1-2. Lamo ingelakaso lá Bokfɔ ɛnɔnyi enkfumɔ?

 AMBOHETA ɛnɔnyi nsuke la 2 000, wɛ Yeso ndapɛyɛ lowiko lɔnde lá wapɔ wɔso. Kɛsɔ ketodjipolaka mboka djɛ mba lowiko l’etshinda. L’otsho wɔ lá ntondo kɛ nyɔyi kɛnde, Yeso ashimelaka ambeki wande dj’iwɔ mvungɔka enanghedji kɛnde kɛ ngandji má nanghaka seremɔni kɛ wɔdju kɛlɔmbaka ngo mampa la vinyo.​—1 Kɔ. 11:23-26.

² Iso nɛmɛyɛka ɔlɛmbɛ wɔ Yeso ladjikɛnde iso ndɔkɔpaka efula. (Dj. 14:15) Ɛnɔnyi enkfumɔ l’eleko kɛ Bokfɔ, iso nyɛnyɛka djedjɛ djɛso tá kɛnɛ kɛ ndatonanghela má ndɔsa winá djɛ ntɔnɔlaka lá lɔlɔmbɔ kɛnɛ kɛ nyɔyi kɛ Yeso osakisolawɔ le anto. La djedjɛ nkfumɔ iso mfudjɛka olemo wɔso w’ipoposanyɛ, djɛ nkembɛ anto efula dj’iwɔ ndosanghana laso lá losanghanyɛ lɔ djonyi lɔsɔ. Edjinge lá nsɔsɔlɔ, iso ndɔsaka nkano dj’ipa ndjawola djɛ kaanga ekete kɛmɔ ntoshimba djɛ nsanghana lá Bokfɔ.

3. Kɛkɔnge k’ɔkɔpaso nshishima lá djamba djɛnɛ?

³ Lá djamba djɛnɛ, tongoshishima topo tosato tɔ enkambi wɛ Yehova onanghawɔ welo efula djɛ mvungɔ nyɔyi kɛ Yeso: 1) má nangha Bokfɔ lá nkilika djɔmbɔmba kɛ Yeso ndatshike, 2) má ndjetaka anto ankina lá Bokfɔ, la 3) má nanghaka Bokfɔ kaanga l’anteyi k’ekakasano.

4. Akambo wa nsɔsɔlɔ wakɔnge w’otosakisolawɔ lá Bokfɔ dj’ɔnɔnyi onkfumɔ, lamo sopakoke ndawombela akambo wasɔ ngo leso isɔmɛlɛ? (Luka 22:19, 20)

⁴ Lá Bokfɔ dj’ɔnɔnyi l’ɔnɔnyi, iso ndjekameyɛka djamba djemá Bible djɛpɛyɛ nsakiso y’okama papoo lá efula kɛ weepó wɛso. Iso ndjekaka lamo anto oyɛwɔ la djonyi dj’oshinga wɔ mbendo la wopo wɔ nyɔyi k’onto ɔmɔ okokawɔ ndjipisanyɛ evunga w’anto efula. Iwɔ ntovungolaka kɛnɛ kɛ mampa la vinyo osakisolawɔ edjinge anto wakoká ndɛ mampa la vinyo djɛkɔ. (Wala Luka 22:19, 20.) Edjinge iso ntɔnɔlaka lá ɛtshɔkɔ wekongela anto walekɔ la nkongi djɛ ndowika lá looko l’etsho weyaye. (Iza. 35:5, 6; 65:17, 21-23) Topakoke ndawombela akambo wa nsɔsɔlɔ wasɔ ngo leso isɔmɛlɛ. Miliyɔ y’anto watasipisoyɛ akambo wasɔ, edjinge wapasipisoyɛ wopo wɔ olambo wɔ Yeso oyɛwɔ la ntshina. Lonkina wapananghe Bokfɔ djɛ nyɔyi kɛnde lá nkilika ndjɔmbɔmba kɛ ndatshike. Lamo nghɔsɔ?

5. M’ɔkɔngɔ wɔ nyɔyi kɛ apɔstɔlɔ nsuke l’ankfumɔ, wopo wɔkɔnge anto yatateyɛ nangha Bokfɔ djɛ nyɔyi kɛ Yeso?

⁵ Atahetá ilá m’ɔkɔngɔ wɔ nyɔyi kɛ apɔstɔlɔ wa Yeso nsuke l’ankfumɔ, Akristo w’engolo w’ingelaka l’otshumano. (Mat. 13:24-27, 37-39) Iwɔ watepelaki ‘akambo wapalekɔ nsɔsɔlɔ djɛ ntshinda ambeki dj’iwɔ ndaakilika.’ (Ele. 20:29, 30) Nkambo mɔtshi l’anteyi kɛ ‘akambo wapalekɔ nsɔsɔlɔ’ w’Akristo w’engolo yatateyɛ ndakanyɛ nde ambɔ Yeso atalambola demba djɛnde ‘mbala kɛmɔ lotshinda djɛ mbɛmba mpekanto y’anto efula,’ etengo Bible otepelande, koko ambɔ olambo wɔnde ladjɛ mpɛyamaka mbala la mbala. (Heb. 9:27, 28) Lɔɔko kɛnɛ efula k’anto w’eloko wɔlɔ ndjawolaka olakanyelo w’ongolo wɔsɔ. Wangotshɔke mbala la mbala lá nkɛlɛsiya, mbala imɔtshi mfu inkfumɔ, djɛ ntovungɔ olambo wɔ Yeso wetawɔ l’ɛkɛlɛsiya k’ase mupɛlɔ ambɔ “misa kɛ Karizimu.” b Nkɛlɛsiya nkina wangonanghake Bokfɔ djɛ nyɔyi kɛ Yeso ngo lá payi, koko wapasipisoyɛ papoo kɛnɛ kɛ olambo wɔ Yeso osakisolawɔ. Amɔtshi nkoka ndawopola ambɔ: ‘Nyɔyi kɛ Yeso nsakisolaka nsɔsɔlɔ ente mpekato yɛmi nkoka nyimeyama?’ Lamo opolakawɔ woopó wɔsɔ? Mbala efula iwɔ ntshindamaka me anto wiilaka ehamo ambɔ olambo wɔ Yeso wopakoke nyimeyɛ mpekato yɛso. Wopo wɔkɔnge ambeki wa Yeso wa nsɔsɔlɔ okotshɛ́wɔ anto djɛ nsipisoyɛ nkambo djɛsɔ?

6. Tá 1872, kɛkɔnge kɛ iloyi imɔtshi y’ambeki wa Bible yasipisoyɛ?

⁶ Tá ekomo k’ɛtɛndɔ kɛ 19, iloyi y’ambeki wa Bible yɛlɔndjamaki me Charles Taze Russell wawangaka la wekelo wɔ lotshimola w’Afunelo. Iwɔ wakɔpaki ndjewa akambo wa nsɔsɔlɔ walendana la ntshina k’olambo wɔ Yeso, la wopo w’oyɛwɔ ladjɛ mvungɔ nyɔyi kɛnde. Tá 1872, iwɔ wasipisoyɛka olakanyelo wemá Bible wɛnyɛ djɛ Yeso avɔka djɛ mfuta oshinga wɔ mbendo lá nkambo dj’anto ankfumɔ. Iwɔ watawomba akambo w’iyisola wasɔ ngo lewɔ iyɔmɛlɛ. Koko, iwɔ wapoposanyɛka akambo wakɔ le anto má lotshimbo l’enkanda, lɔ tojurnalɛ, la lɔ wa periyodikɛ. Edjinge lako mpeta ilá, má nkilika ndjɔmbɔmba kɛ Akristo wal’ɛtɛndɔ kɛ ntondo, iwɔ watateyɛka nsanghana ngo mbala kɛmɔ l’ɔnɔnyi djɛ nangha Bokfɔ.

7. Wopo wɔkɔnge wowaso wapɔ má ehonelo wenanghisá ambeki wa Bible wa ntondo wasɔ?

⁷ Lɔɔko kɛnɛ iso mbaka wapɔ má ehonelo w’Akristo wa nsɔsɔlɔ wasɔ yananghe  amboheta ɛnɔnyi efula. Lá wopo wɔkɔnge? Yehova atokotshɛka djɛ nsipisoyɛ kɛnɛ k’olambo wɔ Yeso osakisolawɔ, edjinge kɛnɛ k’olambo wɔkɔ yongonangha lá nkambo dj’anto ankfumɔ. (1 Dj. 2:1, 2) Tekaka lonkina ente Bible mpɛyɛ anto wasasangɛ Ndjambe wepo epe wɛ nkongi. Le wamɔtshi, nkongi djɛ ndjala la lowiko lopavɔki l’olongo la le miliyɔ inkina y’anto, nkongi djɛ mbika lotshinda lotshinda lanɛ lá looko. Iso ndekaka ndasukanyɛ te Yehova winá w’ɔtɔnɔlaso l’efula kɛ ngandji k’otokande la wopo wɔ onto l’onto wɔ l’anteyi kɛso owande ɛtshɔkɔ efula má olambo wɔ Yeso. (1 Pɛ. 3:18; 1 Dj. 4:9) Djɛkondeke ngo ngete wananyɔ waso wa nkɔmano wal’etsho wɛ ntondo, iso ndjetaka anto ankina djɛ ndonangha laso Bokfɔ djɛ nyɔyi kɛ Yeso lá nkilika ndjɔmbɔmba kɛ ndatotshikela.

8. Kɛkɔnge kɛ enkambi wɛ Yehova onanghawɔ djɛ ndjeta anto ankina lá Bokfɔ? (Lenda ntshango.)

⁸ Amboyala ɛnɔnyi efula wɛ Ewakɛ wɛ Yehova etawɔ anto ankina djɛ ndonangha lawɔ Bokfɔ. Má bango djɛ 1881, wananyɔ l’ankaana yel’États-Unis wawaka leeta lɔ ndosanghana esanga lá mvulu kɛ wɔnanyɔ ɔmɔtshi welá Allegheny, lá Pennsylvanie lá mbamba kɛ djonyi kɛsɔ. M’ɔkɔngɔ, otshumano l’otshumano, watateyɛka nangha Bokfɔ iyɔmɛlɛ. Lá Ngɔndɔ k’asato 1940, washimelaka ansakodji djɛ iwɔ nkoka ndjeta onto onkfumɔ wolekɔ́ l’etatshi kɛwɔ kɛ looko wɛnyɛ mposɛ. Lá 1960, Betɛlɛ aposeyɛka ntshumano akishi wa leeta mbala kɛ ntondo. Ntateyɛ masɔ, Miliyara y’akishi wa leeta lɔ ta Bokfɔ, wakapanyemaka. Lamo ilaso welo w’efula wɛsɔ djɛ ndjeta anto ankina?

9-10. Anto wakɔna wawa wapɔ má welo w’ilaso djɛ ndjeta anto ankina lá Bokfɔ? (Djɔanɛ 3:16)

 ⁹ Elonga kɛmɔtshi k’etaso anto ankina djɛ ndosanghana laso lá Bokfɔ nde iso nkombolaka djɛ anto w’ingela mbala kɛ ntondo lá Bokfɔ ndjeka akambo wa nsɔsɔlɔ wa Yehova nya Yeso yatonanghela isankfumɔ. (Wala Djɔanɛ 3:16.) Tokanele ente, kɛnɛ k’ɛnawɔ la k’okawɔ lá Bokfɔ kengatshinda djɛ ndjeka akambo efula walendana la Yehova la nkoma enkambi wɛnde. Koko edjinge anto ankina lonkina mbaka wapɔ efula.

¹⁰ Iso ndjetaka lonkina anto wambotshikaka nkambela Yehova. Iso nanghaka nghɔsɔ djɛ ndavungola ente Ndjambe akindjɛ ngo ndaakɔpa. Efula ndjawolaka leeta lɔso, edjinge tongoyalake l’osasa efula djɛ ndawɛna. Nsanghana lá Bokfɔ ndavungolaka wopo w’iyakɔpaka nkambela Yehova efula l’etsho wɛ ntondo. Kolenda ndjɔmbɔmba kɛ Monica. c Nde akalɔka ndjala nsakodji l’onkina l’eleko kɛ COVID-19. M’ɔkɔngɔ wɔ nde ndjingela lá Bokfɔ djɛ ɔnɔnyi 2021, nde atepelaka ante: “Bokfɔ djɛnɛ djalaka djonyi efula le lemi. Mbala kɛ ntondo m’ɔkɔngɔ wɛ ɛnɔnyi 20, ndjalaka l’akoka wa mpoposanyɛ le anto ankina la ndaaweta lá Bokfɔ. Nanghaka kenkfumɔ kɛ makoke nangha djɛ ndjeta anto ankfumɔ ladjikɛnde ndekɔ la djedjɛ efula lá kɛnɛ kɛ Yehova nya Yeso yananghelá.” (Yee. 103:1-4) Ayale anto wawola leeta lɔso kana lako, iso ndjetaka anto ankina l’entete lá Bokfɔ ladjikɛnde iso ndjewaka ente Yehova nsasangaka la welo w’ilaso.

11. Wopo wɔkɔnge Yehova ɔtshɔkɔlande welo w’ilaso djɛ ndjeta anto lá Bokfɔ? (Angayi 2:7)

¹¹ Yehova atshɔkɔla lombombe welo w’ilaso djɛ ndjeta anto ankina lá Bokfɔ. Lá 2021, kaanga sayale l’elelo ɛmɔtshi m’opela wɔ COVID-19, tingelaka lá Bokfɔ anto 21 367 603. Lofulo lɔsɔ ndjingelaka lá lofulo l’Ewakɛ wɛ Yehova wel’andja w’otondo mbala ipe la ndambo! Lá nsɔsɔlɔ, Yehova apayakiyanyɛ lá lofulo l’anto w’ingela lá Bokfɔ. Nde ndjakiyanyɛka lá nkambo dj’onto ɔmɔ ɔmɔ w’ingela lá Bokfɔ. (Luka 15:7; 1 Ti. 2:3, 4) Tolekɔ l’eshikikelo ente winá wɔpɛyɛso anto akishi wa leeta Yehova ntokotshɛka djɛ ndjisola anto w’eloko wɔlɔ.—Wala Angayi 2:7.

12. Akambo wakɔna wakoka ntila l’okakasano djɛ nangha Bokfɔ? (Lenda ntshango.)

¹² Yeso atepelaka ante, l’etsho w’ekomo tongopomana la wepo enkfumɔ w’ekakasano, ndjɔmbɔmba, onanyelo me ase nkfumbo, lɔnyɔkɔ, ambandji, elando, la akambo ankina efula. (Mat. 10:36; Mar. 13:9; Luka 21:10, 11) Mbala la mbala akambo wasɔ ntilaka l’okakasano djɛ mvungɔ nyɔyi kɛ Yeso. Kɛkɔnge kɛ wananyɔ l’ankaana yɛso yananghe djɛ ndongela ekakasano etengo wɛsɔ, ko wopo wɔkɔnge Yehova ndaakotshɛ́?

13. Wopo wɔkɔnge Yehova ndatshɔkɔla oloko wolo la nkano djɛ Artem djɛ nangha Bokfɔ lá lokando?

¹³ Lokando. Wananyɔ waso walekɔ l’ankando m’ɔtɛ wɔ djawo djɛwɔ nanghaka kenkfumɔ k’okokawɔ nangha djɛ mvungɔ nyɔyi kɛ Yeso. Tokolenda ndjɔmbɔmba kɛ Artem. L’eleko kɛ Bokfɔ dj’ɔnɔnyi wɔ 2020, nde adjipamaka lá lokando l’ivuvulu yɛ mɛtrɛ kare 17 nde nya ampame inkina itano. Kaanga ndayale lá lokando, nde ayalaka l’akoka wa mba nkete mɔtshi djɛ ndakoke nkamba la djɛkɔ etengo mampa la vinyo edjinge nde alonghanyɛka djɛ mpɛyɛ djamba djɛ Bokfɔ lá wapɔ wɔnde nyɔmɛlɛ. Koko winande wayalaki lande  lá lokando wanɔki tokaya edjinge watolanaki efula. Kɛkɔnge kɛ ndananghe? Nde álɔmbaka ntsha wakoka ntshika nnɔ ikaya la ntolana ngo lá winá wɔ ntango ɔmɔ toko. Nkambo djekamoyisa Artem nde, winande welá lokando w’awolaka ntshika nnɔ ikaya la ntolana lá winá wɔ ndananghaka Bokfɔ. Artem ntepelaka ante: “Ntateyɛka ndashimela akambo walendana la Bokfɔ.” Kaanga yatepela ambɔ wapakɔpɛ ndjoka akambo wasɔ, m’ɔkɔngɔ w’iwɔ ndjoka la nyɛna wopo wɔ Artem ndananghaka lá Bokfɔ, iwɔ wowopolaka weepó efula lá nkambo djɛkɔ.

14. Welo wɛkɔnge wenanghemisá djɛ nangha Bokfɔ kaanga l’eleko k’opela wɔ COVID-19?

¹⁴ Opela wɔ COVID-19. Winá w’opela wɔnɛ yawange, enkambi wɛ Yehova watakoka nsanghana lá Bokfɔ elongi l’elongi. Koko kɛsɔ ketaashimbá djɛ nangha Bokfɔ. d Ntshumano djelekɔ lá djena djekoma ɛntɛrnɛtɛ wananghaka Bokfɔ má video kɔmfɛransɛ. Ko otepelaso mo lá nkambo djɛ miliyɔ y’anto yepalekɔ l’ɛntɛrnɛtɛ? L’ewila ɛmɔtshi nonghanyi y’ɔsamaka djɛ anto ndjekameyɛ djamba djɛ Bokfɔ má  televiziɔ kana má radio. Má djiko djɛlasɔ, filiyalɛ efula waranjistrɛka djamba djɛ Bokfɔ l’etepela ndekana 500 djɛ kaanga ewila welekɔ l’otale nangha bokfɔ. Edjinge wananyɔ wa nkɔmano walonghanyɛka djɛ mpɛyɛ odio wɔ djamba djɛsɔ le anto ankfumɔ walekɔ la djonyi.

15. Olakanyelo wɔkɔnge wɔ ngombowa má ndjɔmbɔmba k’ombeki wɔ Bible w’etawɔ Sue?

¹⁵ Onanyelo wime ase nkfumbo. Le amɔtshi, okakasano woleka ekekete djɛ nangha Bokfɔ nde onanyelo wime ase nkfumbo. Tokolenda ndjɔmbɔmba kɛ ombeki wɔ Bible ɔmɔtshi w’etawɔ Sue. Lá 2021, lá ntondo kɛ Bokfɔ, Sue ashimelaka wetsha wɔnde wɔ Bible ante, ladjikɛnde ase nkfumbo kɛnde wonanyɛ nde apangoyala l’akoka wa nsanghana lá Bokfɔ. Wetsha wɔnde wɔ Bible owalelaka Luka 22:44. Masɔ, nde osipisoyɛka ante winá w’opomanaso l’ekakasano, iso ladjɛ nkilika ndjɔmbɔmba kɛ Yeso má nkadjimɔ te Yehova lá lɔlɔmbɔ la má ndawɛkɛ l’otondo wɔso te Nde. Lofu lɔwɔlamisá, Sue alɔngɔsɔlaka mampa la vinyo edjinge akilikaka nonghanyi kɛ Losanghanyɛ lɔ Nkɛsɛ má jw.org. La nkɔlɔ djɛkɔ, nde adjipamaka lá shambrɛ kɛnde ko akilikaka djamba djɛ Bokfɔ má telefɔnɛ. M’ɔkɔngɔ wɔ lasɔ, Sue afunelaka wetsha wɔnde wɔ Bible ante: “Onkembɛka lomi efula. Nanghaka kenkfumɔ kɛ makoke nangha djɛ nsanghana lá Bokfɔ, edjinge Yehova ankotshɛka. Mpewe nkosipisoyɛ osasa la djedjɛ djelekɔ la lemi!” Okanela ente Yehova nkoka nkokotshɛ́ ntsha opomana l’okakasano etengo wɔsɔ?

16. Lamo oyɛso l’eshikikelo ente Yehova angɔtshɔkɔla welo w’ilaso djɛ nsanghana lá Bokfɔ? (Ɔrɔma 8:31, 32)

¹⁶ Yehova nsasangaka efula la welo w’ilaso djɛ mbokfɔ nyɔyi kɛ Yeso. Tolekɔ l’eshikikelo ente nde angɔtɔtshɔkɔla winá w’ɛnyɛso djedjɛ djɛso tá kɛnɛ kɛ ndatonanghela. (Wala Ɔrɔma 8:31, 32.) Djɛkondeke, nyontshɔ toyashikikɛ djɛ nsanghana lá Bokfɔ dj’ɔnɔnyi wɔnɛ la nangha kenkfumɔ k’okokaso nangha djɛ ndapɛyɛ efula l’elemo wɛso welá nyuma l’eleko kɛ Bokfɔ.