1, 2. a) Ka wasandirubei dan le wararamagun asaminara luagu libagari luma lani Hesusu ministeriu? b) Kaba wariha lidan aturiahani le?

 DAN LE hounwen gürigia ha hínsiñebaña woun, álugatiwa hawagu. Másiñati wasandirun igarigu dan le wasaminarun luagu lagumuhóun dan le hásügürübei lubaragiñe hounwen, dántima le weiri lan hasufurirun lubaragiñe hounwen. Lau lásügürün dan, háfuga wagumeserun asandira ugundani lau waritaguni dan buiti le wásügürübei hama, o katei le wadügübei úara, kéiburi, le harufudahabei woun, o somu katei le hadügübei o le hariñagubei lun híchugun ñuruguaü woun o le hadügübei lun wéherehan.

² Ligiaméme asuseredubei dan le waliihan luagu lasufurirun luma lounwen Hesusu. Ruti íruni woun dan le wasagarun dan lun wararamagun asaminara luagu óunwenbu lebegi lani Hesusu sákürifisiu lidan lidaani Aritaguagülei (1 Ko. 11:24, 25). Lau wasaminarun luagu le ladügübei Hesusu luma luagu le lariñagubei dan meha le ya lubéi ligibuagu Ubóu le, sanditiwa ugundani. Ruti giñe erei woun wasaminarun luagu le ladügübei guentó luma luagu le lunbei ladügüni túteme. Lidan aturiahani le, warihiba lau lan wararamagun asaminara luagu sun burí katei le luma luagu ínsiñeni le lasandirubei Hesusu wawagu línchahabadiwa lun warufuduni weteingiradi lidan ámuñegueinarügü igaburi.

3. Ka resun wámabei lun wíchugun seremei luagu lebegi esefuruni?

³ Sanditiwa aban lanarime geteingiradi dan le wararamagun asaminara luagu libagari luma lounwen Hesusu. Dan meha le  lapurichihanbei ubouagu, arufudahati houn gürigia luagu katei buiti le lunbei ladügüni Larúeihan Bungiu. Wéiriti lebegi inarüni luagu Larúeihan Bungiu woun. Seremei wamuti giñe lebegi esefuruni saragu, ladüga adügati lun buidu lan wamadagua dandu luma Heowá kei luma Hesusu. Wagía ha arufudubaña afiñe wamá luagu Hesusu hemenigitiwa giñe lun wawinwandun lun súnwandan luma lun warihiniña waduheñu ha hilaguaañabaña (Huan 5:28, 29; Rom. 6:23). Le linarün katei, madügüngidiwa ni kata lun gadüna wamani abiniruni burí le. Siñabei wafayeiruni Bungiu luma Kristu luagu sun le hadügübei wawagu (Rom. 5:8, 20, 21). Gama lumoun, ida luba warufuduni weiri lan weteingiruniña? Ariha waméi.

4. Ka tadügübei María Mágüdalena lun tarufuduni weiri lan le ladügübei Hesusu tuagu? (Ariha huméi dibuhu).

⁴ Samina wamá luagu le tadügübei aban würi huríu gíritu María Mágüdalena. Súfuritu meha würi to saragu ladüga añahein meha sedü sífirigu wuribatiña tuagu ani adügatiña meha lun tasufurirun. Másiñati samina tan máranina lan le gádanbarun. Gayaraati san wasaminarun ida liña lan meha tasandiragun tungua lárigiñe lasagaruniña Hesusu máfianu hagía tuéi? Chóuruti seremei tani. Ligía tadügagunbei tungua lánime Kristu disipulu, yusu tumuti tidaani, tere, luma túmati lun tetenirun lun lidan lani ministeriu (Luk. 8:1-3). Lau sun weiri lan lebegi le ladügübei Hesusu tun, másiñati ua lan meha gunfuranda tani buidu buidu óunwenbu idewesei le lunbei meha líchigaali lan. Líchigaali meha Hesusu libagari hawagu gürigia “lun sun lan ha afiñerutiña luagu” resibi hamaamuga ibagari magumuchaditi (Huan 3:16). Íbini ítara, arufuda tumuti María Mágüdalena lau úaragua tan seremei tani Hesusu luagu le ladügübei tuagu. Dan le ladaawagunbei Hesusu luagu wagabu, aba terederun ñein yarafa lun, lun tíchugun gurasu lun luma houn ha ñéinbaña (Huan 19:25). Ani dan le lídanñein lubéi umúahaü Hesusu, ñǘdüntu María Mágüdalena arihei úara hama bián würiña lun háhurudaguni lúgubu Hesusu lau ibiñein (Mar. 16:1, 2). Ruti Heowá tafayeiruaha María Mágüdalena ladüga úaraguni le tarufudubei. Ma  lanarime ugundani le tasandirubei lau tarihini águyuguaali lan Hesusu ani gayara ligía tayanuhan luma! Aban lubuidun chansi lira le mibihin habéi sun disipulugu (Huan 20:11-18).

5. Ida luba warufuduni weteingiradi luagu le ladügübei Heowá luma Hesusu wawagu?

⁵ Gayaraati giñe warufuduni weteingiradi luagu le adüga laalibei Heowá luma Hesusu wawagu. Ida? Lau wayusuruni wadaani, were, luma waseinsun lun wawanseragüdüni dasi lánina Larúeihan Bungiu. Kei hénpulu, gayaraati wíchaagun woungua lun wídeha lidan tábunawagun luma lidan taransehóun muna to ayusurúboun lun láhudurawagun lun Heowá.

6. Ka uagu wariñaga aban lan idewesei houn kada aban wádangiñe lebegi esefuruni?

⁶ Dan le wasaminarun luagu óunwenbu ínsiñeni le lasandirubei Heowá luma Hesusu wawagu, ínchaha lumutiwa giñe lun hínsiñe hamá woun (1 Huan 4:10, 19). Dan le gunfuranda wamani hilá lan Hesusu luagu kada aban wádangiñe wéiritimati ínsiñeni le wasandirubei luagu Heowá luma luagu Hesusu. Ligía larufudunbei apostolu Pábulu eteingiruni luagu idewesei le. Ligía lariñagubei tidan gárada to labürühaboun houn galasiana: “Liráü Bungiu le hínsiñehabubei nun, aba lederegeragun lungua lun lounwen nuagu” (Gal. 2:20). Seremei lani Hesusu sákürifisiu, aba láchawahanün Heowá luouguoun lun lumada humá (Huan 6:44). Hingí lumutu san hanigi hasubudiruni ariha lan Heowá katei buiti huagu ani fayei lan aban ebegi séruti lun gayara lan gamadagua humá luma? Adügati san katei le lun hasandirun ínsiñeni luagu Heowá luma luagu Hesusu? Ligía gayara lubéi wálügüdagun woungua: “Kaba un línchahana ínsiñeni le?”.

7. Kei larihín tidan iyawaü, ida luba warufuduni sun wagía hínsiñe lan Heowá luma Hesusu woun? (2 Korintuna 5:14, 15; 6:1, 2).

⁷ Ínchaha lumutiwa ínsiñeni le wasandirubei  luagu Bungiu luma luagu Kristu lun hínsiñedun amu woun (aliiha huméi 2 Korintuna 5:14, 15; 6:1, 2). Gayaraati warufuduni ínsiñeni le lau wapurichiha lau ubebeni houn sun gürigia. Apurichihatiwa houn furumiñeguarügü gürigia meberesenga ka lan harasanbei, ka lan héchubei, meberesenga anhein gaseinsun habéi o maseinsun hamá. Ítara liña wídeha luma Heowá “le busenbei lun hasalbarun sun gürigia, lun giñe hayabin lun hasubudiruni inarüni” (1 Tim. 2:4).

8. Ida luba warufuduni hínsiñe hamá wábirigu woun?

⁸ Arufuda wamuti giñe hínsiñe lan Bungiu luma Kristu woun lau hínsiñe hamá wábirigu woun (1 Huan 4:21). Kei hénpulu, nidiheritiwa hawagu ani dan le hásügürün lídangiñe somu lénrengunga íderagua wamutiña. Rútiwa dǘgüdaguaü houn dan le heferidirun somu haduhe lidan óunweni, abisidaha wamutiña dan le sandi hamá ani adüga wamuti sun wayaraati lun wíchugun gurasu houn dan le ladagarun lanarime íruni hawagu (2 Ko. 1:3-7; 1 Tesa. 5:11, 14). Furíeitiwa giñe hawagu ladüga subudi wamuti wéiriti lan “lubafu afurieidúni le ladügübei gürigia le richaguabei tau sun lanigi” (Sant. 5:16).

9. Ka amu katei gayaraabei wadügüni lun warufuduni hínsiñe hamá wábirigu woun?

⁹ Ábanya igaburi lun warufuduni hínsiñe hamá wábirigu woun lau wáfaagun saragu lun buidu lan wanaagun woungua hama. Áfaaguatiwa giñe lun feruduna wamaniña ítara kei ladügüni Heowá. Samina wamá luagu le: anhein ígira lubéi Heowá lun lounwen lisaani luagu wafigoun, ma lunti feruduna wamaniña wábirigu lau lóufudagun dan le hachararun woun? Mabusenrúntiwa lun ítara wamá kei idamuni le wuribabei, le uágubei labahüdahan Hesusu. Feruduna lumuti labureme lanarime dúeiti le ladúeirubei, gama lumoun, máhati musu ligía feruduna lani musu líledi le adúeirubalin murusun seinsu (Mat. 18:23-35). Ligíati, anhein gaturobulin hubéi luma aban íbiri, ka uagu máfaagun hubéi lun harandarun luma lubaragiñe Aritaguagülei? (Mat. 5:23, 24). Anhein hadüga ítara, harufudubei hínsiñe lan Heowá luma Hesusu hun saragu.

10, 11. Ida liña harufuduni wéiyaaña lidan afiñeni hínsiñe lan Heowá luma Hesusu houn? (1 Féduru 5:1, 2).

¹⁰ Gayaraati harufuduni wéiyaaña lidan afiñeni hínsiñe lan Heowá luma Hesusu houn lau aban igaburi espechaliti: lau hóunigiruniña lau ínsiñeni lánigu Hesusu ha ítarabaña kei mudún (aliiha huméi 1 Féduru 5:1, 2). Furanguti lígiruni Hesusu katei le lun apostolu Féduru. Kei meha ariñaga lan Féduru ǘrüwa wéiyaasu ibidiñe lan Hesusu lun, másiñati busén lan meha Féduru lun larufuduni lun Hesusu hínsiñe lan lun. Lárigiñe láguyugun Hesusu, aba lálügüdüni Hesusu Féduru “Simón, liráü Huan, hínsiñetina san bun?” Chóuruti, hínsiñe lan hamuga lun Féduru lun ladügün furumiñeguarügü katei lun larufuduni lun Hesusu hínsiñe lan lun. Ábati lóunabuni Hesusu: “Góunigibañati nánigu” (Huan 21:15-17). Lúmagiñe dan ligía lun lubaruaguóun, aba letenirun Féduru houn lánigu Hesusu lau ínsiñehabuni, ani ítara liña larufuduni hínsiñe lan lun.

¹¹ Lidan lidaani Aritaguagülei ida liña gayara lan harufuduni wéiyaaña lidan afiñeni seriu lan hanügüni dimurei le lariñagubei Hesusu lun Féduru? Gayaraati harufuduni weiri lan línsiñe dandu Heowá kei Hesusu houn ánhaña akipuragua houngua beresegu lidan dasi lánina hetenirun houn lubúeingu Heowá, ani áfaagua hagíame lun híderaguniña íbirigu ha bulubuduhali hamadagua luma Bungiu (Ese. 34:11, 12). Lanwoun lira, gayaraati hetenirun houn ha aturiahabaña Bíbülia luma houn ha achülürübaña luagu furumiñeti wéiyaasu lidoun Aritaguagülei. Ariha hamutiña wéiyaaña lidan afiñeni gürigia ha kei lani Hesusu disipulugu ámuñegü ani  busentiña lun buidu lan hasandiragun houngua.

12. Ka uagu gayara lubéi líderaguniwa wasaminarun luagu dimurei le lariñagubei Hesusu guñoun lubaragiñebei lounwen lun ganigi wamá? (Huan 16:32, 33).

¹² Ariñagati Hesusu houn lani disipulugu guñoun lubaragiñe lounwen: “Hasufuriruba ubouagu, gama lumoun ganigi humá, gañei naali ubóu” (aliiha huméi Huan 16:32, 33). Ka íderagubalin Hesusu lun ganigi lan dan le hasiadirubalin láganigu luma lun úaragua lan darí lounwen? Lafiñen luagu Heowá. Kei subudi lani Hesusu hásügürüba lan lani disipulugu lídangiñe óuchawaguni ítarati, ligía lamuriahanbei luma Heowá lun lóunigiruniña (Huan 17:11). Ka uagu gayara lubéi líderaguniwa katei le lun ganigi wamá? Ladüga gabafutimati Heowá luéi furumiñeguarügü wágani (1 Huan 4:4). Ariha lumuti Heowá sun katei. Chouru wamuti ánhawa lan arabacha luagu Heowá sunsuinagubei gayaraabei lagidarun anufudei wawéi.

13. Ida liña larufudun Hosé le arimatéana ganigi?

¹³ Samina wamá luagu aban wügüri huríu inebewati Arimatéana gíriti Hosé. Ligía meha aban hádangiñe lílana Sanedrín liñun agei lúrudu huríu. Gama lumoun, lidan lidaani lani Hesusu ministeriu manigiti meha wügüri le saragu. Ariñagati Huan “falá lumuti meha wügüri ligía Hesusu, lau sun aramudaguarügü lan ladügei ladüga lanufude hawéi huríu” (Huan 19:38). Íbini hínsiñe lan uganu luáguti Larúeihan Bungiu lun wügüri ligía, aramuda lumuti meha lafiñen luagu Liráü Bungiu. Chóuruti hanufude lan luéi leferidiruni inebesei le hasandirubei gürigia luagu. Meberesenga ka lan asuseredubei, abahüdahatu Bíbülia, lárigiñe lan lounwen Hesusu aba lebelurun Hosé “le ñeinhin lubéi Pilatu amuriahei lúgubu Hesusu; úouga ni murusun anufudei lidan” (Mar. 15:42, 43). Maramudaguhaali Hosé lau lafiñen.

14. Ka lunbei wadügüni anhein nidiheri wabéi luagu le hasaminarubei amu wawagu?

¹⁴ Nidiheritün san kaba lan hariñaga gürigia huagu, ítara kei lasuseredun lun Hosé le arimatéana? Anihein san dan ru lan busiganu hun hariñagun leskuelarugu o lidan wadagimanu gefén humá luagu Heowá? Hígiruñein san lubá amu dan lun aban humá apurichihati o lun habadiseirun? Mígira humá lun ladügün anufudei luagu le lunbei hasaminaruni amu huagu lun madügün humani le buídubei. Ayumuragua humá lun Heowá lun líderagunün luma lun líchugun ganigi hun lun hadügüni lugundan. Danme le harihini lóunabuni Heowá hafurieidun, derebugubadün ani ganigitimabadün giñe (Isa. 41:10, 13).

15. Ka adügübei lun hagundaarun disipulugu lau harihini águyuguaali lan Hesusu? (Luk. 24:52, 53).

¹⁵ Dan le lóunwenbei Hesusu, sanditiña lani disipulugu aban lanarime íruni. Ida luba hamuga hasandiragun hungua lun hamuga ñéinñadün lan? Mama féridirügü hamuti disipulugu hamada le hínsiñebei houn féridi hamuti giñe hemenigin (Luk. 24:17-21). Aba larufudagun Hesusu lungua houn lárigiñe láguyugun ani sügüti dan hama ani afuranguagüda lumuti houn lagunfuliruñein lan profesía le ariñawagúbei luagu tidan Bíbülia. Lanwoun lira, ruti aban dasi súdiniti houn (Luk. 24:26, 27, 45-48). Dan le lamudeirunbei Hesusu sielun bián-wein weyu lárigiñe láguyugun, íruni le meha hawagubei lani disipulugu ábanhali meha ugundani. Gúndaatiña meha hasubudiruni wínwanhaali lan Hesusu ani líderagubaña lan lun hagunfuliruni iseri hadasin. Ínchaha lumutiña ugundani le, alawahei Heowá mararamagunga (aliiha huméi Lúkasi 24:52, 53; Adü. 5:42).

16. Ida luba wafalaruni hani disipulugu hénpulu?

¹⁶ Anti wagía, ida luba wafalaruni hani disipulugu hénpulu? Lau weseriwidun lun Heowá lau ugundani sagü weyu, mámarügü lidan lidaani Aritaguagülei. Lun wibihini, mosu wíchuguni Larúeihan Bungiu furumiñe lidan wabagari. Kei hénpulu, añahein íbirigu sansi hamaali lóurate hawadigimari lúntima gadaanitima hamá lun hapurichihan, hidin adamuridagua luma lun háhuduragun lun Heowá keisi iduheñu sagü dimaasu. Añahein hádangiñe anúadiraaña mibe lan hámati lun gayara lan hídehan lidan damuriguaü o lun houdin apurichiha le ñein lubéi lougua hamá Gefentiña. Inarüni megei wamá awanduni lun wasigirun eseriwida lun Heowá, lugundun, füramaseti labinirubadiwa lan saragu ánhawa íchigei Larúeihan lidan furumiñeti lúgaaru (Ari. 10:22; Mat. 6:32, 33).

17. Ka lunbei wadügüni lidan lidaani Aritaguagülei? (Ariha humóun iyawaü).

¹⁷ Wayumahaña lun lachülürün weyu luagu-biama, 4 lidan gádürü-hati lun wadügüni Aritaguagülei. Mama mosu wagurabahani weyu ligía lun wararamagun asaminara luagu libagari luma lounwen Hesusu, luma giñe ínsiñeni le larufudunbei dandu Hesusu luma Heowá wawagu. Sagá humá dan lidan lidaani Aritaguagülei lun hararamagun asaminara luagu katei le. Kei hénpulu, gayaraati hasagarun dan lun hakutihani le asuseredubei lun Hesusu, le áfuachubei lidan apéndice B12 tidan Traducción del Nuevo Mundo, le gíribei “La última semana de Jesús en la tierra”. Áluaha humá bérusu luma ariñahani le gayaraabei laganwoundagüdüni heteingiradi, hínsiñehabu, ganigi le lunbei harufuduni luma ugundani le hasandirubei. Samina humá ida luba lan harufuduni heteingiradi tídangiñe sun hanigi. Chouru waméi: gebegi lan lun Hesusu sun le wadügübei lun waritagun luagu, lidan lidaani Aritaguagülei (Aruf. 2:19).