1-2. (a) Banci saja uga perasanta sanga ngukuri kerna kegeluhen ras pelayanen Jesus? (b) Kai kari sibahas bas artikel enda?

 ADI lit kalak si keleng ateta si enggo mate, pasti tedeh kel ateta ia. Tangtangna banci saja sedih kel siakap sanga siukuri wari-wari sope lenga ia mate. Terlebih adi mesui kel akapna ope lenga ia mate. Tapi, dungna banci ka kita terapuli sanga siukuri kai si enggo iajarkenna man banta ntah pe kai si enggo lakokenna man banta guna mpegegehi kita ntah pe erban meriah ukurta.

² Bas minggu-minggu sope ras kenca Peringeten, siban ateta waktuta guna ngukuri pengorbanen Jesus si meherga. Banci saja sedih siakap sanga siukuri kerna uga suina akap Jesus ras kerna kematenna. (1 Kor. 11:24, 25) Tapi, terapuli kita sanga siukuri kerina si ikataken ras si ilakoken Jesus sanga ia i doni. Terpegegehi ka kita adi siukuri kerna kai si lakokenna gundari ras si lakokenna pagi man banta. Adi siukuri kerna si e ras kekelengenna man banta, teriahken kita guna ncidahken pengatan bujurta. Bas artikel enda, sibahas kari kai saja si banci silakoken guna ncidahken pengatan bujurta.

3. Kai saja alasenta ngata bujur nandangi tebusen?

³ Ngata bujur kita sanga siukuri kerna kegeluhen ras kematen Jesus. Bas pelayanenna i doni, iajarken Jesus kerna pasu-pasu si nandangi ibereken Kerajan Dibata. Siergai kel kebenaren kerna Kerajan e. Ngata bujur kel kita nandangi tebusen. Perban lit tebusen, banci kita rembak ras  Jahwe bage pe Jesus. Selain si e, adi erkiniteken kita man Jesus, lit arapenta nggeluh rasa lalap janah banci siidah kalak si keleng ateta ipekeke pagi. (Joh. 5:28, 29; Rom. 6:23) Situhuna, labo kita metunggung ngaloken pasu-pasu e janah labo banci sibalas kai si enggo ilakoken Dibata ras Kristus man banta. (Rom. 5:8, 20, 21) Tapi, banci sibuktiken pengerganta man Jahwe bage pe man Jesus. Uga carana?

4. Uga cara Maria Magdalena ncidahken pengerganna nandangi kai si lakoken Jesus man bana? (Nen gambar.)

⁴ Cuba ukuri contoh arah Maria Magdalena sekalak diberu Jahudi. Parah kel situasina, lit pitu malekat jahat si nyiksa ia. Banci saja la kapna lit si banci nampati ia. Emaka, pasti ngata bujur kel ia sanga ibebasken Jesus ia arah pengaruh malekat-malekat jahat. Pengerganna e ngiahken ia jadi pengikut Jesus janah pakena waktuna, gegehna, ras ertana guna ndukung Jesus bas pelayanen. (Luk. 8:1-3) Amin pe iergai Maria kel kai si ilakoken Jesus man bana, banci saja la tehna maka ilakoken Jesus pagi terbuen man bana. Ibereken Jesus kegeluhenna guna kerina jelma “gelah ise pe si erkiniteken man bana” banci ndatken kegeluhen seh rasa lalap. (Joh. 3:16) Amin pe lenga teh Maria kerna si e, cidahkenna pengerganna man Jesus alu setia man bana. Sanga mesui kel akap Jesus bas tiang siksan, Maria cinder i deherna guna mpegegehi Jesus ras kalak si deban si lit i je. (Joh. 19:25) Kenca Jesus mate, Maria ras dua diberu si debanna maba rempah-rempah guna penguburen Jesus. (Mrk. 16:1, 2) Mbelin kel pasu-pasu si ibereken Jahwe man Maria perban setia ia. Kenca Jesus ipekeke, ijumpaina Maria, janah ercakap-cakap kalak e. Sitik ngenca murid Jesus si banci ndatken kesempaten e.​—Joh. 20:11-18.

5. Uga carata mbuktiken pengerganta man kerina si lakoken Jahwe ras Jesus man banta?

 ⁵ Banci sicidahken pengerganta man kerina si enggo lakoken Jahwe ras Jesus man banta alu nggunaken waktu, gegeh, ras ertata guna ndukung pendahin Kerajan. Contohna, banci kita ikut mbangun ras ngurus bangunen-bangunen si ipake guna ibadah si benar.

6. Engkai maka banci sikataken tebusen e eme hadiah man banta sekalak-sekalak?

⁶ Sanga siukuri uga kelengna ate Jahwe ras Jesus kita, kita pe teriahken guna engkelengi Jahwe ras Jesus. (1 Joh. 4:10, 19) Reh kelengna ateta Jahwe ras Jesus perban enggo mate Jesus man banta sekalak-sekalak. Rasul Paulus pe tehna kerna si e, janah icidahkenna pengerganna sanga itulisna surat man kalak Galati. Nina, ‘Anak Dibata engkelengi aku janah ngorbanken dirina guna aku.’ (Gal. 2:20) Perban tebusen, itarik Jahwe kita ku Ia janah dungna banci kita jadi temanNa. (Joh. 6:44) Enda erban malem kel pusuhta perban siteh inen Jahwe kai si mehuli arah kita, janah enggo merga kel kita itukurNa alu tebusen gelah banci kita jadi temanNa. Enda erban reh kelengna ateta Jahwe ras Jesus. Emaka, banci sisungkuni banta, ‘Kekelengenku man Jahwe ras Jesus ngiahken aku ngelakoken kai?’

7. Bagi siidah bas gambar, uga carata mbuktiken kekelengenta man Jahwe ras Jesus? (2 Korinti 5:14, 15; 6:1, 2)

⁷ Kekelengenta man Dibata ras Kristus ngiahken kita engkelengi kalak si deban. (Baca 2 Korinti 5:14, 15; 6:1, 2.) Salah sada carana ncidahken kekelengenta eme alu semangat erberita si meriah.  Erberita kita man kerina kalak, la soal kai bangsana, sukuna, status ekonomina, ntah pe latar belakangna. E sesuai ras sura-sura Jahwe eme “gelah erbage-bage kalak iselamatken janah ndatken pemeteh si tepat kerna kebenaren.”​—1 Tim. 2:4.

8. Uga kita mbuktiken maka keleng ateta turang seninata?

⁸ Sibuktiken maka keleng ateta Dibata ras Kristus alu ncidahken kekelengen man turang seninata. (1 Joh. 4:21) Ermediate kita man kalak e, janah sisampati kalak e sanga lit masalahna. Siapuli kalak e sanga lit kalak si ikelengina mate, sidahi kalak e sanga ia sakit, ras sipegegehi kalak e asa ngasupta sanga kitik ukurna. (2 Kor. 1:3-7; 1 Tes. 5:11, 14) Terus sitotoken kalak e perban siteh maka “toto kalak si benar, mbelin kel pengaruhna.”​—Jak. 5:16.

9. Kai cara si deban si mbuktiken maka keleng ateta turang seninata?

⁹ Banci ka sibuktiken maka keleng ateta turang seninata alu kerja keras njaga perdamen ras kalak e. Siusahaken ngusih Jahwe bas ngampuni. Adi Jahwe pe berekenNa anakNa mate guna dosa-dosata, la kin arusna nggit kita ngampuni turang seninata sanga ersalah ia man banta? La ateta bagi budak si jahat si lit bas salah sada perumpaman Jesus. Kenca ihapusken tuanna utangna si seh kel mbuena, la ampunina temanna si utangna ndauh sitiken. (Mat. 18:23-35) Adina salah paham kam ras turang senina si lit bas runggun, nggit nge kam leben erban dame sope lenga reh ku acara Peringet-ingeten? (Mat. 5:23, 24) Adi bage lakokenndu, icidahkenndu me maka keleng kel atendu Jahwe ras Jesus.

10-11. Uga pertua-pertua mbuktiken maka keleng atena Jahwe ras Jesus? (1 Petrus 5:1, 2)

¹⁰ Uga pertua-pertua mbuktiken maka keleng atena Jahwe ras Jesus? Salah sada carana eme alu mperdiateken keperlun biri-biri Jesus. (Baca 1 Petrus 5:1, 2.) Ijelasken Jesus kerna si e man Rasul Petrus. Kenca telu kali ipersokenna Jesus, pasti merhat kel Petrus mbuktiken kekelengenna man Jesus. Kenca Jesus ipekeke, isungkunna Petrus, nina, “O Simon anak Johanes, keleng nge atendu aku?” Banci kita tek maka pasti nggit Petrus ngelakoken kai pe guna mbuktiken maka keleng kel atena Tuanna e. Ikataken Jesus man Petrus, “Permakanilah biri-biriku si kitik.” (Joh. 21:15-17) Seh ngasa Petrus mate, iurusna alu lembut biri-biri Tuanna si mbuktiken maka keleng atena Jesus.

¹¹ Pertua-pertua, uga kam mbuktiken maka penting akapndu kata-kata Jesus man Petrus sope ras kenca acara Peringet-ingeten? Banci buktikenndu maka keleng kel atendu Jahwe ras Jesus alu ratur mpermakani turang senina, janah ngelakoken terbuen guna nampati kalak si la aktip mulihken ku Jahwe. (Esek. 34:11, 12) Banci ka kam ermediate man kalak si erlajar Pustaka bage pe kalak si mbaru denga reh ku acara Peringet-ingeten. Ateta igejapken kalak e min maka ia ialo-alo, janah ngarap kita gelah bas sada wari pagi ia pe jadi pengikut Jesus.

12. Engkai maka ngukuri kata-kata si belasken Jesus bas berngi sope kematenna banci erban kita jadi kalak si perpang? (Johanes 16:32, 33)

¹² Bas berngi sope Jesus mate, bagenda nina man murid-muridna, “Dat kena pagi  kiniseran bas doni enda, tapi ula kena mbiar! Enggo kap kutaluken doni enda.” (Baca Johanes 16:32, 33.) Kai si nampati Jesus pang ngadapi musuh-musuhna janah tetap setia seh ngasa ia mate? Iandalkenna Jahwe. Itehna maka pengikutna pe pagi ngadapi ujin si seri, emaka ipindoken Jesus gelah ijaga Jahwe kalak e. (Joh. 17:11) Engkai maka enda erban kita jadi pang? Perban gegehen Jahwe asangken musuh-musuhta. (1 Joh. 4:4) Idah Jahwe kerina si terjadi man banta. Emaka, tek kita adina siandalken Jahwe banci sitaluken kebiarenta janah jadi kalak si perpang.

13. Uga Jusup arah Arimatea dungna ncidahken sipat si perpang?

¹³ Ukuri kerna usihen Jusup arah Arimatea. Ia ihamati i tengah-tengah kalak Jahudi. Ia sekalak anggota Pengadilen Agama Jahudi. Tapi sedekah pelayanen Jesus i doni, Jusup labo kalak si perpang. Ikataken Johanes maka ‘Jusup pe murid Jesus, tapi la kataken Jusup man kalak si deban perban mbiar ia man kalak Jahudi.’ (Joh. 19:38) Amin pe meriah iakap Jusup megiken berita Kerajan, bunikenna arah kalak si deban maka ia erkiniteken man Jesus. Mbiar ia lanai iergai kalak adi teh kalak ia murid Jesus. Tapi, ikataken Pustaka kenca Jesus mate, dungna “pang ia ngadap Pilatus janah pindona mayat Jesus.” (Mrk. 15:42, 43) Dungna, cidahken Jusup alu jelas maka ia murid Jesus.

14. Kai si banci lakokenndu adi mbiar kam man jelma?

¹⁴ Pernah nge kam mbiar man jelma bali bagi Jusup? Pernah nge kam mela ngataken maka kam Saksi Jahwe bas sekolah bage pe inganndu erdahin? Ragu-ragu nge kam jadi perberita ntah pe iperidiken perban mbiar kam ngukuri kai kari ning kalak kerna kam? Ula pediat perasan si bage erban kam la ngelakoken kai si benar. Tutuslah atendu ertoto man Jahwe. Pindolah man baNa gelah pang kam ngelakoken sura-suraNa. Sanga gejapkenndu uga Jahwe njawap toto-totondu, reh paguhna me kam janah reh pangna.​—Jes. 41:10, 13.

15. Keriahen ukur murid-murid Jesus ngiahken kalak e ngelakoken kai? (Lukas 24:52, 53)

¹⁵ Sedih kel akap murid-murid sanga mate Jesus. Cuba bayangkenndu situasi kalak e. Kalak e enggo kebenen teman  si ikelengina janah lanai kapna lit arapenna. (Luk. 24:17-21) Tapi sanga cidahken Jesus bana man kalak e, isampatina kalak e ngangkai uga ia erban nubuat bas Pustaka terjadi. Iberekenna ka tugas si penting man kalak e. (Luk. 24:26, 27, 45-48) Empat puluh wari kenca si e, nangkih Jesus ku surga. Lanai sedih akap kalak e tapi meriah kel ukurna. Sebap enggo teh kalak e maka Tuanna enggo nggeluh janah sampatina pagi kalak e ngelakoken tugas si mbaru. Keriahen ukur e ngiahken kalak e guna terus muji Jahwe.​—Baca Lukas 24:52, 53; Perb. 5:42.

16. Uga carata ngusih murid-murid Jesus?

¹⁶ Uga carata ngusih murid-murid Jesus? Banci sidatken keriahen ukur sanga nembah Jahwe labo saja sanga lit acara Peringeten, tapi bas segedang tahun e. Guna ndatken si e, perlu sipelebe Kerajan Dibata bas geluhta. Contohna, enterem turang senina si enggo sesuaikenna jadwalna erdahin gelah banci ia ratur erberita, perpulungen, ras ibadah keluarga. Piga-piga la ngayaki erta si anggap kalak penting, gelah banci ia mereken terbuen bas runggun. Ntah pe, banci ia ngelayani bas ingan si merluken terbuen perberita. Memang, arus kita megenggeng gelah banci terus ngelayani Jahwe. Tapi enggo erjanji Jahwe maka bereNa mbue pasu-pasu adi sipelebe Kerajan Dibata bas geluhta.​—Kua. 10:22; Mat. 6:32, 33.

17. Kai nge atendu lakokenndu bas minggu-minggu sope ras kenca acara Peringeten? (Nen gambar.)

¹⁷ Tertima-tima kel kita guna ngikuti acara Peringeten bas wari Selasa tanggal 4 April. Tapi, perlu siukuri kerna kegeluhen ras kematen Jesus bage pe kekelengen Jesus ras Jahwe man banta bas minggu-minggu sope ras kenca acara Peringeten, labo bas wari Peringeten ngenca. Contohna, banlah waktundu guna mbaca ras ngukuri kejadin si lit bas bagin “Minggu Terakhir Kegeluhen Jesus i Doni,” si lit i Keterangen Tambahen B12 bas Terjemahen Doni si Mbaru. Sanga lakokenndu si e daramilah ayat-ayat Pustaka si banci mpebelin pengergan, kekelengen, sipat si perpang, ras keriahen ukurndu. Selain si e, ukurilah kai si banci lakokenndu guna ncidahken pengatan bujurndu. Teklah kam maka iergai Jesus kerina si lakokenndu guna nginget pengorbanenna.​—Ket. 2:19.