1-2. a) Gurhe rhunachiyunva amango rhwamawaza oku kalamo ka Yesu n’oku kasi kage k’amahubiri? b) Bichi rhwaganirako mu gunola mwazi?

 AMANGO rhwamafisa omuzigirwa werhu, rhunayorha eyi rhuli rhwamukumbula bwenene! Oku burhanzi, hali oku ntacho rhwakayunva aliko rhunayunva malumwa manene eyi rhushuba kuwaza oku siku zageraga embere omuzigirwa werhu afe, ahanene akaba omuzigirwa werhu alilibukire bwenene embere afe. Oku esiku zinali za chichunda, rhwakashuba gwarha obusiime amango rhuli rhwawaza ku chintu chilebe arhubwiraga changwa ech’ajiraga, changwa echintu aderhaga chirhuhebere omurhima changwa charhumaga rhwasheka.

² Konakuguma, binarhubabaza amango rhwamasoma oku bilolere okuntu Yesu alibukaga n’okuntu afaga. Omu maboso m’embere n’enyuma w’Olwibuko, rhunarhola ebisanzi by’okukengeera bwenene oku kamaro nk’enchungu ya Yesu. (1 Ko. 11:24, 25) Aliko, rhunagwarha obusiime bunene amango rhwamawaza oku bintu byoshi Yesu aderhaga n’eby’ajiraga amango aliri hanola oku gulu. Bihebere omurhima amango rhwamawaza oku bilolere bichi Yesu ali ajira zene n’ebi nj’ajira omu mango mayinjire. Okuwaza kw’ebila bintu n’oku buzigire arhugwerheko byakarhushunika rhuyerekane eshukurani omu kalamo kerhu nk’oku rhwabibona mu gunola mwazi.

3. Mpanvu zihe rhugwerhe z’okuyerekana eshukurani yerhu oku bilolere enchungu?

³ Rhunagwarha shukurani nene amango rhwamawaza oku kalamo ka Yesu n’oku lufu lwage. Amango Yesu aliri hanola oku gulu, aliyigirize abantu oku bilolere emigisho Obwami bwa Mungu nji bwabalerhera. Rhunasiima eby’Ebiblia eyigirize oku bilolere enchungu, n’ebintu binja nji yarhulerhera. Rhugwerhe eshukurani nene oku nchungu bulala erhufungulire enjira y’okugwarha  obwira bukomere haguma na Yehova na Yesu. Balala bagwerhe obwemere mu Yesu, banagwerhe obulangalire b’okulama esiku n’amango n’okushuba kubona abazigirwa babo bafire. (Yoh. 5:28, 29; Ro. 6:23) Ntacho rhwajirire mpu yi rhukwanana eyola migisho yoshi; changwa ntacho rhwakabona rhwaha Yehova na Yesu oku bibarhujirire. (Ro. 5:8, 20, 21) Aliko rhwakayerekana kangana gurhe rhugwerhe eshukurani nene. Nka gurhe rhwakajira ntyo?

4. Nka gurhe Maria Magdalena ayerekanaga oku agwerhe eshukurani oku bi Yesu amujiriraga? (Olole efoto.)

⁴ Rhulole omufano g’omukazi muguma w’omuyahudi waliyirikirwe Maria Magdalena. Aliri omu hali ebihire bwenene, aliri alibuzwa na bazimu mushanvu. Akwanene kuba ey’aliri awaza oku ntaye wakagala kumurhabala. Jaga wawaza shukurani ngana gurhe aligwerhe amango Yesu amukula kw’abola bazimu! Eshukurani yage yamushunika abe mwanafunzi wage anakolese ebisanzi byage, emisi n’ebintu akaba agwerhe omu kurhabala oku kasi k’okuhubiri. (Lu. 8:1-3) Chiro akaba oku aligwerhe shukurani nene oku bi Yesu amujiriraga, nkabaga arhalimenyere oku Yesu akashubire kumujirira binene omu mango mayinjire. Akahaanire akalamo kage eju y’abantu, “yi buli muntu wayerekana obwemere muye” agwarha akalamo k’esiku n’amango. (Yoh. 3:16) Aliko, Maria aligenderere kuyerekana eshukurani yage emwa Yesu omu kugenderera kuyorha mwimana. Amango Yesu aliri alibuka oku murhi gw’amalibuko, Maria aliyumangire ahola burhambi bulala alilagire ku Yesu, analilonzeze kurhuliriza abandi baliri ahola burhambi. (Yoh. 19:25) Enyuma y’okufa kwa Yesu, Maria n’abandi bakazi balerha amanukato m’okushiga oku mubiri gwage embere ahambwe. (Mk. 16:1, 2) Yehova alihere Maria luhembo lunene bwenene bulala aliri mwimana ku Yesu. Aligwerhe obusiime b’okubuganana na Yesu amala kufuuka n’okuganira naye, lwari lukengo banene omu banafunzi bage barhapataga.—Yoh. 20:11-18.

5. Gurhe rhwakayerekana eshukurani ku byoshi Yehova na Yesu barhujirire?

 ⁵ Nerhu rhwakayerekana eshukurani ku byoshi Yehova na Yesu barhujirire amango rhuli rhwakolesa ebisanzi byerhu, emisi changwa n’efuranga zerhu omu kurhabala y’akasi k’Obwami kaja embere. Omufano, rhwakarhabala kuyumbaka enju z’okuharamiza mu Yehova n’okurhabala kuzikwiziza.

6. Bulagurhe rhwakaderha oku enchungu luli luhembo lwa buli muguma werhu?

⁶ Amango rhwamabona kangana gurhe Yehova na Yesu barhuzigiire, nerhu rhwanayunva rhushunikirwe kubazigira. (1 Yo. 4:10, 19) Rhunabazigira chiro bwenene amango rhwamamenya oku Yesu afaga eju ya buli muguma werhu. Entumwa Paulo alimenyere echola anayerekana eshukurani yage amango ayandikira Abakristu be Galatiya, aderha ntya: “Mugala wa Mungu . . . walinzigiire nyono anachihaana yewe yenyine eju yani.” (Gal. 2:20) Bulala Yesu arhufirire, Yehova akarhukululira emwage na ntyo rhwakaba bera bage. (Yoh. 6:44) Ka birhasimisize omurhima gwawe okumenya oku Yehova abwene echintu chinja mu woyo anaj’alipa ebeyi lizibuzibu y’ogala kuganjwa omu bera bage? K’echola chirhakomeeze obuzigire bwawe ku Yehova na Yesu? Chechirhumire rhwakachibaza ntya, ‘Bichi obola buzigire bunshunikire njire?’

7. Nk’oku efoto eyerekene, nka gurhe rhweshi rhwakayerekana obuzigire bwerhu ku Yehova na Yesu? (2 Wakorinto 5:14, 15; 6:1, 2)

⁷ Obuzigire bwerhu ku Mungu na Kristu bunarhushunika rhuzigire abandi. (Osome 2 Wakorinto 5:14, 15; 6:1, 2.) Njira nguma rhunayerekanamo obuzigire bwerhu, kuli kugwarha obushiru omu kasi k’amahubiri. Rhunaganira na buli yeshi rhwabuganire. Rhurhaleka kuganira na muntu mulebe mpu bulala rhurharhengere mu buko buguma changwa rangi liguma ly’omubiri. Kandi rhunaganira  na buli yeshi abe achirire changwa ali mukene, abe ey’asomere changwa nanga. Amango rhuli rhwaganira na buli yeshi rhwabuganene naye, eyi rhuli rhwajira obulonza bwa Yehova bulala obulonza bwage buli “oku abantu ba buli buko nji bachunguke n’okugwarha obumenyi b’okunali bw’Echinwa cha Mungu.”—1 Ti. 2:4.

8. Nka gurhe rhwakayerekana obuzigire ku bene-berhu na bali-berhu?

⁸ Rhwakashuba yerekana obuzigire bwerhu ku Mungu na Kristu omu kuyereka obuzigire bene-berhu na bali-berhu. (1 Yo. 4:21) Rhunachihangana rhubashishikale rhunabarhabale omu bibazo byabo. Rhunabarhuliriza amango bafisize omuzigirwa wabo, kandi rhunabarhangula amango balwere, kandi rhunajira oku rhugalire yi rhubaheba omurhima amango bavunikire omurhima. (2 Ko. 1:3-7; 1 Te. 5:11, 14) Rhunabaheba omu masala merhu n’okuyibuka oku “esala ly’okulakirira ly’omunya-kunali lijira emisi.”—Yak. 5:16.

9. Yindi njira ehe rhwakayerekanamo oku rhugwerhe obuzigire ku bene-berhu na bali-berhu?

⁹ Kandi rhunayereka obuzigire bene-berhu na bali-berhu omu kukola bwenene yirhugendereza omurhula haguma nabo. Rhunachihangana kuyiganya omufano gwa Yehova g’okubabalira abandi. Yehova aliri tayari kuleka Omwana wage afe eju y’ebyaha byerhu. Bobola, nerhu rhukwanene kuba tayari kubabalira bene-berhu na bali-berhu amango bamarhugoseza. Rhurhalonzeze kuba kuguma n’olala muja mubi oderherwe omu mugani muguma gwa Yesu. Chiro n’amango n’ahamwabo amubabalira edeni lizibu-zibu aligwerhe, oyola muja afundwa kubabalira owabo muja walimugwerhere deni ligeke bwenene. (Mt. 18:23-35) Akaba hali muntu mulebe omu chibaga murhali mwayunvikana naye, ka wakarhola entambu y’oburhanzi y’okujira omurhula embere muje oku Lwibuko? (Mt. 5:23, 24) Okajira ntyo, wanayerekana ok’ogwerhe obuzigire bunene ku Yehova na Yesu.

10-11. Nka gurhe abashamuka bakayerekana oku bazigiire Yehova na Yesu? (1 Petro 5:1, 2)

¹⁰ Nka gurhe abashamuka bakayerekana oku bazigiire Yehova na Yesu? Enjira nkulu bakayerekanamo obola buzigire, kuli kuhereza entama za Yesu ebi zikenere. (Osome 1 Petro 5:1, 2.) Yesu aliyerekere bwinja-bwinja entumwa Petro echola. Amalire kuhakana kasharhu oku arhenji Yesu, Petro aligwerhe nyorha nene y’okuyerekana oku azigiire Yesu. Enyuma y’okufuuka kwage, alibazize Petro ntya: “Simoni mugala wa Yohana, k’onzigiire?” Rhwakachizera oku Petro akajirire buli chintu y’ayerekana obuzigire bwage ku Waliha wage. Yesu abwira Petro ntya: “Olagire entama zani zidorho.” (Yoh. 21:15-17) N’omu kalamo kage kaliyorhere, Petro aliri ashishikala oku buzigire entama za Waliha wage n’okuyerekana oku alizigiire Yesu.

¹¹ Bashamuka, nka gurhe mwakayerekana oku ebinwa Yesu abwiraga Petro, bili by’akamaro emwenyu, omu maboso m’embere n’enyuma w’Olwibuko? Wakayerekana kangana gurhe ozigiire Yehova na Yesu omu kuchiheberaho ebisanzi buli mango by’okuja kuheba omurhima bene-berhu na bali-berhu, chiro n’okuchihangana omu kurhabala abaholere bagalukire Yehova. (Eze. 34:11, 12) Wakashuba chihangana kuheba omurhima abanafunzi be Biblia n’abandi bantu basimisizwe bahike oku Lwibuko. Rhulonzeze bachiyunve bayegerezwe bulala rhulangalire oku nabo nji baba banafunzi ba Yesu.

12. Bulagurhe okuwaza oku binwa Yesu aderhaga omu budufu bw’embere afe byakarhuha obushiru? (Yohana 16:32, 33)

¹² Omu budufu Yesu afagamo, alibwirire  abanafunzi bage ntya: “Mwahurana amalibuko omu gulu, aliko mukomere! Nahimire egulu.” (Osome Yohana 16:32, 33.) Bichi byalirhabere Yesu agwarhe obushiru amango abanzi bage baliri bamulibuza n’okugenderera kubera mwimana kuhika amango afaga? Alilangalire Yehova. Bulala alimenyere oku abanafunzi bage nabo bakahurene n’amalibuko mali nk’amola, Yesu ahema Yehova agenderere kubalanga. (Yoh. 17:11) Bulagurhe echola chirhuhebere omurhima? Bulala Yehova agwerhe emisi minene kulusha yeshi yeshi omu banzi berhu. (1 Yo. 4:4) Yehova anabona byoshi. Rhumenyere oku rhukalangalira Yehova, arhurhabala rhuhime obuba bwerhu rhunayerekane obushiru.

13. Nka gurhe Yusufu we Arimatea aliyerekene obushiru?

¹³ Rhushambale oku mufano gwa Yusufu we Arimatea. Aliri Muyahudi ogwerhe lukengo lunene bwenene. Aliri w’omu Sanendrine, etribinale nkulu y’Abayahudi. Aliko, amango Yesu aliri akola akasi kage k’amahubiri hanola oku gulu, Yusufu aliyerekene obushiru. Yohana aderhere oku aliri “mwanafunzi wa Yesu omu siri, bulala aliri ayubaha Abayahudi.” (Yoh. 19:38) Chiro akaba oku Yusufu alisimisizwe n’oburhumwa b’Obwami, arhaliyerekere abandi oku agwerhe obwemere mu Yesu. Nkabaga aliyubahire oku barhakachigenderere kumukenga nka bamenyaga oku ali mwanafunzi wa Yesu. Bibe ntyo changwa nanga, Ebiblia erhubwirire oku enyuma y’okufa kwa Yesu, Yusufu ahikira ‘kugwarha obushiru n’okuja embere za Pilato amuhema omubiri gwa Yesu.’ (Mk. 15:42, 43) Arhachilonzaga kubisha oku ali mwanafunzi wa Yesu haba n’akatyu.

14. Bichi okwanene kujira akaba oli walwisa echibazo ch’okuyubaha abantu?

¹⁴ Ka nawe wachigerere kuyubaha omuntu kuguma na Yusufu? Mango maguma oku masomo changwa oku kasi, k’onayunva ogwerhe eshonyi z’okumenyesa abandi ok’oli Muhamirizi wa Yehova? K’oli wagangana kuba muhubiri changwa kubatizwa bulala oyubahire eby’abandi bakaderha? Omenye wayemerera amawazo mali nk’amola makubuze kujira ebintu omenyere oku bili binja. Osalire Yehova n’omurhima goshi. Omuheme akuhe obushiru b’okujira obulonza bwage. Ok’onali wabona oku Yehova ali ashubiza amasala mawe, wakomera n’okugwarha obushiru bunene.—Isa. 41:10, 13.

15. Yesu amalire kurhengerera abanafunzi bage, bichi omwishingo gwabo gwabashunikaga bakole? (Luka 24:52, 53)

¹⁵ Abanafunzi baligwerhe mugayo gunene amango Yesu afa. Waza nka nawe waliri mubo.  Barhahezaga konyine mwira wabo muzigirwa, s’aliko kandi balichiyunvirhe nka bahezeze obulangalire bwabo. (Lu. 24:17-21) Aliko, amango Yesu abarhengerera, abarhabala bayunve nka gurhe ayeneze obulebi bwe Biblia. Aliko kandi abaha akasi k’akamaro k’okujira. (Lu. 24:26, 27, 45-48) Hagerere kasanzi kalebe, Yesu agaluka embingu enyuma wa siku 40, omugayo gw’abanafunzi, gwabaga gwahindamukire m’omwishingo gunene. Baligwerhe mwishingo gunene bulala balimenyere oku Waliha wabo alamire n’oku abarhabala bakole akasi alibahere bakole. Omwishingo gwabo gwabarhabala bakuuze Yehova buzira kuleka.—Osome Luka 24:52, 53; Mdo. 5:42.

16. Nka gurhe rhwakayiganya abanafunzi ba Yesu?

¹⁶ Nka gurhe rhwakayiganya abanafunzi ba Yesu? Rhwakagwarha omwishingo amango rhuli rhwaharamya Yehova arhali omu mango m’Olwibuko monyine s’ahubwe n’omu mwaka goshi. Yirhugala kujira ntyo bihemere oku rhuhebe Obwami bwa Mungu oku nafasi y’oburhanzi omu kalamo kerhu. Omufano, banene bapangire bwinja eprograme yabo y’akasi yi bagala kuja omu mahubiri, kuhika oku mbuganano, n’okujira obuharamye b’omulala oku kahunda. Baguma bachishogere okurhagwarha ebintu by’omubiri abandi babwene oku bili by’akamaro yi bagala kukola bwenene omu chibaga changwa yi bagala kuja kukola ahakenerwe bwenene abahubiri b’Obwami. Chiro akaba oku rhukenere kulembera yirhugenderera kukolera Yehova, arhulaganyize oku arhugisha bwenene rhukahira enyungu z’Obwami oku nafasi y’oburhanzi omu kalamo kerhu.—Mez. 10:22; Mt. 6:32, 33.

17. Bichi ohigirire kujira omu maboso m’embere n’enyuma y’Olwibuko? (Olole efoto.)

¹⁷ Rhulingirize oku nyorha okujira Olwibuko Lwakabiri, Siku 4, Mwezi gwa 4. Aliko birhakuhemere mp’olingirize kuhika amola mango, y’owaza bwenene oku kalamo ka Yesu n’olufu lwage n’obuzigire yewe na Yehova barhuyerekere. Owaze kw’ebyola bintu kanene nk’oku wakanagala omu maboso m’embere n’am’enyuma y’Olwibuko. Omufano, orhole akasanzi k’okusoma n’okukengeera oku bihe byarhengereraga biyerekenwe oku muchoro “Juma la Mwisho la Maisha ya Yesu Katika Dunia” (Eboso ly’Obuzinda ly’Akalamo ka Yesu omu Gulu), guli omu Nyongeza (Enyongezo) B12-A, “Juma la Mwisho la Maisha ya Yesu Katika Dunia” (Eboso ly’Obuzinda ly’Akalamo ka Yesu omu Gulu), guli omu Nyongeza (Enyongezo) B12-B ye Tafsiri ya Ulimwengu Mupya. Ok’onali wasoma oku bilolere akalamo ka Yesu, olonze omu Biblia amandiko makomeze eshukurani yawe, obuzigire, obushiru n’omwishingo. Oje wachihangana kuwaza mu njira zihe wakayerekanamo eshukurani yawe n’omurhima goshi. Wakachizera oku Yesu asiima byoshi oli wajira omu kumuyibuka omu maboso m’embere n’enyuma y’Olwibuko.—Ufu. 2:19.