1-2. Juu ya ki kila muaka tuli twaya ku Kibukisio?

 MIAKA 2 000 eevi yaapitile, Yesu waafumiizie bukose bwakue juu yeetu eevi kutwizuila nzila ya kupata bukose bwa loonse. Mu nsita ya busiku ntaanzi ya kufua kwakue, Yesu waabalandile basambi bakue baye balanguluka ngeleelo yakue ya ntono, kupitila kukita kintu kimo kileengelesie kibiikile mukati mukate ni divai.​—1 Bakor. 11:23-26.

² Tuli twanakila malaizio akue Yesu, paantu tumutonene saana. (Yoan. 14:15) Kila muaka, mu milungu ya ntaanzi ni ya kisia Kibukisio, tuli twalangilila kutasia palua keelia kyaakitile Yesu, kupitila kutontonkania ni kupepa palua mana ya lufu lwakue ku bantu. Kabili, tuli twasekelela kukila kukwasia miilo ya kusimikila ni kukinkizia bantu bengi kine kyakitika, eevi beeze basaangue pamo ni fwefue ku keekio kintu kiibeleele. Kabili, tupinguile eevi te kunti tukabe kulekelela kintu kyonse kitwanzie kuya ku Kibukisio.

3. Tuli kulondoluela ki mu leeli lyasi?

³ Mu leeli lyasi, tuli kulondoluela nzila itatu ili yalangililamo bantu bakue Yehova nangue bali baikwinda kukita Kibukisio kya lufu lwakue Yesu. Bali balangilila evio: (1) kupitila kukita Kibukisio nga evelia vibaasambiliziiziwe na Yesu, (2) kupitila kukupa bantu bange ku Kibukisio, ni (3) kupitila kukita Kibukisio anzia kine bali mu aali ikolele.

4. Ni biipuzio ki bili byaasukua kila muaka ku Kibukisio, kabili juu ya ki te tupalile kupuulula bebio bisinka? (Luka 22:19, 20)

⁴ Kila muaka ku Kibukisio, tuli twatuilizia lyasi liswapiile Bibilia lili lyaasuka biipuzio bingi mu nzila yunvuikile buino. Tuli  twasambilila juu ya ki bantu bakabiile kilubula mulandu, kabili tuli twafikiila kumana kine lufu lwa muntu umo kunti lwalipila siani mazaambi a bantu bengi. Tuli twalangulusiiwa mana ya mukate ni divai, kabili tuli twalangulusiiwa palua baalia bapalile kulia mukate ni kumina divai. (Soma Luka 22:19, 20.) Kabili tuli twatontonkania palua mpaalo ipembeele baalia bali ni kiswapilo kya kwikala pa kyalo. (Is. 35:5, 6; 65:17, 21-23) Te tupalile kupuulula bebio bisinka. Mabilioni a bantu, teezi kusaangua amanine bebio bisinka, kabili te amanine ngeleelo yakue Yesu viili yasaangua yali ya mana. Kabili te beezi kukita Kibukisio nga evelia vyaasambiliziizie Yesu. Juu ya ki kili evio?

5. Kisia batumua bengi kufua, bantu baatendekele siani kulanguluka lufu lwakue Yesu?

⁵ Musita uniini kisia batumua bengi bakue Yesu kufua, Bakristu ba bufi baalukile seemu ya kilonghaano. (Mat. 13:24-27, 37-39) Baali balanda ‘bya bufi mukubemba bazumizi kuti babakoonke.’ (Miil Bat. 20:29, 30) Mu bebio “bintu bya bufi” byaatendekele kusambilizia Bakristu ba bufi, mubanga mwali lisambilizio limo lilandile nangue Yesu taaipeelesie ‘limo kwaluka ngeleelo kuti afumie bibalo ao mazaambi a bantu bengi’ nga vilandile Bibilia. Inzi, baali basambilizia nangue ngeleelo yakue, ipalile kuya yafumiiwa-fumiiwasie. (Baeb. 9:27, 28) Loonu, bantu bengi bazumiine leelio lisambilizio lya bufi. Bali baya ku tunisa kila mulungu, ni lunge kila busiku, eevi kuya kulanguluka ngeleelo yakue Yesu, elia ili yakuutua na kanisa ka Katolika nangue “Ukaristia.” b Bantu ba mu tunisa tunge, te beezi kulanguluka lingi lufu lwakue Yesu, inzi lubali bakita evio, te beezi kusaangua bamanine buino mana ya ngeleelo yakue Yesu. Bange kunti baiipuzia eevi: ‘Eba, paapo lufu lwakue Yesu lulangiliile kakiine nangue mazaambi ane kunti aeleelua?’ Juu ya ki bali baipuzia keekio kiipuzio? Paantu, baasininkiziiziwe kale na bantu bali balanda nangue mazaambi teaviinda kweleelua kupitila lufu lwakue Yesu. Basambi bakue Yesu bali babakwasia siani bantu bamane mana ya ngeleelo yakue Yesu, ni nzila ipalile ya kulangulukilamo lufu lwakue?

6. Mu muaka wa 1872, kikundi kya basambi ba Bibilia kyaafikiile kumana ki?

⁶ Mu 1870, kikundi kya basambi ba Bibilia kyaali kyatungulwilue na Charles Taze Russell, kyaatendekele kusambilila saana palua Maleembo. Baali batonene kumana mana iine ya ngeleelo yakue Yesu, kabili kine lufu lwakue lupalile kuya lwalangulukua siani. Mu muaka wa 1872, baafikiile kumana nangue kakiine Yesu waafumiizie kilubula mulandu juu ya bantu bonse. Te baasiele basuungile palwabo bunke beelia bibaasambiliile. Inzi, baasalanganiizie bintu bibaasambiliile kupitila bitabu, ni ma kazeeti. Musita uniini kisia paapo, baakoonkele mufuano wa Bakristu ba mu miaka mia ya ku ntendeko, ni kutendeka kukolonghana limosie ku muaka eevi kukita Kibukisio.

7. Tuli mukunoonkelamo siani kupitila bintu byaakebuluile basambi ba Bibilia ba ntaanzi?

⁷ Loonu, tuli mukunoonkelamo kupitila bintu byaakebuluile babo Bakristu mu miaka ingi yaapitile. Mu nzila ki? Yehova waakitukwasia kwinika mana ya ngeleelo yakue Yesu, ni keelia kyakakitua na ezio ngeleelo palwetu ni palua bantu bonse. (1 Yoan. 2:1, 2) Kabili twaakisambilila nangue Bibilia ili yabapeela bantu bali bamusaansamusia Leeza biswapilo bibili. Bantu baniini bakapeelua bukose  busiizi kufua ku muulu, ni mamilioni a bantu bange akapata bukose bwa loonse pa kyalo. Tuli twamupalama Yehova musita utuli twatontonkania weene vyatutonene saana, ni vituli twanoonkelamo kila muntu kupitila ngeleelo yakue Yesu. (1 Pet. 3:18; 1 Yoan. 4:9) Kansi, nga evelia vyaakitile balupua betu ba kisinka ba mu nsita ya kale, tuli twabakupa bantu bange eevi beeze beyunge ni fwefue pa kukita Kibukisio nga evelia Yesu vyaabasambiliziizie basambi bakue.

8. Bantu bakue Yehova bali bakita siani eevi kubakupa bange ku Kibukisio? (Mona foto.)

⁸ Bantu bakue Yehova bakita kale miaka ingi bakupa bange ku Kibukisio. Ku ntendeko ya muaka wa 1881, balupua ni bankazi mu États-Unis baakupilue, mu nsesi yakue lupua umo mu Allegheny ku Pennsylvania, eevi bakite keekio kintu kiibeleele. Kisia paapo, kila kilonghaano kyaatendekele kukita Kibukisio palwakue. Mu Muezi wa 03, 1940, bakasimika baalandilue nangue kunti bamukupa kila muntu ali kutona, wa mu kazonga kabo. Mu 1960, Beteli yaafumiizie lya kuanza mikupo ya ku mapapie ni kupeela bilonghaano. Kutendekela paapo, mabilioni a mikupo palua Kibukisio aakisalanghaniiwa. Juu ya ki tuli twapisia nsita ingi saana ni kwikwinda kukupa bange?

9-10. Ni baani bali banoonkelamo musita utuli twaikwinda kubakupa bange beeze ku Kibukisio? (Yoane 3:16)

⁹ Nsaambu imo ili yalengia tubakupe bange beeze ku Kibukisio ni eezi, tutonene baalia bali baiza ku Kibukisio lya kuanza, basambilile kisinka palua keelia kitwaakitiilue na Yehova ni Yesu fwe bonse. (Soma Yoane 3:16.) Tuli twasaangua twaswapiile nangue beelia bibali kumona ni kunvua ku Kibukisio, bili kubakinkizia  batone kusambilila bingi, ni kwaluka babombi bakue Yehova. Inzi, kuli ni bange bali banoonkelamo.

¹⁰ Kabili, tuli twabakupa baalia basili bamubombela Yehova kabili. Tuli twabakupa eevi kubalangulusia nangue Yehova atwaliliilesie kubatona. Bengi bali baitabila mukupo weetu, kabili tuli twasekelela saana kubamona. Kuiza ku Kibukisio kuli kwabalangulusia vibabanga basekelela kumubombela Yehova mu nsita ya kale. Mona mufuano wakue Monica. c Mu kipindi kya buluele bwa korona (COVID-19), waatendekele kabili kusimikila. Kisia kusaangua ku Kibukisio kya mu muaka wa 2021, waalandile eevi: “Keekio Kibukisio kyaali kyaibeleele saana kuli neene. Lya kuanza kisia kukita miaka 20, naaviindile kubasimikila bantu ni kubakupa ku Kibukisio. Naaikwindile saana eevi kubakupa bange, paantu ndi mukutasia saana palua beelia byaakitile Yehova ni Yesu palwane.” (Malum. 103:1-4) Atasie kine bantu baitabila ao bakaana mukupo weetu, tuli twatwalilila kubakupa bange kwa mute beeze ku Kibukisio twamanine nangue Yehova ali watasia palua kwikwinda kwetu.

11. Yehova ali wapaala siani musita utuli twaikwinda kubakupa bantu beeze ku Kibukisio? (Hagai 2:7)

¹¹ Yehova ali wapaala saana kwikwinda kwetu musita utuli twabakupa bantu eevi beeze ku Kibukisio. Mu 2021, anzia kine kubanga kwali bintu binge byaali byakaaniiziwe kukita juu ya buluele bwa korona (COVID-19), bantu baasaangilue ku Kibukisio baafikile milioni makumi abili na umo, mia itatu ni makumi sita na saba elufu, mia sita ni batatu (21 367 603). Ezio mpendua, yakeba kwalukamo mara ibili mu mpendua ya Bakasininkizia Bakue Yehova mu kyalo! Yehova teezi kupoozasie maano ku mpendua ya bantu bali basaanguako. Ali wapooza maano ku kila muntu ali wasaangua ku Kibukisio. (Luk. 15:7; 1 Tim. 2:3, 4) Tuli ni kisinka nangue musita utuli twabapeela bange mikupo, Yehova ali watukwasia kubapata baalia bali ni mitima iweeme.​—Soma Hagai 2:7.

12. Ni aali ki ili yalengia paange kiye kyakolele kusaangua ku Kibukisio? (Mona foto.)

¹² Yesu waalandile ntaanzi nangue, mu kipindi kya nsiku ya mpeleezio twakasaakaana ni aali ingi ikolele, nga evelia kupingua na bantu ba mu lupua, kukyuziiwa, maluele ali asalanghana lubilo ni maavia ange engi. (Mat. 10:36; Mark. 13:9; Luk. 21:10, 11) Nsita inge, azo maavia ali alengia kiye kyakolele kukita Kibukisio kya lufu lwakue Yesu. Balupua ni bankazi betu bali bakita siani eevi kuluisia maavia nga azo, ni Yehova ali wabakwasia siani?

13. Yehova waapaalile siani mibeele ya kusipa yakue Artem pamo ni bupinguzi bwaakwete musita lwabanga wali mu buloko?

¹³ Kukakua. Baalia balupua betu bakakilue palua kiketekelo kyabo, bali baikwinda saana kukita Kibukisio kya lufu lwakue Yesu. Mona mufuano wakue Artem. Mu kipindi kya milungu ya ntaanzi ni ya kisia Kibukisio kya mu 2020, waali wakakilue mu kiumba kiniini kya buloko kibanga kyabiikuamo bantu basano pa musita umo. Anzia kine waali wakakilue, waabombiizie beelia byaali wakwete eevi bimukwasie palua mukate ni divai. Kabili waapaangile kulanda lyasi lya Kibukisio palwakue muine. Inzi bantu bange, baalia babanga bali mu kiumba pamo nakue, baali bapeepa ni kulanda bulanzi bubiipile. Weene waakitile siani? Waabaloombele bakite atasie nsa imo bila balanda bulanzi bubiipile ni kupeepa. Artem waapapile kumona baalia baali wali naabo mu buloko bila bapeepa ni kubombia  bulanzi bubiipile musita wa Kibukisio. Artem walanda eevi: “Naaipeele eevi kulanda naabo palua Kibukisio.” Anzia kine baalandile nangue te batonene kunvua palua Kibukisio, kisia kumumona ni kumunvua Artem wakita Kibukisio, baamwipuziizie bintu byonse palua keekio kyaali wakita.

14. Bantu bakue Yehova baakiviinda siani kukita Kibukisio anzia buluele bwa korona (COVID-19)?

¹⁴ Buluele bwa korona (COVID-19). Mu keeki kipindi kya buluele bwa korona, bantu bakue Yehova te baakiviinda kukita Kibukisio bali pamo. Inzi, keekio te kyakilengia bandue kukita Kibukisio. d Beelia bilonghaano byaakiba byali ni buviinde bwa kwingila ku Enternete, byakiba byakita Kibukisio kupitila kukuutana ku viideo. Ale palua mamilioni a bantu baakiba baandua kwingila ku Enternete? Mu byalo binge, mipaango yaakitilue eevi lyasi lilandue ku televizio ao ku radio. Kukila pakaako, misambo yaakopiizie maasi mu ndimi ikilile pa 500, eevi baalia bali mu tuzonga twa kule ni beene bakite Kibukisio. Kabili, balupua baatwele maasi akopiiziwe mu mazui ku balupua  bange baali bakabiile azo maasi mu tooto tuzonga.

15. Weewe, wasambilila ki kupitila musambi umo wa Bibilia ali wakuutua Sue?

¹⁵ Kupingua na bantu ba mu lupua. Palua kukita Kibukisio, bange bali bapata buavia bukata saana bwa kupingua na bantu ba mu lupua lwabo. Mona mufuano wa musambi umo wa Bibilia ali wakuutua Sue. Mu 2021, busiku bwa kukiila Kibukisio, Sue waamulandile mwalimu wakue wa Bibilia nangue takaba kuya ku Kibukisio, paantu bantu bange ba mu lupua lwakue baali bamupinga. Mwalimu wakue wa Bibilia waasomene lileembo lya Luka 22:44. Kisia, ozo mwalimu waalondoluele pamo nakue nangue musita utuli twasaakaana ni maavia, tupalile kukoonka mufuano wakue Yesu wa kupepa kuli Yehova ni kumuswapila saana Weene. Busiku bwaakoonkelepo, Sue waateaniizie mukate ni divai, kabili waakoonkele ntantiko iibeleele ya Lupupo lwa Lukele-keele Palua Kibukisio mu jw.org. Mu kyungulo kya bobo busiku, musita lwabanga wali bunke mu kiumba, waaiungile ku Kibukisio kupitila telefone. Kisia paapo, Sue waamuleembeele eevi mwalimu wakue wa Bibilia: “Lukeele, weewe waakinkoselezia saana. Naakikwinda saana eevi nsaangue ku Kibukisio, kabili Yehova waakinkwasia. Kakiine nsiviinda kulondolola nsaansa indi naayo, ni sante yane!” Eba ni weewe, uli watontonkania nangue Yehova kunti wakukwasia kine wasaakaana ni aali ipaleene ni ezio?

16. Juu ya ki tusininkiziizie nangue Yehova wakaba kupaala kwikwinda kwetu palua kusaangua ku Kibukisio? (Baroma 8:31, 32)

¹⁶ Yehova ali wasekelela saana musita utuli twaikwinda kukita Kibukisio kya lufu lwakue Yesu. Kunti twasininkizia nangue Yehova wakaba kutupaala kine twalangilila kutasia palua keelia kyaatukitiile. (Soma Baroma 8:31, 32.) Kansi tuye twapinguile kusaangua ku Kibukisio onu muaka, kabili mu milungu ya ntaanzi ni ya kisia Kibukisio, twikwinde kukita bingi mu miilo yakue Yehova.