LONGI DIA 5
“O Zola kwa Kristu Kukutufilanga”
“O zola kwa Kristu kukutufilanga . . . kimana awana bena moyo, balembi kadila diaka o moyo muna yau kibeni.”—2 KOR. 5:14, 15.
NKUNGA WA 13 Kristu i Mbandu Eto
MANA TULONGOKA a
1-2. (a) Aweyi tumonanga vava tuyindulanga e zingu kia Yesu ye salu kiandi kia umbangi? (b) Nkia mambu tulongoka mu longi diadi?
VAVA tufwilwanga o muntu ona tutoma zolanga, viangi kiayingi kikilu tumonanga! Entete, tulenda kendalala yo mona e mpasi musungula avo mpasi zayingi kamwene vitila kafwa. Kansi kuna kulanda, tulenda mona e kiese vava tuyindula e diambu dina o muntu kavanga yovo kavova diatukasakesa yovo diatusevesa.
2 Diau dimosi mpe yo yeto, tukendalalanga vava tuyindulanga e mpasi zina Yesu kamona ye lufwa lwandi. Muna kolo kia Luyindulu, tuvaulanga e ntangwa muna yindula e nsasa a kimenga kia lukûlu kia Yesu. (1 Kor. 11:24, 25) Kana una vo i wau, tutoma yangalelanga muna mawonso Yesu kavova yo vanga vava kakala ova ntoto. Ediadi dikutukasakesanga mpe vava tuyindulanga muna mana Yesu kevanganga owau ye mana kevanga mu kuma kieto kuna sentu. O badika e mambu mama yo zola kwandi muna yeto, dilenda kutufila mu songa luyangalalu lweto muna mavangu nze una tulongoka mu longi diadi.
LUYANGALALU LUKUTUFILANGA MUNA LANDA YESU
3. Nkia kuma tuna yau ilenda kutufila mu vutulanga matondo mu kuma kia lukûlu?
3 Tuvutulanga kikilu matondo vava tuyindulanga e zingu ye lufwa lwa Yesu. Ekolo kakala ova ntoto muna salu kiandi kia umbangi, Yesu walonga o wantu mu kuma kia nsambu zitwasa Kintinu kia Nzambi. Oyeto tutoma vutulanga matondo mu kuma kia ludi kia Kintinu. Tuvutulanga mpe matondo mu kuma kia lukûlu e kuma kadi lwaziula e nzila muna kala ye ngwizani ambote yo Yave yo Yesu. Awana bekwikilanga muna Yesu bena mpe ye vuvu kia zinga yakwele mvu yo monana diaka ye azolwa au ana bafwa. (Yoa. 5:28, 29; Roma 6:23) Ke tufwanukinu nkutu e nsambu zazi ko ye ke tuna ye dina tulenda vutula nkutu ko kwa Nzambi ye kwa Kristu muna mawonso bavanga muna kuma kieto. (Roma 5:8, 20, 21) Kansi, tulenda kubasonga luyangalalu lweto. Mu nkia mpila?
Obadika muna mbandu a Maria Mandala aweyi ikufidilanga mu songa luyangalalu? (Tala e tini kia 4-5)
4. Aweyi Maria Mandala kasongela luyangalalu lwandi muna dina Yesu kavanga mu kuma kiandi? (Tala e fwaniswa.)
4 Badika e nona kia nkento mosi wa mwisi Yuda una ye nkumbu Maria Mandala. Wamweswanga e mpasi kwa nkuya nsambwadi yamu tezo kiamona vo kesinga lenda kuyivevola ko muna diambu diadi. Owau yindula una kamona vava Yesu kalenda vayikisa e nkuya miamina muna nitu andi! O luyangalalu lwandi, lwamfila mu kituka nlandi a Yesu ye wasadila e ntangwa, ngolo ye mavua mandi muna yikama Yesu muna salu kiandi kia umbangi. (Luka 8:1-3) Kana una vo Maria watoma vutulanga matondo kwa Yesu mu kuma kia mawonso kavanga mu kuma kiandi, kayindulanga ko e diambu diampwena dina Yesu kadi vanga diaka kuna sentu. Wadi vana o moyo andi mu kuma kia nza yawonso “kimana konso ona osonga lukwikilu muna yandi” ke fwaswa ko, moyo a mvu ya mvu kevua. (Yoa. 3:16) Dianu vo, Maria watoma songa luyangalalu muna Yesu yo sikila ye kwikizi muna yandi. Vava o Yesu kamweswanga e mpasi vana nti, Maria wakala vana ndambu muna fiaulwisa Yesu ye wantu ankaka. (Yoa. 19:25) Vava Yesu kafwa, Maria ye akento wole banata e lekwa ya nsunga muna zika Yesu. (Maku 16:1, 2) E kwikizi kia Maria kiatoma sendwa. Wakala ye lau dia mona Yesu vava kafuluka yo mokena yandi, lau dina alongoki akaka ke bakala diau ko.—Yoa. 20:11-18.
5. Aweyi tulenda songela luyangalalu lweto muna mawonso Yave yo Yesu bavanga mu kuma kieto?
5 Oyeto mpe tulenda songa luyangalalu lweto muna mawonso Yave yo Yesu bavanga mu kuma kieto, muna sadilanga ntangwa, ngolo ye mavua meto muna yikama e Kintinu. Kasikil’owu, tulenda kukivana mu sadisa muna salu yantungilu yo vangulula e fulu ya nsambila.
O ZOLA KWETO MUNA YAVE YO YESU KUKUTUFILANGA MUNA ZOLA AKAKA
6. Ekuma tulenda vovela vo o lukûlu i lukau Yave kavana kwa konso muntu mu yeto?
6 Vava tuyindulanga o zola kuna Yave yo Yesu batusonga, ediadi dikutufilanga muna toma kubazola. (1 Yoa. 4:10, 19) Ozaya wo vo Yesu wafwa mu kuma kia konso muntu mu yeto, dikutufilanga muna toma kubazola. Paulu wa ntumwa watoma zaya e diambu diadi yo songa luyangalalu lwandi vava kasonekena ampangi kuna Ngalatia vo: “Mwan’a Nzambi, . . . wanzola yo kukiyekola muna wete diame.” (Ngal. 2:20) Muna lusadisu lwa lukûlu, Yave watunta kimana wakala nkundi andi. (Yoa. 6:44) Ozaya vo Yave diambu diambote kamona muna ngeye yo futa e ntalu i sundidi kimana wakala nkundi andi, nga ke disimbanga ntim’aku ko? Nga ediadi ke dikufilanga ko muna wokesa o zola kwaku muna Yave yo Yesu? Ozevo diambote twakiyuvulanga: ‘Adieyi o zola kwaku kulenda kumfila mu vanga?’
O zola kweto muna Nzambi ye muna Kristu kukutufilanga mu samuna e nsangu za Kintinu kwa wantu a mpila zawonso (Tala e tini kia 7)
7. Nze una tumwene muna foto, aweyi tulenda songela o zola kweto kwa Yave yo Yesu? (2 Korinto 5:14, 15; 6:1, 2)
7 O zola kweto muna Yave yo Yesu kukutufilanga muna zola akaka. (Tanga 2 Korinto 5:14, 15; 6:1, 2.) I mosi muna mpila tulenda songela o zola kweto muna Yave, i samunanga e nsangu zambote yo vema kwawonso. Tumokenanga yo wantu awonso tuwanananga yau. Ke tusianga mpambula ko mu kuma kia se kia nitu kia muntu, kanda kawutukila, kiakala vo mvuama yovo ve yovo tunda ye fulu kasansukila. Muna mpila yayi, tusalanga kumosi ye kani dia Nzambi, dia sia vo, “wantu a mpila zawonso bavuluzwa yo vua zayi wasikila wa ludi.”—1 Tim. 2:3, 4.
8. Aweyi tulenda songela vo tuzolanga e mpangi zeto?
8 Tusonganga mpe o zola kweto muna Nzambi yo Kristu vava tuzolanga mpangi zeto zawonso. (1 Yoa. 4:21) Tusonganga mpe vo tutokanenanga e wete diau yo kubasadisa vava bekalanga muna mpasi. Tukubafiaulwisanga vava befwilwanga e yitu, vava beyelanga ye vava tuvanganga mawonso muna kubakumika vava bebwilwanga e sumbula. (2 Kor. 1:3-7; 1 Tes. 5:11, 14) Tukwamanananga samba mu kuma kiau muna kubasungamesa vo “e ndodokela za muntu ansongi zivuidi nkuma.”—Yak. 5:16.
9. Ayeyi i mpila yankaka tulenda songela o zola kwa mpangi zeto?
9 Tusonganga mpe o zola kwa mpangi zeto vava tuvanganga e ngolo muna tatidila luvuvamu. Tutangininanga mpe e mpila ina o Yave kelolokelanga o wantu. Avo Yave wayambula o mwan’andi kafwa mu kuma kia masumu meto, nga oyeto mpe ke tulendi loloka mpangi zeto ko avo batuvangidi e mbi? Ke tuzolele kala ko nze ntaudi ona oyikwanga muna kingana kia Yesu. Kana nkutu vava o mfumu andi kanyambulwila e mfuka ampwena kakala yau, ontaudi ndioyo kazola loloka nkwandi ntaudi ko ona wandeva e nzimbu zakete. (Mat. 18:23-35) Avo diambu obakane diau yo mpangi aku muna nkutakani, nga olenda vanga mawonso muna siamisa o luvuvamu vitila o Luyindulu? (Mat. 5:23, 24) Ovanga wo, tusonga vo tuzolanga Yave yo Yesu.
10-11. Aweyi akuluntu balenda songela o zola muna Yave yo Yesu? (1 Petelo 5:1, 2)
10 Aweyi akuluntu balenda songela vo bezolanga Yave yo Yesu? E mpila i sundidi o mfunu balenda wo vangila, i lunga-lunganga e nsatu za mameme ma Yesu. (Tanga 1 Petelo 5:1, 2.) Yesu watoma kiesesa e diambu diadi kwa Petelo wa ntumwa. Vava kavakulwila Yesu nkalu mu nkumbu tatu, Petelo wakala ye kani diasonga vo wazolanga kikilu Yesu. Vava kafuluka, Yesu wayula kwa Petelo vo: “E Simone wa mwan’a Yoane, nga zola okunzolanga e?” Tulenda kala ye ziku vo Petelo wavanga mawonso muna songa vo wazolanga kikilu o Mfumu andi. Yesu wavovesa Petelo vo: “Vungula mameme mame.” (Yoa. 21:15-17) Yakuna nsuka zingu kiandi, Petelo watoma lunga-lunganga mameme ma Mfumu andi muna songa vo watoma zolanga Yesu.
11 Akuluntu, muna nsungi a Luyindulu, aweyi nulenda songela vo e mvovo mina Yesu kavovesa kwa Petelo mfunu mina kwa yeno? Lulenda songa vo luzolanga Yave yo Yesu muna vungulanga mpangi zeno yo vanganga e ngolo muna sadisanga awana bayoya muna mwanda kimana bavutuka kwa Yave. (Yez. 34:11, 12) Lulenda mpe sia e sungididi kwa alongoki a Bibila yo wantu ampa ana belungana muna Luyindulu, ovanga wo dikubasadisa mu mona vo batomene tambulwa, kadi oyau mpe balenda kituka se alandi a Yesu.
O ZOLA MUNA KRISTU KUKUTUFILANGA MU KALA AKWA UNKABU
12. E mvovo mina Yesu kavova muna fuku wa vitila lufwa lwandi, aweyi mikutukumikinanga? (Yoane 16:32, 33)
12 Muna fuku vitila lufwa lwandi, Yesu wavovesa alongoki andi vo: “Ova nza mpasi numona, kansi nukala yo unkabu! Omono nsundidi e nza.” (Tanga Yoane 16:32, 33.) Nki kiasadisa Yesu muna sunda e mbeni zandi kuna unkabu wawonso yo sikila ye kwikizi yamuna lufwa lwandi? Wabunda e vuvu muna Yave. Ozaya wo vo alongoki andi mpe betontwa, Yesu walomba kwa Yave vo kabatanina. (Yoa. 17:11) Ediadi aweyi dikutuvaninanga unkabu? Kadi o Yave osundidi o nkuma ke mu mbeni zeto ko. (1 Yoa. 4:4) Yave omonanga mawonso. Tuna ye ziku vo avo tubundidi e vuvu muna Yave, tulenda sunda o wonga yo songa unkabu.
13. Aweyi Yosefe wa musi Arimataya kasongela unkabu?
13 Badika e nona kia Yosefe wa mwisi Arimataya. Watoma zitiswanga kwa wantu muna Yuda. Wakala mosi muna Afundisi wasadilanga kuna Sanedina yovo kuna Mbazi Ankanu anene ya Ayuda. Kansi vava Yesu kasalanga e salu kiandi kia umbangi ova ntoto, Yosefe kasonga unkabu ko. Yoane wavova mu kuma kiandi vo ‘nlongoki a Yesu kakala kuna sweki, mu kuma kia wonga wa Ayuda.’ (Yoa. 19:38) Kana una vo Yosefe watambulwila e nsangu za Kintinu, kansi wayiswekanga kwa akaka vo wakwikilanga muna Yesu. Wayiswekanga, nanga mu kuma kia wonga wa lembi zitiswa diaka kwa wantu avo babakudi vo yandi nlongoki a Yesu. Kansi, kiakala nkia kuma kiamfila muna kuyisweka, e Bibila kivovanga vo vava Yesu kafwa, Yosefe “okabukidi yo kwenda kwa Pilato, olombele vimbu dia Yesu.” (Maku 15:42, 43) Tuka muna lumbu kina Yosefe kasadisila Yesu, kayiswekanga diaka ko.
14. Adieyi olenda vanga avo wonga wa wantu omonanga?
14 Nga wamona kala wonga wa wantu nze Yosefe? Nga nsoni omonanga muna kuyisunzula kuna sikola yovo kuna salu vo Umbangi a Yave? Nga wonga omonanga muna kituka nteleki yovo vubwa mu kuma kia dina akaka beyindula mu kuma kiaku? Kuyambula ko vo e mambu mama mafila mu lembi vanga dina ozeye vo i diansongi. Samba kwa Yave ye nsi antim’aku yawonso. Unlomba vo kavana unkabu wafwana muna vanga luzolo lwandi. Ekolo omonanga una Yave kevaninanga e mvutu za sambu yaku, ovua nkuma yo kala yo unkabu wayingi.—Yes. 41:10, 13.
E KIESE KIKUTUFILANGA MU SADILA YAVE LEMBI KULULA O VEMA KWETO
15. Vava Yesu kamoneka kwa alongoki, e kiese bamona nkia diambu kiabafila mu vanga? (Luka 24:52, 53)
15 Alongoki batoma kendalala vava Yesu kafwa. Wau, teza kuyisia vana fulu kiau. Ke bavidisa kaka nkundi ko ona batoma zolanga, kansi bamona mpe vo ke bakala diaka ye vuvu ko. (Luka 24:17-21) Ke vavioka kolo ko Yesu wamoneka kwa yau yo vaula e ntangwa muna kubasadisa kimana babakula una lufwa lwandi lwalungisila ungunza wa Bibila. Wabavana mpe salu kiamfunu mu sala. (Luka 24:26, 27, 45-48) Vioka lumbu 40, Yesu wavutuka kuna zulu, o lukendalalu lwa alongoki lwakituka se lwakiese. Kiese kikilu bakala kiau mu zaya vo o Mfumu au wakala o moyo ye wakubama kakala muna kubasadisa muna lungisa e salu kabavana. E kiese kiaki, kiabafila mu kwamanana sadila Yave.—Tanga Luka 24:52, 53; Mav. 5:42.
16. Aweyi tulenda tanginina alongoki a Yesu?
16 Aweyi tulenda tanginina alongoki a Yesu? Tulenda kala ye kiese muna salu kieto kwa Yave ke muna nsungi a Luyindulu kaka ko kansi muna mvu wawonso. Ediadi divavanga vo twasia e Kintinu kia Nzambi va fulu kiantete muna zingu kieto. Ndonga i diau mpe bevanganga. Kasikil’owu, bevanganga e nsobani muna salu yau ya lumbu ke lumbu kimana bayivana muna salu kia umbangi una ufwene, kwenda muna tukutakanu yo kala ye Nsambila ya Esi Nzo konso lumingu. Akaka bayambula vava kala ye mavua mayingi kimana batoma sadilwa muna nkutakani yovo benda sadila muna zunga ivuilu ateleki ayingi a Kintinu o mfunu. Kana una vo luzindalalu divavanga muna kwamanana sadila Nzambi eto, Yave osianga nsilu vo okutusambula avo tusidi e Kintinu va fulu kiantete muna zingu kieto.—Nga. 10:22; Mat. 6:32, 33.
Muna nsungi a Luyindulu, vaula e ntangwa muna badika muna mana Yave yo Yesu bavanga kwa ngeye (Tala e tini kia 17)
17. Nkia kani olenda kala diau muna nsungi a Luyindulu? (Tala e foto.)
17 Tuvingilanga ye kiese kiawonso o Luyindulu lwa mvu wau lukala kina Kiazole, 4 kia Abidi. Kansi, ke tufwete vingila kaka e lumbu kia Luyindulu ko muna yindula muna zingu ye lufwa lwa Yesu yo sungamena o zola kuna yandi yo Yave basonga kwa yeto. Tuzolele sadila malau mawonso muna kolo kia Luyindulu kimana twasonga luyangalalu lweto. Kasikil’owu, vaula e ntangwa muna tanga yo badika muna mambu mavangama vitila ye kuna nina lufwa lwa Yesu. Ziula muna Bibila Nsekola ya Nzampa, muna nkudika B12 ina yo ntu a diambu, “Lumingu Lwansuka lwa Zingu kia Yesu ova Ntoto.” Ekolo otanganga, sia e sungididi muna sono ya Bibila ilenda kusadisa mu wokesa luyangalalu lwaku, zola, unkabu ye kiese. I bosi, vava e mpila yasikididi ina olenda songela luyangalalu lwaku. Avo ovangidi wo olenda kala ye ziku vo Yesu oyangalela mawonso ovanga muna kunsungamena muna nsungi a Luyindulu.—Lus. 2:19.
NKUNGA WA 17 “Nzolele Wo”
a Muna kolo kia Luyindulu, tukasakeswanga mu sungamena e zingu kia Yesu, lufwa yo zola kuna yandi yo Se diandi batusonga. Ovanga wo, dilenda kutufila mu vanga diambu. E longi diadi dikutusadisa mu zaya e mpila tulenda songela luyangalalu muna lûkulu yo zola kweto muna Yave yo Yesu. Tulongoka mpe una tulenda songela o zola kwa mpangi zeto, unkabu yo kala ye kiese muna salu kieto.
