1, 2. ¿Imanirtaj watan watan Conmemoraciunpaj shuntacanchi?

 JESUSGA noganchiraycur wanurgan imaycamapis cawayta tarinapaj, y pay wanushganpitaga 2.000 watacunanonami canga. Wanunanpaj junaj chacaychomi tantawan vinuta Santa Cenata camacächergan. Discipuluncunata mandargan paycunata cuyar wanushganta yarpapäcunanpaj (1 Cor. 11:23-26).

² Jesusta alapa cuyashpanchimi cristianucunaga pay mandashganta cäsucunchi (Juan 14:15). Chaymi Conmemoración wichan quillacho imaycacunata ruranchi pay rurashganta agradecicunapaj. Chay wichan tiempunchita raquinchi mastaraj mañacunapaj y Jesuspa wanuynin imano yanapämashganchiman yarpachacunapaj. Jina camacächinchi predicaciunchopis cushi cushila yanapacunapaj pï may runacunata invitaycunapaj chay shumaj reuniunman shacäramunanpaj. Chay junaj Conmemoraciunman aywanapaj imapis michamänanchipaj manami munanchichu.

3. ¿Imacunapitataj canan yachacushun?

³ Jehovapa sirvejnincunaga alapami calpachacushcanchi Jesuspa wanuyninta yarpänanchipaj. Chayno cashganta cay yachacuycho quimsalata ricärishun: 1) Jesús mandashganno Conmemoraciunta ruranchi, 2) waquincunata invitanchi shuntacänanpaj y 3) ima chapa captinpis jinala ruranchi.

4. 1) ¿Ima yachachicuycunatataj Conmemoraciuncho shumaj tantiachicamun? (Lucas 22:19, 20). 2) ¿Imanirtaj caycunata ali tantiarga alapa shumajmi caycan?

⁴ Wata watami Conmemoraciunpaj shuntacaptinchi, juc shumaj discursuta wiyanchi. Chaycho Bibliawan tantiachimanchi  imanir Jesús wanunanraj cargan y imano juc runalapa wanuynin achca runacunapa juchancuna perdunashga cananpaj yanapan. Jina yarpächimanchi tantawan vino ima ninantaj y pïcunalataj chaycunata micupäcunman y upupäcunmanpis (leiriy Lucas 22:19, 20). Discursuta wiyar yarpachacunchi Pachacho cawananpaj cajcuna ima bendiciuncunata chasquinanpaj (Is. 35:5, 6; 65:17, 21-23). Cay yachachicuycunata shumaj tantiarcurga cawayninchicho alapami yanapämanchi. Aypala runacuna chaycunata shumaj mana tantiashpan Jesús noganchiraycur wanushganta shumaj mana valuranchu. Jina Jesuspa wanuyninta yarparpis pay mandashganno manami ruranchu. ¿Imanirtaj chayno rurapäcun?

5. ¿Imanotaj runacuna Jesuspa wanuyninta yarpar galaycurgan casi lapan apostulnincuna wanushgana captin?

⁵ Jesuspa casi lapan apostulnincuna wanushganpitana, congregaciuncho lutan cristianucuna lutancunata yachachicur galaycärergan (Mat. 13:24-27, 37-39). Paycunaga hermanucunata lutancunata yachachirmi “waquin ermänucunaga paycunatami” gatirpar galaycärergan (Hech. 20:29, 30). Lutan yachachicojcunaga manami acuerduchochu caycargan Jesús “juk kutilami atska runakunapa jutsankunapita” wanushganta. Paycunapäga Jesusga cutin cutinräshi wanunman cargan, ichanga Bibliachoga chay yachachicuyga manami carganchu (Heb. 9:27, 28). Canan wichanpis achca ali shonguyoj runacuna chay luta yachachicuyman creir, iglesiaman semana semana o waquincunaga waran waranmi aywapäcun santa comuniunman b participananpaj. Waquin religiuncunaga ayvëcisla yarpapäcun Jesús wanushganta, pero chaycho caycajcunaga manami musyapäcunchu ima ruraycashgantapis. Öraga pilapis caynochi tapucun: “¿Rasunpachuraj Jesús wanushganraycur juchäcunapita perdonashga cäman?” nir. Chayno tapucojcunataga creichipäcurgan Jesús wanushga captinpis juchanchicunapitaga perdunashga mana cashganchita. Y Jesuspa rasunpa gatirajnincuna, ¿imataj rurapäcurgan?

6. ¿Imataj tantiapäcurgan Bibliata estudiajcuna 1872 watacho?

⁶ 1870 wata wichan Charles Russell y waquin Bibliata estudiajcuna Diospa Palabranta shumaj tantiananpaj calpachacärergan. Paycuna tantiayta munapäcurgan Jesuspa wanuynin imano yanapämashganchita y Jesús mandashganno wanuynin imano yarpapäcunanpäpis. 1872 watacho Bibliata shumaj estudiar tantiargan Jesús noganchiraycur wanushganpita. Y tantiacärishgancunataga manami pacarächirganchu. Chaypa trucan librucunacho, periodicucunacho y revistacunachopis musyachicurgan. Nircur ichic tiempulacho, watacho juc cutilami Conmemoraciunta rurapäcurgan, unay cristianucuna rurashganno.

7. Bibliata estudiajcuna tantiacärishganga, ¿imanotaj canan wichan yanapämanchi?

⁷ Chay cristianucuna lapan calpachacärishgancuna tantiacärinanpaj, ¿imanotaj canan wichan yanapämanchi? Paycunataga Jehová bendiciunninta gorgan y canan tantianchi Jesuspa wanuynin imano yanapämashganchita y chayraycur imata logracänanpapis (1 Juan 2:1, 2). Jina Bibliacho yachacushcanchimi Jehovata cäsucoj runacuna ima bendiciuncunata chasquinanpaj: waquincunaga cielucho imaycamapis cawacärenga y aypala runacunanami Pachacho imaycamapis  cawapäcunga. Y Jesuspa wanuynin alapa yanapämashganchita yarparar cuenta gocunchi Jehová amatar cuyamashganchita y Payman guelicunapaj munashgantapis (1 Ped. 3:18; 1 Juan 4:9). Chaymi unay Jehovata cuyaj cristianucuna rurashganno, cananpis runacunata invitanchi Conmemoraciunman aywananpaj Jesús mandashganno ruranapaj.

8. ¿Imatataj rurapäcurgan Jehovapa sirvejnincuna waquincuna Conmemoraciunman shacäramunanpaj? (Fotucunata ricay).

⁸ Achca watacunanami Jehovapa sirvejnincunaga runacunata invitanchi Conmemoraciunpaj. 1881 watacho cay revistacho juc invitación yurimurgan Allegheny (Pensilvania) marcacho Estados Uniduspita hermanucuna shuntacänanpaj. Nircur cada congregaciuncunana Conmemoraciunta rurapäcoj. Pero 1940 wata, marzo quillapäga publicadorcunata nergan marcancho wiyayta munajcunapita pï maytapis invitarcunanpaj. Y 1960 watachona Betelpita congregaciuncuna invitaciuncunata chasquergan Conmemoraciunpaj. Chaypita pacha Jehovapa testiguncunaga Conmemoraciunpaj aypala invitaciuncunata runacunata goycushcanchi. ¿Imanirtaj calpachacunchi chay lapanta ruraycunapaj?

9, 10. Conmemoraciunpaj waquincunata invitaptinchega, ¿pïcunatataj yanapan? (Juan 3:16).

⁹ Runacunataga Conmemoraciunpaj invitanchi Jehovawan Jesús lapan runacunaraycur ima rurashganta musyapäcunanpaj (leiriy Juan 3:16). Munayculanchimi chay reuniuncho wiyashganpis ricashganpis yanapänanpaj Jehovapita masraj yachacunanpaj y sirvejnincunamanpis ticrananpaj. Ichanga  waquincunata invitashganchega manami paycunalatachu yanapan.

¹⁰ Invitaciunninchicunaga yanapacun gasacashga hermanucuna y Jehovapita carupacushga hermanucunapis yapay shuntacänanpaj. Invitayculanchi yarpächinapaj Jehová jinala cuyaycashganta. Y alapami cushicunchi achcaj shapäcamuptin. Chay chacaycho yarpapäcun unaycho Jehovata cushishga sirvipäcushganta. Monicapita parlarcushun. c COVID-19 gueshya wichan payga yapay predicar galaycurgan. Y 2021 watapaj, Conmemoraciunpaj conectacur cayno nergan: “Cay wata Conmemoraciunga nogapäga alapa alimi cargan. Chayrämi ishcay chunca watapita pacha runacunata predicar Conmemoraciunpaj invitacurgä. Jehovatawan Jesusta alapa agradecicushpämi lapan shongüwanmi chayta rurashcä” (Sal. 103:1-4). Runacuna invitaciunninchicunata chasquimaptinchi o manapis, calpachacunchimi pï maytapis invitaycunapaj, Jehovaga alapami valuran lapan calpachacushganchita.

11. ¿Imanotaj Jehová bendiciycalämashcanchi Conmemoraciunpaj runacunata invitanapaj calpachacushganchita? (Ageo 2:7).

¹¹ Runacunata Conmemoraciunpaj invitaycunapaj calpachacushganchitaga Jehová bendiciycalämashcanchi. 2021 watacho COVID-19 gueshya wichan 21.367.603 runacunami Conmemoraciunpaj shuntacushcanchi; chaynoga manami imaypis shuntacashcanchichu cargan. Chayno shuntacashganchega cashga entero munducho Jehovapa testiguncuna cashganpita ishcay cutipitapis masraj. Jehovaga alapachi cushicurgan chaychica runacuna shuntacashganta ricar (Luc. 15:7; 1 Tim. 2:3, 4). Caywan cuentata gocunchi Conmemoraciunpaj campañata rurar Jehová yanapämanchi ali shonguyoj runacunata tarinapaj (leiriy Ageo 2:7).

12. ¿Imacunaraj öraga michamashwan Jesuspa wanuyninta mana yarpänanchipaj? (Fotuta ricay).

¹² Jesusmi nergan ushanan junajcho familianchi contranchicho sharcunanpaj, chiquishga canapaj, guerracuna, gueshyacuna y maspis cananpaj (Mat. 10:36; Mar. 13:9; Luc. 21:10, 11). Chaycunapa pasaptinchi öraga sasami canman Jesús wanushganta yarpänanchipaj. ¿Imatataj hermanunchicuna rurapäcurgan chaycunapa pasar y imanotaj Jehová yanapaycushga?

13. Artiom carcelcho caycarpis valurcharcur Conmemoraciunta rurananpaj calpachacushganga, ¿imanotaj Jehová bendicergan?

¹³ Carcelcho caycaj yäracuyninraycur hermanunchicunaga calpachacärinmi Conmemoraciunta rurananpaj. Artiom hermanunchi imata rurashganta ricärishun. Jesuspa wanuyninta yarpänapaj wichan 2020 watacho, juc tacsha celdalacho wichgarashga caycargan, y chaychoshi hasta pichga runacunatapis wichgachipäcoj. Chayno captinpis amänunlacho caycajcunatashi utilizargan Conmemoraciunta rurananpaj y discursutapis quiquinla rurananpaj camacächergan. Ichanga paywan wichgarashga masincunaga goyatish cigarruta mucar y lisuracunalata parlacachar carcaycargan. ¿Imataj Artiom rurargan? Payshi mañacurgan juc horalacho chayta mana rurapäcunanpaj. Paycunanash ‘au alimi’ nipäcurgan. Artiom wilacun: “Paycunata nergä tantiachinäpaj imano Conmemoraciunta rurashganchita”. Paycuna ichanga wiyayta mana munaptinpis, Conmemoraciunta ruraycashgantana ricar, nircurshi maslata tapupäcurgan.

14. ¿Imataj Jehovapa sirvejnincunaga rurapäcurgan Conmemoraciunta rurananpaj COVID-19 gueshya captinpis?

 ¹⁴ COVID-19 gueshyaraycur Jehovapa sirvejnincunaga Diospa aduranapaj wasicho Conmemoración rurayta mana puedishganchichu. Pero cayga manami michämashcanchichu ruranapaj. d Waquin congregaciuncunacho internet captin videulapa chayta rurapäcurgan. Ichanga aypala hermanucunapa internetnin mana captin, ¿imanotaj rurargan? Waquin naciuncunachoga Conmemoraciunpaj discursutaga televisiunpa o radiupapis pasachergan. Jina 500 rimaycunapitapis maschoraj chay discursuta grabacargan, chaynopa caru sitiucunacho caycajcunapis Conmemoraciunta rurananpaj. Waquin hermanucunanami chay grabaciuncunata hermanunchicunata chayachergan.

15. ¿Imataj yachacunchi Bibliapita yachacoj Sue jipashpita?

¹⁵ Familiancuna chiquishganraycur öraga waquincunapa sasami canman Conmemoraciunta ruraycunanpaj. Chaypami pasargan  Bibliapita estudiaj Sue jutiyoj jipash. 2021 watacho Conmemoraciunpaj juc junaj pishiycaptin Bibliapita yachachejninta Sue nergan, familiancuna contrancho captinraycur Conmemoraciunman conectacuyta mana puedinanpaj. Chaura yachachejninga Lucas 22:44 textuta leipar tantiachergan ima problemapis captenga, más aliga caycan Jesuspita yachacunanpaj y Jehovata mañacur yäracunanpaj pay yanapänanpaj cajta. Warayninna Sue tantata rurargan, vinutapis alistargan nircur tutacho yachacunapaj caj programatapis jw.org paginacho ricargan. Tardipanash cuartuncho wichgacurgan y telefunulapa Conmemoraciunpa discursunta wiyargan. Nircur yachachejninta cayno escribergan: “Ganyan alapa shacyächimashcanqui y Conmemoraciunman conectacunäpaj lapan calpachacushgäta Jehová bendicimargan. Cushishgami caycä y Jehovata gracias nëmi”. Gampis chaypa pasaycaptiquega ama gongaychu Jehová yanapäshunayquipaj cashganta.

16. ¿Imanirtaj ninchi Jehová bendicimänanchipaj cajta Conmemoraciunman aywanapaj calpachacuptinchi? (Romanos 8:31, 32).

¹⁶ Wamran noganchiraycur wanushganta yarpänapaj calpachacuptinchega Jehová alapami cushicun. Ama gongashunchu Jehová bendicimänanchipaj cajta pay noganchiraycur rurashganpita agradecido caycaptinchi (leiriy Romanos 8:31, 32). Ima chapacuna captinpis calpachacushunmi cay wata Conmemoraciunman mana faltanapaj. Jina chay wichan Jehovapaj mastaraj ruranapaj camacächishun.