1, 2. ¿Jasche ronojel taq junabʼ kojkʼojiʼ pa ri Unaʼtabʼalil ri ukamikal ri Jesús?

 QʼAXINAQ chi weneʼ 2,000 junabʼ, ri Jesús xuya ri ukʼaslemal pa kamikal rech kqariq na ri kʼaslemal kʼo ta ukʼisik. Pa ri kʼisbʼal chaqʼabʼ re ri ukʼaslemal pa ri uwach Ulew xukoj kaxlanwa y vino pa jun riqbʼal ibʼ kukʼ ri utijoxelabʼ rech xukʼut kan chkiwach che rajawaxik kkinaʼtasaj ri ukamikal (1 Cor. 11:23-26).

² Ri cristianos kojniman che ri xojutaq wi kan ri Jesús rumal che kqaloqʼoqʼej (Juan 14:15). Are chiʼ xa jubʼiqʼ chi kraj kuriq ri qʼij re ri Unaʼtabʼalil ri ukamikal ri Jesús, kqakʼutu che nim kqil wi are chiʼ kqatas qatiempo che ubʼanik qachʼawem, kojchoman chrij ri tobʼanik xuya ri ukamikal chqe. Xuqujeʼ kqakoj qatiempo che kisikʼixik más winaq rech kekʼojiʼ qukʼ che unaʼtajisaxik ri ukamikal. Y kqaj taj che kʼo jun jastaq kojqʼatenik rech kojkʼojiʼ pa wajun riqbʼal ibʼ.

3. ¿Jas kqil na pa wajun kʼutunem?

³ Ri testigos rech Jehová sibʼalaj qakojom qachuqʼabʼ rech kqanaʼtasaj ri ukamikal ri Cristo. Pa wajun kʼutunem kqil na oxibʼ jastaq che qabʼanom: 1) kqanaʼtajisaj ri ukamikal ri Jesús junam rukʼ ri xukʼut kanoq, 2) keqasikʼij nikʼaj chi winaq rech keʼopan qukʼ y 3) kqanaʼtajisaj ri ukamikal paneʼ kqariq kʼax.

4. a) ¿Jas kqʼalajisax ronojel junabʼ pa ri Unaʼtabʼalil ri ukamikal ri Jesús? (Lucas 22:19, 20). b) ¿Jasche nim ubʼanik ketaʼmax wariʼ?

⁴ Ronojel junabʼ, are chiʼ kqanaʼtajisaj ri ukamikal ri Jesús, kyaʼ jun chʼabʼal y ktzalix uwach jujun taq preguntas. Ri preguntas are wariʼ: ¿jasche nim kojutoʼ wi ri ukamikal ri Jesús? ¿jasche kkuyutaj kimak e kʼi winaq rumal ri ukamikal jun winaq? Y knaʼtajisax chqe jachin taq ketijow ri kaxlanwa y ri vino, xuqujeʼ jas kkikʼutunisaj chkijujunal wariʼ (chasikʼij uwach Lucas 22:19, 20). Are chiʼ tajin kyaʼ ri chʼabʼal, kojchoman chrij ri tewchibʼal che kkiriq na ri winaq che kekʼojiʼ kan cho ri uwach Ulew (Is. 35:5, 6; 65:17, 21-23). Sibʼalaj nim ubʼanik ri kyaʼ ubʼixik chrij waʼ taq jastaq riʼ, rumal laʼ nim ubʼanik kojopan pa ri riqbʼal ibʼ. E kʼi winaq kkichʼobʼ ta wariʼ y ketaʼm taj jas kkibʼano rech kkikʼutu che nim kkil wi ri ukamikal ri Jesús. Y we kkinaʼtasaj je ta kkibʼan che ubʼanik junam che xukʼut kan ri Cristo. Y, ¿jas kʼu che laʼ?

5. Are chiʼ xaq e jujun chi ri apóstoles e kʼasal kanoq, ¿jas xkibʼan chi ri winaq che unaʼtajisaxik ri ukamikal ri Jesús?

⁵ Are chiʼ xaq e jujun chi ri apóstoles e kʼolik, xkimaj okem e qastzij taj cristianos pa ri congregación (Mat. 13:24-27, 37-39). Xkimaj ubʼixik «jechʼalaj taq jastaq, rech ri e kojonelabʼ, keteriʼ kʼu bʼik chkij» (Hech. 20:29, 30). Jun chke ri «jechʼalaj taq jastaq» che xkikʼutu, are che ri Jesús xa ta «jumul xyaʼ che tabʼal toqʼobʼ che resaxik ri kimak ri e kʼi». Ri kkibʼij junam ta rukʼ ri kukʼut ri Biblia, rumal che kkikʼutu che ri Cristo rajawaxik kyaʼ kʼi mul che tabʼal toqʼobʼ o kʼi mul kkamik (Heb. 9:27, 28). Kimik e kʼi kojonelabʼ kkichomaj che are chiʼ kkibʼan ri kiriqbʼal ibʼ, ri kaxlanwa are ri ucuerpo ri Cristo y ri vino are ri ukikʼel. Are taq kkitijo, kkichomaj che tajin kkam chi jumul ri Jesús che utojik ri kimak. Y e kʼo chi nikʼaj che xaq jujun mul kkibʼano, are kʼu qas ta kkichʼobʼo che nim ubʼanik wariʼ. Weneʼ e kʼo jujun kkichomaj: «¿La qastzij wi che kkuyutaj ri numak rumal ri ukamikal ri Jesús?». Kkibʼij wariʼ rumal che kʼutum chkiwach che ri ukamikal ri Jesús ktobʼan taj rech kkuyutaj ri qamak. ¿Jas kʼu kkibʼan ri qastzij cristianos?

6. ¿Jas xkichʼobʼ jun jupuq tijoxelabʼ re ri Biblia pa ri 1872?

⁶ Pa taq ri junabʼ setenta re ri siglo diecinueve, jun jupuq tijoxelabʼ re ri Biblia y ri kʼamal kibʼe Charles Russell, xkimaj unikʼoxik ri uTzij ri Dios rech qas kkichʼobʼ ri kukʼutu. Xkaj xketaʼmaj jasche xkam ri Jesús y jas kkibʼan che unaʼtajisaxik ri ukamikal. Y pa ri 1872 xkichʼobʼo che ri Jesús xkam pa kiwiʼ konojel ri winaq. Ri xketaʼmaj xkesaj ubʼixik pa libros, periódicos y revistas. Tekʼuriʼ, xkimajij unaʼtajisaxik ri ukamikal ri Jesús jun mul pa jun junabʼ, junam rukʼ ri xkibʼan ri nabʼe taq cristianos.

7. ¿Jas utzilal kuya chqe kimik ri xketaʼmaj ri nabʼe taq tijoxelabʼ re ri Biblia?

⁷ ¿Jas utzilal kuya chqe ri xkibʼan ri tijoxelabʼ re ri Biblia ojer kanoq? Ri Jehová sibʼalaj utewchim ri xkibʼano, rumal che kimik kqachʼobʼo jasche xkam ri Jesús y jas utzilal kuya ri ukamikal chqe (1 Juan 2:1, 2). Xqetaʼmaj che ri Dios keʼutewchij ri winaq che kenimanik: e jujun kebʼe pa ri kaj y kekam ta  chi wi y e nikʼaj chik kyaʼ jun kikʼaslemal kʼo ta ukʼisik chke cho ri uwach Ulew. Y kojqebʼ rukʼ ri Jehová are chiʼ kqachomaj che sibʼalaj kojraj y che ri ukamikal ri Jesús kojutoʼ chqajujunal (1 Ped. 3:18; 1 Juan 4:9). Rumal laʼ, junam kukʼ ri nabʼe taq cristianos, kqanaʼtajisaj ri ukamikal ri Jesús junam rukʼ ri xukʼut kanoq y keqasikʼij nikʼaj chi winaq rech kekʼojiʼ qukʼ.

8. ¿Jas kibʼanom ri testigos rech Jehová rech kekisikʼij ri winaq che unaʼtajisaxik ri ukamikal ri Jesús? (Chawilaʼ ri e kʼutbʼal).

⁸ Ri upataninelabʼ ri Jehová kʼi chi junabʼ tajin kekisikʼij ri winaq rech kekʼojiʼ kukʼ che unaʼtasaxik ri ukamikal ri Jesús. Pa ri 1881, ri wuj La Atalaya xubʼij che kkimulij kibʼ ri Testigos pa Allegheny (Pensilvania) che unaʼtajisaxik ri ukamikal ri Jesús. Tekʼuriʼ, are chiʼ xqʼax ri tiempo chkijujunal ri congregaciones xkibʼan chik. Pa ri marzo 1940 xbʼix chke ri qachalal che kekisikʼij ri winaq che kkaj keʼopanik. Y pa ri 1960, Betel xutaq bʼi wuj pa taq ri congregaciones rech kekisikʼij ri winaq. Pa riʼ ri tiempo qamajim lo ujachik sibʼalaj kʼi wuj che kisikʼixik ri winaq. ¿Jasche sibʼalaj kqakoj qatiempo y qachuqʼabʼ che ubʼanik wariʼ?

9, 10. ¿E jachin chi nikʼaj keqasikʼij pa ri Unaʼtabʼalil ri ukamikal ri Jesús? (Juan 3:16).

⁹ ¿Jasche keqasikʼij ri winaq qukʼ? Rumal che kqaj che kketaʼmaj jas kibʼanom ri Jehová y ri Jesús pa qawiʼ (chasikʼij uwach Juan 3:16). Kqaj che ri kkita ri e winaq pa ri Unaʼtabʼalil ri ukamikal ri Jesús keʼutoʼo rech kketaʼmaj más uwach ri  Jehová y kkipatanij. Are kʼu, e kʼo chi nikʼaj kkiriq utzilal are chiʼ kqaya ri sikʼinik re ri Unaʼtabʼalil ri ukamikal ri Jesús. ¿E jachin riʼ?

¹⁰ Xuqujeʼ keqasikʼij ri winaq che kiyaʼom kan upatanexik ri Jehová rech kketaʼmaj che keloqʼoqʼex na rumal. Sibʼalaj kojkikotik are chiʼ kqilo che kekʼojiʼ qukʼ. Wajun riqbʼal ibʼ riʼ kunaʼtajisaj chke che ojer kanoq xekikot che upatanexik ri Jehová. Chqilampeʼ ri xukʼulmaj jun qachalal, Mónica ubʼiʼ. b Pa ri pandemia re ri COVID-19 xumaj chi utzijoxik ri utzij ri Dios. Are chiʼ xkʼojiʼ pa ri Unaʼtabʼalil ri ukamikal ri Jesús pa ri 2021, xubʼij: «Ri Unaʼtabʼalil ri ukamikal ri Jesús che xbʼan pa wajun junabʼ riʼ sibʼalaj nim ubʼanik chnuwach. Rumal che pa 20 junabʼ kʼateʼ chi waʼ keʼinsikʼij ri winaq rech kkinaʼtajisaj ri ukamikal ri Jesús. Rukʼ ronojel wanimaʼ xinbʼano rech kinkʼutu che kinmaltyoxij ri xkibʼan ri Jehová y ri Jesús pa nuwiʼ» (Sal. 103:1-4). Paneʼ ri winaq kkaj taj kekʼojik, are kʼu ri Jehová nim kril wi ri chuqʼabʼ che kqakojo.

11. Junam rukʼ ri kubʼij Ageo 2:7, ¿jas ubʼanom ri Jehová che utewchixik ri chuqʼabʼ qakojom che kisikʼixik ri winaq pa ri Unaʼtabʼalil ri ukamikal ri Jesús?

¹¹ Ri Jehová sibʼalaj utewchim ri chuqʼabʼ qakojom che kisikʼixik ri winaq che unaʼtajisaxik ri ukamikal ri Jesús. Jun kʼutbʼal, pa ri 2021, paneʼ xumajij ri pandemia re ri COVID-19, xojkʼojiʼ 21,367,603 winaq. Wariʼ más nim na chuwach ri kajilabʼal ri testigos rech Jehová che e kʼo pa ronojel ri uwach Ulew. Qastzij che ri más nim ubʼanik are ta ri ajilabʼal, xaneʼ are ri e winaq (Luc. 15:7; 1 Tim. 2:3, 4). Qetaʼm che ri Jehová kojukojo rech keqasikʼij ri winaq pa ri Unaʼtabʼalil ri ukamikal ri Jesús rech keqariq ri kkaj kketaʼmaj uwach (chasikʼij uwach Ageo 2:7).

12. ¿Jas kʼax weneʼ kojuqʼatej che unaʼtasaxik ri ukamikal ri Jesús? (Chawilaʼ ri wachbʼal).

¹² Ri Jesús xubʼij kanoq che ri utijoxelabʼ kkiriq na kʼax rumal ri kikojonik: itzel keʼil kumal ri e kachalaxik, kumal ri winaq, kkiriq kʼax rumal ri chʼoj y rumal ri nimaʼq taq yabʼil... (Mat. 10:36; Mar. 13:9; Luc. 21:10, 11). Weneʼ ri e kʼax riʼ kojkiqʼatej rech kqanaʼtajisaj ta chi ri ukamikal ri Jesús. Are kʼu ¿jas kibʼanom e jujun qachalal chuwach wariʼ? Y, ¿jas ubʼanom ri Jehová che kitoʼik?

13. ¿Jas xubʼan ri Jehová che utewchixik ri qachalal Artiom rumal che xukoj uchuqʼabʼ che unaʼtajisaxik ri ukamikal ri Jesús pa ri cárcel?

¹³ Ri kʼax pa ri cárcel. Ri e qachalal che e kʼo pa cárcel kkikoj kichuqʼabʼ che unaʼtasaxik ri ukamikal ri Jesús. Chojchoman chrij ri xukʼulmaj ri qachalal Artiom. Are chiʼ xa jubʼiqʼ chi kraj kuriq ri qʼij re ri Unaʼtabʼalil ri ukamikal ri Jesús pa ri 2020, tzʼapim pa jun celda che 17 metros ri uwach y ri urabʼik (183 pies cuadrados), jawiʼ yaʼom wi rukʼ kajibʼ rachiʼl. Paneʼ jeriʼ, xkunik xuriq ri kajwataj che ubʼanik ri Unaʼtabʼalil ri ukamikal ri Jesús y xuchomaj uyaʼik ri chʼabʼal paneʼ xaq utukel. Are kʼu, ri e rachiʼl pa ri cárcel amaqʼel kkibʼij itzel taq tzij y kkitij sikʼ. Rumal laʼ, ri qachalal Artiom xubʼij chke we kekunik paneʼ xa jun hora kkitij ta na sikʼ y kkibʼij ta na itzel taq tzij. «Utz laʼ» xechaʼ. Ri qachalal Artiom kubʼij: «Xinbʼij chke che kinkunik kinqʼalajisaj chkiwach jasche kqabʼan ri Unaʼtabʼalil ri ukamikal  ri Jesús». Paneʼ nabʼe qas ta xkaj xketaʼmaj chrij ri kraj kubʼij ri qachalal chke, are kʼu are chiʼ yaʼtajinaq chi ri chʼabʼal xkibʼan preguntas che.

14. ¿Jas xkibʼan ri upataninelabʼ ri Jehová che unaʼtajisaxik ri ukamikal ri Jesús paneʼ kʼo ri pandemia?

¹⁴ Ri kʼax che xuya ri pandemia re ri COVID-19. Rumal ri pandemia, xojkun taj xqamulij qibʼ pa ri Ja rech Ajawbʼal che unaʼtajisaxik ri ukamikal ri Jesús, are kʼu xojuqʼatej ta che ubʼanik. c Ri qachalal che kʼo kinternet xekunik xkibʼan pa videoconferencia. ¿E kʼu ri e qachalal che kʼo ta kinternet? Pa jujun tinamit xqʼaxex ri chʼabʼal pa radio o televisión. Y ri sucursales xkiqʼaxej ri chʼabʼal pa más che 500 chʼabʼal. Xuqujeʼ e kʼo qachalal xkikʼam bʼi ri grabaciones chke e nikʼaj chik.

15. ¿Jas kqetaʼmaj chrij ri xukʼulmaj ri al Sue?

¹⁵ Ri kʼax kkibʼan ri achalaxik. Ri más kʼax kiriqom jujun qachalal che unaʼtajisaxik ri ukamikal ri Jesús are che kqʼatex kiwach kumal ri kachalaxik. Are riʼ ri xukʼulmaj  jun ali, Sue ubʼiʼ, che tajin kyaʼ etaʼmanik re ri Biblia che. Are chiʼ xa jun qʼij chi kraj kuriq ri Unaʼtabʼalil ri ukamikal ri Jesús pa ri 2021, xubʼij che ri qachalal che tajin kuya ri etaʼmanik che che kkun taj kopan pa ri riqbʼal ibʼ, rumal che kyaʼ ta bʼe che rumal ri ufamilia. Ri qachalal xukʼut Lucas 22:44 chuwach ri al Sue y xubʼij che chi we kʼo kʼax tajin kqaqʼaxej, ri más utz kqabʼano are che kqesaj uwach ri Jesús y kqabʼan qachʼawem che ri Jehová rumal che areʼ qas kojutoʼo. Chukabʼ qʼij, ri al Sue xubʼan ri kaxlanwa y xuloqʼ ri vino, kʼateʼ riʼ xril ri adoración matutina pa jw.org. Y bʼenaqʼij, xutzʼapij ribʼ pa ri ucuarto y xumaj utatabʼexik ri chʼabʼal re ri Unaʼtabʼalil ri ukamikal ri Jesús pa teléfono. Tekʼuriʼ, xutzʼibʼaj bʼi waʼ taq tzij che ri qachalal che tajin kyaʼow etaʼmanik che: «Iwir sibʼalaj xaya nuchuqʼabʼ. Xinkoj nuchuqʼabʼ rech xinkʼojiʼ pa ri Unaʼtabʼalil ri ukamikal ri Jesús, y ri Jehová xinutoʼ pa ronojel. Sibʼalaj kinkikotik, maltyox chawe». We tajin katqʼax at pa jun kʼaxkʼolil, ¿la kakojo che ri Jehová kkunik katutoʼo?

16. ¿Jas kubʼan ri Jehová we kqakoj qachuqʼabʼ che unaʼtasaxik ri ukamikal ri Jesús? (Romanos 8:31, 32).

¹⁶ Ri Jehová sibʼalaj nim krilo are chiʼ kqakoj qachuqʼabʼ che unaʼtajisaxik ri ukamikal ri uKʼojol. Qetaʼm che qas kojutewchij we kqamaltyoxij ri ubʼanom pa qawiʼ (chasikʼij uwach Romanos 8:31, 32). Maqayaʼ che kʼo jun jastaq kojqʼaten che unaʼtajisaxik ri ukamikal ri Jesús pa wajun junabʼ riʼ. Y chqapatanij más ri Jehová pa ri tiempo riʼ.