1, 2. (1) ¿Sãwũã sentiseapanʉ krĩchapanʉbʉrʉ Jesuba kʼãrẽ obada ʉ̃rʉ akʉza iya Daizeze Bedʼea sãwũã jarabada ʉ̃rʉ? (2) ¿Kʼãrẽta kʼawuadai naʉ̃ artikulodera?

 DAYIRÃ mebẽrã beibʉrʉdera mejãcha pʉ, mamina audre pʉabʉ dayirãba jẽda kĩrãbepanʉne iyi bei nãã kʼãrẽ obada ʉ̃rʉ, mawũã ẽ bʉrʉ zʉbʉria beidata. Mamina ewari berabari wãne daya jẽda kĩrãbebʉde iyi sãwũãbadata, dayi sãwũã ipidabibadata, naʉ̃ba jẽda sobia sentibibʉ.

² Dayirãba lebʉrʉde Jesu ʉ̃rʉ akʉza kʼawuabʉrʉde iyi sãwũã zʉbʉria kʼãrãpe beidata, naʉ̃ba sopʉa sentibibʉ, maʉ̃ kʼarea Jesu beida jẽda kĩrãbepanʉ ewaridera, ewari jʉrʉpanʉ bia krĩchaita iyira kʼãrẽa beisita (1 Cor. 11:24, 25). Mamina mejãcha sobia sentipanʉ krĩchabʉdade Jesuba jarada ʉ̃rʉ akʉza iya oda ʉ̃rʉ nama egorode baside. Naʉ̃ba kʼarebayi krĩchaita idi ewade iya kʼãrẽta onʉmʉta akʉza kʼãrẽta oita ʉ̃ra zeide. Krĩchapanʉbʉrʉ iya dayirã kʼãrẽaba kãgabʉ ũdubida ʉ̃rʉ, naʉ̃ba kʼarebayi nekʼãrẽ oita iyaʼa biga diabʉ ũdubita. Naʉ̃ artikulode kʼawuadayi maʉ̃ra sãwũã oita.

3. ¿Kʼãrẽ kʼarea biga diaibara Jesu dayirã bari beida kʼareara?

³ Dayirãba Jesu sãwũãbada ʉ̃rʉ akʉza iyi sãwũã beida ʉ̃rʉ krĩchabʉrʉdera, naʉ̃ba iyaʼa biga diabibʉ. Jesu nama egorode baside jaradiasi Daizeze Nokʼoba kʼãrẽ nebia wei ʉ̃rʉ. Dayirãbara kãga Daizeze Bedʼeade Jesu beida ʉ̃rʉ jarabʉra, naʉ̃ba kʼarebasi baera Jeowa akʉza Jesuʉ̃me neũdukʼawua bʼaita. Dayirãba Jesu ʉ̃rʉ ĩjãpanʉbʉrʉ  ewari jõmaʉ̃nẽ baseapanʉ akʉza jẽda ũduseapanʉ dayirã mebẽrã beidara (Juan 5:28, 29; Rom. 6:23). Dayirãbara kʼãrẽ oda ẽ basi Daizezeba dayirã mawũã nebia diamarẽãra akʉza paga auda ẽ Jeowaba Jesuʉ̃meba dayirãbari odara (Rom. 5:8, 20, 21). Mamina biga diabʉta ũdubiseapanʉ, ¿sãwũã oseabʉ maʉ̃ra?

4. ¿Sãwũã ũdubisi María Magdalenabara Jesuʼa biga diabʉta iyi kʼarea oda kʼarea? (Akʉra potota).

⁴ Kʼawuadaya ẽbẽra wẽrã María Magdalena ʉ̃rʉ, iyira judiabasi. Iyira mejãcha zʉbʉriabasi angelera kayiruara 7bʉraba iyita zʉbʉriabipanasi baera. Krĩchabasibaibara kʼaiba kʼarebada ẽãta. Iya Jesuʼa mejãcha biga diabasibaibara ẽdrʉbisi baera maʉ̃ra angelera kayiruaraneba akʉza iyi ewarita, iyi zareata, iya nekʼãrẽ erbʉta zokʼasi Jesuba jarabʉ oita (Luc. 8:1-3). Maríaba Jesuʼa biga diabasi iya oda kʼarea, mamina iya kʼawua ẽ basi Jesuba nekʼãrẽ biata oita, ẽbẽra jõmaʉ̃ bari beita, mawũã yi ẽbẽra «iyidebema ĩjãbʉra bei ẽ bamarẽã» (Juan 3:16). Maríara kʼẽrẽpabasi Jesuʉ̃me, adewara Jesu bakurude beibodode iyi kʼawabasi so zarea diaita akʉza wuabemarasida kʼarebaita (Juan 19:25). Maʉ̃ tẽã Maríaba akʉza awuru wẽrãraba erjʉ̃ẽsida nekʼãrẽ tũãpoabʉta, mawũã Jesu kakuama pãbida kʼãrãpe wuagabʉdaita (Mar. 16:1, 2). Jeowabara Maríaʼa nebiata mejãcha diasi, iduaribisi Jesu beida jẽda piradrʉda tẽã ũdumarẽã akʉza iyiʉ̃me bedʼeamarẽã, maʉ̃ra Jesu kʼaidubemara jõmaʉ̃ba abarika ũduda ẽ basi (Juan 20:11-18).

5. ¿Dayirãbara sãwũã biga diabʉta ũdubiseabʉ Jeowaʼa akʉza Jesuʼa, ãya dayirã bari oda kʼarea?

⁵ Dayirãbida Jeowaʼa akʉza Jesuʼa biga diabʉta ũdubiseapanʉ dayirã ewarita, dayirã zareata akʉza plata diabʉde nekʼãrẽ Jeowaita oita. Bari jaraita, dayirãbara kʼarebaseabʉ Daizeze de parãita, mawũã ẽ bʉrʉ maʉ̃ de ara oerbʉde.

6. ¿Kʼãrẽa jaraseapanʉ Jesura dayirã aba abakaʉ bari beisita?

⁶ Krĩchabʉdade Jeowaba Jesuʉ̃meba dayirã mejãcha kãgabʉta, dayirãbida abarika kãgakĩrãpanʉ ãyita (1 Juan 4:10, 19). Audre kãgapanʉ kʼawuabʉdade Jesura beisita dayi bari. Apostol Pablobara naʉ̃ta kʼawuabasi maʉ̃ kʼarea biga diasi, naʉ̃ta bʉsi galataraʼa «Daizeze warrata [...] mʉ̃ kãgape akʉza mʉ̃bari beisi» (Gál. 2:20). Jesuta jõmaʉ̃ bari beisi baera, mawũã dayirãra Jeowa neũdukʼawua baseabʉ (Juan 6:44). Dayirãra mejãcha sobiabʉ Jeowaba dayi sode nebiata ũdusi baera akʉza iyi warrata dayirã bari beabisi baera, mawũã dayirãra iyi neũdukʼawua baseabʉ. Naʉ̃ ʉ̃rʉ krĩchaiba kʼarebabʉ audre kãgaita Jeowata Jesuʉ̃me. Mawũẽra bʉyikʉza widiseabʉ: «¿Naʉ̃ kãgabara kʼãrẽta obibʉ mʉ̃ara?».

7. ¿Dayirã aba abakaʉba sãwũã ũdubiseabʉ Jeowata Jesuʉ̃me kãgabʉta potode ũdubʉ kĩrãkʼa? (2 Corintios 5:14, 15; 6:1, 2).

⁷ Jeowata Jesuʉ̃me kãgabʉba kʼarebabʉ kãgaita wuabemarasida (akʉra 2 Corintios 5:14, 15; 6:1, 2). Maʉ̃ kãgara dayirãbara ũdubibʉ Daizeze Bedʼea jaradiabʉde ẽbẽrarã jõmaʉ̃ʼa, akʉda ẽ kʼãrẽ pʉwʉrʉdeba zesita, iyi kulturata akʉza plata mejãcha erbʉta, mawũã ẽ bʉrʉ neẽãta. Mawũã odara Jeowaba kãgabʉde opanʉ «iyara kãgabʉ jõmaʉ̃ba kʼawuadamarẽã wãrĩnuta akʉza ẽbẽra jõmaʉ̃ta ẽdrʉmarẽã» (1 Tim. 2:4).

8. ¿Sãwũã ũdubiseapanʉ kãgabʉta dayirã mebẽrã kongregasionebemara?

⁸ Jeowata Jesuʉ̃me kãgabʉta ũdubipanʉ, mebẽrã kongregasionebema kãga ũdubipanʉne (1 Juan 4:21). Krĩchadaibara ãyi ʉ̃rʉ akʉza kʼarebadaibara ãyi  bedʼea zroma erbʉde, akʉ jʉ̃ẽpanʉne ãyi kayabʉde, yi mebẽrã beibʉrʉde so zarea diabʉde akʉza ãyi krĩcha zroma obʉde zarea opanʉne ãyaʼa so zarea diaita (2 Cor. 1:3-7; 1 Tes. 5:11, 14). Ãyi ʉ̃rʉ badua yiwidʼipanʉ kʼawuapanʉ baera «ẽbẽra jipabʉta yiwidʼira, Daizezeʉ̃mebʉbʉrʉ, zarea mejãcha erbʉ» (Sant. 5:16).

9. ¿Adewara sãwũã kãgabʉta ũdubiseabʉ mebẽrã kongregasionebemara?

⁹ Akʉza mebẽrã kongregasionebema kãgata ũdubibʉ zarea obʉde ãyibawara aduʼa bʼaita. Jeowade kĩrãkʼa okĩrãpanʉ, Jeowabara kĩrãduabʉ baera wuabemaba nemitia obʉra. Jeowabara idu beabisi yi warrata dayirã nemitia bari, maʉ̃ kĩrãkʼa dayirã mebẽrãba dayi ʉ̃rʉ mitia odara kĩrãduaibara. Jesuba nebʉrasi nezokʼa kayirua ʉ̃rʉ. Naʉ̃ nezokʼara nokʼoʼa mejãcha debebasi, mamina nokʼobara kĩrãduasi maʉ̃ debera, mamina naʉ̃ nezokʼaba ababema nezokʼata iya wiña debebadara kĩrãdua ẽ basi. Dayirãra naʉ̃ nezokʼa kayirua kĩrãkʼa bakĩrãpanʉ ẽ (Mat. 18:23-35). Bʉta mebẽrã kongregasionebema abaʉ̃me bedʼea zroma erbʉbʉrʉ, ¿ara oseabʉka maʉ̃ra Jesu beida jẽda kĩrãbei ewari zei nãã? (Mat. 5:23, 24). Mawũã obʉbʉrʉ ũdubidayi audre kãgabʉta Jeowata Jesuʉ̃me.

10, 11. ¿Sãwũã ũdubiseabʉ zõrãrã kongregasionebemabara Jeowata Jesuʉ̃me kãgabʉta? (1 Pedro 5:1, 2).

¹⁰ ¿Sãwũã ũdubiseabʉ zõrãrã kongregasionebemabara Jeowata Jesuʉ̃me kãgabʉta? Akʉbʉde mebẽrã kongregasionebemaba kʼãrẽta nesidabʉta (akʉra 1 Pedro 5:1, 2). Jesubara ũdubisi Pedroʼa maʉ̃ oira yibiata. Pedroba kĩrã ũbea jaraside Jesu ũdukata, maʉ̃neba ʉ̃ta jʉrʉsi sãwũã Jesu kãgabʉ ũdubita. Jesu jẽda piradrʉda tẽã iya Pedroʼa widisi: «Simón […] ¿bʉa mʉrã kʉãgʼakʼa?». Pedrobara nekʼãrẽ jõma osibaibara Jesu kãgabʉ ũdubita. Jesuba Pedroʼa jarasi: «Jʉredua mʉ pẽwã bʼeta» (Juan 21:15-17). Maʉ̃neba ʉ̃ta Pedrobara ewari jõmaʉ̃nẽ akʉsi Jesu obejarãra, mawũã ũdubisi Jesu mejãcha kãgabʉta.

¹¹ ¿Zõrãrãbara sãwũã ũdubiseabʉ Jesu beida jẽda kĩrãbei ewari nãã akʉza maʉ̃ tẽãbida Jesuba Pedroʼa bedʼea jaradara maraitabida yibiata? Zõrãrãbara Jeowata Jesuʉ̃me kãgabʉta ũdubiseabʉ, ewari jʉrʉbʉde mebẽrã so zarea diabʉde akʉza mebẽrã kʉrãzadata jẽda Jeowa ode zemarẽã kʼarebabʉde (Ezeq. 34:11, 12). Adewara so zarea diaseabʉ Daizeze Bedʼea ʉ̃ra kʼawuapanʉraʼa Jesu beida jẽda kĩrãbepanʉ ewaride jʉ̃ẽpanʉrata akʉza ʉ̃rabʉrʉ yi jʉ̃ẽnarata.

12. Dayirãba krĩchapanʉbʉrʉ Jesuba iyi bei nãã bedʼea jaradata, ¿maʉ̃bara sãwũã zowaĩnĩgʉa diabʉ? (Juan 16:32, 33).

¹² Diamasi Jesu bei nãã iyi kʼaidubemara jarasi: «Naʉ̃ ẽjũãnerã marã zuburiaya, mawũãmina wãnigua bʼeaudua, mʉã edre bʼaebisia ãtõmiã zareata ẽjũãne nʉmʉrã» (akʉra Juan 16:32, 33). ¿Kʼãrẽba kʼarebasi Jesura iyi nejʉrara nãã zowaĩnĩgʉa bʼaita akʉza iyi beiyeda kʼẽrẽpa bʼaita? Iya Jeowata ĩjãsi, Jesuba kʼawuabasi baera iyi kʼaidubemara zʉbʉria odaita iya jarasi Jeowa akʉmarẽã (Juan 17:11). ¿Naʉ̃ ĩjãiba kʼãrẽa so zarea diabʉ? Jeowara zarea barabʉ baera dayirã nejʉraraira (1 Juan 4:4). Jeowabara jõma ũdubʉ. Dayirãba Jeowata  ĩjãbʉbʉrʉ pera senti ẽ bayi akʉza zowaĩnĩgʉata erbayi.

13. ¿Sãwũã ũdubisi José Arimateadebemabara zowaĩnĩgʉabʉta?

¹³ Akʉdaya kʼãrẽta berabarisita José Arimateadebemata. Iyira juezʼra Sanedrínʼnebʉra abaʉdebemabasi, maʉ̃ kʼarea judiorabara iyira bia akʉpanasi. Jesu nama egorodebaside akʉza Daizeze Bedʼea jaradiabaside Josébara ũdubi ẽ basi iyira zowaĩnĩgʉabʉta. Juanba jarasi Josébara «judíorã wawiaba Jesús chupea pẽwã bʼʉta» (Juan 19:38). Joséba Daizeze Nokʼo ʉ̃rʉ kʼawuakĩrãbasimina iya kãga ẽ basi wuabemaraba kʼawuadamarẽã iya Jesu ʉ̃rʉ ĩjãbʉta, iya krĩchabasi baera wuabema ẽbẽrarãba kʼawuadara iyita Jesu kʼaidubemata, wuabemarabara iyira bia akʉda ẽãta. Daizeze Bedʼeabara jarabʉ Jesu beida tẽãra Joséra «wãnigua edʼa wãsia Pilatoma. Mobe widʼisia Jesús kʼakuata» (Mar. 15:42, 43). Joséra wua Jesu kʼaidu chupea ba ẽ basi, jõmaʉ̃ra ũdubisi maʉ̃ta.

14. ¿Kʼãrẽta oseabʉ bʉta ẽbẽra kʼarea perabʉbʉrʉ?

¹⁴ ¿Bʉra José kĩrãkʼa pera sentibarika ẽbẽrarã kʼarea? Trajode mawũã ẽ bʉrʉ kolegiode, ¿bʉra pera sentibarika jaraita bʉra Jeowa ʉ̃rʉ Kʼawuabipanʉrãta? ¿Bʉra nejaradiabari bakĩrã ẽka mawũã ẽ bʉrʉ buru kʼoeikĩrã ẽka wuabema ẽbẽrata bʉ ʉ̃rʉ sãwũã krĩchai kʼarea? Bʉ mawũã pera sentibʉ kʼarea iduaribirãra Jeowaba zokʼabʉ oita. Soiduba yiwidʼira Jeowa akʉza kʼareba widira iya kãgabʉ aripe oita, bʉa ũdubʉrʉde Jeowaba sãwũã panʉbʉta bʉ yiwidʼira, naʉ̃ba kʼarebayi bʉ zarea erbaita akʉza zowaĩnĩgʉa erbaita (Is. 41:10, 13).

15. ¿Jesuta iyi kʼaidubemara yi ũdubida tẽã ãyira maʉ̃ kʼarea mejãcha sobiapanasi baera kʼãrẽta osida? (Lucas 24:52, 53).

¹⁵ Jesu kʼaidubemarãra mejãcha sopʉapanasi iyi beisidera. Krĩchara ãyi sãwũã sentidata, ãyara sentipanasi ãyi neũdukʼawuarata aduasita akʉza kʼãrẽ nebia jʉ̃ãita neẽbasita (Luc. 24:17-21). Mamina Jesura ãyaʼa yi ũdubisi, adewara jara ũrĩbisi sãwũã Daizeze Bedʼeade propesia erbʉra iyide jõma aripe berabaribasita, mawũã ãya ĩjãbʉta audre zarea erpanamarẽã, adewara ãyaʼa trajo biata diasi (Luc. 24:26, 27, 45-48). Jesu beida jẽda piradrʉdata ewari 40 babʉrʉde ʉ̃ta wãsi, maʉ̃ kʼarea iyi kʼaidubemarãra mejãcha sobiapanasi, kʼawuapanasi  baera Jesura wuara bei ẽ baita akʉza kʼarebaibasita ãya trajo omarẽã jaradata. Mawũã sobiapanʉba kʼarebasi ewari jõmaʉ̃nẽ Jeowa ʉ̃rʉ ibia bedʼea bʼaita (akʉra Lucas 24:52, 53; Hech. 5:42).

16. ¿Sãwũã Jesu kʼaidubemane kĩrãkʼa oseapanʉ?

¹⁶ ¿Sãwũã Jesu kʼaidubemane kĩrãkʼa oseapanʉ? Dayirãra ewari jõmaʉ̃nẽ sobia baseapanʉ Jeowa ʉ̃rʉ bedʼeapanʉne, mawũã bari Jesu beida jẽda kĩrãbepanʉ ewaridebʉrʉ sobia baseabʉ ẽ. Mawũã panaira Daizeze Nokʼodebemata nããra odaibara. Bari jaraita, ʉ̃kʉrʉ mebẽrãra nekʼãrẽ osida ãyi trajode wiña trajaita mawũã audre Daizeze bedʼea jaradiaita, ãba yi jʉrebarima wãita akʉza semanaza ãba yi jʉredaita yi mebẽrãbawara Jeowa ʉ̃rʉ kʼawuadaita. Ʉ̃kʉrʉ mebẽrãbara nekʼãrẽ bia mejãcha erbaita jʉrʉda ẽ, mawũã audre oita ãyi kongregasione, mawũã ẽ bʉrʉ jaradia wãita kongregasionba Daizeze bedʼea jaradiaita nesidabʉma. Dayirãba Jeowaba zokʼabʉ oira nesidapanʉ awuantaita, adewara Jeowaba dayirã jarabʉ nebia mejãcha diaita nãã bʉepanʉbʉrʉ iyi Nokʼodebemata (Prov. 10:22; Mat. 6:32, 33).

17. ¿Kʼãrẽta oita krĩchabʉ naʉ̃ poagade Jesu beida jẽda kĩrãbeide? (Akʉra potota).

¹⁷ Naʉ̃ poagadera Jesu beida jẽda kĩrãbedayi martes 4 abrilde. Mamina jʉ̃ãna ẽ baibara maʉ̃ ewari zeyeda krĩchaita Jesuba kʼãrẽ odata akʉza iyi sãwũã beida ʉ̃rʉ, adewara Jeowaba Jesuʉ̃meba dayirã sãwũã kãgabʉ ʉ̃rʉ. Audre bia krĩchaseapanʉ Jesu beida jẽda kĩrãbepanʉ ewaride. Bari jaraita, leibara akʉza maʉ̃ ʉ̃rʉ krĩchaibara Jesu sãwũãbada ʉ̃rʉ, maʉ̃ oita akʉra rekuadro «La última semana de Jesús en la Tierra» maʉ̃rabʉ apendise B12 Traduccion del Nuevo Mundo de, maʉ̃ akʉbʉrʉde ũdura sãwũã biga diaita, kãga ũdubita, zowaĩnĩgʉa erbaita akʉza sobia bʼaita, adewara akʉra bʉa kʼãrẽta oseabʉta mawũã biga diabʉta ũdubita. Ĩjãra Jesuba kĩrãduada ẽ baita dayirã kʼãwũã zarea opanʉra iyi beida jẽda kĩrãbeita (Apoc. 2:19).