1-2. (a) How wi feel wen wi meditayt pahn Jeezas laif ahn minischri? (b) Weh wi wahn diskos eena dis aatikl?

 WEN sohnbadi weh wi lov ded, wi mis dehn wahn lat. At fers, wen wi tink bak tu di dayz bifoa di persn mi ded, wi mait feel wahn lata payn, espeshali if di persn mi sofa wahn lat. Bot afta wahn wail, wi mait ku memba tingz bowt di persn weh mek wi feel hapi. Fi egzampl, wi mait memba sohnting weh ih teech wi, sohnting weh ih seh er du fi inkorij wi, er sohnting weh mek wi laaf.

² Saym way soh, wi feel sad wen wi reed bowt how Jeezas sofa ahn ded. Joorin di weeks bifoa an afta di Memoaryal, wi tek di taim fi reeli meditayt pahn di ransom sakrifais. (1 Kor. 11:24, 25) Ahn wi feel soh hapi wen wi meditayt pahn aala di tingz weh Jeezas mi seh ahn du wen hihn mi deh rait ya pahn ert. An ih veri inkorijin fi tink bowt weh hihn di du now ahn weh hihn wahn du fi wi eena di fyoocha. Wen wi tek taim fi tink bowt dehnya tingz, wi wahn waahn shoa dat wi tankful. Soh dis aatikl wahn diskos difrent wayz how wi ku shoa apreeshiayshan fi weh Jeezas ahn Jehoava du fi wi.

3. Wai wi ku bee tankful fi di ransom?

³ Wen wi meditayt pahn aal weh Jeezas du ahn pahn ih sakrifais, wi feel soh tankful. Wail hihn mi deh pahn ert, hihn mi teech peepl bowt di blesinz weh Gaad Kingdom wahn bring. Wi hapi fi noa bowt aal di gud tingz weh Gaad Kingdom wahn du fi wee. Wi soh tankful fi di ransom  bikaaz da onli dat mek it pasabl fi mek wi bee fren wid Jehoava ahn Jeezas. Dehn wan weh shoa dat dehn ga fayt eena Jeezas sakrifais wahn aalso ga di hoap fi liv fareva ahn fi si dehn ded lov wanz kohn bak tu laif. (Jan 5:28, 29; Roam. 6:23) Wi noh du notn fi dizerv dehnya blesin, ahn wi kuda neva pay bak Jehoava ahn Jeezas fi aal weh dehn du fi wi. (Roam. 5:8, 20, 21) Bot how wi ku shoa dehn dat wi tankful fi aal weh dehn du?

4. How Mayri Magdaleen mi shoa dat ih mi tankful fi weh Jeezas mi du far ahn? (Si di picha.)

⁴ Mek wi kansida di egzampl a wahn Jooish laydi weh naym Mayri Magdaleen. Shee mi-di sofa wahn lat bikaaz ih mi ga sevn deemon eena ahn. Shee mosi mi feel laik nobadi ku help ahn. Soh wi ku jos imajin how tankful shee mosi mi feel wen Jeezas mi jraiv owt di deemonz owta ahn! Dis mi moov shee fi bee Jeezas falowa ahn fi yooz ih taim, enerji, ahn bilanginz fi sopoat hihn eena ih minischri. (Look 8:1-3) Mayri mi reeli apreeshiayt weh Jeezas mi du far ahn, bot shee neva noa dat Jeezas mi wahn du wahn lat moa fi shee eena di fyoocha. Hihn mi wahn giv op ih laif “soh dat evribadi weh shoa fayt eena ahn” ku geh evalastin laif. (Jan 3:16) Bot Mayri mi shoa dat shee mi tankful wen ih mi stay laayal tu Jeezas. Wen Jeezas mi-di sofa pahn di taacha stayk, Mayri neva lef, bikaaz shee mi kay bowt Jeezas an ih mi waahn komfert adaz weh mi dehdeh tu. (Jan 19:25) Afta Jeezas mi ded, Mayri ahn too ada laydi mi kehr sohn spais da di toom weh dehn mi beri ahn. (Maak 16:1, 2) Jehoava mi bles Mayri bikaaz ih mi laayal tu ahn. Shee mi geh di privilij fi meet Jeezas ahn taak tu ahn afta hihn mi geh rezorek. Dat da-mi wahn privilij weh moas a Jeezas disaipl dehn neva get.—Jan 20:11-18.

5. How wi ku shoa dat wi tankful fi aal weh Jehoava ahn Jeezas don du fi wi?

 ⁵ Wee ku shoa dat wi tankful fi aal weh Jehoava ahn Jeezas du fi wi wen wi yooz wi moni, taim, an enerji fi sopoat di preechin werk. Wi ku du dat wen wi help owt pahn kanschrokshan proajeks ahn wen wi help mantayn Kingdom Haalz an ada bildinz.

6. Wai wi ku seh dat di ransom da wahn persnal gif?

⁶ Wen wi tink bowt humoch Jehoava ahn Jeezas lov wi, dat moov wi fi lov dehn bak. (1 Jan 4:10, 19) Wi lov dehn eevn moa wen wi andastan dat Jeezas ded fi eech wan a wi persnali. Di apasl Paal mi noa dis an ih mi shoa dat ih tankful wen ih rait wahn leta tu di Galayshanz ahn seh: “Di Son a Gaad . . . lov mi ahn giv op ih laif fi mee.” (Gal. 2:20) Bikaaz Jeezas ded fi wee, Jehoava jraa wi kloas tu ahn soh dat wi ku bee ih fren. (Jan 6:44) Dis noh mek yu feel hapi fi noa dat Jehoava si sohnting gud eena yu ahn dat hihn pay di haiyis prais soh dat yoo ku bee ih fren? Dis wahn mek yu lov fi Jehoava ahn Jeezas geh schranga. Wi ku aks wiself, ‘Weh da lov wahn moov wi fi du?ʼ

7. Laik weh wi si eena di picha, how eech wan a wi ku shoa wi lov fi Jehoava ahn Jeezas? (2 Korintyanz 5:14, 15; 6:1, 2)

⁷ Di lov weh wi ga fi Gaad ahn Jeezas moov wi fi shoa lov tu adaz. (Reed 2 Korintyanz 5:14, 15; 6:1, 2.) Ahn wan way how wi shoa dat wi lov adaz da wen wi preech. Wi preech tu evribadi weh wi meet, noh mata weh rays er kolcha dehn kohn fram, weda dehn rich er poa, er ga wahn ejukayshan er nat. Wen wi du dis,  wi shoa dat wi di du weh Jehoava waahn, bikaaz “da fi hihn wil dat aal kaina peepl geh sayv ahn geh di karek andastandin a di chroot.”—1 Tim. 2:4.

8. How wi ku shoa wi bradaz ahn sistaz dat wi lov dehn?

⁸ Wi proov wi lov fi Gaad ahn Jeezas wen wi shoa wi bradaz ahn sistaz dat wi lov dehn. (1 Jan 4:21) Wi shoa dat wi reeli kay fi dehn ahn wi help dehn wid weh dehn need wen dehn di goh chroo chraiyalz. Wi komfert dehn wen sohnbadi weh dehn lov ded, vizit dehn wen dehn sik, an inkorij dehn wen dehn feel diskorij. (2 Kor. 1:3-7; 1 Tes. 5:11, 14) Wi kantinyu pray fi dehn, bikaaz wi noa dat “wen wahn raichos man pray haad, dat powaful an ih ku reeli help peepl.”—Jay. 5:16.

9. Wat da wahn nada way wi ku shoa lov fi wi bradaz ahn sistaz?

⁹ Wi shoa wi bradaz ahn sistaz dat wi lov dehn wen wi du wi bes fi aalwayz ga pees wid dehn. Wi need fi chrai kapi Jehoava egzampl eena di way hihn fergiv adaz. If Jehoava mi wilin fi giv op ih Son fi mek ih ded fi wi, yu noh tink dat wi shuda chrai haad fi fergiv wi bradaz ahn sistaz weh du wi sohnting? Wi noh waahn bee laik di wikid slayv weh Jeezas mi taak bowt eena ih parabl. Di slayv mi oa ih maasta wahn lata moni, bot ih maasta neva chaaj ahn far it. Laytaraan, wen sohnbadi els mi oa di slayv les dan weh hihn mi oa ih maasta, hihn neva waahn fergiv di persn. (Mach. 18:23-35) If yu ga wahn prablem wid sohnbadi eena di kangrigayshan, yu tink ih pasabl fi mek pees wid dehn bifoa yu goh da di Memoaryal? (Mach. 5:23, 24) If yu du dat, yu wahn reeli proov dat yu lov Jehoava ahn Jeezas.

10-11. Bays pahn 1 Peeta 5:1, 2, how eldaz ku shoa dat dehn lov Jehoava ahn Jeezas?

¹⁰ How eldaz ku shoa dat dehn lov Jehoava ahn Jeezas? Wan way how dehn ku du dis da wen dehn tek kyaa a Jeezas sheep. (Reed 1 Peeta 5:1, 2.) Jeezas mi mek dis klyaa tu Peeta. Afta Peeta mi disoan Jeezas chree taimz, hihn mi reeli waahn proov dat ih mi lov Jeezas. Wen Jeezas mi kohn bak tu laif, ih aks Peeta: “Saiman son a Jan, yoo lov mi?” Ahn wi ku bee shoar dat Peeta mi wahn du eniting fi shoa Jeezas dat ih lov ahn. Jeezas mi tel Peeta: “Leed mi lee sheep dehn di way wahn shepad wuda leed dehn.” (Jan 21:15-17) Ahn fi di res a Peeta laif hihn mi tek kayr a Jeezas sheep an ih mi shoa dat ih reeli lov Jeezas.

¹¹ Joorin di weeks bifoa an afta di Memoaryal, how eldaz ku shoa dat weh Jeezas mi tel Peeta impoatant tu dehn? Dehn ku shoa humoch dehn lov Jehoava ahn Jeezas wen dehn du dehn bes fi chrai ga shepadin vizit wid di bradaz ahn sistaz, ahn wen dehn tek di taim fi help inaktiv bradaz ahn sistaz fi kohn bak tu Jehoava. (Ezek. 34:11, 12) Dehn ku aalso inkorij Baibl stodiz ahn peepl weh shoa inchres fi kohn da di Memoaryal. Wi waahn mek dehn feel welkom, bikaaz wi hoap dat dehn wahn staat fala Jeezas tu.

12. How di tingz weh Jeezas seh di nait bifoa ih ded ku help wi fi ga korij? (Jan 16:32, 33)

¹² Di nait bifoa Jeezas ded hihn mi tel ih disaipl: “Unu wahn fays chribyulayshan eena di werl, bot tek korij! Kaaz Ai don kanka di werl aredi.” (Reed Jan 16:32, 33.) Weh mi help Jeezas fi  stan op gens ih enimi dehn ahn fi stay faytful til di en a ih laif? Hihn mi pen pahn Jehoava. Ahn Jeezas mi noa dat ih disaiplz wuda mi fays sohnting simila. Soh Jeezas mi aks Jehoava fi protek dehn. (Jan 17:11) How dis ku help wi fi ga korij? Wi ku ga korij bikaaz Jehoava schranga dan aala wi enimi dehn. (1 Jan 4:4) Jehoava si evriting weh hapm tu wi. Wi ku bee shoar dat if wi pen pahn Jehoava, hihn wahn help wi ga korij.

13. How Joazef fahn Arimateeya mi shoa korij?

¹³ Mek wi luk pahn di egzampl a Joazef fahn Arimateeya. Hihn da-mi wahn memba a di Jooish Sopreem Koat, ahn di Jooish peepl mi rispek ahn wahn lat. Bot wen Jeezas mi deh pahn di ert di preech, Joazef neva ga korij. Jan mi seh dat “Joazef da-mi wahn disaipl a Jeezas, bot bikaaz ih mi frayd fi di Jooz ih neva tel nobadi bowt it.” (Jan 19:38) Eevn doa Joazef mi shoa inchres eena di Kingdom mesij, hihn neva waahn adaz noa dat hihn mi ga fayt eena Jeezas. Hihn mi praabli frayd dat peepl neva mi wahn rispek ahn if dehn mi noa dat hihn da-mi wan a Jeezas disaipl. Bot di Baibl tel wi dat afta Jeezas mi ded, Joazef mi “tek korij ahn gaahn aks Pailat fi Jeezas badi.” (Maak 15:42, 43) Joazef neva mi-di chrai haid dat hihn da-mi Jeezas disaipl nohmoh.

14. Weh yu shuda du if yu frayd fi weh peepl mait seh er du?

¹⁴ Jos laik Joazef, yoo frayd fi weh peepl mait tink er seh bowt yoo? Wen yu deh da skool er werk, yoo eva feel shaym fi seh dat yoo da wan a Jehoava Witnisiz? Yoo frayd fi bee wahn poblisha er geh baptaiz bikaaz yu di wori bowt weh adaz mait tink bowt yu? Noh mek dehndeh tingz stap yu fahn du weh rait. Bayg Jehoava fi help an aks ahn fi gi yu di korij fi du weh hihn waahn. Wen yu si dat ih ansa yu pryaaz, yu fayt wahn geh schranga ahn yu wahn ga korij.—Isa. 41:10, 13.

15. How Jeezas disaiplz mi feel afta Jeezas apyaa fronta dehn, ahn weh dis mi moov dehn fi du? (Look 24:52, 53)

¹⁵ Jeezas disaiplz mi sad wen hihn mi ded. How yoo wuda mi feel if yoo mi deh eena fi dehn shooz? Dehn mi looz wahn fren weh dehn mi lov wahn lat. Ahn dehn mi feel laik dehn neva ga no hoap. (Look 24:17-21) Bot Jeezas mi apyaa  fronta dehn, an ih mi spen taim wid dehn an eksplayn tu dehn dat evriting weh mi-di hapm tu hihn da-mi fi mek Baibl prafesi kohn chroo. Hihn mi aalso gi dehn wahn impoatant werk fi du. (Look 24:26, 27, 45-48) Ahn wen Jeezas gaahn da hevn 40 dayz layta, di disaiplz neva sad nohmoh, bot dehn mi veri hapi fi noa dat Jeezas mi alaiv ahn dat hihn mi wahn help dehn du di werk weh hihn gi dehn fi du. Da hapinis mi moov dehn fi noh stap prayz Jehoava.—Reed Look 24:52, 53; Aks 5:42.

16. How wi ku kapi di egzampl a Jeezas disaiplz?

¹⁶ How wi ku kapi di egzampl a Jeezas disaiplz? Wi ku fain jai di serv Jehoava joorin di hoal yaa, noh jos rong Memoaryal taim. Fi mek wi ku du dis, wi need fi put di Kingdom fers eena wi laif. Fi egzampl, lata wi bradaz ahn sistaz chaynj dehn skejul soh dat dehn ku preech, goh da meetin, ahn ga dehn famili wership evri week. Som a dehn eevn disaid fi liv widowt baysik tingz weh adaz kansida az impoatant. Wai? Dehn du dis soh dat dehn ku du moa eena di kangrigayshan er serv eena wahn ayrya weh need moa bradaz ahn sistaz. Wen wi put di Kingdom fers eena wi laif ahn noh giv op eena wi servis tu Jehoava, hihn pramis ih wahn bles wi.—Prov. 10:22; Mach. 6:32, 33.

17. Weh yu mek op yu main fi du joorin di weeks bifoa an afta di Memoaryal? (Koment pahn di picha.)

¹⁷ Wi kyaahn wayt fi selibrayt di Memoaryal pahn Choozdeh, Aypril 4. Bot wi noh haftu wayt til da day kohn fi meditayt pahn Jeezas sakrifais ahn pahn di lov weh Jehoava ga fi wi. Tek advantij a evri apachooniti weh yu ga fi meditayt pahn dehnya tingz joorin di weeks bifoa an afta di Memoaryal. Fi egzampl, yu ku set wahn taim fi reed ahn meditayt pahn di ivent dehn weh deh eena di Appendix B12 “The Final Week of Jesusʼ Life on Earth (Part 1 ahn Part 2)” weh deh eena di New World Translation. Wen yu reed bowt Jeezas laif pahn ert, luk fi skripchaz weh ku mek yu feel hapiya, bee moa tankful, ahn ga moa lov ahn korij. Den luk fi spesifik wayz how yoo ku shoa dat yu reeli tankful fi weh Jeezas ahn Jehoava du fi yu. Yu ku bee shoar dat Jeezas wahn chrezha evriting weh yu du joorin di weeks bifoa an afta di Memoaryal.—Rev. 2:19.