1-2. Eaa tatou ka aere ei ki te Akamaaraanga i te au mataiti tataki tai?

 VAITATA e 2,000 mataiti akenei, kua oronga a Iesu i tona oraanga no tatou, kia rauka ia tatou te oraanga mutu kore. I te po i mua ake ka mate ei aia, kua akaue a Iesu i tana au pipi kia akamaara i tana angaanga akaaka na roto i tetai oroa ma te varaoa opue kore e te wina.​—1 Kori. 11:23-26.

² Ka akono tatou i ta Iesu akaueanga no to tatou inangaro akaperepere iaia. (Ioa. 14:15) I te au mataiti tataki tai i te Akamaaraanga, ka akaari tatou i to tatou ngakau āriki no tana i rave na te akamanako anga na roto i te pure i te aiteanga o tona mate. Rekareka katoa tatou i te akamaata i ta tatou angaanga tutu aere, te akamaroiroi anga i te manganui kia kapiti mai kia tatou i teia atianga takake. E ka tauta pakari tatou kia kore e tuku i tetai apinga kia arai ia tatou mei te aere anga ki te Akamaaraanga.

3. Eaa ta tatou ka uriuri i teia atikara?

³ I teia atikara, ka uriuri tatou e toru mataara i tauta pakari ei te iti tangata o Iehova no te akamaara i te mate o Iesu: (1) na te akono akaou anga i ta Iesu akaraanga, (2) na te patianga i tetai ua atu ki te Akamaaraanga, e te (3) na te akono anga i te Akamaaraanga noatu te ngatā.

4. Eaa te au tuatua mou tei akamāramaia mai i te au mataiti ravarai i te Akamaaraanga, e eaa tatou kare e manako puapinga kore i te reira? (Luka 22:19, 20)

⁴ I te au mataiti i te Akamaaraanga, ka akarongo tatou ki te au akoanga Pipiria tei oronga mai i te au pauanga taka  meitaki ki tetai au uianga. Ka kite mai tatou i te tumu i anoano ei te tangata ravarai i te atinga oko e akapeea te mate o te tangata okotai i te akakore anga i te ara a te manganui. Kua akamaaraia mai tatou te aiteanga o te varaoa opue kore e te wina e koai ma ka kai e ka inu i te reira. (E tatau ia Luka 22:19, 20.) E ka akamanako tatou i te au akameitakianga no te aronga te manakonako ra i te noo ki te enua. (Isa. 35:5, 6; 65:17, 21-23) Auraka rava tatou e manako puapinga kore i teia au tuatua mou. E pirioni ua atu tangata kare i mārama i te reira, e kare ratou i kite tikai i te puapinga o te atinga oko o Iesu. Kare katoa ratou e akono i te Akamaaraanga o tona mate kia tau ki tana i akanoo mai. Eaa te tumu?

5. Muri ake i te mate anga te au apotetoro, eaa tei tupu ki te akaraanga ta Iesu i akanoo?

⁵ Muri mai i te mate anga te au apotetoro a Iesu, kua tomo mai te au Kerititiano pikikaa ki roto i te putuputuanga. (Mata. 13:24-27, 37-39) Ka tuatua mai ratou i te “tuatua mingi, kia aruia ratou e te pipi.” (Anga. 20:29, 30) Ko tetai “tuatua mingi” ta teia au Kerititiano pikikaa i apii mai e kare a Iesu i oronga ana i tona kopapa “kia apai ke aia i te ara a te tangata e manganui,” i karanga ai te Pipiria, mari ra kia rave taoki akaouia tona atinga. (Ebe. 9:27, 28) I teia rā e maata te tangata tei irinaki i teia apiianga tarevake. Ka aere putuputu ratou ki te are pure​—tetai taime i te au rā ravarai—​no te akono i tei matauia ko “te Oroa a te Maataanga.” b Tetai mai au akonoanga kare ratou e akamaara ana i te mate o Iesu, kare te maata anga i mārama tikai i ta te atinga o Iesu i akatupu. Penei ka manako tetai pae, ‘Kua akakoreia ainei taku ara e te mate o Iesu?’ Eaa ratou ka ui ei i teia uianga? I tetai tua, kua akakeuia ratou e te aronga tei ekoko e ka rauka i te atinga oko o Iesu i te akakore i te ara. Akapeea ta Iesu au pipi, eaa ta ratou i rave?

6. I te 1872, eaa ta te aronga apiipii Pipiria i kite mai?

⁶ E tae ua atu ki te openga o te 19 anere mataiti, kua rave te pupu aronga apii Pipiria ko Charles Taze Russell ma i tetai apiianga oonu o te au Tuatua Tapu. Kua inangaro ratou i te kite i te tuatua mou no runga i te puapinga o te oko o Iesu e akapeea tona mate me akamaaraia. I te 1872, kua kite mai ratou i te pauanga i roto i te Pipiria e kua oronga mai a Iesu i te oko no te tangata ravarai. Kare ratou i tāpu i teia mārama kia ratou. Mari ra, kua akakite aere i te reira na roto i te au puka, nutipepa, e te au makatini. Muri mai, na te aru anga i te au Kerititiano o te anere mataiti, kua akono ratou i te Akamaaraanga e tai taime i te mataiti.

7. Akapeea tatou i puapingaia ai mei te kimikimi anga a te aronga apii Pipiria o mua ana?

⁷ Teia rā te puapinga nei tatou mei te kimikimi anga a teia pupu tane Kerititiano ngakau tae i rave. Akapeea? Ma te akameitakianga a Iehova, kua mārama mai tatou i te tuatua mou no runga i te atinga oko o Iesu e ta te reira i akatupu. (1 Ioa. 2:1, 2) Kua kite mai tatou i roto i te Pipiria i te manakonakoanga e rua no te au tangata tei akamareka i te Atua​—te oraanga mate kore i runga i te rangi no tetai pae e te oraanga mutu kore i te enua nei no te mirioni ua atu tangata. Ka akavaitata tatou kia Iehova me akamanako ana tatou i tona akaperepere maata ia tatou e te kite anga i te  puapinga o te atinga oko o Iesu no tatou. (1 Pete. 3:18; 1 Ioa. 4:9) Mei to tatou au taeake tiratiratu o mua ana, ka pati tatou i tetai ua atu kia akono i te Akamaaraanga kia tau ki ta Iesu i akanoo.

8. Eaa ta te iti tangata o Iehova i rave no te pati i tetai ua atu ki te Akamaaraanga? (Akara i te tutu.)

⁸ Kua roa te pati ua anga te iti tangata o Iehova i tetai ua atu ki te Akamaaraanga. I te akamata anga o te 1881, kua patiia te au taeake e te au tuaine i Marike kia uipa kapiti ki tetai kainga i Allegheny, Pennsylvania, no te reira akakoroanga puapinga. I muri mai, kua akono te putuputuanga tataki tai i ta ratou Akamaaraanga. Ia Mati 1940, kua akakiteia ki te au papuritia kia pati i tetai ua atu tei inangaro kia aere mai. I te 1960, no te taime mua, kua oronga te opati Betela i te au patianga neneiia ki te au putuputuanga. Mei reira mai, e pirioni ua atu patianga no te Akamaaraanga tei tuʼa aereia. Eaa ra tatou ka rave maroiroi ei i te pati ua atu i tetai?

9-10. Koai ma ka puapingaia mei ta tatou patianga i tetai ua atu ki te Akamaaraanga? (Ioane 3:16)

⁹ Tetai tumu i pati ei tatou i te tangata kia akono kapiti i te Akamaaraanga kia tatou koia oki kia kite ratou no te taime mua i te tuatua mou no ta Iehova e Iesu i rave no tatou katoatoa. (E tatau ia Ioane 3:16.) Tapapa tatou e ko ta ratou i kite mai e te akarongo i te Akamaaraanga ka akakeu ia ratou kia apii maata atu e kia riro mai ei au tavini no Iehova. Ka puapinga katoa tetai pae.

 ¹⁰ Ka pati katoa tatou i te aronga kare e tavini akaou ana ia Iehova. Rave tatou i te reira kia akamaara kia ratou e te akaperepere ra rai a Iehova ia ratou. E manganui tei āriki mai i ta tatou patianga, e te rekareka nei tatou i te kite ia ratou. Na te aere anga ki te Akamaaraanga ka riro ei akakeu ia ratou kia akamanako i to ratou au tuatau mataora i mua ana i te tavini anga ia Iehova. Akamanako ana i te akaraanga o Monica. c Kua akamaroiroiia aia kia riro akaou ei papuritia i te tuatau o te maki kino COVID-19. I muri mai i te aere anga ki te Akamaaraanga i te 2021, karanga mai aia: “E mea akaperepere tikai teia Akamaaraanga kiaku. No te taime mua i te 20 mataiti, kua rauka iaku i te tuatua ki tetai tangata e te pati ia ratou ki te Akamaaraanga. Inangaro tikai au i te rave i te reira no ta Iehova e Iesu i rave noku.” (Sala. 103:1-4) Me ka āriki mai te tangata e me kare, ka pati ua rai tatou i tetai ua atu ki te Akamaaraanga, te kite anga e te mareka maira a Iehova i ta tatou angaanga maroiroi.

11. Akapeea a Iehova i te akameitakianga i to tatou maroiroi no te pati i te au tangata ki te Akamaaraanga? (Hagai 2:7)

¹¹ Akameitaki tikai a Iehova i ta tatou angaanga maroiroi no te pati i te au tangata ki te Akamaaraanga. I te 2021, noatu te au arairaianga no te maki kino COVID-19, kua rauka te numero ou e 21,367,603 aronga tei tae mai. Vaitata tera e rua e te apa numero i te katoa anga o te Au Kite o Iehova i teianei ao! E tika kare ko te numero te mea maata kia Iehova. Te inangaro ra aia i te au tangata tataki tai. (Luka 15:7; 1 Timo. 2:3, 4) Papu ia tatou e te taangaanga ra a Iehova i ta tatou patianga i tetai ua atu kia kimi i te aronga ngakau tika.​—E tatau ia Hagai 2:7.

12. Eaa te au turanga ngatā ka tamanata ia tatou i te akono i te Akamaaraanga? (Akara i te tutu.)

¹² Kua totou a Iesu i te au rā openga, ka tupu te au turanga ngatā kia tatou​—mei te patoianga a te ngutuare, te takinokinoanga, te tamaki, te maki mate, e te vai atura. (Mata. 10:36; Mare. 13:9; Luka 21:10, 11) Tetai au taime ka tamanata teia turanga ia tatou kia kore e akamaara i te mate o Iesu. Eaa ta to tatou au taeake e te au tuaine i rave kia autu i te au timataanga, e akapeea a Iehova i te tauturu anga ia ratou?

13. Akapeea a Iehova i te akameitakianga i to Artem tu ngakau toa e tona inangaro i te akono i te Akamaaraanga iaia i roto i te are auri?

¹³ Tiriaia ki roto i te are auri. Rave ra to tatou au taeake tei tiriaia ki roto i te are auri no to ratou akarongo i tei rauka ia ratou kia akamaara i te mate o Iesu. Akamanako ana i te akaraanga o Artem. I te tuatau Akamaaraanga 2020, kua tukunaia aia ki roto i tetai pia are auri e 17-koea-mita (183-koea-tapuae) ma tetai au rima tangata ke mai. Noatu kua tapekaia, kua rauka iaia i te akaputu mai i tetai au apinga kia taangaanga no te Akamaaraanga, e kua parani katoa i te oronga i te ako no te Akamaaraanga. E aronga kai avaava e te tuatua viivii tei roto i tona pia are auri. Eaa tana i rave? Kua pati aia kia ratou kia kore e tuatua viivii e te kai avaava e tai ora. Poitirere a Artem, kua akatika mai ratou e kare i kai avaava ana e te tuatua viivii i te tuatau o te Akamaaraanga. Karanga mai a Artem e, “Kua inangaro au i te tuatua kia ratou  no te Akamaaraanga.” Noatu kua karanga mai ratou e kare ratou e inangaro i te akarongo mai, i na te kite anga ratou ia Artem e akono ra i te Akamaaraanga, kua ui atu ratou no runga i te reira.

14. Eaa te au angaanga tei raveia kia rauka i te katoatoa i te akono i te Akamaaraanga noatu te maki kino COVID-19?

¹⁴ Maki kino COVID-19. I te tupuanga mai teia maki kino, kare i rauka i te iti tangata o Iehova i te aere ki te are uipaanga no te Akamaaraanga. Kare ra te reira i arai ana ia ratou mei te akono anga i te Akamaaraanga. d Ko te au putuputuanga e Initaneti ta ratou kua akono i te Akamaaraanga na runga i te vitio karangaranga. Akapeea ra te au mirioni kare a ratou Initaneti? I tetai au enua, kua rauka ia ratou te akanoonoo e kia orongaia te ako na runga i te tivi e te ratio. Tetai katoa, kua rekoti te au opati Betela i te ako ki roto i te 500 tuma reo e ka rauka rai i te aronga i te au ngai mamao i te akono i te Akamaaraanga. Na tetai taeake tiratiratu  e akapapa e te tuʼa i te ako ki te aronga te anoano ra i te reira.

15. Eaa taau i kite mai mei te akaraanga o te vaine apii Pipiria ko Sue?

¹⁵ Patoianga a te ngutuare tangata. No tetai aronga, ko tetai manamanata i te akono i te Akamaaraanga ko te patoianga a te ngutuare tangata. Akamanako ana i te akaraanga o tetai vaine apiipii Pipiria ko Sue. I te mataiti 2021, i te rā i mua ake i te Akamaaraanga, kua akakite a Sue ki tona puapii Pipiria, kare aia e tae atu ki te Akamaaraanga no te patoianga a te ngutuare tangata. Kua tatau tona puapii Pipiria ia Luka 22:44. E oti kua akamārama aia kiaia e me tupu te au turanga ngatā kia tatou, e aru tatou i to Iesu akaraanga e uri kia Iehova na roto i te pure e te irinaki pu tikai Iaia. I tera mai rā, kua akapapa a Sue i te au mea oroa e kua akarakara i te porokaramu takake no te Akamorianga i te Popongi i runga i te jw.org. Tera aiai, iaia i roto i tona pia, kua taangaanga aia i tana tereponi apaipai kia akarongo i te Akamaaraanga. I muri akera, kua tata a Sue ki tona puapii Pipiria: “Kua akamaroiroi tikai koe iaku i nanai. Kua rave au i tei rauka iaku kia tae ki te Akamaaraanga, e na Iehova te katoaanga. Mataora nei au ma te ngakau aroa kua pera au!” Toou manako ka rauka ainei ia Iehova te tauturu ia koe me tupu te reira kia koe?

16. Eaa tatou i papu ei e ka akameitaki a Iehova ia tatou e tauta ra kia aere ki te Akamaaraanga? (Roma 8:31, 32)

¹⁶ Akaperepere maata a Iehova ia tatou e aruaru ra i te akamaara i te mate o Iesu. Papu ia tatou ka akameitaki aia ia tatou me akaperepere tatou i tana i rave no tatou. (E tatau ia Roma 8:31, 32.) E tauta ua rai tatou i te aere ki te Akamaaraanga i teia mataiti e te rave i ta tatou ka rauka no te akamaata atu i ta tatou au angaanga pae vaerua i te tuatau o te Akamaaraanga.