1-2. Manino tsika ro manatriky Fahatiarova santao?

 NANOME ty ainy ho antsika Jesosy fa ho 2 000 tao lasa zay, mba hahafahantsika mahazo fiaina mandrakizay. Tamy haly talohani-nahafatesani-Jesosy iny, le nandidy ty mpanori-dia azy ie mba hanao fankalazà tsotra ho fahatiarova ty fitiava nasehony. Misy mofo noho divay ampiasà amy fankalazà io.​—1 Kor. 11:23-26.

² Manoriky ani-didini-Jesosy iny tsika satria tena tea azy. (Jaona 14:15) Saky vanim-potoani-Fahatiarova, le asehontsika hoe ankasitrahantsika ty raha nataoni-Jesosy ho antsika. Manao ani-zay tsika lafa mivavaky noho mametsivetsy ty antony nahafaty ani-Jesosy. Falifaly koa tsika mampitombo ty fanompoantsika, le manasa olo farani-ze maro mba hiaraky amintsika amy fotoa miavaky io. Mazava ho azy fa tapa-kevitsy tsika hoe tsy misy ndre ino ndre ino hengantsika hisaka antsika tsy hanatriky Fahatiarova.

3. Ino ty hodinihintsika amy lahatsoratsy toy ato?

³ Tena niezaky ty vahoakini-Jehovah mba hahafahan-drozy mankalaza ty nahafatesani-Jesosy. Handiniky fomba telo anaovan-drozy ani-zay tsika amy lahatsoratsy toy ato: 1) Manaraky ty modely nameani-Jesosy rozy, 2) manasa olo hanatriky Fahatiarova, le 3) manatriky Fahatiarova avao ndre miatriky raha sarotsy.

4. Ino ty fanontanea voavaly amy Fahatiarova, le manino ro tokony ho vatan-draha amintsika ty valini-fanontanea reo? (Lioka 22:19, 20)

⁴ Saky Fahatiarova, le mijanjy lahateny ara-baiboly tsika. Misy fanontanea maro voavaly amy lahateny io. Ampianary antsika hoe manino ty olombelo ro mila vilim-panavota, le manino ty nahafatesani-lahilahy raiky ro mahavita manafaky ty fahotàn’olo maro. Ampitiarovy antsika hoe ino ty dikani-mofo noho divay rey, le ia ty tokony hihina noho hino amy raha rey. (Vakio Lioka 22:19, 20.) Amy fotoa io koa tsika mametsivetsy ty fitahia ho azon’olo mitamà hiay mandrakizay an-tany etoy amy hoavy. (Isaia 35:5, 6; 65:17, 21-23) Tokony ho vatan-draha amintsika fahamarina reo. Olo an-tapitrisany ro tsy mahay ani-raha reo, sady tsy hain-drozy ty maha lafovily ty soro nataoni-Jesosy. Tsy manahaky ty modely nameani-Jesosy koa ty fomba ankalazan-drozy ty Fahatiarova. Fa manino?

5. Lafa nimaty ty ankamaroani-apostoly rey, nanao akory ty fomba nankalazan’olo ty fahatiarova ty nahafatesani-Jesosy?

⁵ Tsiela tafarani-nahafaty ty ankamaroani-apostolini-Jesosy, le nanomboky nisy Kristiana sandoky tanivoni-fiangona eo. (Mat. 13:24-27, 37-39) ‘Nampianatsy raha diso rozy mba hitaoma ty mpianatsy hanaraky an-drozy.’ (Asa. 20:29, 30) Raiky amy “raha diso” nampianarini-Kristiana sandoky reo, ohatsy, ty hoe tsy nanome ty vatany “indraiky mandeha avao” Jesosy “mba handay ty fahotan’olo maro”, fa tsy maintsy ampolimpoly soro nataony io. (Heb. 9:27, 28) Maro henanizao ty olo mino ani-fampianaran-diso io. Mandeha mivavaky rozy sankerinandro, le misy aza fa ho sanandro mihintsy, mba hankalazà ty soro nataoni-Jesosy. “Lamesa” ty ikaihani-Katoliky ani-raha io. b Mankalaza matetiky ty nahafatesani-Jesosy ty fivavaha sisany, fe tsy hain-drozy hoe ino ty dikani-soro nataoni-Jesosy iny. Mety hieritseritsy ty olo sisany hoe: ‘Tena afaky manafaky ty fahotako vatany va ty nahafatesani-Jesosy?’ Manino rozy ro mieritseritsy ani-zay? Satria nisy nandresy lahatsy rozy hoe tsy mahavita manafaky fahotà ty nahafatesani-Jesosy. Akory ty nataoni-mpanori-dia ani-Jesosy mba hanampea olo hahay hoe ino ty dikani-soroni-Jesosy iny, le akory ty tokony hankalazà ty nahafatesany?

6. Ino ty raha nihaini-Mpianatsy Baiboly tamy tao 1872?

⁶ Tamy tao 1870, le nanomboky nianatsy soa ty Soratsy Masy ty Mpianatsy Baiboly nitarihini-Charles Russell. Tean-drozy ho hay hoe ino marina ty tena dikani-soro nataoni-Jesosy iny, le akory ty tokony hankalazà ty fahatiarova ty nahafatesany. Tamy tao 1872, le nanjary nihain-drozy hoe nanome ty ainy ho vilim-panavota ho an’olo iaby Jesosy. Tsy nitanjahin-drozy ho an-drozy avao raha nihain-drozy zay. Vomaiky aza nataon-drozy ze hahaizan’olo ani-raha iny, ka nampiasa boky noho gazety rozy. Tsiela tafarani-zay, le nanomboky niaraky nivory rozy santao mba hankalaza Fahatiarova, satria ta hanahaky ani-Kristiana tamy taonjato voalohany rey.

7. Manino ro mahasoa antsika ty raha nianarani-Mpianatsy Baiboly taloha tany rey?

⁷ Mbo mahasoa antsika henanizao ty raha nianarani-Kristiana reo, ndre fa tao maro lasa aza. Amy fomba akory? Nampeani-Jehovah tsika ka lasa haintsika hoe ino ty dikani-soro nataoni-Jesosy iny, le ino ty soa ho azontsika baka amy raha zay. (1 Jaona 2:1, 2)  Nianarantsika koa fa miresaky fampitamana roe ho ani-ze olombelo manao raha mahafalifaly a Ndranahary ty Baiboly. Tsy ino zay fa ty hoe ho velo mandrakizay an-danitsy any ty olo sisany, fa ty ankamaroany hiay mandrakizay an-tany eto. Lasa ta hifandramby marìny amy Jehovah tsika lafa mandiniky ty fitiavany antsika noho ty raha soa maro ho azontsika baka amy soro nataoni-Jesosy. (1 Pet. 3:18; 1 Jaona 4:9) Ka mba hanahafantsika ani-rahalahintsika taloha tany rey, le manasa olo tsika mba hiaraky amintsika hankalaza ty Fahatiarova, mifanaraky amy modely nameani-Jesosy iny.

8. Ino ty nataoni-vahoakini-Jehovah mba hanasà olo hanatriky Fahatiarova? (Henteo sary io.)

⁸ Fa ela ty vahoakini-Jehovah ro nanasa olo hanatriky Fahatiarova. Tamy voalohandohani-tao 1881, le nisy fampandrenesa tamy Tilikambo Fiambena hoe tokony hiaraky hanatriky Fahatiarova ty rahalahy noho anabavy ta Etazinỳ any. Natao tamy tranoni-rahalahy raiky ta Allegheny, a Pennsylvania any raha io tamy zay. Tafarani-zay le samby nanao ty azy ty fiangona kiraidraiky. Tamy Marsa 1940, le nampirisihy ty mpitory hoe afaky manasa olo ta hanatriky Fahatiarova amy faritanin-drozy eny rozy. Tamy 1960, le nanomboky nanao printy fanasà ty Betela mba halefa amy fiangona. Nanomboky teo le fanasà an-tapitrisany ro nizarà. Fa manino tsika ro miasa mafy mba hanasà olo?

9-10. Ia ty mandramby soa amy ezaky ataontsika mba hanasà olo hanatriky Fahatiarova? (Jaona 3:16)

⁹ Ino ty antony raiky mahavy antsika manasa olo hanatriky Fahatiarova? Satria teantsika laha mianatsy mikasiky ty raha nataoni-Jehovah  noho Jesosy ho antsika olombelo ty olo vo sambany manatriky Fahatiarova. (Vakio Jaona 3:16.) Mitamà tsika fa hanosiky an-drozy hianatsy raha maro mikasiky ani-Jehovah noho hanompo azy ty raha hitan-drozy noho ren-drozy amy Fahatiarova any. Ia koa ty mandramby soa?

¹⁰ Asàntsika koa azy fa tsy nanompo ani-Jehovah sasy rey. Ampitiarovintsika an-drozy hoe mbo tea an-drozy Ndranahary. Maro ty olo maneky lafa asàntsika, le falifaly biby tsika mahita an-drozy. Lafa manatriky Fahatiarova rozy, le lasa tiaron-drozy ndraiky hoe tena nifalifaly biby rozy taloha, tamin-drozy mbo nanompo ani-Jehovah. Diniho moa ty ohatsini-Monica. c Nanomboky nitory ndraiky ie tanatini-arety mandripaky COVID-19 iny. Hoy ty asany lafa ie baka nanatriky Fahatiarova tamy 2021 iny: “Tena natao ho ahy mihintsy Fahatiarova iny. Zay ndraiky aho vo mba nitory noho nanasa olo hanatriky Fahatiarova, tanatini-20 tao zay. Nanao ze azoko natao aho mba hanasà olo satria tena ankasitrahako ty raha nataoni-Jehovah noho Jesosy ho ahy.” (Sal. 103:1-4) Ndre maneky ty olo asàntsika ndre tsy maneky, le manao ze fara herintsika avao tsika mba hanasà olo hanatriky Fahatiarova. Haintsika hoe tena ankasitrahani-Jehovah ty ezaky ataontsika.

11. Ino ty ataoni-Jehovah mba hitahia ty ezaky ataontsika hanasà olo amy Fahatiarova? (Hagay 2:7)

¹¹ Tena tahini-Jehovah ty ezaky ataontsika mba hanasà olo hanatriky Fahatiarova. Tamy 2021 iny, ohatsy, le nahatratsy 21 367 603 ty isakin’olo nanatriky Fahatiarova, ndre teo arety mandripaky COVID-19 iny. Laha hentea raha zay le fa indroe noho tampany mahery amy ty isakini-Vavolombeloni-Jehovah amy tany toy! Mazava ho azy fa tsy isakin’olo nanatriky Fahatiarova rey avao ro tena vatan-draha amy Jehovah fa ty olo kiraidraiky mihintsy. (Lioka 15:7; 1 Tim. 2:3, 4) Afaky matoky tsika fa lafa tsika mizara fanasà, le manampy antsika Jehovah mba hahita ani-ze olo mana fo soa.​—Vakio Hagay 2:7.

12. Manino ro mety ho sarotsy amintsika ty mankalaza Fahatiarova? (Henteo sary io.)

¹² Fa nivola Jesosy hoe amy andro farany, le hiatriky raha sarotsy sankarazany tsika, anatini-zay ty fanoherani-fianakavia, fanenjeha, aly, mosary, noho ty maro hafa. (Mat. 10:36; Mar. 13:9; Lioka 21:10, 11) Lasa sarotsy amintsika amy zay kindraiky ty mankalaza ty nahafatesani-Jesosy vokatsini-raha reo. Ino ty nataoni-rahalahy noho anabavintsika mba handresea raha sarotsy manahaky ani-reo, le akory ty nanampeani-Jehovah an-drozy?

13. Nibe herim-po Artem ka nanapa-kevitsy hankalaza Fahatiarova avao ndre nigadra. Akory ty nitahiani-Jehovah ty ezaky nataony?

¹³ Hagadrà. Manao ze azon-drozy atao rahalahintsika gadra rey mba hankalazà ty nahafatesani-Jesosy. Diniho moa ty tantarani-Artem. Nigadrà ie tamy 2020 tamy vanim-potoani-Fahatiarova iny mihintsy. Napetraky tamy efitsy raiky mirefy 1m 83 zay tao ie, le nisy efatsy na limy rozy nigadrà tanatini-efitsy io tao. Ndre teo raha zay, le nampiasa ze raha nisy taminy teo avao ie mba hanaovany mofo noho divay, sady nieritseritsy hanao lahateny Fahatiarova ie mba hahasoa azy manoka. Fe nitroky sigara olo niharo efitsy aminy rey sady nitea zivaziva. Ino ty nataony? Nangataky amin-drozy ie hoe tsy no mba afaky tsy mitroky noho tsy manjivaziva tse rozy anatini-lera raiky. Nitseriky Artem fa naneky tsy hitroky na tsy hanjivaziva olo rey tamy  lerani-Fahatiarova iny. Hoy ty asany: “Nanararaotsy niresaky amin-drozy mikasiky ani-Fahatiarova iny aho.” Marina fa nivola rozy hoe tsy ta haharè resaky mikasiky ani-zay, fe lafa baka nahita noho nijanjy ani-Artem nankalaza Fahatiarova rozy, le nametraky fanontanea maro mikasiky ani-raha iny.

14. Ino ty ezaky nataoni-vahoakini-Jehovah mba hankalazà Fahatiarova ndre teo aza ty COVID-19?

¹⁴ Arety mandripaky COVID-19. Lafa niavy arety mandripaky io, le tsy afaky nanatriky Fahatiarova mivanta ty vahoakini-Jehovah. Fe tsy nahasaka an-drozy tsy hankalaza Fahatiarova raha zay. d Nampiasa Internet ty fiangona mba hanatreha Fahatiarova amy alalani-vidéoconférence. Fe nanao akory azy tsy afaky nampiasa Internet rey? Nanao fandahara ty biròni-sampana amy tany sisany, amy zay ty olo mba afaky manaraky lahateny amy tele na radio. Ankoatsini-zay, le nalàni-sampana feo amy fivolana 500 mahery lahateny iny, soa mba afaky mankalaza Fahatiarova iaby ndre ty olo mipetraky amy pilasy mitoka any. Le nanao fandahara koa ty rahalahy amy  fiangona eo nanatitsy ani-lahateny nalà feo rey tamy mpiara-manompo.

15. Ino ty ianaranao baka amy tantarani-mpianatsy Baiboly raiky mana anara hoe Sue?

¹⁵ Fanoherani-fianakavia. Tena sarotsy amin’olo sisany ty mankalaza Fahatiarova satria manohitsy azy ty fianakaviany. Diniho moa tantarani-mpianatsy Baiboly raiky toy. Sue ty anarany. Tamy 2021, le nivolaniny mpampianatsy Baiboly azy iny hoe tsy afaky hanatriky Fahatiarova ie satria manohitsy azy ty olo sisany an-tranon-drozy ao. Nivakini-mpampianatsy azy iny ty Lioka 22:44. Bakeo nihazavaniny taminy hoe lafa miatriky raha sarotsy tsika, le tokony hanaraky ty modelini-Jesosy ka hiantehitsy amy Jehovah amy vavaky noho hatòky tanteraky Azy. Hamarain’iny amy zay Sue, nanoma mofo noho divaini-Fahatiarova, le nanaraky ani-fandahara manoka Fotoam-pivavaha Maray iny tamy jw.org ao. Lafa niavy ty hariva, le nandeha amy efitsy firoroany ao ie ka nanaraky Fahatiarova tamy telefoniny iny. Nanoratsy tamy mpampianatsy Baiboly azy iny Sue tafarani-zay. Hoy ty asany: “Tena nampahery ahy mihintsy iha nomaly iny. Nanao ze azoko natao aho mba hanatreha Fahatiarova, le nanampy ahy Jehovah. Tsy hitako ty fomba hivolana ty hafaleako. Tena misaotsy ani-Jehovah aho!” Akory ty hevitsinao, hanampy anao koa va Jehovah lafa iha tojiky raha manahaky ani-zay?

16. Manino tsika ro matoky fa hotahini-Jehovah ty ezaky ataontsika mba hanatreha Fahatiarova? (Romanina 8:31, 32)

¹⁶ Tena lafovily amy Jehovah ty ezaky ataontsika mba hankalazà ty nahafatesani-Jesosy. Afaky matoky tsika fa hitahy antsika ie laha asehontsika hoe ankasitrahantsika ty raha nataony ho antsika. (Vakio Romanina 8:31, 32.) Loniky lahy tsika mba ho tapa-kevitsy hanatriky Fahatiarova amy tao toy sady hampitombo ty fanompoantsika amy vanim-potoani-Fahatiarova io.