1-2. Lande na kɔtɔso lo Eohwelo ɔnɔnyi tshɛ?

 AMBETA ɛnɔnyi suke la 2000 wakakimɔ Yeso lɔsɛnɔ lande lo wahɔ aso ndo wakandatodiholɛ mboka dia sho nkondja lɔsɛnɔ la pondjo. L’otsho wa la ntondo ka nde mvɔ, Yeso akadjangɛ ambeki ande dia vɔ mbohɔka tshelo yande ya ngandji oma lo sɛlɛmɔnyi kaha kawotake kakandasale lo nkamba la mapa ndo la vinyɔ.​—1 Kɔr. 11:23-26.

² Sho nkitanyiyaka didjango dia Yeso nɛ dia sho mboolangaka efula. (Jni. 14:15) Ɔnɔnyi tshɛ, lo nshi ya Eohwelo, sho mɛnyaka lowando laso lo kɛnɛ kakandatosalɛ dia totshungola etena kakanaso yimba lo dɔmbɛlɔ lo kɛnɛ kalembetshiya nyɔi kande. La lowando tshɛ, sho pamiaka olimu aso w’esambishelo ndo sho keketshaka anto efula dia monga kaamɛ la so lo diaaso dia laande sɔ. Lo mɛtɛ, tamboyashikikɛ dia mbetawɔ diaha kaanga ɛngɔ ɔtɔi toshimba dia mbɔtɔ lo Eohwelo.

3. Kakɔna kayotɔsɛdingola lo sawo nɛ?

³ Lo sawo nɛ, tayɔsɛdingola toho tosato tadja ekambi wa Jehowa welo w’efula dia mbohɔ nyɔi ka Yeso: 1) Vɔ salaka Eohwelo lo ndjela ɛnyɛlɔ kakatshike Yeso, 2) vɔ mbelɛka anto akina oya lo Eohwelo, ndo 3) vɔ salaka lo Eohwelo kaanga l’atei w’ekakatanu.

4. Ambola akɔna wakadimɔma ɔnɔnyi tshɛ lo Eohwelo, ndo lande na kahatahombe mbɔsa akambo wa mɛtɛ asɔ oko awui w’anyanya? (Luka 22:19, 20)

⁴ Ɔnɔnyi tshɛ lo Eohwelo, sho pokamɛka sawo di’oma lo Bible diasha ekadimwelo wokɛma hwe lo ambola amɔtshi.  Sho mbekaka lande na kele anto l’ohomba w’oshinga w’etshungwelo ndo woho wele nyɔi k’onto ɔtɔi koka nkomba pɛkato y’anto efula. Vɔ toholaka kɛnɛ kalembetshiya mapa la vinyɔ ndo waa na wahomba ndɛ mapa ndo nnɔ vinyɔ. (Adia Luka 22:19, 20.) Ndo sho kanaka yimba l’ɛtshɔkɔ wayokondja wanɛ wayɔsɛna pondjo pondjo lanɛ la nkɛtɛ. (Isa. 35:5, 6; 65:17, 21-23) Hatohombe mbɔsa akambo wa mɛtɛ asɔ oko awui w’anyanya. Miliyara y’anto hawoshihodia akambo asɔ, ndo vɔ hawoshihodia nɛmɔ diele la olambo wa Yeso. Ndo nto, vɔ hawosale Eohwelo ka nyɔi kande lo woho wɔtɔnɛ la kɛnɛ kakandetsha ambeki ande. Lande na kediɔ ngasɔ?

5. L’ɔkɔngɔ w’apɔstɔlɔ efula mvɔ, ngande wakatatɛ anto mbohɔ nyɔi ka Yeso?

⁵ Yema tshitshɛ l’ɔkɔngɔ w’apɔstɔlɔ waki Yeso mvɔ, Akristo wa kashi wakayɔtɔka l’etshumanelo. (Mat. 13:24-27, 37-39) Vɔ mbutaka “akambo wele bu mɛtɛ dia nkonya ambeki dia vɔ mbayela.” (Ets. 20:29, 30) Dui dimɔtshi l’atei wa “akambo wele bu mɛtɛ” wakatatɛ mbetsha Akristo wa kashi aki ɔnɛ Yeso konambola demba diande “mbala ɔtɔi lo pondjo dia mɛmba pɛkato y’anto efula” oko wata Bible, koko ɔnɛ olambo ande ɔsɔ pombaka kimɔmaka mbala ko mbala. (Hɛb. 9:27, 28) Ɛlɔ kɛnɛ, anto efula wele l’etema w’ɛlɔlɔ mbetawɔka wetshelo wa kashi ɔsɔ. Vɔ tshɔka l’ɔtɛmwɛlɔ lomingu tshɛ kana tena dimɔshi lushi la lushi dia olambo wa Yeso welɛwɔ l’ɔtɛmwɛlɔ w’aseka Mupɛ ɔnɛ “olambo wa lemba l’anto.” b Atshunda amɔtshi w’ɛtɛmwɛlɔ mbohɔka nyɔi ka Yeso lo pai, koko efula k’anto wa lɔkɔ hawoleke nshihodia kɛnɛ kalembetshiya olambo wa Yeso. Amɔtshi ndjambolaka ɔnɛ: ‘Onde nyɔi ka Yeso koka dimanyiya mɛtɛ pɛkato yami?’ Lande na kayaokawɔ dimbola sɔ? Lo ntena dimɔtshi, vɔ wakasɛngiyama oma le wanɛ wahetawɔ di’olambo wa Yeso koka dimanyiya pɛkato. Ko kakɔna kakasale ambeki wa mɛtɛ wa Yeso la ntondo ka dikambo sɔ?

6. Lo 1872, kakɔna kakayoshihodiaka djui y’ambeki wa Bible?

⁶ L’ekomelo ka ntambe ka 19, olui ɔmɔtshi w’ambeki wa Bible wakalɔmbwamaka oma le Charles Taze Russell wakatatɛ mbeka Afundelo lo yoho ya lotshimola. Vɔ wakalangaka mbeya akambo wa mɛtɛ wendana la nɛmɔ di’olambo wa Yeso ndo woho wakawahombaka mbohɔ nyɔi kande. Lo 1872, vɔ wakayoshihodiaka l’ekimanyielo ka Bible dia Yeso akayakimɔ oko oshinga w’etshungwelo dikambo di’anto tshɛ. Vɔ konama awui wakawashola asɔ lo wahɔ awɔ hita. Koko, vɔ wakewoya anto akina awui akɔ lo tshimbo y’abuku, ya tojurnalɛ ndo ya waa periodikɛ. Ndo yema tshitshɛ oma laasɔ, lo mbokoya Akristo wa lo ntambe ka ntondo, vɔ wakatatɛ nsangana mbala ɔtɔi l’ɔnɔnyi dia nsala Eohwelo.

7. Wahɔ akɔna wakondjaso oma l’eyangelo wakasale ambeki wa Bible wa ntondo asɔ?

⁷ Ɛlɔ kɛnɛ, tekɔ lo nkondja wahɔ oma l’eyangelo wakasale Akristo wa mɛtɛ asɔ ambeta ɛnɔnyi efula. Lo woho akɔna? Jehowa ambotokimanyiya dia sho nshihodia kɛnɛ kalembetshiya olambo wa Yeso ndo kɛnɛ kayotokondja ndo kayokondja anto tshɛ oma lɔkɔ. (1 Jni. 2:1, 2) Tambeka nto dia Bible mbishaka weho ehende w’elongamelo le anto wangɛnyangɛnya Nzambi. Elongamelo kɛmɔtshi ekɔ ka lɔsɛnɔ lahavɔki l’olongo dikambo dia anto amɔtshi ndo kekina ekɔ ka  lɔsɛnɔ la pondjo lanɛ la nkɛtɛ le miliyɔ kina y’anto. Sho ndjasukanyaka la Jehowa etena kasɛdingolaso polo lo yɛdikɔ yakɔna yatolangande efula ndo woho wakondja ɔmɔmɔ la l’atei aso wahɔ oma l’olambo wa Yeso. (1 Pe. 3:18; 1 Jni. 4:9) Laasɔ, l’ɛnyɛlɔ k’anangɛso wa kɔlamelo wa lo nshi y’edjedja, sho mbelɛka anto akina dia ndjosala la so Eohwelo ka nyɔi ka Yeso lo yoho yɔtɔnɛ l’ɛnyɛlɔ kakandatotshikɛ.

8. Kakɔna kambosala ekambi wa Jehowa dia mbelɛ anto akina oya lo Eohwelo? (Enda osato.)

⁸ Aya ɛnɔnyi efula welɛ ekambi wa Jehowa anto akina oya lo Eohwelo. Oma ko 1881, anangɛso l’akadiyɛso wa l’États-Unis wakelamɛ dia tosangana kaamɛ lo luudu lɔmɔtshi laki ɔnangɛso ɔmɔtshi la Allegheny, la Pennsylvania, lo diaaso dia laande sɔ. L’ɔkɔngɔ diko, etshumanelo tshɛ kakayotatɛka nsala Eohwelo tɔamɛ. Lo Ngɔndɔ ka sato 1940, wakewoya apandjudi dia wakakoke mbelɛ onto tshɛ la l’ɛtshi kawɔ ka nkɛtɛ lakɛnya nsaki. Lo 1960, mbaki mbala ka ntondo ka Bɛtɛlɛ ntomɛ tshumanelo akatshi wa leeta. Ntatɛ oma l’etena kɛsɔ, miliyara y’akatshi wa leeta w’oya lo Eohwelo yekɔ lo kahanyema. Lande na kakambaso la wenya aso ndo kadjaso welo dia mbelɛ anto akina?

9-10. Waa na wakondja wahɔ oma lo welo wadjaso dia mbelɛ anto akina oya lo Eohwelo? (Joani 3:16)

⁹ Ɔkɔkɔ ɔmɔtshi welɛso anto akina oya lo Eohwelo ele sho nangaka dia vɔ mbɔtɔ mbala kawɔ ka ntondo dia mbeya akambo wa mɛtɛ wendana la kɛnɛ kakasale Jehowa nde la Yeso lo dikambo diaso sho tshɛ. (Adia Joani 3:16.) Tekɔ la elongamelo dia kɛnɛ kɛnawɔ ndo kokawɔ lo Eohwolo kayowatshutshuya  dia vɔ mbeka akambo efula ndo nkoma ekambi wa Jehowa. Ndo anto akina vɔ lawɔ kodjaka wahɔ.

¹⁰ Sho mbelɛka nto ndo wanɛ wambotshikaka kambɛ Jehowa. Sho salaka dui sɔ dia mbaohola dia Nzambi aakatetemala mbaoka ngandji. Efula kawɔ mbetawɔka leeta laso ndo sho mongaka l’ɔngɛnɔngɛnɔ w’efula dia mbaɛna. Mbɔtɔ lo Eohwelo mbaoholaka woho wakawangɛnangɛnaka kambɛ Jehowa lo nshi yakete. Tɔsɛdingole ɛnyɛlɔ kaki Monica. c Lo nshi ya hemɔ ka COVID-19, nde akayotatɛka nsambisha nto. L’ɔkɔngɔ wa nde mbɔtɔ lo Eohwelo lo 2021, nde akate ate: “Eohwelo kɛsɔ kakonge mɛtɛ diaaso dia laande le mi. Mbala ka ntondo l’ɔkɔngɔ w’ɛnɔnyi 20, lakonge l’akoka wa nsambisha anto ndo mbaelɛ lo Eohwelo. Lakasale kɛnɛ tshɛ kakamakoke nsala dia ɛmbelɛ anto akina nɛ dia lekɔ la lowando lo kɛnɛ kakasalɛ Jehowa nde la Yeso.” (Os. 103:1-4) Oyadi anto mbetawɔ leeta laso kana bu, sho mbelɛka l’ohetoheto tshɛ anto akina oya lo Eohwelo, teya dia Jehowa ngɛnangɛnaka welo wadjaso.

11. Ngande watshɔkɔla Jehowa welo wadjaso dia mbelɛ anto oya lo Eohwelo? (Hangayi 2:7)

¹¹ Jehowa tshɔkɔlaka lo yɛdikɔ y’efula welo wadjaso dia mbelɛ anto oya lo Eohwelo. Lo 2021, kaanga mbakawatoshimbe awui efula l’ɔtɛ wa COVID-19 takasangana anto 21367603. Lofulo lɔsɔ lekɔ suke la lofulo l’Ɛmɛnyi wa Jehowa wa l’andja w’otondo ndodia mbala hiende l’etenyi! Lo mɛtɛ, Jehowa hayasha tsho lo lofulo l’anto wɔtɔ lo Eohwelo, koko nde ndjashaka le onto ndo l’onto. (Luka 15:7; 1 Tim. 2:3, 4) Sho koka monga l’eshikikelo di’etena kashaso anto akina akatshi wa leeta, Jehowa tokimanyiyaka dia ntana anto wele l’etema w’ɛlɔlɔ.​—Adia Hangayi 2:7.

12. Awui akɔna wakoka todjɛ wekamu dia mbɔtɔ lo Eohwelo? (Enda osato.)

¹² Yeso akate dia lo nshi y’ekomelo, tayotenyanya ntena dia wolo efula, ɛnyɛlɔ ɔlɔshamelo wa lo nkumbo, ɛhɛnyɔhɛnyɔ, ata, elando ndo awui akina. (Mat. 10:36; Makɔ 13:9; Luka 21:10, 11) Ntena dimɔtshi, awui asɔ todjɛka wekamu dia mbohɔ nyɔi ka Yeso. Kakɔna kakasale anangɛso l’akadiyɛso dia ntondoya ekakatanu ɛsɔ ndo ngande wakaakimanyiya Jehowa?

13. Ngande wakatshɔkɔla Jehowa dihonga ndo eshikikelo kaki la Artem dia nsala Eohwelo etena kakinde lo lokanu?

¹³ Wanɛ wakadjama lo lokanu. Anangɛso wele lo lokanu l’ɔtɛ wa mbetawɔ kawɔ salaka kɛnɛ tshɛ kakokawɔ nsala dia mbohɔ nyɔi ka Yeso. Tɔsɛdingole ɛnyɛlɔ kaki Artem. Lo 2020, mingu ya la ntondo ndo ya l’ɔkɔngɔ wa Eohwelo, nde akadjama lo lokanu lo yidudu yele la mɛtɛlɛ kare 17 nde l’apami akina atanu. Kaanga mbakinde lo lokanu, nde aki l’akoka wa ntana diangɔ diakandakoke nkamba la diɔ oko mapa la vinyɔ, ndo nde akakongɛ dia nsala sawo dia Eohwelo dikambo dia wahɔ ande hita. Koko, wanɛ waki lande kaamɛ lo lokanu wakanɔka mfɔka ndo wakakambaka l’ɛtɛkɛta wa kɔlɔ otsha le nde. Kakɔna kakandasale? Nde akaalɔmbɛ dia kana vɔ kokaka ntshika nnɔ mfɔka ndo mbotondjɛ ɛtɛkɛta wa kɔlɔ lo yɛdikɔ ya wonya wa ntango ɔtɔi oto. Aha la Artem nongamɛ dia vɔ wayosala dui sɔ, wanɛ waki la nde lo lokanu asɔ wakatshike nnɔ mfɔka  ndo ntondjɛ ɛtɛkɛta wa kɔlɔ etena kakandasalaka Eohwelo. Artem mbutaka ɔnɛ: “Dimi lakawatɛ awui wendana la Eohwelo.” Kaanga mbakawate dia hawolange mboka awui wendana la dikambo sɔ, l’ɔkɔngɔ wa vɔ mɛna ndo mboka woho wakasale Artem Eohwelo, vɔ wakawoke ambola tshɛ wendana la dikambo sɔ.

14. Welo akɔna wakadje ekambi wa Jehowa dia nsala Eohwelo kaanga mbaki hemɔ ka COVID-19?

¹⁴ Hemɔ ka COVID-19. L’ɔtɛ wa hemɔ ka Kɔrɔna, ekambi wa Jehowa kokoka mbɔtɔ lo Eohwelo okoko l’okoko. Koko dui sɔ kombashimba dia nsala Eohwelo. d Tshumanelo diaki l’akoka wa nkamba l’Ɛtɛrnɛtɛ wakasale Eohwelo lo tshimbo ya vidɛo kɔfɛranse. Ko kayotoya dia miliyɔ y’anto waki komonga l’akoka wa mbɔtɔ l’Ɛtɛrnɛtɛ? Lo wedja ɛmɔtshi, tɛdikɔ takɔsama dia sawo dia Eohwelo mbeta lo televiziɔ kana lo radio. Ndo nto, filialɛ efula wakadje sawo dia Eohwelo l’ɛtɛkɛta ndekana 500 l’eshinga dia nkimanyiya wanɛ waki l’ahole wa ntale dia nsala Eohwelo. Ndo anangɛso wa kɔlamelo wakɔshi tɛdikɔ dia wanɛ waki l’ohomba w’asawo asɔ mbakondja.

15. Wetshelo akɔna wakondjayɛ oma l’ɛnyɛlɔ ka ombeki ɔmɔtshi wa Bible welɛwɔ Sue?

 ¹⁵ Ɔlɔshamelo w’oma le ase nkumbo. Le amɔtshi, okakatanu woleki wolo le wɔ dia nsala Eohwelo ele ɔlɔshamelo w’oma le ase nkumbo. Tɔsɛdingole ɛnyɛlɔ k’ombeki ɔmɔtshi wa Bible welɛwɔ Sue. Lo 2021, lushi ɔtɔi la ntondo ka Eohwelo, Sue akatɛ ombetsha ande wa Bible dia l’ɔtɛ w’ɔlɔshamelo w’ase nkumbo kande nde hatonga l’akoka wa mbɔtɔ lo Eohwelo. Ombetsha ande wa Bible akadia Luka 22:44. Oma laasɔ, nde akoolembetshiya di’etena kahomanaso l’ekakatanu, sho pombaka ndjela ɛnyɛlɔ ka Yeso lo nɔmba Jehowa ndo ndjaɛkɛ le nde tshɛ lo tshɛ. La wedi a pindju, Sue akalɔngɔsɔla mapa la vinyɔ ndo nde akayele ekongelo ka laande k’ɔtɛmwɛlɔ wa la pindju lo jw.org. La dikɔlɔ sɔ, etena kakinde ndamɛ la ngelo, nde akasale Eohwelo lo tshimbo ya telefɔnɛ kande. L’ɔkɔngɔ wa laasɔ, Sue akafundɛ ombetsha ande wa Bible ate: “Wɛ akakeketsha efula loyi. Lakasale kɛnɛ tshɛ kakimi l’akoka wa nsala dia mbɔtɔ lo Eohwelo ndo Jehowa akakimanyiya. Handeye kotɛ ɔngɛnɔngɛnɔ ndo lowando lele lami!” Onde wɛ fɔnyaka dia Jehowa koka kokimanyiya naka wɛ ambotanema la ntondo ka dikambo diakɔ diaamɛ?

16. Lande na keso l’eshikikelo dia Jehowa ayɔtshɔkɔla welo wadjaso dia mbɔtɔ lo Eohwelo? (Rɔmɔ 8:31, 32)

¹⁶ Jehowa mbɔsaka la nɛmɔ welo wadjaso dia mbohɔ nyɔi ka Yeso. Sho koka monga l’eshikikelo dia nde ayotɔtshɔkɔla naka sho mɛnya lowando laso lo kɛnɛ kakandatosalɛ. (Adia Rɔmɔ 8:31, 32.) Laasɔ, nyɛsɔ toyashikikɛ dia mbɔtɔ lo Eohwelo k’ɔnɔnyi ɔnɛ ndo nsala kɛnɛ tshɛ kakokaso nsala dia sho ndeka ndjasha l’elimu wa lo nyuma lo nshi ya Eohwelo.