1-2. (a) Wën mer triwer noo tenke aan Yeesus sayn leepe un preetich, wii khene mer uns xpiire? (b) Was tuun mer in tiise artikel siin?

 WËN mer een keliipte persoon im toot ferliire, kriin mer fiil ferlangre fon tëne. Am aanfang, khene mer uns aarich traurich xpiire wën mer tenke aan te taache eep ti persoon kextorep is, hauptseechlich wën se fiil kelit hot foer sayn toot. Awer mit te tsayt, khene mer froo plaype wën mer tenke aan etwas woo ti persoon uns in kelërnt hot, etwas woo se kesaat orer kemacht hot fer uns uf muute orer wën se uns lache kemacht hot.

² Kraat soo, wën mer leese iwer wii fiil Yeesus kelit hot un iwer sayn toot, kepe mer traurich. Hauptseechlich in te woche foer un noo tëm Aantenke, tuun mer tsayt hoole fer triwer noo tenke aan wii fiil weyert tas fray khaaf opfer hot. (1 Kor. 11:24, 25) Awer meyer xpiire uns froo wën mer tenke aan ales was Yeesus kesaat un kemacht hot wii eyer uf te eyert waar. Es muut uns uf wën mer tenke aan was Yeesus yets am mache is un was eyer fer uns im futuer mache tuut. Too traan tenke un triwer noo tenke aan Yeesus sayn liip tsu uns, tuut uns uf muute unser petanklichkheet in praktixe aate tsayche, wii mer in tiise artikel noch siin tuun.

3. Was fer uersache hon mer fer petanklich fer tas fray khaaf opfer sin?

³ Wën mer triwer noo tenke aan Yeesus sayn leepe un toot, wëre mer petanklich. Wii Yeesus uf te eyert waar, hot eyer ti layt in kelërnt iwer ti kuute tinge woo Kot sayn Raych mache tuut. Un tiise woerheete hon fiil weyert fer uns. Meyer sin petanklich fer tas fray khaaf opfer wayl weeche tas, khene mer een ticht fraayntxaft mit Yeehoowa un Yeesus hon. Tii woo aan Yeesus klaape, hon aach ti hofnung fer eewiche leepe kriin un sayn keliipte  woo kextorep sin, noch mool siin. (Yoo. 5:28, 29; Rom. 6:23) Meyer hon niks kemacht fer tiise seechen fertiine; un meyer kriin nii tsu Yeehoowa un Yeesus tsurik petsaalt ales was se fer uns kemacht hon. (Rom. 5:8, 20, 21) Awer meyer khene tëne tsayche wii petanklich meyer sin. Wii?

4. Wii hot Maria Mataleena petanklichkheet ketsaycht fer was Yeesus fer tëne kemacht hat? (Kuk tas pilt.)

⁴ Kuk mool tas payxpiil fon een yitix fraa woo Maria Mataleena keheest hot. Tii waar aarich fiil am layte, wayl 7 temoone hon se kekweelt. Tsiimlich sicher hot se ketenkt tas nimant se helfe khont. Soo xtel tich mool foer wii petanklich se waar wii Yeesus se pefrayt hot fon te influëns fon tiise temoone. Sayn petanklichkheet hot se uf kemuut Yeesus noo keen un sayn tsayt, kraft un tinge penutse fer Yeesus in te preetich aarwayt uner xtitse. (Luk. 8:1-3) Opwool Maria petanklich waar fer was Yeesus tsu tëne kemacht hat, fiilaycht wust se net tas Yeesus teet was fiil kreeseres im futuer fer tëne mache. Yeesus teet sayn leepe fer ti kans mënxheet kepe, tas ‘yeete eene woo aan tëm klaape teet’, khent eewiche leepe kriin. (Yoo. 3:16) Noch soo, hot Maria sayn petanklichkheet ketsaycht wii se leaal keplip is. Wii Yeesus aan tëm kweel phoste am layte waar, waar Maria tat kewees wayl se sich mit tëm kekhimert hot un wayl se wolt ti anere woo tat waare, treeste. (Yoo. 19:25) Noo Yeesus sayn toot, hon Maria un tswaay anere fraae tinge mit kuute keroch tsum kraap kenom fer Yeesus sayn pekreepnis. (Mar. 16:1, 2) Yeehoowa hot Maria peloont wayl se leaal tsu Yeesus waar. Noo sayn ufxtaye, hot Yeesus Maria ketrof un mit tëne fertseelt — ti meyerste tisipele hate net tiise eer. (Yoo. 20:11-18)

5. Wii tsayche mer tas mer petanklich sin fer ales was Yeehoowa un Yeesus fer uns kemacht hon?

⁵ Wii tsayche mer tas mer petanklich sin fer ales was Yeehoowa un Yeesus fer uns kemacht hon? Meyer khene unser tsayt, kraft un kelt penutse fer tas Raych pay xteen. Meyer khene, tsum payxpiil, helfe in te paueray fon kepaye woo in Yeehoowa sayn aanpeetung penutst sin, un tëne in te ray hale.

6. Warom khene mer saan tas tas fray khaaf opfer een kexenk fer yeete eene fon uns is?

⁶ Wën mer tenke aan wii fiil Yeehoowa un Yeesus uns liipe, sin mer uf kemuut tëne liipe. (1 Yo. 4:10, 19) Unser liip tsu tëne wërt aach tiifer wën mer mërke tas Yeesus fer yeete eene fon uns kextorep is. Te aphostel Phaul hot tas erkhënt un sayn petanklichkheet ketsaycht wii eyer fer ti kalater kexrip hot: “Kot sayn Soon (...) hot mich keliipt un sich fer mich ap kep.” (Kal. 2:20) Wayl Yeesus fer uns kextorep is, hot Yeehoowa tich tsu Tëm ketsoo tas tuu Tëm sayn fraaynt wëre khanst. (Yoo. 6:44) Yeehoowa hot was kuutes in tich kesiin un tee hot te heechste prays petsaalt tas tuu tëm sayn fraaynt wëre khanst. Wërt tayn hërts net fol frooheet wëns tuu too traan tenkst? Tuut tas net tayn liip tsu Yeehoowa un Yeesus ferkreese? Tes weeche, sole mer uns selepst frooe: ‘Was tuut tiise liip mich uf muute se mache?’

7. Tëm noo tas pilt, wii khene mer unser liip tsu Yeehoowa un Yeesus tsayche? (2^te Korinter 5:14, 15; 6:1, 2)

⁷ Unser liip tsu Kot un Yeesus muut uns uf liip fer ti anere tsayche. (Lees 2^te Korinter 5:14, 15 b; 6:1, 2. c) Een aat wii mer tiise liip tsayche khene is flaysich in te preetich aarwayt xafe. Meyer xpreche mit al woo mer trefe. Meyer tuun uns net tsurik hale mit yemant xpreche ploos wayl eyer fon een aner ras orer xtam is. Un meyer xpreche mit ale kaar, ekaal ep se raych un fiil xuul hon, orer aarm un khee xuul hon. Wën mer mit ale kaar xpreche, mache mer Yeehoowa sayn wile, wayl Eyer “wil tas ale sorte layt keret  kepe un een kenau khëntnis fon te woerheet kriin”. (1 Tim. 2:4)

8. Wii khene mer liip fer unser priiter un xwestere tsayche?

⁸ Meyer pewayse aach tas mer Kot un Yeesus liipe wën mer liip tsu unser priiter un xwestere tsayche. (1 Yo. 4:21) Meyer khimere uns mit tëne un meyer tuun se helfe wën se xwiirichkheete mit mache. Meyer treeste se wën se een keliipte im toot ferliire; meyer pesuuche se wën se krank sin, un meyer mache unser pestes fer tëne uf muute wën se traurich sin. (2 Kor. 1:3-7; 1 The. 5:11, 14) Meyer tuun wayter fer tëne peete wayl meyer wise tas “tas eerliche kepeet fon tëm kerechte hot fiil kraft”. (Tya. 5:16)

9. In was fer aner aat khene mer liip tsu unser priiter un xwestere tsayche?

⁹ Meyer tsayche aach liip fer unser priiter un xwestere wën mer uns aan xtrenge fer te friit mit tëne hale. Meyer fersuuche noo mache ti aat wii Yeehoowa ti anere fertsayt. Yeehoowa waar wilich fer se lose sayn Soon weeche unser sinte xtërpe; tes weeche mise mer wilich sin fer unser priiter fertsaye wën se keeche uns sinte. Een mool, hot Yeesus een kexicht iwer een xlecht sklaaw fertseelt. Sayn hër hot tëm sayn mechtich kroos xulte fertsayt; noch soo, waar tiise xlecht sklaaw net wilich fer se fertsaye een aner sklaaw sayn kleen xulte. Meyer wole nii soo wii te xlechte sklaaw sin. (Mat. 18:23-35) Wëns tuu een propleem mit yemant in te kemaynt host, khanst tuu te eyerste xrit kepe fer friit mit tëm mache, eeps tuu tsum Aantenke keest? (Mat. 5:23, 24) Wëns tuu tas machst, tuust tuu pewayse tas tuu een tiif liip tsu Yeehoowa un Yeesus host.

10-11. Wii khene ti elteste liip tsu Yeehoowa un Yeesus tsayche? (1^te Pheeter 5:1, 2)

¹⁰ Wii khene ti elteste tsayche tas se Yeehoowa un Yeesus liipe? Een wichtich tings is Yeesus sayn xeef uf phase. (Lees 1^te Pheeter 5:1, 2.) d Yeesus hot tas taytlich fer te aphostel Pheeter kelos. Noo tas eyer 3 mool kesaat hot tas eyer net Yeesus kekhënt hot, tsiimlich sicher hat eyer een kroose wunx fer se pewayse tas eyer Yeesus keliipt hot. Noo sayn ufxtaye, hot Yeesus fer Pheeter kefroot: “Simon, Yoohan sayn soon, liipst tuu mich?” Sicher teet Pheeter mache ales was eyer khont fer se tsayche tas eyer sayn Hër keliipt hot. Yeesus hot fer Pheeter kesaat: “Fersorich mayn xeefche.” (Yoo. 21:15-17) Un torich te rest fon sayn leepe, hot Pheeter, mit liip, Yeesus sayn xeef uf kephast. Soo hot eyer ketsaycht tas eyer sayn Hër keliipt hot.

¹¹ Elteste, in te woche foer un noo tëm Aantenke, wii khent teyer tsayche tas Yeesus sayn wërter tsu Pheeter wichtich fer aych sin? Teyer khent tsayche wii fiil teyer Yeehoowa un Yeesus liipt wën teyer ayre tsayt penutst fer ti priiter uf muute un wën teyer een kreeser aanxtrengung macht fer se helfe tii woo inatiiw sin, tsurik tsu Yeehoowa khome. (Ese. 34:11, 12) Teyer khent fersuuche ti Piipel xtutënte uf muute un aach anere layt woo tsum Aantenke khome. Meyer wole se hërtslich wilkhome wayl mer hofe tas tii aan fange Yeesus noo keen.

12. Wën mer triwer noo tenke aan Yeesus sayn wërter in te nacht foer sayn toot, kriin mer koraaj. Warom? (Yoohan 16:32, 33)

¹² In te nacht foer sayn toot, hot Yeesus fer sayn tisipele kesaat: “Teyer tuut xwiirichkheet uf te welt mit mache. Awer, sayt koraajich! Ich  hon ti welt iwerkhom.” (Lees Yoohan 16:32, 33.) e Was hot Yeesus keholef koraaj foer sayn faynte tsayche un troy pis sayn toot plaype? Tee hot uf Yeehoowa ketraut. Tee wust tas sayn nookeener teete eenliche proope mit mache; tes weeche hot Yeesus fer Yeehoowa ferlangt tëne uf phase. (Yoo. 17:11) Warom kriin mer koraaj too temit? Wayl Yeehoowa is xtërker wii unser faynte al. (1 Yo. 4:4) Yeehoowa siit ales. Tes weeche sin mer uns sicher tas wën mer uf tëm traue, khene mer torich unser pang triwer wech khome un koraaj tsayche.

13. Wii hot Yoosef fon Arimatëa koraaj ketsaycht?

¹³ Kuk mool tas payxpiil fon Yoosef fon Arimatëa. Ti yuute hon tëm fiil respektiirt. Tee waar een mitkliit fon tëm Sinëtryum, tas yitixe heechste kericht. Awer wii Yeesus uf te eyert kepreeticht hot, waar Yoosef net koraajich kewees. Yoohan hot kesaat tas Yoosef “waar een tisipel fon Yeesus, awer tee hot tas haymlich kemacht, wayl eyer pang fon te yuute hat”. (Yoo. 19:38) Opwool Yoosef interes in te woerheet hat, hot eyer fon te anere ferxtekelt tas eyer aan Yeesus keklaapt hot. Tsiimlich sicher, hat eyer pang tas ti layt tëm net mee respektiire teete wën se tsum wise kreechte tas tee Yeesus sayn tisipel waar. Ekaal ti uersach, ti Piipel saat tas noo Yeesus sayn toot, is Yoosef ‘fol koraaj kep un is foer Pilatus kang un hot Yeesus sayn khërper ferlangt’. (Mar. 15:42, 43) Yoosef hot net mee fersuucht se ferxtekele tas eyer een tisipel waar.

14. Was solst tuu mache wën es xweyer fer tich is torich ti pang fom mënx triwer wech khome?

¹⁴ Tuust tuu als mool, soo wii Yoosef, pang fon te mënxe kriin? In te aarwayt orer in te xuul, tuust tuu als mool tich ferxeeme fer ti anere saan tas tuu Yeehoowa sayn Tsayer pist? Tuust tuu es uf xupe een puplikatoer wëre orer tich taafe lose wayls tuu tich ketanke machst mit was ti anere iwer tich tenke khene? Los net soo sorte xpiirunge tich um hale se mache was tuu weest richtich is. Peet hërtslich tsu Yeehoowa. Ferlang tëm koraaj fer tëm sayn wile mache. Wëns tuu siist wii Yeehoowa tayn kepeete antwort, wërst tuu xtërker un koraajicher. (Isa. 41:10, 13)

15. Noo tas Yeesus fer sayn tisipele tsum foer xayn khom is, was hon se kemacht weeche sayn frooheet? (Lukas 24:52, 53)

¹⁵ Ti tisipele sin aarich traurich kep wii Yeesus kextorep is. Xtel tich mool foer was tuu  xpiire teest wëns tuu soo was mit mache teest. Tii hon net ploos sayn liipe fraaynt, awer aach sayn hofnung ferloer. (Luk. 24:17-21) Awer wii Yeesus tsu tëne tsum foer xayn khom is, hot eyer tëne aus keleet wii eyer ti piiplixe profetsiie erfiilt hot. Tee hot tëne aach een wichtich aarwayt kep. (Luk. 24:26, 27, 45-48) Fërtsich taache xpeeter, wii Yeesus tsurik tsum himel kang is, waare ti tisipele net mee traurich. Tii waare froo wayl tii wuste tas Yeesus am leepe waar un tii wuste aach tas eyer tëne helfe teet ti aarwayt mache woo eyer se kep hat. Sayn frooheet hot se uf kemuut Yeehoowa wayter loope. (Lees Lukas 24:52, 53; f Aph. 5:42.)

16. Wii khene mer Yeesus sayn tisipele noo mache?

¹⁶ Wii khene mer Yeesus sayn tisipele noo mache? Meyer khene frooheet in unser aanpeetung tsu Yeehoowa fine net ploos in te woche foer un noo tëm Aantenke, awer torich tas kanse yoer. Fer tas hin kriin, mise mer Kot sayn Raych im eyerste plats in unser leepe tuun. Tsum payxpiil, fiile hon keënert ti xtune woo se kexaft hon tas se khonte reeklich preetiche, in te fersamlunge keen un ti familye aanpeetung mache. Etliche hon soo kaar net phaar materyaalixe tinge kesuucht woo anere tenke neetich sin, wayl soo khente se mee fer ti kemaynt mache orer sich wanere tsu pletse woo weeniche priiter un xwestere sin. Es is neetich fiil persewerans fer Yeehoowa wayter tiine, awer tee ferxprecht uns fiil seechne wën mer tas Raych im eyerste plats tuun. (Xpr. 10:22; Mat. 6:32, 33)

17. Was pist tuu pextimt se mache in te tsayt fom Aantenke? (Kuk tas pilt.)

¹⁷ Meyer sin hërtslich am waarte tsum Aantenke keen am tiinstaach, 4^te april. Awer tuu net pis tiise taach waarte fer aan Yeesus sayn leepe un toot triwer noo tenke un aach aan te liip woo eyer un Yeehoowa uns ketsaycht hon. Tenk too triwer noo soo oft wiis meechlich is in te woche foer un noo tëm Aantenke. Tsum payxpiil: hool tich tsayt fer leese un triwer noo tenke aan te ewënte fon te tapëla woo im Xtuutyum heftche April fon 2019, sayt 4, xteet. Wëns tuu iwer Yeesus sayn leepe leest, suuch xtike fon te Piipel woo tayn petanklichkheet, liip, koraaj un frooheet ferxtërke. Tan fersuuch se tenke aan spetsiifixe aate wiis tuu tayn petanklichkheet tsayche khanst. Say tich sicher tas Yeesus aarich froo wërt mit te kans aanxtrengung woos tuu machst fer tëm erinere in te tsayt fom Aantenke. (Apo. 2:19)