SIHLOKO LESIFUNDVWAKO 4
Jehova Uyayibusisa Imetamo Yetfu Yekuba Khona ESikhumbutweni
“Chubekani nikwenta, ningikhumbula.”—LUK. 22:19.
INGOMA 19 Sidlo SeNkhosi Sakusihlwa
LOKUTAWUCOCWA NGAKO KULESIHLOKO a
1-2. Yini leyenta sibe khona eSikhumbutweni njalo ngemnyaka?
EMINYAKENI lecishe ibe ngu-2 000 leyendlulile, Jesu wanikela ngekuphila kwakhe ngenca yetfu kuze sitfole kuphila lokuphakadze. Ngebusuku lebebungaphambi kwekufa kwakhe, wayala balandzeli bakhe kutsi bakhumbule kufa kwakhe ngekutsi bente umkhosi lomelula lofaka ekhatsi sinkhwa neliwayini.—1 Khor. 11:23-26.
2 Silalela lomyalo waJesu ngobe simtsandza kakhulu. (Joh. 14:15) Njalo ngemnyaka ngesikhatsi seSikhumbuto, sikhombisa kutsi siyabonga ngaloko lasentela kona ngekutsi sithantaze futsi sicabangisise ngekutsi kufa kwakhe kusho kutsini kitsi. Siphindze sente lokunyenti emsebentini wekushumayela, simeme bantfu labanyenti kutsi babe kanye natsi kulomkhosi lobalulekile. Ngetulu kwaloko, senta konkhe lokusemandleni etfu kutsi kube bete lokusivimbelako kutsi sibe khona eSikhumbutweni.
3. Sitawucoca ngani kulesihloko?
3 Kulesihloko, sitawucoca ngetintfo letintsatfu letentiwe bantfu baJehova kuze bakhumbule kufa kwaJesu: (1) bagubha lomkhosi ngendlela Jesu labafundzisa kutsi bawente ngayo, (2) bamema labanye kutsi babe khona eSikhumbutweni, ngetulu kwaloko (3) bagubha lomkhosi ngisho babhekana netimo letimatima.
KUGUBHA LOMKHOSI NGENDLELA JESU LATSI SIWENTE NGAYO
4. Ngumaphi emaciniso lesiwafundza njalo ngemnyaka eSikhumbutweni, futsi kubaluleke ngani kutsi singawatsatseli phansi? (Lukha 22:19, 20)
4 Njalo ngemnyaka eSikhumbutweni, silalela inkhulumo lesekelwe eBhayibhelini lephendvula imibuto leminyenti. Sifundza ngekutsi yini leyenta bonkhe bantfu badzinge inhlawulo, nekutsi kufa kwemuntfu munye kungatihlawulela njani tono tebantfu labanyenti. Siphindze sikhunjutwe kutsi sinkhwa neliwayini limelelani nekutsi bobani lokufanele badle lesinkhwa futsi banatse leliwayini. (Fundza Lukha 22:19, 20.) Siphindze sicabangisise ngetibusiso letitawutfolwa ngulabo labatawuphila emhlabeni. (Isa. 35:5, 6; 65:17, 21-23) Kufanele singawatsatseli phansi lamaciniso. Tigidzigidzi tebantfu atikwati loku, futsi aticondzi kutsi kubaluleke ngani kufa kwaJesu. Abakugubhi kufa kwaJesu ngendlela latsi bakugubhe ngayo. Kwentiwa yini loko?
5. Bantfu babese bakugubha njani kufa kwaJesu ngemuva kwekushona kwebaphostoli?
5 Ngemuva nje kwekutsi linyenti lebaphostoli baJesu selifile, emaKhristu mbumbulu angena ebandleni. (Mat. 13:24-27, 37-39) Akhuluma “tintfo letisontsekile kuze advonse bafundzi kutsi bawalandzele.” (Imis. 20:29, 30) Lokunye kwaloku ‘lokusontsekile’ lebekufundziswa ngulamaKhristu mbumbulu kutsi Jesu akazange anikele ngemtimba wakhe “kanye kuphela kuze etfwale tono talabanyenti,” njengobe liBhayibheli lisho, kodvwa atsi umhlatjelo wakhe kufanele wentiwe njalo njalo. (Heb. 9:27, 28) Lamuhla, bantfu labanyenti bayayikholelwa lemfundziso lengemanga. Baya esontfweni njalo ngeliviki, labanye baya onkhe malanga kuze babe nemkhosi labakhumbula ngawo kufa kwaJesu. Bakholelwa kutsi sinkhwa neliwayini kuyashintja kube yingati yaKhristu nemtimba wakhe mbamba. Bacabanga kutsi umtimba waJesu nengati yakhe kuba ngumhlatjelo ngaso sonkhe sikhatsi nawukudla. Letinye tinkholo atikugubhi njalo kufa kwaJesu, kodvwa aticondzi kahle kutsi umhlatjelo wakhe usho kutsini. Labanye kungenteka bayatibuta: ‘Kufa kwaJesu kusho kutsi tono tami tingacolelwa mbamba yini?’ Yini leyenta batibute lombuto? Kuletinye timo, bentiwe bantfu labangabatako kutsi umhlatjelo waJesu wenta tono ticolelwe. Yini balandzeli baJesu beliciniso labayentile ngalendzaba?
6. Ngusiphi siphetfo bafundzi beliBhayibheli labefika kuso nga-1872?
6 Nga-1870, licembu lebafundzi beliBhayibheli lebeliholwa nguCharles Taze Russell, lacala kuhlolisisa imiBhalo ngekutimisela. Bebafuna kwati liciniso lekutsi isho kutsini vele inhlawulo yaJesu, nekutsi kufanele kukhunjulwe njani kufa kwakhe. Nga-1872, befika esiphetfweni sekutsi Jesu wafa kuze ahlawulele bonkhe bantfu. Abazange bathule naloko labakutfola. Kunaloko, batjela labanye basebentisa tincwadzi, emaphephandzaba nabomagazini. Ngekushesha nje, bacala kulingisa emaKhristu ekucala ngekutsi bahlangane kanye ngemnyaka kuze bagubhe Sikhumbuto.
7. Lusisita njani lucwaningo lolwentiwa bafundzi beliBhayibheli?
7 Lamuhla luyasisita lolucwaningo lolwentiwa ngulamaKhristu eminyakeni leminyenti leyendlulile. Lusisita njani? Jehova usisitile kutsi sicondze kutsi umhlatjelo waJesu usho kutsini, nekutsi yini lotawusentela yona. (1 Joh. 2:1, 2) Sifundzile nekutsi liBhayibheli likhuluma ngetintfo letitawutfolwa bantfu labajabulisa Nkulunkulu, labanye banelitsemba lekuphila ezulwini bangafi kantsi tigidzi tebantfu tinelitsemba lekuphila kuze kube phakadze emhlabeni. Sisondzelana naJehova nasicabanga ngekutsi usitsandza kangakanani nekutsi ngamunye wetfu usitakala njani ngemhlatjelo waJesu. (1 Phet. 3:18; 1 Joh. 4:9) Ngako njengebazalwane betfu basesikhatsini lesendlulile, natsi simema labanye kutsi babe natsi nasikhumbula kufa kwaJesu ngalendlela latsi sikukhumbule ngayo.
KUMEMELA LABANYE ESIKHUMBUTWENI
Yini longayenta kuze wentele Jehova lokunyenti ngemkhankaso weSikhumbuto? (Buka tigaba 8-10) d
8. Yini leyentiwe bantfu baJehova kuze bamemele labanye eSikhumbutweni? (Buka sitfombe.)
8 Kusukela kadzeni, bantfu baJehova bebamemela labanye eSikhumbutweni. Nga-1881, bazalwane nabodzadze baseMelika bamenywa kutsi babe ndzawonye ekhaya lemzalwane lebelise-Allegheny, ePennsylvania kuze bagubhe lomkhosi lobalulekile. Ngekuhamba kwesikhatsi, libandla ngalinye labase liyatigubhela Sikhumbuto. NgaMarch 1940, bamemeteli batjelwa kutsi bangamema nobe ngubani endzaweni yangakubo. Nga-1960, kwaba kwekucala kutsi iBethel inike emabandla timemo letishicilelwe. Kusukela ngaleso sikhatsi, sekusakatwe tigidzigidzi tetimemo teSikhumbuto. Yini leyenta sicitse sikhatsi setfu nemandla simema labanye?
9-10. Bobani labasitakalako nasimemela bantfu eSikhumbutweni? (Johane 3:16)
9 Lesinye sizatfu lesenta simeme labanye kutsi babe natsi eSikhumbutweni kutsi sifuna labo labete kwekucala bafundze liciniso ngaloko Jehova naJesu labasentela kona. (Fundza Johane 3:16.) Sinelitsemba lekutsi loko labatakubona eSikhumbutweni nalabatakuva kutawubenta bafune kufundza lokunyenti ngaJehova futsi bacale kumkhonta. Kodvwa bakhona nalabanye labasitakalako eSikhumbutweni.
10 Siphindze simeme nalabo lesebaphelelwe ngumdlandla wekukhonta Jehova. Loko sikwenta kuze sibakhumbute kutsi Nkulunkulu usabatsandza. Labanyenti babakhona eSikhumbutweni futsi sijabula kakhulu kubabona. Lokuba khona kubakhumbuta kutsi bebakujabulela kangakanani kukhonta Jehova esikhatsini lesendlulile. Cabanga ngesibonelo saMonica. b Waphindze wacala kushumayela ngesikhatsi se-COVID-19. Ngemuva kwekuba khona eSikhumbutweni nga-2021, watsi: “LeSikhumbuto besikhetseke kakhulu kimi. Ngemuva kweminyaka lengu-20 ngingashumayeli, bekukwekucala kutsi ngishumayele bantfu futsi ngibamemele eSikhumbutweni. Ngente konkhe lokusemandleni ami kuze ngibameme ngobe ngibonga kakhulu ngaloko Jehova naJesu labangentele kona.” (Hla. 103:1-4) Ngisho nobe bantfu basemukela simemo setfu nobe bangasemukeli, siyachubeka sibamemela eSikhumbutweni, sibe sati kutsi Jehova uyajabula ngaloko lesikwentako.
11. Jehova uyibusise njani imetamo yetfu yekumemela bantfu eSikhumbutweni? (Hagayi 2:7)
11 Jehova uyibusise kakhulu imetamo yetfu yekumemela bantfu eSikhumbutweni. Nanobe bekunemincele nga-2021 ngenca yakubhedvuka kwe-COVID-19, kodvwa bantfu labangu-21 367 603 beba khona eSikhumbutweni. Loko kuliphindza kabili nehhafu linani laBoFakazi BaJehova emhlabeni! Kuliciniso kutsi Jehova akajajuliswa nje linani lebantfu lababa khona. Kodvwa unendzaba nemuntfu ngamunye loba khona eSikhumbutweni. (Luk. 15:7; 1 Thim. 2:3, 4) Singaciniseka kutsi nasimema bantfu, Jehova usuke asisebentisa kuze sitfole labo labanetinhlitiyo leticotfo.—Fundza Hagayi 2:7.
KUBA KHONA ESIKHUMBUTWENI NANOBE KUNETINKINGA
Jehova uyayibusisa imetamo lesiyentako yekugubha Sikhumbuto (Buka sigaba 12) e
12. Ngutiphi timo letingenta kube matima kutsi sigubhe Sikhumbuto? (Buka sitfombe.)
12 Jesu waphrofetha kutsi kulamalanga ekugcina sitawubhekana netinkinga letimatima letehlukahlukene, letifaka ekhatsi kuphikiswa ngemalunga emndeni, kuphatfwa kabi, timphi, tifo nalokunye lokunyenti. (Mat. 10:36; Mak. 13:9; Luk. 21:10, 11) Ngaletinye tikhatsi letimo tenta kube matima kutsi sigubhe Sikhumbuto. Yini bazalwane betfu nabodzadze labayentile kuze babhekane naletinkinga, futsi Jehova ubasite njani?
13. Jehova wambusisa njani Artem ngenca yekuba nesibindzi nekutimisela kuze agubhe Sikhumbuto nakasejele?
13 Kuboshwa. Bazalwane betfu lababoshiwe ngenca yekukholwa kwabo, benta konkhe labangakwenta kuze bakhumbule kufa kwaJesu. Cabanga ngesibonelo sa-Artem. NgeSikhumbuto sanga-2020, wavalelwa esitokisini lesincane (lesingema-square-meter langu-17) akanye netiboshwa letingu-5. Nanobe bekaboshiwe, watitfola tintfo lebekatatisebentisa ngeSikhumbuto, futsi wahlela nekutsi atibekele inkhulumo. Kodvwa lamadvodza lebekavalelwe nawo bekabhema kakhulu futsi etfuka. Wenta njani? Wawacela kutsi amane angetfuki futsi angabhemi li-awa linye nje. Artem wamangala ngobe avuma kungabhemi nekungetfuki ngesikhatsi seSikhumbuto. Artem utsi: “Ngacela kuwachazela kutsi Sikhumbuto simayelana nani.” Nanobe atsi awafuni kuva lutfo lolumayelana nalomkhosi, kodvwa ngemuva kwekubona nekuva Artem abeka inkhulumo yeSikhumbuto, abese ayambuta mayelana naso.
14. Yini bantfu baJehova labayenta kuze bakhone kugubha Sikhumbuto nanobe bekune-COVID-19?
14 Kubhedvuka kwe-COVID-19. Ngesikhatsi kubhedvuka lomkhuhlane, bantfu baJehova bebangakhoni kugubha Sikhumbuto matfupha. Kodvwa loko akuzange kubavimbe kutsi basigubhe. c Emabandla lane-Internet asigubha nge-videoconference. Kodvwa tigidzi tebantfu letite i-Internet tasigubha njani Sikhumbuto? Kulamanye emave, kwahlelwa kutsi lenkhulumo isakatwe nge-TV nobe nge-radio. Ngetulu kwaloko, emagatja arekhoda lenkhulumo ngetilwimi letingetulu kwa-500 kuze kutsi labo labasetindzaweni letite i-Internet bakhone kugubha Sikhumbuto. Bazalwane babese bamikisela labanye bazalwane labakuleto tindzawo lenkhulumo lerekhodiwe.
15. Yini loyifundza esibonelweni saSue?
15 Kuphikiswa ngulamanye emalunga emndeni. Kulabanye, inkinga lenkhulu leyenta bangakhoni kuba seSikhumbutweni kutsi baphikiswa ngulamanye emalunga emndeni. Cabanga ngesibonelo saSue, lodadisha liBhayibheli nalomunye Fakazi. Nga-2021, ngelilanga lebelingaphambi kwekutsi kube Sikhumbuto, Sue watjela loFakazi kutsi angeke akhone kugubha Sikhumbuto ngenca yekutsi uphikiswa ngulamanye emalunga emndeni. LoFakazi wafundza Lukha 22:44. Wabese uyamchazela kutsi nasibhekana netinkinga, kufanele silingise sibonelo saJesu ngekutsi sithantaze kuJehova futsi setsembele kuye ngalokuphelele. Ngelilanga lelilandzelako, wakhona kuba nesinkhwa neliwayini, futsi wabukela Kukhonta Kwasekuseni ku-jw.org. Ngemuva kwekushona kwelilanga, waya ekamelweni lakhe futsi walalela inkhulumo yeSikhumbuto ngelucingo. Ngemuva kwaloko, Sue wabhalela loFakazi lobekadadisha naye liBhayibheli watsi: “Ungikhutsate kakhulu itolo. Ngente konkhe lebengingakhona kukwenta kuze ngigubhe Sikhumbuto, futsi Jehova ungisite kakhulu. Ngijabula kakhulu, futsi ngiyabonga!” Ucabanga kutsi Jehova angakusita yini nawe nawusesimeni lesifanako?
16. Yini lesenta siciniseke kutsi Jehova utayibusisa imetamo yetfu yekuba seSikhumbutweni? (KubaseRoma 8:31, 32)
16 Jehova ujabula kakhulu ngemetamo lesiyentako kuze sikhumbule kufa kwaJesu. Singaciniseka kutsi utasibusisa nasikhombisa kutsi siyabonga ngaloko lasentele kona. (Fundza KubaseRoma 8:31, 32.) Ngako shengatsi singatimisela kuba khona eSikhumbutweni nakulomnyaka, futsi sente konkhe lesingakwenta kuze sentele Jehova lokunyenti ngesikhatsi seSikhumbuto.
INGOMA 18 Kukhombisa Kubonga Ngenhlawulo
a NgaLesibili, April 4, 2023, tigidzi tebantfu emhlabeni wonkhe titawube tikhumbula kufa kwaKhristu. Kungenteka labanye batawube bacala kuba khona. Labanye boFakazi lasebaphelelwe ngumdlandla wekukhonta Jehova nabo batawube bakhona ngemuva kweminyaka bangabi khona. Labanye batawuncoba timo letimatima kuze babe khona. Kunobe ngusiphi simo lobhekene naso, ciniseka kutsi Jehova utawujabula nganobe nguyiphi imetamo loyentako kuze ube khona.
b Lamanye emagama ashintjiwe.
c Ku jw.org, buka sihloko lesitsi “2021 Memorial Commemoration.”
