MUSORO WE KUFUNDA 4
Djehovha Anokomborera Kupeta Masimba Katinoita kuti Tipinde Cirangaridzo
“Rumbwai meciita izvi mecindirangarira.”—RUKA 22:19.
NGOMA 19 Kurarira ka Tenzi
ZVATICAFUNDA a
1-2. Ngei tecipinda Cirangaridzo makore ese?
PAAKUDARIKA makore 2000 kubva pakupasa kakaita Djesu upenyu wake, uye ndizvona zvinotipasa mukana wekurarama nokusikaperi. Pa usiku asati afa, Djesu akabvunza ateeri ake kuti arangarire nge zve cibairo cake nge mushobo usikashuphi uye eciseenzesa pau no vhinyu.—1 Ako. 11:23-26.
2 Isusu tinoteerera cikumbiro ca Djesu ngekuti tinomuda maningi. (Juau 14:15) Mu makore ese mu mazuwa e Cirangaridzo, isusu tinopangidza kuti tinotenda maningi ngo zvese zvatakaitirhwa ndi Djesu ngekupsvaka nguwa kuti tinyase kurangarira nge zvekuti rufu rake rinoreyei katiri uye kuita munamato nge ndaa yazvo. Isusu tinopetawo masimba kuti tiite zvakawanda mu basa rekuparidzira tecipika anhu akawanda kuti auyewo paciitiko ici cinokosha. Zviri pamhene kuti atitenderi kuti ciro cipi haco kana kuti munhu upi hake atiitise kuti tisapinde Cirangaridzo.
3. Ticaonei mu fundo ino?
3 Mu fundo ino ticaona zviro zvitatu zvinoizwa no Apupuri a Djehovha zvinopangidza kuti awona anopeta masimba kuti apinde Cirangaridzo: (1) ngekuita Cirangaridzo nge mushobo wakafundiswa ndi Djesu, (2) ngekupika amweni kuti auye ku Cirangaridzo, uye (3) ngekupinda Cirangaridzo kunyazi ecisongana no migariro inoshupha.
KUPINDA CIRANGARIDZO NGE MUSHOBO WAKAFUNDISA DJESU
4. I zvokwadi zvipi zvatinoedzurira pa Cirangaridzo, uye ngei tecidikana kuzvikoshesa? (Ruka 22:19, 20)
4 Mu makore ese panoizwa Cirangaridzo, isusu tinopurutana mharidzo yakawakirhwa mu Bhaibheri inonyasa kudaira mibvunzo dzakaringana no rufu ra Djesu. Isusu tinofunda kuti ngei anhu ecida rusudzunuro, uye kuti rufu re munhu umwe basi ringapfudza kudini zvitema zve anhu akawanda. Tinoedzurirawo kuti ndiyani unodikana kurhya pao nokumwa vhinyu, uye kuti zviro zviri izvi zvinoreyei. (Erengai Ruka 22:19, 20.) Kupinda izvona, tinonyasa kurangarirawo nge makomborero e aya ano kariro yekurarama pa nyika pano. (Isa. 35:5, 6; 65:17, 21-23) Zvakanaka maningi kuti isusu tikoshese zvokwadi izvi. Mabhirionji e anhu aazwisisi zvokwadi izvi uye aakoshesi cibairo ca Djesu. Kupinda izvona, awona aaiti Cirangaridzo nge mushobo wakafundisa Djesu. Ngei?
5. Cinyi cakaitika mumasure mekufa ke aphostori akawanda?
5 Mumasure mekuti afundi akawanda a Djesu afa, Akristu e kunyepa akatanga kupinda mu ungano. (Mat. 13:24-27, 37-39) Awona aifundisa “zviro zvisiripi izvona ecida kupausa afundi kuti aateere.” (Zvii. 20:29, 30) Cimwe ce “ciro cisiripi icona” caakabhuya ngecekuti Djesu aazi kufa “kamwe basi kuti asuke zvitema zve anhu akawanda,” hingana zvinorekethwa no Bhaibheri, asi kuti cibairo ca Djesu caidikana kuphindwa-phindwa. (Aheb. 9:27, 28) Anhu akawanda nyamasi uno anotendera fundiso ii yekunyepa. Awona anoenda kugereja masuma ese —nguwa dzimweni mazuwa ese—kuti apinde cibairo ce rufu ra Djesu uye anodainza icona kuti: “Santa Missa.” b Magereja amweni aanyanyi kukoshesa rufu ra Djesu uye akawanda awo aanyasi kuziya kuti cinyi cinobatanidzwa pa cibairo. Anhu amweni anodzibvunzisa kuti: ‘Kodi rufu ra Djesu ringakwanisa kurekerera zvitema zvangu?’ Amweni angagara no mubvunzo iwona ngekuti aibvunzwa no aya aireketa kuti rufu ra Djesu arikwanisi kupfudza zvitema zvedu. Akristu e zvirokwazvo anobetsera kudini anhuwo kuti anyase kuzwisisa nge zve nyaya ii?
6. Afundi e Bhaibheri akaguma pakuziyei muna 1872?
6 Muna 1870, Charles Taze Russell no amweni akatanga kupsvakisisa zvinorekethwa no Bhaibheri. Awona aida kuzwisisa kuti cibairo ca Djesu cinoreyei uye kuti aizoita kudini kuti arangaridze rufu rake. Hino, muna 1872, awona akazogumira cokwadi ciri mu Bhaibheri cekuti Djesu ainga akafa kuti aponese anhu. Awona akaita urongwa wekuti abvunze amweni eciseenzesa mabhuku, majornari uye marevhista. Mumasure mazvo, awona akatangawo kuita Cirangaridzo kamwe pa gore hingana zvaiizwa nge Akristu e kutanga.
7. Tiri kubetserhwa kudini nge kwarakwatiso yakaizwa nge afundi e Bhaibheri e kutanga?
7 Isusu nyamasi tinobetserhwa ngekukwarakwatisa kakaizwa nge Akristu akagondeka aya. Djehovha akatibetsera kuzwisisa kuti cibairo ca Djesu cinoreyei uye kuti zviro zvipi zvaacaitira anhu mu nguwa yemberi. (1 Juau 2:1, 2) Isusu taakutoziya kuti kuno kariro mbiri ku aseenzi a Djehovha—amweni acararama kudenga uye maweni acararama pa nyika pano. Kunyasa kurangarira mushobo watinodiwa na Djehovha uye kubetsereka katinoita nge cibairo ca Djesu, zvinoita kuti tikhwedere dhuze naye. (1 Ped. 3:18; 1 Juau 4:9) Ndiyo ndaa hingana Akristu akagondeka e mu nguwa yekare, isusu tinopikawo anhu kuti auye koopinda na isusu Cirangaridzo nge mushobo wakabhuya Djseu.
KUPIKA AMWENI KUTI AUYE KU CIRANGARIDZO
Imwimwi mungaitei kuti mugare no mukana wakakura wekupasa anhu mupiko? (Onai mandima 8-10) e
8. Anhu a Djehovha akaitei kuti apike anhu kuti auye ku Cirangaridzo? (Onai mufanikiso.)
8 Ke makore akawanda, anhu a Djehovha anosopika anhu kuti auye ku Cirangaridzo. Muna 1881, hama no hanzvadzi dzeku Estados Unidos dzakapikwa kuti dziungane pa nyumba pe hama imweni ku Allegheny, Pennsylvania, ku ciitiko ici cinokosha. Pedzepo, Cirangaridzo cakatanga kuizwa mu ungano imwe na imwe. Mu Marso ya 1940, aparidzi akakohomedzeswa kuti apike anhu kuti auye ku Cirangaridzo. Mu gore ra 1960, Bheteri ndipona parakatanga kuimprimiri mupiko dze Cirangaridzo. Kubvira ipona, mabhirionji e mupiko arikupaswa anhu. Asi ngei teciseenza no simba kuti tipike anhu?
9-10. Kupika anhu kuti auye ku Cirangaridzo kunobetsera ani? (Juau 3:16)
9 Ciro cimweni cinotiitisa kuti tipike anhu kuti auye ku Cirangaridzo ngecekuti aya anonga ecitangisa kucipinda afundire zvese zvatinoizirhwa na Djehovha uye na Djesu. (Erengai Juau 3:16.) Kariro yedu ngeyekuti ese aya anouya pa Cirangaridzo abaiwe mwoyo nge zvese zvaanozwa uye zvaanoona uye kuti agare aseenzi a Djehovha. Asi anhu aya andiwopi ega anobetserhwa.
10 Isusu tinopikawo aya akaima kuseenzera Djehovha. Tinoita izvona kuti tiaedzurire kuti Djehovha anoada maningi. Akawanda anotendera kupikwa, uye tinopfara maningi patinoaona. Kupinda Cirangaridzo kungakwanisa kuaedzuririsa mupfaro waaizwa paaiseenzera Djehovha. Onai muezaniso wa Monica. c Pa nguwa yese ye nhenda ye COVID-19 iyena wakahwirirazve kuparidzira no aparidzi amweni. Uye mumasure mekupinda Cirangaridzo ca 2021, iyena wakati: “Cirangaridzo ici cakakosha maningi kandiri. Uku ngekekutanga kupika anhu ku Cirangaridzo mumasure me kudarika makore 20. Inini ndinotenda maningi zvandakaizirhwa na Djehovha uye na Djesu, ndiyo ndaa ndakapeta masimba kuti ndipike anhu.” (Pis. 103:1-4) Isusu tinopeta masimba kuti tipike anhu kuti auye ku Cirangaridzo pasinei nokuti anotenda kana kuti haiwa. Cinokosha ngecekuziya kuti Djehovha anokoshesa kupeta kedu masimba.
11. Djehovha anokomborera kudini kupeta kedu masimba pakupika anhu kuti auye ku Cirangaridzo? (Ajeu 2:7)
11 Patinopeta masimba kuti tipike anhu kuti auye ku Cirangaridzo, Djehovha anotikomborera. Muna 2021, kunyazi no nhenda ye COVID-19, anhu akapinda Cirangaridzo anokwana kuita 21 367 603. Numero ii inopeta kairi pa numero ye Apupuri a Djehovha mu nyika yese! Zviri pamhene kuti Djehovha aana ndaa nokuwanda ke numero. Asi iyena anokoshesa umwe na umwe unopinda Cirangaridzo. (Ruka 15:7; 1 Ti. 2:3, 4) Isusu tino rugondo rekuti paya patinopika anhu kuti auye ku Cirangaridzo, Djehovha anotibetsera kuti tigumire aya ano mwoyo unoda.—Erengai Ajeu 2:7.
KUPINDA CIRANGARIDZO KUNYAZI TECISONGANA NO MIGARIRO INOSHUPHA
Djehovha anokomborera kupeta masimba katinoita kuti tipinde Cirangaridzo (Onai ndima 12) f
12. Cinyi cingaita kuti zvitishuphire kupinda Cirangaridzo? (Onai mufanikiso.)
12 Djesu akabhuya kuti mumazuwa ekupedzesera taizosongana no migariro ye zviro inoshupha yakadai hingana—kuphikiswa ne mhuri, kuteererhwa, hondo, matenda uye no zvimweniwo zvakawanda. (Mat. 10:36; Mark. 13:9; Ruka 21:10, 11) Zviro izvi zvingatiitisa kuti tisapinde Cirangaridzo ce rufu ra Djesu. Ngazvipi zvirikuizwa no hama uye hanzvadzi dzedu kuti dzikwanise kukunda matambudziko aya, uye Djehovha anoabetsera kudini?
13. Djehovha akakomborera kudini Artem ngekupangidza ushingi wekuita Cirangaridzo kunyazi mukaraboso?
13 Karaboso. Hama dzakasungwa nge ndaa yekutenda, dzinoita zviri zvese kuti dzirangaridze rufu ra Djesu. Onai muezaniso wa Artem. Cirangaridzo pacaiizwa mu 2020, iyena wainga ari mu karaboso no asungwa ashanu. Kunyazi zvakadaro, iyena wakakwanisa kuunganidza zvese zvaidikanwa pa Cirangaridzo zvinobatanidza pau no vhinyu, uye wakagadzirira kuti azviitire mharidzo. Asi asungwa amweni aibhema uye aireketa masoko anopsverusa. Hino Artem wakaitei? Iyena wakaakumbira kuti zvaita here kuti amboimi kubhema uye kureketa masoko anopsverusa ke nguwa imwe basi. Izvona zvakashamisa Artem ngekuti awona akatendera kuima kuzviita ke nguwa yaakakumbira ndiyena. Hino iyena unoti: “Ndakadzipira kuti ndiyapanganidzire nge zve Cirangaridzo.” Kunyazi akabhuya kuti ainga asikadi kuzwa nge zve ciitiko icona, mumasure mekuona uye mezukwa Artem eciita Cirangaridzo, awona akamubvunzisa nge zve zviro zvese zvaainga azwa.
14. Anhu a Djehovha akakwanisa kudini kupinda Cirangaridzo kunyazi no nhenda ye korona vhiru?
14 Nhenda ye COVID-19. Nge ndaa ye nhenda ii, Apupuri a Djehovha ainga asikadikani kupinda Cirangaridzo akaungana. Asi izvona azvizi kutiimisa kupinda Cirangaridzo. d Ungano dzainga dziri ku mbuto ino internet dzakaita musangano uu dzeciseenzesa vhidhiyo-koferesiya. Asi mamirionji e anhu ainga asina internet. Hino akazviita kudini? Mu nyika dzimweni, Cirangaridzo cakaizwa peciseenzeswa radhiyo no terevhizau. Kupinda izvona, matare amweni e firiyari akaita zvekugravhari mharidzo ye Cirangaridzo mu mireketero inodarika 500. Izvona zvakaita kuti anhu e mireketero irikure akwanisewo kupinda Cirangaridzo. Uye hama dzedu dzakatora ma audhiyo awona dzecienda koopasa hama dzimweni, uye kunyazi aya ainga ari ku mbuto dzinoshupha kuguma aikwanisa kupinda Cirangaridzo.
15. Mafundei no muezaniso we mufundi we Bhaibheri unozwi Sue?
15 Kuphikiswa mu mhuri. Ku anhu amweni, citsinzwa cikuru caanosongana naco kuti asapinde Cirangaridzo, ikuzindwa no mhuri. Onai muezaniso we mufundi umweni we bhaibheri unozwi Sue. Mu 2021, pecishota zuwa rimwe basi kuti Cirangaridzo ciizwe, Sue wakabvunza mufundisi wake we Bhaibheri kuti wainga asikazopindi Cirangaridzo nge ndaa yekuphikiswa no mhuri yake. Mufundisi wake we Bhaibheri wakamuerengera tsamba ya Ruka 22:44. Pedzepo wakamupanganidzira kuti patinosongana no matambudziko, tinodikana kuteerera muezaniso wa Djesu ngekuita munamato kuna Djehovha uye ngekunyasa kumugonda. Pa zuwa rakazoteera, Sue wakagadzirira zvese zvaidikanwa pa Cirangaridzo, kana kuti pau no vhinyu uye wakasistiri Kunamata ke Macibesi mu jw.org. Pa usiku uwona, iyena wainga ari mu kwartu yake uye wakapinda Cirangaridzo eciseenzesa thurufunu. Pedzepo Sue wakatarira mufundisi wake we Bhaibheri eciti: “Imwimwi makandibambisa maningi zuro. Ndaita zvese zvandaikwanisa kuti ndipinde Cirangaridzo, uye zvezvirokwazvo, Djehovha akaita dii rake. Anditokwanisi kumubvunza mapfarire andiri kuita uye kutenda!” Imwimwi munorangarira kuti Djehovha angamubetsera kana mukasongana no mugariro wakadaro here?
16. Ngei tingagara no rugondo rekuti Djehovha anokomborera masimba atinoita kuti tipinde Cirangaridzo? (Aroma 8:31, 32)
16 Djehovha anotenda maningi kupeta masimba katinoita kuti tirangaridze rufu ra Djesu. Tingagonda hedu kuti iyena acakomborera kupeta kedu masimba kana tikapangidza kuti tinotenda zvaakatiitira. (Erengai Aroma 8:31, 32.) Ngekudaro, ngatishinge kupinda Cirangaridzo ce gore rino uye kugara takabatikana pa nguwa ino inokosha ye Cirangaridzo.
NGOMA 18 Makaita Basa Nge Kutisudzunura
a Zuwa ra 4 ya Abriri ra 2023, mu Cipiri, mamirionji e anhu mu nyika yese acapinda Cirangaridzo cekufa ka Djesu Kristu. Amweni anonga ecitanga kucipinda. Uye amweni akaima kuseenzera Djehovha uye asikapindi Cirangaridzo ke makore akawanda, anonga atoripoo. Amweni acasongana no zvitsinzwa zvakawanda kuti akwanise kupinda Cirangaridzo. Imwimwi mungagara no rugondo rekuti Djehovha acapfara maningi kana mukapeta masimba kuti muonekepo pa Cirangaridzo pasinei no mugariro wamunonga munawo.
b Anhu awona anotendera kuti pa nguwa iyona, pau no vhinyu zvinocinja zvogara muiri no ngazi ya Djesu. Awona anotenda kuti muiri no ngazi ya Djesu zvinonga zvecitopaswa hinga cibairo pa nguwa yese yaanonga ecipinda pa misa yawo.
c Mazina amweni akacinjwa.
d Onai fundo dziri mu jw.org dzinoti: “Celebração de 2021.”
