1-2. (a) Lè nou katjilé asou lavi Jézi, ki mannyè sa ka fè nou santi? (b) Kisa nou kay diskité an atik sala?

 LÈ an moun nou enmen mò, nou ka mantjéʼy an chay. Èk sa ka kasé tjè nou lè nou chonjéʼy, sitou si i té soufè an pil avan i mò. Mé kon tan ka pasé, nou pé ni on ti souwi asou vijay nou lè nou chonjé sa moun-lan té enstwi nou, on bèl blag i ban nou, on bagay i di èben on bagay i fè ki té ankouwajé nou. Épi sa ka fè nou koumansé santi pli mèyè.

² An menm mannyè-a, tjè nou ka kasé lè nou li konsèné soufwans èk lanmò Jézi Kwi. Konsa, diwan sézon Mémoriyal-la, nou ka pwan tan pou katjilé asou enpòtans sakwifis li. (1 Kòr. 11:24, 25) Épi, nou ka jwenn an chay djèwté lè nou katjilé asou tout sé bagay-la Jézi té di èk fè lè i té asou latè-a. Osi, nou ka ni tjè kontan lè nou katjilé asou sa Jézi ka fè apwézan, èk sa i kay fè an tan pou vini. Konsa, lè nou mèdité asou sé bagay sala èk lanmityé-a Jéhova ni pou nou, sa ka édé nou pou moutwé apwésiyasyon nou an diféwan mannyè. An atik sala, nou kay diskité adan sé mannyè sala.

3. Ki wézon nou ni pou moutwé apwésiyasyon pou sakwifis Jézi?

³ Lè Jézi té asou latè-a, i enstwi moun konsèné sé bèl bagay-la Wéyòm Bondyé té kay mennen. Èk sakwifis li ka fè tout sé bèl bagay sala posib. Èk nou kontan sa Bib-la ka enstwi konsèné wanson-an, sa vlé di sakwifis Jézi, èk mannyè i fèʼy posib pou nou sa vini bon jan épi Jéhova èk Jézi. Tout sé moun-lan ki mété lafwa yo an Jézi ni èspwa-a pou viv pou tout tan. Épi osi, yo ni èspwa-a pou wè sé moun-lan yo enmen-an ki ja mò vivan ankò. (Jan 5:28, 29; Ronm 6:23) Konsa, lè nou katjilé asou lavi èk lanmò Jézi Kwi, apwésiyasyon nou kay agwandi. Nou pyès pʼòkò fè anyen pou méwité sé bennédiksyon sala, ni nou pa kay sa janmen péyé Bondyé èk Jézi pou tout sa yo ka fè ban nou. (Ronm 5:8, 20, 21) Alò, kisa nou sa fè pou moutwé yo nou vwéman apwésyé tout sa yo ja fè ban nou?

4. Koumannyè Mari Madlenn té moutwé apwésiyasyon pou sa Jézi té fè ba li? (Gadé pòtwé-a.)

⁴ Annou konsidiwé on madanm Jwif yo ka kwiyé Mari Madlenn. Sitiwasyonʼy té mové si tèlman paski i té ni sèt vyé lèspwi andidanʼy ki té ka toumantéʼy. Pitèt i té ka katjilé, ‘Pyèsonn pa té sa édé mwen.ʼ Mé lévanjil-la di nou, Jézi tiwé sé vyé lèspwi sala an Mari! Ou sa imajiné mannyè Mari santi kòʼy lè Jézi tiwé sé vyé lèspwi sala. Annékòz di apwésiyasyonʼy, Mari vini on disip Jézi. Èk i sèvi tout tanʼy, tout fòs li èk tout byenʼy pou sipòté Jézi an minis li. (Louk 8:1-3) Mari té vwéman apwésyé sa Jézi té fè ba li. Èk i pʼòkò té byen konpwann, sa pa té pli gwo kado-a Jézi té ni pou baʼy. Pli gwo kado-a sé, Jézi té kay bay laviʼy pou tout moun. Konsa, “tout moun ki kwè an li pa kay pèd lavi yo, mé yo kay ni lavi étonnèl.” (Jan 3:16) Mari wèsté fidèl pou Jézi èk i kontiné moutwé apwésiyasyon pou sa Jézi té fè ba li. Pou ègzanp, lè Jézi té ka soufè asou poto soufwans-lan, i té la ka sipòtéʼy. I osi té ka konfòté lòt moun ki té la. (Jan 19:25) Apwé Jézi mò, Mari épi dé lòt madanm achté fiksyon pou yo té sa fiksyonnen kadav Jézi. (Mak 16:1, 2) Konsa, Mari té kontiné ka moutwé apwésiyasyon. Fidèlité Mari pa té anven, paski i té ni pwivilaj-la pou palé épi Jézi apwé i té wésisité. Sa té on pwivilaj an chay disip Jézi pa té ni. Èk sa té baʼy an pil djèwté.​—Jan 20:11-18.

5. Ki mannyè nou sa moutwé apwésiyasyon pou tout sa Jéhova èk Jézi ja fè ban nou?

⁵ Nou osi, sa moutwé apwésiyasyon pou tout sa Jéhova èk Jézi ja fè ban nou. Kisa nou sa fè? Nou sa sèvi tan nou, fòs nou, kouway nou, èk byen nou pou sipòté twavay Wéyòm-lan. Pou ègzanp, nou sa fè kò nou avélab pou édé bati plas adowasyon, èk pou tjenn yo an bon kondisyon.

6. Pouki ou ka di sakwifis Jézi sé an kado pou ou?

⁶ Lè nou katjilé asou ki otan enmen Jéhova èk Jézi enmen nou, ès sa pa ka touché tjè nou? Ès sa pa ka pousé nou pou enmen yo tou? (1 Jan 4:10, 19) Mé wi kouman! Jézi mò pou nou chak. Lèʼw konpwann Jézi mò pou ou kon yon endividi, sa ka pouséʼw pou enmen Jéhova èk Jézi plis toujou. Zapòt Pòl té konnèt Jézi té mò pou li menm. Èk a liv Galécha, i di: “Gason Bondyé ki enmen mwen. . .bay laviʼy pou mwen.” (Gal. 2:20) Paski Jézi mò pou nou, sa ban nou òpòtyounité-a pou nou vini pli pwé Jéhova, épi pou nou fè jan épiʼy. (Jan 6:44) Ès nou pa byen kontan Jéhova wè on bagay ki bon an nou, èk i péyé on gwo pwi, pou nou sa vini janʼy? Ès sa pa ka fòtifyé lanmityéʼw pou Jéhova èk Jézi? I kay bon pou nou mandé kò nou, ‘Kisa lanmityé mwen pou Jéhova èk Jézi ka pousé mwen pou fè?ʼ

7. Kon nou ka wè an pòtwé-a, ki mannyè nou tout sa moutwé lanmityé nou pou Jéhova èk Jézi? (2 Kòrint 5:14, 15; 6:1, 2)

⁷ Lanmityé nou pou Bondyé èk Jézi ka pousé nou pou enmen lézòt. (Li 2 Kòrint 5:14, 15; 6:1, 2.) Lè nou zélé an twavay pwédikasyon-an, nou ka moutwé nou vwéman enmen lézòt. Nou ka palé épi tout moun nou jwenn. Nou pa ka moutwé pyès pwéféwans. Ki yo wich ki yo pòv, ki yo ni endikasyon opa, ki yo sòti an péyi nou, ki yo menm was épi nou opa, nou ka palé bay tout moun. Lè nou fè sa, nou ka twavay a ling épi divwa Jéhova, Dyé-a “ki vlé tout [moun] sové épi vini konnèt lavéwité.”​—1 Tim. 2:4.

8. An ki mannyè nou sa moutwé nou enmen sé fwè èk sè nou-a?

⁸ Yonn an sé mannyè-a nou ka moutwé lanmityé nou pou Bondyé èk Jézi, sé lè nou enmen sé fwè èk sè nou-a. (1 Jan 4:21) An ki mannyè nou sa moutwé nou enmen sé fwè èk sè nou-a? Nou sa moutwé lentéwé an yo. Nou sa sipòté yo lè yo anba twaka. Nou sa konfòté yo lè on moun yo enmen mò. Nou sa vizité yo lè yo malad. Èk nou sa fè sa nou pé pou ankouwajé yo lè yo dékouwajé. (2 Kòr. 1:3-7; 1 Tèsa. 5:11, 14) Osi, nou vlé kontiné ka pwédyé ba yo, paski lévanjil-la an Jémz 5:16 di: “Lapwiyè an nonm ki ka viv dwèt douvan Bondyé ni an pil pouvwa.”

9. Ki lòt mannyè nou sa moutwé nou enmen fwè nou èk sè nou?

⁹ Nou osi sa moutwé nou enmen fwè èk sè nou, lè nou twavay wèd pou tjenn lapé épi yo. Nou ka éséyé pou imité ègzanp Jéhova an mannyè nou ka pawdonnen yonn a lòt. Alò, si Jéhova té pawé pou kité gasonʼy mò pou nou jwenn pawdonnasyon, nou sipozé pawé pou pawdonnen fwè èk sè nou lè yo ofwansé nou. Nou pa kay janmen vlé vini kon mové ofisyé-a Jézi té mansyonnen an pawabòl li-a. Ofisyé sala té dwé wa-a on gwo dèt èk i pa té sa péyéʼy. Èk wa-a té dakò pou éfasi gwo dèt sala. Mé menm ofisyé sala, jwenn on lòt ofisyé ki té kanmawad li ki té dwéʼy on ti tak lajan épi i té vlé twangléʼy pou sa. I pa té pawé pou pawdonnen. (Maf. 18:23-35) Fwè èk sè, si ou ni on malkonpwann épi on lòt moun an kongwigasyon-an, ès ou sa pwan démach pouʼw sa fè lapé épi moun sala avan ou atandé Mémoriyal-la? (Maf. 5:23, 24) Si nou fè sa, nou ka moutwé nou vwéman enmen Jéhova èk Jézi Kwi.

10-11. Ki mannyè sé ansyen-an sa moutwé yo enmen Jéhova èk Jézi? (1 Pita 5:1, 2)

¹⁰ Ki mannyè sé ansyen-an sa moutwé yo enmen Jéhova èk Jézi? Yon mannyè yo sa fè sa ki byen enpòtan, sé lè yo “gadé apwé sé ich Bondyé-a . . . menm kon an gad mouton ka gadé apwé twipo moutonʼy.” (Li 1 Pita 5:1, 2.) Jézi té fè pwen sala a klè bay zapòt Pita. Koumannyè i té fè sa? Apwé Pita té di pou twa fwa i pa konnèt Jézi, sa vwéman té kasé tjè Pita. Alò, i té ni on gwo dézi pou moutwé Jézi sé pa dé enmen i enmenʼy. Èk Pita té jwenn chans sala, paski apwé Jézi wésisité, twa fwa i mandé Pita: “Simon gason Jan, ès ou enmen mwen?” Épi twa fwa, Pita wéponn li: “Wi Senyè, ou sav mwen enmenʼw.” Èk pou chak sé fwa-a, Jézi diʼy mannyè pou moutwé i vwéman té enmenʼy. I diʼy: “Swen sé ti mouton mwen-an.” (Jan 21:15-17) Konsa, pou lèwèstan lavi Pita, i fè ègzaktiman sa. Èk i moutwé, i té vwéman enmen Jézi.

¹¹ An sé simenn-lan avan èk apwé Mémoriyal-la, zòt sé ansyen-an, ki mannyè zòt sa moutwé, sa Jézi té di Pita enpòtan pou zòt? Mi yonndé bagay zòt sa fè ankò, pou moutwé zòt enmen Jéhova èk Jézi. Fè tan pou ankouwajé sé fwè èk sè-a. Fè on gwo éfò pou édé fwè èk sè ki pa aktiv witounen pou Jéhova. (Izik. 34:11, 12) Osi, éséyé pou ankouwajé sé étidyan Bib-la, èk lòt moun ki atandé Mémoriyal-la. Èk byenvini yo, paski nou ni èspwa, yon jou yo pé vini disip Jézi.

12. Ki mannyè pawòl Jézi swè-a avan i mò ka ban nou kouwaj? (Jan 16:32, 33)

¹² Jézi té moutwé kouwaj èk i té wèsté fidèl pou Bondyé jik o lanmòʼy. Jézi té sa fè sa, paski i mété tout konfyans li an Jéhova. Èk i té sav sé disip li-a té kay ni pou fè sa tou. I té sav, yo té bizwen kouwaj paski yo té kay èspéyansé pèsikasyon. Konsa, swè-a avan i mò i di sé disip li-a, ‘pa pè èk pwan kouwajʼ. (Li Jan 16:32, 33.) Osi, Jézi té mandé Jéhova pou gadé apwé èk pwotèkté sé disip li-a. (Jan 17:11) Sa Jézi té mandé Bondyé ka ban nou an pil kouwaj, paski Bondyé Jéhova, pli fò pasé tout lèlmi nou èk i ka wè tout bagay. (1 Jan 4:4) Konsa lè nou mété tout konfyans nou an Jéhova, nou asiwé i kay édé nou ganyen a bout tout pèwèz nou. Èk i kay ban nou kouwaj!

13. (a) Ès Jozèf ki sòti an vil Arimatéya té toujou bwav? (b) Kisa i té fè ki ka moutwé i té vini ni kouwaj?

¹³ Annou konsidiwé ègzanp Jozèf ki sòti Arimatéya. I sété an manm an konsit sé Jwif-la. Anfen, i sété an manm an pli gwo Kay Konsèy sé Jwif-la. Moun té ka wèspèktéʼy. Ou té kay kwè on nonm kon sa té kay byen bwav, ès pa? Mé zapòt Jan di: “[I] sété an disip Jézi, mé i pa té fè moun konnèt sa, paski i té pè sé chèf Jwif-la.” (Jan 19:38) Konsa, magwé Jozèf té antéwésé an konmisyon Wéyòm-lan, i pa té vlé moun sav i té ka kwè an Jézi. Pouki wézon? Pitèt i té pè i té kay pèd pozisyonʼy. Èben pitèt i té pè moun pa té kay wèspèktéʼy ankò si yo vini sav i té ka kwè an Jézi. Kanmenm, Bib-la di apwé Jézi mò, Jozèf pa té pè si moun sav i sété on disip Jézi. “I pwan tjè épi i alé mandé Pilat pou kò Jézi.” (Mak 15:42, 43) Wi, dépi tan sala, Jozèf té ka moutwé kouwaj.

14. Kisa ou ni pou fè siʼw ni pèwèz lézòm?

¹⁴ Menm kon Jozèf, ès ou janmen vini pè moun an twavay ou èben an lékòl ou? Èben ès délè ou ka jis santi hont pou idantifyé kòʼw kon on Tèmwen Jéhova? Ès ou ka tjébé dèyè pou koumansé pwéché, èben batizé, paski ou pè sa lòt moun kay di? Ében, pa kité sé bagay sala anpéchéʼw fè sa ou sav ki dwèt. Pwédyé ba Jéhova ofon tjèʼw, èk mandéʼy pou baʼw kouwaj-la pou fè volontéʼy. Konsa, lèʼw ka wè mannyè Jéhova ka wéponn lapwiyèʼw, ou kay vini pli fò èk ni pli kouwaj.​—Izay. 41:10, 13.

15. Apwé Jézi pawèt douvan sé disip li-a, kisa djèwté yo pousé yo pou fè? (Louk 24:52, 53)

¹⁵ Imajiné kòʼw an sitiwasyon sé disip Jézi-a. Apwé lanmò Jézi, tjè yo té kasé toubonnman. Yo té pèd bon jan yo yo té kontan an pil-la. Épi yo té santi konmsi yo té pèd èspwa yo. (Louk 24:17-21) Kanmenm, lè Jézi pawèt douvan yo, yo té si tèlman kontan. Mé Jézi fè tan pou édé yo konpwann ki, tout sé bagay sala ki té wivéʼy té nésésè pou akonpli pwofèsi Bib. Osi, i ba yo on twavay ki byen enpòtan pou yo fè. (Louk 24:26, 27, 45-48) Konsa, yo pa té an lapenn ankò. Èk yo té byen èksité paski Jézi té vivan ankò. Èk yo sav, i té kay édé yo akonpli twavay sala. Bò lè-a Jézi viwé an syèl, yo pa té ni pyès lapenn. Mé yo té ni an pil djèwté. Èk djèwté sa-a, pousé yo pou glowifyé Jéhova san doubout.​—Li Louk 24:52, 53; Twav. 5:42.

16. Kisa nou sa fè pou nou ni lajwa?

¹⁶ Koumannyè nou sa ni lajwa menm kon sé disip Jézi-a? Nou sa ni lajwa lè nou ka adowé Jéhova touléjou pa sèlman diwan sézon Mémoriyal-la. Alò, nou bouzwen mété lentéwé Wéyòm Bondyé pwèmyé an lavi nou. Pou ègzanp, an chay fwè èk sè ja fè chanjman an twavay yo pou yo sa pwéché pli, atandé mitin, èk pou fè asiwé yo ni tan pou létid fanmi yo. Adan di yo ja désidé pou tjenn lavi yo senp pou yo sa fè pli an kongwigasyon-an. Èk osi, pou yo sa wann sèvis an plas ki bizwen pli pwoklanmatè. Bon. Nou sav nou kay bouzwen ladiway pou nou sa kontiné adowé Jéhova. Èk Jéhova pwonmèt pou édé nou èk benni nou, si nou mété lentéwé Wéyòm-lan pwèmyé an lavi nou.​—Pwov. 10:22; Maf. 6:32, 33.

17. Kisa ou détèminé pou fè pou sézon Mémoriyal sala? (Gadé pòtwé-a.)

¹⁷ Nou byen èksité pou òbzòvé Mémoriyal lanmò Jézi, Madi li 4 Avwi. Mé an sé jou-a avan simenn sala wivé, nou vlé pwan tan pou pansé asou lavi èk lanmò Jézi, épi lanmityé-a i èk Jéhova ja moutwé nou. Nou vlé katjilé asou sé bagay sala byen souvan, avan sézon Mémoriyal-la. Pwan tan pou li èk mèdité asou dènyé simenn lavi Jézi asou latè-a. b Kon ou ka li, gadé pou pasay an Bib-la ki sa fòtifyé apwésiyasyonʼw, lanmityéʼw, kouwaj ou, èk lajwaʼw. Apwé, gadé pou mannyè ou sa moutwé Jéhova èk Jézi apwésiyasyonʼw. Épi ou kay ni asiwans-la ki Jézi kay apwésyé tout sa ou fè pou chonjéʼy diwan sézon Mémoriyal-la. ​—Wév. 2:19.