1-2. Pabia ku no ta mati Memorial kada anu?

 KUAS 2.000 anu atras, Jesus da si vida pa nos, pa no pudi tene vida ku ka ta kaba. Na noti antis di muri, Jesus manda si sigiduris pa e lembra di si sakrifisiu ki fasi ku amor, atraves di un simplis sirmonia ku nvolvi pon ku biñu. — 1 Kor 11:​23-26.

² No ta obdisi mandamentu di Jesus pabia no amal dimas. (Jon 14:15) Kada anu, semanas antis i dipus di Memorial, no ta mostra no apresu pa ke ku Jesus fasi ora ku no toma tempu pa pensa i ora aserka di signifikadu di si mortu pa pekaduris. Tambi no ta sta kontenti di fasi mas na pregason, kumbida manga di jintis ku no pudi pa e junta ku nos nes mumentu spesial. Ku sertesa, no sta disididu pa ka disa nada tujinu mati Memorial.

3. Ke ku no na bin fala del nes studu?

³ Nes studu, no na fala di tris kusas ku povu di Jeova fasi ku ta mostra se sforsu garandi di fasi lembransa di mortu di Jesus: (1) Fasi Memorial di un manera ku Jesus nsina, (2) kumbida utrus pa mati Memorial, i (3) fasi Memorial mesmu na situasons difisil.

4. Kal bardadis ku ta faladu del kada anu na Memorial, i pabia ku sibi es i spesial pa nos? (Lukas 22:​19, 20)

⁴ Kada anu na Memorial, no ta obi un diskursu basiadu na Biblia ku ta danu respostas klaru pa manga di purguntas. No ta aprindi pabia ku pekaduris pirsisa di un resgati i kuma ku mortu di un omi pudi paga pekadus di manga di jintis. No ta lembrantadu kal ki signifikadu di pon ku biñu i ba kin ku dibi di kumel i bibil. (Lei Lukas 22:​19, 20.) No ta pensa fundu na futuru bonitu ku kilis ku tene speransa di vivi pa sempri na Tera na tene. (Isa 35:​5, 6; 65:​17, 21-​23) No dibi di oja es bardadis suma un kusa spesial. Manga di jintis ka kunsi es bardadis, pa kila, e ka ta da balur pa sakrifisiu di Jesus. Tambi e ka ta fasi Memorial di si mortu suma ki nsina si sigiduris pa e fasi. Pabia di ke?

5. Dipus ku maioria di apostolus muri, kuma ku jintis kumsa ku fasi lembransa di mortu di Jesus?

⁵ Puku tempu dipus ku maioria di apostolus di Jesus muri, kristons falsu kumsa ku fasi parti di kongregason. (Mat 13:​24-​27, 37-​39) E ta “tursi bardadi pa pui utru krentis bai se tras.” (At 20:​29, 30) Kristons falsu “tursi bardadi”. Un di kusas ke kumsa nsina i di kuma, Jesus ka da si kurpu “un bias pa tira pekadu di manga di jinti”, suma ku Biblia fala, ma si sakrifisiu dibi di ripitidu kada bias. (Eb 9:​27, 28) Aos, manga di jintis sinseru ta fia nes nsinu falsu. E ta bai pa igreẑa kada semana, utrora kada dia, pa lembra di sakrifisiu di Jesus, kusa ke ta coma di “Eukaristia.” b Utrus riliẑions ku ta fala kuma e sedu kriston, ka ta fasi sempri lembransa di mortu di Jesus, ma e ka ta ntindi diritu signifikadu di sakrifisiu di Jesus. Alguns pudi punta: ‘Sera ki mortu di Jesus signifika di kuma ña pekadus pudi purdadu?’ Ke ku manda e ta fasi es purgunta? Pabia jintis konvensi elis di kuma pekadus ka pudi purdadu atraves di mortu di Jesus. Kuma ku sigiduris di bardadi di Jesus lida ku es situason?

6. Ke ku un grupu di studantis di Biblia ntindi na 1872?

⁶ Na 1970, un grupu di studantis di Biblia orientadu pa Charles Taze Russell, kumsa na studa Biblia fundu. E mistiba sibi kal ki signifikadu di sakrifisiu di Jesus i kuma ku si mortu dibi di lembradu. Na 1872, di akordu ku Biblia, e kaba pa ntindi di kuma na bardadi Jesus da un resgati pa tudu pekaduris. E ka fika ku ke ke aprindi so pa se kabesa. En ves di kila, e konta utrus ke ke aprindi atraves di livrus, jornalis ku rivistas. I ka tarda, e kumsa ku runi pa fasi Memorial un bias kada anu, suma kristons di purmeru sekulu.

7. Kuma ku no benefisia di piskisa di purmeru studantis di Biblia?

⁷ Aos no ta benefisia di piskisa ku kil kristons sinseru fasi manga di anus atras. Di kal manera? Jeova judanu ntindi ke ku sakrifisiu di Jesus signifika, i ke ki na bin fasi pa nos i pa tudu  jintis. (1 Jon 2:​1, 2) No aprindi tambi di kuma, Biblia fala di dus speransas pa jintis ku ta kontenta Deus: Vida na seu sin muri pa alguns, i vida ku ka ta kaba na Tera pa milyons di jintis. No ta pertusi mas di Jeova ora ku no pensa na kuma ki amanu i kuma ku kada un di nos ta benefisia di sakrifisiu di Jesus. (1 Ped 3:18; 1 Jon 4:​9) Pa kila, suma no ermons fiel di pasadu, no na kumbida utrus pa e junta ku nos na fasi Memorial, suma ku Jesus nsina si sigiduris pa e fasi.

8. Ke ku povu di Jeova fasi pa kumbida utrus pa Memorial? (Jubi foto.)

⁸ Pa manga di anus povu di Jeova kumbida jintis pa Memorial. Na kumsada di 1881, ermons ku irmas di Stadus Unidu kumbidadu pa runi na kasa di un ermon na Allegheny, Pennsylvania, pa es mumentu spesial. Mas tardi, kada kongregason fasi se propi Memorial. Na Marsu di 1940, publikaduris faladu di kuma e pudi kumbida kualker algin ku mostra interesi na se tiritoriu. Na 1960, pa purmeru bias, Betel manda konvitis mprimidu pa kongregasons. Disna di ki tempu, bilyons di konvitis di Memorial dadu pa jintis. Pabia ku no dibi di fasi manga di sforsu pa kumbida utrus pa Memorial?

9-10. Kin ku ta benefisia di no sforsu di kumbida utrus pa Memorial? (Jon 3:​16)

⁹ Un di motivu ku pui no ta kumbida utrus pa mati Memorial juntu ku nos, i  pabia no misti pa kilis ku mati pa purmeru bias, pa e aprindi bardadi aserka di ke ku Jeova ku Jesus fasi pa nos tudu. (Lei Jon 3:​16.) No spera di kuma ke ke oja i obi na Memorial, na motiva elis aprindi mas i torna servus di Jeova. Ma, utrus jintis ta benefisia tambi.

¹⁰ No ta kumbida tambi kilis ku sedu inativus. No ta fasil pa lembranta elis di kuma Deus kontinua inda ama elis. Manga di jintis ta reaẑi ben pa no konviti, i no ta kontenti di oja elis. Mati Memorial ta lembranta elis di kontentamentu ke teneba di sirbi Jeova na pasadu. Jubi isemplu di Monica. c Duranti duensa di COVID-19 i kumsa prega mas. Dipus ki mati Memorial na 2021, i fala sin: “Es Memorial sedu spesial dimas pa mi. Pa purmeru bias na 20 anu, N konsigi prega jintis i kumbida elis pa Memorial. N fasi tudu ku N pudi pa kumbida utrus pabia N misti gardisi Jeova ku Jesus pa ke ke fasi pa mi.” (Sal 103:​1-4) Nin si jintis seta o ka seta no konviti, no ta fasi no minjor pa kumbida elis pa e mati Memorial, pabia no sibi kuma Jeova ta kontenti ciu ku sforsu ku no ta fasi.   

11. Kuma ku Jeova bensua no sforsu di kumbida jintis pa mati Memorial? (Aẑeu 2:​7)

¹¹ Jeova bensua ciu no sforsu di kumbida jintis pa Memorial. Na 2021, mesmu ku regras ku pudu pabia di duensa di COVID-19, manga di jintis matiba. E seduba 21.367.603. Es i kuas dus bias i meiu numeru di Tustumuñas di Jeova na mundu! I bardadi kuma, Jeova ka ta sta so nteresadu na numeru. I sta nteresadu na kada kin ku mati. (Luk 15:7; 1 Tim 2:​3, 4) No pudi tene sertesa di kuma ora ku no kumbida utrus, Jeova ta sta na judanu oja kilis ku tene bon korson. — Lei Aẑeu 2:​7.

12. Ke ku pudi pui pa i sedu difisil fasi Memorial? (Jubi foto.)

¹² Jesus fala kuma na fin de tempu, no na tene manga di situasons difisil suma pirsigison, familia na sta kontra nos, i na ten geras, duensas ku manga di utrus kusas. (Mat 10:36; Mar 13:9; Luk 21:​10, 11) Utrora, es situasons ta pui pa i difisil pa no fasi lembransa di mortu di Jesus. Ke ku no ermons ku irmas fasi pa vensi es situasons difisil, i kuma ku Jeova juda elis?

13. Kuma ku Jeova bensua koraẑen ku disison di Artem di fasi Memorial ocal na prison?

¹³ Prison. No ermons ku sta na prison pabia di se fe, ta fasi ke ke pudi pa fasi lembransa di mortu di Jesus. Jubi isemplu di Artem. Na 2020, na semanas antis i dipus di Memorial, i ficadu na un sela di 17 metru kuadradu ku kustuma tene 4 o 5 prisonerus. Mesmu pa manera ki prindidu, i usa ke ki teneba pa fasi pon ku biñu, tambi i fasi planu pa fasi diskursu di Memorial pa rel. Ma si kolega di sela ta fuma i koba mal dimas. Ke ki fasi? I pidil pa i para fuma i para koba mal pa pelu menus un ora. Pa  surpresa di Artem, si kolega konkorda pa ka fuma nin koba mal na ora di Memorial. Artem fala sin: “N disidi papia ku elis aserka di Memorial.” Mesmu pa manera ke falal di kuma e ka misti obi aserka di Memorial, dipus ke oja i obi Artem na fasil, e fasil manga di purguntas aserka di Memorial.

14. Kal sforsu ku fasidu pa fasi Memorial mesmu ku duensa di COVID-19?

¹⁴ Duensa di COVID-19. Pabia des duensa, povu di Jeova ka pudi mati Memorial juntu, na mesmu kau. Ma kila ka tuji elis fasi Memorial. d Kongregasons ku tene internet fasi se Memorial atraves di videokonferensia. Ma ke gora di milyons ku ka tene internet? Na alguns teras, i fasidu aran­ẑus pa jintis jubi diskursu na televison o obil na radio. Tambi filialis grava diskursu na mas di 500 lingua, asin te mesmu kilis ku mora na tabankas lunju konsigi fasi Memorial. Ermons fiel  fasi aranẑu pa gravasons mandadu pa kilis ku pirsisa.

15. Ke ku no aprindi di un studanti di Biblia comadu Sue?

¹⁵ Ora ku familia sta kontra nos. Pa alguns, purblema mas garandi di fasi Memorial i ora ki se familia sta kontra elis. Jubi isemplu di un studanti di Biblia comadu Sue. Na 2021, dia antis di Memorial, Sue fala pa kin ku ta studa Biblia ku el di kuma, suma alguns di si familia sta kontra el, pa kila, i ka na konsigi mati Memorial. Kin ku ta studa Biblia ku el lei pa rel Lukas 22:44. Dipus i splikal di kuma, ora ku no sta na pasa pa purblemas, no dibi di sigi isemplu di Jesus, ora Jeova i pui tudu no konfiansa nel. Dia dipus, Sue konsigi tene pon ku biñu, i jubi programa spiritual di parmaña na jw.org. Ki di noti, i bai pa si kuartu el so, i sukuta Memorial na si telefoni. Dipus, Sue skirbi pa kin ku ta studa Biblia ku el. I fala sin: “Aonti bu nkoraẑan ciu. N fasi tudu ku N pudi pa mati Memorial, i Jeova judan. N ka tene palabras pa gardisi i fala di ña kontentamentu!” Sera ki bu pensa kuma Jeova pudi judau si bu sta na pasa mesmu situason?

16. Pabia ku no pudi tene konfiansa di kuma Jeova na bensua no sforsu pa mati Memorial? (Romanus 8:​31, 32)

¹⁶ Jeova ta da manga di balur pa no sforsu di fasi lembransa di Jesus. No pudi tene sertesa di kuma i na bensuanu ora ku no mostra di kuma no gardisi ke ki fasi pa nos. (Lei Romanus 8:​31, 32.) Pa kila, no sta disididu pa mati Memorial des anu. Na semanas antis i dipus di Memorial, no misti fasi mas pa Jeova.