1-2. (a) Ányị ọ tị́ ka lahị myị́ ụka kahị kụ irya u-uhye nya ọhịhị bala ụkụrwọ nya iJisọsị? (b) Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

 ỤKA ká ọngọ háahị há á gbu hiihi, iwe nya ọngọọwa kaa dahị kaka kpoye! Ụka nya ọgbanyẹ, ọ kaa jụụhị kpoye-kpoye kori kahị kụ irya nya ọjụjụ ọlẹ kọ chịpwụrụ bwu ahyẹẹnụ ịmanyị-ịmanyị ene kọọ gbu. Ma ụka kọ tị nọ chẹẹ, ahị kaa dọmwụ nyọka chị ọkẹkẹnị dụmwọ-dụmwọ ụka kahị kpịtịya nya ẹla ọlẹ ká ọngọọwa họ lee o-ya nyọka kpụ́ụhị ẹjẹ lee ọ-họ kahị ka chị ụmwẹhụ.

² Ụ-ụgbẹyị ọlịnyị-ịnyị, ọ kaa jụụhị ụka kahị ja wa oja nya akama bala igu nya iJisọsị. Ahị kaa kụ irya kpori-kpori u-uhye nya igu nya iJisọsị gụgụ ụka nya ọ-Họ Kpa Kpịtịya. (1 Kọr. 11:24, 25) Ma, ahị kaa chị ọkẹkẹnị ọtụka-ọtụka ụka kahị ja kpịtịya nya ẹla ịlẹ ká iJisọsị họ bala o-ya ụka kọ jam odehe ọlẹ. Ọ kaa kpụhị ịpyọ ịnyịnyị la ọ-ka kụ irya u-uhye nya ang ịlẹ kọ wẹẹ họ lẹẹlẹẹ bala ịlẹ kọ ka họ hahị ị-ịlahị. Jaabwọ kahị wẹẹ ka yẹ ẹ-ẹpwụ nya ang ọjẹ́jẹ ọlẹ, ọ-kụ irya u-uhye nya ang ịlịịwẹ bala ọháha ọlẹ kọ la ẹ-ẹga nyahị ka guhi gbịla nyọka mẹjẹ nyori ẹla nyamwụ myịhị lẹhị.

3. Ịyẹ à tị́ ri ang odudu ká iya ọkịlaakịla nya iJisọsị ka myịhị lẹhị?

³ Ọ kaa myịhị lẹhị ụka kahị kụ irya u-uhye nya ọhịhị bala igu nya iJisọsị. Ụka ká iJisọsị jam odehe ọlẹ, ọ mẹ ang jẹ angịnyị u-uhye nya ahị ọwawa ịlẹ ká Ịpyị-Adịrahụ nya Ohe ka kpa warị. Ẹla ịlẹ ká ịBayịbụụ mẹjẹ u-uhye nya iya ọkịlaakịla nya  iJisọsị bala apyobwuna ịlẹ kahị ka yé háahị yẹẹyẹẹ. Iya ọkịlaakịla ọwẹ myịhị lẹhị chajị ọ wụrụ ụgbẹyị da hahị nyọka jẹ́-ẹ ri igu o-chii ta iJihova bala iJisọsị. Angịlẹ kị la ọmyịmyị ẹ-ẹga nya iJisọsị la ẹhị ọrịrịị-rịrị nyọka hịhị gboyi myị́ oyi bala ọ-ka yẹ angị háa-há ịlẹ kị gbu myị́myị́. (Jọn. 5:28, 29; Rom. 6:23) Áhị jụ ịngịhyẹ họ kpụ ọ-ka ye ahị ọwawa ịwẹ bwu ẹga nya Ohe ka; áhị tị dọmwụ ka jẹ́-ẹ nwụ Ohe bala ịKịrayịsị uri nya ang ịlẹ kị họ hahị kpá ẹnẹnẹhẹ kaka ịnyịnyị. (Rom. 5:8, 20, 21) Ma ahị tị ka jẹ́-ẹ mẹjẹ jaabwọ ká ẹla nyaa myịhị lẹhị kaka ba. Ányị ahị tị́ ka bwu họ ịnyị?

4. Ányị iMeri ọla ịMagịdala a tị́ mẹjẹ nyori ang ọlẹ ká iJisọsị họ họọ myọọ lẹhị? (Yẹ ifoto.)

⁴ Kụ ẹhị yẹ oja nya ọla iJuu ọhẹ ká ẹnyị nyamwụ ri iMeri ọla ịMagịdala wẹẹ. Ọ kaa yẹ akama nya ịlẹhị-ịlẹhị ọọlajị nyọlẹ ká alegu inyibyi irwiye kaa yọọ ụhị. Ọ ka lọọ lala o-ri ọ ka jẹ́-ẹ yé ụbwọ ọdada kaka myị́. Lẹ, kụ irya nya abwọlẹ kọ ka myọọ lẹhị kaka ba ụka ká iJisọsị họ kọ la ịlọmwụ bwu ẹga nya alegu inyibyi ịwẹ wẹẹ! Abwọlẹ kọ myọọ lẹhị kaka ba du kọ dọmwụ nyọka ba iJisọsị jẹ bala ọ-ka kpa ụka, ọngịrị, bala ang ọlala nyamwụ wuu kpa da ụkụrwọ nya iJisọsị ụbwọ. (Luk. 8:1-3) Ịlẹhị lẹ, ang ọlẹ ká iJisọsị họ ha iMeri myọọ lẹhị yẹẹyẹẹ, ma ọ́ tị ka jẹ́ nyori iJisọsị nyị ka họ ang ị-gụ́ ọwẹ gụ họọ ị-ịlahị ka myị́. Ọ ja ka hu ọhịhị nyamwụ ha wọnụ nya angịnyị ehe ju, “chajị ká ọng myị́ ọng ọlẹ kọ myị lọọ” ka la ọhịhị ọmyịmyị-ka. (Jọn. 3:16) Kpọkpọọkpọ, iMeri mẹjẹ nyori ẹla nya iJisọsị myọọ lẹhị bwula o-godayị giri-giri họọ. Ụka ká iJisọsị wẹẹ yẹ akama u-uhye nya okoji ọlẹ kị gwoo ilo ba, iMeri juwa ẹ-ẹga ọọwa chajị ẹla nya iJisọsị gwoo o-olegu, ọ tị tịtọ nyọka kpụ́ angịkịḷa ịlẹ kị juwa ẹjẹ ịnyịnyị. (Jọn. 19:25) Ụka ká iJisọsị gbu kpá, iMeri bala anyang ịkịla kpa ida ochoru kwọkwọ ka iworu nya iJisọsị nyọka ya wọọ. (Mak. 16:1, 2) IJihova wahị kụrụ iMeri yẹẹyẹẹ nyọlẹ kọ nyẹẹkpẹ da iJisọsị ka. Ọ la iwe nyọka yẹ iJisọsị bala ọ-ya ẹla balọọ ụka kọ wuleji  bwula igu kpá. Angịjụgbẹyị ịmanyị-ịmanyị à la iwe ọwẹ myị́ lẹ.—Jọn. 20:11-18.

5. Ányị ahị tị́ ka bwu mẹjẹ nyori ang ịlẹ wuu ká iJihova bala iJisọsị họ hahị myịhị lẹhị?

⁵ Ahị ịnyịnyị ka jẹ́-ẹ mẹjẹ nyori ang ịlẹ wuu ká iJihova bala iJisọsị họ hahị myịhị lẹhị bwula ọ-kpa ụka, ọngịrị, bala okpoko nyahị da ụkụrwọ nya iJihova ụbwọ. Ọ-chụ pwokwita, ahị ka jẹ́-ẹ ya ụbwọ kpụ ịlọhị nyọka da ụbwọ nwụ ebe ị-kpa gbịgba bala ọ-kpahị jwaa.

6. Ịyẹ tị́ du kahị ka jẹ́-ẹ ya nyori iya ọkịlaakịla nya iJisọsị ri āhị ha ọngọngọọng nyahị?

⁶ Ụka kahị kụ irya nya abwọlẹ ká iJihova bala iJisọsị la ọháha ẹ-ẹga nyahị kaka ba, ọ ka guhi gbịla nyọka la ọháha ẹ-ẹga nyaa ịnyịnyị. (1 Jọn. 4:10, 19) Ị tị dọmwụ ka háahị gụ́ ọọwa ụka kahị wẹ ka jẹ́ nyori iJisọsị gbu chajị nyahị kpangga. Ọlẹrụ ịPọlụ ya jaabwọ kọ myọọ lẹhị kaka ba ụka kọ da ụpwụ du kịla Ala ịGalatiya yẹkẹẹ: ‘M̀ há Ọnyẹwẹ nya Ohe Oluhye lụmẹ gbee kọ hu ịlọmwụ kpa kaka kịla iya chajị nyam.’ (Gal. 2:20) Chajị nya iya ọkịlaakịla ọwẹ, iJihọva tụ́ng ba ịlọmwụ chajị ká ka jẹ́-ẹ ri oligu nyamwụ. (Jọn. 6:44) Ọ́ Kpụng ịpyọ nyọka jẹ́ nyori iJihova yẹ ịngịhyẹ ọnyịịla ẹ-ẹga nyang bala ọ-nwụ uri ọtụka-ọtụka chajị ká ka jẹ́-ẹ ri oligu nyamwụ ka? Ọ́ ju ọháha ọlẹ kahị la ẹ-ẹga nya iJihova bala iJisọsị ọngịrị ka? Lẹ ahị ka tọ ịlọhị wo myị́ nyori, ‘Ịyẹ ọháha ọọwa à tị́ ka gum gbịla nyọka họ?’

7. Jaabwọ kahị wẹẹ yẹ i-ifoto, ányị ahị wuu à tị́ ka bwu mẹjẹ nyori ahị la ọháha ẹ-ẹga nya iJihova bala iJisọsị? (2 Ala ịKọrịntị 5:14, 15; 6:1, 2)

⁷ Ọháha ọlẹ kahị la ẹ-ẹga nya Ohe bala iJisọsị kaa guhi gbịla nyọka la ọháha ẹ-ẹga nya angịkịla. (Wa 2 Ala ịKọrịntị 5:14, 15; 6:1, 2.) Ụgbẹyị ọhẹ ọlẹ kahị ka jẹ́-ẹ họ ịnyị ri ọ-ka kpa ẹrụ ọnyịịla pyẹ la ila ọchịchị. Ahị ka ya ẹla je ọng myị́ ọng ọlẹ kahị tọ. Áhị ka be ọngọngọhẹ deeji chajị nyori, ọ bwu ẹpwụma lee epweji  ọkịla ka. Ahị tị kaa ya ẹla bala ọng myị́ ọng kori kị ka ube-ụpwụ lee ị́ kà ka, bala ọ-la ang lee ị́ la ka. Bwula ọ-họ ịnyị, ahị wẹẹ họ ẹla pwoku irya nya iJihova, chajị irya nyamwụ ri, “angịnyị ehe wuu ka chịda bala ọ-ka ri angị jẹ́ ẹla nya ịlẹhị nya Ohe Oluhye yẹẹyẹẹ.”—1 Tim. 2:4.

8. Ányị ahị tị́ ka bwu mẹ ọháha jẹ ẹ-ẹga nya aanahị?

⁸ Ahị kaa mẹ ọháha ọlẹ kahị la ẹ-ẹga nya Ohe bala ịKịrayịsị jẹ bwula ọ-la ọháha ẹ-ẹga nya aanahị alẹng bala anyang ịnyịnyị. (1 Jọn. 4:21) Ahị kaa kpahị jwaa bala ọ-daa ụbwọ ụka nya ịmayẹ. Ahị kaa kpáa ẹjẹ ụka ká ọngịnyị nyaa á gbu, wụlaa yẹ ụka kị jụ ẹdụrụ, bala ọ-maga nyọka jwaa ọhụ ụka ká ọkịlẹtụ á kpaa enyi. (2 Kọr. 1:3-7; 1 Tẹs. 5:11, 14) Ahị kaa kịnyaa la ọ-raabwọ chajị nyaa, chajị ahị kpịtịya nyori “abwọ ọrịrị nya ọlabwẹla ọnyịịla kaa kpa ọngịrị nya Ohe Oluhye hireji.”—Jem. 5:16.

9. Ụgbẹyị ọkịla oyina ahị tị́ ka jẹ́-ẹ mẹ ọháha jẹ ẹ-ẹga nya aanahị?

⁹ Ahị kaa mẹ ọháha jẹ ẹ-ẹga nya aanahị bwula ọ-maga nyọka họ okpunyi balaa. Ahị kaa maga nyọka hịnyọhi jaabwọ ká iJihova kaa họ. Kori ká iJihova á myọnụ nyọka pehi Ọnyị nyamwụ gbu chajị nya ịhọbịrị nyahị, áhị ka hịnyọhi ha aanahị ụka kị họ ọhọbịrị baahị ịnyịnyị ka? Áhị tịtọ nyọka lala ọnchẹ ọlọkwọ ọlẹ ká iJisọsị ya ẹla rụ ẹ-ẹpwụ nya oja ọ-chụ pwokwita nyamwụ ka. Nyọlẹ ká ayịbamwụ tụụbwọ hi uri ọtụka ọlẹ kọ kpa ga họọ kpá, ọwa-á myị tụụbwọ hi uri ọpyịnyẹng ọlẹ ká ọnchẹ ọọnamwụ kpọọ ka. (Mat. 18:23-35) Kori ká o-wo lawụlẹ ka á ji arịrị nyang bala ọngọhẹ ẹ-ẹpwụ nya ọjịra-jịra, à ka jene hu ẹta-ẹdịyẹ nyọka họ okpunyi balọọ ene nya ẹnụ nya ọ-Họ Kpa Kpịtịya myị́? (Mat. 5:23, 24) Ọ-họ ịnyị ka mẹjẹ nyori à la ọháha okpori-kpori ẹ-ẹga nya iJihova bala iJisọsị.

10-11. Ányị angịgbahị nya ọjịra-jịra à tị́ ka jẹ́-ẹ mẹ ọháha jẹ ẹ-ẹga nya iJihova bala iJisọsị? (1 iPita 5:1, 2)

¹⁰ Ányị angịgbahị nya ọjịra-jịra à tị́ ka jẹ́-ẹ mẹjẹ nyori ị la ọháha ẹ-ẹga nya iJihova bala iJisọsị? Ụgbẹyị ọkpọnchị ọhẹ ri ọ-ka kpahị ju angị ri ịkpịlọ nya iJisọsị. (Wa 1 iPita 5:1, 2.) IJisọsị họ ọlẹrụ iPita jẹ́ ẹlẹwẹ gede-gede. Nyọlẹ ká iPita pwa iJisọsị arwarụ ụka ịta kpá, ọ ka há iPita yẹẹyẹẹ nyọka mẹ ọháha nyamwụ jẹ ẹ-ẹga nya iJisọsị myị́myị́. Nyọlẹ ká iJisọsị wuleji bwula igu kpá, ọ tọ iPita wo yẹkẹẹ: “ỊSayịmọn, ọnyị nya iJona ee, m háng nya ịlẹhị-ịlẹhị kpong-kpong?” Ahị ka jẹ́-ẹ ya nyori iPita nyị họ ang myị́ ang ọlẹ kọ ka jụ họ myị́ nyọka mẹjẹ nyori ọ la ọháha ẹ-ẹga nya Ayịbamwụ. IJisọsị byi iPita yẹkẹẹ: “Aa tị tị kpa ịkpịlọ nyam la ang oriri mẹ.” (Jọn. 21:15-17) IPita tị kpahị ju ịkpịlọ nya Ọngọlahị ẹ-ẹpwụ nya ọhịhị nyamwụ wuu ịnyịlẹhị, mẹjẹ nyori ọ mẹ ọháha jẹ ẹ-ẹga nya iJisọsị.

¹¹ Angịgbahị, ányị anụ tị́ ka bwụ mẹjẹ lụka nya ọ-Họ Kpa Kpịtịya nyori ẹla ọlẹ ká iJisọsị byi iPita nyị baba hanụ? Anụ ka jẹ́-ẹ mẹjẹ jaabwọ kanụ la ọháha ẹ-ẹga nya iJihova bala iJisọsị kaka ba bwula ọ-ju aanahị ụga nyọka jwaa ọhụ bala ọ-maga nya ịlẹhị-ịlẹhị nyọka da angị gbile ẹta ẹkpẹ ụbwọ kị ka tịrẹkpẹ wẹ ẹga nya iJihova. (Isi. 34:11, 12) À ka jẹ́-ẹ maga nyọka ju angị wẹẹ jẹ́ ịBayịbụụ bala angịkịla ịlẹ kị wẹ ọ-Họ Kpa Kpịtịya ọhụ ịnyịnyị, chajị ahị dahịhile nyori ị ka wẹ ka ri angịjụgbẹyị nya iJisọsị ẹnẹhẹ wẹẹ.

12. Ịyẹ tị́ du ká ọ-kụ irya ju ẹla ọlẹ ká iJisọsị ya ene kọọ gbu ka ya ugbodu ojuju hahị? (ỊJọn 16:32, 33)

¹² Lodu ọlẹ kọ chịpwụrụ ene nya igu nya iJisọsị, o byi angịjụgbẹyị nyamwụ yẹkẹẹ: “Akama . . . ka wẹ chịnụ ọgụ ẹ-ẹpwụ nya odehe ọlẹ lẹ! Ma, anụ tị la ẹjẹ ọkpụ́kpụ mẹ. Chajị, m  kụrụ odehe ọlẹ wuu wọnụ nyanụ ju lẹ.” (Wa ịJọn 16:32, 33.) Ịyẹ à tị́ da iJisọsị ụbwọ du kọ jẹ́ jahị da aluji nyamwụ la ugbodu ojuju bala ọ-kpa ọmyịmyị nyamwụ kpọọ gbee pwụ ocheju? Ọ kpụnịrọ iJihova ịnyị. Nyọlẹ ká iJisọsị jẹ́ nyori angị bọọ jẹ nyị ka la ịmayẹ ịlịnyị-ịnyị wẹẹ, ọ bịlẹ iJihova kọ ka kpẹhị rịraa. (Jọn. 17:11) Ịyẹ tị́ du ká ọọwa ka ya ugbodu ojuju hahị? Chajị iJihova la ọngịrị gụ́ oluji nyahị ọhẹ-lọhẹ. (1 Jọn. 4:4) IJihova kaa yẹ ang myị́ ang wuu. Ahị jẹ́ myị̀myị̀ nyori kori kahị kpụnịrọọ lẹ aalẹ, ahị ka kụrụ uhihi nyahị kpụ ahị ka ju ugbodu myị́ lẹ.

13. Ányị iJosẹfụ ọla Arịmatiya à tị́ mẹjẹ nyori ọ ju ugbodu?

¹³ Kụ ẹhị yẹ ọ-chụ pwokwita nya iJosẹfụ ọla Arịmatiya lẹẹ wẹẹ. Ọ ri ọngọlẹ ká ala iJuu kaa ju ihi yẹẹyẹẹ. Ọ ri ọngọhẹ ẹ-ẹpwụ nya ala ịKọtụ ọgbẹgbịlẹ nya ala iJuu. Ma, ụka ká iJisọsị jam odehe ọlẹ kọ kaa kpa ẹrụ ọnyịịla pyẹ, iJosẹfụ á ri ọngọ ju ugbodu kpong-kpong lẹka. ỊJọn ya nyori iJosẹfụ nyị “ri ọngọjụgbẹyị nya iJisọsị. Ma, ọ tị kaa kpa ịlọmwụ kwiikwii, chajị nya uhi nya ala iJuu.” (Jọn. 19:38) Ịlẹhị lẹ, ẹla nya Ịpyị-Adịrahụ há iJosẹfụ, ọ́ tị họ angịnyị jẹ́ nyori ọ la ọmyịmyị ẹ-ẹga nya iJisọsị ka. Ọhẹka ọ juhi nyori ụka ká angịnyị-ị́ jẹ́ nyori ọ ri ọngọjụgbẹyị nya iJisọsị lẹ aalẹ, ị́ ka jwoo ihi kaka. Jaabwọ myị́ abwọ kọ la, ịBayịbụụ ya jehi nyori ụka ká iJisọsị gbu kpá, iJosẹfụ la ugbodu ojuju kpụ ọ “kele kaka bịlẹ ịPayịleti ogu nya iJisọsị kọ ka hwoo kpa kaka ju eji.” (Mak. 15:42, 43) IJosẹfụ á maga nyọka tụ́ ịlọmwụ kpịbaa chajị ká angịnyị ka jọ́ọ nya ọngọjụgbẹyị nya iJisọsị ka, ugbẹnyị kaka.

14. Ányị a tị́ ka họ kori á kaa juhi nya angịnyị ehe?

¹⁴ À kaa juhi nya angịnyị ụka ọhẹ lala iJosẹfụ? Ọ kaa lang oyoyi ụka ọhẹ nyọka ya ịlọng dodehe nyori à ri ọngọhẹ nya Alibeenu nya iJihova uube-ụpwụ lee ọ-ọlụkụrwọ? À ja gbile ẹta ẹkpẹ nyọka ri ọngọ kpa ẹrụ ọnyịịla pyẹ lee ọ-ka hu enyi Ohe chajị nyori à juhi nya ẹla ọlẹ ká angịnyị ka ya? A myị ká irya ịlịịwẹ a hung abwọ la ọ-họ ang ọlẹ ká jẹ́ nyị la kpakpa ka. Raabwọ nya ịlẹhị-ịlẹhị ha iJihova. Bịlọọ kọ ya ugbodu ojuju ọlẹ á ka kpa họ irya nyamwụ hang. Jaabwọ ká wẹẹ yẹ nyori iJihova kaa wẹ abwọ ọrịrị nyang, à ka la ọngịrị bala ugbodu ojuju gụ́ ọọwa.—Ayị. 41:10, 13.

15. Nyọlẹ ká iJisọsị hu mẹjẹ angịjụgbẹyị nyamwụ kpá, ịyẹ ọkẹkẹnị à tị́ gwaa gbịla kaka họ? (ILuku 24:52, 53)

¹⁵ Ọ jụ́ angịjụgbẹyị yẹẹyẹẹ ụka ká iJisọsị gbu. Maga ká yẹ ịlọng iiwe-ahụrụ nyaa wẹẹ. Ọ́ ba o-ori oligu ọlịkẹjẹ nyaa gbu kem ka, ọ  laa lala o-ri ahị ọdahile nyị gwaa myị́ ịnyịnyị lẹ. (Luk. 24:17-21) Ma, nyọlẹ ká iJisọsị hu mẹjáa, ọ daa ụbwọ kị ka jẹ́ ụkụrwọ ọlẹ kọ la ka họ ẹ-ẹpwụ nya ọ-họ jịra nya ọmwụ ọyẹyẹ ịla ịBayịbụụ. Ọ ya ụkụrwọ ọkpọnchị ọhẹ haa nyọka họ ịnyịnyị. (Luk. 24:26, 27, 45-48) Ahyẹẹnụ 40 chịpwụrụ ene ká iJisọsị rụ ka epwoohe. Ụka ọwẹ wẹẹ, ọjụjụ nya angịjụgbẹyị nyamwụ yẹ la ọkẹkẹnị ọtụka-ọtụka lẹ. Ị chị ọkẹkẹnị nyọlẹ kị jẹ́ nyori Ayịbaa nyị juwa lahị lẹ bala o-ri nyị nwụlanọ nyọka daa ụbwọ kị ka jụ ụkụrwọ ọlẹ kọ ya jwaa ụ-ụbwọ họ. Ọkẹkẹnị ọọwa gwaa gbịla nyọka gwogbo ha iJihova la ọ-tụ ẹta kẹkpẹ ka.—Wa iLuku 24:52, 53; Ụkụr. 5:42.

16. Ányị ahị tị́ ka bwu gbịla angịjụgbẹyị nya iJisọsị?

¹⁶ Ányị ahị tị́ ka bwu gbịla angịjụgbẹyị nya iJisọsị? Ahị ka jẹ́-ẹ yé ọkẹkẹnị ẹ-ẹpwụ nya ịgba ọgbagba nya iJihova ụka wuu myị́, ọ́ ka ba ụ-ụka nya ọ-Họ Kpa Kpịtịya kem ka. Ọọwa mẹjẹ nyori ahị ka baba nya o-ku Ịpyị-Adịrahụ nya Ohe jene ẹ-ẹpwụ nya ọhịhị nyahị. Ọ-chụ pwokwita, iru nya aanahị nwụ ụka nya ụkụrwọ nyaa họ chajị kị ka jẹ́-ẹ kpa ẹrụ ọnyịịla pyẹ, ka ọjịra-jịra, bala ọ-ka jẹ́ ang nya ugbiyegu ụka myị́ ụka. Angịhyẹ dọmwụ kaa tụụbwọ hi ang-ụdụ ịhyẹ ịlẹ ká angịkịla kaa yẹ nya ang ọbaba, chajị kị ka jẹ́-ẹ họ ụkụrwọ gụ́ ọọwa ọọjịra-jịra lee kị ka jẹ́-ẹ mwụ ka ẹga ọkịla ọlẹ ká ọbaba nya angị kpa ẹrụ ọnyịịla pyẹ ji gụ́. Ịlẹhị lẹ, ahị baba nya ọhụ ọbaba nyọka kịnyaa la ọ-gbịgba ha iJihova, ọ tị myị ọnụ nyọka wahị kụrụụhị yẹẹyẹẹ kori kahị ku Ịpyị-Adịrahụ jene ẹ-ẹpwụ nya ọhịhị nyahị.—Etu 10:22; Mat. 6:32, 33.

17. Ịyẹ a tị́ cheje nyọka họ lụka nya ọ-Họ Kpa Kpịtịya ọlẹ? (Yẹ ifoto.)

¹⁷ Ahị wẹẹ ya ẹhị rịrị gbe ọ-ka họ ọ-Họ Kpa Kpịtịya ẹnụ nya iTusdee, ẹnụtụrụ ohene nya Ọya Ohene. Ma, a godayị gbe ahyẹẹnụ ọwẹ ene ká ka kụ irya u-uhye nya ọhịhị bala igu nya iJisọsị tụ́ ọháha ọlẹ kọ mẹjẹ ẹ-ẹga nyahị ka. Maga ká kụ irya u-uhye nya ẹlẹwẹ ụka myị́ ụka kọ chịkpẹẹ hang ene nya ọ-Họ Kpa Kpịtịya bala ụka kọ myị́ kpá. Maga ká hu ụka nọ nyọka kụ ẹhị yẹ ẹla ịlẹpwụ nya akpa ọla mwb19.4 ẹbẹ 4. Jaabwọ ka wẹẹ họ ịnyị, mwahị nya ẹla ịla ịBayịbụụ ịlẹ kị ka ju ọháha, ugbodu ojuju bala ọkẹkẹnị nyang ọngịrị bala ọ-họ ká ẹla nya iJihova bala iJisọsị ka myịng lẹhị gụ ọọwa. Ọọwa lẹ, à kụ irya u-uhye nya agbẹyị ịhyẹ kpangga ịlẹ ká ka jẹ́-ẹ mẹjẹ nyori ẹlẹwẹ myịng lẹhị bwu ọkịlẹtụ lẹlẹ. Jẹ́ myị̀myị̀ nyori ang myị́ ang ọlẹ ká họ nyọka kpịtịya nya iJisọsị lụka nya ọ-Họ Kpa Kpịtịya ọwẹ ka myọọ lẹhị yẹẹyẹẹ.—Ọwụ. 2:19.