1-2. (a) Fa we fii te we pakisei a libi fu Yesesi anga den sani di a be du? (b) San wo luku aini a artikel ya?

 TE WAN sama di u lobi dede, ná pikin angii we angii fi en. Biginbigin ná pikin hati ai hati u te u pakisei den ten fosi a sama dede, moomoo efu a be siki wan bunbun siki fosi a dede. Ma bakaten, u nai tyali so moo. Son yuu te u pakisei fa a sama be e gi u taanga-sikin da we lafu. Son leisi a wan sani di a be du we pakisei da we lafu.

² Na aseefi fasi tyali e kisi u tu te we leisi fu a fasi fa Yesesi pina te enke a dede. Na a pisiten fu a Membeefesa, we moo poti pakisei na a dede di Yesesi kon dede gi u (1 Kor. 11:24, 25). Ma ná pikin poolo we poolo te we pakisei ala den sani di Yesesi be taki, anga den sani di a be du di a be de a goontapu. Ná pikin taanga-sikin we fende te we pakisei den sani di Yesesi e du nownow, anga den sani di aw du gi wi aini a ten di e kon. Te we teke ten pakisei ala den sani ya, anga a lobi di Yesesi soi gi u, we wani du sani fu soi taki we teke san en anga en Dda du gi u fu bigi. Aini a artikel ya, wo luku faw sa du a sani ya.

3. Saide u mu teke a dede di Yesesi dede gi u fu bigi?

³ Ná pikin bigi ai bigi gi u te we pakisei a libi fu Yesesi anga a dede di a dede gi u. Di Yesesi be de a goontapu, a be e taigi sama san a den sani di a Kownukondee o du. U lobi den sani di Yesesi be e leli sama fu Beibel. We teke en fu bigi taki Yesesi kon dede gi u fu wi anga Yehofa be  sa toon mati baka. Den sama di e biibi Yesesi abi a howpu fu libi fu teego, den o si den sama fu den di be dede baka tu te den o weki baka (Yoh. 5:28, 29; Rom. 6:23). Wa bun sai fu fende den belesi ya. Wa poi pai Yehofa anga en Manpikin gi den sani di den du gi u (Rom. 5:8, 20, 21). Ma winsi fa wa poi du den sani ya, toku u sa soi taki we teke san Yehofa anga en Manpikin du gi u fu bigi. Faw sa du a sani ya?

4. Fa Maliya Makdalena soi taki a teke a sani di Yesesi be du gi en fu bigi? (Luku a fowtow.)

⁴ Luku a toli fu wan Dyu uman den be e kai Maliya Makdalena. Ná pikin pina a uman ya be e pina, bika seibin ogii yeye be de neen tapu e fooseli en. Kande a be e denki taki sama á de di be o poi yeepi en. Pakisei fa a uman ya be musu poolo di Yesesi puu den ogii yeye neen tapu. Fu di a sani di Yesesi be du gi en be e bigi gi en, meke a toon wan bakaman fu Yesesi. A uman ya be e du ala san a be poi tu, fu holibaka gi Yesesi anga a peleikiwooko (Luk. 8:1-3). A be e bigi gi Maliya tuutuu taki Yesesi be yeepi en, winsi fa aa be sabi taki Yesesi be o du moo gaan sani gi en aini a ten di e kon. Yesesi be o gi en libi fu pai fu den sondu fu den sama di e biibi en, a sani ya o meke den fende a teego libi (Yoh. 3:16). A soi tu taki a sani di Yesesi be du bigi gi en di aa gwe fika en. Di Yesesi be e pina na a ponsu, Maliya be taampu ape tu fu soi taki ai booko en ede anga Yesesi. A be de ape fu toosutu den sama fu Yesesi tu (Yoh. 19:25). Baka di Yesesi dede, Maliya anga tu taa uman bai sumeeswiti fatu fu lobi gi a dede-sikin fu Yesesi fosi a beli (Malik. 16:1, 2). Yehofa pai Maliya fu a sani di a du gi Yesesi. A be gi en a gaandi fu miti anga Yesesi di a weki baka. Yesesi taki anga en tu. A wantu sama namo be fende a okasi ya.​—Yoh. 20:11-18.

5. San a wantu fasi faw sa soi taki we teke san Yehofa anga Yesesi du gi u fu bigi?

 ⁵ Wantu fasi faw sa soi taki we teke san Yehofa anga Yesesi du gi u fu bigi, a te we gi den u ten, u kaakiti, efuso te we gi moni fu holibaka gi a wooko di e du a hii goontapu. U sa yeepi anga a bow wooko di a olikanisâsi e du. U sa yeepi seeka den peesi pe we kon makandaa fu dini Yehofa tu.

6. Saide u sa taki a gi ibii wan fu u Yesesi dede?

⁶ Te we pakisei fa Yehofa anga Yesesi lobi u, da a sani ya e meke u wani du sani fu soi taki u lobi den tu (1 Yoh. 4:10, 19). A sabi di u kon sabi taki Yesesi dede gi ibii wan fu u, e meke u moo lobi den. Na aseefi sani ya apostel Pawlesi be fusutan. A be wani soi taki a sani ya e bigi gi en, neen meke di a sikiifi a biifi gi den Galasiyasama a taki: ‘A Manpikin fu Gadu lobi mi. A dede fu mi ede’ (Gal. 2:20). Fu di Yesesi dede gi u, meke Yehofa be man hali u kon neen fu u sa toon en mati (Yoh. 6:44). Fu di Yehofa si wan bun sani a yu, meke a pai gii anga a moo bun sani di a abi. Bika a wani yu anga en toon mati. Fa a sani ya e meke i fii? Tei pakisei a sani ya, a nai meke i moo lobi Yehofa anga Yesesi noh? Neen meke i mu akisi iseefi taki: ‘San mio du fu soi taki mi lobi Yehofa anga Yesesi?’

7. Tei luku a fowtow, da faw sa soi taki u lobi Yehofa anga Yesesi? (2 Korentesama 5:14, 15; 6:1, 2)

⁷ A lobi di u lobi Yehofa anga Yesesi, e meke u lobi taa sama tu. (Leisi 2 Korentesama 5:14, 15; 6:1, 2.) Wan fasi faw sa soi taki u lobi taawan, a te we du a peleikiwooko fayafaya. U nai paati bee, we peleiki gi ala sama. U nai luku taki a sama ya gudu, efuso pooti, a go a sikoo  efuso aa go a sikoo. Ma we meke moiti fu peleiki gi ala sama winsi sowtu nasi. Te we peleiki gi ala sama di we miti, we du san Yehofa wani u du. Bika a wani ‘ala sowtu sama kon fii, den mu sabi a waaleiti soifili tu’.​—1 Tim. 2:4.

8. Faw sa soi u baala anga sisa taki u lobi den?

⁸ Wan taa fasi faw sa soi taki u lobi Yehofa anga Yesesi, a te u lobi u baala anga sisa (1 Yoh. 4:21). Te u baala anga sisa de a nowtu, we meke moiti fu yeepi den, bika we booko wi ede anga den. Te wan sama fu den dede, we kee pina anga den. We meke moiti fu gi den taanga-sikin. Te den siki, we go luku den. Te den e fii booko-saka we toosutu den (2 Kor. 1:3-7; 1 Tes. 5:11, 14). We begi gi den tu, bika we holi a pakisei taki ‘te wan sama di e libi a wan letifasi e begi anga en hii ati, Gadu e aliki a begi fi en’.​—Yak. 5:16.

9. San a wan taa fasi faw sa soi taki u lobi u baala anga sisa?

⁹ We soi taki u lobi u baala anga sisa te we meke moiti fu libi aini freide anga den. Te u baala efuso sisa du wan sani di hati u, we meke moiti fu gi den paadon leti enke Yehofa. Yehofa be de kabakaba fu sende en Manpikin kon dede gi u fu pai fu u sondu. Neen meke useefi mu de kabakaba fu gi u baala anga sisa paadon tu. Wa wani de enke a ogii saafu aini a ageisitoli fu Yesesi. A man ya be abi fu pai a masaa fi en wan gaan moni, ma a masaa be taigi en taki aa de fu a pai en a moni moo. Ma aseefi man ya á soi tyali-ati gi wan taa saafu di be mu pai en wan pikin moni (Mat. 18:23-35). Efi yu anga i baala efuso sisa pasa wan pikin sani, meke moiti fu meke en bun anga en fosi i go na a Membeefesa (Mat. 5:23, 24). Tei du a sani ya, ye soi taki i lobi Yehofa anga Yesesi tuutuu.

10-11. Fa owluman sa soi taki den lobi Yehofa anga Yesesi? (1 Peitilisi 5:1, 2)

¹⁰ Fa owluman sa soi taki den lobi Yehofa anga Yesesi? Wan pelensipali fasi fa den sa du a sani ya, a te den e luku den sikapu fu Yesesi. (Leisi 1 Peitilisi 5:1, 2.) Na a sani ya Yesesi be taigi Peitilisi. Baka di Peitilisi be taki dii leisi taki aa sabi Yesesi, a be musu wani soi Yesesi taki a lobi en tuutuu. Baka di Yesesi weki baka, a akisi Peitilisi taki: ‘Simon, manpikin fu Yohanisi, i lobi mi?’ Peitilisi be o du ala san a poi fu soi taki a lobi a Masaa fi en. Yesesi taigi Peitilisi taki: ‘Luku den pikin sikapu fu mi’ (Yoh. 21:15-17). Baka di Yesesi taigi Peitilisi a sani ya, en hii libi langa a meke moiti fu solugu den sikapu fu Masaa. A so a soi taki a be lobi Yesesi.

¹¹ Owluman, fai sa soi taki ye wooko anga den sani di Yesesi be taigi Peitilisi? Fai sa du a sani ya a den wiki fosi a Membeefesa anga baka a Membeefesa? Wan fasi fai sa soi taki i lobi Yehofa anga Yesesi, a te yu abi a gwenti fu go luku den baala anga sisa. I mu meke moiti fu yeepi den wan di nai peleiki efuso kon a komakandaa moo, fu daai kon dini Yehofa baka (Eseik. 34:11, 12). I sa poti pakisei a den Beibelsutudi anga den sama di kon a fosi leisi na a Membeefesa tu. A sani ya sa meke den fii a lobi fu Yehofa anga Yesesi. Kande den sa wani toon Yesesi bakaman tu.

12. Saide a sani di Yesesi taki fosi a dede, e gi u taanga-sikin? (Yohanisi 16:32, 33)

¹² A neti fosi Yesesi dede, a taigi den bakaman fi en taki: ‘Tesi o miti wi aini a  goontapu, ma tei ati! Mi wini goontapu kaba.’ (Leisi Yohanisi 16:32, 33.) San yeepi Yesesi fu aa feele di sama be wani du ogii anga en? San yeepi en fu holidoo te enke a dede? A be e fitoow Yehofa. A be sabi taki den bakaman fi en be o miti denseefi sowtu tesi ya, neen meke a akisi Yehofa fu a luku den (Yoh. 17:11). Saide a sani ya e gi u taanga-sikin? Bika Yehofa taanga moo den feyanti fu u (1 Yoh. 4:4). A poi si ala sani. U sa biibi taki efu we fitoow Yehofa, u naw feele. Winsi sai miti u, wo holidoo.

13. Fa Yowsefu fu Alimateya soi taki a be abi deki-ati?

¹³ Luku a toli fu wan man den e kai Yowsefu fu Alimateya. Den Dyu be e lesipeki a man ya, bika en a be wan fu den kuutuman aini a moo gaan kuutu-osu fu den Dyu. Ma a pisiten di Yesesi be e du a peleikiwooko a goontapu ya, a man ya á be abi deki-ati. Yohanisi be taki ‘Yowsefu a be wan disipel fu Yesesi ma aa be wani sama sabi, bika a be e feele den Dyu’ (Yoh. 19:38). Winsi fa Yowsefu be lobi a Kownukondee bosikopu, aa be wani sama sabi taki a be e biibi aini Yesesi. A be e feele taki den sama á be o lesipeki en moo te den be o sabi taki en a wan bakaman fu Yesesi. Ma baka di Yesesi dede, Yowsefu ‘teke deki-ati go akisi Pilatesi a dede sikin fu Yesesi’ (Malik. 15:42, 43). Di a du a sani ya, ala sama be kon sabi taki en a wan bakaman fu Yesesi.

14. Sai mu du efi ye feele san sama o taki?

¹⁴ Tei pakisei a toli fu Yowsefu, ye feele sama enke en son leisi? Tei de a sikoo efuso wooko, ye feele fu taigi sama taki yu a wan Yehofa Kotoigi? Ye daaidaai fu toon peleikiman efuso fu dopu fu di ye pakisei san sama e taki? Ya mu meke den sani ya tapu i fu du sai sabi taki bun. Begi Yehofa fayafaya. Akisi en fu a yeepi i fu du sani enke fa a wani. Te yo si fa Yehofa piki den begi fii, a sani ya o meke yu abi moo deki-ati. I naw feele so moo.​—Yes. 41:10, 13.

15. Baka di Yesesi weki baka, a taki anga den bakaman fi en. San a piisii di den be e piisii be yeepi den fu du? (Lukasi 24:52, 53)

¹⁵ Ná pikin tyali kisi den bakaman fu Yesesi di a dede. Pakisei fai be o fii efii be de ape. Yesesi a be wan bun mati fu den. Boiti dati, den be e denki taki neen a be a sama di be o fii den. Na a sani de  meke a dede fi en be moo hati den (Luk. 24:17-21). Ma baka di Yesesi weki baka, a soi den taki den sani di miti en, be sikiifi aini den Beibel polofeititoli. A yeepi den tu fu fusutan den polofeititoli ya moo bun. Baka dati neen a gi den wan pelensipali wooko fu du (Luk. 24:26, 27, 45-48). Baka 40 dei neen Yesesi go a hemel. A ten de, den bakaman fi en á be e tyali moo, ma den be e piisii bika den be sabi taki Yesesi be de a libi. A be o yeepi den du a wooko di a be gi den fu du tu. Fu di den be e piisii tuutuu meke den be e gafa Yehofa.​—Leisi Lukasi 24:52, 53; Toli 5:42.

16. Faw sa waka a den bakaman fu Yesesi baka?

¹⁶ Faw sa waka a den bakaman fu Yesesi baka? A ná a pisiten fu a Membeefesa wawan u sa dini Yehofa anga piisii, ma na a ala yuu. Fu man du a sani ya, u mu poti a Kownukondee fu Yehofa a fesi. A omen sama kengi a yuu di den be e wooko fu man du a peleikiwooko, fu man go a komakandaa anga fu holi a Osufamii Anbegi ala wiki. Son baala anga sisa fika son sani di sama e si enke pelensipali sani, fu man du moo aini a kemeente. Taawan e foloisi go a pe moo peleikiman de fanowdu. Ala u di e dini Yehofa abi fu holidoo, ma Yehofa paamisi u taki efu we poti a Kownukondee na a fosi peesi, aw belesi u.​—Odo 10:22; Mat. 6:32, 33.

17. San yo du na a ten fu a Membeefesa? (Luku a fowtow.)

¹⁷ Wa poi wakiti fu go na a Membeefesa di o holi a tudewooko 4 april. Ma toku, wa mu wakiti te a ten de doo fosi wo go ondoosuku sani fu a libi fu Yesesi, anga a fasi fa en anga Yehofa soi taki den lobi u. A bun fu sidon pakisei den sani ya den wiki fosi a Membeefesa anga baka a Membeefesa. I sa leisi den sani di sikiifi aini a Saanantongo buku di den kai Studeri Gado Wortu moro fini. Pisi 16 e soi san pasa a lasiti neti di Yesesi be de a goontapu ya. Te ye leisi a pisi ya, luku efii sa fende Beibel tekisi di o yeepi i fu moo teke a sani di Yehofa anga Yesesi du gii fu bigi. Suku tekisi tu di o yeepi i fu moo soi lobi, fu moo abi deki-ati, anga fu moo piisii. Baka dati, pakisei san i sa du ete fu soi taki ye teke a dede di Yesesi dede gii fu bigi. I sa biibi taki Yesesi o teke en fu bigi te aw si a moiti di i meke, fu membee en na a ten fu a Membeefesa.​—Openb. 2:19.