1, 2. ¿Kʼu yuʼun chijbat jujun jabil li ta Konmemorasione?

 LEʼ XA van ta chaʼmil jabile, li Jesuse laj yakʼ xkuxlejal ta jtojolaltik. Koliyal taje, xuʼ xijkuxi sbatel osil. Kʼalal jun xa ox akʼobal skʼan xcham li Jesuse, la stsob li yajchankʼoptak sventa xalbe ti akʼo spasik li Konmemorasione. Sventa jech spasike, skʼan stunesik pan xchiʼuk vino (1 Kor. 11:23-26).

² Li yajtsʼaklomutik Kristoe jech˗o ta jpastik li tsobajel taje, yuʼun jkʼanojtik tajek li Jesuse (Juan 14:15). Kʼalal skʼan toʼox li Konmemorasion xchiʼuk mi echʼ xa oxe, xuʼ xkakʼtik ta ilel ti toj ep sbalil chkiltik li kʼusi la spase. Jech kʼuchaʼal liʼe, xuʼ jchʼakbetik lek yorail sventa jpastik orasion xchiʼuk ti jnopbetik skʼoplal ti kʼu yuʼun cham ta jtojolaltike. Jech xtok, ta jchʼakbetik skʼakʼalil sventa jtaktik ta ikʼel krixchanoetik yoʼ xtal xchiʼinutik li ta Konmemorasione. Ta xkakʼtik persa yoʼ mu kʼusi smakutik sventa xijbat ek.

3. ¿Kʼusi chkalbetik skʼoplal li ta xchanobil liʼe?

³ Li yajtunelutik Jeovae kakʼojtik talel persa ti jpastik li Konmemorasione. Li ta xchanobil liʼe ta jkʼeltik oxib srasonal ti kʼu yuʼun jech chkaltike: 1) jech ta jpastik Konmemorasion jech kʼuchaʼal laj yal Jesuse, 2) ta jtaktik ta ikʼel yantik xchiʼuk 3) ta jpastik Konmemorasion akʼo mi oy kʼusi tsots jnuptantik.

4. 1) ¿Kʼusitik tsjambeik smelolal li ta Konmemorasione? (Lukas 22:19, 20). 2) ¿Kʼu yuʼun tsots skʼoplal ti xkaʼibetik smelolale?

⁴ Kʼalal chijbat ta Konmemorasion jujun jabile, te chkaʼitik jun mantal ti lokʼem ta Vivliae. Li ta tsobajel taje, te tstakʼbutik ti kʼu yuʼun chtun kuʼuntik li pojelale xchiʼuk ti kʼuxi toj yuʼun smul skotol krixchanoetik li jun noʼox vinike. Jech xtok, te tsvules ta joltik buchʼutik xuʼ sveʼik li pan xchiʼuk xuchʼik li vinoe xchiʼuk ti kʼusi smelolal li pan xchiʼuk li vinoe (kʼelo Lukas 22:19, 20). Li ta mantal xtoke, te chkaʼitik li bendisionetik tskʼupinik li buchʼutik chkuxiik ta balumile (Is. 35:5, 6; 65:17, 21-23). Tsots me skʼoplal ti xkaʼibetik smelolal taje, yuʼun ta smiyonal noʼox krixchanoetik mu xaʼibeik smelolal xchiʼuk muʼyuk ep sbalil chilik li xkuxlejal laj yakʼ Jesus ta jtojolaltike. Maʼuk noʼox taje, akʼo mi tspasik li Snaʼobil slajel Jesuse, mu jechuk tspasik jech kʼuchaʼal yaloj komele. ¿Kʼu van yuʼun ti jech tspasike?

5. Kʼalal chamik xa ox jutuk mu skotoluk li yajtakboltak Jesuse, ¿kʼu yelan lik spasik li Snaʼobil slajel Kristoe?

⁵ Kʼalal chamik xa ox jutuk mu skotoluk li yajtakboltak Jesuse, ochik talel ta tsobobbail li buchʼutik tskuy sbaik ta yajtsʼaklom Kristoe (Mat. 13:24-27, 37-39). Laj yalik «jecheʼ chanubtaseletik sventa chjochik batel ta stojolal stukik li jchankʼopetike» (Ech. 20:29, 30). Jtos li jecheʼ chanubtasel laj yalike jaʼ ti maʼuk noʼox la jun velta laj yakʼ xkuxlejal Jesus «sventa xkuchbe batel smul li epal krixchanoetike». Pe jaʼuk li Vivliae chal ti jun noʼox velta laj yakʼ xkuxlejal Jesus ta jtojolaltike (Ebr. 9:27, 28). Li avie, ep krixchanoetik jech xchʼunojik taje. Chbatik ta iglesia skotol xemana o skotol kʼakʼal sventa xbat spasbeik li Snaʼobil slajel Kajvaltike. Yuʼun tsnopik ti chkʼataj ta sbekʼtal xchiʼuk ta xchʼichʼel Kristo li pan xchiʼuk vinoe. Li yan relijionetik xtoke muʼyuk mas tspasik li Snaʼobil slajel Jesuse, yuʼun jutuk mu skotoluk li buchʼutik te chkʼotike mu xaʼibeik smelolal kʼu yuʼun skʼan pasel. Junantike xi van tsjakʼbe sbaike: «¿Mi ta melel xuʼ xchʼay jmul ti cham li Jesuse?». Ti kʼu yuʼun jech tsnopike jaʼ ta skoj ti yichʼojik albel ti muʼyuk chchʼay jmultik ti laj yakʼ xkuxlejal li Jesuse. Pe ¿kʼusi spasojik li melel yajtsʼaklomtak Jesuse?

6. ¿Kʼusi laj yaʼibeik smelolal li Jchanolajeletik ta Vivlia ta 1872?

⁶ Li ta 1870, li Jchanolajeletik ta Vivlia ti jaʼ jbabe yuʼunik li Charles Russell lik xchanbeik lek skʼoplal li Skʼop Diose. Yuʼun tskʼan snaʼik ti kʼu yuʼun tsots skʼoplal ti laj yakʼ xkuxlejal Jesus ta jtojolaltike xchiʼuk tskʼan snaʼik kʼu yelan skʼan spasik li Snaʼobil slajele. Li ta 1872, laj yaʼibeik smelolal ti laj yakʼ xkuxlejal Jesus ta stojolal li krixchanoetike. Pe muʼyuk la snakʼik li kʼusi laj yaʼibeik smelolale, yuʼun la spukbeik skʼoplal ta livroetik, periodiko xchiʼuk revistaetik. Ta mas tsʼakal jutuke, lik spasik jujun jabil li Konmemorasione, jech kʼuchaʼal la spasik li yajtsʼaklomtak Kristo ta baʼyel sigloe.

7. ¿Kʼuxi ta jtabetik sbalil li kʼusi la xchanbeik skʼoplal li Jchanolajeletik ta Vivliae?

⁷ ¿Kʼusi sbalil ta jtabetik li kʼusi laj yaʼibeik smelolal li Jchanolajeletik ta Vivliae? Ta skoj ti jech la spasike, akʼbatik bendision yuʼun li Jeovae, yuʼun xkaʼibetik xa smelolal avi ti kʼu yuʼun cham li Jesuse xchiʼuk ti kʼusi sbalil ta jtatike (1 Juan 2:1, 2). Kabinojbetik xa smelolal xtok ti chal Vivlia li kʼusi tstaik li buchʼutik chchʼunbeik smantal Diose:  junantike chkuxiik sbatel osil ta vinajel xchiʼuk ta smiyonal noʼox krixchanoetik chkuxiik sbatel osil ta balumil. Mas me nopol oyutik ta stojolal Jeova kʼalal ta jnopbetik skʼoplal ti kʼu to yepal skʼanojutike xchiʼuk ti kʼuxi ta jtabetik sbalil ta jujuntal ti laj yakʼ xkuxlejal li Jesuse (1 Ped. 3:18; 1 Juan 4:9). Jech oxal, jech kʼuchaʼal la spasik li ermanoetik ta voʼnee, ta jtaktik ta ikʼel krixchanoetik sventa xtal xchiʼinutik li ta Konmemorasion jech kʼuchaʼal laj yal Jesus ti skʼan jpastike.

8. ¿Kʼusi spasojik tal li yajtuneltak Jeova sventa stakik ta ikʼel yantik li ta Konmemorasione? (Kʼelo li lokʼoletike).

⁸ Li yajtunelutik Jeovae ta epal jabil xa ta jtaktik ta ikʼel krixchanoetik li ta Konmemorasione. Li ta 1881, Li Jkʼel˗osil ta toyol ta inglése laj yalbe li ermanoetik ta Estados Unidos ti akʼo stsob sbaik ta sna ermanoetik ta Allegheny (Pensilvania) sventa spasik li Konmemorasione. Ta mas tsʼakal ne, ta jujun xa tsobobbail la spasik. Li ta marso ta 1940, laj yichʼik albel li jcholmantaletik ti xuʼ stakik ta ikʼel krixchanoetik ti te noʼox nopol nakalik ti oy ta yoʼonton chbatike. Li ta 1960, li Betele la stak batel invitasionetik ta jujun tsobobbail. Vaʼun, jaʼ te lik˗o talel ti ta jpuktik ta smiyonal noʼox invitasionetike. ¿Kʼu yuʼun ta jchʼakbetik skʼakʼalil xchiʼuk chkakʼ kipaltik sventa jtaktik ta ikʼel li yantike?

9, 10. ¿Buchʼutik tstabeik sbalil kʼalal ta jtaktik ta ikʼel yantik li ta Konmemorasione? (Juan 3:16).

⁹ Jun srasonal ti ta jtaktik ta ikʼel yantik li ta Konmemorasione jaʼ ta skoj ti oy ta koʼontontik ti snaʼik li krixchanoetik li  kʼusi spasoj ta jtojolaltik li Jeova xchiʼuk Jesuse (kʼelo Juan 3:16). Oy ta koʼontontik ti jaʼ xtijbat yoʼontonik sventa xojtikinik Jeova li kʼusi chaʼiik xchiʼuk li kʼusi chilik tee xchiʼuk ti xtunik ta stojolale. Pe maʼuk noʼox me tstabeik sbalil li buchʼu jaʼ to sba velta chkʼotike.

¹⁰ Yan ti buchʼu ta jtaktik ta ikʼel xtok li ta Konmemorasione jaʼ li buchʼutik chibajemike. Kʼalal ta jtaktik ta ikʼele, chvulesbat ta sjolik ti kʼanbilik˗o yuʼun li Diose. Xijmuyubaj tajek kʼalal ep buchʼutik chkʼotike. Li vaʼ akʼobale, chvulesbat ta sjolik ti xmuyubajik toʼox tajek kʼalal tunik ta stojolal Jeovae. Kalbetik skʼoplal li Mónicae. b Kʼalal tal li chamel COVID-19, lik xchol mantal yan velta. Kʼalal ay li ta Konmemorasion ta 2021, xi laj yale: «Toj kʼupil sba laj kaʼi li Konmemorasion liʼe, yuʼun oy xa ox ta 20 jabil ti muʼyuk jcholbe mantal li krixchanoetike xchiʼuk ti muʼyuk jtak ta ikʼel yantik li ta Konmemorasione. Ta sjunul koʼonton jech la jpas sventa jtojbe ta vokol Jeova xchiʼuk Jesus li kʼusi spasojik ta jtojolale» (Sal. 103:1-4). Mu ventauk mi xchʼamik takel ta ikʼel o mi muʼyuk li krixchanoetike, jech˗o chkakʼtik persa ta jtaktik ta ikʼel, yuʼun jnaʼojtik ti ep sbalil chil Jeova li kʼusi ta jpastike.

11. ¿Kʼuxi yakʼojbutik bendision Jeova ti chkakʼtik persa ta jtaktik ta ikʼel yantik li ta Konmemorasione? (Ajeo 2:7).

¹¹ Li Jeovae yakʼojbutik bendision ta skoj ti chkakʼ kipaltik stakel ta ikʼel krixchanoetik li ta Konmemorasione. Jun skʼelobile jaʼ li ta 2021. Ta skoj li chamel coronaviruse, ep kʼusitik muʼyuk laj yakʼ jpastik. Akʼo mi jech, stuk xa noʼox jech ti kʼu yepal la jtsob jbatike, yuʼun lij˗ay 21,367,603 krixchanoetik. Taje mas to ta oʼlol xjelav ti kʼu yepal oy li stestigotak Jeova ta spʼejel balumile. Pe li kʼusi mas tsots skʼoplal chil Jeovae jaʼ li buchʼutik ayike (Luk. 15:7; 1 Tim. 2:3, 4). Koliyal li kampanya sventa Konmemorasione, ta jtatik ta saʼel li krixchanoetik ti oy ta yoʼontonik mantale (kʼelo Ajeo 2:7).   

12. ¿Kʼusitik van xuʼ smakutik sventa mu xijbat li ta Konmemorasione? (Kʼelo li lokʼole).

¹² Li Jesuse laj xa onoʼox yal ti chkichʼtik kontrainel yuʼun kutsʼ kalaltik o yan krixchanoetik, chlik la paskʼop, tsatsal chamel ta buyuk noʼox xchiʼuk yan kʼusitik (Mat. 10:36; Mar. 13:9; Luk. 21:10, 11). Li kʼusitik laj kalbetik skʼoplale xuʼ me jaʼ smakutik sventa mu xijbat li ta Konmemorasione. ¿Kʼusi spasojik li ermanoetik ti jech snuptanojik taje xchiʼuk kʼuxi koltaatemik yuʼun li Jeovae?   

13. ¿Kʼuxi laj yakʼbe bendision Jeova li Artiom ti laj yakʼ persa xetʼes Konmemorasion li ta chukinabe?

¹³ Li chukele. Li ermanoetik ti te tikʼajtik ta chukel ta skoj li kʼusi xchʼunojike chakʼik persa sventa spasik li Snaʼobil slajel Jesuse. Kalbetik skʼoplal li Artiome. Kʼalal skʼan toʼox li Konmemorasion ta 2020, jaʼo laj yichʼ tikʼel ta jun bikʼit chukinab, bateltike voʼob to jchukeletik te tstikʼik. Akʼo mi jech, laj yakʼ persa ti saʼ li kʼusitik chtun yuʼun sventa xetʼes li Konmemorasione xchiʼuk la xchapan li diskurso akʼo mi stuk te oy. Pe oy jtos svokol un, yuʼun li xchiʼiltak ta chukele tsikʼolajik xchiʼuk chalik bol kʼopetik. ¿Kʼusi van la spas li Artiome? La sjakʼbe mi xuʼ van mu sikʼolajik xchiʼuk mu xalik  bol kʼopetik junuk ora. Labal to laj yaʼi, yuʼun albat ti xuʼe. Xi chale: «Laj kalbeik ti xuʼ chkalbeik kʼuxi chjelav li Konmemorasione». Akʼo mi albat ti moʼoje, kʼalal laj yilik ti kʼu yelan la sjelubtas li Konmemorasione, oy kʼusitik lik sjakʼik.    

14. ¿Kʼusi la spas steklumal Jeova sventa spasik li Konmemorasion akʼo mi oy li tsatsal chamele?

¹⁴ Li tsatsal chamel COVID˗19. Ta skoj li tsatsal chamele, li steklumal Jeovae muʼyuk la stsob sbaik sventa spasik li Konmemorasione. Pe taje maʼuk makatik˗o sventa mu spasik. c Li tsobobbailetik ti oy S˗internetike laj yetʼesik ta videoconferencia. Pe ¿kʼusi la spasik li smiyonal noʼox ermanoetik ti chʼabal S˗internetike? Ta junantik lumetike, laj yichʼ jelubtasel li diskurso sventa Konmemorasion ta television o ta radio. Maʼuk noʼox, li Beteletike la sjelubtasik mas ta voʼob sien jeltos kʼopetik li mantal sventa Konmemorasion sventa xuʼ xetʼesik li buchʼutik nakajtik ta namal  parajeetike. Oy ermanoetik ti jaʼ ay yakʼik li gravasionetik taje.

15. ¿Kʼusi chakʼ jchantik li Sue?

¹⁵ Kontrainel ta utsʼ alalil. Li vokolil mas tsots tsnuptanik junantik sventa spasik li Konmemorasione jaʼ ti chkontrainatik yuʼun li yutsʼ yalalike. Taje jaʼ li kʼusi la snuptan li Sue ti jaʼ to jun estudiantee. Li ta 2021 kʼalal jun xa ox kʼakʼal skʼan li Konmemorasione, li Sue laj yalbe li buchʼu ch˗akʼbat s˗estudio ti muʼyuk tspas li Konmemorasion ta skoj ti chkontraine yuʼun li yutsʼ yalale. Li buchʼu ch˗akʼbat estudioe la skʼelbe Lukas 22:44. Albat ti kʼalal oy vokolile, li kʼusi mas leke jaʼ ti xchanbe stalelal Jesus, ti skʼopon Jeova xchiʼuk ti spatuk yoʼonton ti ta onoʼox xkoltaate. Ta yokʼomale, li Sue la smeltsan li pane, la xchapan li vinoe xchiʼuk la skʼel ta jw.org li yichʼel ta mukʼ Dios jujun sob sventa Konmemorasione. Ta mas tsʼakale, la sbaj sba ta skuarto xchiʼuk la xchikinta ta telefono li mantal sventa Konmemorasione. Laje, xi la stsʼibabe batel li buchʼu ch˗akʼbat estudioe: «La apatbun tajek koʼonton li voljee. Laj kakʼ persa ti jpas li Konmemorasione, pe jaʼ la skoltaun stuk li Jeovae. Ximuyubaj tajek xchiʼuk ta jtojbe tajek ta vokol ti echʼ kuʼun li Konmemorasione». Mi jaʼ jech yakal chanuptan eke, ¿mi ta van skoltaot xanaʼ li Jeovae?

16. ¿Kʼu yuʼun jchʼunojtik lek ti chakʼbe sbendision Jeova li kʼusi ta jpastik sventa xijbat ta Konmemorasione? (Romanos 8:31, 32).

¹⁶ Li Jeovae ep tajek sbalil chil ti chkakʼtik persa ta jpastik li Snaʼobil slajel Xnichʼone. Jpʼel ta koʼontontik ti ta xakʼbutik bendision mi ta jtojbetik ta vokol li kʼusi spasoj ta jtojolaltike (kʼelo Romanos 8:31, 32). Mu me kʼusi xkakʼtik smakutik sventa xijbat li ta Konmemorasion li jabil liʼe. Oyuk me kʼusi mas jpastik ta stojolal Jeova kʼalal skʼan toʼox li Konmemorasion xchiʼuk mi echʼ xa oxe.