1-2. Ha yini hi hlalela xidzrimuxo lembe ni lembe?

 KU KHALUTA kolomu ka 2.000 wa malembe na Yesu a nyikele wutomi byake hi nkonta yezru, a va a hi pfulela mukhandlu wa ku kuma wutomi lebyi nga gamikiki. Hi wusiku lebyi Yesu a fiki ha byone, a byele vadondzrisiwa vake leswaku va dzrimuka siku ledzri a fiki ha dzrone. A hlaye leswaku va fanela ku swi yentxa hi ndlela ya ku nabyala, na va tizrisa pawu ni vhinyu.—1Ko 11:23-26.

² Hi landzra a xileleto xa Yesu hikusa hi mu zrandzra ngopfu. (Yh 14:15) Lembe ni lembe hi nguva ya xidzrimuxo, hi kombisa ndlela leyi hi tlangelaka ha yone leswi Yesu a hi yentxeliki swone hi ku tinyika nkama wa ku yanakanyisisa hi lifu dzrake ni ku khongota hi mhaka leyi. Hi tlhela hi tikazratela ku yentxa leswi yengetelekiki a ntizrweni wa ku zrezra, hi kutxa vhanu vanyingi leswaku va va kone ka xiyentxakalu lexi. Nakone handle ka leswo, a hi pfumeleli ntxhumu ni wun’we wu hi sivela ku va kone a xidzrimuxweni.

3. I yini leswi hi taka swi vona ka xidondzro lexi?

³ Ka xidondzro lexi, hi ta vona mintxhumu yizrazru leyi kombisaka leswaku vhanu va Xikwembu Nkulukumba va tikazratela ku yentxa leswi va nga swi kotaka akuva va hlalela xidzrimuxo xa Yesu Kriste: 1) ku hamba xidzrimuxo hi lani Yesu a leletiki ha kone, 2) ku zramba vhanu leswaku va va kone a xidzrimuxweni, ni 3) ku hlalela xidzrimuxo nambiloko va kumana ni swikazratu.

4. I mintiyiso yini leyi hi dzrimuxiwaka yone lembe ni lembe a xidzrimuxweni nakone ha yini hi fanela ku yi nyika lisima? (Luka 22:19, 20)

⁴ Lembe ni lembe hi siku dzra xidzrimuxo, hi yingiseta wukaneli bya le Bibeleni lebyi hlamulaka swivutiso swa kukazri mayelana ni lifu dzra Kriste. Hi dondzra leswaku ha yini vhanu va djula xitizrulo ni leswaku swi kotekisa ku yini leswaku a lifu dzra mhunu mun’we dzri hakela swidoho swa hinkwezru. Hi tlhela hi tlhamuxeliwa leswaku i vamani lava fanelaka ku da pawu ni ku nwa vhinyu ni leswaku swifanekiselo leswo swi tlhamuxela yini. (Dondzra Luka 22:19, 20.) Handle ka leswo, hi tlhela hi dondzra hi matovoko lawa ma taka kumiwa hi lava nga ni dumbo dzra ku hanya lani misaveni hi lani ku nga helikiki. (Eza 35:5, 6; 65:17, 21-23) Ku djuleka hi yi nyika lisima mintiyiso leyo. Vhanu va ntsrandzravahlayi a va tivi ntxhumu hi mhaka leyi nakone a va xi nyiki lisima xitizrulo xa Yesu. Handle ka leswo, a va hambi xidzrimuxo xa Yesu hi lani yene a leletiki ha kone. Hi ndlela yini?

5. I yini leswi yentxekiki ntsrhaku ka ku fa ka vapostola vanyingi?

⁵ Ntsrhaku ka loko ku fe vapostola vanyingi va Yesu, ku sungule ku humelela a vakriste vanyingi va madzrimi a mabandleni. (Mt 13:24-27, 37-39) Vhanu lavo a va li ‘lava khanelaka swa ku somboloka’. Nakone a va ‘tikukuletela vadondzrisiwa.’ (Min 20:29, 30) Wun’we wa mintxhumu ya ku ‘somboloka’ lowu vakriste va madzrimi va sunguliki ku wu dondzrisa i wa leswaku Yesu a nga nyikelanga mizri wake kan’we, ku byatsrha swihono swa lavanyingi. A va hlaya leswaku a xitizrulo xa Yesu a xi fanela ku phindha phindhiwa. (Hb 9:27, 28) Namunhla wa siku vhanu vanyingi va timbilu letinene va kholwa ka madzrimi wolawo. Va ya makezrekeni va ku va ya da “Xilalelo xa Hosi” vhiki ni vhiki nakone minkama yin’wana va teka siku hinkwadzru. b Ka wukhongoti byin’wana va hamba Xilalelo xa Hosi makhambi matsrongo kambe ku tala kwavu a va swi twisisi ha hombe leswi patsrekaka ka xitlhavelo xa Yesu. Van’wana va tivutisa leswi: ‘Xana hakunene swidoho swanga swi nga dzrivaleliwa hi kola ka xitizrulo xa Yesu?’ Van’wana va va ni ku ganaganeka loko hikusa va dondzrisiwe swaku a lifu dzra Yesu a dzri nge swi koti ku dzrivalela swidoho. Xana Vakriste va ntiyiso va va pfuna hi ndlela yini vhanu ku twisisa ndlela leyi xidzrimuxo xa lifu dzra Yesu xi fanelaka ku hambiwa hi yone?

6. I magamu wani lawa ma tlhaseliwiki hi swidondzri swa Bibele kolomu ka va 1872?

⁶ Hi 1870, Charles Russell ni ntlawa wake va sungule ku kambisisa Bibele hi wuyenti. Vone a va djula ku tiva leswaku xitizrulo xa Yesu xi tlhamuxela yini nakone xi yentxisiwa ku yini xidzrimuxo. Kutani, kolomu ka va 1872, hi ku tizrisa Bibele va tlhaseleli magamu ya leswaku Yesu a a fele ku huluxa vhanu hinkwavu. Kutani va teke xiboho xa ku byela vhanu vanyingi mhaka leyi hi ku tizrisa mabuku, majornali, ni marevhixta. Ntsrhaku ka leswo, va yetiseli vapostola, hi ku tlangela lifu dzra Yesu kan’we hi lembe.

7. Xana hi pfuneka hi ndlela yini hi leswi kambeliwiki hi swidondzri swa Bibele a nkameni lowu khalutiki?

⁷ Namunhla, hi swi londzrovota ha hombe leswi swidondzri leswiyani swi swi gunguliki. Hi ndlela yini? Yehovha a hi pfuni hi ku helela ku twisisa leswi xitizrulo xa Yesu xi tlhamuxelaka swone ni leswi a taka swi yentxela vhanu hinkwavu a nkameni lowu taka. (1Yh 2:1, 2) Hi tlhelli hi twisisa leswaku a  vhanu va Xikwembu Nkulukumba va vumbiwa hi mintlawa yi bizri. Wun’we i wa lava nga ni dumbu dzra ku ya hanya hilani ku nga helikiki a matilweni, kasi lowu wun’wana wu vumbiwa hi mawakawaka ya vhanu lava nga ni dumbu dzra ku hanya hilani ku nga helikiki a misaveni. Ku yanakanyisisa hi ndlela leyi Yehovha a hi zrandzraka ha yone ni ndlela leyi xitizrulo xa Yesu xi hi pfunaka ha yone swi ya swi hi tshindzretela kusuhi na Yehova. (1Pe 3:18; 1Yh 4:9) Xileswo, hilani vamakwezru a nkameni lowu khalutiki va yentxiki ha kone, na hine hi zramba vhanu leswaku va ta tlangela lifu dzra Yesu Kriste hi lani yene a hi dondzrisiki ha kone.

8. I yini leswi vhanu va Yehovha va swi yentxeka a kuva va zramba vhanu a xidzrimuxweni? (Vona xifaniso.)

⁸ I malembe na vhanu va Yehovha va zrambela vhanu a xidzrimuxweni. Hi 1881, ka Xihondzro Xa Ku Zrindzra a ku ni xizrambo lexi a xi zrambela vamakwezru a kaya ka makwezru wa kukazri a Allegheny a Pensilvânia hi nkongometo wa ku hamba xiyentxakalo lexo xa ku hlawuleka. Ntsrhaku ka leswo, a xidzrimuxu xi sungule ku hambeliwa a mabandleni. Hi Marsu wa 1940, vazrezri va kutxiwe ku zramba vhanu lava a va nyonxela akuva va va kone a xidzrimuxweni. Nakone hi 1960, a Betele dzri sungule ku humexa swizrambo swa ku sungula swa ku zrambela vhanu a xidzrimuxweni. Ku sukela a nkameni lowo ku ta tlhasa namunhla, ku nyikeliwe swizrambo swa ntsrandzravahlayi. Kambe ha yini hi tikazrata hi ndlela leyo akuva hi zramba vhanu?

9-10. I vamani lava pfunekaka loko hi fambisa swizrambo swa xidzrimuxo? (Yohane 3:16)

⁹ Xin’wana lexi hi yentxeka hi zrambela vhanu a xidzrimuxweni hileswaku hi djula kuva lava va yaka hi khambi dzra ku sungula va dondzra  hi leswi Yehovha kun’we na Yesu va hi yentxeliki swone. (Dondzra Yohane 3:16.) Ku navela kwezru i ka leswaku leswi va taka swi yingela ni ku swi vona a xidzrimuxweni, swi khumba timbilu tavu ni kuva susumetela ku dondzra Bibele akuva va va malandzra ya Yehovha. Kambe a ko va vhanu lava ntsena va buyeliwaka.

¹⁰ Hi tlhela hi zramba ni lava va tsrhikiki kuva Timboni ta Yehovha. Hi yentxa leswo akuva va ta dzrimuka leswaku Yehovha a ha va zrandzra ngopfu. Vanyingi va xi yamukela xizrambu nakone hi nyonxa ngopfu hi ku va na vone. Loko va hlalela xidzrimuxo, va nga ha dzrimuka ndlela leyi a va nyonxe ha yone nkama na va ha tizrela Yehovha. Vona xikombiso xa Mónica. c Hi nkama wa ntungu wa COVID-19, a tlhele a sungula ku zrezra ni Timboni ta Yehovha. Ntsrhaku ka loko a hlalele xidzrimuxo hi 2021, a hlaye leswi: “Xidzrimuxo xa lembe ledzri xi ve xa ku hlawuleka kwanga. Phela ni ve ni 20 wa malembe na ni nga zrambeli vhanu a xidzrimuxweni, kambe lembe ledzri ni swi yentxile. Ni mu tlangela ngopfu Yehovha na Yesu hi leswi va ni yentxeliki swone lakakuva ni yentxe leswi ni nga swi kota akuva ni zramba vhanu.” (Ps 103:1-4) Hi yentxa hinkwaswu leswi hi nga swi kotaka akuva hi zramba vhanu a xidzrimuxweni nambiloko va yamukela kumbe va nga yamukeli. Xa lisima ngopfu ka Yehovha i ku tikazrata kwezru.

11. Xana Yehovha a ku tovokisa hi ndlela yini ku tikazrata kwezru ka ku zrambela vhanu a xidzrimuxweni? (Hagai 2:7)

¹¹ Yehovha a yi tovokisa ngopfu minzamu yezru ya ku zrambela vhanu a xidzrimuxweni. Nambileswi a ku ni swipimelo hi kola ka ntungu wa COVID-19, hi 2021 hi ve ni nhlayu yikulu ngopfu swinene ya vhanu lava hlaleliki xidzrimuxo ku nga 21.367.603 wa vhanu. Nhlayu leyi i yikulu loko yi pimanisiwa ni nhlayu ya Timboni ta Yehovha na yi phindhiwe kabidzri! I ntiyiso leswaku Yehovha a nga zron’weki ngopfu hi tinhlayu kambe a zron’weka hi mun’wana ni mun’wana lwa vaka kone a xidzrimuxweni. (Lk 15:7; 1Tm 2:3, 4) Ha tiyiseka leswaku loko hi zrambela vhanu a xidzrimuxweni, Yehovha a hi pfuna ku kuma lava nga ni timbilu letinene.—Dondzra Hagai 2:7.

12. I yini leswi nga ha yentxaka swi kazrata ku hlalela xidzrimuxo? (Vona xifaniso.)

¹² Yesu a hlaye leswaku a masikwini ya wugamu a hi ta kumana ni swikazratu swinyingi swa ku fana ni ku kanetiwa hi maxaka, tinxanisa, tiyimpi, mintungu ni swin’wana. (Mt 10:36; Mrk 13:9; Lk 21:10, 11) Mintxhumu leyo hinkwayu yi nga ha yentxa leswaku swi hi kazratela ku hlalela xidzrimuxo. I yini leswi vamakwezru va swi yentxaka akuva va hlula swikazratu leswo nakone Yehovha a va pfuna hi ndlela yini?

13. Xana Yehovha a xi tovokise hi ndlela yini xixixi xa Artem ni ku tiyimisela kwake ka ku tlangela xidzrimuxo nambiloko a li djele?

¹³ Ku pfaleliwa. Vamakwezru lava pfaleliwiki madjele hi kola ka lipfumelo dzravu, va yentxa leswi va nga swi kotaka akuva va tlangela lifu dzra Yesu Kriste. Vona xikombiso xa makwezru Artem. Hi nguva ya xidzrimuxo xa lembe dzra 2020 a a pfaleliwe ka xidjelana ni ntlhanu wa swib’otxhwa. Nambitasu a swi kotile ku kuma swifanekiselo swa xidzrimuxo nakone a tilulamiselile akuva a tibekela wukaneli. Kambe a ku ni xikazratu. A swib’otxhwa leswin’wana a swi dzraha ni ku khanela nhlamba. Kutani Artem a kombele vavanuna lava leswaku va yima ku dzraha ni ku zruketela ku  dzringana wora. Lexi hlamalisaka, vavanuna lavo va pfumelile. A tlhele a va byela leswaku loko va swi navela a nga bula navu mayelanu ni xidzrimuxo. Hi nkama wolowo a va pfumelanga, kambe ntsrhaku ka loko va mu vone na a tlangela xidzrimuxo va sungule ku mu hamba swivutiso.

14. Xana vhanu va Yehovha va swi kotise kuyini ku hlalela xidzrimuxu nambiloko ku ni ntungu wa COVID-19?

¹⁴ Ntungu wa COVID-19. Hi kola ka ntungu wa COVID-19, a swi kotekanga kuva Timboni ta Yehovha ti hlalela xidzrimuxo na ti tlhanganile hi xivizri. Kambe leswo a swi ti sivelanga ku tlangela siku dzra ku fa ka Kriste. d Mabandla lawa a ma ni internet ma tlhanganile hi ku tizrisa videoconferência, kambe lava a va nge na internet va yentxise ku yini? Ka matiko man’wana a xidzrimuxo xi haxiwe ka radiyo ni ka televhizawu. Handle ka leswo, a mabetele ma gravari wukaneli bya xidzrimuxo hi tindzrimi leti tlulaka 500. Kutani vamakwezru va teki magravhasawu lawo va ma yisa lomu a ma vileleka kone, lakakuva nambi lava a va tsrhama tintlhaveni va swi kotile ku hlalela xidzrimuxo.

15. U dondzre yini ka mfambu wa Sue?

 ¹⁵ Ku kanetiwa hi maxaka. Swin’wana leswi yentxaka kuva vhanu van’wana swi va kazratela ku hlalela xidzrimuxo i ku kanetiwa hi maxaka. Vona xikombiso xa mun’we lwa dondzreliwaka Bibele lwa vitaniwaka Sue. Na ku kiyela siku akuva ku hambiwa xidzrimuxo xa 2021, Sue a byele lwe a a mu dondzrela Bibele leswaku a a nga ti swi kota ku hlalela xidzrimuxo hi kola ka ku kanetiwa hi maxaka. Kutani mudondzrisi wake a mu dondzrele Luka 22:44 a va a mu tlhamuxela leswaku loko hi kumana ni swikazratu hi fanela ku yetisela xikombiso xa Yesu. Minkama hinkwayu Yesu a a khongota a va a tsrhika hinkwaswu a mavokweni ya Yehovha. Hi siku ledzri landzreliki, Sue a swi kotile ku kuma pawu ni vhinyu ni ku hlalela wugandzreli bya nimixo bya ku hlawuleka ka jw.org. A madambyeni na a li wuswake a kwartu, a swi kotile ku hlalela xidzrimuxo hi ku tizrisa telefone. Ntsrhaku ka leswo, Sue a tsralele mudondzrisi wake a ku: “Leswi u ni byeliki swone tolo swi ni kutxe ngopfu. Ni yentxe hinkwaswu akuva ni hlalela xidzrimuxo nakone Yehovha a ni pfunile. Ni nyonxe ngopfu lakakuva ni pfumala ni mazritu ya ku tlangela Yehovha hi leswi a ni yentxeliki swone!” Xana wa swi dumba leswaku Yehovha a nga ku pfuna loko wo kumana ni xiyimu lexi fanaka?

16. Hi ku ya hi Ba-le-Roma 8:31, 32, ha yini hi nga tiyisekaka leswaku Yehovha a ta tovokisa ku tikazrata kwezru ka ku hlalela xidzrimuxo?

¹⁶ Yehovha a ku nyika lisima ku tikazrata loku hi ku yentxaka akuva hi hlalela xidzrimuxo xa lifu dzra Yesu Kriste. Hi nga tiyiseka leswaku Yehovha awa hi tovokisa loko hi kombisa leswaku ha swi tlangela hinkwaswu leswi a hi yentxelaka swone. (Dondzra Ba-le-Roma 8:31, 32.) Xileswo, ingiki hi nga tiyimisela kuva hi hlalela xidzrimuxo xa lembe ledzri ni kuva hi yentxa hinkwaswu leswi hi nga swi kotaka akuva hi hlengela ka mintizro ya moya leyi yentxiwaka hi nguva leyi ya ku hlawuleka ya xidzrimuxo.