1-2. (1) Misimsim to kaˈorip ni Yis, nano sowal ato nidemakan ningra, papaira to masamaanay a harateng ita hani? (2) Onini lalakaw mamilengo to maanan hani?

 ANO mapatay ko cecay kaolahan ita a tamdaw, maedeng o mamaˈilol kita cingranan. Satapang aca, maharateng ita ko ˈayawho no mapatay cingra a tatokian, tada masomaday kita alatek. ˈAyaw no mapatay cingra ano micadaayho to adihayay a roray, mamangalef ko adada no falocoˈ ita. Kawra ikorto, maharateng ko pipasifanaˈ ningra kitaanan a pina demak, anca maharateng ko pipakalalok ningra kitaanan, sapalipahakaw kitaanan a sowal, ato midemakan a pina a demak, wa palidlid sato kita a lipahak.

² Malecaday, maˈosiay ita ko Fangcalay Cudad ˈayaw no mamapatay ci Yis tada misemsemay cingra, pakayni toninian tada masomaday ko falocoˈ ita. ˈAyaw ato ikor no Piharatengan a Saˈopo, limasmasen ita ko toki miharateng hano mihaen a mikinafalah ci Yis. (1 Korinto 11:24, 25) Nikawrira, midotim to nano sowal ato nidemakan ningra a demak i, lipahakay ko falocoˈ ita. Maharateng to mimaanay cingra nohatini, ato dadademaken ningra pakayni kitaanan ano ikor i, makowaday ko falocoˈ ita. Midotim tonini a demak, ato olah ni Yis kitaanan i, mamikowad kitaanan tano waywayan a patiko to olah ningra. Onini a lalakaw sasomowal to mamisamaan kita mihaen to demak.

3. Iraay ko maanan a lalangian ita miakoˈid to patafangan ni Yis a sapatefoc?

³ Maharateng ko kaˈorip ato kapatay ni Yis, wa irato ko miakoˈiday falocoˈ ita. Midemak ci Yis to mitosilay i fafekang no  sera i, pasowalay to tamdaw to papaira ko Hongti Kitakit no Kawas to maanan a sapalemed. Onini milingatay to Hongti Kitakit a soˈlinay kimad, pakayni kitaanan tada masakalimlaan. Roma i, samanen patafangan ni Yis ko sapatefoc, hato ngaˈayay kita nohatini mala widang cingranan aci Yihofaan. Cowa ka hatini aca, o mihakelongay cingranan a tamdaw iraayho ko tokel tahadaˈoc maˈorip, hanaca pakaˈaraw to mapatayay a salawina patikol maˈorip. (Yohani 5:28, 29; Loma 6:23) Milifok kita to hatiniay a sapalemed, cowa ko nano ˈicel no niyah. O nano demak ni Yihofa aci Yis kitaanan, awaay ko sapatiko ita Cangranan. (Loma 5:8, 20, 21) Kawra wa ngaˈay kita pasayra Cangranan paihkal to piakoˈid no niyah. Sasamaan ko pidemak hani?

4. Ci Mariya no Maktala samaanay paihkal to tada miakoˈiday ko niyah ci Yisan hani? (Nengnengen ko coka.)

⁴ Nengnengen ko nalifetan no cecay Yutaya fafahiyan. Ci Mariya no Maktala, na maˈimeray no pito kaloykoy cingra, tada pasemsemay cingranan. Maedeng matoleday ko falocoˈ ningra. Haratengen hena, mafahfahto ni Yis koya kaloykoy i, tada miakoˈiday cingra ci Yisan! Oranto i, mikotoday ci Yisan, tano toki, ˈicel ato hafay a midama to mitosilay a tayal ni Yis. (Luka 8:1-3) Kawra, papafelienho ni Yis to sapalemed, samanen mikinafalahay ci Yis to ˈorip no niyah, ira ko toki no ‘polong mitooray cingranan a tamdaw’ tahadaˈoc ko ˈorip. (Yohani 3:16) Cowaho kafanaˈ ci Mariya to mamilayap tonini sapalemed, kawra miakoˈidayto cingra ci Yisan, madimadi a mikotod cingranan. Ya mapasemsem ci Yis i hecek i, itiniay i ngata ci Mariya a tomireng, sapidamaaw ci Yisan cingra, ato sapihinomaw to romaroma tamdaw. (Yohani 19:25) Mapatayto ci Yis i, malahakelongay ci Mariya ato roma tatosa fafahiyan mihawikid to sapafangsis a cemel tayra i tadem, misipasip to tireng ni Yis. (Marko 16:1, 2) Hatini ko ka madimadi ni Mariya ci Yisan, hato mikiriwiˈay cingra pakaˈaraw to nika patikol ni Yis a maˈorip, masasowalayho ci Yisan, onini a nalifetan ningra cowa ka malifet  no romaroma ˈalomanay a nisawawaan.—Yohani 20:11-18.

5. Sasamaan kita paihkal to piakoˈid ci Yihofaan aci Yisan?

⁵ Adihayay ko midemakan ni Yihofa aci Yis saki kitaanan, ngaˈayay kita mitodong ci Mariyaan a paihkal to piakoˈid Cangranan. Sakadademaken ita ko toki, ˈicel ato dafong no niyah midama to Hongti Kitakit no Kawas, tinakoen mirienang to patirengay no likakawa, ato midama to mitomadaway a tayal.

6. O sapatefoc hano o sapafeli ni Yihofa tisowanan a kalimlaan a sapatelong han hani?

⁶ Haratengen hakowaay ko nika olah ni Yihofa aci Yis tisowanan, maedeng mamasemer ko falocoˈ iso, sapatikoaw to olah Nangra. (1 Yohani 4:10, 19) Ano mahapinang iso ko pikinafalah ni Yis to ˈorip saki tisowanan i, mamangalef ko kaolah Cangranan. Mahaenay ko falocoˈ no tarokos ci Pawlo, itini Kalatiya cudad matomesay ko piakoˈid ningra, sowal sa: ‘Wawa no Kawas . . . maolahay takowanan, kinafalah to ˈorip no niyah saki takowanan.’ (Kalatiya 2:20) Tona iraay ko sapatefoc, misolotan ni Yihofa kiso tayra i raringid Ningra, mala widang Ningra. (Yohani 6:44) Minengnengay ci Yihofa to kangaˈayan iso, pasadak to matekesay a sapiˈaca to sakangaˈay iso mala widang Ningra, mafanaˈ toninian i, coko dihkoay ko falocoˈ iso saw? Onini coko mitongalay to kaolah iso ci Yihofaan aci Yisan han? Licayen ita ko niyah: “O mahaenay a noka olah micoracoray takowanan misamaan ko pidemak hani?”

7. Sasamaan kita paihkal to maolahay ko niyah ci Yihofaan aci Yisan hani? Nengnengen ko coka. (2 Korinto 5:14, 15; 6:1, 2)

⁷ Ano maolah kita ci Yihofaan aci Yisan i, o mamaolah kita to tao. (ˈOsien ko 2 Korinto 5:14, 15; 6:1, 2.) O cecay pakayraan ita paihkal to hatiniay a olah i, fanekfek mirienang to mitosilay a tayal. Mamisaˈicel kita pasowal to malitemohay a tamdaw to soˈlinay kimad, ano  caka lecad ko finacadan no tao i, aka sawad sa paladaˈ to ngaˈayay lihaf cangranan. Roma i, cowa ko kacihafay anca hakowaay ko picudadan no tao ko sapisaˈosi ita, to tatosilen cingra hokira. Ano mihaen, o midofdofayto kita to araaw ni Yihofa, samanen ‘araaw no Kawas i, mangalayay Cingra to sakaˈoripaw no masakenakenaay a tamdaw, masongilaˈ cipinang to soˈlinay kimad.’—1 Timoti 2:4.

8. Sasamaan kita paihkal to olah i salikaka hani?

⁸ Ano maolahay kita to Kawas aci Kristoan i, mamaolah kita to salikaka. (1 Yohani 4:21) O caciharateng kita ato midama to tahalifaay to sapalifet a salikaka. Ano mapatay ko salawina nangra, hinomen no mita cangra, ano adada cangra i, lisoˈen ita cangra, ano matoled cangra i, kowaden ita cangra. (2 Korinto 1:3-7; 1 Tisalonika 5:11, 14) Padadotoc kita mitolon saki cangranan, samanen maharatengay ita ‘o pingitangit no moecelay a tamdaw, tada ciˈicelay.’—Yakop 5:16.

9. Ngaˈayho kita sasamaan paihkal to olah i salikaka aki?

⁹ Misaˈicel kita dipayal a malacafay to salikaka, paihkal to maolahay kita cangranan. Saˈicelen ita mitodong ci Yihofa, mikifalocoˈ misodod to tao. Pakayni sapisododaw to raraw ita, ci Yihofa hayi sanay kinafalah to kaolahan a Wawa. Mihaenay i, ano ira ko pakararaway kitaanan a salikaka, o mamikifalocoˈ kita misodod cangranan. Ci Yis itini sapatinako masowalay ko cecay mariˈangay a koli, soˈlin palasawaden no tawki ko adihayay a tadah ningra, kawra cowa kakahi cingra palasawad to mimingay a tadah no roma a koli. Caay ka ciharateng kita malecad cingranan. (Matay 18:23-35) Ano iraay ko lacongis iso to cimaanan a salikaka i, ˈayaw no mirienang to Piharatengan a Saˈopo, wa ngaˈay kiso talaˈayaw malaliˈay cingranan han? (Matay 5:23, 24) Ano mihaen ko demak iso, paihkalay to tangongolay ko olah iso ci Yihofaan aci Yisan.

10-11. O malohemay malitengay sasamaan paihkal to maolahay ko niyah ci Yihofaan aci Yisan hani? (1 Pitiro 5:1, 2)

¹⁰ O malohemay malitengay sasamaan paihkal to nika olah ci Yihofaan aci Yisan hani? O cecay masakalimlaan a pakayraan i, midimokos to ‘siri’ ni Yis. (ˈOsien ko 1 Pitiro 5:1, 2.) Na ihkalay ci Yis palimoˈot to tarokos ci Pitiroan papihaen to demak. Kinatolo ci Pitiro misahaiken ci Yisan ikor i, maedeng sapisawacayaw to maolahay ko niyah ci Yisan. Licayen noya patikolayto maˈorip a Yisan ci Pitiro: ‘Simonaw, wawa ni Yohani, maolahay kiso takowanan han?’ Mana ecaka olah ci Pitiro ci Yisan saw. Toha sapisawacayaw tonini a olah, maedeng makahiay cingra midemak to maamaan. Oranto i, pasowalan ni Yis ci Pitiro: ‘Ka pidimokos kiso to siri no mako.’ (Yohani 21:15-17) To hakelong no ˈorip ningra, misongilaˈay ci Pitiro midimokos to siri ni Yis, misawacay to nika olah ningra ci Yisan.

¹¹ O malohemay malitengay, kamo itini ˈayaw ato ikor no Piharatengan a Saˈopo to pina a lipay, sasamaan midemak paihkal to misaaretengay minengneng ko niyah to sapalimoˈot ni Yis hani? Ka pidimokos kamo to salikaka, hanaca misaˈicel a padama to misawadayto mitosil a tamdaw minokay i tatihi ni Yihofa, o paihkalay konini to tangongolay a olah namo ci Yihofaan aci Yisan. (Icikil 34:11, 12) O mamikihar kamo to mipacekiwan ato sakinacecay mirienang to Piharatengan a Saˈopo a tamdaw, kiemelen mihamham cangra, latek mamala salikaka cangra noikor.

12. Midotim toya nano sowal ni Yis ˈayaw no patay a dadaya, hano patimolo kitaanan hani? (Yohani 16:32, 33)

¹² ˈAyaw no mamapatay ci Yis toya dadaya, pasowalay to nisawawaan: ‘O tatahalifa kamo to pades itini i hekal, kawra katimolo kamo!  Malowidayto ako ko hekal.’ (ˈOsien ko Yohani 16:32, 33.) Misamaanay hano tada timolo ci Yis misiˈayaw to ˈada, tahapatay a madimadi hani? Samanen misarocoday cingra mitiˈer ci Yihofaan. Mafanaˈay ci Yis mamisiˈayaw ko nisawawaan to malecaday a sapalifet, mansa mingitangit ci Yihofaan midimokos cangranan. (Yohani 17:11) Mafanaˈ toninian i, misamaanay hano patimolo kitaanan hani? Samanen ikakaay ko ˈicel ni Yihofa to cimacima a ˈada ita. (1 Yohani 4:4) O roma sa i, mafanaˈay ci Yihofa to kihcod. Pakasoˈlinay kita, ano tiˈeren ci Yihofa, o papakaremo to kokiˈ, mamatongal ko timolo.

13. Ci Yosif no Arimatiya samaanay paihkal to timoloay cingra hani?

¹³ Nengnengen ci Yosif no Arimatiya, o masalalomaˈay no Lomaocay (o saˈakawangay a hoing no Yutaya) cingra, o cinganganay tamdaw itini Yutaya. Kawra, itiniho ci Yis i fafekang no sera mitosil i, cowa paihkal ci Yosif to timoloay. Sowal no Fangcalay Cudad: ‘O nisawawaan ni Yis ci Yosif, kawra matalaway cingra to Yutaya a tamdaw, mansa lonok sa mala nisawawaan.’ (Yohani 19:38) Soˈlin ciharatengay ci Yosif to lihaf no Hongti Kitakit, kawra cowa ka sakafanaˈaw no tao to pakasoˈlinay ci Yisan cingra. Maedeng matalaway cingra malahdaw ko tadamaanay a saaroˈan no niyah. Kawra o sowal no Fangcalay Cudad, ci Yosif ta mapatayto ci Yis i, ‘timoloay a tayra ci Pilatoan, misaali to tireng ni Yis.’ (Marko 15:42, 43) Nohatini, mafanaˈayto ko tamdaw maemin to midamaay ci Yosif ci Yisan.

14. Ano iraay ko matalaway a falocoˈ iso to tamdaw i, sasamaan ko pidemak hani?

¹⁴ Matiraay kiso ci Yosifan matalaw to tamdaw han? Itini i picudadan anoca katayalan, mangodoay kiso mafanaˈ ko tao to Misawacayay Tamdaw ni Yihofa kiso han? Matalaway kiso to pinengneng no tao tisowanan, cato kakahi mitosil anoca mipaputisem han? Aka a pakayni to nika talaw caka pidemak to matatodongay a demak, sarocoden a mingitangit ci Yihofa i satolon, pafeli to timolo i tisowanan, padama tisowanan midofdof to araaw Ningra. Ano maˈaraw iso ko pipacaˈof ni Yihofa to satolon iso i, o tatanoktokto, mangalef ko ka timolo.—Isaya 41:10, 13.

15. Patalahkalay ci Yis to tireng i kaˈayaw no nisawawaan ikor i, lipahakay ko falocoˈ nangra, mansa samaanayto ko pidemak nangra hani? (Luka 24:52, 53)

¹⁵ Mapatayto ci Yis i, tada masomaday ko nisawawaan ningra. Malahdawayto ko kanonoˈan a widang nangra, malahdawayto ko hatokel nangra. Ano ilalomaˈay nangra kiso itiya i, wa samaan ko falocoˈ iso hani? (Luka  24:17-21) Kawra patalahkalay ci Yis to tireng i kaˈayaw nangra, mipalak to toki padama cangranan cipinang to samaanay malaˈosi ko sapairasol no Fangcalay Cudad. Hanaca, pafelian ningra cangra to cecay masakalimlaan a tayal. (Luka 24:26, 27, 45-48) Ikor no 40 romiˈad, patikolayto ci Yis tayra i kakarayan. Itiya caayto ka masomad ko nisawawaan, ao lipahakayto ko falocoˈ nangra, samanen mafanaˈay to maˈoripayho ko Tapang nangra, papadama cangranan milahci to faelohay a ˈinorong. Tona mahemekay cangra, mansa padadotoc pakahemek ci Yihofaan.—ˈOsien ko Luka 24:52, 53; Dmak 5:42.

16. Sasamaan kita mitodong to nisawawaan ni Yis hani?

¹⁶ Sasamaan kita mitodong to nisawawaan ni Yis hani? Itini kaˈayaw ato ikor no Piharatengan a Saˈopo to pina lipay, ato ilalomaˈ no cecay miheca i, o lalipahak kita midoko ci Yihofaan. Sapitooraw tonini a patosokan, o papaisalakaten ita i kaˈorip ko Hongti Kitakit no Kawas. Tinakoen, mamicerid a mirienang to mitosilay, to saˈopo ato pakalomaˈay a pidoko, ˈalomanay tamdaw milowanan nangra ko toki no katayalan. O roma salikaka sapitongalaw to demak i kasakopang, anca sakalinahaw tayra i misaaliay to ˈalomanay mitosilay a kitiraan, hato misawaday to adihayay dafong, ˈarawhan o kalimlaan a dafong koranan sanay minengneng ko tao. Soˈliˈlin mamihadidi kita ngaˈ, ngaˈay padadotoc midoko ci Yihofaan, kawra mikiˈokay ci Yihofa, ano paisalakaten ita i kaˈorip ko Hongti Kitakit Ningra i, o papafelien Ningra kita to kadofahay a halifon.—Taneng 10:22; Matay 6:32, 33.

17. ˈAyaw ato ikor no pina lipay to Piharatengan a Saˈopo anini a miheca, mamisetek kiso to falocoˈ samaan ko demak hani? (Nengnengen ko coka.)

¹⁷ Halamhamay kita mirienang to Piharatengan to Pikinafalah ni Yis a Saˈopo, itini saka 4 folad 4 romiˈad pitosaan no picudadan. Nikawrira, aka tahiraen to pirienangan a tatokian ngaˈ, misimsim to hakelong no ˈorip ni Yis ato kapatay ningra, to olah ningra ato olah ni Yihofa kitaanan. ˈAyaw ato ikor no pina lipay nonini Piharatengan a Saˈopo, mamihaen to demak kita. Tinakoen, limasmasen iso ko toki miˈosi ato midotim to sapatongal lalakaw B12 no Faelohay Hekal Mihongyakan Fangcalay Cudad, itiniay i lalomaˈ no masalipaˈay a lalakaw: “Salikoray Lipay no Pikinafalah ni Yis a Demak.” Ano miˈosi kiso i, kilimen ko sinael mitongal to piakoˈid, to olah, timolo ato hemek iso, ikor haratengen sasamaan kiso tano demak patiko ci Yihofaan aci Yisan. Papakasoˈlinen iso, ano misarocod kiso kiemel a miharateng ci Yisan i, cowa ko mamatawal ningra.—Paˈarawan 2:19.