1-2. (a) Kuchi twakwivwa muze twakunyonga ha mwono ni ha mulimo wa Yesu? (b) Yika mutulilongesa ha mutwe uno?

 NYI twafwisa mutu yoze twazanga, twakumuvwila usona unji! Ku uputukilo, mutwivwa yikola yinji mumu lia yize yalingiwile kuli mutu wacho shimbu te kanda achifwa, chipi-chipi nyi kamwene lamba linji. Ha kupalika cha mashimbu, mutuputuka kuwahilila cheka muze mutwiwuluka chimwe chuma chize iye atulongesele hanji alingile chipwe ambile chize chatutakamishine hanji kutusehesa.

² Chizechene nawa, twakunenganyana muze twakutanga ha lamba lize Yesu amwene. Ha mashimbu a kwiwuluka kufwa cha Yesu, twakusa mashimbu hanga tupukune ha chitapo cha ukuule wenyi. (1 Kori. 11:24, 25) Chipwe chocho, twakuwahilila muze twakunyonga ha yuma yeswe yize Yesu ambile ni yize alingile muze apwile hano hashi. Chikwo nawa, chili utakamiso kunyingika yuma yize anatulingila musono ni yize makatulingila kulutwe lia matangwa. Ngwe chize mutumona ha mutwe uno, kupukuna ha yuma yino ni ha zango lienyi hali yetu, muchitukwasa kusolola usakwililo wetu mu yitanga.

3. Mumu liaka twakusakwilila ha ukuule?

³ Twakusolola usakwililo wetu muze twakupukuna ha mwono ni kufwa cha Yesu. Muze apwile hano hashi, Yesu kalongesele atu ngwenyi, Wanangana wa Zambi muukaneha yiwape yinji. Twakulemesa chinji yize Mbimbiliya yakulongesa hakutwala  ku ukuule. Chikwo nawa, twakusakwilila ha ukuule mumu wakutwaha uhashi wa kupwa masepa ja Yehova ni Yesu. Waze akufuliela muli Yesu kakwete nawa kutalatala cha kuzuka mwono wa mutolo ni kuliwana ni asoko jo waze makahindwisa ku ufwe. (Yoa. 5:28, 29; Roma 6:23) Yetu te kutwatelele yiwape yacho, mumu kukushi nichimwe chize mutuhasa kutulinga hanga tufunyise yize Yehova ni Yesu hanatulingila. (Roma 5:8, 20, 21) Alioze mutuhasa kusolola usakwililo wetu hali ayo. Kuchi mutuhasa kuchilinga?

4. Kuchi Maria Ka-Mandala asolwele usakwililo wenyi ha yize Yesu amulingilile? (Tala chizulie.)

⁴ Tutalenu chilweza cha Maria Ka-Mandala. Te kakumupinjisa kuli andemoniu shimbiali ni kumumwesa lamba. Iye kota kanyongene ngwenyi, andemoniu jacho kechi keza kamwecha nilimwe tangwa. Kashika, mutuhasa kunyonga usakwililo uze asolwele muze Yesu amutuhwishile andemoniu jacho! Usakwililo wacho wamutwalile hanga apwe kambaji ka Yesu ni kusa mashimbu, tachi ni yikumba yenyi hanga akwase Yesu mu mulimo wa kwambujola. (Luka 8:1-3) Maria kalemesene chinji yize Yesu alingile hali iye, alioze kota kakanyingikine yize te malinga kulutwe. Iye te mahana mwono wenyi hali atu eswe “hanga mweswawo mamufuliela, kechi katoka, alioze akapwe ni mwono wa mutolo.” (Yoa. 3:16) Chipwe chocho, Maria kasolwele usakwililo wenyi kuli Yesu ha kushishika kuli iye. Muze Yesu te anapinda ha mutondo wa lamba, Maria kapwile hamwe nenyi ni kumukwasa ni kutakamisa tumbaji akwo. (Yoa. 19:25) Muze Yesu afwile, Maria ni mapwo akwo aali yalanda yuma hanga alulieke nayo mujimba wenyi. (Marku 16:1, 2) Maria kamuwahishile chinji mumu lia ushishiko wenyi. Iye kapwile ni uhashi wa kuliwana ni Yesu muze amuhindwishile ni kuhanjika nenyi, chiwape chize kuchakapwile kuli tumbaji akwo.—Yoa. 20:11-18.

5. Kuchi mutuhasa kusolola ngwetu twakusakwilila ha yize Yehova ni Yesu anatulingila?

 ⁵ Ni yetu mutuhasa kusolola usakwililo wetu kuli Yehova ni Yesu ha yize akutulingila ha kusa mashimbu, tachi ni yikumba yetu hanga tukwase mulimo wa Wanangana. Chakutalilaho, mutuhasa kulihana hanga tukwase mulimo wa kutunga ni kululieka mazuwo waze twakuzachisa mu uwayilo wetu.

6. Mumu liaka mutuhasa kwamba ngwetu, ukuule uli chawana kuli yena?

⁶ Muze twakunyonga ha chize Yehova ni Yesu akutuzanga, chakutukwasa ni yetu kwazanga. (1 Yoa. 4:10, 19) Nawa muze twakunyingika ngwetu Yesu katufwilile, zango lietu hali ayo liakwoka. Postolo Paulu kasolwele chize te akusakwilila ha chitapo cha Yesu, muze asonekenene A-Ngalashia, ngwenyi: “Mwana Zambi . . . wanguzangile, waliechele hali yami.” (Ngala. 2:20) Mumu lia ukuule, Yehova hanakukoka kuli iye hanga upwe sepa lienyi. (Yoa. 6:44) Kunyingika ngwo Yehova kamwene chuma chipema muli yena ni kufweta ndando yinene hanga upwe sepa lienyi, kuchishi kukuvwisa kuwaha? Kuchishi kukolesa zango lie hali Yehova ni Yesu? Twatamba kulihula ngwetu: ‘Yika zango liacho mulingukwasa kulinga?’

7. Ngwe chize tunamono ha chizulie, kuchi yetu eswe mutuhasa kusolola zango lietu hali Yehova ni Yesu? (2 A-Korindu 5:14, 15; 6:1, 2)

⁷ Zango lietu hali Yehova ni Yesu liakutukwasa kuzanga akwetu. (Tanga 2 A-Korindu 5:14, 15; 6:1, 2.) Jila yimwe yakusolwelamo zango liacho, yili kulihana chinji mu mulimo wa kwambujola. Yetu twakuhanjika ni atu eswe waze twakuliwana no, chipwe ngwe kali a ku minyachi yeka, chikowa, kakwete mbongo hanji ka. Hachino, twakulinga mulimo wetu kulita ni upale wa Zambi unambe ngwo,  ‘atu eswe akalilamwine, akahete ku chinyingi cha umwenemwene.’—1 Timo. 2:4.

8. Kuchi mutuhasa kusolola ngwetu twakuzanga mandumbu ni mapangi yetu?

⁸ Twakusolola nawa zango lietu hali Yehova ni Yesu muze twakuzanga mandumbu jetu. (1 Yoa. 4:21) Yetu twakwafunga ni kwakwasa ha yize yeswe anafupiwa muze anapalika mu yipikalo. Nyi mandumbu jetu mafwisa twakwalembejeka, nyi mayiza twakwameneka, nyi manenganyana twakulinga yeswayo mutuhasa hanga twatakamise. (2 Kori. 1:3-7; 1 Tesa. 5:11, 14) Twakulembela mandumbu jetu, mumu tunanyingika ngwetu kulemba “cha mukwa ululi chili ni tachi jinji.”—Tia. 5:16.

9. Mutapu ukwo uka mutusolwelamo ngwetu, twakuzanga mandumbu jetu?

⁹ Mutapu ukwo uze mutusolwelamo ngwetu, twakuzanga mandumbu jetu uli kusa tachi hanga tutwame no kanawa. Yehova kali mukwa-kukonekena munene, kashika mutuhasa kwimbulula chilweza chenyi. Iye kahanyine Mwanenyi hanga atufwile ha shili yetu, kashika ni yetu twatamba kukonekena mandumbu jetu. Yetu kutwazangile kupwa ngwe ndungo mupi wa ha chishima cha Yesu. Chipwe ngwe mwata wenyi kamukonekenene kongo linene lize apwile nayo, alioze iye kakonekenene kongo likepe lize ndungo-ni-mukwo amupwile nalio. (Mateu 18:23-35) Nyi nwalipinjishile ni umwe ndumbu, shina muhasa kulivwashana nenyi shimbu chiwanyino cha Yesu kanda chiputuka? (Mateu 5:23, 24) Nyi wachilinga, musolola ngwe wakuzanga Yehova ni Yesu ni mbunge yeswe.

10-11. Kuchi makulwana a mu chikungulwila mahasa kusolola zango lio hali Yehova ni Yesu? (1 Petulu 5:1, 2)

¹⁰ Kuchi makulwana a mu chikungulwila mahasa kusolola ngwo, kakuzanga Yehova ni Yesu? Mutapu umwe ulemu uze mahasa kuchilingila, uli ha kufunga kanawa mapanga jambala a Yesu. (Tanga 1 Petulu 5:1, 2.) Yesu kasolwele chikuma chino zwalala kuli postolo Petulu. Hanyima lia kulikala Yesu katatu keswe, Petulu kota kalihulumbile chinji hanga asolele kuli Yesu ngwenyi kakumuzanga. Hanyima lia kumuhindwisa, Yesu yahula Petulu ngwenyi: “Semone mwana Yona, unanguzange kuhiana wano, nyi?” Pundu lume, Petulu te malinga cheswacho mahasa hanga asolole ngwenyi kakuzanga Yesu. Yesu yamba kuli Petulu ngwenyi: “Lisa ana-mapanga jami.” (Yoa. 21:15-17) Ndo kusongo lia mwono wenyi, Petulu kafungile kanawa mapanga ja Yesu ni kusolola ngwenyi, chamwenemwene te kakumuzanga.

¹¹ Makulwana, ha jimwe poso shimbu chiwanyino cha Yesu kanda chilingiwa ni muze hichalingiwa, kuchi munuhasa kusolola ngwenu yize Yesu ambile kuli Petulu yili ni ulemu kuli yenu? Munuhasa kuchisolola ha kuzanga Yehova ni Yesu, kusa mashimbu nukolweze mandumbu ni kukwasa waze hanazeye ku ufulielo hanga afune kuli Yehova. (Eze. 34:11, 12) Munuhasa nawa kukolweza alongi a Mbimbiliya ni atu akwo waze akwiza ha chiwanyino cha Yesu. Tunazange kwatambula kanawa mumu tunanyingika ngwetu, kulutwe no makapwa tumbaji twa Yesu.

12. Mumu liaka kunyonga ha maliji waze Yesu ahanjikile shimbu te kanda achifwa chakutwaha hamu? (Yoano 16:32, 33)

¹² Ha ufuku shimbu te kanda achifwa, Yesu yalweza tumbaji twenyi ngwenyi: “Hano hashi munukapwa ni luyinda: alioze hamukenu chikolo; hingunakumbu hashi.” (Tanga Yoano  16:32, 33.) Yika yakwashile Yesu kusolola hamu kuli akwa-kole jenyi ni kununga ni kushishika ndo ku kufwa? Iye kajikijilile muli Yehova. Chikwo nawa, kanyingikine ngwenyi, tumbaji twenyi no te mapalika mu yeseko yalifwa, kashika etele kuli Yehova hanga aafunge. (Yoa. 17:11) Mumu liaka chino chakutwaha hamu? Mumu Yehova kali ni ndundo jinji kuhiana akwa-kole jetu eswe. (1 Yoa. 4:4) Iye kakumona yuma yeswe yize yakulingiwako. Kashika tuli ni shindakenyo ngwetu, nyi twafuliela muli Yehova, iye matukwasa kukumba woma hanga tupwe ni hamu.

13. Kuchi Yosefwe wa ku Arimatea asolwele hamu?

¹³ Tutalenu chilweza cha Yosefwe wa ku Arimatea. Iye kapwile lunga yoze te akuvumbika chinji kuli A-Yunda. Kapwile ni kulinga chihanda mu chota cha akwa-kuyula A-Yunda. Alioze muze Yesu apwile hano hashi, Yosefwe kakapwile ni kusolola hamu. Yoano kambile ngwenyi, iye kapwile “kambaji ka Yesu, alioze ku tenga mumu ha woma wa A-Yunda.” (Yoa. 19:38) Yosefwe te kakwete ufulielo unji muli Yesu, alioze te keshi kuusolola kuli akwo. Kota kapwile ni kunyonga ngwenyi, nyi atu mamunyingika ngwo kali kambaji ka Yesu te kechi kumusa nawa vumbi. Alioze Mbimbiliya yakwamba ngwo, muze Yesu afwile iye “walembele kuli Pilatu, hanga akachize mujimba wa Yesu.” (Marku 15:42, 43) Ha kuchilinga, atu eswe yanyingika ngwo, neye kapwile kambaji ka Yesu. Iye kakevwile nawa woma.

14. Yika muhasa kulinga nyi wakuvwila atu woma?

¹⁴ Shina hiunevu kama woma ngwe Yosefwe wa ku Arimatea? Shina hiunevu sonyi ja kulisolola ngwe Chela cha Yehova ku shikola hanji ku mulimo? Shina uneche kupwa mukwa-kwambujola hanji kukupapachisa mumu unevu woma wa yize akwenu manyonga hali yena? Kanda wecha woma ukukinde kulinga yuma yalita. Lemba kuli Yehova ni kumulweza chize unevu. Mwite hanga akwehe hamu lia kulinga upale wenyi. Muze mumona ngwe Yehova kanakumbulula kulemba che, mutakama ni kupwa ni hamu linji.—Iza. 41:10, 13.

15. Hanyima lia Yesu kusoloka kuli tumbaji twenyi, yika uwahililo wakwashile kulinga? (Luka 24:52, 53)

¹⁵ Muze Yesu afwile, tumbaji twenyi kanenganyanyine chinji. Tuchesekenu kulisa mu chihela cho. Ayo kakatokesele wika sepa lio, alioze kalivwile nawa ngwe katokesa kutalatala cho. (Luka 24:17-21) Chipwe chocho, kwakapalikile mashimbu anji, Yesu yasoloka  kuli ayo ni kwalumbunwina chize kufwa chenyi chamanunwine uprofeto. Iye yaaha nawa mulimo ulemu hanga alinge. (Luka 24:26, 27, 45-48) Ha kupalika cha matangwa 40 chize haze Yesu ayile mu malilu, yinyengo ya tumbaji twenyi yiyalumuka uwahililo. Ayo kanyingikine ngwo, Yesu kali ni mwono nawa ngwo, maakwasa mu mulimo uze aehele. Uwahililo uze apwile ni kwivwa, wakwashile kulingila Yehova chakuhona kunenganyana.—Tanga Luka 24:52, 53; Yili. 5:42.   

16. Kuchi mutuhasa kwimbulula tumbaji twa Yesu?

¹⁶ Kuchi mutuhasa kwimbulula tumbaji twa Yesu? Mutuhasa kuwahilila ha kulingila Yehova hi wika ko ha mashimbu a chiwanyino cha Yesu, alioze ha mwaka weswe wamuwundu. Mba chino chilingiwe, twatamba kusa Wanangana wa Zambi ha chihela chitangu ku mwono wetu. Chakutalilaho, mandumbu amwe hanalulieka katalilo wa milimo yo hanga alihane chinji mu mulimo wa kwambujola, kukunguluka ni kulinga uwayilo wa mu usoko hita poso. Akwo haneche yimwe yuma ya ku musunya yize kuli atu akwo yikwete ulemu unji hanga akwase chikungulwila ni kuya kuze kunafupiwa ukwaso wa akwa-kwambujola. Chochene, tunafupiwa lume kunyongonona mba tununge ni kuwayila Yehova. Mumu iye kanalakenya ngwo, nyi twasa Wanangana wenyi ha chihela chitangu ku mwono wetu matwaha yiwape yinji.—Yishi. 10:22; Mateu 6:32, 33.

17. Yika twatamba kulinga ha mashimbu a chiwanyino cha Yesu? (Tala chizulie.)

¹⁷ Tunashimbwila tukapwe ha chiwanyino cha Yesu, chize muchikalingiwa Liamaali 4 ya Abril. Alioze, kutwafupiwile kuheta ha tangwa liacho mba tupukune ha kufwa ni ha mwono wa Yesu ni ha zango lize iye ni Yehova akutusolwela. Tusenu tachi hanga tupukune ha yuma yeswayi ha mashimbu a chiwanyino cha Yesu. Chakutalilaho, tusenu mashimbu hanga tutange ni kupukuna ha chikuma, “Poso Yakasula ya Yesu Hano Hashi” ha Apêndice B12 ya Tradução do Novo Mundo. Muze tunatange sango jacho, tufupenu yisoneko yize muyikolesa usakwililo, zango, hamu ni uwahililo wetu. Hanyima, tufupenu majila waze mutuhasa kusolwelamo usakwililo wetu mu yitanga. Nyi twachilinga, mutupwa ni shindakenyo ngwetu, Yesu malemesa yeswe yize mutulinga hanga tumwiwuluke ha mashimbu a chiwanyino cha kufwa chenyi.—Uso. 2:19.