1, 2. ¿Tuku xlakata anaw akgatunu kata Akxni lakapastakkan akxni tinilh Cristo?

 TITAXTUNITA 2,000 kata lata Jesús mastalh xlatamat kimpalakatakan, chu xlakata uma akinin kgalhiyaw takgalhkgalhin pi tlan nalatamayaw putum kilhtamaku. Katsisni akxni nina xniy, Jesús lakkaxwililh akgtum ni xatuwa taway niku maklakaskilh kaxtalanchu chu vino. Kalimapakgsilh kstalaninanin pi chuntiya xtlawakgolh xlakata xlakapastakkgolh lanka tapaxkit nema xla xʼama kalimasiyani (1 Cor. 11:23-26).

² Akinin kstalaninanin Cristo kgalhakgaxmataw xlimapakgsin Jesús xlakata paxkiyaw (Juan 14:15). Akxni lakapastakaw akxni tinilh Cristo, limasiyayaw la xlilhuwa xtapalh liʼakxilhaw xtamakamastan. Limaxtuyaw kilhtamaku natlawayaw oración chu nalilakpuwanaw tuku kilhchanima chuna la nilh. Nachuna, lu xatapaxuwan limaxtuyaw kilhtamaku xlakata nakawaniyaw amakgapitsin latamanin pi kakinkataminkgon akxni nalakapastakaw akxni tinilh Cristo. Chu ni mastaputunaw talakaskin pi wi tuku natlawa nila naʼanaw.

3. ¿Tuku naʼakxilhaw kʼuma artículo?

³ Kskujnin Jehová lu liskujnitaw xlakata nalakapastakaw akxni tinilh Cristo. Kʼuma artículo nalichuwinanaw pulaktutu tuku chuna limasiya: 1) lakapastakaw akxni tinilh Cristo chuna la Jesús wa, 2) kawaniyaw amakgapitsin latamanin pi kakinkatatamakxtumikgon chu 3) lakapastakaw akxni tinilh Cristo maski tuwa tuku titaxtuyaw.

4. 1) ¿Tuku xaxlikana lichuwinankan akgatunu kata Akxni lakapastakkan akxni tinilh Cristo? (Lucas 22:19, 20). 2) ¿Tuku xlakata lu xlakaskinka pi naʼakgatekgsaw umakgolh tuku xaxlikana?

⁴ Akgatunu kata akxni anaw Akxni lakapastakkan akxni tinilh Cristo, kgaxmataw akgtum taʼakgchuwin nema takilhtinit kBiblia niku kgalhtikan makgapitsi takgalhskinin. Akgtum liʼakxilhtit, lichuwinankan tuku xlakata maklakaskinaw talakgmaxtut chu la litamakgtayakgo lhuwa latamanin kaj xlakata chatum chixku nilh. Kinkamalakapastakakanan tiku tlan wakgo kaxtalanchu chu vino, chu tuku kilhchanima uma (kalikgalhtawakga Lucas 22:19, 20). Na kinkamalakapastakakanan tasikulunalin nema nalipaxuwakgo tiku nalatamakgo kKatiyatni (Is. 35:5, 6; 65:17, 21-23). Lu lhuwa xtapalh kiliʼakxilhatkan pi akgatekgsaw putum uma. Wilakgo lhuwa latamanin tiku ni akgatekgskgo uma chu ni limasiyakgo pi xtapalh liʼakxilhkgo xtamakamastan Jesús. Nachuna, ni lakapastakkgo akxni tinilh Cristo chuna la Jesús wa pi xlitatlawat. ¿Chu tuku xlakata nichuna tlawakgo?

5. Akxni xnikgonita makgapitsi apóstoles, ¿la tsukukgolh lakapastakkgo Cristo makgapitsi latamanin?

⁵ Akxni nina makgas xnikgonit makgapitsi xʼapóstoles Jesús, tiku xwankgo pi kstalaninanin Cristo xwankgonit tsukukgolh kalakgstipatanukgo congregaciones (Mat. 13:24-27, 37-39). Xwankgo «tuku ni xatlan xlakata nakaxwataxtukgo tamakgalhtawakgen chu nakalinkgo» (Hech. 20:29, 30). Pulaktum «tuku ni xatlan» nema tsukukgolh masiyakgo wa pi Jesús ni «kaj makgtum xʼakstu tamakamastalh xlakata nalin xtalakgalhinkan lhuwa latamanin». Xmasiyakgo pi xtamakamastan Jesús makglhuwa chuna xlitatlawat xwanit, maski uma ni wa tuku xmasiya Biblia (Heb. 9:27, 28). La uku, lhuwa latamanin kanajlakgo uma taʼakgsanin. Ankgo kpusikulan akgatunu semana, o asta chali chali, xlakata natlawakgo tuku litalakgapasa el sacrificio de la misa. b Amakgapitsi takanajla ni puntsu puntsu lakapastakkgo akxni tinilh Cristo, pero lhuwa tiku makgtapakgsikgo kʼumakgolh takanajla ni liwana akgatekgskgo tuku kilhchanima. Max makgapitsin lakpuwankgo: «¿Xlikana tlan nakintapatikan kintalakgalhin xlakata Jesús nilh?». Makgapitsi chuna lakpuwankgo xlakata kamakanajlikanit pi xtamakamastan Jesús nila xapa kintalakgalhinkan. ¿Pero tuku tlawakgonit xaxlikana kstalaninanin Cristo?

6. ¿Tuku akgatekgskgolh makgapitsi xlikgalhtawakgananin Biblia kkata 1872?

⁶ Kkata 1870, makgapitsi xlikgalhtawakgananin Biblia, tiku xkapulalima Charles Russell, tlakg tsukukgolh lakputsananikgo xTachuwin Dios. Xlakan xʼakgatekgsputunkgo la xlilhuwa xtapalh xwanit xtamakamastan Jesús chu xkatsiputunkgo la xlilakapastakatkan xwanit akxni Jesús nilh. Kkata 1872 Biblia kamakgtayalh naʼakgatekgskgo pi Jesús tamakamastalh xpalakatakan putum latamanin. Chu ni matsekgkgolh tuku xkatsikgonit. Tlawakgolh libros, periódicos chu revistas xlakata nakamakatsinikgo amakgapitsin. Ni makgas titaxtulh tsukukgolh lakapastakkgo akxni tinilh Cristo makgtum akgatunu kata, chuna la xtlawakgo kstalaninanin Cristo kxapulana siglo.

7. ¿La litamakgtayayaw la uku putum tuku lakputsananikgolh xlikgalhtawakgananin Biblia?

⁷ ¿La litamakgtayayaw la uku putum tuku umakgolh kstalaninanin Cristo lakputsananikgolh makgasa? Jehová sikulunatlawalh xtaskujutkan, chu la uku akinin liwana akgatekgsaw tuku kilhchanima xtamakamastan Jesús chu putum tuku tlan nakitaxtu (1 Juan 2:1, 2). Na katsininitaw pi Biblia malaknu akgtiy takgalhkgalhin xpalakata tiku kgalhakgaxmatkgo Dios: makgapitsi tlan nalatamakgo kʼakgapun chu  makgapitsi tlan nalatamakgo kKatiyatni putum kilhtamaku. Tlakg talakatsuwiniyaw Jehová akxni lilakpuwanaw la xlilhuwa kinkapaxkiyan chu la kinkamakgtayayan chatunu akinin xtamakamastan Jesús (1 Ped. 3:18; 1 Juan 4:9). Wa xlakata, chuna la kskujnin Dios xalamakgasa, kawaniyaw amakgapitsin latamanin pi kakinkatatamakxtumikgon akxni lakapastakaw akxni tinilh Cristo.

8. ¿Tuku tlawakgonit makgapitsi natalan xlakata nakawanikgo amakgapitsin latamanin pi kakinkatalakapastakkgon akxni tinilh Cristo? (Kaʼakxilhti dibujos).

⁸ Kskujnin Jehová akglhuwata kata kawanimakgo latamanin pi kakatatamakxtumikgolh Akxni lakapastakkan akxni tinilh Cristo. Kkata 1881, uma revista kawanilh natalan xalak Estados Unidos pi xtamakxtumikgolh kʼakgtum chiki kʼAllegheny (Pensilvania) xlakata xlakapastakkgolh akxni tinilh Cristo. Alistalh, akgatunu congregación tsukukgolh tlawakgo uma tamakxtumit. Pero marzo kkata 1940 kawanika publicadores pi tlan xkawanikgolh amakgapitsin latamanin pi na xkinkatatamakxtumikgon. Chu kkata 1960, Betel xlimakgtumku kamalakgachanilh invitaciones kxakapsnat akgatunu congregaciones. Lata uma kilhtamaku, xtatayananin Jehová malakgatuminitaw lhuwa invitaciones. ¿Tuku xlakata lu limaxtuyaw lhuwa kilhtamaku chu litliwakga xlakata natlawayaw uma taskujut?

9, 10. ¿Tiku lu litamakgtayakgo akxni lu liskujaw xlakata nakawaniyaw amakgapitsin pi kakinkatatamakxtumikgon? (Juan 3:16).

⁹ Pulaktum tuku xlakata kawaniyaw latamanin pi kaʼankgolh akxni lakapastakaw akxni tinilh Cristo wa pi lakaskinaw kakatsikgolh tuku tlawakgonit kimpalakatakan Jehová chu Jesús (kalikgalhtawakga Juan 3:16). Lakaskinaw pi tuku nakgaxmatkgo chu naʼakxilhkgo uma katsisni,  nakamakgpuwantini tlakg nalakgapaskgo Jehová chu naskujnaniputunkgo. Pero ni kajwatiya umakgolh latamanin litamakgtayakgo akxni akinin kawaniyaw amakgapitsin pi kakinkatatamakxtumikgon.

¹⁰ Invitaciones nema mastayaw na kamakgtayakgo tiku tamakgatlinikgonit Jehová. Kawaniyaw pi kaʼankgolh Akxni lakapastakkan akxni tinilh Cristo xlakata nalakapastakkgo pi Dios chuntiya kapaxki. Lu lipaxuwayaw akxni akxilhaw pi lhuwa tiku ankgo. Uma katsisni kamalakapastaka pi lu xpaxuwakgo akxni kskujnanikgo Jehová. Kalichuwinaw xliʼakxilhtit Mónica. c Akxni xʼanan pandemia xla COVID-19 tsukupa lichuwinan Dios. Akxni xkilanita akxni talakapastakli Cristo kkata 2021, wa: «Uma tamakxtumit lu xlakaskinka litaxtunit kimpalakata. Titaxtunita akgpuxam kata ni xakkalitachuwinanit Dios amakgapitsin latamanin chu ni xakkawaninit pi xʼankgolh Akxni lakapastakkan akxni tinilh Cristo. Xliputum kinaku chuna ktlawalh, xlakata lu kkapaxtikatsini Jehová chu Jesús tuku tlawakgonit kimpalakata» (Sal. 103:1-4). Maski latamanin naʼankgo o ni naʼankgo Akxni lakapastakkan akxni tinilh Cristo, tlawayaw putum tuku matlaniyaw xlakata nakawaniyaw pi kakinkatatamakxtumikgon xlakata katsiyaw pi Jehová lanka xtapalh liʼakxilha kintaskujutkan.

11. ¿La sikulunatlawanit Jehová putum tuku tlawayaw xlakata nakawaniyaw latamanin pi kakinkatatamakxtumikgon? (Ageo 2:7).

¹¹ Jehová sikulunatlawanit putum tuku tlawayaw xlakata nakawaniyaw latamanin pi kakinkatatamakxtumikgon akxni lakapastakaw akxni tinilh Cristo. Akgtum liʼakxilhtit, kkata 2021, maski lhuwa tuku nila xtlawayaw xlakata xʼanan COVID-19, kinkatatamakxtumikgon 21,367,603 latamanin. Uma makgtiy tlakg lhuwa nixawa xtatayananin Jehová nema anankgo kxlikalanka katiyatni. Xlikana, tuku Jehová tlakg xtapalh akxilha wa latamanin chu ni wa la xlilhuwa kilakgolh (Luc. 15:7; 1 Tim. 2:3, 4). Jehová limaklakaskin Akxni lakapastakkan akxni tinilh Cristo xlakata nakatekgsaw latamanin tiku kgalhikgo xatlan naku (kalikgalhtawakga Ageo 2:7).

12. ¿Tuku max xtlawalh pi nila xʼaw Akxni lakapastakkan akxni tinilh Cristo? (Kaʼakxilhti dibujo).

¹² Jesús lichuwinalh pi kxaʼawatiya kilhtamaku xʼamaw kgalhiyaw lhuwa taʼakglhuwit: taputsastalanit kfamilia, xtaputsastalanitkan mapakgsinanin, guerras, tajatat chu atanu (Mat. 10:36; Mar. 13:9; Luc. 21:10, 11). Pulakatunu uma max tlan xtlawalh pi nila xʼaw Akxni lakapastakkan akxni tinilh Cristo. ¿Tuku tlawakgonit kinatalankan akxni titaxtukgonit uma, chu la kamakgtayanit Jehová?

13. ¿La sikulunatlawalh Jehová Artiom xlakata ni pekualh chu liskujli nalakapastaka akxni tinilh Cristo maski xtanuma kpulachin?

¹³ Pulachin. Natalan tiku tanumakgo kpulachin xlakata xtakanajlakan, lu liskujkgo xlakata nalakapastakkgo akxni tinilh Cristo. Kalichuwinaw xliʼakxilhtit Artiom. Akxni lakapastakka akxni tinilh Cristo kkata 2020, xla xtanuma kʼakgtum aktsu pulachin nema 17 metros cuadrados xwanit, chu anta xkatamaknukan kgalhkitsis latamanin. Maski chuna, putsalh putum tuku xtamaklakaskin xlakata tlan xlakapastakli akxni tinilh Cristo chu lakkaxwililh pi xʼakstu xʼama masta taʼakgchuwin. Pero xʼanan akgtum taʼakglhuwit: tiku xkatatanuma kʼuma pulachin kxkulikgo chu ankgalhin xwankgo laklixkajnit tachuwin. ¿Tuku tlawalh Artiom? Kakgalhskilh komo tlan ni kxkulikgolh chu ni xwankgolh laklixkajni tachuwin kaj akgtum hora. Lu kaks lilakawa pi umakgolh latamanin wanikgolh pi tlan. Xla wan: «Kkawanilh tuku tlawakan Akxni lakapastakkan akxni tinilh Cristo». Maski wanikgolh pi ni xkatsiputunkgo xlakata uma, akxni akxilhkgolh tuku tlawalh, tlakg katsiputunkgolh.

14. ¿Tuku tlawalh xkachikin Jehová xlakata nalakapastaka akxni tinilh Cristo maski xʼanan pandemia xla COVID-19?

 ¹⁴ Pandemia xla COVID-19. Xlakata uma pandemia, kskujnin Jehová nila tamakxtumiw xlakata nalakapastakaw akxni tinilh Cristo. Pero uma ni tlawalh pi ni nalakapastakaw. d Congregaciones tiku xkgalhikgo internet, tlan tlawakgolh uma lu xlakaskinka tamakxtumit kvideoconferencia. Pero ¿la kakitaxtunilh lhuwa millones natalan tiku ni xkgalhikgo internet? Kmakgapitsi países matitaxtika taʼakgchuwin ktelevisión chu kradio. Nachuna, sucursales grabarlikgolh taʼakgchuwin kliwaka 500 tanu tanu tachuwin xlakata natalan tiku lakgamakgat wilakgo tlan xlipaxuwakgolh uma lu xlakaskinka tamakxtumit. Chu kalakgayawaka makgapitsi natalan xlakata nakalinikgo uma grabaciones.

15. ¿Tuku kinkamasiyaniyan xliʼakxilhtit chatum tiku xlimakgalhtawakgemaka Biblia tiku wanikan Sue?

¹⁵ Akxni familia lisitsikgo kintakanajlakan. Tuku tlakg tuwa titaxtukgonit makgapitsin xlakata nalakapastakkgo akxni tinilh Cristo wa pi xfamiliajkan kalisitsinikgo. Wa uma  tuku titaxtulh chatum tiku xlimakgalhtawakgekan Biblia, tiku wanikan Sue. Kkata 2021, akxni akgtum kilhtamaku xtsankga xlakata nalakapastakkan akxni tinilh Cristo, Sue wanilh xmakgalhtawakgena pi nila xʼama makgtlawa akxni xlakapastakka akxni tinilh Cristo xlakata xfamilia ni xmaxkikgo talakaskin. Tiku xmakgalhtawakgema likgalhtawakganilh Lucas 22:44. Wanilh pi akxni titaxtuyaw taʼakglhuwit, tuku tlan natlawayaw wa pi nastalaniyaw xliʼakxilhtit Jesús chu natlawaniyaw oración Jehová chu nalipawanaw pi xla nakinkamakgtayayan. Lichali, Sue lakkaxtlawalh kaxtalanchu chu putsalh vino, chu akxilhli kjw.org taʼakgchuwin nema xlakkaxwilikanit xlakata nakakninanikan Dios tsisa. Alistalh tanulh kxcuarto chu kgaxmatli taʼakgchuwin kxteléfono. Alistalh tsokgnilh umakgolh tachuwin xmakgalhtawakgena: «Kgotana lu kimakgpuwantini, ktlawalh putum tuku kmatlanilh xlakata naklakapastaka akxni tinilh Cristo chu Jehová tlawalh amakgapitsi tuku xtalakaskin. Lu kpaxuwa chu lu kpaxtikatsini». Komo wix nachuna titaxtupat, ¿kanajlaya pi Jehová namakgtayayan?

16. ¿Tuku xlakata liwana katsiyaw pi Jehová nasikulunatlawa putum tuku natlawayaw xlakata naʼanaw Akxni lakapastakkan akxni tinilh Cristo? (Romanos 8:31, 32).

¹⁶ Jehová lu xtapalh liʼakxilha putum tuku tlawayaw xlakata nalakapastakaw akxni tinilh xKgawasa. Liwana kakatsiw pi Dios nakinkasikulunatlawayan komo nalimasiyaniyaw pi paxtikatsiniyaw putum tuku tlawanit kimpalakatakan (kalikgalhtawakga Romanos 8:31, 32). Ni mastaputunaw talakaskin pi wi tuku natlawa pi ni naʼanaw akxni natalakapastaka akxni tinilh Cristo uma kata. Wata tlakg kaskujniw Jehová akxni nalakgchan uma kilhtamaku.