1-2. (a) Thwanga yowa thuthi thukalengekania okwa ngebe n’omubiiri wa Yesu ow’erithulira? (b) Thukendi kania okuki omo mwatsi ono?

 THWAMAHOLERWA ow’okw’ithwe, thukamukandira kutsibu! Okw’itsuka, thwanganabya omwa bulhumi thukalengekania okwa biro biwe by’erighunzerera iniakisiya iniaholha, kwilhabirirya amabya imwaghalhwa kutsibu athali aholha. Aliwe endambi yikahika, ithwatsuka eribana etseme thukalengekania okwa kindu eky’athukangiriraya kutse eky’akolha kutse eribugha akathuhimba kutse erithutsemesya.

² Omwa nzira iyan’eyo, kikathw’itha bulighe thukasoma okw’ighalhwa n’olhuholho lhwa Yesu. Omwa buthuku bw’Eryibuka, kutsibu-tsibu thukahirawa mw’omuhwa w’erihiraho endambi y’erilengekania okwa mughaso munene ow’ekihongo kiwe eky’endongolya. (1 Kor. 11:24, 25) Aliwe, thukabana etseme nene thukalengekania okwa byosi ebya Yesu abugha n’erikolha iniane okwa kihugho. Kandi thukahirawa mw’omuhwa thukalengekania okwa by’anemukolha lino n’eby’akendi syathukolera omwa buthuku obukasa. Erighanirya okwa bindu ebi n’olhwanzo olhw’athuwithire byangana thuhira mw’omuhwa w’erikangania erisima lyethu omwa mikolere, ngoku thukendi lhangira omo mwatsi ono.

3. Ni nzumwa syahi esyanga leka ithwasima endongolya?

³ Thukasima thukalengekania okwa ngebe ya Yesu n’olhuholho lhwiwe. Omw’ithulira liwe okwa kihugho, Yesu mwabwira abandu okwa mighisa eyo Obwami bwa Nyamuhanga bukendi  syaletha. Thukasima kutsibu ekwenene y’Obwami eyi. Thukasima kutsibu endongolya kundi yikathukyungulira enzira y’erithungiramu obunywani bw’ahakuhi na Yehova na Yesu. Abak’ikiriraya omu Yesu kandi bawithe amaha w’erisyabyaho kera na kera n’aw’erilhangira abanzwa babu bakalhubuka. (Yn. 5:28, 29; Abar. 6:23) Sithuwithe ekya thwakolire eritholera emighisa eyi; kutse sithuwithe ekya thwanga thuha Nyamuhanga na Kristo busana n’ebya babirithukolera. (Abar. 5:8, 20, 21) Aliwe thwangana kangania nga thukabasima bungahi. Thuthi?

4. Maria Magdalene mwakangania athi kw’akasima ebya Yesu amukolera? (Lebaya ekisasani.)

⁴ Thalengekania okwa ky’erileberyako ky’omukali Omuyuda oyukahulhawamo Maria Magdalene. Abya iniabiryaghalhwa kutsibu busana n’esyombinga musanju esyabya sikamunubya. Atholere eribya imwayowa nga sihakiri mulhamu. Neryo thalengekania nga mwasima bungahi Yesu akamulhusya kw’esyombinga esyo! Erisima liwe mulyaleka iniakwama Yesu n’erimusighika omw’ithulira liwe omw’ikolesya endambi, akaghalha, n’eby’awitheko. (Lk. 8:1-3) Nomwakine indi Maria mwasima kutsibu ekya Yesu amukolera, angabya imwathayitheghererya ekihembo kinene kya Yesu ekyabya ikikayasa. Yesu angahereyo engebe yiwe busana n’abandu, “neryo oyukamwikiriraya” angabwene engebe y’erikotha. (Yn. 3:16) Nomwabine, Maria mwakangania kw’akasima Yesu omw’isighalha muthaleghulha. Yesu inianemwaghalhwa okwa muthi w’amaghali, Maria abya inianeho erimusighika kuthya n’abandi. (Yn. 19:25) Yesu abere abiriholha, Maria n’abandi bakali babiri mubaletha amanukato okw’isinda awakendi kolesibwa akatsikwa. (Mk. 16:1, 2) Maria mwatsumulhwa kutsibu busana n’obuthaleghulha bwiwe. Mwatsema akabanangana na Yesu n’erikania nayu iniabirilhubuka​—olhusunzo olhwa abangyi b’okwa bigha bathabana.​—Yn. 20:11-18.

5. Thwanga kangania thuthi ku thukasima ebyosi ebya Yehova na Yesu babirithukolera?

 ⁵ Nethu thwangana kangania ku thukasima ebyosi ebya Yehova na Yesu babirithukolera omw’ikolesya endambi yethu, akaghalha, n’esyosente erisighika omubiiri w’Obwami. Ng’eky’erileberyako, thwangana yihayo eriwathikya okwa buhimbe n’erisugha amanyumba w’eriramya ly’okwenene.

6. Busana naki ithwabugha thuthi endongolya ni kihembo okwa buli mundu ahabw’iwe?

⁶ Thukabya thukalengekania okwa lhwanzo lhungaha olhwa Yehova na Yesu bathuwithire, kikaleka nethu ithwabanza. (1 Yn. 4:10, 19) Thuk’ongera eribanza thukaminya ngoku Yesu mwaholha busana nethu. Omukwenda Paulo mwaligha eki kandi mwakangania erisima liwe akahandikira Abanya Galatia, athi: ‘Mughalha wa Nyamuhanga, mwanyanza, n’eriyiha busana naghe.’ (Gal. 2:20) Busana n’endongolya, Yehova abirikuletha okw’iyo nuku wangabya munywani wiwe. (Yn. 6:44) Mbwino sikirikutsemesaya eriminya ngoku Yehova abirikulhangiramo ekindu kibuya kandi ngoku mwaliha ekindu ky’obughuli bunene nuku wughanzawe mwa munywani wiwe? Mbwino sikirighumaya olhwanzo olhwa wuwithire Yehova na Yesu? Thukakolha ndeke thukayibulya thuthi, ‘Olhwanzo olho lhukendi nyisukuma erikolhaki?’

7. Ngoku kiri omwa kisasani, ithwe bosi thwanga kangania thuthi olhwanzo olhwa thuwithire Yehova na Yesu? (2 Abanya Korinto 5:14, 15; 6:1, 2)

⁷ Olhwanzo olhwa thuwithire Nyamuhanga na Kristo lhukaleka ithwanza abandi. (Soma 2 Abanya Korinto 5:14, 15; 6:1, 2.) Enzira nguma eya thukakanganirayamu olhwanzo lhwethu ly’erisangira omw’ithulira n’omuhwa. Thukakanaya n’obuli mundu oyo thukeghaya. Sithuli solholha owosi-wosi busana  n’erangyi yiwe, ekihanda, eby’awitheko, kutse eyo alhuire. Omwa nzira eyi, thukakolha erikwamana n’ekighendererwa kya Yehova eky’erianza “abandu abosi balhamibawe, n’eriminya ndeke omwatsi w’ekwenene.”​—1 Tim. 2:4.

8. Thwanga kangania thuthi ku thwanzire balikyethu?

⁸ Kandi thukakanganaya olhwanzo olhwa thuwithire Nyamuhanga na Kristo omw’ikangania balikyethu b’olhwanzo. (1 Yn. 4:21) Thukabatsomana kutsibu n’eribawathikya bakabana ebitsibu. Thukabahumulikanaya bakaholerwa, ithwababungira bakalhwalha, n’erikolha ngoku thwanga thoka eribahimba omughulhu babbunikire muthima. (2 Kor. 1:3-7; 1 Tes. 5:11, 14) Thukalholha embere eribasabira, ithun’ibukire ngoku “erisaba ly’omundu muthunganene likathoka mwatsi munene.”​—Yak. 5:16.

9. Ni yindi nzira yahi eya thwanga kanganiryamo ku thwanzire balikyethu?

⁹ Kandi thukakanganaya ku thwanzire balikyethu omw’ikolha kutsibu eribya buholho nabu. Thukalengaho erigherererya eky’erileberyako kya Yehova eky’erighanyira. Yehova amabya imwanathalighira Mughalha wiwe eriholha busana n’ebibi byethu, mbwino nethu sithwangabya ithunayitheghekire erighanyira balikyethu bakathusoberya? Sithwanganza eribya ng’omughombe mubi oyukanibweko omwa mughuma w’okwa misyo ya Yesu. Nomwakine indi mukama wiwe abya iniabirimughanyira eribanza liwe linene, omughombe oyo mwalemwa erighanyira omughombe mulikyabu oyuwabya mw’eribanza liwe like kutsibu. (Mt. 18:23-35) Wamabya iwuwithe erithendi yitheghererania n’omundu mulebe omwa kithunga, mbwino siwanga kolha ekiika ky’erimbere eky’erihiraho obuholho wuthe wahindana okw’Ibuka? (Mt. 5:23, 24) Erikolha ekyo ikikendi kangania olhwanzo lhunene olhwa wuwithire Yehova na Yesu.

10-11. Abasyakulhu banga kangania bathi ku banzire Yehova na Yesu? (1 Petero 5:1, 2)

¹⁰ Abasyakulhu banga kangania bathi ku banzire Yehova na Yesu? Enzira ngulhu ly’eritsomana ebiyithawa by’esyombuli sya Yesu. (Soma 1 Petero 5:1, 2.) Yesu mwawathikya omukwenda Petero eriyitheghererya enzumwa eyo ya ndeke. Abere abirighana Yesu emirundi isathu, Petero angabya imwanza kutsibu erikangania kw’anzire Yesu. Neryo Yesu abere abirilhubuka, mwabulya Petero athi: “Simoni mughalha wa Yoane, wunanyanzire kwehi?” Ahathe erithika-thika Petero angakolire ekyosi-kyosi erikangania kw’anzire Mukama wiwe. Yesu mwabwira Petero athi: “Wutheghaye ebyana by’esyombuli syaghe.” (Yn. 21:15-17) Kandi omwa ngebe yiwe yosi, Petero mwatsomana kutsibu esyombuli sy’Omukama, erikangania kw’anzire Yesu.

¹¹ Abasyakulhu, mwanga kangania muthi ngoku ebinywe ebya Yesu abwira Petero ni bikulhu embere syenyu omwa buthuku bw’Eryibuka? Mwangana kangania nga mwanzire Yehova na Yesu ba bungahi omw’ibungira balikyenyu mughulhu wosi n’erihiraho akaghalha k’embaghane eriwathikya ababirisebebera erisuba oku Yehova. (Eze. 34:11, 12) Kandi mwangana tsomana abigha be Biblia n’abahyaka abakasa okw’Ibuka omw’ikolha ekyosi-kyosi nuku abangana syabya bigha aba bayowe buholho.

12. Busana naki erilengekania okwa binywe ebya Yesu abugha omw’ithumbi athali aholha kikathuha obuthubaha? (Yoane 16:32, 33)

¹² Omw’ithumbi athali aholha, Yesu mwabwira abigha biwe athi: “Omo kihugho  mwasyabana eriendereribwa. Nikwa muhande emithima! Nabirikinda ekihugho!” (Soma Yoane 16:32, 33.) Ni kyahi ekyawathikaya Yesu erimanira buthubaha esyonzighu siwe n’erisighalha muthaleghulha erihika okwa lhuholho? Mwayikethera Yehova. Busana n’eriminya ngoku abigha biwe bangabwene erilengwako ng’eryo, Yesu mwasaba Yehova athi atheghayebo. (Yn. 17:11) Busana naki eki kikathuha obuthubaha? Kundi Yehova awithe amaaka kwilhaba enzighu yethu yosi-yosi. (1 Yn. 4:4) Sihali ekikamulhaba okwa meso. Thukaligha ngoku thwamayikethera Yehova, ithwangana singura obuba bwethu kandi ithwakangania obuthubaha.

13. Yozefu owe Arimatea mwakangania athi obuthubaha?

¹³ Thalengekania okwa ky’erileberyako kya Yozefu owe Arimatea. Ini mulhume oyusikibirwe kutsibu omwa Bayuda. Abya mughuma w’okwa b’omw’Ibuyiro, ekoti ngulhu y’Abayuda. Aliwe omw’ithulira lya Yesu okwa kihugho, Yozefu mwalemwa erikangania obuthubaha. Yoane mwabugha athi “abya mwigha wa Yesu, nikwa omo bubiso-biso, busana n’eryubaha Abayuda.” (Yn. 19:38) Nomwakine indi Yozefu mwatsemera omwatsi w’Obwami, mwathanza abandi bakaminya kw’abir’ikirirya Yesu. Ahathe erithika-thika mwasagha athi angaherirye ekitsumbi ekyo aby’awithe. Mbulha ni kyahi, e Biblia yikathubwira yithi Yesu abere abiriholha, erighunzerera Yozefu “mwahanda omuthima mwaya eyiri Pilato n’eribulya omubiri wa Yesu.” (Mk. 15:42, 43) Yozefu erisighika Yesu abya isyakiri mwatsi w’embiitha.

14. Wutholere iwakolhaki wamabya iwukasagha abandu?

¹⁴ Nga Yozefu, wune wathasagha abandu? Okwa sukuru kutse okwa mubiiri, mbwino hakanayira iwasagha eriyiminyikalya ng’Omwema wa Yehova? Mbwino wukasagha eribya muthuliri kutse eribatizibwa kundi wukabulha abandi nga bakendi ku lengekaniako bathiki? Isiwalighira eriyowa ng’eryo likakulemesya erikolha ekya wunasi ku kihikire. Erilhua okwa muthima, bwira Yehova y’eriyowa lyawu. Musabe wuthi akuhe obuthubaha bw’erikolha erisonda liwe. Wukendibya wukalhangira ngoku Yehova akasubiraya emisabe yawu, wukendi ongera erighuma n’eryongera eribya muthubaha.​—Isa. 41:10, 13.

15. Yesu abere abiributhukira okwa bigha biwe, etseme yabu muyaleka ibakolhaki? (Luka 24:52, 53)

¹⁵ Abigha mubabya omwa bulighe bunene Yesu akaholha. Thayihira omwa bisandu byabo. Mubaholerwa munywani wabu mwanzwa  kandi mubayowa nga sibakiwithe amaha. (Lk. 24:17-21) Aliwe, Yesu abere abiribabuthukirako, mwaghunza buthuku iniane mubawathikya eriyitheghererya olhukwamirwa lhwiwe omw’iberererya amaminyereri we Biblia. Kandi mwabaha omubiiri mukulhu ow’erikolha. (Lk. 24:26, 27, 45-48) Aho Yesu asubira elhubulha enyuma w’ebiro 40, obulighe bw’abigha bwabya ibwabirihinduka mw’etseme nene. Eriminya ngoku Mukama wabu aneho kandi ngoku anayitheghekire eribawathikya eriberererya omubiiri wabu muhyaka mukyaleka ibatsema. Etseme yabu muyaleka ibapipa Yehova ahathe eribikyako.​—Soma Luka 24:52, 53; Emib. 5:42.

16. Thwanga gherererya thuthi abigha ba Yesu?

¹⁶ Thwanga gherererya thuthi abigha ba Yesu? Thwangana bana etseme omw’iramya Yehova butsira omwa buthuku bw’Eryibuka lisa aliwe omo mwaka wosi. Eki kikathuyithaghisaya erihira Obwami bwa Nyamuhanga bw’embere. Ng’eky’erileberyako, abangyi babirikolha embinduka omwa ndegheka yabu y’omubiiri nuku basangire omw’ithulira, erihindana okwa mihindano, n’erisangira omw’iramya ly’eka mughulhu wosi. Abandi erithoka eryongera eribya b’omughaso omwa kithunga kutse eriyakolera eyiri obuyithawa bunene bw’abathuliri b’Obwami, babirithwamu erithendibya n’ebindu by’ekinyamubiri ebyo abandi bakalengekanaya bathi bikayithaghisibawa. Nomwakine indi thukayithagha eriyiyinia erilholha embere erikolera Yehova, akayilhagha erisyathuhemba ndeke thwamahira Obwami bw’embere.​—Emi. 10:22; Mt. 6:32, 33.

17. Wamathwamu erikolhaki omwa buthuku bw’Eryibuka buno? (Lebaya ekisasani.)

¹⁷ Thulindirire kutsibu erisyahindana okw’Ibuka Kyakabiri biro 4 Okwakani. Aliwe, isithwalinda erihika aho ekiro ekyo kikendi hikira imuthwalengekania okwa ngebe n’olhuholho lhwa Yesu n’olhwanzo olhwa iyo na Yehova babirithukangania. Kolesaya akaghisa kosi-kosi erikolha ekyo omwa buthuku bwosi bw’Eryibuka. Ng’eky’erileberyako, hiraho endambi y’erisoma n’erighanirya okwa myatsi eyiri omwa chati “Eyenga y’Erighunzerera ey’Engebe ya Yesu Okwa Kihugho,” eyiri omwa mwb19.4 olhup. 4-5. Wukakolha ekyo, sondaya emyatsi ye Biblia eyikendi ghumya erisima lyawu, olhwanzo, obuthubaha, n’etseme yawu. Neryo lengekanaya okwa syonzira ndebe esyo wanga kanganiryamu erisima lyawu erikalhua okwa muthima. Wukiminye ngoku Yesu akendi lhangira ebyosi ebya wukakolha erimw’ibuka omwa buthuku bw’Eryibuka buno mwa by’obughuli.​—Erib. 2:19.