1-2. (a) Ka tukwiyivwa buli-buli pala tukwinong’onelapo ivyakukwafannya nu bumi ubwa Yesu sona nu bulumbilili? (b) Ka mu nkani iyi, inti tunenezannye ichoni?

 UMUKAMU witu yo tumughanite pala afwa tukumusoba sana. Tukuba swe bachitima sana pala tukwinong’onela mo ivintu vikabela po akabinagha sona napo akafwanga. Pala akabalilo kendapo, tukwanda pakuhobokako nanti tukwinong’onelapo ivintu ivyiza vyo akutumanyisya bo achili pakufwa pamo amazyu gho akanena aghakutulimbikisya.

² Umwakuyana bulo, vitakutuhobosya nanti tukubelenga mu Bayibolo intamyo zyo u Yesu akakomana nazyo mpaka imfwa yache. Pakabalilo akakukumbukila imfwa iya Yesu, tukuba nu lusako ulwakwinong’onelapo ukulondiwa ukwa sembe iya Kilisitu. (1 Kol. 11.24, 25) Pala tukwinong’onelapo pa vintu vyo u Yesu akanena po akaba pa chisu ichapasi, tukuhoboka sana. Vikutukazya pala tukwinong’onelapo vyo akubomba pakabalilo aka, sona navyo inti abombe muntazi. Pala tukwinong’onelapo pa vintu vyosi ivi nu lughano lo akatulangizya, vikutupangisya ukuti tupalizye muzila izyakupambana-pambana, ngati mo inti twenezye mu nkani iyi.

3. Chifukwa buli tukupalizya isembe iya Yesu?

³ Pala tukwinong’onelapo ivya bumi ubwa Yesu nifwa yache tukuba swe bakuboka. U Yesu po akaba pa chisu ichapasi mubulumbilili bwache, akamanyisyanga abantu ivya malusayo gho Ubumwene u bwa Chala bukwiza pakubapa. Tubughanite hee ubwanaloli bo Ibayibolo likutumanyisya ubwakukwafannya ni sembe sona ni vintu  ivyiza vyo yikwiza pakutubombela. Tukupalizya sana chifukwa cha sembe iya Yesu, yo yikutupangisya ukuti tube pabumanyani ubwiza nu Yehova sona nu Yesu. Bo bali nu lwitiko mwa Yesu, bakusubila ukuti inti bize babennye sona abamanyani babo bo bakafwa. (Yohani 5.28, 29; Lom. 6.23) Pate nachimo-chimo cho tubombitepo ukuti tupokele amalusayo agha, sona nayumo-yumo yo anganyoska ivintu vyosi vyo u Chala nu mwana wache u Yesu Kilisitu batubombeye. (Lom. 5.8, 20, 21) Loli tungalangizya ukupalizya kwitu. Ka tungalangizya buli-buli?

4. Ka u Maliya akalangizya buli-buli ukuti akupalizya vyo u Yesu akamubombela? (Ennya ichituzi.)

⁴ Zatwennye inkani iya mama yumo umu Yuda izina lwache, u Maliya Magadalena. Umukolo uyu akatamiwanga ni mizimu imibibi iyakukwana 7. Akiyivwanga ukuti nayumo-yumo yo angamwavwa. U Yesu akati amwavwa ukuti imizimu imibibi iyi yileke ukumutamya, ka mukwinong’ona ukuti akiyivwa buli-buli? Akwenela ukuti akapalizya sana. Chifukwa chakupalizya vyo u Yesu akamubombela, akasala ukuba mumanyili wache. Akabombezya akabalilo kache, amaka ghache sona na chilichosi cho akaba nacho ukuti avwe pa mbombo iyakulumbilila. (Luka 8.1-3) Napo u Maliya akapalizya sana vyo u Yesu akamubombela, loli atakamanya ukuti u Yesu akwiza pakumubombela ivintu ivyingi muntazi. U Yesu akapeleka ubumi bwache mumalo mwa bantu bosi, “kokuti umuntu wesi yuyo akumusubila” ize abwaghe ubumi ubwa bwila na bwila. (Yohani 3.16) U Maliya alangizya ukupalizya umwakubukilila ukuba musubaliwa kwa Yesu. Bakati bamukomelela u Yesu pikwi, u Maliya akaba papipi ukulangizya ukuti akumwinong’onela, sona akalondagha ukuti abakazye na banji bo bakaba papipi. (Yohani 19.25) U Yesu akati afwa, u Maliya na bakolo bamo babili bakabuka kwipumpa na mafuta aghakununkila ukuti baye bapake umubili wache. (Maliko 16.1, 2) U Yehova akamusaya u Maliya ichifukwa chakuti akaba musubaliwa kwa Yesu. U Maliya akahoboka nkani hee ukuti akakomana nu Yesu akati azyuka nu kunena nawe, ulusako lo abamanyili aba Yesu batakabanalo.—Yohani 20.11-18.

5. Ka tungalangizya buli-buli ukuti tukupalizya vyo u Yehova nu Yesu batubombeye?

 ⁵ Nuswe bulo tungalangizya ukuti tukupalizya vyosi vyo u Yehova nu Yesu batubombeye, nanti tukubombezya akiza akabalilo kitu, amaka ghitu sona ni vintu vyosi vyo tuli navyo ukwavwapo pambombo iya Bumwene. Tungavwapo pambombo iyakuzenga nu kuyannya inyumba izya Bumwene ukuti zibukilile ukuboneka akiza.

6. Choni cho tunganena ukuti, isembe chabupi icha muntu aliwesi pamwene?

⁶ Pala tukwennya ulughano lo u Yehova nu Yesu batulangizizye, vikutupangisya ukuti nuswe bulo tubaghane. (1 Yohani 4.10, 19) Ulughano lwitu lukukula nkani, nanti twazimanya ukuti u Yesu akafwila umuntu aliwesi pamwene. Umutumiwa u Pabuli akayimanya ifundo iyi. Akalangizya ukuti akupalizya po akabasimbila aba Galatiya nukanena ukuti: “Mwana uwa Chala . . . anganite nukufwila pachifukwa icha nene.” (Gal. 2.20) U Yehova akutuguzila kukwache ukuti tube bamanyani bache ukwizila mu sembe iya Yesu. (Yohani 6.44) Ka mutakuhoboka ukufuma pasi pa moyo pakumanya ukuti, u Yehova enizyemo ivyiza mumwinyu nukubapa umwana wache ukuti mube mumanyani wache? Ka ivi vitakukazya ulughano lwinyu mwa Yehova nu Yesu? Mwilalusye ukuti, ‘Ka ulughano ulu lukumpangisya une ukuti imbombe ichoni?’

7. Ngati mo tukwenezya pachituzi, ka aliwesi pamwene angalangizya buli-buli ukuti amughanite u Yehova nu Yesu? (2 Aba Kolinti 5.14, 15; 6.1, 2)

⁷ Ichifukwa chakuti tumughanite u Yehova nu Yesu, vikutwavwa ukuti tulangizye ulughano ku bantu abanji. (Belenga 2 Aba Kolinti 5.14, 15; 6.1, 2.) Izila yoka yo tungalangizizya ulughano ulu, kokubikapo umoyo pambombo iyakulumbilila. Tukunenezannya na aliwesi yo twakomana nawe. Tutakusala umuntu chifukwa cha luko lwache, umutundu wache pamo mo akwaghila ivintu pabumi bwache sona nako akulila. Tukubomba bunubu chifukwa tukulangizye ukuti, tukukolelana  nu bwighane ubwa Yehova yo akulonda “ukuti abantu bosi bapokiwe, sona nukuti babumanye ubwanaloli.”—1 Tim. 2.4.

8. Ka tungalangizya buli-buli ukuti tubaghanite abakamu na bayemba bitu?

⁸ Tungalangizya ukuti tumughanite u Yehova nu Yesu pala tukubukilila ukubaghana abakamu na bamuyemba bitu. (1 Yohani 4.21) Tukulangizya ukuti tukubinong’onela, pakumanya vyo bakulondiwa sona tukubombapo zimo ukuti tubavwe. Tukubasangalusya pala umuntu yo bamughanite afwa, nanti babina tukubuka pakubennya sona tukubomba vyosi vyo tungakwanisya ukuti tubakazye pantamyo zyosi zyo bakukomana nazyo. (2 Kol. 1.3-7; 1 Tes. 5.11, 14) Akabalilo kosi tukubukilila ukubiputila abakamu na bayemba bitu, chifukwa tukumanya ukuti ulwiputo ulwa “muntu umugholosu lwamaka.”—Yak. 5.16.

9. Nkimba zila buli iyamwabo yo tungalangizizya ukuti tubaghanite abakamu na bayemba bitu?

⁹ Tukulangizya sona ulughano ku bakamu na bayemba bitu, nanti tukubukilila ukuba nabo pamtende. Tukumuyezya u Yehova pankani iyakuhobokela abanji. Pala u Yehova akatuma u Mwana wache ukuti ize atufwile chifukwa cha mbibi zyitu, nkimba uswe tutangabahobokela abakamu na bayemba bitu pa vyo bakutunangila? Tutakulonda ukuba ngati uwa mbombo umubibi yo akutambuliwa muchili icha Yesu. Ubwana wache akamuhobokela inkongole inkulu yo akaba nayo, loli umwene akapotwa ukumuhobokela uwa mbombo uwamwabo akankongole akanandi ko akaba nako. (Mat. 18.23-35) Pala mutakolelana nu mukamu pamo umuyemba kuchipanga, ka mungayezya-yezya ukunyosezyapo umutende po ulukomano ulwa Kukumbukila imfwa iya Yesu luchili pakubombiwa? (Mat. 5.23, 24) Nanti mungabomba bunubu mungalangizya ukuti mumughanite nkani u Yehova sona nu Yesu.

10-11. Ka abasongo abachipanga bangalangizya buli-buli ukuti bamughanite u Yehova nu Yesu? (1 Pitala 5.1, 2)

¹⁰ Ka abasongo abachipanga, bangalangizya buli-buli ukuti bamughanite u Yehova nu Yesu? Ichakulondiwa nkani, ko kupwelelela ing’ozi izya Yesu. (Belenga 1 Pitala 5.1, 2.) U Yesu akalongosola akiza sana ifundo iyi kwa mutumiwa u Pitala. Akati amukana katatu, u Pitala akalondagha hee ukulangizya ukuti amughanite u Yesu. U Yesu akati azyuka akamulalusya ukuti: “Wee Simoni umwana uwa Yohani, nkimba unganite?” Tukusubila ukuti u Pitala akwenela akabikapo umoyo ukubomba chilichosi cho angakwanisya ukuti alangizye ukuti amughanite u Yesu. U Yesu akamubuzya u Pitala ukuti: “Lyesya ing’ozi zyane.” (Yohani 21.15-17) Pabumi bwache bosi u Pitala akabukilila ukupwelelela ing’ozi izya Mwene wache ukulangizya ukuti akamughana naloli u Yesu.

¹¹ Ka abasongo abachipanga, bangalangizya buli-buli ukuti amazyu gho u Yesu akamubuzya, u Pitala ghakulondiwa nkani pakabalilo akakukumbikila imfwa iya Yesu? Mungalangizya ukuti mumughanite u Yehova nu Yesu, pala mukubukilila ukubendela abakamu na bayemba bo bakaleka ukumubombela u Yehova, ukuti mubavwe umwakuti banyokele sona kwa Yehova. (Eze. 34.11, 12) Mungalangizya sona ulughano ku bantu bo bakumanyila Ibayibolo sona nabo kabwandilo ukufika palukomano ulwa Kukumbukila imfwa iya Yesu. Tukulonda ukuti abantu aba bize biyivwe ukuti bapokeleliwa, chifukwa tukusubila ukuti bope bangize babe bamanyili ba Yesu.

12. Pala tukwinong’onelapo amazyu gho u Yesu akanena pabusiku ubwabumalilo bo achili pakufwa, ka ghakutukazya buli-buli? (Yohani 16.32, 33)

¹² Ubusiku ubwabumalilo bo achili pakufwa, u Yesu akababuzya abamanyili bache ukuti: “Ichisu ichapasi ichi chikwiza pakubavwima, loli mujimbe nkani umoyo pakuti nachipota kale ichisu ichapasi.” (Belenga Yohani 16.32, 33.) Nkimba choni cho chikamwavwa u Yesu ukuti ajimbe po abalwani bache bakamutamyanga, sona ukuti abukilile ukuba musubaliwa mpaka po akafwila? Ichifukwa chakuti, akabalilo kosi  akamusubilagha u Yehova. U Yesu akazimanya ukuti abamanyili bache bope, bakwiza pakukomana ni ntamyo ngati zgo akakomana nazyo, cho chifukwa akamulaba u Yehova ukuti abasunge. (Yohani 17.11) Ka ivi, vikutukazya buli-buli ukuti nuswe tubukilile ukuba bakujimba? Tukukaziwa sana, chifukwa tukumanya ukuti u Yehova wamaka nkani, ukulusya abalwani bitu. (1 Yohani 4.4) U Yehova akwennya chilichosi. Tukumanya ukuti pala akabalilo kosi tukumusubila u Yehova, angatwavwa ukuti tuzipote intamyo nu kubukilila ukujimba.

13. Ka u Jozefu uwaku Alimateya akalangizya buli-buli ukujimba?

¹³ U Jozefu uwaku Alimateya akaba umuntu uwakuchindikiwa hee na Bayuda. Akaba mugulu ilwa bantu bo bakabombagha mu nkoti ilikulu ilya Sanihedilini mu Yuda. Loli po u Yesu akalumbililagha pa chisu ichapasi, u Jozefu akaba umuntu uwakujimba. U Yohani akanena ukuti ‘u Jozefu akaba mumanyili uwa Yesu uwambula kumanyikwa pakuti akanyilagha abalaghili aba Chiyuda’ (Yohani 19.38) Nangabuli u Jozefu akahoboka na mazyu amiza agha Bumwene, loli akifisagha kubamwabo ukuti ali nu lwitiko mwa Yesu. Tutakukayikila ukuti u Jozefu akoghopagha ukuti nanti abantu bazimanya ukuti mumanyili uwa Yesu inti baleke pakumuchindika. Mulimosi mo vingabela, loli Ibayibolo likutubuzya ukuti bo u Yesu afwa u Jozefu “akabuka kwa Pilato nu bujivu pakumulaba ukuti amupe umuvimba uwa Yesu.” (Maliko 15.42, 43) Ubovwili bosi bo u Jozefu akapeleka kwa Yesu pakabalilo aka, bukamanyikwa ku bantu bosi.

14. Ka mungabomba buli-buli nanti muli ni ntamyo iyakoghopa abantu?

¹⁴ Ka numwe bulo mukoghopa abantu ngati we Jozefu? Nanti muli ku sukulu pamo ku mbombo, ka mukupanga isoni ukuti mubamanyisye abantu ukuti mwe Bakaboni ba Yehova? Nkimba mukupotwa ukuti mube mwe balumbilili abambula ukoziwa pamo mukupotwa pakoziwa, ichifukwa chakuti mukoghopa vyo abantu banginong’ona ivya umwe? Ivintu ivi vitakabapangisye ukuti munyokele munyuma sona nukupotwa ukupanga ichintu cho chiza. Mubukilile ukulaba kwa Yehova, po akwiza pakubaghomya ukuti mukwanilisye ukubomba ubwighane bwache. Pala mukwennya mo u Yehova akwamulila inyiputo zyinyu, vingabavwa ukuti mujimbe sona vingabakazya.—Yes. 41.10, 13.

15. U Yesu akati abonekela kubamanyili bache, ka ulusekelo lo bakaba nalo lukapangisya ukuti babombe ichoni? (Luka 24.52, 53)

¹⁵ U Yesu akati afwa abamanyili bache bakaba nichitima hee! Mwinong’onele ukuti numwe mukabako pakabalilo aka. Batakiyennya ukuti batagha bulo umumanyani babo yo bakamughanagha,  loli bakennya ukuti batagha sona ulusubilo lwabo. (Luka 24.17-21) U Yesu akati azyuka bulo, akasenda akabalilo ukuti abavwe ukwivwisya ubudindo bo alinabo pakukwanilisya amabuchimi gho ghali mu Bayibolo. Ukufuma apo akabapa imbombo iyakulondiwa sana. (Luka 24.26, 27, 45-48) Pakati pendapo amasiku 40 ukufuma po u Yesu akakwelela kumwanya, ichitima cho abamanyili bache bakaba nacho chikasinta nukuba lusekelo. Bakaba bakuhoboka sana, chifukwa bakamanya ukuti u Yesu ali nu bumi sona wakwisengannya ukubavwa ukuti bakwanilisye imbombo yo akabapa. Ulusekelo lo bakaba nalo lukabapangisya ukuti babukilile ukumupala u Yehova ukusita ukuleka.—Belenga Luka 24.52, 53; Imbombo 5.42.

16. Ka tungabayezya buli-buli abamanyili ba Yesu?

¹⁶ Ka tungabayezya buli-buli abamanyili ba Yesu? Tungaba swe bakuhoboka pala tukumwiputa u Yehova akabalilo kosi, tutakamwiputaye pene po tukukumbukila imfwa iya Yesu. Ukuti tukwanisye ukupanga ivi, tukulondiwa ukubika Ubumwene ubwa Chala pabwandilo pabumi bwitu. Abantu bamo basintite indondomeko yabo iyakumbombo, ukuti babe na kabalilo akakukwana akakulumbilila, ukwaghiwapo pa nkomano sona ukuti baghiwengepo akabalilo kosi pakwiputa ukwa pa mbumba. Bamo basalite ukuti batakabe ni chuma ichingi, umwakuti akabalilo kabo kosi bamalilaghe pa vintu ivya Bumwene, sona ukuti basamukile kuvipanga vyo vikulondiwa abalumbilili abinji. U Yehova alaghizizye ukuti akwiza pakutusaya nanti tukubukilila ukubika ivintu ivya Bumwene pa bwandilo pabumi bwitu sona pala tukubukilila ukujimba ukuti tumubombele.—Mbupi. 10.22; Mat. 6.32, 33.

17. Nkimba mwasimikizya ukwiza pakubomba ichoni pakabalilo akakukumbukila imfwa iya Yesu? (Ennya ichituzi.)

¹⁷ Tukulindilila umwakuhoboka ukuti twize tukumbukile imfwa iya Yesu Pachibili Epulelo 4. Loli tutakulindilila ukuti isiku ili lize likwane tasi, po twize twande pakwinong’onela ulughano lo u Yehova nu Yesu bakutulangizya. Nanti kwasyala amasabata ghanandi bulo ukuti tupange ulukomano ulwa kukumbukila imfwa iya Yesu, tubaghiye ukwinong’onelapo ivya lughano lo u Yehova nu Yesu bakatulangizya. Pala twapanga ulukomano ulu, tukulondiwa ukubukilila ukwinong’onelapo ivya lughano lo batulangizizye. Tupatulaghe akabalilo akakubelenga nu kwinong,onelapo ivyakukwafannya nichakubombi ichi vyo vili mu tchati ilyakuti: “Sabata Yaumaliro kwa Yesu pa Charu Chapasi,” vyo vikwaghiwa pa Vyakusazgirapo B12 mu Mang’anamuliro gha Chalu Chiphya. Pala mungabelenga inkani izyakukwafannya nu bumi ubwa Yesu izi, inti mughomye ulughano lwinu sona zingabavwa ukuti mujimbe nukuba mwe bakuhoboka. Yezya ukwinong’onelapo izila izya mo mungalangizizya ukuti mukupalizya ukufuma pasi pa moyo. U Yesu akupalizya sana vyosi vyo mukubomba pakabalilo aka lukomano ulwa Kukumbukila imfwa yache.—Ubv. 2.19.