1-2. Faandi mbei u ta mëni di dëdë u Jesosi hiniwan jaa?

 SÖWAN 2000 jaa pasa, Jesosi bi ko dëdë da u, sö taa u sa feni di libi u teego. A di ndeti ufö Jesosi dëdë, a bi piki dee bakama fëën u de ta mëni di dëdë di a bi o dëdë da u. De bi musu tei bëë ku win, nöö de hoi wan ndeti njanjan u mëni di dëdë fëën.​—1 Kol. 11:23-26.

² U ta du di soni di Jesosi piki u, u di u lobi ën gaanfa seei (Joh. 14:15). Hiniwan jaa, a di pisiten di u ta mëni di dëdë u Jesosi, u ta tei ten u begi, söseei u kai pakisei a di soni di a du da u. A sö wan fasi u ta lei taa u ta tei di soni dë u bigi. U ta peleiki möön hia a di pisiten dë tu, sö taa u sa kai te a hia sëmbë u de ko mëni di dëdë fëën makandi ku u. Boiti di dë, u ta mbei hii möiti u soni an tapa u fu wa go a di komakandi di u ta hoi u mëni di dëdë fëën.

3. Fuun soni woo taki a di woto aki?

³ A di woto aki, woo taki u dii fasi fa dee sëmbë u Jehovah bi du hii soni di de bi sa du, u de sa ta mëni di dëdë u Jesosi: De ta mëni di dëdë u Jesosi kumafa a lei de, de ta kai woto sëmbë u de ko mëni di dëdë fëën makandi ku de, söseei de ta mëni di dëdë fëën aluwasi soni ta taanga da de.

4. Un lei de ta tja ko a limbo da u hiniwan jaa te u ta mëni di dëdë u Jesosi, nöö faandi mbei wa musu si dee lei dë kuma sösö soni? (Lukasi 22:19, 20)

⁴ Hiniwan jaa te u ta mëni di dëdë u Jesosi, u ta haika wan taki di ta piki wantu fanöudu hakisi. A di taki dë, de ta konda da u faandi mbei libisëmbë abi wan lusupaima fanöudu, söseei unfa wan kodo sëmbë bi sa dëdë paka paima da sömëni sëmbë. De ta toona piki u andi di bëë ku di win kë taki, söseei de ta piki u ambë sa njan di bëë, bebe di win. (Lesi Lukasi 22:19, 20.) Boiti di dë, u ta kai pakisei a dee gaan bunu di dee sëmbë dee o libi u teego a goonliba aki o feni (Jes. 35:5, 6; 65:17, 21-23). Wa musu si dee tuutuu lei aki kuma sösö soni. Milionmilion sëmbë dë di an sabi dee soni aki, söseei de an ta fusutan unfa di dëdë u Jesosi dë fanöudu tjika. Ma na di dë nöö, de an ta mëni di dëdë u Jesosi kumafa a bi taki taa u musu ta du ën. Faandi mbei de an ta du ën sö?

5. Andi pasa ku di fasi fa Jesosi bi taki taa u musu ta mëni di dëdë fëën, baka di gaansë u dee apösutu fëën dëdë?

⁵ Kölö sö baka di dee apösutu u Jesosi dëdë, hën sëmbë di bi ta ganjan wotowan bi ko a di kemeente (Mat. 13:24-27, 37-39). De bi ’ta bia di buka tee an ko dë tuutuu soni möön. Nöö a di fasi dë, de bi ta biinga u ganjan dee oto biibima fu Masa Jesosi hai ko a de së’ (Tjab. 20:29, 30). Wan u dee fasi fa de bi „bia di buka”, hën da de bi bigi ta lei sëmbë taa „Keesitu [an] dëdë wan kodo pasi tö, fu sömëni sëmbë sa kumutu a di sitaafu de bi o kisi u dee hogi du u de”. Ma de bi ta taki taa u musu ta mëni di dëdë u Jesosi hiniwan juu (Heb. 9:27, 28). Sömëni sëmbë ta biibi di poipoi lei dë a di ten aki tu. De nango a keiki hii juu nasö hiniwan daka u du soni u mëni di dëdë u Jesosi. De ta biibi taa te de ta mëni di dëdë fëën, nöö di bëë ta ko toon di sinkii u Jesosi, nöö di win ta ko toon di buuu u fëën. De ta si kuma te wan sëmbë ta njan di bëë, bebe di wini, nöö Jesosi ta toona dëdë. Woto keiki dë tu di an ta mëni di dëdë u Jesosi sö hesihesi, ma gaansë u dee sëmbë u dee keiki dë an ta kaba fusutan andi di dëdë u Jesosi kë taki. So u de sa ta hakisi deseei taa: ’A dë sö tuutuu taa di dëdë u Jesosi sa mbei mi feni paadon u dee zöndu u mi ö?’ Faandi mbei de ta hakisi deseei di soni aki? Wë u di de ko ta si soni kuma dee sëmbë dee an ta biibi taa di dëdë u Jesosi sa mbei sëmbë feni paadon u dee zöndu u de. Unfa dee tuutuu bakama u Jesosi heepi sëmbë u de ko fusutan dee soni aki?

6. Andi wanlö womi di bi ta öndösuku soni u Bëibel bi ko fusutan a di jaa 1872?

⁶ A di jaa 1870, hën Charles Taze Russell ku wanlö woto sëmbë di bi ta öndösuku soni u Bëibel, bi bigi öndösuku soni a di Bëibel fajafaja. De bi kë ko sabi andi di dëdë u Jesosi kë taki tuutuu, söseei de bi kë ko sabi unfa sëmbë musu ta mëni di dëdë fëën. A di jaa 1872, hën de ko fusutan taa Jesosi dëdë paka paima da libisëmbë tuutuu. De an bi hoi dee soni di de bi ko fusutan da deseei. Ma de bi sikifi de buta a buku ku kolanti, sö taa woto sëmbë seei bi sa ko sabi de tu. Kölö sö baka di dë, hën de bi bigi ta mëni di dëdë u Jesosi wan pasi a wan jaa, kumafa dee fesiten Keesitu sëmbë bi ta du ën.

7. Unfa u ta feni wini u dee soni di wanlö womi di bi ta öndösuku Bëibel, bi öndösuku feni?

⁷ A di ten aki, u ta feni wini jeti u dee soni di dee womi dë bi öndösuku feni sömëni jaa pasa. Faandi mbei u taki sö? Jehovah heepi u fuu ko fusutan andi di lusupaima u Jesosi kë taki, söseei a heepi u fuu ko sabi un bunu di  soni dë o mbei libisëmbë feni (1 Joh. 2:1, 2). U ko fusutan tu taa di Bëibel ta taki u tu gaan bunu di dee sëmbë dee ta piki Gadu buka o feni. So u de o go libi u teego a liba ala, nöö milionmilion wotowan o feni di libi u teego a goonliba aki. U ku Jehovah ta ko dë möön gaan mati te u ta buta pakisei a di fa a lobi u tjika, söseei te u ta buta pakisei a di fa di lusupaima u Jesosi o mbei u feni gaan bunu tjika (1 Pet. 3:18; 1 Joh. 4:9). Fëën mbei u ta kai woto sëmbë u de ko mëni di dëdë u Jesosi makandi ku u kumafa Jesosi bi lei u, leti kumafa dee baaa fuu u di ten di pasa bi ta du ën.

8. Andi dee sëmbë u Jehovah bi du u kai sëmbë u de ko mëni di dë u Jesosi makandi ku de? (Luku di peentje.)

⁸ Gaanduwe kaa dee sëmbë u Jehovah ta kai sëmbë u de ko mëni di dëdë u Jesosi makandi ku de. A di jaa 1881, de bi kai baaa ku sisa u de ko makandi a wan wosu a di foto Allegheny, di dë a Pennsylvania, na Amëëkanköndë, u de mëni di dëdë u Jesosi. Bakaten hiniwan kemeente bi ta mëni di dëdë u Jesosi deseei. A gaanliba u di jaa 1940, de bi piki dee peleikima taa de bi sa kai hiniwan sëmbë a di pisiwata ka de bi ta dë, u de ko mëni di dë u Jesosi ku de. A di jaa 1960, di Bëtëli bi da de kemeente pampia u de kai sëmbë. A bi dë di fosu pasi di de bi du di soni aki. Sensi di ten dë, hën u ta paati milionmilion pampia u kai sëmbë u de ko mëni di dëdë u Jesosi. Faandi mbei u ta mbei möiti sö u kai sëmbë u de ko mëni di dëdë u Jesosi ku u?

9-10. Ambë ta feni wini u di möiti di u ta mbei u kai sëmbë u de ko mëni di dëdë u Jesosi? (Johanisi 3:16)

⁹ Wan u dee soni di mbei u ta kai sëmbë u de ko mëni di dëdë u Jesosi ku u, hën da u di  u kë u dee sëmbë dee o ko u di fosu pasi, ko sabi andi Jehovah ku Jesosi du da libisëmbë. (Lesi Johanisi 3:16.) U bi o kë seei u dee soni di de o si ku di de o jei, mbei taa de kë ko sabi möön soni u Bëibel, sö taa de sa kë ko dë dinima u Jehovah tu. Ma woto sëmbë seei ta feni wini te de ko tu.

¹⁰ U ta kai dee sëmbë dee an ta dini Jehovah möön tu. U ta du di soni aki u heepi de u de si taa Jehovah lobi jeti. Sömëni u de ta ko te u kai de, nöö u ta wai seei u si de. Te de ko, nöö di soni dë ta mbei de toona mëni unfa a bi ta suti da de tjika di de bi ta dini Jehovah. Sö soni bi waka da wan sisa de kai Monica. b A bi bigi peleiki baka a di pisiten di di kolona siki bi ta paaja a goonliba. Di a bi ko mëni di dëdë u Jesosi a di jaa 2021, hën a bi taki taa: „Di mëni di u mëni di dëdë u Jesosi aki bi dë wan apaiti soni da mi. A hii dee 20 jaa dee pasa aki, awaa ufö mi toona peleiki da sëmbë, söseei awaa ufö mi toona kai sëmbë u de ko mëni di dëdë u Jesosi. Mi du hii soni di mi bi sa du u kai sëmbë, u di mi ta tei di soni di Jehovah ku Jesosi du da mi u bigi” (Ps. 103:1-4). Aluwasi ee sëmbë ko, nasö ee de an ko te u kai de, tökuseei u ta du hii soni di u sa du u kai de, u di u sabi taa Jehovah ta wai ku di möiti di u ta mbei.

11. Unfa Jehovah bi mbei u feni gaan bunu, di u bi kai sëmbë u de ko mëni di dëdë u Jesosi? (Hagai 2:7)

¹¹ Jehovah bi mbei u feni gaan bunu, u di u bi mbei möiti u kai sëmbë u de ko mëni di dëdë u Jesosi. Hii fa wa bi sa du so soni möön u di di kolona siki bi ta paaja jeti a di jaa 2021, tökuseei 21.367.603 sëmbë bi ko mëni di dëdë u Jesosi a di jaa dë. Dee sëmbë dee bi ko, bi hia tu toon ku hafu möön hii dee Jehovah Kotoigi dee dë a hii di goonliba! Wë u sabi taa Jehovah an ta buta pakisei a di un mëni sëmbë di ta ko nöö a kaba, ma a ta buta pakisei a hiniwan u de apaiti (Luk. 15:7; 1 Tim. 2:3, 4). U dë seiki taa Jehovah ta heepi u fuu feni dee bunuhati sëmbë, ku di kai di u ta kai sëmbë u de ko mëni di dëdë u di Womi Mii fëën.​—Lesi Hagai 2:7.

12. Andi sa mbei a taanga da u fuu mëni di dëdë u Jesosi? (Luku di peentje.)

¹² Jesosi bi taki a fesi taa a dee lasiti daka soni bi o taanga da u, u di dee famii fuu ku woto sëmbë bi o ta du ku u u di biibi fuu hedi. A bi taki sö tu u di feti bi o dë, u di taku siki bi o ko, söseei u di sömëni woto soni bi o ta pasa (Mat. 10:36; Maik. 13:9; Luk. 21:10, 11). So juu dee soni aki ta mbei a ta taanga da u fuu mëni di dëdë u Jesosi. Andi dee baaa ku dee sisa fuu bi du u de bi sa hoi dou di dee tesi aki bi miti de, nöö unfa Jehovah bi heepi de?

13. Unfa Jehovah bi mbei Baaa Artem feni gaan bunu u di a bi abi degihati, söseei u di a bi dë kabakaba u mëni di dëdë u Jesosi, hii fa a bi dë a dunguwosu?

¹³ Te de buta u a dunguwosu. Dee baaa fuu di de buta a dunguwosu u di biibi u de hedi, ta du hii soni di de sa du u mëni di dëdë u Jesosi. Luku fa soni bi dë da wan baaa de kai Artem. A di jaa 2020, a di pisiten di u bi o mëni di dëdë u Jesosi, de bi söötö hën ku fö woto womi a wan piki kamba a dunguwosu. Hii fa a bi dë a dunguwosu, tökuseei a bi feni wantu soni di a bi abi fanöudu faa bi sa mëni di dëdë u Jesosi, söseei a bi seeka soni u hoi di taki di u ta hoi di daka dë. Ma dee woto womi dee hën ku de bi dë a wan kamba, bi ta sumuku, söseei de bi ta kosi sëmbë. Wë nöö andi a bi du? A bi hakisi de ee de bi o sa hoi wan juu longi dëën söndö u de du dee soni aki. A bi bigi da Baaa Artem seei di dee womi  bi piki ën taa de bi o du di soni di a bi hakisi de. Baaa Artem bi taki taa: „Mi bi hakisi de ee mi bi sa konda soni u di mëni di woo mëni di dëdë u Jesosi da de.” Hii fa de bi taki taa de an bi kë sabi soni u di mëni di u ta mëni di dëdë u Jesosi, tökuseei de bi hakisi Baaa Artem soni fëën di de bi si unfa a bi ta mëni ën, söseei di de bi jei dee soni dee a bi ta taki.

14. Unfa dee sëmbë u Jehovah bi mëni di dëdë u Jesosi di di kolona siki bi ko?

¹⁴ Di di kolona siki bi ko. Di di kolona siki bi ko, dee sëmbë u Jehovah an bi sa go miti deseei u mëni di dëdë u Jesosi. Ma di soni dë an bi tapa de u de mëni di dëdë u Jesosi. c Dee kemeente de bi abi Internet, bi hoi komakandi a Internet u mëni di dëdë u Jesosi. Ma unfa soni bi dë da dee milionmilion woto sëmbë dee an bi abi Internet? A so köndë, de bi seti soni sö taa sëmbë bi sa haika di taki a teefei ku ladio. Boiti di dë, dee bëikantoo bi hai di taki tei a möön leki 500 töngö, sö taa dee sëmbë dee ta dë a kamian ka Internet an dë, bi sa mëni di dëdë u Jesosi tu. Nöö wanlö baaa bi mbei möiti u de bi sa tja di taki go da dee baaa ku dee sisa dee bi ta dë a dee kamian dë.

15. Andi i lei u di woto u wan mujëë di bi ta lei soni u Bëibel, di de ta kai Sue?

 ¹⁵ Te dee famii fuu ta du ku u. Di möön gaan soni di ta tapa so sëmbë u de an mëni di dëdë u Jesosi, da di du di dee famii u de ta du ku de. Boo luku di woto u wan mujëë di bi ta lei soni u Bëibel, di de ta kai Sue. A di jaa 2021, wan daka ufö u mëni di dëdë u Jesosi, Sue bi piki di sisa di bi ta lei ën soni u Bëibel taa an bi o sa mëni di dëdë u Jesosi, u di dee sëmbë fëën wosudendu bi ta du ku ën. Di sisa bi lesi Lukasi 22:44 dëën. Baka di dë, hën a piki ën taa te soni ta taanga da u, nöö u musu begi Jehovah nöö u disa hii soni nëën maun, kumafa Jesosi bi ta du ën. Di debooko fëën, Sue bi suku di bëëë ku di win, hën a luku di taki di nama ku di daka wöutu u di daka dë, a jw.org. A di ndeti dë, di a bi dë hën wanwan nëën kamba, hën a haika di taki di nama ku di dëdë u Jesosi a Internet, a di tëlëfön fëën. Bakaten, Sue bi sikifi wan bosikopu manda da di sisa di bi ta lei ën soni u Bëibel. A bi taki dëën taa: „Na piki sö taanga i da mi a di jeside. Mi du hii soni di mi bi sa du u mëni di dëdë u Jesosi, hën Jehovah heepi mi. Ma sa piki i fa mi ta wai tjika, söseei fa mi dë ku tangi a hati tjika!” I si kuma Jehovah sa heepi i ee soni ta taanga da i sö tu ö?

16. Faandi mbei u sa dë seiki taa Jehovah o mbei u feni gaan bunu, te u ta mbei möiti u mëni di dëdë u Jesosi? (Loomë 8:31, 32)

¹⁶ Jehovah ta tei ën u bigi taa u ta mbei möiti u mëni di dëdë u Jesosi. U sa dë seiki taa a o mbei u feni gaan bunu te u ta lei taa u ta tei di soni di a du da u u bigi. (Lesi Loomë 8:31, 32.) Fëën mbei boo mbei hii möiti fuu sa mëni di dëdë u Jesosi di jaa aki, söseei boo dë kabakaba fuu sa du möön soni a di diniwooko, a di pisiten di woo mëni di dëdë u Jesosi.