim idyɨk jeem, jukyajpa y tsaam idyɨk malan̈matyajpa. ¿Tyi iwat Artiom? Jeʼ ikwaʼk siiga wɨap idyɨk iityyaj tuum hora iga odoy jukyajiñ y odoy malan̈matyajiñ. Y nɨmyaj iga wɨap, jeʼ nɨmpa: «Annɨʼmayyaj iga wɨap idyɨk anan̈madayyaj juutypɨk wattaap jeʼm Jɨɨskimoʼoyi». Mex iga jeʼeyaj dyaʼ idyɨk ijoodon̈ayajtoʼoba, jesɨgam iaʼmyaj juutypɨk sɨʼ idyɨk iwat, iwaʼkyaj iga an̈madayyajtaiñ.

14. ¿Tyi iwat jeʼm Jehová ikumun iga wɨaiñ iniityyaj jeʼm Jɨɨskimoʼoyi mex iga tsukum jeʼm pandemia del COVID-19?

 ¹⁴ Jeʼm pandemia del COVID-19. Iga tsukum yɨʼp pandemia, jeʼm Jehová ikumun dyaʼ wɨa mu in̈tuʼumaayaj iga iwatyajpa jeʼm Jɨɨskimoʼoyi. Pero wɨa mu tan̈wattaʼm. e Jeʼm tɨwɨtam iniityyajwɨʼɨp idyɨk internet wɨa mu ikumaton̈yaj jeʼm najɨʼyoʼoyi por videoconferencia. Pero ¿tyi nas kun jaʼyan̈ tɨwɨtam iga dyaʼ idyɨk iniityyaj internet? En weeñi países aknasta jeʼm najɨʼyoʼoyi por televisión o por radio. Y jeʼm sucursalyaj iwadayyaj grabación jeʼm najɨʼyoʼoyi en maaj de 500 an̈matyiimɨ, iga hasta jeʼm an̈eymɨ juuty tsaam tan̈kaʼ tannuʼk wɨaiñ iwatyaj jeʼm Jɨɨskimoʼoyi. Y weeñi tɨwɨtam oy ichakyaj yɨʼpyaj grabaciones.

15. ¿Tyi tan̈kejaytyaʼmpa jeʼm Sue iñasɨyoʼoyi?

¹⁵ Jesɨk tanfamilia ijoʼykayajpa iga tan̈kuyooxaap Dios. Weeñiyaj in̈teeñkamokneyaj jeʼm kutɨʼɨchi iga jeʼm ifamilia dyaʼ iaʼmchiyajpa iga iniityyajiñ jeʼm Jɨɨskimoʼoyi. Jeʼam jempɨk iñaskaʼ Sue. En jeʼm amtyɨy 2021, tuum jaama  wiñtyi iga wattaiñ jeʼm Jɨɨskimoʼoyi, Sue iñɨʼmay jeʼm yoomtɨwɨ ikkuyujpaʼap idyɨk iga dyaʼ wɨap ikumaton̈ jeʼm Jɨɨskimoʼoyi, iga jeʼm ifamilia dyaʼ ikusuʼnɨʼyyajpa. Jeʼm yoomtɨwɨ imayay Lucas 22:44. Iwɨan̈maday iga jesɨk tanan̈an̈kamokpa kutɨʼɨchiyaj maaj wɨɨ iga tantun̈ɨʼyiñ jeʼm Jesús iakwiñkejoʼoyi, tanan̈wejpaʼdyiñ Jehová y tan̈kupɨguiñ iga jeʼ tayooxpaʼtpa. Ikukejaama, Sue iwat jeʼm kaxtyañaañi y ikuaʼm jeʼm vino, y iaʼm en jw.org jeʼm najɨʼyoʼoyi kukejakɨʼɨmpɨk jeʼm jaama jesɨk wattaap jeʼm Jɨɨskimoʼoyi. Y jesɨk kutsuʼuya, tɨgɨy icuarto y ikumaton̈ jeʼm najɨʼyoʼoyi icelularjom. Okmɨ ijaʼyay yɨʼpyaj an̈matyiyaj jeʼm yoomtɨwɨ ikkuyujpaʼap: «Matɨʼk tsaam ananmajan̈chiʼ. An̈wat ityumpɨy juʼtspɨy awɨa iga wɨaiñ an̈kumaton̈ jeʼm Jɨɨskimoʼoyi, y Jehová ayooxpaʼt. Tsaam pɨɨmi amaymay». Siiga mimich sɨʼ iññaskaʼ yɨkxpɨk kutɨʼɨchi, ¿in̈kupɨkpa iga Jehová wɨap miyooxpaʼt?

16. ¿Tyiʼiga tan̈kupɨktaʼmpa iga Jehová ikumayketpa ityumpɨy jempɨk tan̈watpa iga wɨaiñ tañitytyaʼm jesɨk wattaap jeʼm Jɨɨskimoʼoyi? (Romanos 8:31, 32).

¹⁶ Jehová tsaam ichoowaixpa jesɨk tan̈watpa juʼtspɨyam tawɨap iga tanjɨɨsaʼyba jeʼm Jesús ikaʼiʼ. Wɨap tan̈kupɨktaʼm iga Dios takumayketpa siiga tanakwiñkejpa iga tantsoowaixpa jempɨk iwatneʼ por taɨchtyam (maayɨʼ Romanos 8:31, 32). Dyaʼ tan̈togoytyoʼoba yɨʼp amtyɨy jesɨk wattaap jeʼm Jɨɨskimoʼoyi. Majnam taputtaʼmiñ jeʼm an̈matkuy sɨɨ iga toomianeum jeʼm Jɨɨskimoʼoyi.