ARTICOLO STUDIOSCHE 4
O Iehova del-ame but miștimata anda codoia că das amari zor te încăras i Comemorarea
„Continuin te cheren cadai buchi ande mânri amintirea.” (LUCA 22:19)
GHILI 19 I Cina le Raieschi
SO VA DICHAIA a
1, 2. Sostar jias ca i Comemorarea ande fiesavo bărș?
CAM acana 2 000 bărșa, o Isus dea peschi viața anda amende, hai cadea pâtărdea amenghe o drom caring i viața veșnico. Andi riat angla so te merel, o Isus poruncisardea pesche discipolenghe te anen penghe amintea catar lesco sacrificio pherdo iubirea prin iech ceremonia simplo, ande savi sile folosime sar simboluri o manro hai i mol. (1 Cor. 11:23-26)
2 Amen încăras i porunca le Isusoschi anda codoia că iubisaras-les zurales but. (Ioan 14:15) Ande fiesavo bărș, ande le curche angla hai pala i Comemorarea, amen sicavas amari recunoștința anda so cărdea vo ande amaro miștimos, cana cheras amenghe timpo te mangas-ame hai te gândisaras-ame ca so însemnol lesco merimos anda amende. Sa cadea, amen sam zurales bucurime că daisaras te jias mai but andi predicarea hai te acharas chichi mai bute manușen te aven ande iech than amența ca cado baro evenimento. Hai vi amen, sam hotărâme ande amaro ilo te cheras sea so daisaras caște jias ca i Comemorarea.
3. So va dichaia mai dur?
3 Ande cado articolo, va avela te dichas so bare eforturi cărde le slujitori le Iehovasche caște încăren i Comemorarea le merimaschi le Isusoschi. Va avela te das duma anda trin buchia prin save von cheren cadaia: 1) încăren i Comemorarea cadea sar sicadea-le o Isus, 2) acharen avere manușen ca i Comemorarea hai 3) încăren i Comemorarea, chiar cana silen pharimata.
LE SLUJITORI LE IEHOVASCHE ÎNCĂREN I COMEMORAREA CADEA SAR SICADEA-LE O ISUS
4. So ciacimata sile sicade ande fiesavo bărș ca i Comemorarea hai sostar ci trebul te bâstras so miștimata si amen anda codoia că hachiaras-le? (Luca 22:19, 20)
4 Ande fiesavo bărș, ca i Comemorarea, amen așunas iech cuvântarea bazome pi Biblia cai del-ame răspunso ca mai but pușimata importanto. Sar exemplo, daisaras te jianas sostar le manușen silen nevoia catar i răscumpărarea hai sar daștil-pe ca o merimos ieche corcore manușesco te chosel le păcatea cadichi de bute manușenghe. Sa cadea, anel-pe amenghe amintea so însemnol o manro hai i mol hai con daștil te lel anda lende. (Citisar Luca 22:19, 20.) Si iech șucar ocazia vi te gândisaras-ame ca le miștimata cai sile șiute de iech partea anda le creștini cai silen i speranța te train pi phuv. (Is. 35:5, 6; 65:17, 21-23) Ci trebul te bâstras chichi de but miștimata si amen anda codoia că hachiaras cadal ciacimata. Miliardea manușa ci prinjianen-le hai ci jianen chichi de cuci si i jertfa le Isusoschi. Mai but, von ci încăren i Comemorarea cadea sar sicadea-ame o Isus. Sostar?
5. Sar astarde le manușa te încăren i Comemorarea le merimaschi le Isusoschi pala so le mai but apostoli mule?
5 Țâra timpoia pala so mule le mai but apostoli, andi congregația avile creștini neciace. (Mat. 13:24-27, 37-39) Cadala ‘dine duma buchia rimome caște țârden le discipolen pala pende’. (Fap. 20:29, 30) Iech andal buchia rimome sicade catar le creștini neciace sas că o Isus ci dea pesco corpo „iech corcori data caște phiravel bute jenenghe păcatea”, cadea sar sicavel i Biblia. (Evr. 9:27, 28) Von arăsle te sicaven că leschi jertfa trebul neviardi mai butivar. Aghies, but manușa pachian cado sicaimos neciacio. Von chiden-pe ande iech than andel changherea ande fiesavo curco sau, poiechtada, ande fiesavo ghies caște încăren i „Jertfa la Liturghiachi” b, cadea sar phenen lache von. Aver religii ci încăren i Comemorarea le merimaschi le Isusoschi cadea de but, tha le mai but manușa anda codola changherea ci hachiaren mișto so miștimata anel amenghe o merimos le Isusosco. Chichiva anda lende pușen-pe: „Daștil ciaces, o merimos le Isusosco te chosel mânre păcatea?”. Sostar șion von cado pușimos? Anda codoia că, butivar, von sas-le cărde te pachian că le păcatea ci daștin te aven chosle prin o merimos le Isusosco. Sar ajutisarde le ciace continuatori le Isusosche le manușen te hachiaren sostar mulea vo?
6. So arăsle te prinjianen ando bărș 1872 le murșa anda iech grupo cai rodenas te hachiaren mai mișto i Biblia?
6 Co sfârșito le secolosco 19, iech grupo murșengo cai rodenas te hachiaren mai mișto i Biblia, cărdo catar o Charles Taze Russell, astarde te studiin atento le Scripturi. Von camenas te jianen so însemnol ciaces o merimos le Isusosco hai sar trebulas comemorime. Ando bărș 1872, le ajutoroia la Bibliaco, von hachiarde că o Isus dea peschi viața sar răscumpărarea anda sea le manușa. Pherde bucuria, von ci încărde numai anda pende le sicaimata cai hachiarde-le, tha cărde-le prinjiande vi averenghe prin lila, ziarea hai revistea. Ca țâra timpo pala codoia, von astarde te încăren i Comemorarea numa iech data po bărș, cadea sar cherenas vi le creștini anda o iechto secolo.
7. So miștimata si amen anda codoia că cadal creștini le ileia ujo dine penghi zor te hachiaren sea mai mișto i Biblia?
7 Aghies, si amen but miștimata anda codoia că, bute timpoia mai anglal, cadal creștini le ileia ujo dine penghi zor te hachiaren sea mai mișto i Biblia. Sar? Le ajutoroia le Iehovasco, amare iacha sas-le pâtărde te dichas o ciacimos anda i jertfa le Isusoschi hai so cherel voi anda amende hai anda sea le manușa. (1 Ioan 2:1, 2) Sa cadea, hachiardeam că i Biblia del duma anda dui speranțe cai o Iehova del-le codolenghe cai sile cuci ande lesche iacha: viața bi merimasco ando cerii anda iech țâno număro manușengo hai viața anda sea o timpo pi phuv anda milioanea manușa. Cana gândisaras-ame ca i bari iubirea le Iehovaschi caring amende hai ca le miștimata cai va avena amen prin i jertfa le Isusoschi, pașioas sea mai but amare Dadestar cerisco, Iehova. (1 Pet. 3:18; 1 Ioan 4:9) Anda codoia, cadea sar amare phrala loialo andal puraimata, te acharas vi averen te aven ande iech than amența ca i Comemorarea, cai încăras-la cadea sar sicadea-ame o Isus.
LE SLUJITORI LE IEHOVASCHE ACHAREN VI AVEREN CA I COMEMORAREA
Sar daștis te cheres mai but andi campania prin savi acharas le manușen ca i Comemorarea? (Dich le paragrafea 8-10) e
8. So cărde le slujitori le Iehovasche caște acharen vi averen ca i Comemorarea? (Dich i imaginea.)
8 De but timpo, le slujitori le Iehovasche acharen vi averen ca i Comemorarea. Ando bărș 1881, le phrala hai le pheia andal Statele Unite sas-le acharde te chiden-pe ande iech than ando chăr ieche phralesco anda Allegheny (Pennsylvania) caște încăren cado evenimento specialo. Pala codoia, i Comemorarea sas-li încărdi ande fiesavi congregația. Ande martia 1940, le vestitorenghe sas phendo te acharen le manușen anda o teritorio cai camenas te prinjianen mai but buchia anda o ciacimos. Ande 1960, le congregații primisarde anda i iechto data invitații tipărime catar o Betelo. De atunci, pe sea i phuv si dine miliardea invitații. Sostar cheras amenghe cadichi de but timpo hai das cadea de but amari zor caște acharas vi averen ca i Comemorarea?
9, 10. Cas mai acharas ca i Comemorarea? (Ioan 3:16)
9 Camas te acharas chichi mai bute manușen ca i Comemorarea caște ajutisaras-le te prinjianen o ciacimos anda so cărdea o Iehova hai o Isus ande savorengo miștimos. (Citisar Ioan 3:16.) Sperisaras anda sea o ilo că so va dichena hai va așunena ca i Comemorarea va cherena-le te camen te prinjianen mai but buchia anda o ciacimos, hai ji la urmă te arăsăn te aven slujitori le Iehovasche. Tha vi aver jene țârden miștimata anda i Comemorarea.
10 Amen acharas ca i Comemorarea vi codolen cai ci mai slujin activo le Iehovasche. Cadea, anas lenghe amintea că o Del ci bâstărdea-le hai că iubil-le vi mai dur. Cana dichas că von aven ca i Comemorarea, amaro ilo bariol bucuriatar. I Comemorarea ajutil-le te anen penghi amintea i bari bucuria cai pherelas lengo ilo cana slujinas le Iehovasche. Te dichas o exemplo la pheiaco Monica c. Voi astardea te slujil pale activo le Iehovasche andi pandemia de COVID-19. Pala so sas-li ca i Comemorarea anda o bărș 2021, voi phendea: „Cadai Comemorarea sas zurales specialo anda mande. Pala 20 bărșa, daisardem de dav duma averența anda o ciacimos hai te acharav-le ca i Comemorarea. Dem mânri zor anda sea o ilo ande cadai Campania anda codoia că som zurales recunoscătorii le Iehovasche hai le Isusosche anda sea so cărdea anda mande”. (Ps. 103:1-4) Indiferento că le manușa așunen-ame sau nici, amen das amari zor te acharas chichi mai bute manușen caște aven ande iech than amența ca i Comemorarea, anda codoia că jianas că amare eforturi sile cuci andel iacha le Iehovasche.
11. So bare miștimata dea-ame o Iehova anda codoia că deam amari zor te acharas vi averen ca i Comemorarea? (Hagai 2:7)
11 O Iehova dea-ame bare miștimata anda codoia că deam amari zor te acharas le manușen ca i Comemorarea. Ando bărș 2021, chiar cana sas restricții andai pandemia de COVID-19, avile ca i Comemorarea 21 367 603 manușa, adică cam dui-var hai dipaș o număro le Martorengo le Iehovasche anda sea i lumea. Si ciaces, o Iehova silo interesime mai but andel manușa, na ande chichiva numerea. (Luca 15:7; 1 Tim. 2:3, 4) Cadea că, amen daisaras te pachias ciaces că o Iehova folosil-pe catar cadal campanii ande save acharas le manușen ca i Comemorarea caște ajutil-ame te arachas le manușen cai silen o ilo ujo. (Citisar Hagai 2:7.)
LE SLUJITORI LE IEHOVASCHE ÎNCĂREN I COMEMORAREA, CHIAR CANA NACHEN PRIN PHARIMATA
O Iehova del-ame but miștimata anda codoia că das amari zor te încăras i Comemorarea (Dich o paragrafo 12) f
12. Cana daștilas te avel amenghe pharo te încăras i Comemorarea? (Dich i imaginea.)
12 O Isus phendea de mai anglal că, andel ghiesa de palal, va avela te nachas prin mai but pharimata: opoziția catar i familia, persecuții, marimata, nasfalimata hai but aver. (Mat. 10:36; Mar. 13:9; Luca 21:10, 11) Poiechdata, ande cadal situații, si amenghe zurales pharo te încăras i Comemorarea le merimaschi le Isusoschi. So cărde amare phrala hai pheia caște nachen părdal cadal pharimata hai sar ajutisardea-le o Iehova?
13. Sar binecuvântisardea o Iehova le phrales Artiom anda o tromai cai sicadea-les hai anda leschi hotărârea te încărel i Comemorarea ando phandaimos?
13 O phandaimos. Amare phrala cai sile ando phandaimos anda lengo pachiamos cheren sea so daștin caște încăren i Comemorarea le merimaschi le Isusoschi. Te dichas so cărdea iech phral po anav Artiom. Ando bărș 2020, cana sas i Comemorarea, vo sas-lo phandado ande iech celula de 17 metri pătrați, cai sas phandade leia ștar sau panji manușa. Chiar cana sas-lo phandado, vo daisardea te chidel chichiva buchia caște folosil-le sar embleme hai cărdea pesche iech plano te încărel i cuvântarea andai Comemorarea anda peste. Tha le manușa cai sas-le phandade leia andi celula țârdenas thuvali hai acușenas but. Cadea că, vo manglea-le ca, măcar anda iech ora, te încăren-pe parpale te na mai acușen hai te na mai țârden. Bi te ajucărel-pe, von cărde cadai buchi. O Artiom phenel: „Phendem lenghe că avelas te dav duma lența mai but andai Comemorarea”. Chiar cana mai anglal ci camle te așunen chanci anda cadai buchi, pala so dichle sar încărdea o Artiom i Comemorarea, von șiute lesche but pușimata.
14. So eforturi cărde-pe caște încărel-pe i Comemoarea le merimaschi le Isusoschi chiar cana astardea i pandemia de COVID-19?
14 I pandemia de COVID-19. Cana astardea i pandemia, le slujitori le Iehovasche ci mai daisarde te jian fizico ca i Comemorarea. Tha cadaia ci așadea-le te încăren-la. d Ande le congregații cai le phralen sas len interneto, i Comemorarea sas-li încărdi prin videoconferința. Tha so cărde le milioanea manușa cai ci sas-len interneto? Ande but thema, i cuvântarea andai Comemorarea sas-li șiuti co televizorii sau co radio. Sa cadea, le filiale cărde înregistrări andai cuvântarea ande mai but sar 500 șiba, ca vi chiar codola cai sas-le andel thana duriarde te daștin te încăren i Comemorarea. Hai amare cuci phrala îngărde cadal înregistrări codolenghe cai sas len nevoia lendar.
15. So sichioas catar iech jiuvli cai studiil i Biblia po anav Sue?
15 Opoziția catar i familia. Anda chichiva jene, o mai baro pharimos cai așiavel-le te încăren i Comemorarea si că codola anda lenghi familia așen lenghe contra. Te dichas prin so nachlea iech jiuvli cai studiilas i Biblia po anav Sue. Ando bărș 2021, ieche gheseia angla i Comemorarea, voi phendea la pheiache savi studiilas laia că ci va daștila te avel prezento anda codoia că le jene anda lachi familia așen lache contra. I phei citisardea lache o verseto anda Luca 22:44 hai phendea lache că, atunci cana nachas prin pharimata, trebulas te las-ame pala o exemplo le Isusosco hai sicavas că cheras cadaia cana mangas-ame le Iehovasche hai șioas sea amaro pachiamos ande leste. O duito ghies, i Sue pregătisardea le emblemea hai dichlea i Închinarea de teharin anda o ghies la Comemorareaco po site-o jw.org. Ande codoi riat, voi gălea corcori ande peschi camera hai așundea o programo anda i Comemorarea po telefono. Pala codoia scriisardea la pheiache casa studiilas: „Zuriardean-ma zurales but iși. Me cărdem sea so daisardem caște daștiv te avav prezento ca i Comemorarea, hai o Iehova cărdea peschi partea. Ci daștiv te phenav chichi de but bucuria hai recunoștința pheren mânro ilo!”. Pachias că o Iehova daștil te ajutil vi tut dacă naches prin iech situația sar cadaia?
16. Sostar daisaras te pachias că o Iehova va dela-ame but miștimata dacă das amari zor te jias ca i Comemorarea? (Romani 8:31, 32)
16 O ilo le Iehovasco bariol cana dichel că amen das amari zor te încăras i Comemorarea le merimaschi le Isusoschi. Daisaras te pachias ciaces că vo va dela-ame but miștimata cana sicavas amari recunoștința anda sea so cărdea vo anda amende. (Citisar Romani 8:31, 32.) Cadea că, te avas hotărâme te jias ca i Comemorarea anda cado bărș hai te cheras sea mai but buchia anda o Iehova andel curche angla hai pala i Comemorarea!
GHILI 18 Recunoștința anda i jertfa de răscumpărare
a Marține, 4 aprilia 2023, milioanea manușa pa sea i phuv va încărena i Comemorarea le merimaschi le Cristososchi. But jene va avena anda i iechto data. Va avena vi codola cai, de mai but timpo, ci mai slujin activo le Iehovasche hai daștil-pe că, de chichiva bărșa, ci mai sas-le ca i Comemorarea. Aver va trebuna te nachen prin bare pharimata caște daștin te încăren-la. Orisavi si chi situația, daștis te pachias ciaces că va aveia cuci andel iacha le Iehovasche cana va dichela că des sea chi zor te jias ca i Comemorarea.
b Le manușa ca i jian cai changheri pachian că, ando timpo cana încărel-pe cadai ceremonia, o manro hai i mol paruven-pe ando corpo hai o rat le Cristososco. Von pachian că o Isus del pesco corpo hai rat ori chichivar varecon cherel cado ritualo.
c Chichiva anava sas-le parude.
d Dich vi le articolea pa jw.org cai bușion „I Comemorarea anda 2021”.
