1-2. (a) Ni bata oku turi kubasa kwehurira twatecereza aha magara ga Yesu n’omurimo gweye? (b) Ni enki eki twaza kushwijuma omuri eki kicweka?

 TWAFISA omuntu owu turi kukunda, nituhurira twamusisira munonga! Omu kubanza, nituhurira twashasha munonga twatecereza obusaasi obu yabire ayine atakafire, namunonga yaba yabire arwire munonga. Konka ku hari kuhwaho obwire, nitutandika kushemererwa twatecereza aha kintu eki yatwegesize, eki yagambire ninga shi ninga akakora kikatugaruramu amani kandi kikatuma twayesima.

² Ni co kimwe, nitushasha ku turi kushoma obusaasi obu Yesu yarabiremu ari kuza kufa. Aha bwire bw’Ekijusyo, nitukunda kumara obwire turi kutecereza aha mugasho gw’ekitambo ceye. (1 Kor 11:24, 25) Konka, nitushemererwa ku turi kutecereza aha bintu byingi ebi Yesu yagambire acari omu nsi. Nambwenu ku turi kumanya ebi ari kukora hati n’ebi arije kutukorera omu biro eby’omu misho nikitugaruramu amani. Twatecereza ahari ebyo bintu n’ahari rukundo eyi atwinire, nikibasa kutuma twamwereka ku nitumusima nk’oku twaza kukireba omuri eki kicweka.

3. Ahabwe’nki tushemerire kusima Yehova na Yesu ahabw’ekitambo?

³ Ku turi kutecereza aha magara ga Yesu n’orufu rweye nikituma twayesima. Obu Yesu yabire ari omu nsi, akegesa abantu emigisha eyi Obukama bwa Ruhanga burije kuturetera.  Eyo migisha nituyikunda munonga. Nitwereka ku nitusima ahabw’ekitambo ahakuba nikitwigurira omuhanda g’okugira obunywani burungi na Yehova na Yesu. Nambwenu abari kwikiriza Yesu bine amasiko g’okubaho ebiro byona n’okushuba kubona abantu babo abu bari kukunda abafire. (Yoh 5:28, 29; Rom 6:23) Tihine eki twakozire ngu tube abahikire kutunga eyo migisha kandi tihine eki turi kubasa kushashura Ruhanga na Kristo ahabw’ebi batukorire. (Rom 5:8, 20, 21) Konka nitubasa kubereka ku nitubasima. Ni bata oku turi kubasa kukikora?

4. Ni bata oku Mariya Magadalene yayerekire ku nasima ahabw’ebi Yesu yamukorire? (Reba ekishushani.)

⁴ Reba ecokureberaho c’Omuyudayakazi ori kwetwa Mariya Magadalene. Akaba yatirwe na badayimoni mushanju, kandi bakaba nibamubonabonesa munonga. Nabasa kuba yabire yayehebire. Obwe rero tecereza oku yashemerirwe Yesu ku yamubingireho abo badayimoni! Kikatuma yaba omukurasi wa Yesu, yakoresa obwire, amani n’ebi yabire ayine ari kumushagika omu murimo g’okuburira. (Luk 8:1-3) N’obu Mariya yayesimire munonga ahabw’ebi Yesu yamukorire, nabasa kuba yabire atakamanyire ekingu kirungi munonga eki Yesu yabire arije kumumorera. Eco kintu ni kiha? Yesu akaba arije kufira abantu bona, kandi “omuntu wena ori kumwikiriza” akaba arije kutunga amagara agatahwaho. (Yoh 3:16) Konka nabwe, Mariya akereka ku nasima Yesu ari kuguma amuhamireho. Obu Yesu yabire ari kubonabonera aha kiti, Mariya akaba amwemerire aha rubaju, kugira ngu amuhumurize kandi ahumurize n’abandi. (Yoh 19:25) Yesu ku yamazire kufa, Mariya n’abandi bakazi bakatwara aha kituro c’okumuzikamu amajuta agari kuhumura. (Mar 16:1, 2) Yehova akahemba Mariya ahabw’okuguma ari omwesiga ahari Yesu. Yesu na we ku yamazire kuzoka akeyoreka Mariya kandi baganira. Ogwe mugisha abingi omu begi ba Yesu tibaragubwire!—Yoh 20:11-18.

5. Ni bata oku turi kubasa kwereka ku nitusima ahabwa byona ebi Yehova na Yesu batukorire?

 ⁵ Nitubasa kwereka ku nitusima ahabw’ebi Yehova na Yesu batukorire turi kukoresa obwire, amani n’ebintu ebi twine omu kushagika omurimo g’Obukama. Ecokureberaho: Nitubasa kwekwatanisa omu mirimo y’okombeka n’okuboneza amaju g’ekitongore kitu.

6. Ahabw’enki turi kubasa kugamba ku Yesu yaferire buri omwe?

⁶ Ku turi kutecereza aha ku Yehova na Yesu batukunzire, nikituma n’itwe twabakunda. (1 Yoh 4:10, 19) Kandi nitukizaho kubakunda twamanya ku Yesu yaferire buri omwe omuri itwe. Eco entumwa Pawulo akaba nakimanya kandi akereka ku nasima ari kuhandikira Abagalatiya ati: ‘Omwana wa Ruhanga, akankunda yayehayo ahabwange.’ (Gal 2:20) Yehova akakoresa ekitambo yakweyiriza hihi kugira ngu obe munywani weye. (Yoh 6:44) Mbehi tikiri kukushemeza wamanya ku Yehova yakurebiremu ekintu kirungi, akahayo ekitambo c’omuhendo kugira ngu obe munywani weye? Mbehi eco tikiri kutuma wakizaho kukunda Yehova na Yesu? Obwe rero buri omwe omuri itwe, ashemerire kwebuza ngu: ‘Eyo rukundo eyi ndi kukunda Yehova na Yesu eshemerire kutuma nakora ki?’

7. Nk’oku kiri kurebeka aha kishushani, ni bata oku twena turi kwereka ku nitukunda Yehova na Yesu? (2 Abakorinto 5:14, 15; 6:1, 2)

⁷ Rukundo eyi turi kukunda Ruhanga na Kristo netuma n’itwe twakunda abandi. (Shoma omu 2 Bakorinto 5:14, 15; 6:1, 2.) Oburyo bumwe obu turi kubasa kwerekamu rukundo ni okwekwatanisa omu murimo g’okuburira. Nituburira abantu bona abu twabugana. Tituri kushorora abantu turebire aha moko, esente ezi bine ninga shi ahu bakurire. Twakikora  tusyoya, nituba turi kubuganisa n’ekigendererwa ca Yehova ‘ori kwenda ngu abantu bona bajunwe, bamanyire kimwe amazima.’​—1 Tim 2:4.

8. Ni bata oku turi kubasa kwereka ku nitukunda benetata na banyanyazi?

⁸ Nambwenu nitwereka ku nitukunda Ruhanga na Kristo turi kukunda benetata na banyanyazi. (1 Yoh 4:21) Nitwereka ku nitubafaho kandi tubayamba omu bwire bw’ebigezo. Nitubagumya bafisa abu bari kukunda, tubashura baba barwire, kandi tubahumuriza baba bemerize omutima. (2 Kor 1:3-7; 1 Tes 5:11, 14) Nitugumizamu kubashabira, turi kwijuka ku “okushaba k’ohikirire kugira amani mingi.”​—Yak 5:16.

9. Ni buha bundi buryo obu turi kubasa kwerekamu ku nitukunda benetata na banyanyazi?

⁹ Nambwenu nitwereka ku nitukunda benetata na banyanyazi turi kutaho amani ngu tubane omu businge. Nitutamu amani omu kutoreza Yehova turi kusaasira abandi. Yaba Yehova yahireyo Omwana weye ngu atufire, n’itwe tushemerire kuba twetegwire kusaasira benetata na banyanyazi batushobeza. Tituri kwenda kuba nk’omugaragwa mubi ori kugambwa omu mugani gwa Yesu. Mukama w’ogo mugaragwa ku yamazire kumusaasira ibanja rihango, we akanga kusaasira omugaragwa mugenzi weye ibanja rice. (Mat 18:23-35) Mbehi waba oyine okutikirizana n’omwe omu b’omu kibina, tori kubasa kuba ow’okubanza omu kuretaho obusinge na we obwire bw’Ekijusyo butakahikire? (Mat 5:23, 24) Ku orakikore, noyija kuba ori kutoreza Yehova na Yesu omu kwereka rukundo.

10-11. Ni bata oku abazehe bari kubasa kwereka ku nibakunda Yehova na Yesu? (1 Petero 5:1, 2)

¹⁰ Ni bata oku abazehe bari kubasa kwerekamu ku nibakunda Yehova na Yesu? Oburyo bw’omugasho obu bari kubasa kucerekamu ni okufa aha bi entama za Yesu ziri kwetenga. (Shoma omuri 1 Petero 5:1, 2.) Ni co eki Yesu yashobororire entumwa Petero. Petero ku yamazire kwehakana Yesu emirundi ishatu, akaba nayenda ngu abone obundi buryo bw’okwereka ku nakunda Yesu. Yesu ku yamazire kuzoka, akabuza Petero ati: “Simoni mwene Yohana, nonkunda?” Nitubasa kwesiga ku Petero yakozire cona eki ari kubasa kugira ngu ayereke ku nakunda Mukama weye. Yesu akagambira Petero ati: “Risa entama zange.” (Yoh 21:15-17) Kandi ni co Petero yakozire. Akafa aha ntama za Yesu, rero cayereka ku yabire namukunda.

¹¹ Imwe bazehe mwe, omu bwire bw’Ekijusyo nimubasa kwereka muta ku nimukuratiza ebigambo ebi Yesu yagambire Petero? Nimubasa kwereka ku muri kukunda Yehova na Yesu muri kushura benetata na banyanyazi kugira ngu mubagaruremu amani kandi muri kukora cona eki muri kubasa kugira ngu mukwase abafukirire kugarukira Yehova. (Ezek 34:11, 12) Nambwenu mugume mufe aha begi ba Bibuli n’abasya abarayije aha Kijusyo. Nituba turi kwenda kubafaho kugira ngu behurire ge ahakuba nituba twine amasiko ku barije kuba abegi ba Yesu.

12. Ahabw’enki turi kugira obumanzi twatecereza aha bigambo ebi Yesu yagambire aha kiro ecabandirize orufu rweye? (Yohana 16:32, 33)

¹² Aha kiro ecabandirize orufu rwa Yesu akagambira abegi beye ati: “Omu nsi mwine obusaasi; konka muhumure, nyowe nsingwire ensi.” (Shoma omuri Yohana 16:32, 33.) Ni enki ecakwasize Yesu kurwana n’abangi beye n’obumanzi kandi akaguma ari omwesiga kuhisya aha kufa? Akaba nayesiga Yehova.  Ahakuba yabire ari kumanya ku abakurasi beye babire barije kubugana ebigezo nk’ebyeye, akashaba Yehova ngu abarinde. (Yoh 17:11) Ahabw’enki eco kiri kutuma twagira obumanzi? Ni ahabw’okuba nitumanya ku Yehova ayine amani agari kukira ag’abangi bitu bona. (1 Yoh 4:4) Nareba byona ebiri kutuhikaho. Nitwesiga ku turije kusingura obwoba tukaba emanzi twayesiga Yehova.

13. Ni bata oku Yosefu owa Arimateya yayerekire obumanzi?

¹³ Reba ecokureberaho ca Yosefu owa Arimateya. Abayudaya bakaba nibamuha ekitinisa. Akaba ari omunyishengero omu Ishengero ry’Abayudaya. Konka obu Yesu yabire ari omu nsi, Yosefu akaba atari emanzi na kace. Yohana akagamba ku Yosefu yabire “ari omwegi wa Yesu bwesherece ahabw’okutina Abayudaya.” (Yoh 19:38) N’obu Yosefu yabire nakunda obutumwa bw’Obukama, akaba nashereka abandi ku yabire nayikiriza Yesu. Hatariho okubanganisa, akaba ayine obwoba bw’okuferwa omwanya gw’ekitinisa ogu yabire ayine. Konka Bibuli negamba ku bwanyima y’orufu rwa Yesu, Yosefu yahikire aho ‘akatinuka, akataha owa Pilato, akashaba omutumbi gwa Yesu.’ (Mar 15:42, 43) Obwo bwire akaba atacayeshereka, ahobwe akeyereka ku ari omwegi wa Yesu.

14. Ni enki eki ori kubasa kukora waba nokunda kutina abantu?

¹⁴ Mbehi n’iwe nokunda kutina abantu? Mbehi ah’ishomero ninga aha murimo, notina kumanyisa abandi ku ori Omuhamya wa Yehova? Mbehi notina kuba omuburizi ninga kubatizibwa ahabw’okutina oku abantu barakurebe? Otayikiriza ngu obwo bwoba butume waremwa kukora eki ori kumanya ngu ni co ekihikire. Shaba Yehova munonga. Mushabe ngu akuhe obumanzi bw’okukora ebi ari kukunda. Ku orarebe oku Yehova ari kugarukamu eshara zawe, noyija kugira obumanzi kandi otashuba kugira obwoba.​—Isa 41:10, 13.

15. Yesu ku yamazire kweyoreka abegi beye, ni enki eki okushemererwa kwatumire bakora? (Luka 24:52, 53)

¹⁵ Abegi ba Yesu bakashasha munonga ku yafire. Tecereza n’iwe ori kuraba omu mbera nkeyo. Bakafisa munywani wabo owu babire bari kukunda kandi bahurira babura amasiko. (Luk 24:17-21) Konka, Yesu ku yabeyorekire, akabashobororera ku yabire ashemerire kuhikiriza obuhanuzi bwa Bibuli. Nambwenu akabaha omurimo g’omugasho g’okukora. (Luk 24:26, 27, 45-48) Omu bwire obu Yesu yagarukire omu iguru bwanyima y’ebiro 40,  bakaba batacari kushasha, ahobwe bakaba batungire okushemererwa. Okumanya ku Mukama wabo yabire ahurire kandi ku yabire ayetegwire kubakwasa kuhikiriza omurimo musya kikatuma bashemererwa. Oko kushemererwa kukatuma bahimbisa Ruhanga batari kuruha.​—Shoma omuri Luka 24:52, 53; Byak 5:42.

16. Ni bata oku turi kubasa kutoreza abegi ba Yesu?

¹⁶ Ni bata oku turi kubasa kutoreza abegi ba Yesu? Nitutunga okushemererwa tutari kuramya Yehova omu bwire bw’Ekijusyo kusha, ahobwe turi kumuramya omwaka gona. Eco nikishaba ngu tute Obukama bwa Ruhanga omu mwanya g’okubanza. Ecokureberaho: Abingi bakahindura omu ntebekanisa zabo kugira ngu bekwatanise omu murimo g’okuburira, baze omu nterane, n’okwekwatanisa omu kuramya kw’eka burijo. Kandi abandi bakeferereza ebintu ebi abandi bari kureba nk’eby’omugasho, kugira ngu bakore byingi omu kibina ninga shi baze kuyamba obucweka oburi kwetenga obuyambi. N’obu twakuba turi kuraba omu mbera zigumire ngu tugumizemu kukorera Yehova, naturaganisa ku arije kutuha emigisha twata eby’Obukama omu mwanya g’okubanza.​—Emi 10:22; Mat 6:32, 33.

17. Ni enki eki wamaririra kukora omuri obu bwire bw’Ekijusyo? (Reba ekishushani.)

¹⁷ Twena tutegerize n’ekihika kwekwatanisa omu Kujusyo aha Rwakabiri, ekiro ca 4, Okwakana. Konka, otategereza obwo bwire ngu obe ni bwo obu watecereza aha magara ga Yesu n’orufu rweye n’ahari rukundo eyi we na Yehova batwerekire. Ogume obitecerezeho mbere y’Ekijusyo na bwanyima ya co. Ecokureberaho: Kwata obwire oshome kandi otecereze aha biri omuri cati eri kugira ngu “Esande ya bwanyima y’amagara ga Yesu omu nsi” eri omu Nyongezo ya B12 y’Obuhinduzi bw’ensi ensya (nwt). Gezaho kushoma ebyahandikirwe ebiri kubasa kutuma wakizaho kwereka rukundo, obumanzi n’okushemererwa. Bwanyima, orondese oburyo obu ori kubasa kwerekamu ku nosima obyihire aha mutima. Oyesige otari kubanganisa ku Yesu ari kushemerererwa byona ebi ori kukora kugira ngu omuri obu bwire bw’Ekijusyo oyijuke orufu rweye.​—Kush 2:19.