1-2. (1) ?Wanem filing blong yumi taem yumi tingbaot laef mo ol wok we Jisas i mekem long wol? (2) ?Bambae yumi tokbaot wanem long stadi ya?

 !TAEM wan we yumi lavem hem tumas i ded, yumi misim hem bigwan! Fastaem, maet yumi harem nogud tumas taem yumi tingtingbak long ol dei ya we klosap hem i ded, speseli sipos hem i bin safa bigwan bifo we hem i ded. Be sloslo, maet yumi stat blong harem gud bakegen taem yumi tingbaot ol samting we hem i talem o i mekem, o ol tok we hem i talem blong leftemap tingting blong yumi o i mekem yumi smael.

² Long sem fasin, yumi harem nogud taem yumi ridim ol stori we i soemaot olsem wanem Jisas i safa mo i ded. Long ol wik blong Memoriol, yumi tekem taem blong tingbaot olsem wanem sakrefaes blong Jisas i rili spesel. (1 Kor. 11:24, 25) Be yumi glad taem yumi tingbaot ol samting we Jisas i talem mo i mekem taem hem i stap long wol. Mo tu, taem yumi tingbaot samting we Jisas i stap mekem naoia, mo we bambae i mekem long fiuja, yumi harem gud tumas. Taem yumi tingting dip long ol samting ya mo long lav we hem i soemaot long yumi, hemia i pulum yumi blong soemaot glad blong yumi long plante defren rod, olsem we bambae yumi tokbaot long stadi ya.

3. ?Wanem ol risen we i pulum yumi blong talem tangkiu from ransom?

³ Yumi harem gud taem yumi tingbaot laef mo ded blong Jisas. Taem Jisas i stap long wol, hem i tokbaot long ol man ol gudfala samting we Kingdom blong God bambae i mekem. Yumi glad tumas blong save trutok long saed blong Kingdom. Yumi glad tumas long ransom, from i openem rod blong yumi save gat wan gudfala frensip wetem Jehova mo Jisas. Olgeta ya tu we oli soemaot se oli bilif long Jisas, oli gat hop ya  blong laef olwe mo luk ol famle blong olgeta we oli ded oli laef bakegen. (Jon 5:28, 29; Rom 6:23) Yumi no bin mekem eni samting blong yumi save kasem ol blesing ya, mo bambae yumi neva save pembak God mo Kraes from ol samting we tufala i mekem blong yumi. (Rom 5:8, 20, 21) Be yumi save mekem sam samting blong talem tangkiu long tufala from. ?Olsem wanem blong mekem?

4. ?Meri Magdala i mekem wanem blong talem tangkiu long Jisas from samting we hem i mekem long hem? (Yu luk pija.)

⁴ Tingbaot eksampol blong wan woman Jiu we nem blong hem Meri Magdala. Hem i safa bigwan from we i gat seven dimon i bin stap long hem. Maet hem i harem se i no gat man i save halpem hem. !Taswe i sua se hem i talem tangkiu long Jisas taem i mekem hem i kam fri long ol dimon ya! Fasin tangkiu we hem i gat i pulum hem blong folem Jisas, mo blong yusum taem, mo paoa, mo ol samting blong hem, blong sapotem Jisas taem i stap prij. (Luk 8:1-3) Nating se Meri i glad long ol samting we Jisas i mekem long hem, be hem i no save se Jisas bambae i mekem plante moa samting blong halpem hem long fiuja. Bambae hem i givim laef blong hem long bihaf blong ol man, “blong olgeta man we oli soemaot se oli bilif long hem” oli save kasem laef we i no save finis. (Jon 3:16) Be yet, Meri i soemaot se hem i glad long Jisas, taem hem i holemstrong long hem. Taem Jisas i stap safa long pos, Meri i stanap klosap from we hem i tingbaot Jisas, mo i wantem leftemap tingting blong ol narafala we oli stap. (Jon 19:25) Afta we Jisas i ded, Meri mo tu narafala woman oli karem ol lif we oli gat gudfala smel, i go long tomb we oli berem Jisas long hem. (Mak 16:1, 2) Jehova i blesem Meri bigwan from we hem i holemstrong long Jisas. Meri i glad blong mitim Jisas taem i laef bakegen mo i toktok wetem hem. Hemia nambawan privilej we plante disaepol oli no kasem.—Jon 20:11-18.

5. ?Yumi save mekem wanem blong talem tangkiu long Jehova mo Jisas, from samting we tufala i mekem blong yumi?

 ⁵ Yumi tu yumi save mekem sam samting blong talem tangkiu long Jehova mo Jisas, from samting we tufala i mekem blong yumi. Yumi mekem olsem taem yumi yusum taem, paoa, mo ol samting blong yumi blong sapotem wok blong Kingdom. Eksampol, yumi save givhan blong bildim mo mentenem ol haos wosip.

6. ?From wanem yumi save talem se ransom i wan presem we Jehova i givim long yumi wanwan?

⁶ Taem yumi tingbaot se Jehova mo Jisas i lavem yumi, hemia i pulum yumi blong lavem ol narafala. (1 Jon 4:10, 19) Yumi lavem olgeta moa, taem yumi luksave se Jisas i ded from yumi wanwan. Aposol Pol i luksave samting ya mo i soemaot tangkiu we hem i gat, taem hem i raet i go long ol man Galesia se: “Pikinini blong God . . . i lavem mi, nao i givim laef blong hem from mi.” (Gal. 2:20) Tru long ransom, Jehova i pulum yu yu kam long hem, blong yu save kam fren blong hem. I sua se yu glad blong save se Jehova i luk wan gudfala samting long yu, mo i blesem yu taem i kaontem yu olsem fren blong hem. (Jon 6:44) Ating hemia i mekem se yu lavem moa Jehova mo Jisas. Taswe i gud yu askem se, ‘?Lav ya bambae i pulum mi blong mekem wanem?’

7. Folem pija, ?olsem wanem yumi evriwan i save soemaot se yumi lavem Jehova mo Jisas? (2 Korin 5:14, 15; 6:1, 2)

⁷ Lav we yumi gat long God mo Kraes bambae i pulum yumi blong soemaot lav long ol narafala. (Ridim 2 Korin 5:14, 15; 6:1, 2.) Wan rod blong soemaot lav ya, hemia taem yumi wok strong long wok blong prij. Yumi toktok long eni man we yumi mitim, nomata wanem kala blong skin, kantri blong olgeta, oli rij o pua, o nomata wanem bakgraon oli  kamaot long hem. Long rod ya, yumi stap wok wetem Jehova blong mekem plan blong hem i kamtru, hemia se “ol defdefren kaen man oli mas kasem laef, mo i wantem we olgeta man oli kasem stret save long trutok.”—1 Tim. 2:4.

8. ?Olsem wanem yumi save soemaot lav long ol brata mo sista?

⁸ Yumi pruvum tu se yumi lavem God mo Kraes taem yumi soemaot lav long ol brata mo sista. (1 Jon 4:21) Yumi soemaot se yumi intres long olgeta mo sapotem olgeta taem oli fesem ol trabol. Yumi leftemap tingting blong olgeta taem oli lusum wan long ded, visitim olgeta taem oli sik, mo mekem bes blong yumi blong enkarejem olgeta taem tingting blong olgeta i foldaon. (2 Kor. 1:3-7; 1 Tes. 5:11, 14) Yumi gohed blong prea from olgeta mo yumi tingbaot se “taem we stret man i krae i go long God, prea ya i gat paoa blong givhan.”—Jem. 5:16.

9. ?Wanem narafala rod blong soemaot lav long ol brata mo sista?

⁹ Yumi soem lav tu long ol brata mo sista taem yumi wok had blong holemtaet pis wetem olgeta. Yumi traehad blong folem eksampol blong Jehova blong fogivim olgeta. Sipos Jehova i glad blong letem Boe blong hem i ded from sin blong yumi, yumi sud rere blong fogivim ol brata mo sista taem oli mekem sin agensem yumi. Yumi no wantem kam olsem rabis slef ya we Jisas i tokbaot long wan parabol blong hem. Nating se masta blong hem i kanselem bigfala kaon blong hem, be slef ya i no fogivim narafala slef we i gat smol kaon long hem. (Mat. 18:23-35) Sipos yumi gat wan problem wetem wan long kongregesen, i gud yumi tekem faswan step blong mekem pis wetem hem, bifo we yumi joen long Memoriol. (Mat. 5:23, 24) Sipos yumi mekem olsem, yumi pruvum se yumi lavem Jehova mo Jisas.

10-11. ?Olsem wanem ol elda oli save soem lav long Jehova mo Jisas? (1 Pita 5:1, 2)

¹⁰ ?Olsem wanem ol elda oli save soemaot se oli lavem Jehova mo Jisas? Wan impoten rod blong mekem olsem, hemia blong lukaot gud long nid blong ol sipsip blong Jisas. (Ridim 1 Pita 5:1, 2.) Jisas i makem klia poen ya long aposol Pita. Afta we hem i giaman tri taem se hem i no save Jisas, hem i wantem tumas blong pruvum se hem i lavem Jisas. Afta we Jisas i laef bakegen, hem i askem long Pita se: “Saemon, boe blong Jon, ?yu yu lavem mi?” Yumi sua se Pita bambae i mekem eni samting blong pruvum se hem i lavem Masta blong hem. Jisas i talem long Pita se: “Yu lidim ol smol sipsip blong mi.” (Jon 21:15-17) Mo afta long taem ya, Pita i soemaot long laef blong hem se hem i kea long ol sipsip blong masta, mo hemia i pruvum se hem i lavem Jisas.

¹¹ Ol elda, long ol wik bifo mo afta long Memoriol, ?olsem wanem yufala i save soemaot se ol tok we Jisas i talem long Pita, oli impoten long yufala? Yufala i save soemaot se yufala i lavem Jehova mo Jisas, taem yufala i traehad oltaem blong visitim ol brata mo sista, mo antap moa halpem olgeta we oli no moa mekem wok blong Jehova, blong oli kambak long Jehova. (Esik. 34:11, 12) Mo tu, yufala i save soem intres long ol Baebol studen mo ol niuwan we oli kam long Memoriol. Yumi wantem mekem olgeta oli harem gud, from yumi hop se wan dei olgeta tu bambae oli kam ol man blong Jisas.

12. ?From wanem ol tok we Jisas i talem long naet bifo we hem i ded, i leftemap tingting blong yumi? (Jon 16:32, 33)

¹² Long naet bifo we Jisas i ded, hem i talem long ol disaepol blong hem se: “Long wol ya bambae yufala i kasem trabol, !be tingting  blong yufala i mas strong! Mi mi winim wol ya finis.” (Ridim Jon 16:32, 33.) ?Wanem i halpem Jisas blong i gat strong tingting taem ol enemi oli mekem i nogud long hem, mo blong i holemstrong long Jehova kasem we i ded? Hem i dipen long Jehova. Hem i save se ol man blong hem tu bambae oli fesem ol semfala traem, taswe hem i askem long Jehova blong i lukaot gud long olgeta. (Jon 17:11) ?From wanem hemia i leftemap tingting blong yumi? From Jehova i strong moa i winim eni enemi blong yumi. (1 Jon 4:4) I no gat wan samting we Jehova i no luk. Yumi sua se sipos yumi dipen long Jehova, hem i save halpem yumi blong no fraet mo yumi gat strong tingting.

13. ?Olsem wanem Josef blong Aramatia i soemaot se hem i gat strong tingting?

¹³ Tingbaot eksampol blong Josef blong Aramatia. Hem i wan man we ol man Jiu oli respektem gud hem. Hem i wan memba blong Sanhedrin, hemia hae kot blong ol man Jiu. Be taem Jisas i stap long wol i stap prij, Josef i no soemaot nating se hem i gat strong tingting. Jon i talem se hem i “wan disaepol blong Jisas be i stap haedem from we hem i fraet long ol man Jiu.” (Jon 19:38) Nating se Josef i intres long mesej blong Kingdom, be hem i haedem long ol narafala se hem i bilif long Jisas. Maet hem i fraet se bambae hem i lusum posisen blong hem insaed long komuniti. Nomata se i olsem, Baebol i talem se afta we Jisas i ded, Josef i “mekem tingting blong hem i strong, nao i go stret long fes blong Paelat, i askem bodi blong Jisas.” (Mak 15:42, 43) Long taem ya, Josef i no haedem nating se hem i wan disaepol blong Jisas.

14. ?Yu mas mekem wanem sipos yu fraet long man?

¹⁴ ?Samtaem yu yu fraet long man olsem Josef? Long skul o long wok, ?yu yu fraet blong talemaot long ol narafala se yu yu wan Witnes blong Jehova? ?Yu yu fraet blong stat prij o blong baptaes from yu wari long tingting we ol narafala oli save gat long yu? I nogud yu letem ol filing ya oli stopem yu blong mekem samting we i stret. I gud yu prea long Jehova. Askem hem blong i givim strong tingting long yu blong mekem samting we hem i wantem. Taem yu luk olsem wanem Jehova i ansa long ol prea blong yu, bambae yu kam strong moa, mo yu gat strong tingting.—Aes. 41:10, 13.

15. Afta we Jisas i kamtru long ol disaepol, ?glad we oli kasem i pulum olgeta blong mekem wanem? (Luk 24:52, 53)

¹⁵ Ol disaepol oli harem nogud tumas taem Jisas i ded. Traem tingbaot se yu tu yu fesem wan situesen olsem. Oli no lusum nomo wan  gudfala fren, be oli harem tu se oli no moa gat hop. (Luk 24:17-21) Be taem Jisas i kamtru long olgeta, hem i tekem taem blong givhan long olgeta, blong oli kasemsave olsem wanem hem i stap mekem ol profet tok blong Baebol oli kamtru. Mo tu, hem i givim wan impoten wok blong oli mekem. (Luk 24:26, 27, 45-48) Foti dei afta we Jisas i go antap long heven, ol disaepol oli no moa harem nogud, be oli glad tumas. Taem oli save se Masta blong olgeta i laef bakegen, mo i rere blong halpem olgeta blong oli mekem wok we hem i givim long olgeta, oli glad tumas. Mo glad ya i pulum olgeta blong oli gohed blong presem Jehova.—Ridim Luk 24:52, 53; Wok 5:42.

16. ?Olsem wanem yumi save folem eksampol blong ol disaepol blong Jisas?

¹⁶ ?Olsem wanem yumi save folem eksampol blong ol disaepol blong Jisas? Yumi glad blong wosipim Jehova, i no jes long ol wik blong Memoriol, be long ful yia. Hemia i min se yumi mas putum Kingdom fasples long laef blong yumi. Eksampol, plante oli jenisim program blong olgeta long wok blong oli save joen long wok blong prij, go long ol miting, mo mekem famle wosip oltaem. Samfala, oli disaed blong no gat tumas samting long saed blong bodi, we ol narafala oli ting se oli moa impoten, blong oli save mekem moa wok long kongregesen o go long wan ples we i nidim moa man blong prij. Nating se yumi nidim strong tingting blong gohed long wok blong Jehova, hem i promes se bambae hem i blesem yumi sipos yumi putum Kingdom fasples long laef blong yumi.—Prov. 10:22; Mat. 6:32, 33.

17. ?Yu gat strong tingting blong mekem wanem long ol wik blong Memoriol? (Yu luk pija.)

¹⁷ Yumi luk fowod blong joen long Memoriol long Tusde 4 Eprel. Be yumi no mas wet kasem taem ya blong yumi save tingbaot laef mo ded blong Jisas, mo lav we hem mo Jehova i soemaot long yumi. I gud yumi tekem evri janis long ol wik bifo mo afta long Memoriol blong mekem samting ya. Eksampol, i gud yumi makemaot sam taem blong ridim mo tingting dip long jat ya “Laswan Wik Blong Jisas Long Wol,” we i stap long Apendiks B12 long Niu Wol Translesen. Sipos yu mekem olsem, traem faenem sam vas blong Baebol we i pulum yu blong wantem talem tangkiu moa long Jehova, lavem tufala, gat strong tingting, mo glad. Biaen, traem tingbaot sam rod we yu save folem blong soemaot se yu glad long ol samting we tufala i mekem blong yu. Yu save sua se Jisas bambae i tinghae long olgeta samting we yu mekem, blong tingbaot hem long ol wik blong Memoriol.—Rev. 2:19.