၁-၂. (က) ဖဲ​ပ​ဆိမိၣ်ထံ ယ့ၣ်ၡူး​အတၢ်အိၣ်မူ ဒီး​အတၢ်စံၣ်တဲၤတဲ​​လီၤ​တၢ်မၤ အဂ့ၢ်​ခါန့ၣ်​ ပ​တူၢ်​​ဘၣ်​ဒ်လဲၣ်. (ခ) လၢ​တၢ်မၤလိ​တခါအံၤန့ၣ်​ ပ​က​တဲသကီး တၢ်ဂ့ၢ်​မနုၤလဲၣ်.

 ပှၤလၢ​ပ​အဲၣ်​တဂၤ မ့ၢ်​သံသဒၣ်ကွံာ်​ပှၤန့ၣ်​ ပ​သးသယုၢ်​အီၤ​ဒိၣ်မး. ပ​မ့ၢ်​ဆိမိၣ်က့ၤ တၢ်ဆၢကတီၢ်​ဖဲ ပှၤလၢ​ပ​အဲၣ်​တဂၤ ဘူးထီၣ်​က​သံ​အခါ အ​​ဘၣ်​တူၢ်တၢ်​နးမးန့ၣ်​ ပ​သး​တမုာ်​နီကၠဲးဘၣ်. ဘၣ်ဆၣ်​လၢခံ ပ​မ့ၢ်​နီၣ်ဘၣ်က့ၤ တၢ်​လၢ​အသိၣ်လိ​ပှၤ, တၢ်​လၢ​အတဲဝဲ ဒီး​မၤဝဲန့ၣ်​ ပ​က​သးခုထီၣ်က့ၤ.

^၂ ပ​မ့ၢ်​ဖးဘၣ်​ ဘၣ်ဃးဒီး ယ့ၣ်ၡူး​ဘၣ်တူၢ်တၢ် တချုး​အသံဒံးဘၣ်န့ၣ်​ ပ​သး​တမုာ် စ့ၢ်ကီး​ဘၣ်. ဒီး​ဖဲ​တၢ်သ့ၣ်နီၣ်ထီၣ်က့ၤ​အမူး တလါန့ၣ်​ ပ​ဆိမိၣ်​ဘၣ်ဃးဒီး ယ့ၣ်ၡူး​အတၢ်အိၣ်မူ လီၤဆီဒၣ်တၢ် အတူၢ်သံသး​လၢ က​ပှ့ၤက့ၤ​ပှၤ​အဂီၢ်. (၁ ကရံၣ်သူး ၁၁:၂၄, ၂၅) နာ်က့ ဖဲ​ပ​ဖး​တၢ်ဂ့ၢ် ဘၣ်ဃးဒီး တၢ်​လၢ​ယ့ၣ်ၡူး တဲ​​ဝဲ​ဒီး​မၤဝဲ ဖဲ​အအိၣ်လၢ ဟီၣ်ခိၣ်ချၢ​အခါန့ၣ်​ ပ​သးခုထီၣ်က့ၤ​ဒိၣ်မး. ဒီး​ဖဲ​ပ​ဆိမိၣ်ထံ ဘၣ်ဃးဒီး တၢ်​လၢ​ယ့ၣ်ၡူး မၤ​​ဝဲ​လၢပဂီၢ်​ခဲအံၤ ဒီး​ကမၤ​​ဝဲ​လၢ ခါဆူညါန့ၣ်​ ပ​သးဆူၣ်ထီၣ်ညါ. ပ​မ့ၢ်​ဆိမိၣ်ထံ တၢ်​လၢ​ယ့ၣ်ၡူး​မၤန့ၢ်​ပှၤ ဒီး​အတၢ်အဲၣ်​ပှၤ​အဂ့ၢ်န့ၣ်​ က​မၤစၢၤ​ပှၤလၢ ပ​ကဘၣ်သး ပာ်ဖျါထီၣ်​ ပ​တၢ်စံးဘျုးစံးဖှိၣ်. အဃိ ပ​ပာ်ဖျါထီၣ်​ ပ​တၢ်စံးဘျုးစံးဖှိၣ်​ ကသ့​ဒ်လဲၣ်န့ၣ်​ ပ​က​သ့ၣ်ညါ​​ဘၣ်​လၢ တၢ်မၤလိ​တခါအံၤ.

၃. ဘၣ်မနုၤအဃိ ပ​ပာ်လုၢ်ပာ်ပှ့ၤ တၢ်ပှ့ၤက့ၤ​လဲၣ်.

^၃ ပ​မ့ၢ်​ဆိမိၣ်ထံ ယ့ၣ်ၡူး​အတၢ်အိၣ်မူ ဒီး​အတူၢ်သံသး လၢပဂီၢ်န့ၣ်​ ပ​ဘၣ်သး စံးဘျုးက့ၤ​အီၤ. ယ့ၣ်ၡူးန့ၣ်​ ဖဲ​အအိၣ်လၢ ဟီၣ်ခိၣ်ချၢ​အခါ အသိၣ်လိ​ပှၤဂၤ ဘၣ်ဃးဒီး တၢ်ဆိၣ်ဂ့ၤတဖၣ်​လၢ ကစၢ်ယွၤအဘီမုၢ် က​မၤန့ၢ်​​ဝဲ​လၢ ပှၤဟီၣ်ခိၣ်ဖိ​အဂီၢ်. တၢ်မ့ၢ်တၢ်တီ ဘၣ်ဃးဒီး ကစၢ်ယွၤအဘီမုၢ် အဂ့ၢ်န့ၣ်​ ပ​ပာ်လုၢ်ပာ်ပှ့ၤ​အီၤ​ဒိၣ်မး. ဒီး​ခီဖျိလၢ တၢ်ပှ့ၤက့ၤ​အဃိ ပ​အိၣ်ဒီး​တၢ်ခွဲးတၢ်ယာ်​လၢ ပ​က​ရ့လိာ်သး​ဒီး ယဟိဝၤယွၤ ဒီး​ယ့ၣ်ၡူး အဃိ​တၢ်ပှ့ၤက့ၤန့ၣ်​ အလုၢ်ဒိၣ်ပှ့ၤဒိၣ်​ဒိၣ်မး. ဒီး​ပ​သ့ၣ်ညါ​​ဘၣ်​လၢ ပှၤလၢ​အစူၢ်က့ၤနာ်က့ၤ ယ့ၣ်ၡူးန့ၣ်​  အိၣ်ဒီး​တၢ်မုၢ်လၢ်​လၢ က​အိၣ်မူဘၣ်ဝဲ လီၤထူလီၤယိာ် ဒီး​က​ထံၣ်ဘၣ်က့ၤ ပှၤလၢ​အအဲၣ်ဝဲ လၢ​အသံသဒၣ်​ကွံာ်အီၤ. (ယိၤဟၣ်​ ၅:၂၈, ၂၉; ရိမ့ၤ ၆:၂၃) နီၢ်ကီၢ်န့ၣ်​ တၢ်ဆိၣ်ဂ့ၤတဖၣ်အံၤ တကြၢး​ဒီး​ပှၤ​ဘၣ်​ ဒီး​တၢ်​လၢ​ယဟိဝၤယွၤ ဒီး​ယ့ၣ်ၡူး မၤန့ၢ်​​ဝဲ​လၢပဂီၢ်န့ၣ်​ ပ​စံးဘျုးက့ၤ​အဝဲသ့ၣ်​ တလၢာ်​နီတဘျီဘၣ်. (ရိမ့ၤ ၅:၈, ၂၀, ၂၁) ဘၣ်ဆၣ်​ ပ​ပာ်ဖျါထီၣ်​လၢ ပ​စံးဘျုး​အဝဲသ့ၣ်​သ့ဒံး. ပ​မၤ​ကသ့​ဒ်လဲၣ်.

၄. နီၢ်မၤရံ မၤကဒၤလ့ၣ်​ စံးဘျုးက့ၤ​ယ့ၣ်ၡူးန့ၣ်​ အပာ်ဖျါထီၣ်​လၢ အတၢ်မၤ​ဒ်လဲၣ်. (ကွၢ်​တၢ်ဂီၤ.)

^၄ ခဲအံၤ ပ​က​ကွၢ်သကီး နီၢ်မၤရံ မၤကဒၤလ့ၣ်​ အတၢ်လဲၤခီဖျိ. နီၢ်မၤရံ မၤကဒၤလ့ၣ်န့ၣ်​ အကဲဝဲ ပှၤယူဒၤမုၣ်​တဂၤ ဒီး​ခီဖျိလၢ တၢ်ဝံတၢ်နါ အိၣ်လၢ​အလိၤ​အဃိ အ​​ဘၣ်​တူၢ်တၢ်​နးမး. ဘၣ်သ့ၣ်သ့ၣ်​ အက​ဆိမိၣ်​​ဝဲ​လၢ ပှၤ​မၤစၢၤအီၤ တသ့​နီတဂၤလၢၤဘၣ်. အဃိ ဆိမိၣ်ကွၢ်မီၤ ဖဲယ့ၣ်ၡူး မၤဘျါက့ၤ​အီၤ​အခါ အက​သးခု​ဖးဒိၣ်ညါ. အပာ်ဖျါထီၣ်​လၢ အစံးဘျုးက့ၤ​ယ့ၣ်ၡူး ခီဖျိ အကဲထီၣ်​ ယ့ၣ်ၡူး​အပျဲၢ်အဘီၣ်, အဟ့ၣ်လီၤ အတၢ်ဆၢကတီၢ်, တၢ်ဂံၢ်တၢ်ဘါ, တၢ်လၢ​အအိၣ်ဒီး​အီၤ ဒီး​အဆီၣ်ထွဲ ယ့ၣ်ၡူး အတၢ်စံၣ်တဲၤတဲ​​လီၤ​တၢ်မၤ. (လူၤကၣ်​ ၈:၁-၃) နီၢ်မၤရံ မၤကဒၤလ့ၣ်​ စံးဘျုး​​ဘၣ်​ယ့ၣ်ၡူး​ဒိၣ်မး ခီဖျိလၢ တၢ်​လၢ​ယ့ၣ်ၡူး​မၤန့ၢ်​အီၤ. ဘၣ်ဆၣ်​ ခါဆူညါ ယ့ၣ်ၡူး​က​မၤန့ၢ်​အီၤ တၢ်​ဒီဒူၣ်ဒံးန့ၣ်​ ဘၣ်သ့ၣ်သ့ၣ်​ အတသ့ၣ်ညါဝဲဘၣ်. လံာ်စီဆှံ ပာ်ဖျါထီၣ်​​ဝဲ​လၢ ယ့ၣ်ၡူး က​ဟ့ၣ်​​လီၤ​အသးသမူ လၢ​ပှၤဟီၣ်ခိၣ်ဖိ​အဂီၢ် “ဒ်သိး ပှၤလၢ အစူၢ်က့ၤနာ်က့ၤ​အီၤန့ၣ်” က​န့ၢ်ဘၣ်​ တၢ်မူ​အထူအယိာ်​အဂီၢ်. (ယိၤဟၣ်​ ၃:၁၆) နာ်က့ နီၢ်မၤရံ မၤကဒၤလ့ၣ်​ ပာ်ဖျါထီၣ်​လၢ အစံးဘျုးက့ၤ ယ့ၣ်ၡူး ဒီး​အသးတီဒီး​ယ့ၣ်ၡူး. ခီဖျိလၢ အသးအိၣ်​ယ့ၣ်ၡူး ဒိၣ်မး​အဃိ ဖဲယ့ၣ်ၡူး ဘၣ်တူၢ်တၢ်​လၢ တၢ်မၤအၢမၤနး အသ့ၣ်တၢၣ်လိၤ​အခါ အဆၢထၢၣ်​လၢ သ့ၣ်တၢၣ်​အခီၣ်ထံး ဒီး​အမၤမုာ်ထီၣ်​ ပှၤလၢ​အအိၣ်​ဖဲန့ၣ်တဖၣ်​အသး. (ယိၤဟၣ်​ ၁၉:၂၅) တကးဒံးဘၣ်​ ဖဲယ့ၣ်ၡူး သံ​ဝံၤအလီၢ်ခံ နီၢ်မၤရံ မၤကဒၤလ့ၣ်​ ဒီးပိာ်မုၣ်​အဂၤ​ခံဂၤ လဲၤ​လၢ​တၢ်သွၣ်ခိၣ်​ ဒီး​ဟဲ​စိာ်ဝဲ တၢ်နၢမူနၢဆှီ လၢ​ပှၤ​က​ခူၣ်လီၤ ယ့ၣ်ၡူး​အဂီၢ်. (မၢ်ကူး ၁၆:၁, ၂) နီၢ်မၤရံ မၤကဒၤလ့ၣ်​န့ၣ်​ အသးတီဒီး​ယ့ၣ်ၡူး​အဃိ ယဟိဝၤယွၤ ဆိၣ်ဂ့ၤ​အီၤ. ယ့ၣ်ၡူး ဂဲၤဆၢထၢၣ်​သမူထီၣ်က့ၤ ဝံၤဘျီ အထံၣ်လိာ်သး​ဒီး နီၢ်မၤရံ မၤကဒၤလ့ၣ်​ ဒီး​အတဲသကီးတၢ်​ဒီး​အီၤ. တၢ်ခွဲးတၢ်ယာ် တခါအံၤန့ၣ်​ ယ့ၣ်ၡူး အပျဲၢ်အဘီၣ်​ တန့ၢ်​ဘၣ်ဝဲ ကီးဂၤဒဲး​ဘၣ်. အဃိ အကဲဝဲ တၢ်ဆိၣ်ဂ့ၤ​ဖးဒိၣ်​တခါ​လၢ နီၢ်မၤရံ မၤကဒၤလ့ၣ်​အဂီၢ်.—ယိၤဟၣ်​ ၂၀:၁၁-၁၈.

၅. ပ​ပာ်ဖျါထီၣ်​လၢ ပ​စံးဘျုးက့ၤ ယဟိဝၤယွၤ ဒီး​ယ့ၣ်ၡူး ကသ့​ဒ်လဲၣ်.

 ^၅ ပဝဲစ့ၢ်ကီး ပ​ပာ်ဖျါထီၣ်​လၢ ပ​စံးဘျုးက့ၤ ယဟိဝၤယွၤ ဒီး​ယ့ၣ်ၡူး လၢ​အဝဲသ့ၣ်​ မၤန့ၢ်​တၢ်​လၢပဂီၢ်​သ့. ပ​မၤ​သ့​ခီဖျိ ပ​ဟ့ၣ်လီၤ ပ​တၢ်ဆၢကတီၢ်, ပ​တၢ်ဂံၢ်တၢ်ဘါ, တၢ်​လၢအအိၣ်ဒီး​ပှၤ ဒီး​ပ​ဆီၣ်ထွဲ​မၤစၢၤ ဘီမုၢ် တၢ်စံၣ်တဲၤတဲ​​လီၤ​တၢ်မၤ. အဒိ ပ​မၤစၢၤတၢ်​လၢ တၢ်သူၣ်ထီၣ်ဘှီထီၣ်​ ဒီး​တၢ်​ကွၢ်ထွဲ ဘှီဂ့ၤထီၣ်က့ၤ တၢ်အိၣ်ဖှိၣ်လီၢ်​သ့.

၆. ဘၣ်မနုၤအဃိ ပတဲလၢ တၢ်ပှ့ၤက့ၤန့ၣ်​ အကဲ​​ဝဲ​တၢ်ဟ့ၣ်​လၢ ပ​​ဝဲ​တဂၤဘၣ်တဂၤ အဂီၢ်လဲၣ်.

^၆ ပ​မ့ၢ်​ဆိမိၣ်ထံ ယဟိဝၤယွၤ ဒီး​ယ့ၣ်ၡူး​အဲၣ်​ပှၤ​ဒိၣ်မး​အဂ့ၢ်န့ၣ်​ ပ​ဘၣ်သး အဲၣ်ဆၢက့ၤ အဝဲသ့ၣ်. (၁ ယိၤဟၣ်​ ၄:၁၀, ၁၉) ဒီး​ပ​သ့ၣ်ညါ​​ဘၣ်​လၢ ယ့ၣ်ၡူး​သံ​လၢ ပ​​ဝဲ​တဂၤဘၣ်တဂၤ အဂီၢ်​အဃိ ပ​အဲၣ်​အီၤ​ဒိၣ်ထီၣ်. ဘၣ်ဃးဒီး တၢ်ဂ့ၢ်အံၤန့ၣ်​ တၢ်မၢဖိ​ပီလူး သ့ၣ်ညါ​​ဝဲ​အဃိ အစံးဘျုး ယဟိဝၤယွၤ ဒီး​ယ့ၣ်ၡူး. ဒီး​အကွဲးန့ၢ်ဝဲ ပှၤကလၤတံဖိ​လၢ “ကစၢ်ယွၤ​အဖိခွါ . . . အဲၣ်​ယၤ​ဒီး ဟ့ၣ်လီၤကွံာ် အသးသမူ​လၢ ယဂီၢ်.” (ကလၤတံ ၂:၂၀) ပဝဲစ့ၢ်ကီး ခီဖျိလၢ ယ့ၣ်ၡူး​သံ​လၢပဂီၢ်​အဃိ ယဟိဝၤယွၤ မူၤဃီၤ​ပှၤလၢ​အအိၣ်​ ဒ်သိးဒီး ပ​က​ကဲထီၣ်ဘၣ်​ အသကီး. (ယိၤဟၣ်​ ၆:၄၄) ယဟိဝၤယွၤ ထံၣ်​​ဝဲ​တၢ်ဂ့ၤ​တမံၤမံၤ လၢ​ပ​သးပူၤ ဒီး​ဒ်သိး ပ​က​ကဲထီၣ်ဘၣ်​ အသကီး​အဂီၢ် အဟ့ၣ်​​ဝဲ​တၢ်အပှ့ၤ​လၢ အပှ့ၤ​ဒိၣ်ကတၢၢ် အဃိ​ပ​သးခုညါ. ပ​သ့ၣ်ညါဘၣ်​ ဒ်န့ၣ်​အဃိ ပ​အဲၣ်​ယဟိဝၤယွၤ ဒီး​ယ့ၣ်ၡူး ဒိၣ်ထီၣ်မၣ်​ဒိၣ်ထီၣ်. အဃိ ပ​ကဘၣ်​ သံကွၢ်လီၤပသး​လၢ ‘ယ​တၢ်အဲၣ်​တခါအံၤ က​မၤစၢၤ​ယၤ​လၢ ယ​က​မၤ​မနုၤလဲၣ်.’

၇. ပ​အဲၣ်​ယဟိဝၤယွၤ ဒီး​ယ့ၣ်ၡူးန့ၣ်​ ပ​ပာ်ဖျါထီၣ်​ ကသ့​ဒ်လဲၣ်. ကွၢ်​ဃုာ်ဒီး​တၢ်ဂီၤ. (၂ ကရံၣ်သူး ၅:၁၄, ၁၆; ၆:၁, ၂)

^၇ ပ​အဲၣ်​ယဟိဝၤယွၤ ဒီး​ယ့ၣ်ၡူး​အဃိ မၤစၢၤ​ပှၤလၢ ပ​က​အဲၣ်​ပှၤဂၤ. (ဖး ၂ ကရံၣ်သူး ၅:၁၄, ၁၅; ၆:၁, ၂.) ပ​ပာ်ဖျါထီၣ်​ပ​တၢ်အဲၣ်အံၤ ခီဖျိ ပ​စံၣ်တဲၤတဲလီၤတၢ်​ဆူၣ်ဆူၣ်. ပှၤတဂၤဂၤ အကလုာ်ဒူၣ်​ ဒီး​အတၢ်ဆဲးတၢ်လၤ မ့ၢ်​လီၤဆီ​နာ်က့ ပ​တကွၢ်ကပာ် အဝဲသ့ၣ်​ဘၣ်. ဒီး​ပှၤတနီၤ မ့ၢ်​ကဲပှၤလၢ အဖှီၣ်​မ့ၢ်ဂ့ၤ, အထူးတီၤ​မ့ၢ်ဂ့ၤ, အတၢ်ကူၣ်ဘၣ်ကူၣ်သ့ အိၣ်​အါမ့ၢ်ဂ့ၤ အိၣ်​တအါ​​ဘၣ်​မ့ၢ်ဂ့ၤ ပ​တဲတၢ်ဒီး အဝဲသ့ၣ်​ကီးဂၤဒဲး. ယဟိဝၤယွၤန့ၣ်​  အဘၣ်သး​​ဝဲ​လၢ “ပှၤကိးကလုာ်ဒဲး က​ဒိးန့ၢ်ဘၣ်​ တၢ်အုၣ်က့ၤခီၣ်က့ၤ​ဒီး က​သ့ၣ်ညါထီၣ်​ တၢ်မ့ၢ်တၢ်တီ လီၤတံၢ်လီၤဆဲး.” (၁ တံၤမသ့း ၂:၄) အဃိ ပ​မ့ၢ်​တဲတၢ်ဒီး ပှၤကိးဂၤဒဲးန့ၣ်​ ပ​ပာ်ဖျါထီၣ်​လၢ ပ​အဲၣ်​အဝဲသ့ၣ်​ ဒီး​ပ​မၤ ယဟိဝၤယွၤ အတၢ်ဘၣ်သး.

၈. ပ​ပာ်ဖျါထီၣ်​လၢ ပ​အဲၣ်​ပ​ဒီပုၢ်ဝဲၢ်မုၣ်ခွါ ကသ့​ဒ်လဲၣ်.

^၈ ပ​အဲၣ်​ယဟိဝၤယွၤ ဒီး​ယ့ၣ်ၡူးန့ၣ်​ ပ​ပာ်ဖျါထီၣ်​သ့​ခီဖျိ ပ​အဲၣ်​ပ​ဒီပုၢ်ဝဲၢ်မုၣ်ခွါ. (၁ ယိၤဟၣ်​ ၄:၂၁) ဖဲ​ပ​ဒီပုၢ်ဝဲၢ်မုၣ်ခွါတဖၣ်​ ထံၣ်​​ဘၣ်​တၢ်ကီတၢ်ခဲ​အခါ ပသးအိၣ်​အဝဲသ့ၣ်​ ဒီး​ပ​မၤစၢၤ​အဝဲသ့ၣ်. အဒိ ဖဲ​ပှၤလၢ​အဝဲသ့ၣ်​ အဲၣ်ဝဲတဖၣ်​ သံသဒၣ်​ကွံာ်အီၤ​အခါ ပ​မၤမုာ်ထီၣ်​ အဝဲသ့ၣ်​သး. ဖဲ​အဝဲသ့ၣ်​ အိၣ်တဆူၣ်​​ဘၣ်​အခါ ပ​လဲၤဟး​လၢ​အဝဲသ့ၣ်​အိၣ်​ ဒီး​ဖဲ​အဝဲသ့ၣ်​ သးလီၤစၢ်​အခါ ပ​ဟ့ၣ်ဂံၢ်ဟ့ၣ်ဘါ​အဝဲသ့ၣ်. (၂ ကရံၣ်သူး ၁:၃-၇; ၁ သ့းစၤလနံ ၅:၁၁, ၁၄) ပ​သ့ၣ်ညါ​လၢ “ပှၤတီပှၤလိၤ​တဂၤ အတၢ်ဃ့ကညးန့ၣ်​ အိၣ်ဒီး​အစိအကမီၤလၢ အက​မၤစၢၤတၢ်​အဂီၢ်” အဃိ ပ​ဆဲး​ဃ့ထုကဖၣ်န့ၢ်တၢ်​လၢ ပ​ဒီပုၢ်ဝဲၢ်မုၣ်ခွါ​တဖၣ်အဂီၢ်.—ယၤကိာ် ၅:၁၆.

၉. ပ​ကွၢ်လိ​ယဟိဝၤယွၤ ဒီး​ပာ်ဖျါထီၣ်​လၢ ပ​အဲၣ်​ပ​ဒီပုၢ်ဝဲၢ်မုၣ်ခွါ ကသ့​ဒ်လဲၣ်.

^၉ ပ​ပာ်ဖျါထီၣ်​စ့ၢ်ကီး​လၢ ပ​အဲၣ်​ပ​ဒီပုၢ်ဝဲၢ်မုၣ်ခွါ သ့​ခီဖျိ ပ​အိၣ်ဃူအိၣ်ဖိး​ဒီး​အဝဲသ့ၣ်. ဒီး​ပ​ကွၢ်လိ ယဟိဝၤယွၤ ခီဖျိ ပ​ပျၢ်ကွံာ်​ပှၤဂၤ အတၢ်ကမၣ်. ယဟိဝၤယွၤ သးအိၣ်​ပျၢ်ကွံာ် ပ​တၢ်ဒဲးဘး​အဃိ အပျဲ​​ဝဲ​လၢ အဖိခွါ က​ဟဲ​တူၢ်သံသး လၢပဂီၢ်. ပဝဲစ့ၢ်ကီး ပ​ဒီပုၢ်ဝဲၢ်မုၣ်ခွါ မ့ၢ်​မၤကမၣ်​​ဘၣ်​ပှၤန့ၣ်​ ပ​ကဘၣ်​ သးအိၣ်​ပျၢ်ကွံာ် အဝဲသ့ၣ်​တၢ်ကမၣ်. ဆိမိၣ်ထီၣ်​က့ၤ ယ့ၣ်ၡူး​တဲ​တၢ်အဒိ ဘၣ်ဃးဒီး ကုၢ်​လၢအအၢ​တဂၤ​အဂ့ၢ်. ကုၢ်​လၢအအၢ​တဂၤအံၤ အကမၢ်​အိၣ်ဒီး​စီၤပၤ ဒီဒူၣ်ညါ နာ်က့ စီၤပၤ​မၤလီၤတူာ်ကွံာ် အကမၢ်​ခဲလၢာ်. ဘၣ်ဆၣ်​ ကုၢ်​လၢအဂၤ​တဂၤ အကမၢ်​အိၣ်ဒီး ကုၢ်​လၢအအၢ​တဂၤအံၤ တစဲးဖိ​​​လီၤ​နာ်က့ ကုၢ်​လၢအအၢ​တဂၤအံၤ တဘၣ်သး မၤလီၤတူာ်ကွံာ် ကုၢ်​လၢအဂၤ​တဂၤအံၤ အကမၢ်​ဘၣ်. အဃိ ပ​တ​​ဘၣ်​လီၤဂာ် ဒ်သိးဒီး ကုၢ်​လၢအအၢ တဂၤအံၤ​ဘၣ်. (မးသဲ ၁၈:၂၃-၃၅) နၤ​ဒီး​ဒီပုၢ်ဝဲၢ်​တဂၤဂၤ မ့ၢ်အိၣ်ဒီး တၢ်ဂ့ၢ်ကီ​တမံၤမံၤန့ၣ်​ တချုးလၢ န​လဲၤထီၣ်​ တၢ်သ့ၣ်နီၣ်ထီၣ်က့ၤ​အမူး ဒံးဘၣ်န့ၣ်​ လဲၤ​ဆိ​လၢ​အအိၣ်​ ဒီး​မၤဃူမၤဖိးက့ၤတၢ်​ဒီး​အီၤ. (မးသဲ ၅:၂၃, ၂၄) န​မ့ၢ်​မၤ​ဒ်န့ၣ်မၣ်​ န​ပာ်ဖျါထီၣ်​လၢ န​အဲၣ်​ယဟိဝၤယွၤ ဒီး​ယ့ၣ်ၡူး​နီၢ်ကီၢ်.

၁၀-၁၁. တၢ်အိၣ်ဖှိၣ်သးပှၢ်တဖၣ်​ ပာ်ဖျါထီၣ်​လၢ အအဲၣ်​ယဟိဝၤယွၤ ဒီး​ယ့ၣ်ၡူး သ့​ဒ်လဲၣ်. (၁ ပ့းတရူး ၅:၁, ၂)

^၁၀ တၢ်အိၣ်ဖှိၣ်သးပှၢ်​စ့ၢ်ကီး ပာ်ဖျါထီၣ်​လၢ အအဲၣ်​ယဟိဝၤယွၤ ဒီး​ယ့ၣ်ၡူး သ့​ခီဖျိ အဝဲသ့ၣ်​ကွၢ်ထွဲ ယ့ၣ်ၡူး​အသိ​ဖိတဖၣ်​ဂ့ၤဂ့ၤ. (ဖး ၁ ပ့းတရူး ၅:၁, ၂.) ဘၣ်ဃးဒီး တၢ်ဂ့ၢ်အံၤန့ၣ်​ ယ့ၣ်ၡူး​တဲဘၣ်​ တၢ်မၢဖိ​ပ့းတရူး ပျီပျီ​လီၤ. စီၤပ့းတရူး​န့ၣ်​ အသမၢ​ယ့ၣ်ၡူး သၢဘျီညါ. အဃိ ဖဲယ့ၣ်ၡူး ဂဲၤဆၢထၢၣ်​သမူထီၣ်က့ၤ ဝံၤအလီၢ်ခံန့ၣ်​ အသံကွၢ် စီၤပ့းတရူး​လၢ “စီၤယိၤဟၣ်​အဖိခွါ စီၤၡံမိၣ်ဧၢ, န​အဲၣ်​ယၤဧါ.” ပ​သ့ၣ်ညါ​လၢ စီၤပ့းတရူး​န့ၣ်​ အဘၣ်သး ပာ်ဖျါထီၣ်​က့ၤ​လၢ အအဲၣ်​ယ့ၣ်ၡူး နီၢ်ကီၢ်. အဃိ ယ့ၣ်ၡူး တဲဘၣ်အီၤ​လၢ “လုၢ်အီၣ်လုၢ်အီ ယ​သိ​ဖိတဖၣ်​တက့ၢ်.” (ယိၤဟၣ်​ ၂၁:၁၅-၁၇) အဃိ လၢ​စီၤပ့းတရူး အတၢ်အိၣ်မူ ဒီတစိၤညါ​န့ၣ်​ အပာ်ဖျါထီၣ်​လၢ အအဲၣ်​ယ့ၣ်ၡူး ခီဖျိ အကွၢ်ထွဲဝဲ ယ့ၣ်ၡူး​အသိတဖၣ်​ဂ့ၤဂ့ၤ.

^၁၁ တၢ်အိၣ်ဖှိၣ်သးပှၢ်​သ့ၣ်ဧၢ, တၢ်​ကတိၤ​လၢ ယ့ၣ်ၡူး တဲ​​ဘၣ်​စီၤပ့းတရူး​န့ၣ်​ အရ့ဒိၣ်​ လၢ​နဂီၢ်​ထဲလဲၣ်. ဖဲ​တၢ်သ့ၣ်နီၣ်ထီၣ်က့ၤ ယ့ၣ်ၡူး​အတၢ်သံ​အမူး ဘၣ်​​ဝဲ​တလါန့ၣ်​ တၢ်အိၣ်ဖှိၣ်သးပှၢ်တဖၣ်​ ပာ်ဖျါထီၣ်​ အတၢ်အဲၣ်​လၢ ယဟိဝၤယွၤ ဒီး​ယ့ၣ်ၡူး သ့​ခီဖျိ အလဲၤ​အိၣ်သကီး ဒီး​ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ်. တကးဒံးဘၣ်​ အဝဲသ့ၣ်​ က​​ဘၣ်​မၤစၢၤ ပှၤလၢ အပတုာ်​စံၣ်တဲၤတဲလီၤတၢ် လၢ​က​ဟဲက့ၤကဒါ​လၢ ယဟိဝၤယွၤ​အအိၣ်. (ယဃ့းစက့လး ၃၄:၁၁, ၁၂) ပှၤမၤလိလံာ်စီဆှံဖိ ဒီး​ပှၤအသီတဖၣ်​စ့ၢ်ကီး ပ​မုၢ်လၢ်​လၢ မုၢ်ကအိၣ်ဝဲတနံၤန့ၣ်​ အဝဲသ့ၣ်​က​ကဲထီၣ်​ ယ့ၣ်ၡူး အပျဲၢ်အဘီၣ်​အဃိ တၢ်အိၣ်ဖှိၣ်သးပှၢ်တဖၣ်​ ကဘၣ်​ ဟ့ၣ်ဂံၢ်ဟ့ၣ်ဘါ အဝဲသ့ၣ်​လၢ က​ဟဲထီၣ်​ တၢ်သ့ၣ်နီၣ်ထီၣ်က့ၤ​အမူး.

၁၂. ပ​မ့ၢ်​ဆိမိၣ်ထံ တၢ်ကတိၤ​လၢ ယ့ၣ်ၡူး​တဲဝဲ တချုး​ဖဲ အသံ​ဒံး​​ဘၣ်​တနၤန့ၣ်​ က​မၤစၢၤ​ပှၤ​ဒ်လဲၣ်. (ယိၤဟၣ်​ ၁၆:၃၂, ၃၃)

^၁၂ တချုးလၢ ယ့ၣ်ၡူး​သံဒံး​​ဘၣ်​တနၤန့ၣ်​ အတဲဘၣ်​ အပျဲၢ်အဘီၣ်​တဖၣ်လၢ “လၢ​ဟီၣ်ခိၣ်ချၢအံၤ သု​က​ထံၣ်ဘၣ်​ တၢ်နးတၢ်ဖှီၣ်​ ဘၣ်ဆၣ်​ ယ​မၤနၢၤ​ဟီၣ်ခိၣ်​လံ အဃိ​အိၣ်ဒီး တၢ်သးဒူ​တက့ၢ်.” (ဖး ယိၤဟၣ်​ ၁၆:၃၂, ၃၃.) ဖဲယ့ၣ်ၡူး​အဒုၣ်အဒါတဖၣ်​  မၤပျံၤမၤဖုး​အီၤ​အခါ အတပျံၤတၢ်ဘၣ်. ခီဖျိလၢ အအိၣ်ဒီး​တၢ်သးဒူ​အဃိ အတီ​ဒီး​ယဟိဝၤယွၤ တုၤလၢ​အသံ. ယ့ၣ်ၡူး သ့ၣ်ညါ​​ဝဲ​လၢ အပျဲၢ်အဘီၣ်တဖၣ်​ က​ထံၣ်​​ဘၣ်​တၢ်မၤကွၢ် ဒ်သိးဒီး​အီၤ​အဃိ အမၢ​ယဟိဝၤယွၤ ဒီသဒၢ​အဝဲသ့ၣ်. (ယိၤဟၣ်​ ၁၇:၁၁) ပ​သ့ၣ်ညါ​​ဘၣ်​လၢ ယဟိဝၤယွၤန့ၣ်​ အဂံၢ်ဆူၣ်​ဒိၣ်န့ၢ်ဒံး ပဒုၣ်ပဒါတဖၣ်​အဃိ ပ​အိၣ်ဒီး​တၢ်သးဒူ. (၁ ယိၤဟၣ်​ ၄:၄) တကးဒံးဘၣ်​ ယဟိဝၤယွၤန့ၣ်​ အထံၣ်​တၢ်ကိးမံၤဒဲး အဃိ ပ​မ့ၢ်​သန့ၤသး​လၢအီၤန့ၣ်​ အက​မၤစၢၤ​ပှၤ ဒ်သိး ပ​က​မၤလီၤမၢ်ကွံာ် ပ​တၢ်ပျံၤတၢ်ဖုး ဒီး​ပကအိၣ်ဒီး တၢ်သးဒူ.

၁၃. ပှၤအရံၤမၤသဲဖိ စီၤယိၤသး ပာ်ဖျါထီၣ်​ တၢ်သးဒူ​ဒ်လဲၣ်.

^၁၃ ပ​က​ကွၢ်သကီး ပှၤအရံၤမၤသဲဖိ စီၤယိၤသး အဒိအတဲာ်. စီၤယိၤသးအံၤ အကဲ ပှၤယူဒၤဖိ အကွီၢ်ဘျီၣ်​ လၢ​အဒိၣ်ကတၢၢ် အပှၤဘၣ်မူဘၣ်ဒါ​တဂၤ အဃိ ပှၤယူဒၤဖိ ပာ်ကဲ​အီၤ​ဒိၣ်မး. စီၤယိၤဟၣ်​ တဲဝဲလၢ ပှၤအရံၤမၤသဲဖိ စီၤယိၤသးအံၤ အကဲ “ယ့ၣ်ၡူး အပျဲၢ်အဘီၣ်​ ဘၣ်ဆၣ်​ မ့ၢ်လၢ​အပျံၤ ပှၤယူဒၤဖိ အဃိ အ​​ဝဲ​တဒုး​သ့ၣ်ညါ ပှၤဂၤ​ဘၣ်.” (ယိၤဟၣ်​ ၁၉:၃၈) အဃိ ပ​သ့ၣ်ညါ​​ဘၣ်​လၢ ဖဲယ့ၣ်ၡူး အိၣ်လၢ ဟီၣ်ခိၣ်ချၢ​ခါန့ၣ်​ အတပိာ်​ယ့ၣ်ၡူး​အခံဘၣ်. ပှၤအရံၤမၤသဲဖိ စီၤယိၤသးအံၤ အသးအိၣ်​ ဘီမုၢ်​တၢ်သးခုကစီၣ်​ ဒီး​အနာ်​ယ့ၣ်ၡူး နာ်က့ အတဲ​ပှၤဂၤ​တဘူၣ်ဘၣ်. ဘၣ်သ့ၣ်သ့ၣ်​ အဘၣ်ယိၣ်​​ဝဲ​လၢ ပှၤ​မ့ၢ်​သ့ၣ်ညါ​လၢ အကဲ ယ့ၣ်ၡူး​အပျဲၢ်အဘီၣ်န့ၣ်​ ပှၤ​တပာ်ကဲ​အီၤ​လၢၤဘၣ်. ဘၣ်ဆၣ်​ လံာ်စီဆှံ တဲဝဲလၢ ယ့ၣ်ၡူး​သံ​ဝံၤအလီၢ်ခံ အ “ပာ်ဆူၣ်ထီၣ်​အသး​ဒီး လဲၤ​​ဝဲ​လၢ စီၤပံၤလး​အအိၣ်​ ဒီး​ဃ့​န့ၢ်ဝဲ ယ့ၣ်ၡူး​အစိၣ်.” (မၢ်ကူး ၁၅:၄၂, ၄၃) တဘျီအံၤဒု ပှၤအရံၤမၤသဲဖိ စီၤယိၤသး တဲလီၤအသး​လၢ အကဲ ယ့ၣ်ၡူး​အပျဲၢ်အဘီၣ်​ဘူၣ်လံ.

၁၄. န​မၤလီၤမၢ်ကွံာ် တၢ်ပျံၤ​ပှၤကညီ ကသ့​ဒ်လဲၣ်.

^၁၄ နၤမီၤ, န​ပျံၤ​ပှၤဂၤ ဒ်သိးဒီး ပှၤအရံၤမၤသဲဖိ စီၤယိၤသး ပျံၤ​​ဝဲ​န့ၣ်​ အိၣ်​တဘျီဘျီဧါ. လၢ​ကၠိ​မ့ၢ်ဂ့ၤ, လၢ​တၢ်မၤလီၢ်​မ့ၢ်ဂ့ၤ န​ပျံၤ​လၢ န​က​တဲပၠး​ပှၤဂၤ​လၢ န​ကဲ​ယဟိဝၤပှၤအုၣ်အသး တဘျီဘျီ​ကၠ့ၤဧါ. ခီဖျိလၢ န​ဘၣ်ယိၣ်​လၢ ပှၤဂၤ​က​ထံၣ်​နၤ တမံၤမံၤ​အဃိ န​ထုးယံာ်​တၢ်ဆၢကတီၢ် လၢ​န​က​ကဲထီၣ်​ ပှၤစံၣ်တဲၤတဲလီၤတၢ်ဖိ ဒီး​ဒိးဘျၢထံဧါ. တ​​ဘၣ်​ပျဲလၢ တၢ်ပျံၤ ဒီး​တၢ်ဘၣ်ယိၣ်တဖၣ်အံၤ က​မၤတံာ်တာ်​နၤ​လၢ န​က​မၤ​တၢ်လၢအ​​ဘၣ်​တဂ့ၤ. ဃ့ထုကဖၣ်​ လၢ​ယဟိဝၤယွၤ​အအိၣ်​ဆူၣ်ဆူၣ်​ ဒီး​ဃ့အီၤ​လၢ အက​ဟ့ၣ်​နၤ တၢ်သးဒူ ဒ်သိး​န​က​မၤ အတၢ်ဘၣ်သး. န​မ့ၢ်​ထံၣ်​​ဘၣ်​လၢ ယဟိဝၤယွၤ စံးဆၢ​န​တၢ်ထုကဖၣ်န့ၣ်​ န​သး​က​ဆူၣ်ထီၣ်​ ဒီး​န​တၢ်သးဒူ​က​အါထီၣ်.—ယၡါယၤ ၄၁:၁၀, ၁၃.

၁၅. ယ့ၣ်ၡူး ပာ်ဖျါထီၣ်​သး​လၢ အပျဲၢ်အဘီၣ်​အအိၣ်​ ဝံၤအလီၢ်ခံ အပျဲၢ်အဘီၣ်တဖၣ်​ သးခု​ထီၣ်​က့ၤ​အဃိ မၤစၢၤ​အဝဲသ့ၣ်​ဒ်လဲၣ်. (လူၤကၣ်​ ၂၄:၅၂, ၅၃)

^၁၅ ဖဲယ့ၣ်ၡူး​သံ​အခါန့ၣ်​ အပျဲၢ်အဘီၣ်တဖၣ်​ သးအုး​ဒိၣ်မး. ထံၣ်တမှံကွၢ်​လၢ န​အိၣ်​​ဘၣ်​လၢ အဝဲသ့ၣ်​အလီၢ်​ထံၣ်​မီၤ. အဝဲသ့ၣ်​ တူၢ်ဘၣ်​​ဝဲ​လၢ အသကီး​လၢ အအဲၣ်​​ဝဲ​ဒိၣ်ကတၢၢ်​တဂၤန့ၣ်​ သံသဒၣ်ကွံာ် အဝဲသ့ၣ်​အဃိ လီၤဂာ်လၢ အတၢ်မုၢ်လၢ် တအိၣ်လၢၤဘၣ်.  (လူၤကၣ်​ ၂၄:၁၇-၂၁) ဘၣ်ဆၣ်​ ဖဲယ့ၣ်ၡူး ပာ်ဖျါထီၣ်​သး​လၢ အဝဲသ့ၣ်​အအိၣ်​ခါန့ၣ်​ အမၤစၢၤ​အဝဲသ့ၣ်​လၢ က​နၢ်ပၢၢ်ထီၣ်​လၢ ယ့ၣ်ၡူး​မၤလၢပှဲၤထီၣ်​ ဝံအတၢ်စံးပာ်. တကးဒံးဘၣ်​ ယ့ၣ်ၡူး​ဟ့ၣ်​​လီၤ​စ့ၢ်ကီး​အဝဲသ့ၣ်​ တၢ်မၤ​လၢ အရ့ဒိၣ်​ဒိၣ်မး​တခါ. (လူၤကၣ်​ ၂၄:၂၆, ၂၇, ၄၅-၄၈) ယ့ၣ်ၡူး​အိၣ်ဒီး အပျဲၢ်အဘီၣ်တဖၣ်အံၤ အသီ ၄၀ ဝံၤအလီၢ်ခံ ယ့ၣ်ၡူး က့ၤထီၣ်​လၢမူခိၣ်. နာ်က့ တဘျီအံၤ အပျဲၢ်အဘီၣ်​ တသးအုး​လၢၤဘၣ်. အဝဲသ့ၣ်​ သ့ၣ်ညါ​​ဝဲ​လၢ ယ့ၣ်ၡူး​အိၣ်လၢမူခိၣ်​လံ ဒီး​ယ့ၣ်ၡူး က​မၤစၢၤ​အဝဲသ့ၣ်​ လၢ​က​မၤလၢပှဲၤ မူဒါ​လၢ ယ့ၣ်ၡူး​ဟ့ၣ်လီၤ အဝဲသ့ၣ်​အဃိ အဝဲသ့ၣ်​သးခု​ဒိၣ်မး. တၢ်သးခုအံၤ မၤစၢၤ​အဝဲသ့ၣ်​လၢ အဝဲသ့ၣ်​က​ဆဲး စံးထီၣ်ပတြၢၤ ယဟိဝၤယွၤ​ထီဘိ.—ဖး လူၤကၣ်​ ၂၄:၅၂, ၅၃; မၤတၢ် ၅:၄၂.

၁၆. ပ​ကွၢ်လိ ယ့ၣ်ၡူး အပျဲၢ်အဘီၣ်တဖၣ်​ ကသ့​ဒ်လဲၣ်.

^၁၆ ပ​ကွၢ်လိ ယ့ၣ်ၡူး​အပျဲၢ်အဘီၣ်​ ကသ့​ဒ်လဲၣ်. ပ​ကွၢ်လိ အဝဲသ့ၣ်​ သ့​ခီဖျိ ပ​မၤ ယဟိဝၤယွၤ အတၢ်မၤ​လၢ​တၢ်သးခု ဖဲ​တၢ်သ့ၣ်နီၣ်ထီၣ်က့ၤ ယ့ၣ်ၡူး​အတၢ်သံ​အမူး တလါန့ၣ်​ ဒီး​ပ​ဆဲး​မၤ​အတၢ်မၤ လၢ​တၢ်သးခု​ထီဘိ. ပ​က​မၤ ယဟိဝၤယွၤ​အတၢ်မၤ လၢ​တၢ်သးခု​အဂီၢ် ပ​က​​ဘၣ်​ပာ်ဆိ ကစၢ်ယွၤအဘီမုၢ် လၢ​နီၣ်ဂံၢ်တၢ. အဒိ ပှၤတနီၤန့ၣ်​ ဒ်သိးဒီး အကစံၣ်တဲၤတဲ​​လီၤ​​​ဘၣ်​တၢ်, က​ထီၣ်​​ဘၣ်​တၢ်အိၣ်ဖှိၣ်​ ဒီး​က​မၤဘၣ်​ ဟံၣ်ဖိဃီဖိ တၢ်မၤလိ​လံာ်စီဆှံ ထီဘိ​အဂီၢ် အဝဲသ့ၣ်​ ရဲၣ်ကျဲၤဘၣ်ထီၣ်က့ၤ အတၢ်ဖံးတၢ်မၤ. ဒီး​ပှၤတနီၤန့ၣ်​ ခီဖျိလၢ အဘၣ်သး​မၤစၢၤ​အါထီၣ်​တၢ် လၢ​တၢ်အိၣ်ဖှိၣ်​ မ့တမ့ၢ် အဘၣ်သး လဲၤ​မၤစၢၤတၢ်​လၢ တၢ်လီၢ်လၢ ပှၤ​လိၣ်ဘၣ်​ ပှၤစံၣ်တဲၤတဲလီၤတၢ်ဖိ​အဃိ အဝဲသ့ၣ်​ ပာ်လီၤအသး​လၢ အတပှ့ၤ တၢ်ဖိတၢ်လံၤ အါအါ​ဘၣ်. ပဝဲစ့ၢ်ကီး ဒ်သိး​ပ​က​ဆဲး​မၤ ယဟိဝၤယွၤ အတၢ်မၤ​ထီဘိ​အဂီၢ် ပ​က​​ဘၣ်​အိၣ်ဒီး တၢ်တူၢ်န့ၢ်ခီၣ်ကဲ. ဒီး​ယဟိဝၤယွၤ အၢၣ်​​လီၤ​ပှၤလၢ ပ​မ့ၢ်​ဆဲး​ပာ်ဆိ အဘီမုၢ်​တၢ်မၤ လၢ​ပ​တၢ်အိၣ်မူပူၤန့ၣ်​ အက​ဆိၣ်ဂ့ၤ​ပှၤနီၢ်ကီၢ်.—ကတိၤဒိ ၁၀:၂၂; မးသဲ ၆:၃၂, ၃၃.

၁၇. ဖဲ​တၢ်သ့ၣ်နီၣ်ထီၣ်က့ၤ ယ့ၣ်ၡူး​အတၢ်သံ​အမူး တလါန့ၣ်​ န​ပာ်လီၤသး​လၢ န​က​မၤ​မနုၤလဲၣ်. (ကွၢ်​တၢ်ဂီၤ.)

^၁၇ ပ​ခီးကွၢ်လၢ်​လၢ ပ​က​မၤဘၣ်​ တၢ်သ့ၣ်နီၣ်ထီၣ်က့ၤ ယ့ၣ်ၡူး​အတၢ်သံ​အမူး ဖဲ​မုၢ်ခံနံၤ, လါအ့ဖြ့ၣ်​ ၄ သီ. ဘၣ်ဆၣ်​ ဒ်သိး​န​က​ဆိမိၣ်ထံ ယ့ၣ်ၡူး​အတၢ်အိၣ်မူ ဒီး​အတူၢ်သံသး​အဂ့ၢ် အဂီၢ်န့ၣ်​ တ​​ဘၣ်​အိၣ်ခီး​တုၤလၢ တၢ်သ့ၣ်နီၣ်ထီၣ်က့ၤ​အမူး တနံၤန့ၣ်​တဂ့ၤ. ဖဲ​တၢ်သ့ၣ်နီၣ်ထီၣ်က့ၤ​အမူး တလါန့ၣ်​ ပာ်​​လီၤ​တၢ်ဆၢကတီၢ် မူာ်မူာ်နီၢ်နီၢ် လၢ​န​က​ဆိမိၣ်​ဘၣ်ဃးဒီး ယဟိဝၤယွၤ ဒီး​ယ့ၣ်ၡူး အတၢ်အဲၣ်​လၢ​နဂီၢ်. အဒိ ပာ်လီၤဃာ် တၢ်ဆၢကတီၢ်​လၢ န​က​ဖး ဒီး​ဆိမိၣ်ထံ ဘၣ်ဃးဒီး “ယ့ၣ်ၡူး​အတၢ်အိၣ်မူ​လၢ​ဟီၣ်ခိၣ်ချၢ အလီၢ်ခံကတၢၢ်​တနွံ” အဂ့ၢ် လၢအအိၣ်လၢ တၢ်ဂ့ၢ်​ဘၣ်ထွဲလိာ်သး ခ​၁၂ လၢ ဟီၣ်ခိၣ်သီ​တၢ်ကွဲးကျိာ်ထံ လံာ်စီဆှံ အပူၤ. ဒီး​ဖဲ​န​ဖး​ယ့ၣ်ၡူး​အဂ့ၢ်​အခါ ဃုကွၢ်​တၢ်ဂ့ၢ်​လၢ က​မၤစၢၤ​နၤ​ဒ်သိး န​က​မၤအါထီၣ်​ န​တၢ်စံးဘျုး, န​တၢ်အဲၣ်​ ဒီး​န​တၢ်သးဒူ. ဝံၤဒီး ဒ်သိး​န​က​ပာ်ဖျါထီၣ်​ န​တၢ်စံးဘျုး​အဂီၢ် ဆိမိၣ်ထီၣ်​ တၢ်​လၢ​န​က​မၤ​အီၤ တခါခါ. တၢ်​လၢ​န​မၤ​ဖဲ တၢ်သ့ၣ်နီၣ်ထီၣ်က့ၤ ယ့ၣ်ၡူး​အတၢ်သံ​အမူး တလါန့ၣ်​ ယ့ၣ်ၡူး​သ့ၣ်ညါ​​ဝဲ​အဃိ အပာ်လုၢ်ပာ်ပှ့ၤ န​တၢ်ကျဲးစၢး​ဒိၣ်မး.—လီၣ်ဖျါ ၂:၁၉.