NAʼLEBʼ RE TZOLOK 5
«Li xrahom li Kriist nareechani li qayuʼam»
«Xbʼaan naq li xrahom li Kriist nareechani li qayuʼam […] re naq ebʼ li yoʼyookebʼ inkʼaʼ chik yoʼyooqebʼ yal choʼq rehebʼ» (2 COR. 5:14, 15).
BʼICH 119 Naʼajmank naq kaw qapaabʼal
RUʼUJIL LI TZOLOM a
1, 2. a) Chanru tqekʼa qibʼ xkʼoxlankil li xyuʼam ut li xkʼanjel li Jesús arin saʼ ruuchichʼochʼ? b) Kʼaru tqil saʼ li tzolom aʼin?
NAQ nakamk junaq li qakomon, qʼaxal ra naqekʼa. Maare saʼ xtiklajik, naq wulak re li xkutankil joqʼe kikamk, junes rahil chʼoolejil nayotʼok qe, ma tojaʼ ta chik naq ra kixkʼul naq kikamk. Maare saʼ xnumikebʼ li kutan tchalq saʼ qachʼool junaq li naʼlebʼ li kixbʼaanu re xsahobʼresinkil wiʼ chik saʼ qachʼool, jun eetalil, maare wank kʼaru kixkʼut chiqu, kixye malaj kixbʼaanu re xwaklesinkil qachʼool ut re naq tooxkʼe chi seʼek.
2 Joʼkan ajwiʼ naqekʼa naq naqayaabʼasi chirix li rahilal li kixkʼul li Jesús ut li xkamik. Saʼ xqʼehil li xnimankil li xkamik li Kriist, naqakʼe qahoonal xkʼoxlankil rix naq kixkʼe xyuʼam saʼ qakʼabʼaʼ (1 Cor. 11:24, 25). Abʼan naq naqakʼoxla rix li kixye ut li kixbʼaanu naq kiwank saʼ li ruuchichʼochʼ, qʼaxal naxkʼe xsahil qachʼool. Joʼkan ajwiʼ naxkʼe xkawil qachʼool li yook xbʼaanunkil ut li tixbʼaanu saʼ li kutan chalk re. Saʼ li tzolom aʼin tqil naq xkʼoxlankil rix chixjunil aʼin ut chirix li xrahom li Jesús chiqix, nokoorekʼasi chi bʼanyoxink rikʼin jalan jalanq li naʼlebʼ.
LI BʼANYOXINK NOKOOXTENQʼA XTAQENKIL LI JESÚS
3. Kʼaru ebʼ xyaalal naq naqabʼanyoxi li xkamik li Jesús?
3 Naʼlebʼak chirix li xyuʼam ut li xkamik li Jesús nokoorekʼasi chi bʼanyoxink. Naq kikʼanjelak arin saʼ li Ruuchichʼochʼ, kixkʼut chiruhebʼ li qas qitzʼiin li chaabʼil naʼlebʼ li tixbʼaanu li Xʼawabʼejilal li Yos. Qʼaxal oxloqʼ chiqu li Xʼawabʼejilal li Yos. Naqabʼanyoxi naq kixkʼe li xyuʼam saʼ qakʼabʼaʼ, ut aʼin naxbʼaanu naq tooruuq chi wank choʼq ramiiw li Jehobʼa ut li Jesús. Wi kaw qapaabʼal chirix li xkamik li Jesús wanq qoybʼenihom re wank chi junelik arin saʼ ruuchichʼochʼ ut saʼ jun kutan tqilebʼ ru ebʼ li qakomon li ak xeʼkamk (Juan 5:28, 29; Rom. 6:23). Relik chi yaal, moko qakʼulubʼ ta xkʼulbʼal chixjunil li osobʼtesihom aʼin. Maajunwa tooruuq xtojbʼal re li Qayos ut li Kriist chixjunil li xeʼxbʼaanu chiqix (Rom. 5:8, 20, 21). Abʼan, chanru tqakʼutbʼesi naq qʼaxal naqabʼanyoxi aʼin? Qilaq.
Chanru tatrekʼasi chi bʼanyoxink li kixbʼaanu li xMaría Magdalena? (Chaawil li raqal 4 ut 5).
4. Kʼaru kixbʼaanu li xMaría Magdalena re xkʼutbʼesinkil naq oxloqʼ chiru li kixbʼaanu li Jesús chirix? (Chaawil li jalam u).
4 Li kixkʼul li xMaría Magdalena jun li ixq aj judiiy. Aʼan ra wank chaq xbʼaan naq qʼaxal nachʼiʼchʼiʼiik xbʼaan wuqubʼ li maaʼus aj musiqʼej. Maare kixkʼoxla naq maaʼani naru natenqʼank re. Kʼajoʼ tana kisahoʼk saʼ xchʼool naq kikʼirtasiik xbʼaan li Jesús. Joʼkan naq kiʼok chi xtaqenkil li Kriist, kixkʼe li xhoonal, li xmetzʼew ut li kʼaru re, re xtenqʼankil li Jesús arin saʼ ruuchichʼochʼ (Luc. 8:1-3). Usta li xMaría naxbʼanyoxi chixjunil li kiʼuxk re, abʼan maare inkʼaʼ naxtaw ru chi tzʼaqal li maatan li ok re xkʼebʼal li Jesús. Li Jesús tixkʼe li xyuʼam chirixebʼ li qas qitzʼiin «re naq chixjunil li taapaabʼanq re» twanq xyuʼam chi junelik (Juan 3:16). Li xMaría kixkʼutbʼesi rikʼin li xtiikilal xchʼool naq oxloqʼ chiru li tixbʼaanu li Jesús. Naq wank li Jesús chiru cheʼ li xMaría kikanaak aran xbʼaan naq naxra li Jesús ut naraj xkʼojobʼankilebʼ xchʼool li wankebʼ aran (Juan 19:25). Ut, naq li Jesús wank saʼ li muqlebʼaal kamenaq, li xMaría ut wiibʼ chik li ixq xeʼxkʼam li sununkil bʼan re xyulbʼal li xtibʼel li Jesús (Mar. 16:1, 2). Li Jehobʼa kirosobʼtesi li xMaría xbʼaan li xtiikilal xchʼool. Li Jesús kiril li xMaría ut kiʼaatinak rikʼin naq ak kiwakliik chi yoʼyo. Aʼin jun nimla maatan li moko kʼihebʼ ta xeʼkʼuluk re (Juan 20:11-18).
5. Chanru tqakʼutbʼesi naq oxloqʼ chixjunil li keʼxbʼaanu li Jehobʼa ut li Jesús chiqix?
5 Laaʼo ajwiʼ naru naqakʼutbʼesi naq qʼaxal naqabʼanyoxi chixjunil li kixbʼaanu li Jehobʼa ut li Jesús chiqix. Chanru? Naru naqakʼe li qahoonal, li qametzʼew ut li tumin re li Xʼawabʼejilal li Yos. Jun eetalil, naru naqayeechiʼi qibʼ re xik chi xkabʼlankil malaj xyiibʼankil li napoʼeʼk saʼ ebʼ li naʼaj bʼarwiʼ naqaloqʼoni ru li Jehobʼa.
LI QARAHOM CHIRIX LI JEHOBʼA UT LI JESÚS NAXBʼAANU NAQ TQARAHEBʼ LI JUNCHʼOL
6. Kʼaʼut naqaye naq li xkamik li Jesús aʼan jun li maatan choʼq qe?
6 Naq naqakʼoxla rix li xnimal xrahom li Jehobʼa ut li Jesús chiqix, naqaj ajwiʼ xraabʼalebʼ (1 Juan 4:10, 19). Ut qʼaxal naqarahebʼ naq naqataw ru naq li Jesús kikamk saʼ qakʼabʼaʼ. Oxloqʼ chiru li apóstol Pablo li maatan aʼin. Joʼkan naq kixtzʼiibʼa saʼ li esilhu rehebʼ laj Gálatas: «Li Ralal li Yos [...] kirahok we ut kixqʼaxtesi ribʼ saʼ inkʼabʼaʼ» (Gál. 2:20). Saʼ xkʼabʼaʼ li xkamik li Jesús, li Jehobʼa xatxkʼam chaq re naq tatwanq choʼq ramiiw (Juan 6:44). Ma inkʼaʼ naxtochʼ aachʼool xnawbʼal naq li Jehobʼa kiril laachaabʼil naʼlebʼ ut naq qʼaxal terto kixtoj re naq wanqat choʼq ramiiw? Ma inkʼaʼ tatrekʼasi chi xraabʼal li Jehobʼa ut li Jesús? Joʼkan naq tento tqakʼoxla: «Kʼaru tinrekʼasi chi xbʼaanunkil li rahok aʼan?».
Saʼ xkʼabʼaʼ naq naqara li Yos ut li Kriist, nokoopuktesink rikʼin yalaq ani. (Chaawil li raqal 7).
7. Chanru tooruuq xkʼutbʼesinkil naq naqara li Jehobʼa ut li Jesús, joʼ naʼilmank saʼ li jalam u? (2 Corintios 5:14, 15; 6:1, 2).
7 Li rahok li naqekʼa chirix li Yos ut li Kriist nokoorekʼasi chi xraabʼalebʼ li junchʼol (taayaabʼasi 2 Corintios 5:14, 15; 6:1, 2). Naqakʼutbʼesi aʼin naq nokoopuktesink chi anchal qachʼool rikʼinebʼ chixjunil, maakʼaʼ naxye li xnaʼlebʼebʼ, li xtenamitebʼ ut li xwanjikebʼ. Chi joʼkan nokookʼanjelak rochbʼeen li Jehobʼa, xbʼaan naq «aʼan naraj naq chixjunilebʼ teʼkoleʼq ut toxeʼxtaw ru kʼaru li yaal» (1 Tim. 2:4).
8. Chanru tooruuq xkʼutbʼesinkil naq naqarahebʼ li hermaan?
8 Jun chik li naʼlebʼ bʼarwiʼ tqakʼutbʼesi naq naqara li Yos ut li Kriist aʼan xraabʼalebʼ li qahermaan(1 Juan 4:21). Jun eetalil, naqakʼe qachʼool chirixebʼ ut naqatenqʼahebʼ naq yookebʼ xnumsinkil li chʼaʼajkilal. Naqakʼojobʼebʼ xchʼool naq nakamk jun xkomon malaj ramiiw, naqulaʼanihebʼ naq yajebʼ ut naqabʼaanu chixjunil li wank saʼ quqʼ re xwaklesinkilebʼ xchʼool naq yookebʼ xnumsinkil li rahil chʼoolej (2 Cor. 1:3-7; 1 Tes. 5:11, 14). Joʼkan ajwiʼ nokootijok chirixebʼ xbʼaan naq naqanaw naq «li xtij li tiik xchʼool qʼaxal naʼabʼiik» (Sant. 5:16).
9. Kʼaru jun chik li naʼlebʼ tqabʼaanu re xkʼutbʼesinkil naq naqarahebʼ li qechpaabʼanel?
9 Jun chik li naʼlebʼ bʼarwiʼ naqakʼutbʼesi naq naqarahebʼ li hermaan aʼan naq naqakʼam qibʼ saʼ usilal rikʼinebʼ. Naqayal qaqʼe chi xkuybʼalebʼ xmaak joʼ naxbʼaanu li Jehobʼa. Li Jehobʼa kixkʼe li Ralal re xtojbʼal rix li qamaak. Joʼkan naq, ma inkʼaʼ tqabʼaanu aʼin rikʼinebʼ li qahermaan naq nekeʼmaakobʼk chiqu? Inkʼaʼ naqaj naʼlebʼak joʼ li winq li kiʼaatinak wiʼ li Jesús saʼ li jaljokil aatin. Li winq aʼin kikuyeʼk li xnimla kʼas, abʼan aʼan inkʼaʼ kixkuy xmaak li rechmoosil usta bʼabʼay li xkʼas rikʼin (Mat. 18:23-35). Joʼkan bʼiʼ, wi laaʼat wank junaq aachʼaʼajkilal rikʼin laawechpaabʼanel, patzʼ xkuybʼal laamaak chiru naq toj maajiʼ nawulak xnimankil li xkamik li Jesús (Mat. 5:23, 24). Wi joʼkan taabʼaanu taakʼutbʼesi naq qʼaxal nakaara li Jehobʼa ut li Jesús.
10, 11. Chanru teʼxkʼutbʼesi li cheekel winq naq nekeʼxra li Jehobʼa ut li Jesús? (1 Pedro 5:1, 2).
10 Ebʼ li cheekel winq naru nekeʼxkʼutbʼesi naq nekeʼxra li Jehobʼa ut li Jesús: naq nekeʼxchʼolani ebʼ li xkarneer li Jesús (taayaabʼasi 1 Pedro 5:1, 2). Li Ralal li Yos kixkanabʼ aʼin chi chʼolchʼo ru chiru laj Pedro. Saʼ xkʼabʼaʼ naq laj Pedro kixye oxibʼ sut naq inkʼaʼ naxnaw ru li Jesús naraj xkʼutbʼesinkil naq naxra. Naq ak kiwakliik wiʼ chik chi yoʼyo li Jesús kixpatzʼ re: «At Simón, ralalat laj Jwan, ma qʼaxal nikinaara?». Relik chi yaal, laj Pedro kixbʼaanu raj yalaq kʼaru re xkʼutbʼesinkil naq naxra. Ut li Jesús kixye re: «Chabʼeresihebʼ linkarneer» (Juan 21:15-17). Chalen aran, laj Pedro chi anchal xchʼool kixkʼaakʼalehebʼ li karneer, chi joʼkan kixkʼutbʼesi naq naxra li Jesús.
11 Chanru teʼruuq xkʼutbʼesinkil ebʼ li cheekel winq saʼ xqʼehil li xnimankil li xkamik li Kriist naq chi anchal xchʼool nekeʼraj xbʼaanunkil li kixye li Jesús re laj Pedro? Naru nekeʼxkʼutbʼesi naq qʼaxal nekeʼxra li Jehobʼa ut li Jesús naq nekeʼrulaʼani ebʼ li hermaan ut nekeʼxkʼe xchʼool chirixebʼ li xeʼkehoʼk saʼ li xpaabʼal (Ezeq. 34:11, 12). Joʼkan ajwiʼ, nekeʼxkʼe xchʼool chirixebʼ li yookebʼ xtzolbʼal li Santil Hu ut li nekeʼwulak xbʼeen sut chi xnimankil li xkamik li Jesús. Nekeʼxbʼaanu naq sa teʼrekʼa ribʼ li qas qiitzʼin aʼin ut nekeʼril joʼ aj kʼanjel chiru li Jehobʼa.
LI QARAHOM CHIRIX LI KRIIST NAXBʼAANU NAQ KAWAQ QACHʼOOL
12. Kʼaʼut naxkawresi qachʼool li kixye li Jesús naq jun qʼoqyink chik ma nakamk? (Juan 16:32, 33).
12 Naq jun qʼoqyink chik ma nakamk li Jesús, kixye rehebʼ li xtzolom: «Saʼ li ruuchichʼochʼ teekʼul li rahilal, abʼanan kawaq eechʼool! Laaʼin xinqʼax ru xwankil li ruuchichʼochʼ» (taayaabʼasi Juan 16:32, 33). Kʼaru kitenqʼank re li Jesús re naq kawaq xchʼool naq ebʼ li xikʼ nekeʼilok re xeʼxyeechiʼi xkamsinkil ut tiikaq xchʼool toj saʼ li xkamik? Aʼan xkʼojobʼankil xchʼool rikʼin li Jehobʼa. Li Jesús naxnaw naq ebʼ li xtzolom teʼxnumsi ajwiʼ ebʼ li chʼaʼajkilal aʼin, joʼkan naq kixpatzʼ re li Jehobʼa naq tixkʼaakʼalehebʼ (Juan 17:11). Kʼaʼut naq naxkawresi qachʼool aʼin? Xbʼaan naq li Jehobʼa jwal nim wiʼ chik xwankil chiru chixjunil li xikʼ naʼilok qe (1 Juan 4:4). Yoʼon wank re qatenqʼankil. Chʼolchʼo chiqu naq wi naqakʼojobʼ qachʼool rikʼin li Jehobʼa, tooxtenqʼa chi xqʼaxbʼal li naxkʼe qaxiw ut kawaq qachʼool.
13. Chanru kixkʼutbʼesi laj José aj Arimatea naq kaw xchʼool?
13 Qakʼoxlaq chirix laj José aj Arimatea, wank saʼ xyanqebʼ li xninqal ru aj raqol aatin saʼ xbʼeenebʼ laj judiiy, joʼkan naq oxloqʼinbʼil chaq. Abʼan kixkʼutbʼesi naq kixuwak chiruhebʼ li poyanam naq li Jesús yook chi puktesink. Laj Juan kixye naq aʼan «xtzolom li Jesus (abʼanan chi muqmu xbʼaan xxiw chiruhebʼ laj Judiiy)» (Juan 19:38). Usta xwulak saʼ xchʼool li esil chirix li Xʼawabʼejilal li Yos, kixmuq naq naxpaabʼ li Ralal li Yos. Yook xxiw chirix li teʼxye li poyanam. Abʼan li Santil Hu naxye naq chirix li xkamik li Jesús, laj José «kikawuuk xchʼool chi ok wan wiʼ laj Pilaat ut koxpatzʼ chaq li xtzʼejwal li Jesus» (Mar. 15:42, 43). Laj José inkʼaʼ chik kixmuq li xpaabʼal.
14. Kʼaru tqabʼaanu wi naqaxuwa li teʼxkʼoxla ebʼ li junchʼol chiqix?
14 Ma naqaxuwa ruhebʼ li junchʼol joʼ laj José aj Arimatea? Ma nachalk laaxutaan xyeebʼal saʼ laatzolebʼaal malaj saʼ laakʼanjel naq laaʼat aj testiiw re li Jehobʼa? Ma yookat xkanabʼankil naq tnumeʼq li hoonal naq tatwanq joʼ aj puktesinel malaj naq taasubʼ aawibʼ saʼ haʼ? Maakanabʼ naq xxiwankil li teʼxkʼoxla li junchʼol chaawix tramoq chaawu xbʼaanunkil li us. Tzʼaama re li Jehobʼa naq tatxtenqʼa ut naq tixkʼe xkawilal laachʼool chi xbʼaanunkil li rajom. Kʼajoʼ tixkawresi laachʼool rilbʼal chanru li Jehobʼa naxsume laatij (Is. 41:10, 13).
LI SAHIL CHʼOOLEJIL NOKOOREKʼASI CHI KʼANJELAK CHIRU LI JEHOBʼA
15. Kʼaru xeʼrekʼa ebʼ li xtzolom li Jesús naq xeʼril naq yoʼyo chik? (Lucas 24:52, 53).
15 Naq li Jesús kikamk, jwal kirahoʼk saʼ xchʼool ebʼ li xtzolom. Chan raj ru xaawekʼa laaʼat? Choʼq rehebʼ li xtzolom moko kaʼaj tawiʼ kikamk li xrarookil amiiw xeʼrekʼa naq maakʼaʼ chik ebʼ li roybʼenihom (Luc. 24:17-21). Abʼan moqon li Jesús kixkʼut wiʼ chik ribʼ chiruhebʼ ut kixkʼe xhoonal re xchʼolobʼankil naq saʼ xkʼabʼaʼ aʼan yook chi tzʼaqlok ru ebʼ li propesiiy re li Santil Hu. Joʼkan ajwiʼ, kixkʼe rehebʼ jun li kʼanjel li jwal wank xwankil (Luc. 24:26, 27, 45-48). Naq kinumeʼk 40 kutan, ut li Jesús kitaqeʼk saʼ choxa ebʼ li xtzolom sahebʼ chaq saʼ xchʼool xbʼaan naq nekeʼxnaw naq yoʼyo chik li Jesús ut naq aʼan ttenqʼanq rehebʼ re naq teʼruuq xbʼaanunkil li kʼanjel li keʼkʼeheʼk rehebʼ. Li sahil chʼoolejil aʼan kiʼekʼasink re naq junelik teʼxkʼe xloqʼal li Jehobʼa (taayaabʼasi Lucas 24:52, 53; Hech. 5:42).
16. Chanru tqakʼam qe rikʼinebʼ li xtzolom li Jesús?
16 Chanru tqakʼam qe rikʼinebʼ li xtzolom li Jesús? Tento tookʼanjelaq chiru li Jehobʼa chi saasa qachʼool, moko kaʼaj tawiʼ saʼ xqʼehil li xnimankil li xkamik li Jesús. Re xbʼaanunkil aʼin, aajel ru naq tqakʼe xbʼeenwa li Xʼawabʼejilal li Yos saʼ li qayuʼam. Jun eetalil, wankebʼ nekeʼxjal xhoonal re kʼanjelak re naq teʼruuq xkʼebʼal xkomon xhoonal saʼ li puktesink, re xik saʼ chʼutam ut loqʼonink joʼ junkabʼal rajlal xamaan. Wankebʼ inkʼaʼ nekeʼxik xchʼool chirix li kʼaʼaq re ru, re naq teʼruuq chi tenqʼank chiʼus saʼ li chʼuut malaj xik chi puktesink bʼarwiʼ naʼajmank li tenqʼ. Yaal naq naʼajmank li kuyum re kʼanjelak chiru li Jehobʼa, abʼan naxye qe naq toorosobʼtesi wi naqakʼe xbʼeenwa li Xʼawabʼejilal saʼ li qayuʼam (Prov. 10:22; Mat. 6:32, 33).
Saʼ xqʼehil li xnimankil li xkamik li Kriist, sikʼ laahoonal re xkʼoxlankil chirix li kixbʼaanu li Jehobʼa ut li Jesús chaawix. (Chaawil li raqal 17).
17. Kʼaru tqabʼaanu saʼ xqʼehil li xnimankil li xkamik li Kriist? (Chaawil li jalam u).
17 Naqoybʼeni naq twulaq li kutan martes 4 re abril re xnimankil li xkamik li Jesús. Moko tqoybʼeni ta naq toj twulaq li kutan aʼan re naq tooruuq xkʼoxlankil rix li xyuʼam ut li xkamik li Jesús ut li xrahom li kixkʼutbʼesi aʼan ut li Jehobʼa chiqix. Qoksihaq yalaq kʼaru li hoonal saʼ xqʼehil li xnimankil li xkamik li Kriist re xbʼaanunkil aʼin. Jun eetalil, naru taasikʼ laahoonal re xtzʼilbʼal rix ebʼ li naʼlebʼ li natawmank saʼ xhuhil li qachʼutam Qayuʼam ut Qakʼanjel joʼ aj Paabʼanel abril 2019 perel 4 bʼarwiʼ naxye «Chanru tqakawresi qibʼ re xnimankil li xkamik li Jesús?». Sikʼ ebʼ li raqal re li Santil Hu li ttenqʼanq aawe chi xkʼutbʼesinkil li kawil chʼoolej, li bʼanyoxink, li rahok ut li sahil chʼoolejil. Kʼoxla chan raj ru tatruuq xkʼutbʼesinkil naq nakaabʼanyoxi chi anchal laachʼool li kixbʼaanu li Jesús. Chʼolchʼooq chiqu naq: oxloqʼ chiru li Jesús chixjunil li tqabʼaanu re xjultikankil li xkamik (Apoc. 2:19).
BʼICH 49 Qasahobʼresihaq li xchʼool li Jehobʼa
a Saʼ xqʼehil li xnimankil li xkamik li Kriist, nekeʼxwaklesi qachʼool re xkʼoxlankil rix li xyuʼam ut li xkamik li Jesús, joʼkan ajwiʼ chirix li rahok li naxkʼutbʼesi chiqu li Jehobʼa ut li Jesús. Aʼin nokoorekʼasi chi kʼanjelak chiru li Jehobʼa. Li tzolom aʼin tixtzʼil rix chanru tqakʼutbʼesi naq naqabʼanyoxi naq li Jesús kixkʼe li xyuʼam saʼ qakʼabʼaʼ joʼ ajwiʼ chirix li xrahom li Jehobʼa ut li Jesús. Joʼkan ajwiʼ nokoorekʼasi chi xraabʼalebʼ li hermaan, re naq kawaq qachʼool ut kʼanjelak chiru li Jehobʼa rikʼin sahil chʼoolejil.
