1-2. Bulya gurhi rhuja oku ntimanano y’Okukengera olufû lwa Yezu ngasi mwaka?

 HAMAGERA myaka hofi 2 000 Yezu ahânyire obuzine bwage erhi rhwe rhurhuma, n’omu kujira ntyo arhuyigulira enjira y’okuba n’obuzine bw’ensiku n’amango. Omu budufu bw’embere z’okufâ kwage, Yezu arhegeka abanafunzi bage oku bakakengera eco cijiro cage c’obuzigire omu kujira ishega lirhahûnyiri bintu binji lihiziremwo omugati n’idivayi.​—1 Kr. 11:23-26.

² Rhunarhumikire er’irhegeko lya Yezu bulya rhuba rhumuzigire bwenene. (Yn. 14:15) Ngasi mwaka, omu migobe y’embere n’enyuma z’olusiku lw’Okukengera olufû lwa Yezu, rhunayerekane oku rhuvuzire omunkwa kw’ebi Yezu arhujirire omu kuciha akasanzi k’okusalira n’okurhanya bwenene oku bunguke olufû lwage lurhulerhera. Kandi rhunashagalukire okujira binji omu mukolo gw’amahubiri lyo rhulalika bantu banji nk’oku binahashikine bacilunge haguma na nirhu kw’eyo ntimanano yago-yago. Na kandi, rhunahige okurhaleka akantu koshi-koshi karhume rhurhaja oku ntimanano y’Okukengera olufû lwa Yezu.

3. Bici rhwaganirira mw’eci cigabi?

³ Mw’eci cigabi, rhwaganirira njira isharhu abakozi ba Yehova bajijiremwo okwabo koshi lyo bakengera olufû lwa Yezu: (1) omu kukakengera olufû lwa Yezu omu njira ayigirizagya oku lukakengerwamwo, (2) omu kulalika abandi bayishe aha Kukengera olufû lwa Yezu, na (3) omu kukengera olufû lwa Yezu ciru akaba rhuli omu kanga kazibu.

4. Nyigirizo zihi ziganirirwa ngasi mwaka oku ntimanano y’Okukengera olufû lwa Yezu, na bulya gurhi rhurhashinganini rhukabona nk’ezo nyigirizo zirhali za bulagirire? (Luka 22:19, 20)

⁴ Ngasi mwaka oku ntimanano y’Okukengera olufû lwa Yezu, rhunayumvirhize ehotuba eyimangire oku Bibliya ehâna amashuzo g’obwalagale oku madoso manji. Rhunayige bulya gurhi bene bantu balagirire oku ngombôlo na gurhi olufû lwa muntu muguma yene lwakalyula ebyaha by’abantu banji. Rhunakengezibwe ebi omugati n’idivayi bishushanyize na bandi bashinganine okulya omugati n’okunywa idivayi. (Osome Luka 22:19, 20.) Kandi rhunarhanye bwenene oku migisho abashagalukira obulangalire bw’okulama hanw’igulu bayish’iba nayo omu mango gayisha. (Iz. 35:5, 6; 65:17, 21-23) Rhurhashinganini rhukabona nk’ezo nyigirizo zirhali za bulagirire. Bantu banji bwenene barhaba bahugûsirwe ezo nyigirizo barhanahugûkwa kunganaci enterekêro Yezu ahânaga eba ya ngulo ndarhi bwenene. Na kandi barhakengera olufû lwa Yezu nk’oku yene ayigirizagya abanafunzi bage bakalukengera. Bulya gurhi?

5. Enyuma z’okufâ kw’entumwa nyinji za Yezu, gurhi abantu barhondire okukengera olufû lwa Yezu?

⁵ Kasanzi kasungunu enyuma z’okufâ kw’entumwa nyinji za Yezu, Abakristu b’obunywesi baja omu cigamba c’Ecikristu. (Mt. 13:24-27, 37-39) Bakayigiriza ‘ebibi mpu lyo babona abaganda babashimba.’ (Ebj. 20:29, 30) Kantu kaguma omu bintu “bibi” abo Bakristu b’obunywesi bahikire aha barhondera okuyigiriza kwali kuderha oku Kristu arhahânaga omubiri gwage “nterekêro liguma lyône mpu azaze ebyaha bya bantu banji,” nk’oku Ebibliya enadesire, cikone bakayigiriza oku enterekêro yage egwasirwe ekahânwa kanji-kanji. (Hb. 9:27, 28) Ene, bantu banji baba bayemire ezo nyigirizo z’obunywesi. Banarhimanane omu makanisa gabo ngasi mugobe, ciru hali n’amango bajira ntyo ngasi lusiku, lyo bakengera enterekêro ya Yezu ehamagalwa omu Katolika “Nterekêro y’Emisa.” b Abandi bantu b’omu gandi madîni barhakengera olufû lwa Yezu kanji-kanji, cikone bantu banji ba mw’ago madîni barhaba bahugûsirwe bwinja ebi enterekêro ya Yezu yahikirizize. Bantu baguma na baguma banacidosa ntya: ‘Ka kobinali olufû lwa Yezu lwanarhuma ebyaha byani byababalirwa?’ Bici birhuma badosa er’idoso? Omu njira ndebe, banashumibwe n’entanya z’abantu baderha oku enterekêro ya Yezu erhakarhuma ebyaha birhu byababalirwa. Gurhi abanafunzi b’okuli ba Yezu barhabiremwo abantu bahugûkwe obunguke bw’olufû lwa Yezu n’enjira nyinja y’okulukengera?

6. Omu mwaka gwa 1872, bici ecigusho c’Abanafunzi b’Ebibliya cahugûsirwe?

⁶ Oku buzinda bw’emyaka egarhi ka 1801 na 1900, ecigusho c’Abanafunzi b’Ebibliya cakag’ilongozibwa na Charles Taze Russell carhondera okuyiga Amandiko kwa buzibu-zibu. Bal’ilonzize bamanye okuli lugenda obunguke bw’enterekêro ya Yezu na gurhi olufû lwage lushinganine lukakengerwa. Omu mwaka gwa 1872, bahikira aha bahugûkwa kugerera Ebibliya oku kobinali Yezu ahânyire engombôlo ly’acungula abantu boshi. Barhafulikaga abandi bantu ezo nyigirizo. Lubero n’oko, bazimanyisa abandi kugerera ebitabu, amajurnale, n’amagazeti. Na buzira kulegama, omu kuyiga olwiganyo lw’Abakristu b’omu myaka igana mirhanzi, barhondera okurhimanana liguma lyone omu mwaka lyo bakengera olufû lwa Yezu.

7. Gurhi rhuli rhwayunguka n’obusagasi Abanafunzi b’Ebibliya bajiraga omu myaka yageraga?

⁷ Ene, rhuli rhwayunguka n’obusagasi abo Bakristu b’emirhima minja bajiraga hamagera myaka minji. Omu njira nci? Kugerera emigisho ya Yehova, rhwahugûsirwe okuli lugenda enterekêro ya Yezu n’ebi eri yahikiriza. (1 Yn. 2:1, 2) Kandi  rhwayizire oku hali malangalire abirhi Ebibliya ehîre abantu bashagalusa Nnâmahanga: baguma bahabwa obuzine burhakacifâ empingu n’emiliyoni y’abandi bantu bahabwa obuzine bw’ensiku n’amango hanw’igulu. Rhunayegere Yehova bwenene erhi rhurhanya gurhi aba arhuzigire bwenene na gurhi ngasi muntu ayunguka n’enterekêro Yezu ahânaga. (1 Pt. 3:18; 1 Yn. 4:9) Co cirhuma, ak’abirhu bemezi b’omu mango ga mîra, rhunalalike abandi bantu bacilunge haguma na nirhu omu kukengera olufû lwa Yezu omu njira ayigirizagya abanafunzi bage bakalukengeramwo.

8. Bici abakozi ba Yehova bajijire lyo balalika abandi bantu oku ntimanano y’Okukengera olufû lwa Yezu? (Olole enfoto.)

⁸ Hakola hali myaka minji abakozi ba Yehova bali balalika abandi bantu bayishe oku ntimanano y’Okukengera olufû lwa Yezu. Omu mwaka gwa 1881, bene wirhu na bali birhu b’omu États-Unis bahûnwa oku barhimanane omu nyumpa ya mwene wirhu muguma omu Allegheny, Pennsylvanie, kw’eyo ntimanano yago-yago. Enyuma z’aho, entimanano y’Okukengera olufû lwa Yezu yakajirwa omu ngasi cigamba. Omu Mwezi gwa 3, 1940, abahubiri babwirwa oku banalalika ngasi muntu w’omu eneo yabo osimisibwe. Omu mwaka gwa 1960, e Beteli yarhumira oburhangiriza ebigamba emilali y’akaratasi y’okulalika abantu oku ntimanano y’Okukengera olufû lwa Yezu. Kurhangira ago mango, emiliyoni y’emilali yagabirwe omw’igulu lyoshi. Bulya gurhi rhukolesa kasanzi kanji na bushiru bunji lyo rhulalika abandi?

9-10. Bandi bayunguka n’obushiru rhujira lyo rhulalika abantu oku ntimanano y’Okukengera olufû lwa Yezu? (Yowane 3:16)

⁹ Ecirhumire cirhanzi cirhushumya rhulalike abandi bantu bayishe rhukengere haguma olufû  lwa Yezu kuli kuba rhuba rhulonzize abayishire oburhangiriza oku ntimanano y’Okukegera olufû lwa Yezu bayige okuli lugenda ebi Yehova na Yezu barhujirire rhweshi. (Osome Yowane 3:16.) Rhuba rhulangalire oku ebi babona n’okuyumva kw’eyo ntimanano byabashumya balonze okumanya binji n’okuba bakozi ba Yehova. Cikone hali abandi bayunguka.

¹⁰ Kandi rhunalalike abantu balesire omukolo gw’amahubiri. Rhunajire ntyo lyo rhubakengeza oku Nnâmahanga aciba abazigire. Banji banashuze oku mulali gwirhu rhunanashagaluke bwenene okubabona. Okuja oku ntimanano y’Okukengera olufû lwa Yezu kunabakengeze gurhi bal’ishagalukire okukolera Yehova omu mango gageraga. Rhuganirire olwiganyo lwa Monica. c Acib’irhondera okuhubiri omu mango g’obulwala bw’okuyahukira bw’e COVID-19. Enyuma z’okuyisha oku ntimanano y’Okukengera olufû lwa Yezu omu mwaka gwa 2021, aderha ntya: “Eyi ntimanano y’Okukengera olufû lwa Yezu yali yago-yago kuli nie. Nacib’iba n’obushiru bw’okuhubiri n’okulalika abandi oku ntimanano y’Okukengera olufû lwa Yezu enyuma za myaka 20 kurhenga amango nalekaga okujira ntyo. Najijire ntyo n’obushiru bunji bulya mvuzire omunkwa bwenene kw’ebi Yehova na Yezu banjirire.” (Enna. 103:1-4) Ciru abantu bakayemera omulali gwirhu erhi bagulahire, rhunalalike abandi n’obushiru bunji oku ntimanano y’Okukengera olufû lwa Yezu, bulya rhuba rhumanyire oku Yehova anashagalukire obushiru bwirhu.

11. Gurhi Yehova agishamwo obushiru rhujira bw’okulalika abantu oku ntimanano y’Okukengera olufû lwa Yezu? (Hageyo 2:7)

¹¹ Yehova anagishe bwenene obushiru rhujira lyo rhulalika abantu oku ntimanano y’Okukengera olufû lwa Yezu. Omu mwaka gwa 2021, ciru akaba hali ebihanzo enyanya z’obulwala bw’okuyahukira bw’e COVID-19, bantu 21367603 bo bali oku ntimanano y’Okukengera olufû lwa Yezu. Ogo mubalè gulushire hofi kabirhi n’enusu omubalè gw’Abahamirizi ba Yehova omw’igulu lyoshi! Kobinali, arhali ogo mubalè gw’abantu gone go gushagalusa Yehova. Anashagalukire ngasi muntu oyishire oku ntimanano y’Okukengera olufû lwa Yezu. (Lk. 15:7; 1 Tm. 2:3, 4) Rhuyemire n’obwalagale oku Yehova anakolese omukolo gwirhu gw’okulalika abantu ly’arhurhabala rhubone abantu bagwerhe omurhima mwinja.​—Osome Hageyo 2:7.

12. Kanga kahi kakarhuma kwaba kuzibu kuli rhwe okukengera olufû lwa Yezu? (Olole enfoto.)

¹² Yezu alebire oku omu nsiku nzinda, rhwakahikirwe n’amazibu madarhi ga ngasi lubero: okuhagalikwa n’abantu b’omu mulala gwirhu, okulibuzibwa, amavita, endwala z’okuyahukira, n’agandi mazibu manji. (Mt. 10:36; Mk. 13:9; Lk. 21:10, 11) Hali amango ago mazibu garhuma kwaba kuzibu kuli rhwe okukengera olufû lwa Yezu. Gurhi bene wirhu na bali birhu bajijire lyo bahima amazibu ga ntyo na gurhi Yehova abarhabiremwo?

13. Gurhi Yehova agishiremwo omuhigo n’oburhwali bwa Artem bw’okukengera olufû lwa Yezu ciru akaba ali omu prizo?

¹³ Okushwekwa. Bene wirhu na bali birhu bali omu prizo erhi buyemere bwabo burhuma banajire okwabo koshi lyo bakengera olufû lwa Yezu. Rhuganirire olwiganyo lwa Artem. Omu migobe y’embere n’enyuma z’olusiku lw’Okukengera olufû lwa Yezu omu mwaka gwa 2020, ali omu prizo ya metre 17 oku 17 yalimwo bashwekwa barhanu oku liguma. Ciru akaba ali omu prizo, ahashire okupata bintu bilebe by’okukolesa nka mugati n’idivayi, anapanga okujira ehotuba y’Okukengera olufû lwa Yezu oku bunguke  bwage yenene. Cikone ababo bashwekwa bali omu cumpa ciguma naye bakag’inywa irhabi n’okuderha enderho mbi bwenene. Gurhigi ajijire? Abahûna baleke okuderha ezo nderho mbi n’okunywa irhabi ciru omu nsa nguma yone. Artem asomerwa erhi ababo bashwekwa baleka okunywa irhabi n’okuderha enderho mbi omu kasanzi k’Okukengera olufû lwa Yezu. Adesire ntya: “Nabalaganya oku nababwira lugenda Okukengera olufû lwa Yezu.” Ciru akaba barhanzir’iderha oku barhalonzizi bayumve lugenda oko, enyuma z’okubona n’okuyumva gurhi Artem akengire olufû lwa Yezu, bamuhûna abahugûlire byoshi lugenda oko.

14. Bushiru buci abantu ba Yehova bajijire lyo bakengera olufû lwa Yezu ciru akaba hali obulwala bw’okuyahukira bw’e COVID-19?

¹⁴ Obulwala bw’okuyahukira bw’e COVID-19. Enyanya z’obulwala bw’okuyahukira bw’e COVID-19, Abahamirizi ba Yehova barhakacihashire okujira entimanano y’Okukengera olufû lwa Yezu busu oku busu. Cikone oko kurhabahanzagya okukengera olufû lwa Yezu. d Ebigamba byagwerhe obuhashe bw’okukolesa e Enternete byakajira eyo ntimanano kugerera e vidéoconférence. Cikone abandi bantu banji bwenene barhajira  obuhashe bw’okukolesa e Enternete gurhi bajijire? Omu bihugo biguma na biguma, emipango yarhôzirwe lyo bakulikira eyo hotuba oku televizyo erhi oku radiyo. Na kandi, ba arejistré eyo hotuba omu mabiro g’etawi omu ndimi zilushire 500 lyo bene wirhu na bali birhu bahasha okukengera olufû lwa Yezu ciru na mw’ago maeneo ga kuli bwenene. Na kandi bene wirhu b’obuyemere bakajira emipango y’okuhêkera bene wirhu na bali birhu ezo arejistrema omu maeneo bal’izilagirireko.

15. Bici olwiganyo lw’omwanafunzi w’Ebibliya ohamagalwa Sue lukuyigirizize?

¹⁵ Okuhagalikwa n’abantu b’omu mulala. Kuli bantu baguma na baguma, akanga kazibu kakarhuma barhakengera olufû lwa Yezu kuli kuhagalikwa n’abantu b’omu mulala gwabo. Rhuganirire olwiganyo lwa mwanafunzi muguma w’Ebibliya ohamagalwa Sue. Omu mwaka gwa 2021, olusiku lw’embere z’Okukengera olufû lwa Yezu, Sue abwira mwalimu wage w’Ebibliya oku enyanya z’okuhagalikwa n’abantu b’omu mulala gwage, arhahashe okuba aha Kukengera olufû lwa Yezu. Mwalimu wage w’Ebibliya amusomera olwandiko lwa Luka 22:44. Buzinda amuhugûlira oku, omu mango rhuli rhwarhimanana n’amazibu, rhushinganine rhuyige olwiganyo lwa Yezu omu kuhûna Yehova oburhabale kugerera isala n’okumulangalira loshi-loshi. Olusiku lwakulikiraga, Sue arheganya omugati n’idivayi analola eprograme yago-yago y’Enterekêro y’Esezi oku jw.org. Mw’olo lusiku bijingo, erhi ali yene omu cumpa cage, acilunga kugerera etelefone yage oku ntimanano y’Okukengera olufû lwa Yezu. Buzinda, Sue ayandikira mwalimu wage w’Ebibliya ntya: “Injo wampîre omurhima bwenene. Najijire okwani koshi lyo mba oku ntimanano y’Okukengera olufû lwa Yezu, na Yehova antabire kobinali. Ntakahash’ihugûla kunganaci mvuzire omunkwa na kunganaci nshagalusire!” K’orhanyize oku nawe Yehova anakurhabala erhi wakaba oli omu kanga ka ntyo?

16. Bulya gurhi rhwakayemera n’obwalagale oku Yehova agisha obushiru rhwajira lyo rhuja oku ntimanano y’Okukengera olufû lwa Yezu? (Abaroma 8:31, 32)

¹⁶ Yehova anashagalukire bwenene obushiru rhujira lyo rhukengera olufû lwa Yezu. Rhwanayemera n’obwalagale oku arhugisha erhi rhwakayerekana oku rhuvuzire omunkwa kw’ebi arhujirire. (Osome Abaroma 8:31, 32.) Lekagi rhuhige okuja oku ntimanano y’Okukengera olufû lwa Yezu mw’ogu mwaka n’okujira okwirhu koshi lyo rhuyushula obushiru bwirhu omu mikolo y’ekiroho omu migobe y’embere n’enyuma z’olusiku lw’Okukengera olufû lwa Yezu.