1-2. (a) Yira rologhoma ghan ika mem dị yira ootughiạn ilọ aghuḍum r’arukumuan phọ aZizọs? (b) Yira kooḅeghiọn eeghe siẹn emhuoghaạph phọ ephẹn phọ?

 MEM dị oye umhughanhaan iyira, inyaam retọl ghan ni iboom! Eḅẹl amem mọ, yira rologhoma ghan ni eephinha mem dị yira ootughiạn ilọ asiḍughul otu phọ erorori bọ eghị eteẹny ḍio aḍuugh phọ odị, ekạr ekpaariọm eḍighi maạr dị odị amhiinhọm iboom kụ agbi bọ omhugh. Toroboiperolbọ, esighẹ rekị, yira roḅilhẹ ghan ni kolhoghoma ibo mem dị yira ootughiạn iyaạr dị odị utughemhị iyira, uḍighinhaan iyira obobọ aghaạph dị ikparamhị iyira ḅilhẹ kẹn eḍighi idị yira omhilhọgh.

² Eniin phọ eten phọ, rekọm ghan ni okururu mem dị yira aạl ilọ iminimiịn r’aḍuugh phọ aZizọs. Mem aMemorial phọ, yira rolọgh ghan ni mem kootughiạn ipẹ ekiạ phọ odị emhạn bọ maạr. (1 Kọr. 11:24, 25) Toroboiperolbọ, yira romoọgh ghan ni iboom ibo mem dị yira ootughiạn ilọ araraạr phọ aZizọs aghaạph bọ aḅilhẹ aḍighi mem mọ odị arọl bọ siẹn ade phọ. Rikparamhị ghan kẹn ni iyira ootughiạn ilọ ipẹ odị ruḍighinhaan bọ iyira nyiidiphọ ḅilhẹ r’ipẹ odị kuḍighinhaan bọ iyira ghisigh. Ogbirima ghan ilọ araraạr phọ iphẹn phọ r’ephomhoghiạn phọ odị amhoọgh bọ aru esi ayira kinyu ni iyira oḍeenhaan osereghiạn ibadị areten, iduọn yira komiịn bọ siẹn emhuoghaạph phọ ephẹn phọ.

3. Yira omoọgh ighẹn ariphigh otuạn osereghiạn etagharạn phọ?

³ Ootughiạn ilọ aḍuugh r’aghuḍum mọ aZizọs rinyu ghan ni iyira oḍeenhaan osereghiạn. Siphẹ arukumuan phọ odị siẹn ade phọ, aZizọs atughemhị ni we ilọ aḍisẹph kirokirọ dị Omhạr phọ  k’Enhaạn katuomnaan we. Yira okạr ri osereghiạn igey ilọ Omhạr phọ. Yira osereghiạn ni etagharạn phọ loor esi dị emitiom eten dị yira kokelọm siya arighirị dị ekpulạn r’aZihova ḅilhẹ r’aZizọs. Buphẹ oḍeenhaan bọ omheeraam oghị esi aZizọs omoọgh kẹn ni oḍuomolhoghi orọl k’agee-pọ ḅilhẹ r’omhiịn dị buphẹ momhuughu bọ koḅerenhu. (Jọn 5:28, 29; Rom 6:23) Aḍisẹph kirokirọ phọ i/ḍuạ esi araraạr dị yira oḍighi; ḅilhẹ yira ko/tue okpẹ Enhaạn ḅilhẹ r’aKraist ipẹ bidị muḍighinhaan bọ iyira. (Rom. 5:8, 20, 21) Kuolọ yira kotue ni oḍeenhaan bidị osereghiạn. Ika?

4. Ika kụ idị aMeri opọ aMagdalạ aḍeenhaan m’onọ asereghiạn ni iiḅi phọ aZizọs aḍighi bọ nyodị? (Miịn afoto phọ.)

⁴ Ooḅeghiọn eḍeenhaan anhịr olọ aJu dị oghol mọ Meri opọ aMagdalạ phọ. Oḍual ikarạph aruwaloor ikọm ni iboom iminimiịn engọ nyodị. Eeni odị aloghoma mọ ilọ oḍighi iyaạr nyodị i/lo mun. Esi iduọn phọ gbiom olhoghi idị odị asereghiạn mem mọ aZizọs atagharạn bọ nyodị asighẹ raghaạgh ikarạph aruwaloor phọ! Osereghiạn phọ odị inyu ni nyodị oḍighi aani onyọ amatuạn aZizọs r’osighẹ amem mọ, inyaạm mọ, r’araraạr emhoọgh odị obakiọm aani arukumuan phọ aZizọs. (Luk 8:1-3) Ghalhamọ r’iduọn aMeri asereghiạn bọ ni iboom iiḅi phọ aZizọs aḍighi bọ nyodị, eeni odị o/lhegheri mọ ghisigh aZizọs kaḍighi ni idị epelom siphẹ. Odị katuạn omhạr awe kụ amugh, kụ “torobọ oye lọ ameeraam nyodị,” kamoọgh ghuḍum k’agee-pọ. (Jọn 3:16) Ghalhamọ r’iduọn phọ ni, aMeri aḍeenhaan ni osereghiạn phọ odị esi aZizọs esi oḅạr odị. Mem mọ aZizọs ramiinọm bọ siphẹ oreeny iminimiịn phọ, aMeri ameerạ ni siphẹ phọ abakị Zizọs aḅilhẹ aadereghị ghan we dị oghị ophogh aZizọs. (Jọn 19:25) AZizọs romhugh bọ, kụ aMeri r’iyạl abunhọn anmariịr ophạm rolo oghimọm epẹ oḍi phọ ilọ amaḍi phọ odị. (Mạk 16:1, 2) AZihova akpẹ ni iboom iikpiạ Meri loor esi adọl oḅạr phọ odị. Ologhi odị aḅaạl li iboom esi iduọn aZizọs amitenhaan bọ kụ aḅaanhaạn nyodị—ephẹn phọ eepoogh dị ibadị abutelhedom mọ u/moọgh aani.—Jọn 20:11-18.

5. Ika kụ idị yira koḍeenhaan mọ yira osereghiạn ni oomo ipẹ aZihova ḅilhẹ r’aZizọs muḍighinhaan bọ iyira?

 ⁵ Yira kotue ni oḍeenhaan aani osereghiạn ilọ oomo ipẹ aZihova r’aZizọs muḍighinhaan bọ iyira esi osighẹ ghan amem, inyaạm, ḅilhẹ r’ikpoki ayira obakiọm aani arukumuan Omhạr phọ. Esi omaạm, yira kotue ni omitiom mem r’asiloor ayira ongọ odoghoḍi r’oselhemhi aruutu Omhạr phọ.

6. Nạ utụ eeghe kụ kaḅẹm bọ mọ etagharạn phọ eḍighi inmo dị ongọ nyinhạ r’aloor?

⁶ Mem dị yira omhiịn ipẹ aZihova r’aZizọs uphomhoghiạn bọ iyira, rinyu ghan ni iyira ophomhoghiạn aani abidị. (1 Jọn 4:10, 19) Nạ kakaraghị apomoghiạn bidị mem dị nạ alhegheri mọ aZizọs aghol emhụ anạ kụ amhugh bọ. Otelhedom mọ aPọl alhọgh ni elhegh iphẹn phọ kụ aḍeenhaan osereghiạn mem mọ odị agẹ bọ aghiọm buọ aGaletia phọ mọ: “Oọny phọ Enaạn . . . uphomoghiạn bọ imị kụ ughol bọ imị kụ amugh bọ.” (Gal. 2:20) Ekiạ etagharạn phọ kụ iḍighi bọ iyaạr phọ aZihova aḍur bọ nyinhạ alhoghomạ idiphọ oyaghirị odị. (Jọn 6:44) Olhoghi anạ o/ḅaạl olhegheri mọ aZihova mamhiịn iyaạr dị enhighẹ loor anạ kụ akpẹ bọ iikpiạ phọ iphẹn epelheghiom bọ obọ nạ aḍighi aani oyaghirị odị ḍughụm? Iphẹn phọ i/kparamhị ephomhoghiạn phọ nạ amhoọgh bọ aghị esi aZihova r’aZizọs ḍughụm? Esi iduọn phọ opuruan loor mọ, ‘Ephomhoghiạn phọ epẹ phọ kinyu imhị oḍighi eeghe?’

7. Odaphạn afoto phọ, ika kụ idị oomo ayira kotue oḍeenhaan mọ yira opomoghiạn ni aZihova r’aZizọs? (2 Korịnt 5:14, 15; 6:1, 2)

⁷ Ephomhoghiạn phọ yira omhoọgh bọ oghị esi Enhaạn r’aKraist rinyu ghan iyira oḍeenhaan abunhọn ephomhoghiạn. (Bạl 2 Korịnt 5:14, 15; 6:1, 2.) Eniin eten dị yira roḍeenhaan ghan ephomhoghiạn phọ ayira pọ ophinhomaam ghan abin dị abụgh rukumuan epẹ erugh phọ. Yira rokaaphạn ghan ni torobọ oye lọ yira oteẹny. Yira rokaaphạn ghan ni oomo  awe etigheri ekpisi phọ abidị, mughumọ araalhạ obobọ arukulhom, obobọ etigheri eseeriom mọ abidị. Yira oḍighi iduọn phọ, pọ yira roḍighi ghan idị emhoọgh muḅọph r’ogbi phọ aZihova, rawạ ghan bọ “mọ oomo awe omoọgh pelieẹny r’olegheri iyaạr phọ opọ igey phọ.”—1 Tim. 2:4.

8. Ika kụ edị yira koḍeenhaan ephomhoghiạn bumor r’abumaranhi phọ ayira?

⁸ Yira roḍeenhaan ghan kẹn mọ yira opomhoghiạn Enhaạn r’aKraist esi oḍeenhaan ghan ephomhoghiạn bumor r’abumaranhi phọ ayira. (1 Jọn 4:21) Yira roḍeenhaan ghan ni ogbolhomaam koḅilhẹ obakị bidị mem dị bidị osoman iiḅaghamhị. Yira roodereghị ghan ni bidị mem dị oye amhughanhaan bidị, okị opogh bidị mem dị bidị omheel e/moon, oḍighi oomo ipẹ yira kotue bọ okparamhị abidị mem dị bidị oḅonyonhu ozuan. (2 Kọr. 1:3-7; 1 Tẹs. 5:11, 14) Yira rooḅereghinhaạn ghan ni bidị, loor esi dị “oye aruukuan kụ aaḅereghị, iiḅereghị phọ remoọgh ghan ni iikpọ keḍighi ekol.”—Jems. 5:16.

9. Eghẹn kụ enhọn eten dị yira kotue oḍeenhaan ephomhoghiạn bumor r’abumaranhi phọ?

⁹ Yira oḅilhẹ kẹn roḍeenhaan ghan mọ yira opomoghiạn ni bumor r’abumaranhi phọ ayira esi olhọgh ghan inyaạm orolhạn abidị r’eephọ. Yira rokparaghạ ghan ni otuughaạny eten phọ epẹ aZihova rasạr ghan bọ kawilhenhaạn. Eḍighi maạr dị aZihova kameera ni mọ Oọny phọ odị amhugh loor ikarạph phọ ayira, i/kpẹ dị yira kosạr aani ghan obilhenhaạn bumor r’abumaranhi phọ ayira mem dị bidị upiomạn iyira ḍughụm? Ku/kịgh aani okarạph ebenhẹ phọ aZizọs aghaạph bọ aghol siphẹ aḍidogh phọ odị. Ghalhamọ r’iduọn odẹ otu phọ odị awilhenhaạn bọ ni nyodị oboom omhụgh, ebenhẹ phọ opọ phọ o/mheera osạr owilhenhaạn onhọn ebenhẹ dị alhe aani obạm omhụgh odị. (Mat. 18:23-35) Eḍighi maạr dị oye r’anạ emhoọgh iiḅaghamhị siphẹ ookpomhoghan phọ, nạ katue ni agbatạn edạ oghị oteẹny odị oghaaphọgh kụ egbi oteẹny aMemorial phọ ḍughụm? (Mat. 5:23, 24) Nạ aḍighi iduọn phọ kekạr kụ eḍeenhaan mọ nạ apomhoghiạn ni aZihova r’aZizọs.

10-11. Ika kụ idị ikumor awe phọ koḍeenhaan ephomhoghiạn aZihova r’aZizọs? (1 Pita 5:1, 2)

¹⁰ Ikumor awe phọ koḍeenhaan ika mọ bidị opomoghiạn ni aZihova r’aZizọs? Eten dị emhạn maạr pọ ophogh ghan araraạr phọ ipẹ iyool phọ aZizọs omhoghi bọ. (Bạl 1 Pita 5:1, 2.) AZizọs aagholhomhi ni ekpo phọ ephẹn phọ aḍeenhaan otelhedom mọ Pita. Mem mọ aPita mapharanhaạn bọ Zizọs iraạr amem, odị amhoọgh ni eboom eephuạ oḍeenhaan mọ odị apomoghiạn ni Zizọs. Mem mọ odị maḅetenhu bọ siphẹ aḍuugh phọ, aZizọs apuru ni Pita mọ: “Saimọn, oọny phọ aJọn, nạ uphomoghiạn ni imị?” Yira kotue ni okuphom owol mọ aPita muḍighi ni oomo ipẹ odị katue bọ oḍeenhaan mọ odị apomoghiạn ni Odẹ Otu phọ odị. AZizọs aḅenhị Pita mọ: “Ngọ eḍien nmụny iyooI igạ phọ amị.” (Jọn 21:15-17) Emhiigh mem mọ amuphẹ phọ kụ rekị, aPita aḍeenhaan ni mọ odị apomoghiạn ni Zizọs esi omhaạr ophogh iyool phọ odị.

¹¹ Ikumor awe, mem aMemorial phọ ika kụ edị nyinha keḍeenhaan mọ ikpo-onhụ phọ aZizọs aḅenhị bọ Pita emạn ni maạr? Nyinha ketue ni eḍeenhaan idị nyinha ephomhoghiạn aZihova r’aZizọs esi ogbor ghan oghị ophogh iyool phọ, ḅilhẹ r’olhọgh ghan inyaạm dị egbatanhaạn olhoghonhaạn aḍighaạgh buphẹ moophoọm bọ dị koḅulha okumu aZihova. (Ezek. 34:11, 12) Nạ katue kẹn ni aḍeenhaan mọ nạ akuraam ni buphẹ rotughemhị ghan bọ Baibul phọ r’abumhoom awe phọ oru aani bọ aMemorial phọ.

12. Uḍighi ika kụ ootughiạn ilọ ikpo-onhụ phọ aZizọs aḅạ bọ ḍughul phọ aḍiphẹ reḅaạl bịn kokiigh bọ nyodị ingọ bọ iyira akpọ-oḅio? (Jọn 16:32, 33)

¹² Ḍughul phọ aḍiphẹ reḅaạl bịn odị kamugh bọ, aZizọs aḅenhị butelhedom mọ odị mọ: “Nyina kemiinọm ni iminimiịn siẹn aḅirini phọ,  kuoIọ ikparamị ni iloghi anyina. Mị makpạr ri apu aḅirini phọ.” (Bạl Jọn 16:32, 33.) Eeghe kụ iloghonhaạn Zizọs ḍighaạgh okaran amulọgh ḍien phọ odị r’akpọ-oḅio, kụ oḅilhẹ ophamhanhạm omheeraam mọ odị tutụ k’aḍuugh? Odị abeḍenhọm aZihova. Loor iduọn odị alegheri bọ mọ abumatuạn phọ odị kosoman ni iniin phọ ipaanhaạn phọ, aZizọs alọm ni aZihova mọ amhaạr aphogh bidị. (Jọn 17:11) Uḍighi ika kụ iphẹn phọ kingọ bọ iyira akpọ-oḅio? Aloor esi dị aZihova kụ amhoọgh iikpọ apu mulhọgh ḍien phọ ayira. (1 Jọn 4:4) Iyaạr i/lo dị aaghiạn esi odị. Yira oḍuom ni olhoghi mọ eḍighi maạr dị yira obeḍenhọm aZihova, yira kokpạr ri opu oghiilhaan phọ ayira kụ oḍeenhaan akpọ-oḅio.

13. Ika kụ idị aJosef opọ Arimatiạ aḍeenhaan akpọ-oḅio?

¹³ Ooḅeghiọn eḍeenhaan phọ aJosef opọ Arimatiạ. Aweye aJu phọ ukạr kụ olhọgh nyodị eegu. Odị aḍighi aani nyoniin siphẹ ookpomoghi ikpoIom awe phọ, siphẹ ogbogh otu iiruẹn abuọ aJu phọ. Kuolọ, mem mọ aZizọs odi bọ ni siẹn ade phọ rakumuan, aJosef aḍeenhaan ni akpọ-oḅio. AJọn aḅẹm mọ odị “aḍighi aani ni matuạn aJizọs kụ eepuph abuọ aJu phọ i/meera mọ odị amite egaan.” (Jọn 19:38) Ghalhamọ r’iduọn aJosef amhoọgh bọ ni ḍiḅeraạn adom Omhạr phọ, odị o/ḍighi idị abunhọn kolegheri mọ odị amoọgh ni omheeraam akị esi aZizọs. Iikia i/lo odị aghiilhaan bọ mọ onọ katoph eepoogh phọ odị amhoọgh bọ siphẹ emhạ phọ. Toroboiperolbọ, aBaibul phọ uḅenhị iyira mọ amem mọ aZizọs amhugh bọ kụ edị aJosef “aghị ateẹny Pailet alọm ḍizu phọ aJizọs.” (Mạk 15:42, 43) Bịn aJosef o/ghiilhaan mun omạ omitiom mọ odị onyọ amatuạn aZizọs.

14. Nạ kaḍighi ika eḍighi maạr dị oghiilhaan awe kụ raaḅaghamhị nyinhạ?

¹⁴ Nạ rakiilhaan aani ghan ni we idiphọ aJosef ḍughụm? Otu askul obobọ otu oḍighi, eeni amem nạ rakiilhaan ghan ni umugholoor omạ omitiom mọ nạ oniin onyọ Ogbaanhaạn AZihova ḍughụm? Nạ raḅorion ghan ni oḍighi oniin okaaphọm iiḅi iinhaghạn obobọ oḍiiny amuụm loor oghiilhaan idị abunhọn awe kokaạph ilọ anạ ḍughụm? Ka/meera odọ oghiilhaan phọ ophọn phọ asophoghom nyinhạ oḍighi ipẹ nạ alhegheri bọ mọ eḍighi elhiom. Ḅeeḅereghị r’oomo olhoghi anạ aḅenhị aZihova. Lọm nyodị akpọ-oḅio oḍighi ogbi phọ odị. Idiphọ nạ ramiịn bọ dị aZihova rapagharanhaạn iiḅereghị phọ anạ, nạ kakạr kụ akpạr aḅilhẹ amoọgh akpọ-oḅio.—Isa. 41:10, 13.

15. Mem mọ aZizọs amitenhaan bọ butelhedom mọ odị, ibo phọ abidị inyu bidị oḍighi ika? (Luk 24:52, 53)

¹⁵ Olhoghi abutelhedom mọ eeph ni iboom mem mọ aZizọs amhugh bọ. Ḍighi mudị nạ odi aani pạ phọ. Esi abidị, oye ephomhoghiạn abidị  bịn kụ o/mhugh, kuolọ ighịgh kẹn mudị oḍuomolhoghi phọ abidị maphe. (Luk 24:17-21) Toroboiperolbọ, mem mọ aZizọs amitenhaan bọ bidị, odị alhoghonhaạn ni bidị ḍighaạgh orue onhaghanhạn idị odị amhunhenhi imiịn aBaibul phọ. Odị aḅilhẹ kẹn angọ bidị oḍighi dị amhạn maạr. (Luk 24:26, 27, 45-48) Mem mọ aZizọs agheel bọ k’akẹ mem dị 40 aḍughul otu reten, e/ḅaạl olhoghi abutelhedom mọ iḅilhẹ ni ekitonu eḍighi iboom ibo. Bidị umhoọgh ni iboom ibo mem mọ bidị olhegheri bọ mọ Odẹ Otu phọ abidị odi ni, ḅilhẹ kẹn aakolobian ni olhoghonhaạn abidị ḍighaạgh siphẹ omhoom oḍighi phọ odị angọ bọ bidị. Ibo phọ iphẹn phọ inyu ni bidị oghiọm aghisigh oboom aZihova bịn.—Bạl Luk 24:52, 53; Iiḍighi 5:42.

16. Ika kụ idị yira kotue otuughaạny butelhedom mọ aZizọs?

¹⁶ Ika kụ idị yira kotuughaạny eḍeenhaan phọ aZizọs? Yira kotue ni omoọgh ibo esi ooseeny aZihova ko/ginha amem aMemorial phọ bịn kuolọ siphẹ oomo alhạ phọ. Iphẹn phọ remạ ghan osighẹ Omhạr phọ k’Enhaạn kụ oḍighi eḅẹl siphẹ aghuḍum mọ ayira. Esi omaạm, ibadị mooḅenhion mem iiḍighi abidị obọ bidị orue ghan omite aani ghan epẹ erugh phọ, oghị ghan ituughạ, ḅilhẹ kẹn ophạm ghan iiseeny eghunotu mem mem mem. Abuniin mosopha owilhẹ ophorogh araraạr aḅirinhi phọ dị abunhọn awe ootughiạn mọ emạn ni maạr, obọ osighẹ aani ghan bidị oḍighinhom siphẹ ookpomhoghan phọ, obobọ bidị otue okumuan aani rikpisi dị ewaạm abukaaphọm ilọ Omhạr phọ ebụgh. Emoghi ni okparạm orue oghiọm aghisigh okumu aZihova, kuolọ odị maguanhaan okuamhị osẹph ayira eḍighi maạr lọ yira osighẹ raraạr ilọ Omhạr phọ kụ oḍighi eḅẹl.—Prov. 10:22; Mat. 6:32, 33.

17. Eeghe kụ edị nạ masopha oḍighi siẹn asiḍughul otu aMemorial phọ? (Miịn afoto phọ.)

¹⁷ Yira opogh ni rokiọm ghisigh oghị aani aMemorial phọ Tusdee, April 4. Ghalhamọ r’iduọn phọ ni, ku/kori tutụ eteẹny mem mọ amuphẹ phọ kụ yira ogbi ootughiạn aghuḍum r’aḍuugh phọ aZizọs, ḅilhẹ r’ephomhoghiạn phọ odị r’aZihova muḍeenhaan bọ iyira. Sighẹ ni torobọ eepoogh lọ nạ amhoọgh aatughianhạm ghan ilọ araraạr phọ iphẹn phọ kụ egbi oteẹny aMemorial phọ ḅilhẹ r’amem dị aMemorial phọ maten. Esi omaạm, miteom ni mem aạl ghan aḅilhẹ agbirima ilọ ipẹ ogẹ bọ siphẹ eḅẹm bọ mọ “The Final Week of Jesus’ Life on Earth,” edi bọ siphẹ Appendix B12 siphẹ New World Translation. Mem dị nạ raḍighi iduọn phọ, wạ ghan ni riikpịgh aBaibul dị kenyaamhị osereghiạn phọ, ephomhoghiạn phọ, akpọ-oḅio phọ, ḅilhẹ r’ibo phọ anạ. Kụ aatughiạn reten dị nạ kaḍeenhaan mọ nạ asereghiạn ni k’ekpom. Kuphom ni owol mọ aZizọs asereghiạn ni oomo ipẹ nạ raḍighi bọ ootughiạn odị siẹn asiḍughul otu aMemorial phọ.—Ogan. 2:19.