1-2. Buakinyi atutuelaa mu Kitentekiesho ku kipua kioso?

 TAKUDI bipua bikile pa 2000, Yesu baadi mutuushe muwa waye pa muanda wetu, bua kuitufunguila eshinda buatudia kupeta muwa wa ikalaika. Bufuku kumpala kua lufu luaye, balunguile balongi baye buabadia kutentekiesha kikitshiino kiaye kia kifulo kukiila ku kino kileshesho, kipeelepeele kia mukate na nfinyo.—1 Kod. 11:23-26.

² Atukookielaa ku muiya wa Yesu muanda tui bamufule ngofu. (Yo. 14:15) Ku kipua kioso, mu kipungo kia Kitentekiesho atuleshaa lutumbu luetu bua bioso biadi mukite, pa kuata nsaa ya kunangushena mu luteko ku akipushisha lufu luaye kuatudi. Atuikalaa dingi na muloo wi bungi wa kulungula mukandu wi buwa, bua kunyingisha bantu be bungi pakudi mushindo, buabadia kuibunga neetu mu diadia efuku di pabuadio. Tui na kitshibilo kia kupela kulekiela kintu su nkimune kietukitshishua kutuela mu Kitentekiesho.

3. Nkinyi ki’atukataluula mu uno muisambo?

³ Mu uno muisambo, atukataluula mishindo isatu ayikitshishaa muilo wa Yehowa, buaudia kutuela mu Kitentekiesho kia lufu lua Yesu: (1) pa kukita Kitentekiesho nka bu bibaadi bibalungule Yesu, (2) pa kuitanyina bangi buabadia kutuela mu Kitentekiesho, na (3) muilo w’Efile Mukulu autuelaa mu Kitentekiesho sunga wekadika na nkalakashi i bukopo.

4. Mbia binyibinyi kinyi biabashimikaa kasele ku kipua kioso ku Kitentekiesho, na buakinyi ta tui balombene kuata bino bia binyibinyi bu kitungo ki na Efile Mukulu kuatudi? (Luka 22:19, 20)

⁴ Ku kipua kioso ku Kitentekiesho, atuteemeshaa muisambo wimeene mu Bible autuushaa ngaluulo ayipushika kalolo ku nkonko  i bungi. Atulongaa buakinyi bantu be na lukalo na nkuulo na mushindo wi lufu lua muntu umune ndushimishe miluisho ya bantu be bungi. Na atutentekieshaa akilesha mukate na nfinyo na benyi balombene kudia na kutoma. (Badika Luka 22:19, 20.) Na atunangushenaa ku lukulupilo lui buwa bukile, lui kuanka bua baaba booso be na lukulupilo lua kushaala pa nsenga bua losoo. (Yesh. 35:5, 6; 65:17, 21-23) Ta tui balombene kuata bino bia binyibinyi bu kitungo ki na Efile Mukulu kuatudi. Bantu midiyala ta bapushaa ino mianda nya na ta be na lutumbu lua kutundula’shi mulambu wa Yesu wa nkuulo wi na muulo. T’abakitaa sunga Kitentekiesho kia lufu lua Yesu mu mushindo ubaadi wakule Yesu. Buakinyi bi biabia?

5. Kunyima kua lufu lua balongi ba Yesu, bantu bababangile kukita Kitentekiesho kia lufu lua Yesu mushindo kinyi?

⁵ Mafuku apeela kunyima kua lufu lua balongi ba Yesu, be na Kidishitu basumbule kulumiino babatuelele mu kakongie. (Mat. 13:24-27, 37-39) Babaadi abalambukisha “[ndambukisho] yilube bwa’shi balongi be balonde mu mongo.” (Bik. 20:29, 30, Kilombeeno Kipya 2014) Lumune lua ku “ndambukiisho ilube” lua bena Kidishitu basumbule kulumiino, ndulambukisho lua ba mpagano lua’shi, Yesu ta baadi mulambule mbidi yaye “mususa umune bwa kusemuna milwisho ya be bungi,” bu abibiamba Bible, anka abitungu kuakula pabitale mulambu wa nkuulo ya Yesu musuusa na musuusa. (Eb. 9:27, 28, Kilombeeno Kipya 2014) Lelo uno bantu be bungi, bakuete kukumiina ano malongiesha a madimi. Abendaa mu kipuilo kiabo lubingo looso, ingi nsaa abendaa efuku dioso bua kukita Kitentekiesho kia mulambu wa nkuulo ya Yesu, wabakitaa bikishekishe kui bena katolike, wabetanyinaa bu “Mulambu wa Misa.” b Bingi bipuilo abakitaa Kitentekiesho kia lufu lua Yesu nka binyi biabia, anka t’abauku akipushisha kalolo mulambu wa nkuulo ya Yesu. Ungi muntu mmulombene kuiyipusha’shi: “Lufu lua Yesu, alupushisha mu binyibinyi’shi miluisho yande ngilombene kufuilua lusa?” Buakinyi abeyipushaa luno lukonko? Mu ingi mianda bangi mbebakuminyishe kui baaba be na mpaka’shi mulambu wa nkuulo ya Yesu ta ngulombene kukuasha bua’shi be bafuile lusa ku miluisho yabo. Balongi ba Yesu abakuashaa bantu buabadia kupusha akipushisha mulambu wa nkuulo ya Yesu, na mushindo wi buwa wa kukita Kitentekiesho kia lufu lua Yesu.

6. Mu kipua kia 1872, nkitshibilo kinyi kibaabadi baate kui kasaka ka balongi ba Bible?

⁶ Ku mfudiilo kua siekele a 19, kasaka ka balongi ba Bible kabaadi akakunkushibua na mukuetu Charles Taze Russell, kababangile kutamisha kulonga kuabo kua bifundue. Babaadi abakumiina kuuka bia binyibinyi pabitale akipushisha mulambu wa nkuulo ya Yesu na mushindo wa kutentekiesha lufu lua Yesu. Mu kipua kia 1872, babaadi baate kitshibilo kimeene mu Bible akilesha’shi Yesu baadi mutuushe nkuulo ibaadi ayitungu bua bantu booso. Ta mbalame mianda ibaabadi balongie buabo banabene nya, anka babaadi bapalakashe ino mianda ku bukuashi bua mikanda, ma jurnale, na Kitenta kia Mulami. Na ku mbangilo, p’abo kuambula bena Kidishitu ba mu siekele a kumpala, bababangile kuibunga pamune musuusa umune ku kipua bua kukita Kitentekiesho.

7. Kukimbuula kua balongi ba Bible ba kumpala nkuitukuashe naminyi?

⁷ Lelo uno tukuete kupeta bukuashi bua mianda ibaabadi bakimbuule kui bano bena Kidishitu booso ba binyibinyi, takudi bipua bi bungi. Mu mushindo kinyi? Yehowa mmuitukuashe buatudia kupusha akilesha mulambu wa nkuulo ya Yesu na ki’auketukitshina na ki’aukakitshina bangi bantu booso. (1 Yo. 2:1, 2) Tui balongie dingi’shi, Bible etupa nkulupilo ibidi bua bantu abasankisha Efile Mukulu, bashaabakafu dingi  abakashaala muiyilu. Na bua midiyo ya bangi bantu abakapete muwa wa ikalaika pa nsenga. Atuifubuila kui Yehowa nsaa y’atutaluula mushindo wadi muitufule na mushindo w’atupete miabi pa bupenka ku bukuashi bua mulambu wa nkuulo ya Yesu. (1 Mp. 3:18; 1 Yo. 4:9) Biabia nka bu bangi bakuetu baasha lulamato ba mu mafuku a kala, atuitanyinaa bangi bantu buabadia kuibunga neetu bua kukita Kitentekiesho kia lufu lua Yesu muyile bibakuile Yesu.

8. Nkinyi kiabadi bakite kui muilo wa Yehowa bua kuitanyina bangi ku Kitentekiesho? (Tala kifuatulo.)

⁸ Muilo wa Yehowa, ngupue kuitanyina bangi bantu ku Kitentekiesho kia lufu lua Yesu takudi bipua bi bungi. Ku bangilo kua kipua kia 1881, babaadi balungule bakuetu balume na bakashi ba mu États-Unis buabadia kuikala abebungila mu mashibo mu Allegheny, na mu Pennsylvanie bua dino efuku di pa buadio. Kunyima, kakongie kooso kababangile kukita Kitentekiesho pabuako. Mu kipua kia 1940, abalunguile balungudi booso bua kuitanyina muntu ooso a mu terituare, akumiina kutuela mu Kitentekiesho. Betele baadi mutushiishe tukongie mapuupua a luitamino lua ku Kitentekiesho, bua musuusa wa kumpala mu kipua kia 1960. Kubanga nka paapa, mbatuushe midiyala ya mapuupua a luitamino bua kuabila bantu. Buakinyi atukishaa nsaa i bungi na kuikitshisha bua kuitanyina bangi?

9-10. P’atuitanyina bangi bua’shi bafikie ku Kitentekiesho, nnanyi abikuasha? (Yowano 3:16)

⁹ Kabingilo kamune ka buakinyi atuitanyinaa bangi buabadia kufika batuela neetu ku Kitentekiesho nka’shi, atukumiina booso abatuele neetu bua musuusa wa kumpala, balongie bia binyibinyi pabitale Yehowa na Yesu bua biabadi betukitshine booso buetu. (Badika Yowano 3:16.) Tui bakulupile’shi biabia bi’abamono na bi’abapusha  ku Kitentekiesho abibatakula bua kulonga bi bungi bua’shi bafikie namu nabo bafubi ba Yehowa. Anka bangi namu abibakuasha ngofu.

¹⁰ Atuitanyinaa dingi baaba balekie kufubila Yehowa takudi mafuku e bungi. Atukitaa bino pa kuibatentekiesha’shi Efile Mukulu ki nka muibafule. Be bungi abakumiinaa ku luitamino luetu, atuikalaa na muloo bua kuibamona dingi. Kutuela mu Kitentekiesho akuibatentekieshaa mushindo ubaabadi basankile kufubila Yehowa mu mafuku a kala. Tutaleyi kileshesho kia Monica. c Baadi mubanguule kuikala dingi bu mulungudi mu kipungo kia Corona-Virus. Kunyima kua kutuela mu Kitentekiesho kia mu 2021, bakuile’shi: “Kino Kitentekiesho akikalanga ki pabuakio kuandi. Bua musuusa wa kumpala, kunyima kua bipua 20 ne mupete mushindo wa kulungula bangi mukandu wi buwa na kuibetanyina ku Kitentekiesho. Ne mukite kioso akitungu bua kuitanyina bangi ku Kitentekiesho, muanda ne na lutumbu lukata bua binkitshine Yehowa na Yesu.” (Mis. 103:1-4) Biabia, sunga bantu bakumiina ku luitamino luetu sunga kukutua kukumiina, atuikitshishaa na muetu mooso bua kuitanyina bangi ku Kitentekiesho, atuiuku’shi Yehowa e na muloo bua mushindo w’atuikitshisha.

11. Yehowa elelaa kuikitshisha kuetu miabi p’atuitanyina bangi bua kutuela mu Kitentekiesho naminyi? (Angai 2:7)

¹¹ Yehowa mmuelele kuikitshisha kuetu miabi i bungi bua kuitanyina bangi ku Kitentekiesho. Sunga mu 2021, amuikalanga miya i bungi pabitale kipupa kia Corona-Virus, tui batuele bantu be bungi bukile mu Kitentekiesho bafikie ku midiyala 21367603. Buno bungi buikeele bukile Tumonyi tua Yehowa tui mu nsenga ishima, misuusa ibidi na kipindi! Mu binyibinyi Yehowa t’akambaa kuikalakasha penda pabitale bantu abatuele mu Kitentekiesho nya. Kadi ekalakashaa bua muntu ooso e mutuele, pa bupenka. (Luk. 15:7; 1 Tim. 2:3, 4) Tui balombene kushinkamisha’shi nsaa y’atuitanyina bangi, Yehowa etukuasha buatudia kupeta bantu be na mashimba e buwa.—Badika Angai 2:7.

12. Mmianda kinyi ilombene kuitufuishiisha lukalakashi bua kutuela mu Kitentekiesho? (Tala kifuatulo.)

¹² Yesu bapuile kutemuka’shi mu mafuku a ku mfudiilo tui balombene nkafumankana na nkalakashi ya bipaso bioso, buluishi bua mu kifuko, kubinguabingua, ngoshi, bipupa, na ingi mianda i bungi. (Mat. 10:36; Mak. 13:9; Luk. 21:10, 11) Ingi nsaa, ino mianda yooso ayitufuishishaa lukalakashi bua kutuela mu Kitentekiesho kia lufu lua Yesu. Nkinyi kibaadi kikite bakuetu balume na bakashi bua kukambila ino nkalakashi, na mmushindo kinyi ubaadi wi bakuashe Yehowa?

13. Mmushindo kinyi ubaadi Yehowa muelele Artem miabi, bu’eshimba dinyingie na kitshibilo kiaye kia kukita Kitentekiesho sunga mbibaadi mu lukano?

¹³ Kuedibua mu nkano. Bakuetu be mu nkano pa muanda wa lukomiino luabo, bakuete kuikitshisha na muabo mooso bua kutuela mu Kitentekiesho kia lufu lua Yesu. Tutaluuleyi kileshesho kia Artem. Mu kipungo kia Kitentekiesho mu kipua kia 2020, babaadi bamuele mu kalukano kapeela ka 17 metre mubaabadi abeele be na lukano bananka sunga batano ingi nsaa. Ambaa’shi sunga mbinaadi mu lukano naadi na mushindo wa kukongola, bingi bintu abitungu bua kukita Kitentekiesho, bu mukate na nfinyo, na naadi dingi mulumbuule muisambo wa Kitentekiesho ubaadia kunkuasha ami nabeene. Anka be na lukano naaye babaadi naabo mu kadimbo kamune babaadi abatomo mfuanka na kuakula mianda i bubi. Bakitshine kinyi? Batompele kuibalungula bua’shi su abatombo kuleka kutoma na kuakula bi bubi, munda mua nsaa umune. Artem baadi mukaanye pa kumona be na lukano naaye, babaakumiina kuleka kutoma na kuela tuleo nsaa y’akitshi Kitentekiesho. Artem akula’shi: “Naadi mupete mushindo wa kuakula naabo pabitale Kitentekiesho.” Aku naamu babaadi abakula’shi  ta mbalombene kumuteemesha p’akitshi Kitentekiesho. Kunyima kuabo kumona na kupusha Artem akitshi Kitentekiesho, babaadi bamuipushe nkonko i bungi pabitale uno muanda.

14. Muilo w’Efile Mukulu wikeele kuikitshishe naminyi bua kutuela mu Kitentekiesho kia lufu lua Yesu sunga biakuikeele kipupa kia Corona-Virus?

¹⁴ Kipupa kia Corona-Virus. Pa muanda wa kipupa, muilo wa Yehowa ta ubaadi ulombene kuibunga pamune bua kukita Kitentekiesho nya. Sunga mbiabia, bino ta mbibakutshishue bua kukita Kitentekiesho. d Tukongie tuikeele na mushindo wa kupeta internete, tukitshine Kitentekiesho kia lufu lua Yesu ku bukuashi bua vidéoconférence. Kadi abikalanga naminyi bua midiyo ya bakuetu bash’abekalanga na internete? Mu bingi bibundi ma komite a filiale aekalanga aate mpango bua’shi muilo w’Efile Mukulu, ubandile sunga kuteemesha muisambo ku kisaashi sunga kutelevizio. Na dingi, komite ya ma filiale, ibaadi ikobole miisambo mu ndimi ikile pa 500 bua’shi sunga mbaaba be mu ma mbalo e kula bapete mushindo wa kukita Kitentekiesho. Na bakuetu baasha lulamato babaatshile mpango, ya kutuma miisambo ipue kukobola kui baaba booso be nayo lukalo.   

15. Nkinyi kibolongiela ku kileshesho kia mulongi a Bible abetanyinaa bu Sue?

 ¹⁵ Buluishi bua mu Kifuko. Bua bangi, lukalakashi lukata luabekalaa naalo bua kutuela mu Kitentekiesho, mbuluishi bua mu kifuko. Tutaleeyi kileshesho kia ungi mulongi a Bible abetanyinaa bu Sue. Mu kipua kia 2021, efuku dimune kumpala kua Kitentekiesho, Sue balunguile mulongieshi aaye a Bible’shi, pa muanda wa buluishi bui ku nshibo kuetu ntshi mulombene kupeta mushindo wa kutuela mu Kitentekiesho. Mulongieshi aaye a Bible babadikile naaye Luka 22:44. Na dingi baadi mumupatuluile’shi nsaa y’atupete nkalakashi, tui balombene kulonda kileshesho kia Yesu pa kutadiila kui Yehowa mu luteko, na pa kutuula lukulupilo luetu looso muadi. Sue baadi mulumbuule mukate na nfinyo, na abandila muisambo wi pabuao wa mu lulanguilo lua ku nakashika mu programe a jw.org. Kiakia kiolua, sunga bibaadi bupenka mu kadimbo kaaye baadi mutuele ku Kitentekiesho ku bukuashi bua telefone aaye. Kunyima kua paapa, Sue bafundiile mulongieshi aaye a Bible’shi: “Malooba we munyingishe bikile. Ne mukite kioso akitungu bua’shi kutuele mu Kitentekiesho, na Yehowa munkuashe binyibinyi. Ntanguku bia kupatuula muloo wampusha na lutumbu luandi naalo!” Onangushena’shi Yehowa mmulombene nkukuasha su ofumankana na lukalakashi lui mumune na luno su?

16. Buakinyi tui bashinkamishe’shi Yehowa aketuelela muabi, bua kuikitshisha kuetu bua kutuela mu Kitentekiesho? (Bena-Looma 8:31, 32)

¹⁶ Yehowa ataa kuikitshisha kuetu na muulo ukata, bua kutuela mu Kitentekiesho kia lufu lua Yesu. Tui balombene kushinkamisha’shi aketuelela miabi nsaa y’atulesha lutumbu bua bioso biadi muitukitshine. (Badika Bena-Looma 8:31, 32.) Biabia tuikaleyi na kitshibilo kia kutuela mu Kitentekiesho kia kino kipua, na kukita kioso akitungu bua kulungula mukandu wi buwa mu kipungo kia Kitentekiesho.