1-2. (a) Malizuvho musinke nampo natu vhura kukara nago apa atu gazadara ko kuhamena eparu lyaJesus ntani nosirugana sendi? (b) Yisinke natu ka zogera mosirongwa esi?

 APA ATU fisa gumwe ogu twa hara, ose kurongora unene muntu ogo! Pomuhowo, ose kulizuvha kukora kokunene apa atu gazadara ko komazuva aga ga twaredesere konomfa domuhali gwetu, unene po nsene asi muhali gwetu ogo kwa hepere unene komeho a fe. Nye nampili ngoso, mwa za siruwo ose ku ya tameka ku ya lizuvha ruhafo apa atu gazadara ko kuhamena yuma eyi ga tu ronga, ndi kuhamena yininke eyi ga rugene ndi kuhamena yininke eyi ga uyungire yipo a tu korangede ndi yipo a tu zorese.

² Mokulifana, ayo kutuguvisa apa atu resa kuhamena omu Jesus ga hepere ntani nonomfa dendi. Moyivike yongandi komeho Murarero gu tameke ntani konyima zoMurarero, ose kulitulira po siruwo yipo tu gazadare ko kuhamena omu nzambo zaJesus za kara nomulyo. (1 Kol. 11:24, 25) Nye nampili ngoso, ose kuhafa unene apa atu gazadara ko kuhamena yininke nayinye eyi nga uyunga Jesus ntani neyi nga rugana apa ga kere pevhu. Ayo hena kutukorangeda apa atu gazadara ko kuhamena eyi ana kurugana ngesi ntani neyi ngaka tu ruganena komeho. Kuteda ko koyininke eyi ntani nekeharo eli ga tu likida, kuvhura kututumangeda tu likide rupandu rwetu mononkedi dokulisiga-siga, ngomu tupu natu ka yi lironga mosirongwa esi.

3. Nokonda musinke twa kara nado deyi natu karera norupandu kosizoweseso?

³ Ayo kutuhafesa unene apa atu gazadara ko kuhamena eparu lyaJesus nonomfa dendi. Apa Jesus ga ya kere pevhu, age nga rongo vantu yininke yoyiwa eyi ngau ka rugana Uhompa waKarunga. Ose twa hara eyi azi rongo Bibeli kuhamena sizoweseso  ntani noyininke yoyiwa eyi ayi tompoka morwa sizoweseso. Ose kupandura sizoweseso morwa aso kutupulisira tu kare nelikwatakano lyewa naJehova ntani naJesus. Ava va kara nepuro mwaJesus, nawo kwa kara nehuguvaro lyokukaparuka narunye ntani nehuguvaro lyokukamona hena vahali vawo ava va fa. (Joh. 5:28, 29; Rom. 6:23) Kwato yuma eyi twa rugana eyi nayi tu ninkisa tu gwane matungiko aga ntani ose kapi ta tu vhuru kufuta Karunga naKristusa kweyi va tu ruganena. (Rom. 5:8, 20, 21) Nye ose kuvhura kulikida rupandu rwetu rorunene kwawo. Ngapi omu natu yi rugana?

4. Ngapi omu Mariya Mangadarena ga likidire rupandu rwendi kweyi ga mu ruganenene Jesus? (Tara efano.)

⁴ Tu konakoneni sihonena somukadi goMujuda gedina Mariya Mangadarena. Age nga hepa sili unene, morwa nompepo donondona ntambali edi nga di mu hepeke unene. Age nampo ga lizuvhire asi kwato ngano ogu ga vhulire kumuvatera. Yipo nye, gazara tupu rupandu oru ga kere naro apa Jesus ga mu mangwilire konompepo dina nga di mu hepeke. Rupandu rwendi kwa mu tumangedere yipo a ya kare murongwa gwendi ntani noku ruganesa siruwo nononkondo dendi ntani noyiweka yendi yipo a mu kwatese ko mosirugana sendi. (Ruk. 8:1-3) Nampili ngomu Mariya ga kere norupandu rorunene kweyi ga mu ruganenene Jesus pamundinda, age nampo kapi ga divire asi Jesus nga ka mu ruganena yoyinzi komeho. Age kwa geve eparu lyendi kovantu, yipo asi “nkenye ogu a mu pura” nga ka gwane mwenyo gwanarunye. (Joh. 3:16) Mariya kwa likidire simpe rupandu kwaJesus pokukara mulimburukwi. Ngomu Jesus ga hepere kositji esi va mu pamparere, Mariya kwa sikeme pepi nendi morwa age kwa kere nosinka kwaJesus ntani kwa here kuhengagwida ava va kere po. (Joh. 19:25) Konyima zapa ga fire Jesus, Mariya kumwe novakadi vapeke vavali kwa twere yikwedumba kontoko yipo va ka wapaikire rutu rwaJesus evhumbiko. (Mar. 16:1, 2) Jehova kwa pere Mariya uhwi wounene morwa age kwa kere mulimburukwi kwaJesus. Jesus kwa gwanekerere kumwe naMariya ntani kwa zogerere kumwe nendi konyima zapa va mu vhumbwire. Varongwa wovasesu tupu va kere nompito zangoso.—Joh. 20:11-18.

5. Ngapi omu natu likida rupandu rwetu kwa nayinye eyi ga tu ruganena Jehova naJesus?

 ⁵ Nose kuvhura kulikida rupandu rwetu kwa nayinye eyi ga tu ruganena Jehova naJesus pokuruganesa siruwo nononkondo detu ntani noyimaliwa yetu yipo tu kwatese ko sirugana soUhompa. Pasihonena, ose nampo kuvhura tu vatere mokutunga mavango aga atu ruganesa mokukarera Jehova ntani noku ga pakera mbili.

6. Morwasinke natu uyungira asi sizoweseso kuna kara uhwi wopamundinda?

⁶ Apa atu gazadara ko kuhamena omu ga tu hara Jehova naJesus, ayo kututumangeda tu va hare hena nose. (1 Joh. 4:10, 19) Ose ku va hara hena unene apa atu dimburura asi Jesus kwa ya tu fira pamundinda. Mupositoli Paurusa ga yi divire eyi ntani kwa likidire rupandu rwendi apa ga tjangerere Vagarata pokuuyunga asi: ‘MunwaKarunga kwa here nge nokuligava mwene mwarwange.’ (Gar. 2:20) Kupitira mosizoweseso, Jehova kwa ku kokera kwendi yipo o kare kaume kendi. (Joh. 6:44) Ngoso ayo kapi ayi kuhafesa pokudiva asi Jehova ga mwene yuma yoyiwa moge ntani asi ga futire mfuto zonene yipo a ku tumbure asi kaume kendi ndi? Ayo ngoso kapi ayi nkondopeke eharo lyoge lyokuhara Jehova naJesus ndi? Yipo nye, twa hepa kulipura nyamwetu asi, ‘Yisinke na li tumangeda nge eharo olyo lyokuhara Jehova naJesus ni rugane?’

7. Ngomu tuna kuyimona pefano, ngapi omu natuvenye natu yi likida asi twa hara Jehova naJesus? (2 Vakolinte 5:14, 15; 6:1, 2)

⁷ Eharo lyetu lyokuhara Karunga naKristusa kututumangeda tu likide eharo wopeke. (Resa 2 Vakolinte 5:14, 15; 6:1, 2.) Nkedi zimwe omu atu likida eharo lyetu kwaJehova naJesus kuna kara pokulihameka mo noupampi mosirugana sokuzuvhisa. Ose kuzuvhisira nkenye ogu atu gwanekere nage. Ose kapi atu nyokere po kuuyunga nagumwe morwa asi yeeyi ga tundilira korudi ndi kompo zongandi. Ntani hena, ose kuuyungisa vantu navenye yikare asi awo nongawo  ntani va lironga ndi yi kare asi awo ruhepo ntani kapi va lironga. Monkedi ezi, ose kuna kuruganena kuliza nositambo saJehova asi “vantu navenye va va parure ntani va kare nediwo lyousili.”—1 Tim. 2:4.

8. Ngapi omu natu likida eharo kovanavazinyetu?

⁸ Ose hena kuyilikida asi twa hara Jehova naJesus pokulikida eharo kovanavazinyetu. (1 Joh. 4:21) Ose kwa kara nositumbukira sosinene kwa nkenye eyi va hepa ntani ose ku va vatera apa ava ligwanekere nomaudigu. Ose kuva hengagwida apa ava fisa gumwe ogu va hara, ku va dingura apa ava vere, ntani ose kurugana paapa twa hulira yipo tu va korangede apa ava dompo mutjima. (2 Kol. 1:3-7; 1 Tes. 5:11, 14) Ose kutwikira ku va kanderera po morwa twa yi diva asi “ekanderero lyomuhungami kwa kara nononkondo ntani kuvhura kuvatera vantu.”—Jak. 5:16.

9. Nkedi musinke hena zimwe omu natu vhura kulikida eharo kovanavazinyetu?

⁹ Ose kulikida hena eharo kovanavazinyetu pokurugana unene yipo tu twikire kukara nombili nawo. Ose kukondja yipo tu honene sihonena saJehova sokugusira po. Nsene asi Jehova kwa geve Munendi yipo a ya tu fire kononzo detu, ngoso ose kapi ta tu vhuru kugusira po vanavazinyetu nsene va tu zonena ndi? Ose kapi tuna hara kukara ngwendi mukareli gomudona ogu va tumbura mosifanekeso simwe saJesus. Nampili konyima zapa hekurwendi ga mu gusilire po makongo gendi gomanzi, mukareli gwina kapi ga gusilire po mukareli mukwawo ogu ga mu korotere makongo gomanunu tupu. (Mat. 18:23-35) Nsene asi kapi omu li zuvhu nagumwe gomombungakriste, kuvhura o rugane sininke sokuhova pokutulisa po mbili namunazinyetu ogo komeho zoMurarero ndi? (Mat. 5:23, 24) Nsene o yi rugana oyo, ove ngo yi likida asi wa kara neharo lyenene kwaJehova naJesus.

10-11. Ngapi omu vakuronambunga nava likida eharo kwaJehova naJesus? (1 Peturusa 5:1, 2)

¹⁰ Ngapi omu vakuronambunga nava vhura ku yi likida asi va hara Jehova naJesus? Nkedi zomulyo po kuna kara pokupakera mbili yihepwa yononzwi daJesus. (Resa 1 Peturusa 5:1, 2.) Jesus kwa zeresere nawa sitwa oso komupositoli Peturusa. Konyima zapa ga patanene Jesus yikando yitatu, Peturusa kwa ya kere neharo lyenene lyokuyilikida asi ga here Jesus. Konyima zapa va mu vhumbwire, Jesus kwa pulire Peturusa asi: “Simoni, munwaJohanesa wa hara nge ndi?” Ose kuvhura kukara nehuguvaro asi Peturusa ngano ga vhulire kurugana nkenye eyi yipo a likide eharo lyendi kwahekurwendi. Jesus kwa tanterere Peturusa asi: “Kunga nonzwigona dange.” (Joh. 21:15-17) Ntani meparu lyendi nalinye, Peturusa kwa pakerere mbili nonzwi daKristusa mokuyilikida asi ga here Jesus.

¹¹ Moyivike yongandi komeho zoMurarero ntani konyima zoMurarero, ngapi omu vakuronambunga nomu vhura kuyilikida asi nonkango edi Jesus ga tanterere Peturusa kwa kara nomulyo kweni? One kuvhura kuyilikida asi mwa hara Jehova naJesus pokulitulira po nkenye apa siruwo sokukorangeda vanavazinyeni ntani nokurugana unene yipo mu vatere ava va tengura monyima va tengwire kwaJehova. (Hes. 34:11, 12) One hena kuvhura kuhetekera ko kukorangeda varongwa woBibeli ntani nava ava ya kara poMurarero gwaHompa. Ose tuna hara ku va ninka va li zuvhe asi tuna va tambura, morwa ose twa kara nehuguvaro asi nawo ngava kara varongwa vaJesus.

12. Morwasinke nonkango edi ga uyungire Jesus mesiku lyendi lyokuhulilira adi tu pere uradi? (Johanesa 16:32, 33)

¹² Mesiku lyendi lyokuhulilira komeho a ka fe, Jesus kwa tanterere varongwa vendi asi:  “Mouzuni ou ngomu ligwanekera nomaudigu, nye kareni nouradi! Ame na funda uzuni.” (Resa Johanesa 16:32, 33.) Yisinke ya vaterere Jesus a likide uradi apa nga di mu hepeke nonkore dendi? Age kwa huguvarere mwaJehova. Pokudiva asi varongwa vendi nawo ngava ligwanekera nomaheteko gokulifana, Jesus kwa pulire Jehova a va takamese. (Joh. 17:11) Morwasinke nonkango odo adi tu pere uradi? Morwa Jehova nonkondo unene kupitakana nkenye ezi nkore zetu. (1 Joh. 4:4) Jehova kumona nayinye. Ose twa yi pura asi nsene tu huguvara mwaJehova, age kuvhura kutuvatera yipo tu funde po mautjirwe getu ntani nokulikida uradi.

13. Ngapi omu Josefa gomoAremateya ga likidire uradi?

¹³ Tu konakoneni sihonena saJosefa gomoAremateya. Muhoko goVajuda kwa mu fumadekere unene. Age kwa kere gumwe gomosigongi somasimbi ndi asi gumwe govapanguli wompanguro zonene zoVajuda. Nye nampili ngoso, Josefa kwa ya kere nouradi apa Jesus ga ya kere pevhu. Johanesa kwa uyungire asi age kwa kere “murongwa gwaJesus mokahore-hore morwa kutjira Vajuda.” (Joh. 19:38) Nampili ngomu Josefa ga haferere mbudi zoUhompa, age kapi nga tantere wopeke asi ga kere nepuro mwaJesus. Age nampo kwa kere nowoma asi ngano vantu kapi ngava mu fumadeka hena nsene ngano va yi divire asi age kwa kere murongwa gwaJesus. Yi kare asi konda musinke, Bibeli ku tu tantera asi konyima za pa ga fire Jesus, Josefa “yipo ga zire kwaPiratusa a ka hundire simpu saJesus nampili ngomu ya kere udigu.” (Mar. 15:42, 43) Josefa kapi hena ga hetekerere ko ku yi horekera vantu asi age kwa kere murongwa gwaJesus.

14. Yisinke no rugana nsene asi ove kwa kara noudigu wokutjira vantu?

¹⁴ Nove kwa tjira vantu ngwendi Josefa ndi? Apa o kara kosure ndi koyirugana, ove kulizuvha eswau poyiruwo yimwe pokutantera ko wopeke asi ove gumwe goNombangi daJehova ndi? Ove kusinganyeka kukara muzuvhisi ndi kugwana ekuho morwa wa kara nosinka kuhamena eyi ngava kugazarera wopeke ndi? Wa ha pulisira malizuvho gokufana ngoso ga ku kondere mokurugana yininke eyi wa diva asi uhunga. Kanderera kwaJehova nelituromo. Mu pura a ku pe uradi wokurugana mpango zendi. Ngomu ngo limonena omu Jehova ana kulimburura makanderero goge, ove ngo ya nkondopara ntani ngo ya kara nouradi.—Jes. 41:10, 13.

15. Konyima za pa Jesus ga monekerere varongwa vendi, yisinke rwa va tumangedere ruhafo rwawo va rugane? (Rukasa 24:52, 53)

¹⁵ Varongwa vaJesus kwa guvire unene apa ga fire Jesus. Hetekera ko kulitura nyaamoge moukaro  wawo. Awo kapi tupu va lizuvhire asi kwa zumbanesere kaume kawo ogu va hara, nye kwa lizuvhire asi va zumbanesere ehuguvaro lyawo. (Ruk. 24:17-21) Nye nampili ngoso, apa ga va monekerere Jesus, age kwa li tulilire po siruwo sokuvavatera yipo va kwate egano situmbukira sendi sokusikisa mo mauporofere gomoBibeli. Age kwa va pere hena sirugana somulyo esi nava rugana. (Ruk. 24:26, 27, 45-48) Konyima zomazuva 40 posiruwo esi Jesus ga tengwire meguru, varongwa kapi hena va guvire, nye awo kwa hefe unene. Ayo kwa va hafesere pokudiva asi hekurwawo muzuni ga kere ntani age ga li wapaikilire kuvavatera yipo va sikise mo sirugana sawo sosipe. Ruhafo rwawo kwa va tumangedere va hamberere Jehova va hana kuhageka.—Resa Rukasa 24:52, 53; Yirug. 5:42.

16. Ngapi omu natu vhura kuhonena varongwa vaJesus?

¹⁶ Ngapi omu natu vhura kuhonena varongwa vaJesus? Ose kapi tupu atu gwana ruhafo mokukarera Jehova moyivike yongandi komeho zoMurarero ndi konyima zoMurarero, nye mvhura nazinye. Eyi kutanta asi twa hepa kutura muhowo Uhompa waKarunga meparu lyetu. Pasihonena, sinzi sovantu kwa wapukurura elikwamo lyawo yipo va li hameke mokuzuvhisa, va ponge mapongo ntani nokulihameka mo moukareli wepata nkenye apa. Vamwe kwa tokora kudira kukara nemona eli ava va tara wopeke asi hepero kukara nalyo, yipo va li hameke mo unene mombungakriste ndi yipo va ka vatere oku kuna hepa evatero lyenene lyovazuvhisi woUhompa. Nampili ngomu twa hepa elididimiko yipo tu twikire kukarera Jehova, age kwa tu tumbwidira asi ngatu tungika momunene nsene tu tura muhowo Uhompa meparu lyetu.—Yis. 10:22; Mat. 6:32, 33.

17. Yisinke ono tokomene kurugana moyivike yongandi komeho Murarero gu tameke ndi konyima zoMurarero? (Tara efano.)

¹⁷ Ose kuna kundindira nononkondo mo ku ya kara poMurarero ogu nga gu kara moUvali, 4 Kudumogona. Nye nampili ngoso, wa ha ndindira dogoro nga gu sike mo Murarero ntani ngo gazadara ko kuhamena eparu lyaJesus ntani nonomfa dendi ntani neharo eli ga tu likida Jehova naJesus. Gazadara ko rorunzi kuhamena yininke eyi nsene kuvhura, moyivike yongandi komeho Murarero gu tameke ndi konyima zoMurarero. Pasihonena, litulira po siruwo sokuresa nokuteda ko kuhamena yihorokwa eyi ya kara mokarata zomombapira zekepongo zomwaKudumogona 2019, pepenuno 4. Ngomu ono kuresa kuhamena eparu lyaJesus, papara yihorokwa yomoBibeli eyi nayi vhura kunkondopeka rupandu neharo nouradi woge ntani noruhafo roge. Makura hetekera ko kugazadara ko kuhamena nonkedi dimwe omu no vhura kulikida rupandu roge rokutundilira komutjima. Ove kuvhura kukara nehuguvaro asi Jesus nga hafera nayinye eyi ngo rugana yipo omu diworoke moyivike yongandi komeho Murarero gu tameke ndi konyima zoMurarero.—Ehor. 2:19.